Paruru Anga i to Tatou Akatakaanga ei Kerititiano

“Te tuatua mairā Iehova, Ko kotou toku kite.”​—ISAIA 43:10.

1. Eaa te tu tangata ta Iehova e akatae maira kiaia uaorai?

ME AERE koe ki ko i te Are Uipaanga Patireia, e akara meitaki aere. Koai ma taau e kite ra i teia ngai akamorianga? Penei ka kite koe i te au mapu akono meitaki e akarongo marie ra ki te pakari o te Tuatua Tapu. (Salamo 148:12, 13) Penei, ka kite katoa koe i te au pu ngutuare e tauta ra i te akarekareka i te Atua ia ratou e noo ra i roto i tetai ao e taviivii ra i te oraanga ngutuare tangata. Penei ka kite koe i te aronga pakarikari akaperepereia, e akono ngaueue kore ra i ta ratou akatapuanga kia Iehova noatu te au tu makimaki o te tangata metuaanga. (Maseli 16:31) Te inangaro oonu ra ratou katoatoa ia Iehova. E kua tika iaia kia akatae mai ia ratou ki roto i tetai pirianga ma ia. “Kare te tangata e tae mai kiaku nei,” i akapapu mai ei te Tamaiti a te Atua, “mari ra kia akatae mai te Metua ko tei tono mai iaku nei iaia.”​—Ioane 6:37, 44, 65.

2, 3. Eaa ka riro ei ei akaaoanga i te tamou marie i tetai tu akatakaanga ketaketa ei Kerititiano?

² Kare ainei tatou e rekareka ana kia riro ei tuanga no tetai iti tangata tei rauka te arikianga e te akameitakianga a Iehova? Inara, e akaaoanga tikai te tamou marie anga i te tu akatakaanga ketaketa ei au Kerititiano i roto i teia “tuatau kikino tei ngata roa i te akono atu.” (2 Timoteo 3:1, NW) E tika roa teia no runga i te au mapu ou e utuutuia nei i roto i te au ngutuare tangata Kerititiano. “Noatu te tae ra au ki te au uipaanga Kerititiano,” i akakite ei tetai o taua au mapu ra, “kare oku au akakoroanga taka meitaki i te pae vaerua, ko te tika, kare oku inangaro papu tikai i te tavini ia Iehova.”

³ Tetai pae, noatu te inangaro tikai ra i te tavini ia Iehova, penei ka akaariu keia e te taomianga pakari a te au taeake, te au akakeuanga o teianei ao, e te au tu ara. Me akapakariia mai te taomianga ki runga ia tatou, penei ka akangere marie ua te reira ia tatou i to tatou akatakaanga ei Kerititiano. Ei akaraanga, te karanga ra te manganui i te ao i teia tuatau e kua taito me kore kare e tau ana te au turanga akono tau o te Pipiria i roto i to tatou ao i teia tuatau. (1 Petero 4:4) Te manako ra tetai pae e kare i te mea puapinga roa te akamori i te Atua na te mataara e akakite maira aia. (Ioane 4:24) I roto i tana reta ki to Ephesia, te tuatua ra a Paulo e e “vaerua,” me kore e tu ririnui to teianei ao. (Ephesia 2:2) Te akapakari ra taua vaerua ra i te taomianga ki runga i te tangata kia aru i te tu manako o tetai taiate kare i kite ia Iehova.

4. Akapeea a Iesu i te akaketaketa anga mai i te anoano no tatou kia paruru i to tatou akatakaanga taka meitaki ua ei Kerititiano?

