Tatauanga Pipiria​—E Puapinga e te Mareka Anga

“Kia [tatau] tikai ra koe i te reira i te po e te ao.”​—IOSUA 1:8, akaaite ia NW.

1. Eaa etai au puapinga no te tatauanga matauia e te tatauanga te Pipiria?

TE TATAUANGA i te au apinga puapinga ko tetai aruaru anga meitaki rava ia. Kua tata tetai tangata Varani kimi kite poritiki ko Montesquieu (Charles-Louis de Secondat): “Noku nei, ko te apii tetai mana teitei no te rapakau i te oraanga maromaroa. Kare tetai tu pekapeka i tupu mai kiaku tei kore i rauka i tetai tatauanga no tetai ora kia takore atu i te reira tu.” No tetai tuanga teitei, kua tika teia no te tatauanga Pipiria. I na tetai tata taramo akauruia ei: “Ko te ture a Iehova kare e apa, i te akaariu anga i te vaerua; te tuatua-akakite a Iehova, e mea mou ïa, e pakari ei te kamakura. Te akonoanga a Iehova, e mea tika ïa, e rekarekaʼi te ngakau.”​—Salamo 19:​7, 8.

2. Eaa ra a Iehova i akaora ei i te Pipiria na roto mai i te au tuatau ra, e eaa tana e manakonako ra i tona au tangata kia rave ma te reira?

² E ko Tei Tata i te Pipiria, kua akaora maira te Atua ko Iehova i te reira na roto i te au anere mataiti o te patoi anga kino mei te au enemi mai o te reira, te akonoanga e to te aronga tutara. I te mea ko tona anoano “i te tangata katoatoa kia ora, e kia rauka te kite i te tuatua-mou,” kua akono aia e kua rauka i te au tangata ravarai tana Tuatua ra. (1 Timoteo 2:4) Te manakoia ra e e vaitata i te 80 patene o te au tangata i te enua nei te ka itaeia na te taangaanga i te 100 reo. Ko te tataanga o te Pipiria katoa ra te vai maira i roto i te 370 reo, e ko etai au tuanga o te au Tuatua Tapu ka rauka kia tatauia i roto i etai atu 1,800 reo e te au dialect. Te inangaro ra Iehova kia tatau tona au tangata i tana Tuatua. Te akameitaki atura aia i tona au tavini tei akamanako ra ki tana Tuatua, ae, tei tatau ra i te reira i te au ra ravarai.​—Salamo 1:​1, 2.

Te Umuumuia ra te Tatauanga Pipiria e te Au Akaaere

3, 4. Eaa ta Iehova i umuumu i te au ariki o Iseraela ra, e eaa te au tumu no teianei umuumu anga te piri katoa atura ki te aronga pakari Kerititiano i teia tuatau nei?

³ I te tuatuaanga i te manako anga no te tuatau e raukai tetai ariki tangata no te iti tangata o Iseraela ra kua tuatua Iehova: “E kia noo aia ki runga i te terono o tona ra basileia, ei reira aia e tataʼi i teianei ture nana uaorai ki roto i tetai buka, no roto i te buka ture, e vaoo i te kau taunga ra i te ngati Levi ra: E ei iaia uaorai taua ture ra vaoo ei, e ka tatau oki aia e ope ua atu tona au rā i te ora anga nei; kia apii aia e kia matau i tona Atua ra ia Iehova, e kia akono i te au tuatua ravarai o teianei ture e teianei au akonoanga, kia raveia: Kia kore e teitei tona ngakau i tona ai taeake ra; kia kore aia e anga ke i te akauenga ki te pae katau e te pae kaui.”​—Deuteronomi 17:​18-20.

