PENE 16
E Patoi i te Tiaporo
“E patoi atu i te diabolo, e nana e rere ke atu.”—IAKOBO 4:7.
1, 2. Eaa te ka anoanoia kia kite tatou no runga ia Satani e te au temoni?
TE ORAANGA i roto i to Iehova ao ou e mea mataora tikai te reira. Ka noo tatou mei ta te Atua i akakoro no tatou. Teianei ra, te noo nei tatou i roto i te ao na Satani e tana au temoni e akaaere nei. (2 Korinetia 4:4) Noatu kare tatou e kite mata ana ia ratou, te vai nei ratou e e mana maata to ratou.
2 I roto i teia pene, ka uriuri tatou eaa ta tatou ka rave kia piri vaitata ua rai kia Iehova, e kia rauka i te paruru ia tatou mei te akatere anga a Satani. Kua taputou mai a Iehova e ka tauturu aia ia tatou. Inara ka anoanoia tatou kia kite eaa te au ravenga ta Satani e te au temoni e rave nei, ei akavare e ei takino ia tatou.
“MEI TE LIONA NGUNGURU RA”
3. Eaa ta te Tiaporo e inangaro nei i te rave kia tatou?
3 Karanga a Satani e te akamori ua nei te tangata ia Iehova no ta ratou ka rauka mai, e ka akamutu tatou i te tavini ia Iehova me ngatā te aerenga. (E tatau ia Iobu 2:4, 5.) Me inangaro tetai tangata kia kite no runga ia Iehova, te kite maira a Satani e te au temoni, e ka tauta ratou i te arai iaia. Riri roa ratou me akatapu tetai tangata i tona oraanga kia tavini ia Iehova e kia papetitoia. Te akaaite ra te Pipiria i te Tiaporo ki te “liona ngunguru ra, i te kimi anga i te tangata e pou iaia.” (1 Petero 5:8) Te inangaro nei a Satani i te takore i to tatou pirianga kia Iehova.—Salamo 7:1, 2; 2 Timoteo 3:12.
Riri tikai a Satani me akatapu tatou i to tatou oraanga kia tavini ia Iehova
4, 5. (a) Eaa te kare e rauka ia Satani kia rave? (e) Eaa te aiteanga kia “patoi atu i te diabolo”?
4 Inara kare e tumuanga tau kia mataku tatou ia Satani e tana au temoni. Kua kotingaia e Iehova ta ratou ka rauka i te rave kia tatou. Taputou mai a Iehova e “e aronga maata rava” o te au Kerititiano mou, te ka ora mai mei roto i “te mate maata.” (Apokalupo 7:9, 14) Kare rava a te Tiaporo ravenga ei tāpu i te reira kia kore e tupu, no te mea te paruru nei a Iehova i Tona iti tangata.
5 Me piri vaitata ua rai tatou kia Iehova, kare e rauka ia Satani i te takore i to tatou pirianga Kiaia. Te akapapu maira te Tuatua a te Atua kia tatou e: “Tei ia kotou a Iehova, ko kotou i piri mai kiaia ra.” (2 Paraleipomeno 15:2; e tatau ia 1 Korinetia 10:13.) Manganui ua atu te au tane e te au vaine akarongo mou o mua ana, mei ia Abera, Enoka, Noa, Sara, e Mose, tei patoi i te Tiaporo na roto i te piri vaitata ua anga kia Iehova. (Ebera 11:4-40) Ka rauka katoa ia tatou kia akapera. Te taputou maira te Tuatua a te Atua: “E patoi atu i te diabolo, e nana e rere ke atu.”—Iakobo 4:7.
‘E KUKUMI ANGA TA TATOU’
6. Eaa ta Satani e rave ana ei akaparuparu ia tatou?
6 Noatu kua kite a Satani e kua araiia e Iehova tana ka rauka i te rave kia tatou, kare rai aia i tuku i te ‘au i te rave i tetai ua atu mea ei akaparuparu i to tatou pirianga ki te Atua. I teia tuatau, tuke tuke ta te Tiaporo au mataara e akavare nei i te tangata, e te taangaanga nei aia i taua au ravenga rai tana i taangaanga mai ana i te au tauatini mataiti i aereia mai ana. Eaa ra tetai pae o teia au ravenga?
