E Opu i Teia Tuatau Umere!

KUA tere meitaki ki mua a Peter i tana apii rapakau anga i te kite anga aia i te tuatua ora o te Pipiria. I tona karatuati anga e te akamata anga i te angaanga ei taote i roto i tetai are maki, kua tamou ua atu tona aronga akatere i te akamaroiroi iaia kia riro mai ei neurosurgeon. E tuatau oki teia ka opu te au taote e manganui ma te tapupu kore.

Inara, kua manako a Petera i te tuku ua atu i teia tuatau. Eaa ra? Kua ngere ainei aia i te anoano e te akakeu anga tei anoanoia? Kare, no te mea kua akamanako meitaki tikai a Peter i te reira. I muri ake i te riroanga mai ei Kite akatapuia e te papetitoia o Iehova, kua anoano aia i te akapou maata atu i te taime tei rauka i roto i te au tu angaanga orometua Kerititiano tukeke. I te riro anga mai aia ei neurosurgeon, kua manako aia, ka akapou tana ngai angaanga i te maata anga o tona taime e te ririnui. E neneva ainei aia i te akaruke i teia manakonakoanga takake, me e pakari ainei iaia i te pera?

Ki etai pae, penei kua akara anga neneva ta Peter iki anga. Inara, kua akamanako aia i te au irava Pipiria mei ia Ephesia 5:15, 16. I reira kua raurau te apotetoro ko Paulo i te au Kerititiano: “Kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau [“tau,” NW], no te mea e tuatau kino teia.”

Ka akara ana i te tuatua ‘tuatau tau.’ Kua uriia te reira mei tetai tuatua Ereni tei taangaangaia i roto i te Pipiria i te maata anga o te taime no tetai tuatau me kore tuatau akairoia e tetai au tu me kore tei tau no tetai angaanga tikai. I konei te akakite ra a Paulo e kia akanoo te au Kerititiano i te tuatau no te au mea puapinga. E tikai, “kia timata oki [ratou] i te au mea e maata ua atu te meitaki.” (Philipi 1:10) Te anoanoia ra kia akanoo i te au mea mua.

No reira, eaa te akakoroanga tu-Atua i to tatou tuatau nei? Eaa to te Atua anoano no te aronga tei inangaro iaia? Te akataka meitaki maira te au totou Pipiria i to tatou tuatau ei “tuatau openga,” me kore “au ra openga.” (Daniela 12:4; 2 Timoteo 3:1, NW) Kua akataka meitaki mai a Iesu Karaiti i te mea puapinga rava i to tatou tuatau nei. Kua tuatua tika mai aia e i mua ake i te openga o teia akatereanga kino o te au mea nei, “e tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” I reira anake te openga e tae mai ei.​—Mataio 24:3, 14.

No reira, ka anoanoia tatou kia opu i te tuatau ravarai no te tutu aere i te tuatua meitaki o te Patireia e e akariro i te au tangata ei au pipi. (Mataio 28:19, 20) I te mea kare rava teia au angaanga e rave akaouia, ko te tuatau openga teia no te oronga i ta tatou katoatoa ki teia angaanga akaora anga. “I na, teia taua tuatau tau ra.” E tikai, “teia taua rā e oraʼi ra.”​—2 Korinetia 6:2.

Tuku Anga i Tetai Iki Anga Pakari

Ko Peter​—te mapu tane tei taikuia i te akamata anga—​kua manako meitaki aia i tana iki anga e kua paunu i tana au mea ka rave. Kua kite aia e kare i te mea tarevake kia apii aia ma te inangaro kia riro mai ei neurosurgeon. Inara eaa te mea puapinga rava kiaia? Ko tana angaanga i roto i te angaanga orometua Kerititiano, te akamanakoanga i te tu rapurapu o teia angaanga. I taua taime rai, e au apainga tana ka akono. E tangata akaipoipo aia e ka anoanoia kia akono i tana vaine, tei roto i te angaanga tutu aere tamou. (1 Timoteo 5:8) Kua anoano katoaia a Peter kia tutaki i te au kaiou no tana au apii. Eaa, i reira, tana i iki no te rave?

Kua manako atu a Peter i te rave karape i te angaanga radiology e te rave i te au ultrasound scan. E au angaanga teia te ka anoanoia okotai ra katoa no te angaanga. Ka rauka katoa tana terenianga i te tuatau o te au ora angaanga tamou. Ae, penei ka manako etai pae i teia ei taoonga meangiti ake te ngateitei, inara ka riro teia kia maata mai tona tuatau va no te rave i te au angaanga pae vaerua.

Kua riro tetai atu tamanako anga ei akakeu i ta Peter iki anga. Koi kore ei e akava i tetai atu tei manako ra i te mea ke, kua kite aia e na te o maata anga atu ki roto i te au mea o te ngai angaanga ka riro ia ei mea kino ki tetai Kerititiano. Ka akatupu te reira iaia kia akangaropoina i te au apainga pae vaerua. Te akatutuia ra teia i roto i tetai akaou akaraanga no runga katoa i te ngai angaanga.

Te vaira tetai tei tutu aere tamou i te Patireia ei tangata ati tereniia. Kua rauka iaia i te turu iaia uaorai i te pae o te moni na te okookoanga i tana au peni. Koi akapou ei i te maata anga o tona taime ki roto i te angaanga orometua Kerititiano puapinga rava, kua rauka iaia i te turuturu meitaki iaia uaorai. Inara, kua akamata tetai anoano i te tupu mai no te akamaata i tana angaanga ati. Kua o maata mai aia ki roto i te rave anga peni e te ati, kua akaruke i te angaanga orometua tamou, i te openga ra kua kore takiri i maroiroi akaou i roto i te angaanga tutu aere i te Patireia. I muri mai, kua o aia ki roto i te tu akono tau kore ki te Tuatua Tapu, te opeanga atu ki tona kore anga e riro akaou ei tuanga o te putuputuanga Kerititiano.​—1 Korinetia 5:11-13.