⁴ Inara, ei au tavini akatapuia no Iehova, kua kite tatou e mea tumatetenga tikai no tetai ua atu ia tatou​—mapu me kore pakari​—kia ngere i to tatou akatakaanga ei Kerititiano. Ka rauka anake ua kia akanooia te tu akatakaanga tiratiratu ei Kerititiano ki runga i to Iehova au turanga e tana au tapapaanga no tatou. No te mea, i angaia tatou i tona tu. (Genese 1:26; Mika 6:8) Te akaaite maira te Pipiria i to tatou akatakaanga taka meitaki ua ei Kerititiano ki te au kakau, tei aaoia kia kiteaia mai e te katoatoa. No runga i to tatou au tuatau, kua akamatakite mai a Iesu: “I na, te aere atu nei au mei te keia ra. E ao to te tapapa e te tiaki marie i tona kakau, kia kore aia e aere taaka ua, e kua kite atura te tangata i tona akama.”a (Apokalupo 16:15) Kare tatou e inangaro i te kiriti i to tatou au tu Kerititiano e te au turanga no te tu akono e te akatika i to Satani ao kia akakeu ia tatou. Me ka tupu te reira, ka ngere tatou i teia “kakau.” Ka riro taua turanga ra ei mea mii tikai e te akama.

5, 6. Eaa i puapinga ai te turanga ngaueue kore i te pae vaerua?

⁵ Ka akakeu maata tikai te tu akatakaanga ketaketa ei Kerititiano i te mataara ka noo ei tetai i tona oraanga. Akapeea ra? Me ngere tetai tangata akamori o Iehova i tona tu akatakaanga taka meitaki ua, penei i te openga ka tatipa keia aia, ma te kore e mataara me kore e au akakoroanga akataka meitakiia. Te akamatakite putuputu maira te Pipiria i taua turanga ngakau rua ra. “Ko tei ekoko ra,” te akamatakite maira te pipi ko Iakobo, “e tau ïa i te ngaru tai e puia e te matangi, e tikitiki akera. Auraka oki te reira tangata e manako e, ka rauka tana i te Atu ei ngai mea ngiti ake: E tangata ngakau rua ïa, e te tinamou kore, i tona katoa ra au aerenga.”​—Iakobo 1:6-8; Ephesia 4:14; Ebera 13:9.

⁶ Akapeea tatou me paruru i to tatou akatakaanga ei Kerititiano? Eaa te ka tauturu ia tatou kia akameitaki maata atu i to tatou tu matakite no to tatou akameitakianga maata ei aronga akamori no Tei Teitei? E akamanako i te au mataara ka aru mai ine.

Akapapu ma te Ngaueue Kore i Toou Akatakaanga ei Kerititiano

7. Eaa ka puapingaia ai te pati akatenga kia Iehova kia unuunumou ia tatou?

⁷ E akapapu ua atu rai i toou pirianga ma Iehova. Ko te apinga puapinga maata roa atu a te Kerititiano koia oki ko tona pirianga uaorai ma te Atua. (Salamo 25:14; Maseli 3:32) Me akamata tatou i te tu i te au manako ekoko e te manamanata no runga i to tatou akatakaanga ei Kerititiano, e mea tau kia unuunumou tikai tatou i te puapinga e te oonuanga tikai o teia pirianga. Kua tau rai te pati akatenga a te tata taramo e: “E unuunumou mai koe iaku, e timata mai, e Iehova; e akamakitoro marie mai koe i toku manako e toku ngakau.” (Salamo 26:2) Eaa ra i puapinga ai taua tu unuunumou anga ra? No te mea kare tatou uaorai e tau ei au akava i to tatou uaorai au akakoroanga oonu e te au manako ngakau. Ko Iehova anake rai tei kite i to tatou ngakau tangata​—to tatou au akakoroanga, au manako, e te manako ngakau.​—Ieremia 17:9, 10.

8. (a) Akapeea te timata angaia e Iehova i te akapuapinga anga ia tatou? (e) Akapeea koe i te tauturu angaia kia tere ki mua ei Kerititiano?

⁸ Na te pati anga ia Iehova kia unuunumou ia tatou, te pati ra tatou iaia kia timata ia tatou. Penei ka akatika aia kia tupu te au turanga e akaari maira i to tatou au akakoroanga e te turanga tika tikai o te ngakau. (Ebera 4:12, 13; Iakobo 1:22-25) E mea tau kia ariki tatou i taua au timataanga ra no te mea te oronga maira te reira i tetai tuatau no tatou kia akaari i te oonuanga o to tatou tu tiratiratu kia Iehova. Ka akaari mai tera e me e ‘meitaki rava tatou, ma te apa kore, kare e ape toe.’ (Iakobo 1:2-4) E i te rave anga i te reira, ka tupu tatou i te pae vaerua.​—Ephesia 4:22-24.

