Te Kite Maira Ainei a Iehova i Taau e Rave Ra?

AKAPEEA koe me pau i taua uianga ra? E manganui te ka tuatua e: ‘Kua irinaki au e kua kite te Atua i te au angaanga a te au tangata mei ia Mose, Gideona, e Davida, inara te ekoko nei au e kare aia e inangaro mai i tetai apinga tei rauka iaku i te rave. Kare au e ko Mose, Gideona, me kare ko Davida.’

E tika ia e kua rave etai au tangata tiratiratu i te au tuatau o te Pipiria i te au angaanga umere no te akarongo ra. Kua ‘pou ia ratou te au basileia, kua mopani i te vaa o te au liona, kua tamate i te ririnui i o te ai, kua ora i te mata koke ra.’ (Ebera 11:33, 34) Inara, ko tetai kua akaari mai i to ratou akarongo na te au mataara tuke anga, e kua akapapu mai te Pipiria kia tatou e te kite katoa maira te Atua i ta ratou au angaanga ma te akarongo. Na te akatutuanga, e akamanako ana i te au akaraanga Tuatua Tapu o tetai tiaki mamoe, tetai peroveta, e tetai vaine takaua.

Kua Oronga Tetai Tiaki Mamoe i Tetai Atinga

Eaa taau e maara ra no runga ia Abela, te rua o ta Adamu raua ko Eva tamaiti? Penei te maara ra ia koe e kua mate aia i tetai matenga taiaia, ko tetai apinga e tokoiti ua ia tatou te ka kite. Inara kua kite muaia a Abela e te Atua no tetai tumuanga ke.

I tetai ra, kua apai atu a Abela i etai o te au animara meitaki rava atu o tana anana e kua oronga atu ei atinga ki te Atua. Penei te manakoia ra tana apinga oronga ei apinga meangiti ua i teia tuatau, inara kua kite mai ra a Iehova i te reira e kua akakite mai i tona mareka anga. Inara, kare ko te reira ua. Vaitata e a tauatini mataiti i muri mai, kua akauru a Iehova i te apotetoro ko Paulo kia tata i te reira ki roto i te puka Ebera. I muri ake i te au mataiti e manganui, kare i ngaropoina ana i te Atua taua atinga meangiti ra!​—Ebera 6:10; 11:4.

Akapeea a Abela i te iki anga e eaa te tu atinga te ka orongaia? Kare te Pipiria i akakite mai ana, inara e mea tau kia manako pakari no runga i te tumu. E tangata tiaki mamoe aia, no reira kare i tapapa koreia ana te reira e kua oronga aia i etai o tana anana. Inara, e akamanako ana e kua oronga aia i te mea meitaki tikai​—e “tei matu oki.” (Genese 4:4) Penei kua rauka katoa te reira i tona akamaaraanga i ta Iehova au tuatua ki te ovi i te kainga Edene e: “Ka tuku oki au i te ke ia korua ko te vaine, e to uanga e tona uanga; nana e akaparuparu i to mimiti, e naau e akaparuparu i tona pooavae.” (Genese 3:15; Apokalupo 12:9) Noatu e kare i marama ana i te akatakaanga i “te vaine” e tona “uanga,” penei kua kite a Abela e te ‘akaparuparu anga i te pooavae’ o te uanga a te vaine ra ka piri atu ki te akamaringi anga i te toto. Kua kite papu tikai aia e kare e puapinga maata ana tetai ua atu apinga i to te au mea ora. Tei puapinga maata atu, ko te atinga tana i oronga ana e mea tau tikai ia.

Mei ia Abela rai, te oronga ra te au Kerititiano i teia tuatau i te au atinga ki te Atua. Te oronga ra ratou, kare i te mamoe momua o te anana, mari ra ‘te atinga akameitaki, koia oki ta te vaa nei, i te akapaatu anga i [to te Atua] ingoa.’ (Ebera 13:15) Te akapaatu nei to tatou vaa ia tatou e akakite aere ra i to tatou akarongo ki tetai ke.

Ka inangaro ainei koe i te akamako i te tu o taau atinga? No reira e oronga i te manako meitaki ki te au anoano o te au tangata i toou ngai. Eaa ta ratou e manamanata ra? To ratou inangaro? Eaa te au turanga no te tuatua Pipiria te marekaia ra e ratou? I te tuatau akakiteanga taki tai, e akara i te aronga i atoroia taau i aravei ana ma te akakoroanga kia akameitaki atu i toou puapinga. E me tuatua koe no runga ia Iehova, e rave i te reira ma te irinaki papu, mei te ngakau atu. E akariro i taau atinga ei ‘atinga akameitaki’ tikai.