7. Eaa te tumu e inangaro ei a Satani i te takinga kino i to Iehova iti tangata?
7 Kua tata te apotetoro a Ioane e: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Tei raro teia ao kino i te akatereanga a Satani, e te inangaro katoa nei aia kia riro nana e akatere i to Iehova iti tangata. (Mika 4:1; Ioane 15:19; Apokalupo 12:12, 17) Kua kite te Tiaporo e e taime poto ua tona e vai nei, no reira te akapakari nei aia i te taomianga ki runga ia tatou tataki tai, kia kore tatou e vai tiratiratu ki te Atua. Tetai taime ka timata tika ua mai te Tiaporo ia tatou, e i tetai au taime ka na roto mai i te tu kikite.
8. Eaa te ka anoanoia kia kite te au Kerititiano tataki tai?
8 I roto ia Ephesia 6:12 ka tatau tatou e: ‘E kukumianga ta tatou, ki te au vaerua kikino i te reva nei.’ E tamakianga ta tatou te au Kerititiano uaorai ki te Tiaporo e te au temoni. Ka anoanoia tatou kia kite e pouroa te aronga tei akatapu i to ratou oraanga kia Iehova, tei roto ratou i teia tamakianga. I roto i tana reta ki to Ephesia, kua raurau te apotetoro a Paulo i te au Kerititiano kia tu e kia patoi i te ravenga pakari a te tiaporo.—Ephesia 6:11, 13, 14.
9. Eaa ta Satani e te au temoni e umuumu nei te rave kia tatou?
9 Tuke tuke te mataara e tauta ana a Satani e te au temoni i te pikikaaia tatou. Noatu kua rauka ia tatou i te patoi i tetai ravenga a Satani, kare ra mei te mea e kare aia e autu ki rungao ia tatou na roto i tetai mataara ke mai. Ka umumu te Tiaporo kia kite eaa to tatou au tu paruparu, kia rauka iaia i te iki i te ereere ka tau no te opu ia tatou. Kare e tumuanga tau ka mou ei tatou i te Tiaporo, no te mea te apii maira te Pipiria ia tatou no runga i ta te Tiaporo au ravenga. (2 Korinetia 2:11; akara i te Au Manako Poto 31.) Tetai o teia ko te angaanga temoni.
AKAATEA TAKIRI MAI MEI TE AU TEMONI
10. (a) Eaa te angaanga temoni (e) Eaa ra to Iehova aerenga manako no runga i te angaanga temoni?
10 Ko te angaanga temoni te ō maira te au mea te ka akapiri atu i tetai ki te au temoni e tei kapiti mai te au peu mei te purepure, te kimi i te vaerua kino, te taumaa, angaanga manamana, me kore te ui ki tei mate. Te akakite maira te Pipiria e mea “viivii” tikai te angaanga temoni e auraka tatou kia ō atu ki te reira, ia tatou i roto i te akamorianga a Iehova. (Deuteronomi 18:10-12; Apokalupo 21:8) Ka anoanoia te au Kerititiano kia kopae takiri i te au tu peu ravarai e ō maira te angaanga temoni.—Roma 12:9.
11. Me inangaro tatou kia kite no runga i te au mea e ō maira te angaanga purepure, eaa ta te reira ka akatupu kia tatou?
11 Kua kite a Satani e me te reka ra tatou i te au peu purepure, ka māmā ua iaia i te akavare ia tatou kia ō ki roto i te au angaanga temoni. Ka riro tetai ua atu peu e ō maira te angaanga temoni ei takore i to tatou pirianga kia Iehova.
TAUTA NEI A SATANI I TE AKAVARE IA TATOU
12. Akapeea a Satani te akanauru anga i to tatou aerenga manako?
12 Te tauta nei a Satani i te akatupu i te manako ekoko ki roto i te tangata. Ka akatupu marie ua aia i te ekoko e rauka ua atu iaia i te akanauru i te tangata kia manako e ko “te kino ra e meitaki, e te meitaki ra e kino.” (Isaia 5:20) Te akatotoa nei te Tiaporo i te aerenga manako e kare te apiianga a te Pipiria e angaanga ana, e ka mataora atu tatou me kopae i to te Atua au turanga.
