“E Akakore Tetai i ta Tetai Ara”

“E tauturu atu tetai ki tetai, e akakore tetai i ta tetai ara.”​—KOLOSA 3:13.

1. (a) I ta Petero tuatua anga e kia akakore tatou i te ara a etai ke ra “kia taki itu ua” penei eaa aia i manako ei e e tu maoraora tona? (e) Eaa te aite anga o ta Iesu i tuatua ra e ka tau tatou kia akakore i te ara kia “taki itu ra ngauru i te taki itu anga”?

“E TE Atu, kia putuputu taku taeake i te takinga-kino anga mai kiaku, kia takiia toku akakore anga i tana ara? kia taki itu aina?” (Mataio 18:21) Penei kua manako a Petero e e maoraora ua aia i tana manako anga. I taua tuatau ra, kua tuatua te ikuiku anga rapi e kare e tau tetai kia akakore i te ara kia tere atu i te toru taime no tetai apa anga okotai ra.a E tamanako ana i to Petero poitirere anga i ta Iesu pauanga: “Kare au e karanga atu kia koe e, Kia taki itu ua, Kia itu ra ngauru i te taki itu anga”! (Mataio 18:22) Te tuatua taoki anga i te itu te arite ra ki te tuatuaanga ei “mutu kore.” I to Iesu manako anga, kare e kotinga i te numero o te au taime tei tau ra tetai Kerititiano kia akakore i te ara a etai ke ra.

2, 3. (a) Eaa etai turanga penei ka akara anga ngata kia akakore i te ara a etai ke ra? (e) Eaa ka raukaʼi ia tatou kia irinaki e ei meitaki no tatou kia akakore i te ara a etai ke ra?

² Inara kare i te mea ngoie ua te akono anga i taua akoanga ra. Koai o tatou nei kare i rokoia e tetai ko anga tau kore ra? Penei ko tetai taau i irinaki ra kua akakite i tetai tuatua muna ra. (Maseli 11:13) Te tuatua vaa karea ua a tetai oa piri vaitata ra penei ‘kua koputaputa ia koe mei te koke ra.’ (Maseli 12:18) Te akono anga tau kore no ko mai i tetai taau i aroa ra me kare i irinaki ra penei ka akatupu i te au puta oonu. Me tupu taua au tu ra, ko to tatou manako ngakau matauia penei ka riri ua. Penei ka kore ua tatou e tuatua atu ki tei akariri maira ia tatou, ka kopae takiri atu iaia me ka rauka. Na te akakoreanga i tana ara, penei ka manakoia, e ka akatika ua iaia kia rave tamamae mai ia tatou. Inara, na te akamoupukuanga, ka riro ei tamamaeanga ia tatou uaorai.

³ E no reira kua apii maira Iesu ia tatou kia akakore ara​—“kia itu ra ngauru i te taki itu anga.” E tika tikai kare tana au apiianga e riro ei kino no tatou. Pouroa tana au apiianga i akamata mai ma Iehova ra, ‘ko Tei akakite ia tatou i te mea e puapingaʼi tatou uaorai.’ (Isaia 48:17; Ioane 7:16, 17) E mea tau e, ka tika ei meitaki no tatou kia akakore i te ara a etai ke ra. I mua ake ka uriuri manako ei tatou e eaa tatou ka tau ei kia akakore i te ara e akapeea e raukaʼi ia tatou kia rave i te reira, penei ka tauturu kia na mua tatou i te akataka e eaa te akakore anga ara e eaa kare ra i te reira. Penei na to tatou manako kite i te akakore anga ara e akatupu i to tatou tu karape kia akakore i te ara me ka akaririia mai tatou e etai ke ra.

4. Eaa kare i te aite anga no te akakore anga i te ara a etai ke ra, inara akapeea te akataka anga i te akakore anga ara?

⁴ Kare te aite anga o te akakoreanga ara a etai ke ra no ta ratou uaorai kino i rave e te turu ra tatou me kare te akameangiti maira i ta ratou i rave ra; kare katoa oki i te tukuanga ia etai ke ra kia akono tau kore mai ia tatou. No te mea, me akakore mai a Iehova i ta tatou ara, kare aia e akamanako meangiti mai ana i ta tatou au ara, e kare rava oki aia e akatika i te au tangata ara nei kia takatakai i tona aroa ua. (Ebera 10:29) Kia tau ki ta te Insight on the Scriptures, kua akatakaia te akakore anga ara ei “akakore anga utunga i tetai tei rave kino ra; te akakore anga i te manako mareka kore kiaia no tana apa i rave e te takoreanga i te au tika katoa no te akautunga anga.” (Voriumu 1, kapi 861)b Te oronga maira te Pipiria kia tatou i etai au tumu tau meitaki no te akakoreanga i te ara a etai ke ra.