9. E ikianga ainei ta tatou no runga i te akapapu anga i te tuatua mou o te Pipiria kia tatou uaorai? E akamarama mai.

⁹ Akapapu i te tuatua mou o te Pipiria kia koe uaorai. Ka riro to tatou tu akatakaanga ei au tavini no Iehova i te akaparuparu ia tatou me kare te reira i akatinamouia ki runga i te kite o te au Tuatua Tapu. (Philipi 1:9, 10) Ka anoanoia te au Kerititiano ravarai​—mapu pera te pakari​—kia akapapu kiaia uaorai e ko tana e irinaki ra ko te tuatua mou tikai tei kiteaia i roto i te Pipiria. Kua raurau a Paulo i te au taeake akarongo kia: “Akara matariki marie i te au mea katoa ra; e te meitaki ra e tāpu marie.” (1 Tesalonia 5:21) Ka tau kia kite te au mapu Kerititiano ou no te au ngutuare tangata e mataku ra i te Atua e kare e rava kia irinaki ua ratou ki te akarongo o to ratou nga metua. Kua ako a Davida, to Solomona uaorai metua iaia kia “kite pu koe i te Atua o to metua nei, ka akamori ei iaia ma te ngakau tiratiratu.” (1 Paraleipomeno 28:9) Kare e rava ua no te mapu ou ko Solomona kia akara e akapeea tona uaorai metua i te akatupu anga i te akarongo i roto ia Iehova. Ka anoanoia aia kia kite tikai ia Iehova nona uaorai, e kua pera rai aia. Kua pati akatenga aia ki te Atua: “O mai ana i tenana i te pakari e te kite kiaku nei, kia aere au ki vao e kia oki mai ki roto ki mua i te aroaro o teianei aronga tangata.”​—2 Paraleipomeno 1:10.

10. Eaa i kore ei te ui anga i te au uianga tiratiratu ma te akakoroanga tau i te mea tarevake?

¹⁰ I patuia te akarongo ketaketa ki runga i te kite. “Na te kite mari e raukaʼi te akarongo,” i akakite ei a Paulo. (Roma 10:17) Eaa te aite anga o tana tuatua? Tana aiteanga koia oki na te utuutu angaia ki te Tuatua a te Atua, ka akaketaketa tatou i to tatou akarongo e te irinakianga i roto ia Iehova, tana au taputou, e tona akaaerenga. Ka taki atu te ui anga i te au uianga tiratiratu no runga i te Pipiria ki te au pauanga akapumaana. Pera katoa, ka kite tatou ia Roma 12:2, i te ako a Paulo: “Kia taka tikai ia kotou i to te Atua ra anoano, tei meitaki, e te tau, e te apa kore oki.” Ka akapeea ra e rauka ai ia tatou te reira? Kia rauka mai ei te “āriki i te tuatua-mou.” (Tito 1:1) Na te vaerua o Iehova e tauturu ia tatou kia marama i te au tumu manako ngata. (1 Korinetia 2:11, 12) Kia pure tatou no te tauturu a te Atua me rokoia tatou e te au manamanata i te marama anga i tetai apinga. (Salamo 119:10, 11, 27) Te inangaro maira a Iehova kia marama tatou i tana Tuatua, kia irinaki i te reira, e kia akono i te reira. Ka ariki ua mai aia i te au uianga tiratiratu tei uiia ma te akakoroanga tau.

E Akakoro Tikai i te Akarekareka i te Atua

11. (a) Eaa te anoano natura ua te ka akaereere ia tatou? (e) Akapeea tatou i te akatupu anga i te maroiroi kia patoi atu i te taomianga mei te au taeake?

