Ka Rekareka Ainei Koe ma te Maata no te Rave?

TE MAATA anga ia tatou te arataki ra i te au oraanga angaanga ua, e te maata anga o te taime e rapurapu ua. Te anoanoia e no te au taomi anga o te oraanga o teia tuatau nei e kia tuku putuputu tatou i te tauta no te rave tamou atu. Kia aravei atu te au tane e te au metua tane i te au apainga teiaa ki to ratou au ngutuare tangata, au pu angaanga, e tetai pae atu. Kia akono te au vaine e te au metua vaine i to ratou au anoano i te pae o te ngutuare e to ratou au ngutuare tangata e i te maata anga o te taime te anoanoia ra kia angaanga i te ngai angaanga. Pera katoa te aronga mapu tei raro ratou i te taomi anga i te rave tamou atu anga i ta ratou au apainga i roto i te ngutuare tangata koi apii ei kia rauka tetai apiianga te ka akateateamamao ia ratou no tetai apainga uua i roto i te totaiete.

Inara akapeea ia tatou tei akatapu i to tatou oraanga ki te Atua ko Iehova e ei au Kite papetitoia nona? Tei tapiri atu ki te au maro anga ke ravarai atu i runga ia tatou, tei ia tatou teia tuatua ako a te apotetoro ko Paulo: “E teianei, e aku au taeake akaperepere e, kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.” (1 Korinetia 15:58) Ae, e tuanga te au apainga e manganui tei kapitiia mai no te umuumu anga o te akamori anga mou. Akapeea ra e raukaʼi ia tatou i te akatupu i teia au apainga pouroa e kia rauka te manako au e tetai akaraanga rekareka?

Apai Mai te Akatupuanga i te Rekareka

Te rekareka​—e manako ngakau meitaki me kore merengo anga—​te piri vaitata ra ki te tu manuia o te rauka anga i te rave i te au apainga o te oraanga. Me ka rauka ia tatou i te aravei i to tatou au apainga na roto i te tu tau e te viviki, te raveanga i te au mea i te tuatau tau e na roto i tetai mataara mako, ka rauka i reira ia tatou te manako akatupuanga e te merengo anga. Ko te reira tikai te mataara e tau ei, e ka tupu mai i reira te rekareka kia tatou.

Kare rava te Atua ko Iehova i inangaro ana e kia riro ta tatou raveanga i te au apainga ei manamanata kino. Mari ra, ko tona anoano mei mua mai no tatou e kia ‘rekareka e kia kite i te meitaki i ta tatou au angaanga maata ravarai.’ (Koheleta 3:12, 13) Me rekareka tatou i ta tatou angaanga, te maata anga o te taime te uua ra tatou. Ka papa ua tatou i te rave i te au ikuiku anga e te rave atu ma te au ki tetai atu pae. I tetai tua, me kare ra tatou e rekareka ana, ka riro i reira ta tatou angaanga ei mea reka koreia​—ei mea taokioki e te maromaroa pera katoa kua teiaaia i te pae o te manako ngakau. Ka arataki atu teia ki tetai au tu angaanga uua kore e ka tupu te manako papu kore. Ka riro te oraanga ei putoto anga i te au ra ia tatou e tauta ra te aravei i te au maro anga ravarai tei runga ia tatou. Inara, me ka rauka ia tatou i te kimi i tetai mataara e vai rekarekaʼi tatou i ta tatou raveanga ra, ka riro i reira tatou kia kite i tetai tutakianga e te tutupuanga i te mataara o te oraanga.

Kia Tau Ua

Me te rekareka ra tatou noatu e e maata ta tatou ka rave, te anoano ia ra ratou kia tau ua. E eaa te tau ua? Koia oki ko te “tu tau o te manako e te manako ngakau.” Ka tauta tetai peretana tau ua kia mako aia i tana au raveanga. Ka akapapa aia na mua ake, ka kopae e te vao anga a tetai taime, e te mako tikai i te au tu. Ka akaari aia i te tu akaaere iaia uaorai i roto i te kai, te apinga inu, te tarekareka anga, te au mea inangaro i te rave, e te au tamataora anga. E tikai, ka akaari aia i te tu “akaaere iaia uaorai i roto i te au mea ravarai”!​—1 Korinetia 9:24-27, NW; akaaiteia atu kia Tito 2:2.

E apainga puapinga ta te pure i roto i te rave tamou anga i te tu tau o te Kerititiano. Ka rauka i tetai tavini o Iehova i te pure no te vaerua tapu o te Atua e no to te Metua tauturu i te rangi na te tatanuanga i tona ua, kapitiia atu te akaaere iaia uaorai. (Luka 11:13; Galatia 5:22, 23) E tikai kia akara tetai Kerititiano ki te Atua na roto i te pure me tupu ake te au timata anga te ka takino e te tamanata i tona tu tau ua. “E uri atu i to aerenga ki runga ia Iehova; e irinaki iaia, e nana e akatupu i te reira,” i tuatuaʼi te tata salamo ko Davida. (Salamo 37:5) Penei i tetai taime ka anoanoia tatou kia pure mei ta Davida i rave ra i tona pati anga: “Ko au nei ra, kua tumatetenga au, e te putaua; kia ngakoikoi mai koe kiaku, e te Atua: ko koe toku tauturu e toku ora; auraka e tavare, e Iehova.” (Salamo 70:5) Auraka e akangaropoina e na roto i te pure ka rauka te tu tau ua i te rave tamouia e kia rekareka ‘i te au o te Atua, ko tei maata atu i te au kite ravarai e te paruru ra to tatou ngakau e to tatou manako.’​—Philipi 4:6, 7.

