Mei te Aronga Apiipii Autuia kia Riro ei Aronga Mitinari Autuia

“KARE au i irinaki ake e kua rauka ia maua teianei akameitakianga!” ta Will i tuatua, i te taikuanga ki te terenianga ta raua ko tana vaine, ko Patsy, koi oti ua akenei ei nga tangata apiipiiia no te pupu 103 o te Apii Pipiria Punanga Tiaki o Gileada. Kua akatika katoa a Zahid raua ko Jeni i te reira. “Te manako ngakau akangateiteiia nei matou kia tae mai ki konei,” ta ratou i tuatua. Pouroa te aronga apiipiiia kua rave i te angaanga meitaki i te apii. I teianei te rapurapu ra ratou kia akamata i ta ratou angaanga ei au mitinari. Inara i mua akera, i te porokarama karatuati anga ia Tepetema 6, 1997, kua rauka ia ratou tetai akoanga aroa te ka tauturu ia ratou kia autu i ta ratou au angaanga mitinari.

Ko Theodore Jaracz te tiamana o te porokarama, koia tetai mema no te Pupu Akaaere. Kua akakite aia e​—kapiti katoa ma te pamiri Betela e te aronga komono e 48 no te au opati manga o te Taiate Punanga Tiaki​—te au oa e te au kopu tangata no Kanata, Europa, Puerto Rico, e te United States mai kua akaputu katoa mai kia akapapu ki te aronga tei apiipiiia i ta ratou turuanga e to ratou aroa oki. Kua kite te Taeake ko Jaracz e ko te au mitinari tei tonokia ki vao e te au akonoanga Kerititome e putuputu te akariro keia te manako mei te angaanga mitinari e kua akamata i te aruanga i te au akakoro anga apiipiiia me kare kua piri atu ki roto i te au angaanga poritiki. Ei tuke anga, ko te aronga karatuati o Gileada kua rave i ta ratou i tereniia ra kia rave. Kua apii ratou i te au tangata i te Pipiria.

I reira kua tuatua a Robert Butler no te opati o te Taiate i Brooklyn mai no runga i te tumu manako “E Akariro kia Autu Toou Aerenga.” Kua akataka aia e koi vaito ra te au tangata i te autu anga i roto i te au tu moni me kare i etai atu puapinga no te tangata, inara ko te tumu meitaki tikai e akapeea ta te Atua ra vaito anga i te autu anga. Kua autu ta Iesu ra angaanga orometua, kare e no te maata te numero o te au tangata tei ariu atu iaia, mari ra no tona tiratiratu i tana angaanga. Kua apai mai a Iesu i te kaka kia Iehova, e kua vai viivii kore aia i teianei ao. (Ioane 16:33; 17:4) E au apinga teia te ka rauka i te au Kerititiano kia rave.

Kua ako atura Robert Pevy “Kia Tavini Atu i te Au Tangata Ravarai,” koia tetai mitinari i mua ana i te Orient. Ko te apotetoro ko Paulo tetai mitinari tei autu ra. Eaa tana rave anga karape? Kua akariro aia iaia uaorai ei tavini ki te katoatoa. (1 Korinetia 9:19-23) Kua akataka mai taua vaa tuatua ra: “Ko tetai karatuati no Gileada ma taua tu manako ra kare e manako i te tavini anga ei mitinari ei tetai tu angaanga akaneke atu, ei tetai toka takainga ki etai atu au turanga puapinga maata i roto i te akaaerenga. Te aere atura tetai mitinari ki tana angaanga ma te manako akakeu anga okotai ua​—kia tavini, no te mea ko te reira ta te au tavini ka rave.”

I te akatumuanga maata i tana akoanga ki runga ia 2 Korinetia pene 3 e te 4, kua akamaroiroi mai a Gerrit Lösch koia tetai o te Pupu Akaaere ra, i te aronga apiipii ra kia “Akaata Mai Mei te Io Rai i te Kaka o Iehova.” Kua akamaaraara atura aia ia ratou e ko te kite i te Atua te aite ra ki tetai marama tei akamarama ra i tetai Kerititiano me ka akatuera aia i tona ngakau kia ariki atu i te reira. Ka akaata atu tatou i taua marama ra na te tutuanga i te tuatua meitaki e na te tamou marieanga i te tu akono meitaki. “Penei i etai tuatau ka manako ngakau koe e kare koe i tau,” kua akakite mai aia ra. “Me tu mai taua au manako ngakau ra, e irinaki ia Iehova, ‘kia riro te mana maata meitaki nei ki te Atua.’” (2 Korinetia 4:7) I te karanga anga i te au tuatua a Paulo i tataia ia 2 Korinetia 4:1 ra, kua akaketaketa maira te Taeake ko Lösch ki te aronga apiipiiia ra: “Auraka e roiroi i ta kotou angaanga mitinari. E akakanapanapa ua atu i ta kotou io!”