⁴ E akara i nga tumu i umuumu ei a Iehova i te au ariki katoa o Iseraela i te tuatau ki mua kia tatau i te puka ture tu-Atua i te au ra ravarai: (1) “kia apii aia e kia mataku i tona Atua ra ia Iehova, e kia akono i te au tuatua ravarai o teianei ture, e teianei au akonoanga, kia raveia”; (2) “kia kore e teitei tona ngakau i tona ai taeake ra”; (3) “kia kore aia e anga ke i te akauenga ki te pae katau e te pae kaui.” Kare ainei te au akaaere Kerititiano i teia tuatau nei e tau kia mataku ia Iehova, kia akarongo i tana au ture, kia akakore i te akateitei ia ratou uaorai ki runga ake i to ratou ai taeake ra, e kia kopae ke i te anga ke anga mei ta Iehova ra au akauenga? E mea tika rava kare i meangiti mai te puapinga no ratou i to te au ariki o Iseraela ra no te tatauanga i te Pipiria i te au ra ravarai.

5. Eaa ta te Pupu Akaaere i tata ki te au mema Kumiti Manga i mua ua akenei no runga i te tatauanga Pipiria, e eaa ra te aronga pakari Kerititiano i meitaki ei kia aru i taua akoanga ra?

⁵ E papaanga angaanga maata rava ta te aronga pakari Kerititiano i teia tuatau nei, te akariro ra i te tatauanga Pipiria ei akaaoanga. Ei akatauanga, te au mema no te Pupu Akaaere o te Au Kite o Iehova e te au mema o te Kumiti Manga i te ao katoa nei e au tangata rave angaanga maata ravarai. Inara, ko tetai reta i mua ua akenei mei te Pupu Akaaere ki te au Kumiti Manga katoatoa ra kua akaketaketa atu i te tatauanga Pipiria i te au ra ravarai e te ravenga meitaki i te apii. Kua tou maira taua reta ra i teia, ka akatupu kia maata to tatou inangaro no Iehova e no te tuatua mou oki, e “ka tauturu mai ia ia tatou kia tamou marie i to tatou akarongo, te rekareka, e te akakoromaki anga tae roa ki te openga kaka ra.” Te aronga pakari katoatoa i te au putuputuanga o te Au Kite o Iehova ra te manako ngakau aiteite ra no taua umuumu anga rai. Ka tauturu te tatauanga i te au Tuatua Tapu ra ia ratou i te au ra ravarai ra kia ‘akamanuia te au aerenga.’ (Iosua 1:​7, 8) E maata oki no ratou, te tatauanga Pipiria “e mea meitaki ei apiianga, ei akoanga, ei akakite anga apa, e ei akakite mai i te tuatua-tika ra.”​—2 Timoteo 3:16.

E Mea Umuumuia no te Aronga Ou e te Ruaine

6. Eaa ra a Iosua i tatau maataʼi i te au tuatua katoa o te ture a Iehova ki mua i te au kopu akaputuia o Iseraela ra e te aronga tangata ke?

⁶ I te tuatau taito ra, kare te au kopi tataki tai o te au Tuatua Tapu i rauka no te tatauanga a tetai tangata uaorai, no reira kua raveia te tatauanga Pipiria ki mua i te akaputu anga katoa ra. I muri ake i ta Iehova ra oronga anga kiaia i te re ki rungao i te oire o Ai ra, kua akaputu atura Iosua i te au kopu o Iseraela ki mua i te Maunga ko Ebala ra e te Maunga ko Gerizima. I reira, te akakite maira te tataanga kia tatou: “Kua tatau iora aia i te au tuatua katoa i roto i te ture ra, i te akaora e te akakino, mei tei tataia i roto i te buka ture ra. Kare rava tetai tuatua ta Mose i akaue maira i toe i te tatauia e Iosua ki mua i te aroaro o te uipaanga Iseraela katoa ra; te vaine, e te tamariki mea riki, e te aronga ke ke katoa i roto ia ratou ra.” (Iosua 8:​34, 35) Te aronga ou e te ruaine, te tangata enua e te tangata ke ke ra, kua umuumuia, mei te mea rai, kia taraiia ki roto i to ratou au ngakau e te au manako eaa te tu akono te ka apai mai i te akameitakianga a Iehova e eaa oki te ka akamareka kore iaia. Na te tatau anga putuputu i te Pipiria ka tauturu tika mai ia i roto i teianei tu.