No te mea te irinaki ra aia ki runga ia Iehova e te rekareka ra i te au no te Atua, te mako meitaki ra tetai Kerititiano tau ua i te pae o te manako. (Tito 2:11, 12) Te aere maira teia mei te rauka anga tetai maramaanga meitaki o te au kaveinga Puka Tapu e na te taangaanga anga ia ratou i roto i tona oraanga. Ko teia peretana nei kare aia e rave pikikaa, kare katoa e rapurapu i te akava ua. Na te tu tau meitaki e akono iaia kia kore e manako ua iaia uoarai me kore te manako akateitei. Ka tamou ua rai i tetai manako tau meitaki iaia uaorai e tona au tu kite, e na teia e raukaʼi iaia i te taokotai atu ki tetai atu. (Mika 6:8) Ma te manako atu, te au tu te ka tauturu i tetai peretana kia tau ua tei rotopu katoa te reira i te au tu tei umuumuia e te aronga te ka akataoongaia no te tavini ei aronga akaaere i te putuputu anga Kerititiano.​—1 Timoteo 3:2, 3.

Ka rauka ia tatou i te kapiti maata atu ki to tatou rekareka anga na te tautaanga kia rauka te tu tau ua i ta tatou rave anga i te au ra. Na te akaarianga i te au tu tei piri atu ki te tu tau ua o te meitaki, ka rauka ia tatou i te rave i te au mea anoanoia ma te kore e mamae pakari i te pae o te kopapa me kare te manako ngakau. Ka akaata i reira to tatou tu oraanga i te tu mako maata, e ka rauka ia tatou i te rave maata atu. Ka kite tetai pae atu i te mareka anga maata i to tatou pirianga taokotai, e ka kite tatou i te merengo anga maata e te rekareka. Inara eaa etai au mataara taangaangaia no te rave tamou i te tu tau ua?

Au Mataara Taangaangaia no te Rave Tamou i te tu Tau Ua

E raukaʼi i te rave tamou i te tu tau ua, kia tauta tatou kia viviki e te akaaereia i te raveraveanga i ta tatou au mea na tatou uaorai. Ka anoanoia tatou kia parani i mua ake ana, te akonoanga i te au mea na te tu mako, e te tu akatereia. Te aronga e ngere ra i te akaaere anga meitaki e te rave ua ra i te akaruke a tetai taime ka akamako kore ua rai ratou i to ratou au oraanga ma te akamaata anga i te turanga ketaketa e te roiroi. Na te manuia anga i te teia ngai o te oraanga e tauturu ia tatou kia manako e ko tatou te akaaere ra kare i te manakoanga e e aronga puapinga kore i te au turanga.

Auraka rava tatou e tauta i te rave i te au mea ravarai ko tatou anake ua. Te aronga kare e inangaro ra i te ariki i te tauturu mei tetai pae te maata anga o te taime ka tutaki ratou i tetai tutaki teiaa o te roiroi pakari e te riririri. Te vaira te au angaanga tukeke te ka rauka kia akonoia e tetai pae atu. No reira, e mea pakari no te rave atu i te au tu kite o te aronga te inangaro ra i te oronga i tetai rima tauturu. I te pae i te akamama anga i ta tatou uaorai apainga, penei ka riro teia ei mea akamaroiroianga ki te aronga te inangaro ra i te piri vaitata kia tatou.

E mea pakari kore no te akaaite atu ia tatou uaorai ki te aronga penei ka rauka ia ratou i te rave e maata atu ia tatou. Te tautaanga kia riro mai mei te aronga tei maata atu ta ratou ka rauka, ka riro ia ei mea akamaroiroi kore, te akatupuanga ia tatou kia manako meangiti e te puapinga kore. Ko teia tu manakoanga e mea taukore ia, te akameangitianga i to tatou tu tauta e te papu uaorai. Kua tata a Paulo, “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.” (Galatia 6:4) Kia akamaara e, te tangata angaanga puapinga rava atu koia tei aru i te au ikuiku anga, te aere mako ra e te irinakiia, e te rave ra i te angaanga ma te tu tau meitaki. Me ko te reira to tatou tu, ka arikiia ta tatou rave angaanga e ka maroia mai.​—Maseli 22:29.

