Kia Pakari te Akono i to Kotou Tu Rangatira Kerititiano

“Ei aronga rangatira kotou, inara e tamou i to kotou tu rangatira . . . ei au tavini no te Atua.”​—1 PETERO 2:16, NW.

1. Eaa te tu rangatira i ngaro ia Adamu ra, e eaa te tu rangatira ta Iehova te ka akaora mai no te tangata nei?

I TE rave anga to tatou nga metua mua i te ara i roto i te kainga i Edene ra, kua ngaro ia raua tetai tuanga kaka no ta raua tamariki​—koia te tu rangatira mei te ara e te pe ua. Ko te tupu anga kua anauia mai tatou ravarai ei tuikaa ki te pe ua e te mate oki. E mea mataora ra, kua akakoro a Iehova kia akaora i te aronga tiratiratu ki te tu rangatira meitaki tikai. I teia tuatau nei, te tapapa atura te aronga ngakau tika i “te akakite angaia mai o te tamariki a te Atua,” te ka tupu i reira no ratou “ka akarangatiraia mei te tuikaa anga ki te pe ua e kia rauka te tu rangatira kaka o te tamariki a te Atua ra.”​—Roma 8:19-21, NW.

‘Akatainuia Kia Tutu Aere’

2, 3. (a) Koai ma “te tamariki a te Atua ra”? (e) Eaa te turanga meitaki ta ratou e rekareka nei, ma te apai mai anga i teea apainga?

² Koai ma teia au “tamariki a te Atua ra”? Ko te au taeake akatainuia o Iesu ki te vaerua ko ratou te ka tutara ma ia katoa i te Patireia i te rangi ra. Kua mama mai te aronga mua i o ratou ra i te anere mataiti mua o te T.N. Kua ariki ratou i te tuatua mou matara ra ta Iesu i apii atu ia ratou ra, e mei ia Penetekote 33 T.N. maira, kua rave ratou i te au angaanga kaka ta Petero i tuatua i tana tata anga kia ratou: “E uki ikiia ra kotou, e kau taunga ariki, e iti-tangata tapu, e aronga okoia.”​—1 Petero 2:9a; Ioane 8:32.

³ Kia riro ei aronga okoia na te Atua​—e akameitakianga umere tikai ia! E te rekareka katoa nei te toenga o teia aronga tamariki akatainuia a te Atua i taua turanga akameitakiia ma te Atua ra. Inara kapiti katoaia mai ki taua angaanga teitei ra te vaira te au apainga. Kua tou maira a Petero ki tetai o taua au apainga ra i tana tuatua ua anga: “Kia akakite ua kotou i tona meitaki, to tei kapiki ia kotou i to roto i te poiri, kia tae ki tona mārama umereia ra.”​—1 Petero 2:9e.

4. Akapeea te au Kerititiano akatainuia ra i te akatupu anga i te apainga tei tupu maira ma to ratou tu rangatira Kerititiano?

⁴ Kua akatupu ainei te au Kerititiano akatainuia ra i teianei apainga i te akakite ua i to te Atua ra au meitaki? Ae. I te tuatua totou anga no te aronga akatainuia ra mei te 1919 mairai, kua karanga a Isaia: “Tei runga iaku te vaerua o te Atu Ngateitei ra o Iehova, no te mea kua akatainu a Iehova iaku kia akakite i te tuatua meitaki ki te aronga maru. Kua tono mai aia iaku kia vai i te aronga ngakau mamae ra, ei akakite i te tu matara ki te aronga tuikaaia e te akatuera anga i te au mata o tei tapekaia ra; kia tutu aere i te mataiti marekaia e Iehova e te ra akaoko anga na to tatou Atua ra.” (Isaia 61:1, 2, NW) I teia tuatau nei, te aru ra te toenga o tei akatainuia, i te akaraanga a Iesu, koia ra ta teia nga irava tataanga i taiku mua maira, kua akakite totomapu ratou kia etai ke atura i te tuatua meitaki no te tu rangatira ra.​—Mataio 4:23-25; Luka 4:14-21.

5, 6. (a) Eaa tei tupu mai no te tutuanga maroiroi a te au Kerititiano akatainuia ra? (e) Eaa te au angaanga e te au apainga te rekarekaia ra e te aronga o te urupu maata?

