E Tu Ketaketa i Roto i te Matara Anga o te Kerititiano!

Te au Akataka Anga a Galatia

KO IEHOVA te atua o te matara anga. (2 Korinetia 3:17) Kua tuatua tana Tamaiti, ko Iesu Mesia: “Ka kite ïa kotou i te tuatua-mou, e na te tuatua-mou kotou e akarangatira.” (Ioane 8:32) I te aru anga i te Mesia, kua tutu aere te apotetoro ko Paulo i te nuti meitaki no te matara anga.​—Roma 6:18; 8:21.

Na te akakitekite anga i te reira tuatua tei oronga mai i te matara anga, kua akatupu a Paulo i te au putuputuanga o Galatia (i te tuanga enua o Roma i Asia Minora) i te tuatau o tona tere angaanga evangeria mua (47-48 T.N.). Kua kite te au Galatia i te tukuanga a te pupu akaaere e kare te ravenga peritome e anoanoia no te au Kerititiano. (Angaanga 15:22-29) Inara te inangaro ra te aronga o Iuda no te apai mai ia ratou ki roto i te tapeka anga na te anoano anga e kia peritomeia ratou. No reira kua tuatua pakari a Paulo i te matara anga o te Kerititiano i tana reta i tata ki te au Galatia mei Korinetia me kore Suria Anetioka i te 50-52 C.E. Ei akaraanga, kua tuatua aia: “Ta te Mesia i akarangatira mai ia tatou nei, e auraka e ii akaou i te zugo tuikaa ra.”​—Galatia 5:1.

Paruru a Paulo i Tona Apotetoro Anga

Kua akaari a Paulo na mua i tona apotetoroia anga na roto ia “Iesu Mesia ra, e te Atua.” (1:1–2:14) No tetai akakiteanga, i aere ei a Paulo (ma Banaba e Tito) ki Ierusalema no runga i te uianga o te peritome. I reira kua kite a Iakobo, a Cepha (Petero), e Ioane e kua akamanaia aia ei tetai apotetoro ki te pa enua. E i muri mai te takake anga mai a Petero mei te au Etene tei irinaki ra i Anetioka no te mea kua mataku aia i te au Kerititiano ngati Iuda no Ierusalema mai, kua ako a Paulo iaia.

Akapeea te Akakiteia Anga e e Tuatua Tika?

Kua rave katoa te apotetoro i tetai manako pakari e na roto ua i te akarongo kia Iesu Mesia e raukaʼi i tetai ua atu kia akakiteia e e tuatua tika. (2:15–3:29) Kua rauka i te au Galatia te vaerua tapu o te Atua, kare e no te au angaanga o te ture, inara no te mea no te ariki anga i te nuti meitaki na roto i te akarongo. E akarongo to te au tamaroa mou a Aberahama, inara ko te au tangata e tauta ra i te akakite ia ratou uaorai ei aronga tuatua tika na roto i te “angaanga a te ture ra, kua taumaaia ïa.” Eaa ra? No te mea kare i rauka ia ratou i te akono i te Ture ma te apa kore. E tikai, na te Ture i akaari mai i te au tu ara e kua riro ei “arataki ia tatou ki te Mesia.”

E tu Ketaketa!

Na roto i tona mate, kua ‘okoia e te Mesia te aronga i raro ake i te ture.’ Inara kia tu ketaketa tona aronga tei aru iaia i roto i te matara anga o te Kerititiano. (4:1–6:18) No reira kua anoanoia te au Galatia kia patoi i tetai ua atu te tauta ra i te akavare ia ratou kia ariki i tetai tuko o te tuikaa anga. Te maata atu, kare ratou e tau kia takino i to ratou matara anga inara kia kopae i te “au angaanga a te kopapa” e te akaari i te au ua o te vaerua o te Atua. Te aronga te kimi ra i te apai mai ia ratou ki roto i te tuikaanga ki te Ture “te maani ra i tetai akaraanga tei marekaia i te tu kopapa,” (NW) ka kopae i te takinga kino, e te akapaapaa ra. Inara, kua akaari a Paulo e kare te peritome e tei kore i peritomeia i tetai mea. Mari ra, “tetai mea anga ouia e mea ia.” (NW) Kua pure aia no te au e te takinga meitaki kia tupu ki runga i te au Iseraela vaerua, te aronga o te au mea tei anga ouia.

Kua tauturu te reta a Paulo ki to Galatia kia kopae ratou i te kimianga kia tuikaaia ratou i te pae vaerua. Kia taturu katoaia tatou i te akaari i te au ua o te vaerua e te tu ketaketa i roto i te matara anga o te Kerititiano.

[Pia/​Tutu i te kapi 23]

Au Akairo: “E teianei, eiaa rava ei tangata e akapekapeka mai iaku,” i tataʼi a Paulo, “te apai nei au i te akairo a te Atu ra a Iesu ki runga i toku nei kopapa.” (Galatia 6:17) I rotopu i etai au etene i taito ra, kua akairoia te au tuikaa kia kiteaia to ratou pu. Kua tutungiia te au akairo tukeke me kore kua taraiia ki roto i to ratou pakiri e te kiko. Ma te ekoko kore, te au takino anga tei orongaia ki to Paulo kopapa no tana angaanga Kerititiano kua akaruke mai te reira i te au ira, te akakiteanga i tana tika e koia tetai tavini akono meitaki tei te Mesia, ko tetai tei takinga kinoia Nona. (2 Korinetia 11:23-27) Penei ko teia te au “akairo” ta Paulo i tuatua, me kore penei kua manako ana aia i te oraanga tana i noo ana ei Kerititiano, te akaari anga i te au ua o te vaerua o te Atua e te raveanga i tana angaanga orometua.

[Tutu]

Kua maroia te au tuikaa o Roma kia tavini i to ratou pu, inara kua anoano a Paulo e te rekareka kia riro ei tavini no Iesu Mesia