Au Kite Patoi Atu i te Au Atua Pikikaa

“Te tuatua mairā Iehova, Ko kotou toku kite, e toku tavini i ikiia e au ra.”​—ISAIA 43:10.

1. Koai te Atua mou, e na teea au tu i teitei ravaʼi aia ki runga ake i te au atua e manganui te akamoriia ra i teia tuatau?

KOAI te Atua mou? I teia tuatau nei, te aro maira teia uianga puapinga maata i te au tangata ravarai. Noatu rai e te akamori ra te au tangata i te au atua tini rava, e Okotai ua te ka rauka i te oronga mai i te ora no tatou e ka oronga mai i te tuatau mataora ki mua no tatou. E Okotai ua te ka rauka kia tuatuaia e: “Nona oki to tatou ora, e i aaere ei, e i noo ei oki.” (Angaanga 17:28) E tika rava oki, e okotai ua Atua tei iaia te tika kia akamoriia. Mei ta te imene i te rangi i te puka o Apokalupo e tuatua maira: “E tau te kakā ia koe, [“e Iehova,” NW], e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.”​—Apokalupo 4:11.

2, 3. (a) I akapeea ta Satani akaaoanga pikikaa i to Iehova tika kia akamoriia? (e) Eaa te tupu anga o ta Eva ara nona e tana tamariki, e eaa te tupu anga no Satani?

² I te kainga i Edene, kua akaao pikikaa ua a Satani i to Iehova ra tika kia akamoriia. Na te taangaanga anga i tetai ovi, kua karanga atura aia kia Eva e me ka meameaau aia i ta Iehova ture e ka kai mei te rakau tei tureia ra e Iehova, ka aite atu aia uaorai ki te Atua. Ko tana au tuatua e: “Kua kite oki te Atua e, i te rā e kai ei korua i to reira, ka puera ïa to korua mata, e ka riro korua mei te Atua ra te tu, i te kite i te meitaki e te kino.” (Genese 3:5) Kua irinaki a Eva i ta te ovi e kua kai i te ua tei tureia ra.

³ Inara, kua pikikaa a Satani. (Ioane 8:44) Ko te tu anake ua tei riro a Eva “mei te Atua ra te tu” i tona rave anga i te ara kua rave aia uaorai i tana tika kia iki e eaa te meitaki e eaa te kino, ko tetai apinga ia tei tau ra kia akarukeia kia Iehova. E noatu rai ta Satani ra pikikaa, i te openga iora kua mate atu a Eva. No reira ko Satani anake tei puapingaia i ta Eva ara. Ko te tika e, ko ta Satani akakoro anga taiku koreia ra i te akavareanga ia Eva kia ara koia oki kia riro aia uaorai ei atua. I to Eva rave anga i te ara, kua riro koia te tangata mua tei aru ia Satani, e kare i roa kua kapiti atura Adamu kiaia. Ko te maata anga o ta raua tamariki kare ko te anau anakeia mai “i roto i te ara” mari katoa ra kua topa atu ki raro i to Satani mana, e i tetai tuatau poto ua, kua vai maira tetai ao katoa tei akataka keia ra mei te Atua mou.​—Genese 6:5; Salamo 51:5.

4. (a) Koai te atua o teianei ao? (e) Eaa te anoano rapurapuia ra?

⁴ Kua akapouia taua ao ra i te Vaipuke. (2 Petero 3:6) I muri mai i te Vaipuke ra, kua tupu mai te rua o te ao tei akataka keia ra mei ia Iehova, e te vai nei ia. Te tuatua nei te Puka Tapu no te reira e: “Te vai ua nei rai to te ao ravarai i raro ake i taua vaerua kino ra.” (1 Ioane 5:19) Na ta te reira patoianga i te vaerua e te reta o te ture a Iehova ra, te akono nei teianei ao i to Satani akakoro anga. Koia te atua o te reira. (2 Korinetia 4:4) Inara, ko tona tumu anga e atua mana kore ua aia. Kare e rauka iaia i te akariro kia mataora te au tangata me kare kia oronga i te ora no ratou ra; na Iehova anake ka raukaʼi i te rave i te reira. No reira, te au tangata te anoano ra kia akatupu i te oraanga meitaki e tetai ao meitaki atu ka tau kia kite na mua e ko Iehova te Atua mou e ka apii ei kia rave i tona anoano. (Salamo 37:18, 27, 28; Koheleta 12:13) No reira te vaira, tetai umuumu anga rapurapu no te au tane e te au vaine akarongo kia akakite, me kare kia tutu aere i te tuatua mou, no runga ia Iehova.