13. I akapeea a Satani i te akatupu anga i te manako ekoko?
13 Tetai ravenga meitaki roa atu e taangaanga nei a Satani, ko te akatotoa i te manako ekoko. Kua roa ake nei te tuatau i tona akatupu anga i teia. Roto i te kainga i Edene, kua akatupu aia i te manako ekoko i tona ui anga kia Eva e: “Koia ïa, kua tuatua mai te Atua e, Auraka korua e kai i to te au rakau katoa o te kainga nei?” (Genese 3:1) I muri mai i to Iobu tuatau, kua ui a Satani kia Iehova i mua i te au angera e: “E mataku oko kore ua ainei a Iobu i te Atua?” (Iobu 1:9) I muri ake i to Iesu papetito anga, kua timata atura a Satani iaia na ko atura e: “E Tamaiti koe na te Atua ra, ka karanga atu koe ki teianei au toka kia riro ei kai.”—Mataio 4:3.
14. Akapeea a Satani te akatupu anga i te manako ekoko, e kare te angaanga temoni e kino ana?
14 Teia tuatau, te akatupu nei rai te Tiaporo i te manako ekoko. Na roto i te akavare anga i te tangata e te meitaki ua ra tetai au tu angaanga temoni, kua rauka iaia i te akatupu i te manako ekoko e kare tikai e kino ana taua au peu ra. E kua vare katoa tetai au Kerititiano i teia e kua akapoiriia to ratou manako kia kore e kite i te kino ta teia ka akatupu. (2 Korinetia 11:3) Eaa ra ta tatou ka rave ei paruru ia tatou? Akapeea e rauka ai ia tatou te akapapu anga e kare tatou e vare ana i teia au ravenga a Satani? Ka akara ana tatou e rua nga ravenga te ka riro ei akavare ia tatou: te tamataora e te rapakau maki.
TAANGAANGA A SATANI I TO TATOU ANOANO NATURA EI AKAVARE IA TATOU
15. Akapeea tatou i te ō atu anga ki roto i te angaanga temoni na roto i ta tatou angaanga tamataora?
15 Teia tuatau, e maata te teata, vitio, porokaramu tivi, tarekareka i runga i te komupiuta, e te Initaneti te akaari ra i te au temoni, angaanga manamana, e te au vaerua kino. Ki te manganui, kare e kino ana teia au mea e tamataora ua. Kare ra ratou e kite ana e e mea kino kia ō mai te au temoni ki roto i to ratou oraanga. Ka riro katoa tetai i te ō atu ki roto i te angaanga temoni na roto i te au peu mei te akara etu, tatau kapu rima, te pere, e te akara ki roto i te au poro io, kia kite mei teaa to ratou oraanga a te tuatau ki mua. Te uuna nei te Tiaporo i te kino o teia au mea kia kore te tangata e kite, e kia manakoia e e mea umere tikai e te reka. Manako te tangata i reira e kare ua rai e kino ana kia akara i teia au peu temoni e te purepure, eiaa ra ratou e rave i te reira. No teaa i kino ei teia tu aerenga manako?—1 Korinetia 10:12.
16. Eaa te tumu ka patoi ei tatou i te au peu tamataora te akaari maira i te au angaanga temoni?
16 Kare e rauka ia Satani e te au temoni kia kite eaa to roto i to tatou manako. Ka kite ra ratou eaa ta tatou e inangaro ra e mei teaa te tu o to tatou manako, na roto i te au ikianga ka rave tatou no tatou uaorai, e no to tatou ngutuare tangata, e te tu tamataora ta tatou ka iki. Me ka iki tatou i te au teata, au imene, au puka no runga i te aronga purepure, te peu manamana, aronga tomoia e te temoni, vaine tautau, te vampire, e te vai atura, ka kite a Satani e te au temoni e te inangaro nei tatou kia kite no runga ia ratou. Ka rauka ia ratou i te akavare takiri ia tatou kia piri ki roto i te angaanga temoni.—E tatau ia Galatia 6:7.
17. Akapeea a Satani me taangaanga i to tatou au anoano kia meitaki ua te oraanga kopapa?
17 Ka rauka katoa ia Satani i te taangaanga i to tatou au anoano kia meitaki ua te oraanga kopapa. Teia tuatau, e manganui te rokoia nei e te au turanga maki. Penei kua aere ana tetai ki te are maki e te au taote, e kare i rauka te rapakau. (Mareko 5:25, 26) Penei no tei kore i rauka te rapakau, ka aere aia ki ko i tetai taunga maani vairakau me kore ka āriki ua aia i tetai ravenga e ō maira te angaanga temoni. Inara ka anoanoia tatou te au Kerititiano, kia matakite auraka e iki i te au ravenga rapakau e ō maira tetai ua atu au angaanga temoni.—Levitiku 19:31.