Eaa ka Akakore ei i te Ara a Etai Ke?

5. Eaa te tumu puapinga maata kia akakore i te ara a etai ke ra te akakiteia maira ia Ephesia 5:1?

⁵ Ko tetai tumu puapinga maata kia akakore i te ara a etai ke ra te akakiteia maira ia Ephesia 5:1: “E teianei ei aru kotou i te Atua, mei te tamariki akaperepere ra.” I teea tu e tau ei tatou kia ‘aru i te Atua’? Te tuatua “e teianei” te kapiti ra i taua tuatua anga ra ma te irava i mua akera, te na ko ra: “Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai, mei ta te Atua i akakore mai i ta kotou i te Mesia ra.” (Ephesia 4:32) Ae, no te pae ki te akakore anga ara, ka tau tatou kia aru i te Atua. Mei tetai tamaiti rikiriki te tauta ra kia aite atu ki tona metua, pera katoa tatou, ei tamariki ta Iehova i akaperepere ra, ka tau kia anoano kia aite atu ki to tatou Metua i te rangi te akakore ra i te ara. Mei teaa ra te akamareka anga i to Iehova ra ngakau kia akara mai ki raro nei mei te au rangi ra e kia kite i tana tamariki i te enua nei i te tautaanga kia aite kiaia na te akakore anga i te ara tetai e tetai!​—Luka 6:35, 36; akaaite ia Mataio 5:44-48.

6. Na roto i teea tu i vai ei tetai tuke anga maata i rotopu i ta Iehova ra akakore anga ara e ta tatou?

⁶ E tika, kare e rauka ia tatou kia akakore ara na roto i tetai tu apa kore mei ta Iehova e rave ra. Inara ko tera tikai te tumu tau no tatou kia akakore i te ara tetai e tetai. E akamanako ana: E tuke maata i rotopu i ta Iehova ra akakore anga ara e ta tatou. (Isaia 55:7-9) Me ka akakore tatou i te ara a te aronga tei ara maira kia tatou, e putuputu ma te matakite anga e kare e roaia i muri akera penei ka umuumu tatou kia rave mai ratou i te akaperepere anga na te akakore anga oki i ta tatou ara. Ei au tangata, ko te tu ravarai ko te aronga ara te akakore ra i te ara a te aronga ara ra. Inara, ma Iehova ra, okotai ua aerenga no te akakoreanga ara ra. Te akakore maira aia i ta tatou ara, inara kare rava tatou e anoanoia kia akakore atu i tana ara. Me ka rauka ia Iehova, kare ra aia e rave ara, kia akakore takiri i ta tatou ara ma te aroa, kare ainei e tau tatou tangata ara ua nei kia tauta kia akakore atu i te ara a tetai ra?​—Mataio 6:12.

7. Me ka kore tatou e akakore i te ara a etai ke ra e te vaira tetai tumuanga no te aroa, akapeea te reira e akatupu kino ei ki to tatou uaorai pirianga ma Iehova ra?

⁷ E mea puapinga maata atu oki, me ka kore tatou e akatika kia akakore i te ara a etai ke ra e te vai ra oki tetai tumu no te aroa, ka rauka i te reira kia tarurike i to tatou uaorai pirianga ma te Atua ra. Kare e te pati ua ra Iehova ia tatou kia akakore i te ara tetai e tetai; te umuumu maira aia kia rave tatou i te reira. Kia tau ki ta te au Tuatua Tapu, ko tetai tuanga no te akakeu anga ia tatou kia akakore i te ara koia oki kia akakore mai a Iehova i ta tatou ara me kare no te mea kua akakore ke ana aia i ta tatou ara. (Mataio 6:14; Mareko 11:25; Ephesia 4:32; 1 Ioane 4:11) Me, i reira, kare tatou e anoano kia akakore i te ara a etai ke ra me te vaira te tumu meitaki kia rave i te reira, ka rauka ainei ia tatou kia manako atu kia akakore mai a Iehova i ta tatou nei ara?​—Mataio 18:21-35.