¹¹ E umuumu i te akarekareka i te Atua, auraka te tangata. I tetai tu e mea natura ua i te akapapu i to tatou tu akatakaanga na te piri anga ki tetai pupu. Te anoano nei te katoatoa i tetai au oa, e e mea mareka na tatou kia arikiia mai. I te mapu anga​—pera i te oraanga i muri mai​—e pakari tikai te taomianga a te taeake, i te akatupu anga i te anoano maata kia aru e kia akarekareka i etai ke. Inara kare tikai te au oa e te au taeake e kea mai ana i toou au anoano puapinga. Tetai au taime te inangaro ua ra ratou i tetai tangata kia piri atu kia ratou i te rave i te mea tarevake. (Maseli 1:11-19) Me tuku ua atu tetai Kerititiano ki te taomianga tau kore, e mea matauia e ka tamata aia i te uuna i tona akatakaanga. (Salamo 26:4) Kua akamatakite mai te apotetoro ko Paulo e “Auraka e akaaite ia kotou uaorai ki te ao e takapini ra ia kotou.” (Roma 12:2, The Jerusalem Bible) Na Iehova e oronga mai i te maroiroi o roto ta tatou e anoano ra i te tamaki atu i tetai ua atu taomianga o vaoo kia aru atu.​—Ebera 13:6.

12. Eaa te kaveinga e te akaraanga te ka akaketaketa ia tatou kia ngaueue kore i to tatou irinakianga i roto i te Atua?

¹² Me te tamataku maira te taomianga o vao i te takino i to tatou tu akatakaanga ei Kerititiano, e mea meitaki kia akamaara e e puapinga maata roa atu to tatou tu tiratiratu ki te Atua i te manako o te tangata me kore i te kaveinga o te maataanga. Ka riro te au tuatua a Exodo 23:2 ei kaveinga tau: “Auraka koe e aru i te urupu tangata i te kino.” I te ekoko anga te maataanga i te au oa ngati Iseraela i to Iehova mana kia akatupu i Tana au taputou, kua patoi pakari a Kaleba i te aru i te maataanga. Kua papu iaia e e tika tikai te au taputou a te Atua, e kua akameitaki maataia aia no tona turanga. (Numero 13:30; Iosua 14:6-11) Mei te reira ainei toou tu puareinga ua i te patoi i te taomianga o te manako matauia i te paruru anga i toou pirianga ma te Atua?

13. Eaa i riro ei te akakite anga i to tatou akatakaanga ei au Kerititiano ei arataa pakari?

¹³ E akakite i toou tu akatakaanga ei Kerititiano. E tika rava te tuatua e, ko te paruru anga meitaki rava atu ko tetai akakino anga meitaki ia ia tatou e paruru ra i to tatou akatakaanga. I te aro anga atu i te patoianga no ta ratou au tautaanga kia rave i te anoano o Iehova i te tuatau ia Ezera, kua akakite te au ngati Iseraela tiratiratu e: “E tavini oki matou no te Atua o te rangi e te enua.” (Ezera 5:11) Me rokoia tatou e te au patoianga e e te akaapaanga a te au tangata makitakita, ka apikepike ua tatou i te mataku. Me titau ua rai tatou i te akarekareka i te katoatoa ka akaparuparu te reira i to tatou tu puapinga. No reira auraka e mataku. E mea meitaki ua rai i te akakite taka meitaki ki etai ke e ko koe tetai o te Au Kite o Iehova. Na roto i te mataara akangateitei e te ngaueue kore, e akamarama ki etai ke no runga i toou au tu puapinga, toou irinakianga, e toou turanga ei Kerititiano. Akakite ki etai ke e kua iki koe kia akono marie i to Iehova au turanga teitei no runga i te au maroanga o te tu akono tau. Akataka meitaki e ko toou turanga apa kore e mea tinamou tikai te reira. Akaari e e mea ngakau parau naau toou au turanga akono tau. (Salamo 64:10) Ka riro te tu takake anga ei Kerititiano ngaueue kore ei akaketaketa ia koe, ei paruru ia koe, e ei akakeu katoa i etai ke kia ui no runga ia Iehova e tona iti tangata.