⁵ Ko tei tupu no ta ratou tutuanga maroiroi, e urupu maata o te au mamoe ke atu kua mama mai i te ao nei i teia au ra openga. Kua aere mai ratou mei roto mai i te pa enua ravarai kia kapiti atu ki te aronga akatainuia ra i te tavinianga ia Iehova, e kua akarangatira katoaia oki ratou e te tuatua mou ra. (Zekaria 8:23; Ioane 10:16) Mei ia Aberahama rai kua akatikaia ratou no runga i te tumu anga o te akarongo e kua tomo atu ki roto i tetai pirianga vaitata ma te Atua ra ko Iehova. E mei ia Rahaba rai na to ratou akatika angaia kua tau ratou no te akaoraia​—i to ratou tu, te akaora anga ia Aramakito. (Iakobo 2:23-25; Apokalupo 16:14, 16) Inara no te reira au turanga teitei te kapiti katoaia ra te apainga kia akakite kia etai ke atura i te kaka o te Atua ra. No reira a Ioane i kite ei ia ratou i te akapaapaaanga ia Iehova ra i te ngai tangata, “ma te kapiki nui to ratou reo, i te na ko anga e, No to tatou Atua te ora, tei noo ki rungao i te terono, e no te Punua-Mamoe.”​—Apokalupo 7:9, 10, 14.

⁶ I teia mataiti i topa, e tere atu i te a mirioni to ratou numero, kapiti katoa ma te pupu iti o te toenga o te au Kerititiano akatainuia ra, kua akapou ratou e vaitata i te okotai pirioni ora i te akakitekite aere anga i te au meitaki o Iehova ra. Ko teia tikai te akono anga meitaki roa i to ratou tu rangatira i te pae vaerua.

“Ka Akateitei i te Ariki”

7, 8. Eaa te apainga ki te aronga tutara o teianei ao te kapitiia maira i te tu rangatira Kerititiano, e no teia tu, eaa te tu manako tarevake ka tau tatou kia kopae ke?

⁷ Te kapiti katoa ra to tatou tu rangatira ei Kerititiano i etai atu apainga. Kua tou atura a Petero ki etai i tana tata anga: “E akangateitei atu i te tangata ravarai. E aroa atu i te au taeake. Ka mataku i te Atua. Ka akateitei i te ariki.” (1 Petero 2:17) Eaa te aite anga o te tuatua “ka akateitei i te ariki”?

⁸ “Te ariki” ko te aronga tutara o te enua nei. I teia tuatau, te tupu nei te kauraro kore i te aronga mana i te ao nei, e ka ngoie ua teia i te tupu ki te au Kerititiano. Penei ka manako tetai Kerititiano e eaa uaʼi aia ka akangateitei ei i “te ariki” i te mea e “te vai ua nei rai to te ao ravarai i raro ake i taua vaerua kino ra.” (1 Ioane 5:19) I te manako anga i teia au tuatua, penei ka manako ngakau ua aia e kua rangatira aia i te akarongo kore i te au ture kare i tau kiaia e kua akakore i tana tutaki anga tero me ka kore aia e mou. Inara e patoi anga te reira i ta Iesu akauenga taka meitaki ra kia “apai mari i ta Kaisara kia Kaisara.” Ka riro te reira, ‘ei raveanga i tona tu rangatira ei tapoki no te tuatua kino ra.’​—Mataio 22:21; 1 Petero 2:16, NW.

9. Eaa nga tumu meitaki e rua no te akarongo anga i te aronga mana tutara o te ao nei?

⁹ Te umuumuia ra te au Kerititiano kia akangateitei i te mana tutara e kia kauraro atu i te reira​—noatu rai e me na roto i te tu kotingaia. (Angaanga 5:29) No teaa ra? Ia 1 Petero 2:14, 15 kua tou mai ra a Petero ki nga tumu e toru i tana tuatua anga e ko te au kavana kua “ungaia mai [e te Atua] ei tutaki atu i te aronga i rave i te kino ra, e ei akameitaki i te aronga i rave i te meitaki ra.” E tumu tau ra te mataku i te akautunga ei akarongoanga i te mana tutara ra. Mei teaa ra te tu rikarika no tetai o te Au Kite o Iehova ra kia akautungaia me kare kia tapekaia no te ta ua, te keia, me kare no tetai ua atu rave anga kino! E akamanako ana e akapeea te rekareka o tetai papaki tangata i te akakitekite anga i te reira! I tetai tua, me akatupu tatou i tetai tu meitaki no te akarongo anga i te aronga tutara, ka akapaapaaia mai tatou e te aronga mana akaaere ra. Penei ka orongaia mai kia tere atu to tatou tu rangatira kia aaere ua i ta tatou angaanga tutuanga i te tuatua meitaki. E ‘na te raveanga meitaki ka mopani tatou i te tuatua tau kore a te aronga kite kore ra.’ (1 Petero 2:15e) Ko te rua teia o te tumu no te akarongoanga i te mana tutara.​—Roma 13:3.