8. Eaa ra te rave akakoreanga ara i riro ei ei meitaki no tatou?

⁸ Te apii maira Iehova i tona au tangata “i te ara meitaki kia aere ratou ra.” (1 Ariki 8:36) Me ka apii mai aia ia tatou kia akakore i te ara a tetai, ka rauka ia tatou kia irinaki e te manako meitaki maira aia ia tatou i tona ngakau. Ma te tumu meitaki te akakite maira te Pipiria kia tatou e “tuku ua atura i te riri.” (Roma 12:19) E apainga teiaa te ngakau riri ra kia apai aere i te oraanga. Me akamoupuku tatou i te reira, ka akapou ia i to tatou au manako, ka akangere i to tatou tu au, e ka takore i to tatou rekareka. Te riri roa, mei te vareae ra, ka riro ei tupu anga kino ki runga i to tatou ora anga kopapa. (Maseli 14:30) E i roto i teia katoa, penei ka aere ua tei akariri maira i tona aerenga ma te kite kore takiri i to tatou ra tu taitaia! Te kite ra Tei Anga aroa mai ia tatou e te umuumuia ra tatou kia akakore atea ua i te ara a etai ke ra kare e ei puapinga no ratou anake ua mari ra no to tatou uaorai oki. E tika, ko te apiianga Pipiria kia akakore i te ara, ko ‘te ara meitaki kia aere ra.’

“E Tauturu atu Tetai ki Tetai”

9, 10. (a) Eaa te tu au turanga kare ra e umuumuia te akakore anga ara papaia? (e) Eaa te manakoia ra e te tuatua kia “tauturu atu tetai ki tetai”?

⁹ Penei ko te au puta kopapa ka akamata atu i te au motu rikiriki tae roa ki te au puta oonu ra, e kare e umuumuia te manako anga aiteite te tu. Mei te reira katoa oki te au manako ngakau akakinoia ra​—ko etai puta e oonu atu i etai ke ra. Te tau ra ainei tatou kia akatupu i te maroanga no te au tu paruparu rikiriki ua ta tatou e mamae ra i to tatou au pirianga ma etai ke ra? Te au pekapeka meangiti ua, te au mea rikiriki, e te ongoongo anga e tuanga anake ia no te oraanga e kare e umuumuia te akakore anga ara papaia ra. Me kua matauia tatou ei tetai tei kore ra e komakoma atu kia etai ke no te au tu reka kore rikiriki ua e ka manono ei e kia tataraara ratou i mua ake ka akono atu ei tatou ia ratou i tetai tu maru akaou, penei ka akakeu tatou ia ratou kia aaere muteki ua takapini ia tatou​—me kare kia vai mamao ke atu!

¹⁰ Kareka ra, e meitaki roa atu kia “kitea mai to tatou ngakau maru no te manako tau.” (Philipi 4:5, Phillips) Ei au mea ora apa ua nei te tavini ra e pakuivi ki te pakuivi, e mea tau ra kia manakoia e tatou e i etai tuatau penei ka akaongoongo mai to tatou au taeake ia tatou na te tu tarevake ra, e penei katoa oki ka rave pera atu tatou kia ratou. Te apii maira Kolosa 3:13 ia tatou: “E tauturu atu tetai ki tetai.” Te akakite maira te reira tuatua e kia akakoromaki ma etai ke ra, i te akakoromaki anga i te au apinga kare tatou e reka ana ia ratou ra me kare te au tu akono penei te akaongoongo maira ia tatou. Ko taua tu akakoromaki e te akono tau ra ka tauturu ia tatou kia akakoromaki i te au akakino anga rikiriki te ka tupu mai i ta tatou akono anga ma etai ke ra​—kia kore e akakino i te tu au o te putuputuanga.​—1 Korinetia 16:14.