Tutu Aere Tetai Peroveta ki te Au Tangata Ariki Kore

E akamanako ana i teianei i te peroveta ko Enoka. Penei koia anake ua rai ei kite no te Atua ra ko Iehova. Mei ia Enoka rai, ainei koe, ko koe anake ua ra te mema o toou ngutuare tangata te tavini tiratiratu ra ia Iehova? Ko koe anake ua ainei te tangata apii i roto i toou pupu me kare te tangata angaanga i te ngai te angaanga ra koe tei aru i te au kaveinga Pipiria? Me koia ia, penei ka aro atu koe i te au akaaoanga. Penei ka raurau mai te au oa, te kopu tangata, te au oa apii, me kare te au oa angaanga kia aati koe i te au ture a te Atua. “Kare e tangata e kite eaa taau e rave ra,” penei ko ta ratou ia ka tuatua mai. “Kare matou e akakite.” Penei ka maro mai ratou e e neneva i te manamanata i te au turanga tau o te Pipiria no te mea kare te Atua e manako mai ana e eaa taau e rave ra. I te riri anga e kare koe i manako ana e i rave ana mei ia ratou rai, penei ka rave ratou i te au mea ravarai ma to ratou maroiroi i te taparuparu i toou tu ngaueue kore.

E tika rai, kare i te mea ngoie i te aro atu i taua tu taomianga ra, inara ka rauka ia. E tamanako ana ia Enoka, te itu o te tangata i roto i te akapapa anga mei ia Adamu maira. (Iuda 14) I te taeanga te tuatau i anauia ai a Enoka, te maata anga o te au tangata e kite kore i te akama. E kino tikai ta ratou tuatua; to ratou tu e “tuatua māro.” (Iuda 15) Kua rave ratou mei ta te au tangata e manganui e rave nei i teia tuatau.

Akapeea a Enoka i te autu anga? Ko te pau anga ki taua uianga ra ta tatou e inangaro ra i teia tuatau. Noatu e ko Enoka anake ua te tangata i runga i te enua tei akamori ana ia Iehova, kare tikai aia e koia anake ua. Kua aaere a Enoka ma te Atua.​—Genese 5:22.

Te akamareka anga i te Atua ko to Enoka manakoia no te oraanga. Kua kite aia e ko te aaerenga ma te Atua e maata rava atu te aiteanga i te akono ua anga i tetai oraanga ma, e te tau. Te tapapa ra a Iehova kia tutu aere aia. (Iuda 14, 15) Te anoanoia ra kia akamatakiteia te au tangata e ko ta ratou au angaanga akono kore i te Atua te kiteaia ra. Kua rave ua atu a Enoka i te aaere ma te Atua e tere atu i te 300 mataiti​—tei roa atu i tetai ia tatou i te akakoromaki anga. Te tae ua atu anga ki tona mate, kua rave ua atu aia i te aaere anga ma te Atua.​—Genese 5:23, 24.

Mei ia Enoka rai, e angaanga tutu aere katoa ta tatou. (Mataio 24:14) Kapiti atu ki te akakite anga mei tera are ki tera are, ka tauta tatou i te itae i te au kopu tangata, te au oa pitiniti, e te au oa apii ma te tuatua meitaki. Inara, i tetai taime, penei ka tapupu tatou i te tuatua. Ko koe ainei tetai? Auraka e taitaia. E aru i te au Kerititiano mua, e pure ki te Atua no te mataku kore. (Angaanga 4:29) Auraka rava e ngaropoina e ia tatou e aaere ra ma te Atua, kare roa e ko koe anake ua.

Kua Akapapa Tetai Vaine Takaua i te Kai

E akamanako ana, kua rauka i tetai vaine takaua kare i akakiteia mai te ingoa te au tutaki anga no te mea oki kua akapapa aia i tetai kai ngoie ua! Kare aia i te ngati Iseraela, inara e vaine ke tei ora ana i te tai ngauru anere mataiti M.T.N. i te taoni i Zarephata. Te vaitata ra ki te openga o te tuatau maro e te onge, te pou ua atura te kai a te vaine takaua. Ko tei toe mai nana ra ko tetai manga varaoa okotai rima i ki e te manga inu kia maani e tai ua kainga nana uaorai e na tana tamaiti.

I teia taime nei, i aere atu ei tetai tangata atoro ra. Ko te peroveta a te Atua ko Elia, tei pati i tetai manga tuanga kai a te vaine takaua ra. Kare e rava ana nana e tana tamaiti, e kare oki ana apinga i toe mai kia oronga atu na te manuiri. Inara kua akapapu atura a Elia kiaia ra, i ta Iehova i tuatua mai, e me ka tua aia i tana kai kiaia, kare rava raua ko tana tamaiti e onge akaou. Te inangaroia ra te akarongo kia irinaki e te kite maira te Atua o Iseraela iaia, e vaine takaua ke ra. Inara, kua irinaki aia ia Elia, e kua tutaki a Iehova iaia: “Kare oki taua paero faraoa ra i iti, kare oki te āriki inu i pou, i ta Iehova oki i tuatua mai ia Elia.” Kua ki putuputu te kai a te vaine e tana tamaiti e tae ua atu te openga o te onge.​—1 Ariki 17:8-16.