5. Eaa te “urupu maata i kite” ta Paulo i taiku ra? E akakite mai i tetai papaki o te aronga tana i papa maira.

⁵ Mei te akamataanga mairai, kua mama mai taua aronga tiratiratu ra ki te ao nei. Kua oronga maira te apotetoro ko Paulo, i tetai papaanga roa no ratou ia Ebera pene 11, e kua tapa ia ratou ko “taua urupu maata i kite nei.” (Ebera 12:1) Ko te rua o ta Adamu raua ko Eva tamaiti, koia a Abela, te mea mua ia i runga i ta Paulo papaanga. Ko Enoka raua ko Noa katoa oki tei taikuia mei te tuatau i mua ake i te Vaipuke. (Ebera 11:4, 5, 7) Ko Aberahama tei matauia, koia te tupuna o te kopu ngati Iuda ra. Kua riro a Aberahama tei tapaia ra e, “e oa no te Atua” e tupuna no Iesu, koia “te kite mou e te tuatua-mou.”​—Iakobo 2:23; Apokalupo 3:14.

Ta Aberahama Akakite Anga no te Tuatua Mou

6, 7. Na roto i teea au tu to Aberahama oraanga e te au angaanga i riro ei ei kite e ko Iehova te Atua mou?

⁶ Akapeea ta Aberahama tavini anga ei kite? Na tona akarongo maroiroi e te akarongo tiratiratu ia Iehova. I te akaue anga iaia kia akaruke i te oire o Ura e kia noo i te toenga o tona oraanga ki tetai enua mamao ra, kua akarongo a Aberahama. (Genese 15:7; Angaanga 7:2-4) E putuputu, te au kopu tangata ori aere ua ra i te akaruke i to ratou oraanga ori aere e ka noo tamou atu ki te oraanga tinamou i te oire. No reira, i to Aberahama akaruke anga i te oire e kia noo atu i te oraanga ki roto i te au puakapa, kua oronga aia i te akapapu anga ririnui i tona irinaki anga i te Atua ko Iehova. Kua riro tona akarongo ei kite ki te aronga akara atura. Kua akameitaki maata a Iehova ia Aberahama no tona akarongo. Noatu rai e kua noo puakapa ua, kua apingaia a Aberahama. I te apai ke angaia a Lota e tona ngutuare tangata ei tuikaa, kua akaautu atura Iehova ia Aberahama i tana arumaki anga, e kua rauka iaia i te akaora mai ia ratou. Kua anau maira te vaine a Aberahama i tetai tamaroa i tona ruaine anga, e no reira kua akapapuia maira ta Iehova taputou e ka riro a Aberahama ei metua no tetai uanga. Na roto mai ia Aberahama, kua kite te au tangata e e Atua ora a Iehova tei akatupu ra i tana au taputou.​—Genese 12:1-3; 14:14-16; 21:1-7.

⁷ I te oki mai anga mei te akaoraanga ia Lota, kua aravei atura Aberahama ia Melekizedeka, koia te ariki o Salema (tei tapaia ra ko Ierusalema i muri iora), tei ariki mai ia Aberahama, i te na ko anga e: “Kia akameitakiia Aberama a te Atua Teitei Rava.” Kua aravei katoa atu te ariki o Sodoma iaia e kua anoano i te oronga atu i etai apinga aroa nana. Kare a Aberahama i rave. No teaa ra? Kare aia i anoano kia ekokoia e no ea mai te Tumu o tona au akameitakianga. Kua tuatua aia: “Kua taputou au ki te Atua teitei ra, kia Iehova, ki te Pu o te rangi e te enua nei, Kare au e rave ua atu i tetai manga taura iti i te apinga ravarai naau na, e tae ua atu ki tetai taura itiki tamaka ra, ko te tuatua aea oki koe, E apinga maata ta Aberama iaku.” (Genese 14:17-24; akaaite ia NW.) Mei teaa ra tetai kite meitaki ko Aberahama!