7, 8. (a) Koai ma i teia tuatau te aite ra ki “te aronga ke ke,” e eaa ratou i tau ei kia tatau i te Pipiria i te au ra tataki tai? (e) Na roto i teea au tu ka raukai i te “tamariki mea riki” i roto i te au tangata o Iehova kia aru i ta Iesu akatauanga?

⁷ I teia tuatau nei, e au mirioni ua atu te au tavini o Iehova te aite atura ki taua “aronga tangata ke ke” i roto i tetai tu vaerua. I tetai tuatau ra, i noo ratou kia tau ki te au turanga o te ao nei, inara kua taui ratou i to ratou au oraanga. (Ephesia 4:​22-24; Kolosa 3:​7, 8) Ka tau ratou kia akamaaraara tamou marie ia ratou uaorai i ta Iehova ra au turanga no te meitaki e te kino. (Amosa 5:​14, 15) Na te tatauanga i te Tuatua a te Atua ra i te au ra tataki tai e tauturu ia ratou kia rave i te reira.​—Ebera 4:12; Iakobo 1:25.

⁸ E manganui katoa oki te “tamariki mea riki” i roto i te au tangata o Iehova ra tei apiiia i ta Iehova ra au turanga e to ratou au metua inara tei tau ra ratou kia akapapu ia ratou uaorai i te tika o tona anoano. (Roma 12:​1, 2) Akapeea e raukai ia ratou te rave i te reira? I Iseraela ra, kua apiiia te kau taunga e te aronga pakari: “Ka tatau ei koe i teianei ture ki mua i to Iseraela katoa ra, kia kite ratou. E akaputuputu mai i te au tangata, i te tane, e te vaine, e te tamariki, e to tangata ke i roto i to au oire ra, kia akarongo ratou, e kia apii, e kia mataku i to kotou Atua ra ia Iehova, kia akamanako, e kia rave oki i te au tuatua ravarai o teianei ture: Kia akarongo katoa ta ratou au tamariki, kare i kite ra, kia apii, e kia mataku i to kotou Atua ra ia Iehova.” (Deuteronomi 31:​11-13) I te nooanga i raro ake i te Ture ra, kua akaari a Iesu i tona 12 mataiti ra i tetai inangaro anga kia kite i te au ture a tona Metua ra. (Luka 2:​41-49) I muri iora, kua rave aia i te akarongo e te akono i te tatauanga Tuatua Tapu i te tunako ra. (Luka 4:16; Angaanga 5:21) Ka meitaki ra te aronga ou ra kia aru i ta Iesu ra akatauanga na te tatauanga i te Tuatua a te Atua ra i te au ra ravarai e na te putuputu oki te aerenga ki te au uipaanga te ngai e tatauiai e te apiiia ra te Pipiria.

Tatauanga Pipiria​—Ei Mea Mua Ia

9. (a) Eaa tatou i tau ei kia iki i ta tatou ka tatau? (e) Eaa ta te tangata akanoo mai i teia makatini i tuatua no runga i te au puka tauturu i te apii Pipiria?

⁹ Kua tata te ariki pakari ko Solomona i tetai akamatakiteanga: “Kia akapapa tini i te buka ra, kare e akaeaanga, e roiroi te kopapa ra kia maata te kimi i te tuatua.” (Koheleta 12:12) Penei ka kapiti atu tetai i te tatauanga i te au puka neneiia e manganui i teia tuatau nei kare i roiroi anake ki te kopapa mari ra, ko te tika, e kino ia ki te manako. No reira e mea puapinga maata kia iki. I te pae atu i te tatauanga i ta tatou au puka apii Pipiria, ka tau tatou kia tatau i te Pipiria uaorai. Kua tata te tangata akanoo anga o teianei makatini ki tona aronga tatau ra: “Auraka e akangaropoina e ko te Pipiria ta tatou Turanga e noatu akapeea te oronga tauturu anga mai a te Atua kia tatou nei e ‘au tauturu’ anake ratou kare i te mono anga no te Pipiria ra.”a No reira, noatu rai kare tatou e manako kore i te au puka akatumuia ki runga i te Pipiria ra, ka tau rai tatou kia tatau i te Pipiria ra.