Kua tuatua mai a Karl Adams, koia tetai mema apii katoa ia no Gileada, no te tumu manakoanga meitaki “Teiea a Iehova?” Kare taua uianga ra e taiku ana, i to te Atua ra ngai i te ao katoa e pini ua ake, mari ra ki te umuumu anga kia akamanako i to Iehova ra manako anga e te akakite anga i tana ra arataki anga. Kua tuatua aia e, “i raro ake i te tu taitaia, noatu ra ko tetai tangata kua roa tona tavini anga ia Iehova ka ngaropoina ua i te reira.” (Iobu 35:10) Peea oki i to tatou tuatau nei? I te 1942, kua umuumuia te arataki anga no te au tangata o te Atua. Te akaoti ra ainei te angaanga tutu aere, me kare e maata atu ainei te angaanga kia raveia? Eaa to Iehova anoano no tona au tangata? I to ratou apii atuanga i te Tuatua a te Atua, kua marama mai te pauanga. I mua ake i te openga taua mataiti karena ra,” kua akakite te Taeake ko Adams e, “kua akanooia te au parani no te Apii Pipiria Punanga Tiaki o Gileada.” Kua akameitaki tikai a Iehova i te angaanga a te au mitinari tei tonokia atu e taua apii ra.

Ko Mark Noumair te rua o te tangata ikuiku tei tuatua ra. I tana tuatua, te tumu manako “Akapeea Koe me Taangaanga i Taau Tareni?,” kua akamaroiroi aia i te aronga apiipiiia ra kia akono i te terenianga tei rauka ra ia ratou i Gileada me tae ua atu ratou ki ta ratou ngai angaanga ou ra. “E akauapou atu kia tauturu ia etai ke ra,” tana ia i tuatua. “E manako kapiti atu. Kia rapurapu kia kite i ta ratou au peu, te tuatua enua, te tu akakatakata o taua enua ra. Ko te viviki atu toou kite i te reo, ko te meitaki atu ia noou.”

Ka Kite te Aronga Apiipii Maroiroi i te Rekareka i te Angaanga Orometua

Kapiti atu ki te akonoanga ia ratou uaorai kia tau ki ta ratou au apii i Gileada ra, kua tukuia te aronga apiipiiia ra ki te 11 au putuputuanga i tera ngai. I te au openga epetoma, kua kapiti totomapu atu ratou ki te angaanga tutu aere. Kua pati atu a Wallace Liverance tei apii katoa ia no Gileada ra i etai o ratou kia akakite mai ki te aronga akarongo i etai au tupu anga i kite ratou i reira. Kua kitea to ratou rekareka anga i ta ratou akakite anga i te au tupu anga tei kite ra ratou i te akakite aereanga i te au ngai toa, i te au ngai paka motoka, i te ngai pitiniti, i te au arataa, e mei tera are ki tera are. Kua kimi tetai papaki o ratou i te au ravenga kia itae i te au tangata tuatua i te reo ke tei noo ra e tei angaanga ra i ta ratou ngai o te putuputuanga. Mei te 10 au apii Pipiria i te au ngutuare tei akamataia e tei akonoia e te au mema o te pupu 103 ra i te tuatau e rima marama o to ratou terenianga.

Kua Akakite te Au Mitinari no te Tuatau Roa i te Au Ravenga Autu Anga

Aru mai i teianei tuanga rekareka no te porokarama, kua pati a Patrick Lafranca raua ko William Van de Wall e itu au mema Kumiti Manga kia akapapa mai i te au apiianga ta ratou i kite i ta ratou raveanga angaanga mitinari ei akapuapinga i te pupu ra. Kua akamaroiroi ratou i te au karatuati ra kia akamanako i ta ratou angaanga mitinari e no ko mai ia Iehova ra e kia manako papu kia mou marie i taua angaanga ra. Kua tuatua ratou i te au tupu anga papu tei kitea e te au mitinari tereniia i Gileada i te rave angaanga i etai enua ke ra.

Na teaa i tauturu i teia au mema Kumiti Manga kia tavini no etai raungauru mataiti ei au mitinari mataora e te uua meitaki? Kua angaanga piri vaitata ratou ma te au taeake o te reira ngai e kua apiipiiia mai e ratou ra. Kua akono ratou ia ratou uaorai kia apii i te reo i to ratou tae ua atu anga ki ta ratou ngai angaanga. Kua apii ratou kia taui ngoie ua e kia ariki i te au peu o taua ngai ra. Kua akakite atu a Charles Eisenhower, koia tetai karatuati o te pupu mua o Gileada ra e ko tetai mitinari no te 54 mataiti, e rima ana “au ravenga” i akakite mai ta te au mitinari autu i kite ra: (1) E apii putuputu i te Pipiria, (2) e apii i te reo, (3) e rave maroiroi i te angaanga orometua, (4) e angaanga no te au ki roto i te kainga mitinari ra, e te (5) pure putuputu kia Iehova. Kua mareka te aronga apiipiiia ra kare no te apiianga tau anake tei rauka ra ia ratou mari ra no te rekareka anga kitea puia ra ta teianei au mitinari roa ra i kite i te tavini anga ia Iehova ra. Mei ta Armando raua ko Lupe i tuatua ra “te mataora ra ratou ia ratou e tuatua ra i to ratou au oraanga.”