E irinaki ki runga ia Iehova me rokoia koe e te maki
18. Eaa te au ravenga rapakau anga ta te Kerititiano ka patoi?
18 Tetai aronga i Iseraela i taito, te rave ra ratou i te angaanga manamana. Akakite a Iehova kia ratou: “Kia oora mai oki i to kotou rima, e puroku au i oku mata ia kotou; e kia akamaata kotou i te au pure, kare au e akarongo atu.” (Isaia 1:15) Akamanako ana i teia—Kare rava a Iehova e akarongo atu ki ta ratou au pure! Kare tatou e inangaro i te rave i tetai au mea te ka takino i to tatou pirianga kia Iehova, kia kore aia e tauturu ia tatou, me maki tikai tatou. (Salamo 41:3) No reira kia akapapu tatou me e pirianga rai to te ravenga rapakau anga ta tatou e manako ra, ki te angaanga temoni me kore ki te au vaerua kino. (Mataio 6:13) Mei te mea e te ō maira te au ravenga purepure, kia patoi takiri tatou i te reira!—Akara i te Au Manako Poto 32.
AU TUA NO RUNGA I TE AU TEMONI
19. Akapeea te Tiaporo te akatupu anga i te mataku ki te manganui o te tangata?
19 Te manako ra tetai aronga e e mea tamanako ua te Tiaporo e te au temoni, kareka tetai pae, irinaki ratou e e mea tika tikai te reira no te mea kua tupu ana kia ratou. E manganui te tangata e noo nei ma te mataku i te au vaerua kino e kua riro ratou ei tuikaa ki teia au peu purepure. Tetai pae, te akatupu nei i te mataku i te au temoni na roto i te au tua no runga i te au mea kino ta te au temoni e rave nei ki te tangata. E umere ana te tangata me akarongo i teia au tua, inangaro ratou i te akakite atu ki etai ke. Riro teia au tua ei akatupu i te mataku i te Tiaporo.
20. Na roto i teea tu e piri atu ei tatou ki te akatotoaanga i te pikikaa a te Tiaporo?
20 Akamanako ana i teia—Inangaro a Satani kia mataku te tangata iaia. (2 Tesalonia 2:9, 10) E pikikaa aia, e kua kite aia akapeea me akanauru i te manako o te aronga e reka ana i te angaanga temoni, kia irinaki ratou i tana au pikikaa. Penei ka tua ratou no runga i tetai au mea e manako ra ratou e kua kite e kua rongo ratou. Me taokioki uaia rai te tua, maata roa atu te tuatua akarava ka ō mai. Kare tatou e inangaro i te tauturu ia Satani kia akatotoa i te mataku na roto i teia au tua pikikaa.—Ioane 8:44; 2 Timoteo 2:16.
21. Kare tatou e tua aere no runga i te au temoni, inara eaa ta tatou ka tuatua?
21 Mei te mea e kua kite ana tetai o to Iehova iti tangata i teia au peu temoni, eiaa aia e puka aere. Kare e tumuanga tau no to Iehova iti tangata kia mataku i tetai ua atu mea ta te Tiaporo e tana au temoni ka rave. Ka anoanoia ra kia akamou tatou ki runga ia Iesu e tona mana ta Iehova i oronga nona. (Ebera 12:2) Kare a Iesu i akariro ana i te au tua no runga i te au temoni ei puka reka anga nana ki tana au pipi. Kua akatinamou aia ki runga i te karere o te Patireia e “te peu taka ke a te Atua.”—Angaanga 2:11; Luka 8:1; Roma 1:11, 12.
22. Eaa taau e akakoro ra kia rave?
22 Eiaa tatou kia akangaropoina e ko to Satani akakoroanga, kia takore i to tatou pirianga kia Iehova. Ka tauta aia kia rave i tetai ua atu au mea kia tupu tana i akakoro. Inara kua kite ua tatou i ta te Tiaporo au ravenga e kua papa ua tatou i te patoi takiri i te au peu anake a te au temoni. Kare tatou e “tuku i ta te diabolo ngai kia o mai” ei akaparuparu i to tatou akakoroanga. (E tatau ia Ephesia 4:27.) Ae, me patoi tatou i te Tiaporo, kare tatou e topa ki roto i tana ereere, mari ra ka ora tatou i roto i ta Iehova paruruanga.—Ephesia 6:11.