10. Akapeea ta “te tavini akono meitaki e te pakari” akaketaketa anga i te puapinga no te tatauanga te Pipiria?

¹⁰ I te manako ngakau anga i teianei umuumu anga, no etai au mataiti i teianei kua akapapa “te tavini akono meitaki e te pakari” i te tatauanga Pipiria e ko tetai tuanga no te porokaramu Apii Orometua Teokaratiki i roto i te putuputuanga tataki tai ra. (Mataio 24:45) Te porokaramu tatauanga Pipiria i teianei te kapiti ra i te Pipiria katoa no tetai tuatua e vaitata i te itu mataiti. Ka puapinga teia papaanga no te katoatoa i na no te aronga ou kare ra i tatau ake i te Pipiria katoa. Te aronga tei aere ki te Apii Pipiria Punanga Tiaki o Gileada no te angaanga mitinari e te Apii Terenianga Orometua pera katoa oki te au mema ou o te ngutuare Betela te umuumuia ra kia tatau i te Pipiria katoa i te mataiti okotai ra. Noatu eaa taau papaanga ka aru, ei tangata okotai me kare ei ngutuare tangata, ko te rave tamou marieanga i te reira te umuumuia ra te tukuanga i te tuanga mua ki te tatauanga Pipiria ra.

Eaa ta Taau Ravenga Tatauanga e Akakite Ra?

11. Akapeea e eaa oki tatou i tau ei kia kai i te au tuatua a Iehova i te au ra ravarai?

¹¹ Me e taitaia toou i te rave tamou marieanga i taau papaanga tatauanga Pipiria, penei ka tau koe kia ui kia koe uaorai: ‘Eaa te tupu anga penei ka rokoia ki taku tatauanga me kare ravenga akaraanga tivi no toku kite i te tatau i te Tuatua a Iehova ra?’ E akamaara ana eaa ta Mose i tata​—e kua taiku akaouia e Iesu​—e “kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4; Deuteronomi 8:3) Mei ia tatou e tau ra kia kai varaoa me kare apinga aite atura i te au ra ravarai o to tatou oraanga kia akamatutu ei i to tatou kopapa, ka tau katoa tatou kia tauru i te au manako o Iehova ra ki roto ia tatou kia tamou marie i to tatou tuanga pae vaerua ra. Ka rauka ia kia itae atu ki to te Atua ra au manako i te au ra tataki tai na te tatauanga i te au Tuatua Tapu ra.

12, 13. (a) Akapeea ta te apotetoro ko Petero akatutu anga i te kaki anga ta tatou ka tau no te Tuatua a te Atua ra? (e) Akapeea ta Paulo taiku anga i te akatutu anga no te u i tuke ei mei ta Petero?

¹² Me kua ariki tatou i te Pipiria, ‘kare ei tuatua na te tangata, ei tuatua ra na te Atua,’ ka akapiri vaitataia atu tatou ki te reira mei te pepe tei inangaro ra i te u o tona metua vaine. (1 Tesalonia 2:13) Kua tata mai te apotetoro ko Petero i taua tu aiteite ra: “Kia kaki tikai kotou mei te tamariki anau ou, i te u iro koreia ra, i te tuatua, kia pakari kotou i te reira; Mei te mea e kua tongi kotou i te takinga-meitaki o te Atu.” (1 Petero 2:​2, 3) Me kua tongi tikai tatou na te kite pu tikai, e e “takinga-meitaki to te Atu,” ka akatupu tatou i te kakianga no te tatauanga Pipiria ra.