14. Ka tau ainei kia tuku tatou i te aviri e te patoianga kia akaapikepike ia tatou? E akamarama mai.

¹⁴ Ae, penei ka aviri me kore ka patoi tetai aronga ia koe. (Iuda 18) Me kare etai ke e ariu meitaki mai ki taau au tautaanga i te akamarama i toou au tu puapinga kia ratou, auraka e taitaia. (Ezekiela 3:7, 8) Noatu taau akapapu anga, kare rava e rauka ia koe te akakeu i te aronga kare e inangaro ana kia akakeuia. Akamaara ua ia Pharao. Kare te mate me kore te temeio​—e kare katoa te ngereanga uaorai i tana tama mua​—i akakeu ana ia Pharao e te tuatua ra a Mose no Iehova. No reira, auraka e akatika i te mataku i te tangata kia akaapikepike ia koe. Ka tauturu te irinakianga e te akarongo ia tatou kia autu i te mataku.​—Maseli 3:5, 6; 29:25.

Akara ki te Tuatau i Topa, Patu no te Tuatau ki Mua

15, 16. (a) Eaa to tatou tuanga pae vaerua? (e) Akapeea tatou e puapingaia ai mei te akamanako anga i to tatou tuanga pae vaerua na te taangaanga anga i te Tuatua a te Atua?

¹⁵ Akaperepere i taau tuanga pae vaerua. Na te taangaanga anga i te Tuatua a te Atua, ka puapingaia te au Kerititiano mei te manakonako anga i to ratou tuanga puapinga maata i te pae vaerua. Te kapiti maira teia tuanga i te tuatua mou o te Tuatua a Iehova, te manakonakoanga o te ora mutu kore, e te akameitakianga kia tu no te Atua ei aronga tutu i te tuatua meitaki. Te kite ra koe i toou ngai i rotopu i tona Au Kite, i roto i te pupu tangata akameitakiia tei akamanaia no te angaanga akaora o te tutu anga i te Patireia? E akamaara, e ko Iehova tikai te akapapu maira e: “Ko kotou toku kite.”​—Isaia 43:10.

¹⁶ Ka rauka ia koe i te ui kia koe uaorai i teia au uianga: ‘Mei teaa ra te puapinga maata o teia tuanga pae vaerua kiaku? Te rava ra ainei taku akateitei anga i te reira kia riro te rave anga i te anoano o te Atua ko te mea maata roa atu i roto i te oraanga? E maroiroi ainei toku arikianga rekareka i te akaketaketa iaku kia patoi i tetai ua atu timataanga te ka arataki iaku kia akaruke i te reira?’ Ka rauka katoa i to tatou tuanga pae vaerua i te akaki ia tatou ki te tu tinamou oonu i te pae vaerua te ka rekarekaia i roto anake ua i to Iehova akaaerenga. (Salamo 91:1, 2) Ka riro te akamanako akaou anga i te au tupuanga umere mei te tuatua enua o to Iehova akaaerenga i teia tuatau i te akaketaketa mai kia tatou e kare e tangata me kore e apinga e rauka kia takore i to Iehova iti tangata mei te enua nei.​—Isaia 54:17; Ieremia 1:19.

17. Eaa atu te anoano maataia ra i to te irinaki ua ki runga i to tatou tuanga pae vaerua?

¹⁷ E tika, kare e rauka ia tatou kia irinaki ua ki runga i to tatou tuanga pae vaerua. Ka anoanoia tatou tataki tai kia akatupu i tetai pirianga vaitata ma te Atua. I muri ake i to Paulo angaanga pakari anga i te akamaroiroi i te akarongo o te au Kerititiano i Philipi, kua tata atu aia kia ratou: “E tenana, e aku au akaperepere e, kare akenei kotou i tivata i te akono, kare ra iaku anake i noo ki o kotou na, kua maata ra iaku i takake io nei, e rave akaoti ua i to kotou uaorai ora ma te mataku e te rutetetete.” (Philipi 2:12) Kare e rauka ia tatou kia irinaki ki runga i tetai ke no to tatou ora.