I muri ake i te au uiui anga ra, okotai akoanga tei toe maira. Kua iki a Albert Schroeder, koia tetai mema no te Pupu Akaaere, ko tana tumu tuatua koia te “Tuati Anga Tiratiratu i te Tuatua a te Atua te Akakite Maira i te Au Poe Okomaata no te Tuatua Mou.” I te mea ko te Pipiria te puka maata o te Apii o Gileada, kua inangaro te aronga apiipiiia ra kia akarongo atu i tana ka tuatua. Kua tou mai te Taeake ko Schroeder e i te akamata anga te angaanga ki runga i te New World Translation of the Holy Scriptures i te 50 mataiti kua topa, kare te au mema akatainuia o te Kumiti Urianga Pipiria Ao Ou i akara no te marekaanga o te au tangata mari ra kua irinaki ki runga i te arataki anga a te vaerua tapu. (Ieremia 17:5-8) Inara, i ou ua akenei kua kite tetai papaki o te aronga mana taoonga i te turanga teitei tei akanooia maira e te New World Translation. I roto i tetai reta ki te Taiate, kua tata tetai tangata apii: “Ka kite au i tetai puka tau meitaki me ka akara au i tetai, e kua rave to kotou ‘Kumiti Urianga Pipiria Ao Ou’ i tana angaanga kia meitaki.”

I muri ake i teia tuatua, kua rauka mai te au tiporoma o te aronga apiipiiia ra, e kua akakiteia mai ta ratou ngai angaanga ki te aronga akarongo mai ra. Ko tetai atianga akatuki ngakau te reira no te au mema o taua pupu ra. I te tatau anga tetai komono no taua pupu ra i tetai reta ariki anga, e manganui tei akapuku maira a roto i to ratou karaponga e te roi mata i to ratou mata. Kua akateateamamao tetai papaki o te aronga apiipiiia no te angaanga mitinari no etai mataiti. I te kiteanga e ko te apii anga i Gileada ka raveia i te reo Engarani, kua aere atu etai aronga apiipiiia tokoiti ra ki te au putuputuanga tuatua Engarani kia akameitaki mai i ta ratou tuatua anga i taua reo ra. Ko etai ke kua neke atu ki te ngai e maata te umuumu anga no te au painia, me i to ratou uaorai enua me kare i tetai ngai mamao atu. Te vaira etai ke atu kua teateamamao na te tatauanga i te au kite anga, te rave kimikimianga, me kare te akaraanga vitio tepe a te Taiate ra To the Ends of the Earth ma te taokioki akaou anga.

Ko Will raua ko Patsy, tei taikuia ra i te akamata anga mai, kua mareka maata raua i te manako anga tataki tai tei akaariia ki te aronga apiipiiia ra. “Te au tangata kare ra i kite ia matou kua takave mai ia matou e kua nenei mai ia matou. Kua mou rima maira tetai mema no te Pupu Akaaere ia matou e kua tuatua, ‘Te manako akaparau ra matou ia kotou!’” Kare e ekoko anga no te reira, kua aroa akaperepereia te aronga apiipiiia no te pupu 103 ra. Kua tereni meitakiia ratou. Te apiianga tei rauka ra ia ratou i Gileada ka akatika ia ratou kia rave i te aere atu anga mei te aronga apiipii autuia kia riro ei aronga mitinari autuia.

[Pia i te kapi 22]

[Te Au Tu o te Pupu]

Numero o te au enua tei komonoia: 9

Numero o te au enua tei tukuia: 18

Numero o te aronga apiipii: 48

Numero o te au tokorua akaipoipo: 24

Mataiti avereti: 33

Au mataiti avereti i roto i te tuatua mou: 16

Au mataiti avereti i roto i te angaanga orometua tamou: 12

[Tutu i te kapi 23]

Te 103 Pupu Karatuatianga o te Apii Pipiria Punanga Tiaki o Gileada

I te papaanga i raro ake, kua numeroia te au pa mei mua ki muri, e kua papaia te au ingoa mei te kaui ki te katau i te pa takitai.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Tutu i te kapi 24]

Te aere nei tatou kiea?