¹³ Ka tau tatou kia kite e kua taiku a Petero i teianei tuatua no te u e manga tuke mei ta te apotetoro ko Paulo ra. No tetai pepe anau ou ra, tei te u te au mea anoanoia ei meitaki katoa ra. I ta Petero akatutuanga te akaari maira e tei te Tuatua a te Atua ta tatou e umuumu ra “kia pakari.” Ta Paulo, i tetai pae, te taiku ra i te umuumu anga no te u kia akatutu mai i te au ravenga angaianga tau kore a tetai papaki tei karanga ra e e pakari ratou i te pae vaerua. I tana reta ki te au Kerititiano Epera ra, kua tata Paulo: “Naringa oki mei teianei kua riro kotou ei orometua, kua tika ïa i te roa;e tenana kia apii akaouia rai kotou i te apiianga mua o te tuatua a te Atua e tikaʼi; e kua riro io nei kotou mei te aronga e tau ia ratou te u, eiaa te kai pakari. Ko tei kai katoa oki i te u anake ra, kare ïa i pakari i te tuatua-tika ra: e kaiu rai aia. Kareka te kai pakari ra, na te tangata pakari ïa, na te aronga no te mātau i kite ei to ratou ngakau i te meitaki e te kino.” (Ebera 5:​12-14) Na te tatauanga Pipiria ma te manako araara ka rave kia tupu maata to tatou au mana kite e kia akamatutu i to tatou kaki anga no te au apinga pae vaerua.

Akapeea kia Tatau i te Pipiria

14, 15. (a) Eaa te tika ta Tei Tata i te Pipiria i oronga kia tatou? (e) Akapeea tatou ka puapingaʼi mei te pakari tu-Atua ra? (Oronga mai te au akatauanga.)

¹⁴ Te akamata anga i te tatauanga Pipiria puapinga maata rava, kare na te tatauanga, mari ra na te pureanga. Ko te pure tetai tuanga meitaki maata. Te aite ra e mei te mea e kua akamata koe i te akaraanga i tetai puka no tetai tumu oonu no te araveianga i tei tata ra no tana tauturu kia kite e eaa taau te ka tatau. Mei teaa ra te puapinga maata o te reira! Tei tata ra i te Pipiria, koia ko Iehova, te oronga maira i taua tika ra kia koe. Tetai mema no te pupu akaaere o te anere mataiti mua ra kua tata ki tona au taeake: “Kia ngere ra tetai tangata i te pakari, ka pati aia ki te Atua ra, ko tei oronga ua mai i ta te tangata ravarai ma te patoi kore; e e orongaia mai tana. E pati ra aia ma te akarongo, e te ekoko kore.” (Iakobo 1:​5, 6) Te Pupu Akaaere o teia tuatau nei te akamaroiroi tamou marie ra ia tatou kia rave i te tatauanga Pipiria ma te pure.

¹⁵ Te pakari ko te rave anga tau tikai ia i te kite. No reira i mua ake ka eeu ei i taau Pipiria, e pati kia Iehova kia tauturu mai ia koe kia kite i te au tumu i roto i taau tatauanga te umuumuia ra kia akonoia i roto i toou uaorai oraanga. E taokotai atu i te au mea ou taau i apii ma te kite o mua ana ra. E kapiti atu ia ratou ki roto “i te akonoanga tuatua tikai” taau i kite ra. (2 Timoteo 1:13) E tamanako tikai i te au tupu anga i roto i te au oraanga o te au tavini o Iehova ra i te tuatau kua topa, e ka ui ei kia koe uaorai e akapeea taau ka rave i raro ake i te au turanga aiteite ra.—Genese 39:​7-9; Daniela 3:​3-6, 16-18; Angaanga 4:​18-20.

16. Eaa te au manako tau te orongaia maira e raukai ia tatou te akariro i ta tatou tatauanga Pipiria kia maata atu te puapinga e te tau?