E Tuatau Umere to Tatou

Ei aronga e tavini ra ia Iehova i teianei, papu ka inangaro tatou kia vai akarongo ua kiaia. Kua kite tatou e te noo nei tatou i roto i te tuatau tuke roa atu i roto i te tuatua enua o te tangata nei. E raukaʼi i te tavini ua atu i te Atua e te autu atu i te au turanga i teia tuatau ma te tau ra, penei ka anoano tatou kia rave i te au akatikatika anga tukeke. Ka rauka ia tatou i te akaaite i teia ki te tuatau kokoti anga no tetai tangata tanutanu. E tuatau angaanga umere te reira, me anoanoia te aronga angaanga tanutanu kia akakeu maata atu ia ratou uaorai e kia angaanga roa atu. Eaa ra? No te mea ka anoanoia te mou kia akaputuia mai i roto i tetai tuatau kotingaia.

E manga tuatau kotinga tikaiia te toe no te akatereanga kino o te au mea o teianei. I teianei e maata atu i to mua ana, te anoanoia ra tetai Kerititiano mou kia akakeu iaia uaorai kia aru i te akaraanga o Iesu e e aaere i tona au takainga vaevae. Te akaari taka ua maira tona kaveinga oraanga i te enua nei i te mea puapinga rava atu kiaia. Kua karanga aia: “Ka rave au i te angaanga a tei tono mai iaku nei, koi vai ake te ao: te vaitata mai nei oki te po, kare roa e tangata e angaanga i reira.” (Ioane 9:4) Na te tuatuaanga e te aere maira te po, te tuatua ra a Iesu no te tuatau o tona akavaanga, te tamamae anga, e te matenga, e ope ei tana angaanga orometua i te enua nei e kare e rauka iaia i te o ki roto i te au angaanga a tona Metua i te rangi.

E tika, i te tuatau o tana angaanga orometua e toru e te apa mataiti, kua akapou a Iesu i etai o tona taime te raveanga i te au temeio e te rapakauanga i te maki. Noatu rai, kua taangaanga aia i te maata anga o tona taime e tutu aere i te tuatua Patireia e te “tutu aere i te ora no te aronga tuikaa” o te akonoanga pikikaa. (Luka 4:18; Mataio 4:17) Kua maroiroi tikai a Iesu i tana angaanga orometua e kua akanoo i te tuatau no te tereni i tana au pipi e raukaʼi ia ratou i te patu i te tango tana i akanoo ra no te tamou ua atu i te rave meitaki ra i te angaanga tutu aere. Kua opu a Iesu i te au tuatau ravarai no te akamaata i te au inangaro Patireia e kua inangaro i tana au pipi kia pera katoa.​—Mataio 5:14-16; Ioane 8:12.

Mei ia Iesu ra, te anoanoia ra tatou au pipi nei o teia tuatau kia kite i to te au tangata turanga mei ta te Atua ko Iehova ra akaraanga. Te pou nei te taime no teia akatereanga o te au mea nei, e te inangaro akaaroa ra te Atua i te katoatoa kia rauka te tuatau e raukaʼi te ora. (2 Petero 3:9) No reira, kare ainei i te mea pakari kia tuku i tetai atu au aruaru anga ravarai i te ngai rua ki te raveanga i to Iehova anoano? (Mataio 6:25-33) Koia tikai i tetai tuatau umere mei teia, te mea tei tamanako uaia e e puapinga penei e meangiti ua te puapinga i to tatou oraanga ei au Kerititiano.

Ka ngere ainei tetai ua atu ia tatou no tei tuku tatou i to te Atua anoano i te ngai mua i to tatou oraanga? Kare rava, no te mea e mea tutaki maata tikai te kaveinga Kerititiano o te oronga atinga uaorai. Ei akaraanga, kua akakite a Iesu ki tana au pipi: “Koia mou taku e karanga atu kia kotou nei, kare e tangata i akaruke i te are, e te au taeake, e te au tuaine, e te metua tane, e te metua vaine, e te vaine, e te tamariki, e te kainga, noku, e no te evangelia nei, e kore ei e rauka iaia e anere ua atu, i teianei ao, te are, te taeake, e te tuaine, te metua vaine, e te tamariki, e te kainga oki, ma te takinga-kinoia; e i te ao a muri nei, ko te ora mutu kore ïa.”​—Mareko 10:29, 30.

Kare rava e rauka i tetai tangata i te tuku i te puapinga o te moni ki runga i te au tutaki anga tei rekarekaia e te aronga tei taangaanga i to ratou taime no te akapaapaa ia Iehova e te akakitekite i te tuatua Patireia. Te rekareka ra ratou i te au akameitakianga e manganui! Te kapiti maira teia i te au oa mou, te merengo o te raveanga i te anoano tu-Atua, ta te Atua kata mareka anga, e te manakonakoanga o te oraanga ope kore. (Apokalupo 21:3, 4) E mei teaa atura i te akameitakianga no te tauturu i te au tangata i te pae vaerua e te apai mai i te ngateitei ki te ingoa tapu o Iehova ei Au Kite nona! Kare e ekoko anga, na ‘te taporoporo marie anga i te tuatau tau’ e kaveinga pakari tikai ia ma te tutakianga. Ko teianei tikai te taime no te piri ki roto i te akakitekiteanga i te tuatua meitaki o te Patireia o te Atua. Ka opu ainei koe e ka mou i teia tuatau umere?

[Tataanga Rikiriki i Raro]