10. Eaa te tumu ririnui roa no te akarongoanga i te aronga mana o teianei ao?

¹⁰ Inara e tumu ketaketa atu tetai. I vai mai ei te aronga mana na Iehova ra i akatika. Mei ta Petero i tuatua ra e ko te au tutara poritiki e aronga “ungaia mai” e Iehova, e ko “to te Atua ïa anoano” kia kauraro marie te au Kerititiano ia ratou ra. (1 Petero 2:15a) Mei te reira katoa oki, kua na ko maira te apotetoro ko Paulo e: “Te aronga mana e noo nei, kua akonoia ïa e te Atua.” E no reira, ka akakeu to tatou akava ngakau apiiia e te Puka Tapu kia akarongo tatou i te aronga mana ra. Me ka kore tatou e kauraro atu kia ratou “kua māro [tatou] i tei akonoia e te Atua ra.” (Roma 13:1, 2, 5) Koai to roto ia tatou nei te ka anoano kia maro atu i tei akonoia e te Atua ra? Mei teaa ra te rave anga tau kore ta te reira i te tu rangatira ei Kerititiano ra!

‘E Aroa Atu i te Au Taeake’

11, 12. (a) Eaa te apainga ki to tatou au taeake akarongo te tupu maira ma to tatou tu rangatira Kerititiano? (e) Koai tikai te tau ra no ta tatou akamanako anga aroa, e no teaa ra?

¹¹ Kua karanga katoa a Petero e ka tau te Kerititiano kia “aroa atu i te au taeake.” (1 Petero 2:17) Ko teia tetai atu apainga te kapitiia maira ki te tu rangatira ei Kerititiano. No roto tatou katoatoa i tetai putuputuanga. E tikai, no roto tatou katoatoa i te taokotai anga o te ao katoa nei, me kare akaaerenga, o te au taeake katoatoa ra. Ko te akaarianga i te aroa kia ratou ra e akono anga pakari ia i to tatou tu rangatira.​—Ioane 15:12, 13.

¹² Kua akataka maira te apotetoro ko Paulo i tetai pupu o te au Kerititiano tei tau tikai tatou kia aroa ia ratou ra. Kua karanga aia: “E akarongo atu i te aronga arataki ia kotou na ka kauraro atu ei, no te mea ko ratou te tiaki ra i to kotou au meta, e na ratou e akakite to kotou tu; kia rauka ia ratou te rave i te reira ma te rekareka kare e ma te aue, ko te kino aea kotou no te reira.” (Ebera 13:17, NW) Ko te aronga te rave ra i te arataki anga i te putuputuanga ko te aronga pakari. E tika rai, kare teia aronga i te apa kore ua. Inara, kua akataoongaia ratou i raro ake i te akono matariki anga a te Pupu Akaaere. Ka arataki ratou na te akaari anga i te akatauanga e ma te akamanako anga tau, e kua akaueia ratou kia tiaki i to tatou au meta. Mei teaa ra te teimaa ta ratou apainga! (Ebera 13:7) E mea mataora ra, ko te maataanga o te au putuputuanga e vaerua meitaki, e te taokotai to ratou, e e mea rekareka oki no te aronga pakari i te angaanga kapiti atu ma ratou ra. E mea ngata ra kia kore te aronga tataki tai e anoano i te taokotai anga. Ka rave ua ra te tangata pakari i tana angaanga, inara mei ta Paulo i karanga ra, ka rave aia i te reira ma te “aue.” E tika ra, kare tatou e inangaro kia akariro i te aronga pakari kia aue! Ka inangaro ra tatou kia rekareka ratou i ta ratou angaanga kia raukai ia ratou i te akamaroiroi mai ia tatou.