Tetai Iti Tangata e Au Kite

8. I akapeea ta Mose akaari anga i te akarongo maata ia Iehova ra?

⁸ Ko Mose, e anaunga no Aberahama, kua mama katoa mai i runga i ta Paulo papaanga no te au kite ra. Kua akaariu atu a Mose i tona tua ki te au apinganui o Aiphiti e i muri akera kua aro mataku kore atu i te tutara o taua mana maata o te ao ra kia arataki atu i te tamariki a Iseraela ki te tu rangatira. No ea mai tona maroiroi? No tona akarongo. Te tuatua ra a Paulo e: “I maroiroi rava atura [a Mose] i te akara anga atu iaia, i tei kore e kitea kia akara ra.” (Ebera 11:27) Kua akara uaia te au atua o Aiphiti, e kua amiriia. Mei teia tuatau nei, te manako maata ra te au tangata i ta ratou au tiki. Inara ko Iehova, noatu e akara koreia, e Atua tika maata atu aia kia Mose i taua au atua pikikaa katoatoa ra. Kare o Mose ekoko anga e i vai ana a Iehova e ka tutaki aia i Tona aronga akamori. (Ebera 11:6) Kua riro mai a Mose ei tetai kite meitaki rava.

9. E akapeea ta te iti tangata o Iseraela rave tavini anga kia Iehova?

⁹ I muri ake i tana aratakianga i to Iseraela ki te tu rangatira, kua riro ko Mose te rotopu no tetai koreromotu i rotopu ia Iehova e te au anaunga o Aberahama no roto mai ia ­Iakoba. Ei tupuanga, kua vai mai te iti tangata o Iseraela ei apinga akaperepere maata na Iehova. (Exodo 19:5, 6) No te taime mua, kua orongaia tetai akakite anga na te iti tangata. Kua akonoia ta Iehova au tuatua na roto ia Isaia, i etai 800 mataiti i muri akera na roto i te kaveinga mei te akamataanga mai taua iti tangata ra: “Te tuatua mairā Iehova, Ko kotou toku kite, e toku tavini i ikiia e au ra: kia kite kotou, e kia akarongo mai iaku, e kia kite e, ko Au ïa.” (Isaia 43:10) Akapeea teia iti tangata ou i te tavini anga ei au kite no Iehova? Na to ratou akarongo e te akono anga e na roto i ta Iehova ra au angaanga i rave no ratou.

10. Na roto i teea tu ta Iehova ra au angaanga ririnui no to Iseraela i te oronga anga i tetai kite, e eaa te au tupu anga?

¹⁰ I etai 40 mataiti i muri ake i tona akamataanga, te vaitata ra a Iseraela i te noo ki te Enua Taputouia ra. Kua aere atura te aronga tutaka i te akara i te oire o Ieriko, e kua riro na Rahaba koia ra tetai no Ieriko, i paruru ia ratou. Eaa te tumu? Kua karanga aia e: “Kua akarongo ana oki matou e, kua tamarōia e Iehova te Tai Muramura ia kotou, ia kotou i aere mai mei Aiphiti ra; e ta kotou oki ravenga i nga ariki toko rua o te ngati Amori i tetai pae Ioridana ra, ko Sihona, e ko Oga, ko tei pou takiri rava ïa ia kotou ra. Tei to matou rongo anga i taua tuatua ra, ngaevaeva ua io nei to matou ngakau, kare rava e maroiroi i toe ki roto i te tangata katoa ra ia kotou: ko to kotou Atua ra oki ko Iehova, ko te Atua ïa no te rangi i runga ra, e no raro katoa nei no te enua.” (Iosua 2:10, 11) Na te ripoti no ta Iehova ra au angaanga mana ririnui i akakeu ia Rahaba e tona ngutuare tangata kia akaruke ia Ieriko e tona au atua pikikaa e kia akamori ia Iehova ma to Iseraela katoa ra. Te taka meitaki ra, kua oronga a Iehova i tetai akakite anga ririnui na roto i to Iseraela ra.​—Iosua 6:25.