Ka anoanoia tatou kia akono meitaki i to tatou oraanga kopapa. Ko teia tetai o te au mea puapinga ravarai ia tatou, me kare teia e meangiti ua i reira ta tatou ka rauka i te rave. No reira, kia tauta tatou i te rave tamou i tetai akapapaanga kai oraora no te kopapa na te kaianga i te au kai akamatutu. Te tau ra kia rauka tetai tuatau akaangaroi anga ta tatou ka anoano, te aereanga i te moe i tetai ora tau i te po. Me roiroi pakariia tatou me kore te kite ra i te maki e aere maira, auraka rava tatou e tamou i te opara ia tatou uaorai; ka tutaki aea tatou i te tutaki teiaa.

E mea puapinga no te paruru atu i te akatupuanga i tetai vaerua koumuumu. Me tuku ua atu tatou ki te manako papu kore, ka kite ua rai tatou i tetai mea tarevake i roto i tetai mea me kare i tetai ua atu. E mataara papu teia te ka keia ia tatou e tetai pae i te rekareka. Auraka e urutoe me kore e koumuumu i ta tatou i manako e e tika, e akakite atu tatou i te reira ki te aronga na ratou te apainga no te raveraveanga i teia mea e te akaruke atu i te reira kia ratou no te akatikatika i te au mea. (Akaaiteia atu kia 1 Korinetia 1:10-12.) Te pakari ra tatou no te rave tamou i tetai akaraanga papu, te kimi ua anga e te tapapaanga i te akara i te meitaki i roto i tetai atu e i roto i te au raveanga te ka akatikatika i to tatou oraanga.​—Akaaiteia atu kia Iuda 3, 4, 16.

I te paranianga i ta tatou angaanga, kia akamaara tatou e penei ka tuku tetai takainga rapurapu i te rekoti teitei, inara kare te reira e rauka i te rave tamouia no tetai tuatau roa. Te akakeu anga tamou maata kare anake ua ia e arataki atu ki te tu roiroi pakari mari ra ka apai katoa mai i te tu akamaroiroi kore e ka akameangiti i to tatou tu tauta no te rave ua atu. Ei akaraanga, e mea meitaki no te akatango i tetai papaanga taangaangaia no te piri putuputu atu ki roto i te angaanga tutu aere mei tera are i tera are e tetai atu au tu angaanga orometua Kerititiano. Te anoanoia ra tatou kia tuku i tetai taime no te akaangaroi anga e te tamataoraanga e te akamaroiroi. E ka kite tatou i te puapinga no te tuatua atu ki te aronga ruaine tei ia ratou te au kite anga ie tai ngauru mataiti, penei kua kite ratou e akapeea tetai au mea anoanoia i te rave angaia ma te kore e akaroiroianga ia ratou uaorai i te pae kopapa me kore i te pae manako ngakau.

E Taangaanga i te Akava Anga Meitaki

E mea tau no te manako i tetai apainga e tetai anoano no te akatupu i ta tatou au apainga tei orongaia, kapiti te aronga i roto i te putuputu anga o te iti tangata o Iehova. Te mareka ra te Atua i te aronga aruaru i te angaanga, e te irinakiia. (Akaaiteia atu kia Mataio 25:21; Tito 2:11-14.) Inara te raurau ra te au Tuatua Tapu: “E akono ma te paruru i te pakari taangaangaia e te tu kite o te manako.” (Maseli 3:21, NW) Ka puapingaia tatou me taangaangaia te pakari o te Puka Tapu, e ka anoanoia tatou kia taangaanga i te tu kite e te akava anga meitaki, te raveanga i te au parani mako e te akono ua anga i roto i te kotinga o to tatou maroiroi.

Te aruaru anga e kia maata ta tatou e rave i roto i te angaanga a te Atu ra, kia tau ua te reira ki te akamatakite anga tei orongaia mai ia Koheleta 9:4. I reira ka tatau tatou: “E ngari ake to te puaka-aoa kia ora ra i to te liona kia mate.” Ae, noatu e ka akavaavaaia tetai puakaaoa ora e etai pae, e meitaki ake ia i tetai riona mate, e animara tei tamanakoia e te manganui e e ngateitei. Me taangaanga tatou i te tu tau ua e te akono meitaki i to tatou oraanga kopapa, ka ora i reira tatou e ka rauka i te rave ua atu i te au mea. Kare o tei mate ra kapiti anga i tetai ua atu angaanga. Ka tauturu te akava anga meitaki ia tatou kia kimi i tetai tu tau ua te ka tuku ia tatou kia rave i te au mea anoanoia kia tupu ma te kore e akangaro i to tatou rekareka.

No reira, te raukaanga kia maata i te rave kare te aiteanga e kare tatou e riro kia rekareka. Ka rauka te au tangata raverave rava atu kia riro mai e ko ratou te aronga mataora rava atu me te tau meitaki ra ratou, te rave tamou i tetai akaraanga memeitaki, e te taangaanga i tetai akava anga meitaki kia tamou i te tu tau ua e te meitaki. Ka kite tatou i te mataora maata te ka rauka me akaari tatou i te tu pakari, te rave i te au angaanga meitaki, e te tuku i to tatou manakonako anga ki te Atua ko Iehova.​—1 Timoteo 6:17-19.