13. Eaa etai mataara no tatou e taokotai atu ei ma te aronga pakari ra?

¹³ Eaa etai mataara e raukai ia tatou i te taokotai atu ma te aronga pakari ra? Ko tetai na te tauturuanga i te akono e te tamaanga i te Are Uipaanga Patireia. Ko tetai atu na te taokotaianga i te angaanga tutaka aere i te aronga maki e te tauturuanga i te aronga pirikoki. Inara, ka tau tatou kia tauta kia vai maroiroi i te pae vaerua, kia kore tatou e riro ei apainga na etai ke ra. Ko tetai tuanga puapinga no te taokotai anga ko te tamouanga i te tu ma o te putuputuanga i te pae kopapa e te pae vaerua oki, na to tatou uaorai tu akono e na te ripotianga i te au rave anga ara kikino ta tatou i kite ana.

14. Akapeea tatou i te taokotai atu anga i te rave papa anga tei akanooia e te aronga pakari ra?

¹⁴ I etai taime, e vai ei te tu ma o te putuputuanga, ka akaatea atu te aronga pakari i tetai tei rave i te ara tarevake ma te kore e tataraara. (1 Korinetia 5:1-5) Na teia e paruru i te putuputuanga. Penei katoa oki na te reira e tauturu i tei rave ra i te tarevake. E putuputu, te reira tu papaanga i te akariro i tei apa ra kia rako tangata mai. Inara, ka peea, me tei akaateaia ra e oa piri vaitata me kare e kopu tangata? Akapeea me taua tangata i akaateaia ra, ko to tatou metua me kare metua vaine me kare e tamaiti na tatou e me e tamaine. Ka akangateitei ainei tatou i tei raveia ra e te aronga pakari? E tika rai, penei e mea ngata ia. Inara e akono tau kore tikai i to tatou tu rangatira me ka akaekoko tatou i te tuku anga tika a te aronga pakari ra e ka kapiti ua atu ki tetai i te pae vaerua kua akapapuia ra e e mana taviivii tona i roto i te putuputuanga ra! (2 Ioane 10, 11) Te tau ra te katoa anga o te au tangata o Iehova kia akapaapaaia no to ratou taokotai anga i te reira au tumu ra. Ko tei tupu, te vai ma ra te akaaerenga a Iehova i roto i teianei ao viivii.​—Iakobo 1:27.

15. Me ka rave tetai i te ara kino ra, eaa tana ka tau kia rave viviki ua?

¹⁵ Ka peea me kua rave tatou i tetai ara kino? Kua akataka maira te Ariki ko Davida i te aronga ta Iehova ka akaperepere i tana tuatua anga: “Koai e kake atu ki roto i te maunga o Iehova ra, e koai e tu i tona ra ngai tapu? Ko tei apa kore ra tona rima e te ma ra tona ngakau, ko tei kore ra i apai i Toku meta ki te ngai puapinga kore ra, e kare oki i rave i te tia pikikaa ua.” (Salamo 24:3, 4, NW) Me no tetai tumu kare ‘to tatou rima i vai apa kore e kare katoa i ma to tatou ngakau,’ ka tau rai tatou kia viviki i te akatikatika. Te vaira to tatou oraanga mutu kore i roto i te tu kino.

16, 17. Eaa i tau kore ei no tetai tei apa ra i te rave anga te au ara kikino, kia tauta nana uaorai e akatikatika i te reira?

¹⁶ E ko tetai papaki kua timataia kia uuna i te au ara kikino, penei ma te manakoanga: ‘Kua aaki au kia Iehova e kua tataraara. E no reira eaa au ka kapiti mai ei i te aronga pakari?’ Penei te akama ra tei rave i te tarevake ra me kare te mataku ra e eaa ta te aronga pakari te ka rave. Inara, e mea tau kia maara aia e noatu rai e na Iehova anake e raukai te tama i to tatou ara, kua akono ra aia na te aronga pakari te apainga maata no te tu ma o te putuputuanga. (Salamo 51:2) Te vaira ratou no te rapakauanga, “ei akatau i te aronga tapu.” (Ephesia 4:12) Ko te kore e aere atu kia ratou me te anoanoia ra te tauturu no tatou i te pae vaerua te aite ra ki te kore e aere atu ki te taote me te maki ra tatou.