11. Eaa te apainga a te au metua Iseraela katoatoa no te akakitekite anga?

¹¹ I te tuatau te vaira to Iseraela i Aiphiti, kua tonokia e Iehova a Mose kia Pharao e kua na ko atura: “Kua tuatua mairai a Iehova kia Mose, Ka aere ki roto kia Pharao ra: kua akaketaketa oki au i tona ngakau, e te ngakau o tona au tavini, kia akakite atu au i taua au akairo naku nei ki rotopu ia ratou: E kia akakite oki koe ki nga taringa o taau tamaiti, e te tamaiti a taau ra tamaiti, i taku i rave i to Aiphiti, e taku au akairo taku i rave i rotopu ia ratou; kia kite oki kotou e, ko au ko Iehova.” (Exodo 10:1, 2) Ka tuatua to Iseraela aronga akarongo ra ki ta ratou tamariki i ta Iehova au angaanga mana ra. I muri maira, kua tuatua atu ta ratou tamariki i te reira ki ta ratou au tamariki, e ka raveia te reira mei tera uki ki tera uki. No te reira, ka maaraaraia ta Iehova ra au angaanga mana ririnui. I teia tuatau katoa oki, tei te au metua te apainga no te akakitekiteanga ki ta ratou tamariki.​—Deuteronomi 6:4-7; Maseli 22:6.

12. Akapeea te akameitakianga a Iehova ia Solomona e to Iseraela i riro ei ei tetai akakiteanga?

¹² Kua riro ta Iehova ra akameitakianga maata i to Iseraela iaia e tiratiratu ra, ei tetai kite ki to te pa enua i takapini ra. Mei ta Mose i tuatua i muri ake i te akakiteanga i ta Iehova au akameitakianga i taputou ra: “E ka kite to te ao katoa nei e, kua tapaia koe i te ingoa o Iehova; e ka mataku ratou ia koe.” (Deuteronomi 28:10) Kua orongaia te pakari e te apinganui kia Solomona no tona akarongo. Kua puapingaia te iti tangata ra i raro ake iaia e kua rekareka i te au no te tuatau roa. Ka tatau tatou no te reira tuatau e: “Kua aere mai oki te tangata ravarai e akarongo i te tuatua pakari a Solomona, no ko i te ui ariki katoa o te enua nei, ko tei akarongo i te tuatua karape nana ra.” (1 Ariki 4:25, 29, 30, 34) Ko tetai tei rongo maataia i roto i te aronga tei aere mai kia Solomona ko te ariki vaine o Seba. I muri ake i tona uaorai akaraanga i te akameitakianga a Iehova i te iti tangata ra e tona ariki, kua karanga aia: “Kia akameitakiia to Atua, ko Iehova, ko tei mataora mai ia koe, e kua akanoo ia koe ki runga i tona terono ei ariki na to Atua na Iehova. No te mea kua aroa to Atua ia Iseraela.”​—2 Paraleipomeno 9:8.

13. Penei eaa ta Iseraela akakiteanga maata, e akapeea tatou i te puapinga anga i te reira i teia tuatau nei?

¹³ Kua taiku te apotetoro ko Paulo i tetai apinga penei ko tetai akakiteanga maata ia a to Iseraela. I te uriuri manako anga i to Iseraela kopapa ra ma te putuputuanga Kerititiano i Roma ra, kua karanga aia: “Ko te tuatua ra a te Atua i tukuia mai ia ratou ra, te mea maata.” (Roma 3:1, 2) Akamata mai ia Mose, kua akauruia etai aronga Iseraela tiratiratu ra kia tata i te au akonoanga a Iehova ra ma to Iseraela, pera katoa tana akoanga, tana au ture, e tana au totou. Na roto i teia au tataanga kua akakite taua aronga tata i taito ra ki te au uki katoatoa o muri maira​—kapiti katoa to tatou i teia tuatau nei—​e okotai ua Atua, e ko Iehova tona ingoa.​—Daniela 12:9; 1 Petero 1:10-12.