18. Akapeea te au angaanga Kerititiano i te akameitaki maata atu anga i to tatou tu akatakaanga ei Kerititiano?

¹⁸ Akapiri atu ia koe uaorai ki roto i te au angaanga Kerititiano. Kua kiteaia ana e “e akakeuanga pakari tikai to te angaanga ki runga i te akatakaanga uaorai o tetai.” Kua akamanaia te au Kerititiano i teia tuatau kia rave i te angaanga puapinga o te tutu anga i te tuatua meitaki o te Patireia akatumuia o te Atua. Kua akakite a Paulo: “Te akameitaki nei au i taku taoonga, no te mea ko au te aposetolo a te etene.” (Roma 11:13) Te akataka ke ra ta tatou angaanga tutu anga ia tatou mei teianei ao, e kua riro to tatou pirianga atu ki te reira i te akameitaki maata atu i to tatou akatakaanga Kerititiano. Te piri anga tatou uaorai ki tetai atu au angaanga teokaratiki, mei te au uipaanga Kerititiano, te au porokaramu no te patu i te au ngai akamorianga, te au tautaanga kia tauturu i te aronga i ngere, e te vai atura, ka riro ei akaoonu atu i to tatou tu akatakaanga ei au Kerititiano.​—Galatia 6:9, 10; Ebera 10:23, 24.

Akatakaanga Taka Meitaki, e Au Akameitakianga Tikai

19, 20. (a) Eaa te au puapinga taau uaorai i reka ei Kerititiano? (e) Eaa te oronga maira kia tatou i te tumuanga tikai no to tatou akatakaanga mou?

¹⁹ E akamanako ana no tetai atianga i te au puapinga e te au mea meitaki e manganui e rekareka nei tatou no te mea e au Kerititiano mou tatou. E akameitakianga tikai to tatou e te ariki maira a Iehova uaorai ia tatou. Kua tuatua te peroveta ko Malaki: “I reira te aronga i mataku ia Iehova i te tuatua putuputu anga ki tetai ki tetai: e kua akarongo mairā Iehova, e kua kite e kua tataia iora tetai buka manakoanga ki mua iaia, no te aronga e mataku ia Iehova, e tei manako i tona ra ingoa.” (Malaki 3:16) Ka kite mai te Atua ia tatou ei au oa nona. (Iakobo 2:23) Kua akapuapinga maataia to tatou oraanga e te tu taka meitaki o te akakoroanga, te aiteanga oonu, e e te au akakoroanga tau, e te uua. E kua orongaia mai te manakonakoanga o te tuatau mutu kore ki mua.​—Salamo 37:9.

²⁰ E akamaara e ko toou akatakaanga mou e te puapinga tei runga ia i ta te Atua akava anga i to tatou puapinga tikai, kare i ta tetai tangata ua atu e manako ra. Penei ka akava mai etai ia tatou kia tau ki te au turanga tau kore o te tangata. Inara na te aroa e te inangaro uaorai o te Atua e oronga mai i te tumuanga tikai no to tatou tu puapinga​—nona oki tatou. (Mataio 10:29-31) Aru mai, na to tatou inangaro i te Atua e oronga mai kia tatou i te tu akatakaanga maata roa atu e te aratakianga taka meitaki i roto i to tatou oraanga. “Te inangaro ra tetai tangata i te Atua, koia tei kiteia mai e ia.”​—1 Korinetia 8:3.

[Tataanga Rikiriki i Raro]

Maara Ainei ia Koe?

• Eaa i puapinga ai no te au Kerititiano kia paruru i to ratou akatakaanga pae vaerua?

• Akapeea tatou i te akapapu anga ma te ngaueue kore i to tatou akatakaanga ei Kerititiano?

• Me aro atu i te uianga e koai ta tatou ka akarekareka, eaa te au tumu te ka tauturu ia tatou kia rave i te au ikianga tau?

• Akapeea te tu akatakaanga ketaketa ei Kerititiano i te akakeu anga i to tatou tuatau ki mua?

[Au Tutu i te kapi 21]

Ka riro te akapirianga ia tatou uaorai ki roto i te au angaanga Kerititiano i te akapuapinga maata atu i to tatou akatakaanga ei Kerititiano