Me e Oonu atu te Au Puta Ra

11. Me rave ara mai etai ke ra kia tatou, eaa te ka tauturu ia tatou kia akakore atu i ta ratou ara?

¹¹ Inara, ka peea me ka ara mai etai ke ra kia tatou, ma te akatupuanga i tetai puta kitea uaia atu ra. Me kare i kino rava te ara ra, penei kare e ngata maata kia akono i ta te Pipiria akoanga e ‘akakore i te ara tetai e tetai.’ (Ephesia 4:32) Ko taua tu papa ra kia akakore i te ara te rotai ra ma ta Petero au tuatua akauruia ra: “Ko te aroa rai, kia maata tikaia ïa ia kotou uaorai: ka ngaro oki te apa e manganui i te aroa.” (1 Petero 4:8) Na te tamouanga i te manako e e aronga ara katoa oki tatou ka rauka ia tatou kia akakore ua i te au ara a etai ke ra. Me ka akakore tatou i te ara, ka tuku ua atu tatou kia ngaro ke atu te riri eiaa e utuutu i te reira. Ei tetai tupu anga, kare e kino to tatou pirianga ma tei rave kino maira, e ka tauturu katoa oki tatou kia akatinamou i te tu au okomaata o te putuputuanga. (Roma 14:19) I muri akera, ka akangaropoinaia tana i rave ra.

12. (a) Eaa te mea mua penei ka tau tatou kia rave kia papaʼi no te akakore anga i te ara a tetai tei tamamae oonu maira ia tatou? (e) Akapeea te au tuatua ia Ephesia 4:26 ra i te akakite anga e ka tau tatou kia akaoti vave i te au tumu ra?

¹² Inara, ka peea, me ka ara mai tetai kia tatou na roto i tetai tu kino, ma te akamamaeanga oonu ia tatou? Ei akatauanga, penei kua piri atu tetai oa irinakiia ki roto i etai tumu ngaro noou uaorai taau i tuatua muna ra kiaia e kua akakiteia e ia ra. Ka mamae ngakau oonu koe, ka akama, e kua pikikaaia. Kua tauta koe kia akangaropoina i te reira, inara kare te reira e ngaro ke atu. I taua tu ra, penei ka tau koe kia tamata kia akaoti i taua manamanata ra, penei na te tuatuaanga ki tei rave tarevake ra. E mea pakari kia rave i teia i mua ake ka kino roaʼi. Kua akamaroiroi a Paulo ia tatou: “Kia riri kotou ra, auraka kia araia [koia oki, na te akamoupukuanga me kare te raveanga tau kore i te riri]: auraka e topa te rā i to kotou riri anga.” (Ephesia 4:26) Ei kapitianga manako ki te au tuatua a Paulo ko te tika e i roto i te au ngati Iuda ra, ko te opunga o te ra te openga ia o tetai ra e te akamata anga oki o tetai ra ou. E no reira, ko te reira apii anga: Kia akaoti vave i taua tumu ra!​—Mataio 5:23, 24.

13. Me ka aravei atu tatou i tetai tei akariri maira ia tatou, eaa te akakoro anga tau na tatou, e eaa te au manako te ka tauturu ia tatou kia itaeia te reira?

¹³ Akapeea koe te aravei anga i tei ara mai kia koe ra? “E kimi i te au, e aruaru atu,” ta 1 Petero 3:11 i tuatua. I reira, kare taau akakoro anga e, kia akakite i te riri mari ra kia akatupu i te au ma toou taeake. Ei akatupu i te reira, ka meitaki kia kopae ke i te au tuatua riri e te tu akono; penei ka akatupu mai te reira i tetai tu aiteite mei ko mai i tetai tangata ra. (Maseli 15:18; 29:11) Kapiti katoa oki, auraka e tuatua akamaata e, “Te rave ua ra koe. . . !” me kare, “Kare ua koe . . . !” Ko taua au tuatua akamaata ra penei ka akariro kia paruru aia iaia uaorai. Kareka ra, e tuku i te tangi o toou reo e te tu o to mata kia akakite e te anoano ra koe kia akaoti i te tumu tei akamamae oonu ra ia koe. Kia tano te akatakaanga i toou manako ngakau no tei tupu ra. E oronga atu i te tuatau no tetai ke ra kia akataka i tana au rave anga. E akarongo atu ki tana au tuatua. (Iakobo 1:19) Eaa te meitaki o te reira? Te akataka maira Maseli 19:11 e: “Na te akono o te tangata i kore ei i riri vave; ko tona ïa kakā koia i akakore i te ara.” Na te kiteanga i te manako ngakau o tetai ke ra e te au tumu no tana i rave penei ka takore atu i te au manako tau kore ra e te au manako ngakau kiaia ra. Me aravei atu tatou i taua turanga ra ma te akakoro anga kia akatupu i te au, penei ka takoreia atu tetai ua atu manako tarevakeanga, ka raveia te au tataraara tau, e kua orongaia te akakore anga ara ra.