Inara, te tatari ra tetai ua atu akameitaki anga i te vaine takaua. I tetai tuatau i muri ake i taua temeio ra, kua makiia tana tamaiti akaperepere e kua mate atura. Kua akakeuia ma te mii, kua pati akatenga atu a Elia kia Iehova kia akaora akaou mai i te tamaiti. (1 Ariki 17:17-24) Te umuumuia ra tetai temeio aite koreia te tupu anga. Kare e rekoti no tetai ua atu tangata tei akatuia i mua ana! Ka akaari akaou ainei a Iehova i te tu aroa ki teia vaine takaua ke nei? Kua pera rai aia. Kua akamanaia a Elia e Iehova kia akaora akaou i te tamaiti. Kua tuatua a Iesu no runga i teia vaine takaua tei akameitakiia e: ‘E manganui te vaine takaua i Iseraela . . . tonokia atu a Elia . . . ki tetai vaine takaua i Zarephata i Sidona.’​—Luka 4:25, 26.

Te turanga i te pae moni i teia tuatau kare e tinamou tikai ana, noatu i te au enua e angaanga tetai. Kua akakore etai au taokotaianga maata i te aronga angaanga tei riro ana ei aronga angaanga tiratiratu i te au mataiti. I te ariu atu anga ki te manakonako no te rava kore te angaanga, penei ka timataia tetai Kerititiano kia akapou maataia te taime i te angaanga, te manako anga e ka akono ua rai tana ngai angaanga iaia. I te rave anga i te reira penei e kare ona taime i te aere atu ki te au uipaanga Kerititiano, kia piri atu ki roto i te angaanga koro, me kare kia akono i te au anoano i te pae manako e te pae vaerua o tona ngutuare. Inara, kua manako aia e ka tau kia mou tamou aia i tana angaanga noatu e eaa te au tupuanga.

Ko tetai Kerititiano tei roto i taua turanga ngata i te pae moni e tika anga rai kia manako maata. E mea ngata kia rauka tetai ngai angaanga i teia tuatau. Te maata anga ia tatou kare e aruaru ana i te apinganui, inara mei te vaine takaua i Zarephata, te inangaro ra tatou i te tuku i te kai ki runga i te kaingakai. Inara, kua akamaara mai te apotetoro ko Paulo kia tatou e kua tuatua te Atua e: “Kare rava au e akaruke atu ia koe, kare oki au e taka ke ia koe, kare, kare rava atu.” Ka rauka ia tatou i te tuatua ma te irinaki e: “Ko Iehova toku tauturu, kare au e mataku; eaa ta te tangata kia rave mai iaku?” (Ebera 13:5, 6) Kua tuku tikai a Paulo i tona oraanga ki runga i taua taputou ra, e kua akono rai a Iehova iaia. Ka rave te Atua i te reira kia tatou me kare oki tatou e akaruke iaia.

Penei te manako ra tatou e kare rava ta tatou au angaanga e aite ana mei taua aronga pae vaerua takitai ra mei ia Mose, Gideona, e Davida, inara ka rauka ia tatou i te aru i to ratou akarongo. E ka rauka ia tatou kia maara i te au angaanga ngoie no te akarongo ta Abela, Enoka, e te vaine takaua i Zarephata i rave ana. Te manako maira a Iehova i te au angaanga katoatoa o te akarongo​—pera rai te au angaanga meangiti. Me patoi tetai tangata apii te mataku ra i te Atua i te ariki i te au apinga akakona mei te aronga taomi ra, me patoi tetai Kerititiano angaanga ra i te au akameamea anga tau kore i te ngai angaanga, me kare me tae atu tetai Kite ruaine tiratiratu ra ki te au uipaanga a te putuputuanga noatu te roiroi e te makimaki ra, te kite maira a Iehova i te reira. E te rekareka ra aia.​—Maseli 27:11.

Kua Kite Ainei Koe Eaa ta Tetai e Rave Ra?

Ae, te kite maira a Iehova e eaa ta tatou e rave ra. No reira, ei aronga aru i te Atua, ka tau kia vai araara ua tatou i te kite i te au tauta anga a tetai ke. (Ephesia 5:1) Eaa ka kore ei e akara vaitata i te au akaaoanga e aro atura toou au taeake Kerititiano kia tae atu ki te au uipaanga a te putuputuanga, kia piri ki roto i te angaanga orometua koro, noatu rai te raveanga i ta ratou au angaanga i te au ra ravarai?

I reira, e akakite atu ki toou au taeake akamori o Iehova e te ariki maata ra koe i ta ratou au tauta anga. Ka rekareka ratou e te kite ra koe, e no taau manako anga penei ka riro ia ei akapapu anga kia ratou e te kite katoa maira a Iehova.