14. Eaa ra tetai papaki tei rave ra ei kite no Iehova i takinga kinoiaʼi?

¹⁴ E mea mataora kore ra, kua putuputu to Iseraela i te kore e akono i te akarongo, e i reira kua tono atura a Iehova i te au kite ki tona uaorai iti tangata. E manganui to teia aronga tei takinga kinoia. Kua na ko maira Paulo e ko tetai papaki “e mate maata to tetai pae i te akavaavaa, e te pāpā, e te ruru, e te tapeka i roto i te are tapekaanga.” (Ebera 11:36) E au kite tiratiratu tikai! E mea mii ra e e putuputu to ratou takinga kinoanga i te tupu mai to ratou au mema taeake no te iti tangata ikiia o Iehova! (Mataio 23:31, 37) Ko te tika, e kua riro te ara o taua iti tangata ra kia maata e i te 607 M.T.N., kua tukuia e Iehova to Babulonia kia akapou ia Ierusalema ma tona iero katoa e kua taki atu i te maata anga o to Iseraela tei ora maira kia riro i te tuikaa anga. (Ieremia 20:4; 21:10) Ko te reira ainei te openga o te akakite anga a taua iti tangata ra i te ingoa o Iehova? Kare.

E Timataanga i te Au Atua

15. Akapeea te oronga anga i te kite noatu rai i roto i te tu tuikaa anga i Babulonia?

¹⁵ Noatu rai i te tuikaa anga i Babulonia, kare te au mema tiratiratu o taua iti tangata ra i tapupu i te akakite anga i to Iehova ra Atua anga e te mana. Ei akatauanga, kua akakite mataku kore ua a Daniela i te aiteanga o te au moemoea a Nebukanesa, kua akataka atu i te tataanga i runga i te paruru ra na Belesazara, e kare i akatika kia kore e pure ki mua ia Dariu. Pera katoa oki nga tangata Epera e toru, i te koreanga e tupou ki mua i tetai tiki ra, kua oronga i tetai akakite anga umere kia Nebukanesa.​—Daniela 3:13-18; 5:13-29; 6:4-27.

16. I akapeea ta Iehova totou anga i te oki akaou anga to Iseraela ki to ratou enua, e eaa te akakoro anga o teia oki anga?

¹⁶ Inara, kua akakoro a Iehova e kia rave akaouia tetai akakite anga na te iti tangata ki runga i te enua o Iseraela. Kua tataia e Ezekiela, koia tei totou ra i roto i te au ngati Iuda tuikaaia i Babulonia ra, i ta Iehova akakoro anga no te enua akataneaia ra: “E naku e akamaata i te tangata ia kotou, i te ngutuare katoatoa o Iseraela e ope rava ake: e tangataia te au oire, e te au ngai pou, e patuia ïa.” (Ezekiela 36:10) Eaa ra a Iehova ka rave ei i teia? Ko te mea mua ei akakite i tona uaorai ingoa. Na roto ia Ezekiela kua tuatua aia: “Kare no kotou i akaperaʼi au, e te ngutuare o Iseraela, no toku nei ra ingoa tapu, i tei akaviiviiia e kotou i rotopu i te au etene.”​—Ezekiela 36:22; Ieremia 50:28.

17. Eaa te au tumu turuanga a te au tuatua a Isaia 43:10?

¹⁷ No te totouanga i to Iseraela oki akaou anga mei te tuikaa anga i Babulonia ra i akauruiaʼi te peroveta ko Isaia kia tata i te au tuatua ia Isaia 43:10, i te na ko anga e ko Iseraela te kite o Iehova, tana tavini. Ia Isaia 43 e te 44, te akatakaia maira a Iehova ei Tei Anga mai ia Iseraela, tei Akatupu, te Atua, Tei Tapu, te Akaora, tei Oko akaou, te Ariki, e Tei Anga. (Isaia 43:3, 14, 15; 44:2) Kua akatika uaia to Iseraela tuikaa anga no te putuputu te iti tangata i te kore e akakaka iaia ei pera. Inara, te vaira ratou ei au tangata nona. I tuatua oki a Iehova kia ratou: “Auraka e mataku, kua akaoraia koe e au; naku i tapa i toou ingoa na; noku koe.” (Isaia 43:1) Ka ope ra to Iseraela tuikaa anga ki Babulonia.