¹⁶ Auraka e tatau ua e kia oti te au kapi. E tatau marie ua. E tamanako tikai ki runga i taau tatauanga. Me ka riro toou manako i tetai tumu ke, e akara i te au cross reference me tei roto i taau Pipiria. Me kare taua tumu ra i taka meitaki, e tata kia rave akaou i te kimikimi a muri akera. Ia koe e tatau ra, e akariro i te au irava taau e anoano ra kia maara me kare e tata i te reira. Penei ka tau kia kapiti atu koe i etai tata anga e te au cross reference ki te pae maira. No te au irava te manako ra koe penei a tetai ra ka anoano koe i taau angaanga tutuanga e apiianga oki, e tamanako i te tuatua taviri e ka akaari i roto i te index of Bible words i te tuanga i muri o taau Pipiria ra.b

E Akariro te Tatauanga Pipiria ei Mareka Anga

17. Eaa i tau ei tatou kia mareka i te tatauanga i te Pipiria?

¹⁷ Kua tuatua te tata taramo no te tangata mataora ra “tei inangaro ra i te ture a Iehova; e tei tana ture tona manako anga i te po e te ao.” (Salamo 1:2) Kare e tau kia manakoia ta tatou tatauanga Pipiria i te au ra tataki tai ei angaanga reka kore mari ra ko tetai mea mareka anga tikai. Tetai aerenga ei akariro i te reira ei mareka anga na te manako anga i te puapinga no te au mea apiiia ra. Kua tata te ariki pakari ko Solomona: “E ao to te tangata i kitea iaia te pakari . . . Tona au arataa, e arataa mataora ïa; e e au tei tona ra au aerenga katoa. Ko te rakau ora aia i te aronga e opu iaia: e ko tei tāpu iaia, e ao tona.” (Maseli 3:​13, 17, 18) Te tauta anga te umuumuia ra kia raukai te pakari te tau tika ra, no te mea ko tona au arataa, e arataa mataora ia, e au, e ao, e te openga, e ora ia.

18. Eaa te umuumu anga kapitiia ki te tatauanga Pipiria, e eaa ta tatou ka akamanako i te atikara te ka aru mai nei?

¹⁸ Ae, ko te tatauanga Pipiria e puapinga ia e te mareka anga oki. Inara kua rava ainei tei reira? Kua tatau te au mema ekaretia o Kerititome i te Pipiria no etai anere mataiti, “te tamou ua ra oki i te apii, kare rava ra i rauka te kite i te tuatua-mou.” (2 Timoteo 3:7) No te tatauanga Pipiria kia uua mai, ka tika tatou kia rave i te reira ma tetai manako kia akono i te kite tei rauka mai ki to tatou uaorai au oraanga e te taangaanga oki i te reira i ta tatou angaanga tutuanga e te apiianga ra. (Mataio 24:14; 28:​19, 20) Te umuumuia ra te tauta anga e te au ravenga meitaki no te apii, te ka rauka katoa kia riro ei rekareka anga e ei tutakianga, mei ta tatou ka kite i te atikara te aru mai nei.

[Au Tataanga Rikiriki i Raro]

Au Uianga Akamanako Akaou Anga

• Eaa te akoanga tei orongaia ki te au ariki o Iseraela te tau ra ki te au akaaere i teia tuatau, e no teaa ra?

• Koai ma i teia tuatau te aite ra ki “te aronga ke ke” e “te tamariki mea riki,” e eaa ratou i tau ei kia tatau te Pipiria i te au ra ravarai?

• I roto i teea au aerenga tau ta “te tavini akono meitaki e te pakari” tauturu anga ia tatou kia putuputu te tatau anga i te Pipiria ra?

• Akapeea e raukai ia tatou te puapinga tikai e te mareka anga mei ta tatou tatauanga Pipiria ra?

[Tutu i te kapi 9]

Ko te aronga pakari, tikai, te anoano maataia ra kia tatau i te Pipiria i te au ra tataki tai

[Tutu i te kapi 10]

E mea matauia no Iesu kia rave i te tatauanga Tuatua Tapu i roto i te tunako