14. Me akakore tatou i te ara a etai ke ra, na roto i teea tu e tau ei tatou kia akangaropoina atu?

¹⁴ Te riro ra ainei te aite anga o te akakore anga i te ara a etai ke ra e ka tika kia akangaropoina tikai tatou i tei tupu ra? E akamanako ana i ta Iehova uaorai akatauanga i teianei tu, tei uriuri manakoia i te atikara i mua ake nei. Me tuatua te Pipiria e te ngaropoina ra ia Iehova ta tatou ara, kare te aite anga o teia e kare e rauka iaia kia maara atu ia ratou. (Isaia 43:25) Kareka ra, ka akangaropoina aia na roto i te tu e me akakore aia i te ara, kare aia e akamanako akaou i taua ara a tatou ra a tetai tuatau i muri akera. (Ezekiela 33:14-16) Mei te reira katoa, kare te aite anga no te akakore anga ara na te oa tangata nei e kare e maaraia e tatou eaa ta ratou i rave ra. Inara, ka rauka ia tatou kia akangaropoina na roto i te tu e kare tatou e mou i te reira ei kino no te rave apa ra me kare kia taiku akaouia a tetai tuatau ki mua. I te akatikatikaia anga i taua tumu ra, kare e tau kia tuatua ua no te reira; kare katoa oki i te aroa kia kopae takiri i tei rave ra i te kino, ma te akonoanga iaia mei te mea rai e kua akaateaia aia. (Maseli 17:9) E tika, penei ka pou tetai tuatau no to tatou pirianga ki aia kia ora meitaki; penei kare tatou e rekareka akaou i taua pirianga vaitata mei mua ana ra. Inara ka inangaro tatou iaia ei taeake Kerititiano no tatou e e ka rave i te meitaki te ka rauka ia tatou kia tamou i tetai pirianga au.​—Akaaite ia Luka 17:3.

Me Akara Anga Rauka Kore kia Akakore i te Ara

15, 16. (a) Te umuumuia ra ainei te au Kerititiano kia akakore i te ara a tetai tei rave tarevake ra ma te kore ra e tataraara? (e) Akapeea e raukaʼi ia tatou kia akono i te apii Pipiria te kitea ra ia Salamo 37:8?

¹⁵ Inara, ka peea me ka ara mai etai ke ra kia tatou na te tu te ka akatupu i te au puta oonu roa, e inara kare e akatika anga no taua ara ra, kare e tataraara, e kare e akakiteanga mii no te apa na tei rave kino ra? (Maseli 28:13) Te akataka marama maira te au Tuatua Tapu e kare a Iehova e akakore i te ara a te aronga rave ketaketa i te ara e kare e tataraara. (Ebera 6:4-6; 10:26, 27) Ka akapeea tatou? Te tuatua ra te Insight on the Scriptures e: “Kare te au Kerititiano e umuumuia kia akakore i te ara a te aronga rave ngakau kino ra, i te ara akakoroia ma te kore e tataraara. Ka riro taua aronga ra ei au enemi no te Atua ra.” (Voriumu 1, kapi 862) Kare e Kerititiano tei riro ra ei tetai tei takinga kino maataia na te tu tau kore, rikarika, me kare e akono takinoia tei tau kia manako ngakau kia oparaia kia akakore i te ara, a tetai tei rave tarevake ra tei kore e tataraara.​—Salamo 139:21, 22.