18. I akapeea te matara anga o Iseraela mei Babulonia mai i te akapapu anga e ko Iehova anake te Atua mou?

¹⁸ E tika rava, kua akariroia e Iehova te matara anga o Iseraela mei Babulonia mai ei tetai timataanga i te au atua ra. Kua akaaoia e ia te au atua pikikaa o te pa enua ra kia apai mai i to ratou au kite, e kua tapa aia ia Iseraela ei kite nona. (Isaia 43:9, 12) I tana akakore anga i te au arai o to Iseraela tuikaa anga, kua akapapu aia e ko te au atua o Babulonia kare ua ia i te au atua e koia anake ra te Atua mou. (Isaia 43:14, 15) I etai 200 mataiti i mua ake i te tupu anga te reira, kua tapa aia ia Kuro o Peresia ra ei tavini nona i te akamataraanga i te ngati Iuda, kua oronga aia i tetai atu akapapu anga i tona Atua anga. (Isaia 44:28) Ka akamataraia a Iseraela. No teaa ra? Te akataka maira Iehova: “Na ratou [na Iseraela] e akameitaki mai iaku.” (Isaia 43:21) Ka oronga katoa mai te reira i tetai atu tuatau no tetai akakite anga.

19. Eaa te kite tei orongaia e Kuro i te patianga i to Iseraela kia oki akaou ki Ierusalema e na te au angaanga a te au ngati Iuda i muri ake i taua oki akaou anga ra?

¹⁹ I te tae anga te tuatau, kua autu atura a Kuro o Peresia ki rungao ia Babulonia mei tei totouia ra. Ko Kuro, noatu rai e peikani aia, kua akakite i to Iehova ra Atua anga i tana oronga anga i te akakite anga ki te au ngati Iuda i Babulonia ra e: “Koai tei toe i roto ia kotou i tona katoa au tangata na? Kia piri mai oki tona Atua iaia, e aere aia ki runga ki Ierusalema i Iuda ra, ka akatu ei i te are no te Atua o Iseraela o Iseraela no Iehova, ko te Atua aia, i Ierusalema.” (Ezera 1:3) E manganui te ngati Iuda i akarongo. Kua oki ratou i te aerenga roa ki te Enua Taputouia e kua akatu i te atarau ki runga i te turanga o te iero taito ra. Noatu rai te akamaroiroi koreanga e te patoianga ketaketa, kua rauka ia ratou i te openga i te patu akaou i te iero e te oire o Ierusalema ra. Kua tupu teia pouroa, mei ta Iehova uaorai i tuatua ra, “kare i te ririnui, kare rai i te mana, na [tona] Vaerua ra.” (Zekaria 4:6) Na teia au akatupu anga i oronga mai tetai atu akapapu anga e ko Iehova ra te Atua mou.

20. Noatu rai to Iseraela au tu paruparu, eaa te ka rauka kia tuatuaia no to ratou orongaanga i tetai kite i te ingoa o Iehova i te ao taito ra?

²⁰ No reira, kua tamou ua atura a Iehova i te taangaanga ia Iseraela ei kite nona, noatu rai e iti tangata apa ua e i etai taime e au tangata meameaau. I te ao i mua ake i te akonoanga Kerititiano ra, ko taua iti tangata ra, ma tona iero e te kau taunga, kua mou mai ei te ngai no te akamori mou i teianei ao. Noatu koai e tatau i te au Tuatua Tapu Epera i te au angaanga a Iehova ra i te pirianga kia Iseraela kare rava e ekoko anga e okotai ua Atua mou, e ko tona ingoa ko Iehova ia. (Deuteronomi 6:4; Zekaria 14:9) Inara, e akakite anga maata atu te ka raveia ki to Iehova ingoa, e ka uriuri manako tatou i teia i te atikara te aru mai nei.

Te Maara Ainei Ia Koe?

◻ Akapeea ta Aberahama akakite anga e ko Iehova te Atua mou?

◻ Eaa to Mose tu meitaki rava i riro ei aia ei kite tiratiratu?

◻ Na teea au tu ta Iseraela oronga anga i te akakite anga a te iti tangata ia Iehova?

◻ I akapeea te akaari anga a te matara anga o Iseraela mei Babulonia e ko Iehova te Atua mou anake?

[Tutu i te kapi 10]

Na tona akarongo e te akono anga, kua oronga a Aberahama i tetai kite meitaki rava i to Iehova Atua anga