Te Maara ra Ainei ia Koe?

Kua ariki ainei koe i te tatauanga i te au itiu i ou akenei o Te Punanga Tiaki? Ka akara ana me ka rauka ia koe i te pau i te au uianga te ka aru mai:

• Ia Roma 5:​3-5, eaa ra te apotetoro ko Paulo i akapapa ei i te manakonakoanga e ko te mea openga ia?

Kua akakite mai a Paulo i te au papaanga o te au mea ka kite te au Kerititiano​—te tumatetenga, te akakoromaki, te tu marekaia, e te manakonakoanga. Ko teia “manakonako anga” kare e ko te manakonakoanga mua ka rauka i tetai mei te Pipiria, inara ko tetai manakonakoanga akaketaketaia ra, akaoonuia ra, e te totoa ra ka rauka i tetai Kerititiano e tere atu te tuatau.​—12/15, kapi 22-3.

• Eaa ra tetai Kerititiano i teia tuatau ka inangaro ei i te kite no runga i te au tarekareka maroiroi i Ereni taito?

Te maramaanga no runga i te tu e te au peu o taua tarekarekaanga ka akataka mai i te au irava Pipiria e manganui. Tetai o te reira te taiku ra ki te ‘akonoanga i te ture,’ ‘kopaeanga i te au mea teiaa ravarai e te akara tamou kia Iesu,’ ‘kua oti te oro anga,’ e te raukaanga te korona, me kore te tutaki anga. (2 Timoteo 2:5; 4:​7, 8; Ebera 12:​1, 2; 1 Korinetia 9:​24, 25; 1 Petero 5:4)​—1/1, kapi 28-30.

• Eaa te mataara ou no te akakite anga i te tuatua meitaki tei akamataia ia Tianuare 1914?

Kua tukunaia te “Nuku Teata o Tei Angaia.” Tei roto i te reira e a tuanga oronga anga te kapiti maira i te au tutu ta tuanga ia e te au tutu tere e au anere ua atu, te maata anga o teia kua akatanoia me kore te kapiti ra ki te au rekoti anga ponikarapu o te au tuatua akamarama anga. Kua maaniia e rua ngauru o teia Nuku Teata e te taangaangaia ra no te apii ki te tangata i te tuatua a te Pipiria.​—1/15, kapi 8-9.

• Eaa te tuke i te Pupu Akaaere mei te taokotaianga i te pae ture?

Koi votiiai te au akaaere o te taokotaianga i te pae ture ki roto i te opati e tona au mema, kare i akataoongaia te Pupu Akaaere e tetai tangata mari ra kua akataoongaia e Iesu Karaiti. Kare e anoanoia tetai o te au akaaere o te au taokotaianga tukeke tei taangaangaia e te Au Kite o Iehova ei au mema no te Pupu Akaaere. I te uipaanga mataiti i ou akenei a te Taiate Punanga Tiaki Pipiria e te Pepa o Pennsylvania, kua akaruke puareinga ua te au mema o te Pupu Akaaere tei tavini ana ei au akaaere e e au opita i to ratou au taoonga. Kua monoia taua ngai e te au taeake pakari o te “mamoe ke atu.” (Ioane 10:16) No reira ka rauka i te Pupu Akaaere te akapou maata atu i te tuatau i roto i te akapapaanga i te kai pae vaerua e te akonoanga i te au anoano anga i te pae vaerua no te au taeake i te ao katoa.​—1/15, kapi 29, 31.

• Eaa nga akaraanga Pipiria e rua ka rauka ia tatou te akara meitaki i te apiianga e akapeea me autu i te akamaroiroi kore?

Tetai no Hana, te metua vaine o Samuela. Ka rauka ua iaia i te akatika iaia uaorai kia akamaroiroi koreia i te manako tarevakeia anga aia e Elia, te taunga maata o Iseraela. Mari ra, kua tuatua tika atu aia ma te ngateitei i te au tika kiaia. Pera katoa, kare a Hana i akamoupuku ana ia Elia. Te rua ko Mareko, penei kua akamaroiroi koreia i te mea kare te apotetoro ko Paulo i kapiti atu iaia ki roto i tana tutaka anga mitinari. Koi kore ei i taitaia maata no te ngere anga i teia akameitakianga, kua rave maroiroi ua atu aia i tana angaanga, te teretere anga raua ko Banaba.​—2/1, kapi 20-2.

• Eaa ra te au Kerititiano ka matakite ei no te orongaanga ki tetai, me kare te raukaanga mai mei ia ratou, te au kopi o te au porokaramu software komopiuta?

Kua akonoia te maata anga o te au porokaramu komopiuta (kapiti mai te au kangakanga) e te raitini te kotinga ra i te ona/tei taangaanga ra no te tuku anga i taua porokaramu ki runga i tetai komopiuta. Tei matauia e aati anga i te ture kopi te rave anga i te au kopi na tetai ke, noatu me te oronga ua ra tatou i te reira. Ka inangaro te au Kerititiano i te akarongo i te ture, ‘ka apai i ta Kaisara kia Kaisara.’ (Mareko 12:17)​—2/15, kapi 28-9.

• Koai ma a Cyril raua ko Methodius, e eaa te tauturu anga ta raua i rave no te apii anga i te Pipiria?

E nga teina tuakana raua tei anauia i Tesalonia, i Ereni, i te iva anere mataiti. Kua maani raua i tetai papaanga tataia no te au reo Slavic e kua uri i te katoa anga o te Pipiria ki roto i te reo Slavic.​—3/1, kapi 28-9.

• Eaa te aiteanga o te tuatua “akono i ta te Vaerua ra”?​—Roma 8:6.

Ko te aite anga kia akaaereia, kia tutaraia, e kia akakeuia e te mana ririnui o Iehova. Ka rauka ia tatou te tuku e kia angaanga to te Atua vaerua ki runga ia tatou na te tatauanga e te apiianga i te Pipiria, na te akarongo anga ma te ngakau katoa i ta te Atua ture, e na te pureanga i to te Atua vaerua.​—3/15, kapi 15.

• Eaa ta tatou ka rave me manako tarevakeia tatou?

E mea puapinga kia akataka i taua manako ra na roto i te tu aroa. Me kare te reira e manuia, auraka e taitaia. E pati i te marama e te tauturu mei ko mai ia Iehova, tei ‘kimi matatio rā i te ngakau.’ (Maseli 21:2; 1 Samuela 16:7)​—4/1, kapi 21-3.