¹⁶ Te kiteia ra, ko te aronga tei akono takinga kinoia ra penei ka manako ngakau mamae e ka riri oki. Inara, kia maara e ko te mouanga i te riri e te akamoupuku ka riro ei kino maata kia tatou. Te tatarianga no tetai akatika anga me kare no te tataraara kare ra e rauka mai, penei ka maata atu to tatou riri. No te apiapi i taua tu tau kore ra penei ka tamou i te riri kia pupu ki roto ia tatou, ma te au tupu anga akataneaanga ki to tatou ora anga i te pae vaerua, te manako ngakau, e te pae kopapa oki. Ko te tika, te tuku ra tatou i tei tamamae maira ia tatou kia tamamae tamou ua atu rai ia tatou. E mea pakari ra, te apii maira te Pipiria: “Akapakia te makitakita, e akaruke i te riri otooto.” (Salamo 37:8) Inara, kua kitea e etai Kerititiano e i muri akera kua rauka ia ratou te tuku i te tika kia akakore i te ara na roto i te tu akakoreanga i te akamoupuku​—kare ra i te akameangiti anga i tei tupu ra kia ratou, mari ra na te kore e tuku kia pou ratou i te riri. Na te akaruke takiri anga i taua tumu ra ki roto i nga rima o te Atua tuatua tau ra, kua kite ratou i te tu maru e kua rauka te akono meitaki i to ratou ora anga.​—Salamo 37:28.

17. Eaa te akapapu anga akapumaana ta te taputou a Iehova tei tataia ra ia Apokalupo 21:4 ka oronga mai?

¹⁷ Me oonu rava tetai puta, penei kare tatou e autu i te akakore takirianga i te reira i to tatou manako, e kare i roto i teianei akatereanga o te au mea nei. Inara te taputou maira Iehova i tetai ao ou e riro ei “nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa, no te mea kua kore te au mea taito.” (Apokalupo 21:4) Noatu eaa ta tatou te ka maara a taua tuatau ra kare e akatupu i te mamae ngakau oonu kia tatou, me kare mamae, penei ka riro i teianei ei apainga teiaa no to tatou ngakau.​—Isaia 65:17, 18.

18. (a) Eaa ra i vai ei tetai umuumu anga kia rave i te akakoreanga ara i ta tatou au akonoanga ma to tatou au tungane e te au tuaine? (e) Me rave ara mai etai ke kia tatou, na roto i teea tu e raukaʼi ia tatou kia akakore i ta ratou ara e kia akangaropoina atu oki (ng) Akapeea teia i te akapuapinga mai ia tatou?

¹⁸ I teianei, ka tika tatou kia akono e kia rave angaanga kapipiti ei au tungane e ei au tuaine te apa ua ra, ei aronga ara. Te rave tarevake ra tatou ravarai i etai taime. I etai tuatau te akareka kore ra tatou tetai i tetai e te tamamae ra oki tetai i tetai. E mea tau ra e kua kite a Iesu ka umuumuia tatou kia akakore i te ara a etai ke ra, “Kare . . . , Kia taki itu ua, Kia itu ra ngauru i te taki itu anga”! (Mataio 18:22) E tika ra, kare e rauka ia tatou kia akakore takiri i te ara mei ta Iehova e rave ra. Inara, i te au turanga e maata me apa mai to tatou au taeake kia tatou, ka rauka ia tatou kia akakore i te ara na roto i te tu akakoreanga i te riri e ka rauka ia tatou kia akangaropoina atu na roto i te tu e kia kore e akamoupuku i taua tumu ra kia ratou e tuatau ua atu ki mua. Me ka akakore tatou i te ara e ka akangaropoina atu oki, ka tauturu tatou i te akono kare anake i te au o te putuputuanga mari katoa oki i to tatou uaorai tu au o te manako e te ngakau Tei maata rava atu, ka rekareka tatou i te au te ka rauka anake i to tatou Atua, ko Iehova i te oronga mai.​—Philipi 4:7.

[Au Tataanga Rikiriki i Raro]

Au Uianga no te Akamanako Akaou

◻ Eaa tatou i tau ei kia anoano i te akakore atu i te ara a etai ke ra?

◻ Eaa te tu o te au turanga te anoanoia ra tatou kia “tauturu atu tetai i tetai”?

◻ Me tamamae oonuia tatou na te au ara o etai ke ra, eaa te ka rauka ia tatou kia rave ei akaoti i taua tumu ra ma te au?

◻ Me akakore atu tatou i te ara a etai ke ra, na roto i teea tu i tau ei tatou kia akangaropoina atu?

[Tutu i te kapi 16]

Me akamoupuku tatou i te riri, penei kare tei akariri maira i kite i to tatou tu pekapeka

[Tutu i te kapi 17]

Me aravei atu koe ia etai ke ra kia akatupu i te au, penei ka ngoie ua te akakore atu anga i te au manako tarevake