¹⁷ Ko tetai papaki tei tauta ra na ratou uaorai e akono i to ratou apa ka kite e e au marama me kare e au mataiti i muri akera, te vaira te taitaia kino i to ratou akava ngakau. E kino atu oki i te reira, ko etai tei uuna ra i te apa kino kua topa akaou ki roto i te ara no te rua e tae roa ki te toru taime. I te openga ra kia kitea mai taua apinga ra e te aronga pakari, kua riro ke ana ia ei ravenga putuputu i te tarevake. Mei teaa ra te meitaki atu kia aru i te ako a Iakobo! Kua tata aia: “Me te maki ra tetai i roto ia kotou na? E kapiki aia i te aronga pakari o te putuputuanga kia aere atu kiaia, e na ratou e pure nona, ma te akatainuanga iaia i te manongi i te ingoa o Iehova ra.” (Iakobo 5:14, NW) E aere ki te aronga pakari i te mea te vaira te tuatau no te rapakauanga. Me ka tiaki tatou kia roa rava, penei ka riro tatou kia ketaketa ki roto i tetai mataara no te ara.​—Koheleta 3:3; Isaia 32:1, 2.

Akamanea Anga e te Tamataora Anga

18, 19. Eaa tetai orometua i tuatua akapaapaa meitaki ei i te Au Kite o Iehova ra?

¹⁸ E rima mataiti kua topa, kua tuatua pumaana tetai orometua Katorika no te Au Kite o Iehova i roto i tetai makatini kotinga.a Kua karanga aia: “Ko au nei, e reka au i te Au Kite o Iehova; te akakite tika nei au i te reira. . . . Ko taku aronga i kite ana e meitaki to ratou tu akono, e maru te tuatua . . . [e] e mako no te akarongo atu. Aea ra tatou ka kite ei e te umuumuia ra te oronga anga tau no te tuatua mou? E ko te aronga te akakitekite ra i te tuatua mou kare e tau e kia ngakau paruparu ua, kia aunga, kare i mako te akamanea anga, e ko te kakau kare i tano?”

¹⁹ Kia tau ki ta teia au tuatua nei, kua manako meitaki taua orometua ra, i roto i etai au apinga katoa atu, na te tu o te kakau anga o te Au Kite ra e to ratou oronga anga ia ratou uaorai. E mea papu e, ko te aronga tana i aravei kua akarongo ki te ako tei orongaia e “te tavini akono meitaki e te pakari” i te au mataiti kua topa. (Mataio 24:45) Te akakite maira te Puka Tapu e ko te au vaine kia akamanea ia ratou ‘i te rakei tei akapapa meitakiia e te mako.’ (1 Timoteo 2:9, NW) I teianei tuatau te topa nei te turanga mako, te meitaki katoa ra te reira ako no te au tane. Kare ainei i te mea tau kia mako te oronga anga a te aronga komono i te Patireia o te Atua ra, ia ratou uaorai, ki mua i te aronga o vao ra?

20. Eaa ra i tau ei te Kerititiano kia akamanako i tona kakau i te au tuatau ravarai?

²⁰ Penei ka akatika tetai papaki e i te au uipaanga e i te tutu aere anga, ka tau ratou kia matakite e akapeea to ratou kakau anga, inara penei ka manako ua ratou e kare te au kaveinga o te Puka Tapu e piri atu ana ki etai atu tuatau ke ra. Inara, ka akamutu ainei tatou ei au komono no te Patireia o te Atua? E tika, te tuke tuke ra te au turanga. Me te tauturu ra tatou i te akatu anga i tetai Are Uipaanga Patireia, ka aoao ra tatou i te kakau tuke i to te aere anga ki te uipaanga i taua Are Uipaanga Patireia rai. Me te noonoo ua ra tatou, penei ka akakakau tatou na te tu tau no te akaangaroianga. Inara me te akaraia maira tatou e etai ke ra, e mea tika ra kia tau ua rai to tatou kakau i te akapapa meitakiia e te mako oki.

21, 22. Akapeea to tatou paruru angaia mei te tamataora anga te ka akatupu i te kino ra, e na teea tu tau tatou i te manako anga i te ako anga no te reira au tumu ra?

²¹ Ko tetai atu ngai te maata ra te manakoia ko te tamataora anga. Te au tangata​—e e maata atu oki te aronga ou ra​—te anoanoia ra te tamataora anga. Kare i te ara me kare e kaimoumou taime kia akapapa akaangaroianga mataora no te ngutuare tangata. Noatu rai ko Iesu kua pati aia i tana au pipi kia “noonoo iti ua na” ratou ra. (Mareko 6:31) Inara kia matakite e kia kore te tamataora anga e vai mai i te pa no te taviiviianga i te pae vaerua. Te noo nei tatou i roto i te ao te akateitei maira te tamataora anga i te akaturi, te rave i te ta ua, te akamataku, e te purepure oki. (2 Timoteo 3:3; Apokalupo 22:15) Te matakite ra te tavini akono meitaki e te pakari i taua au tu kino ra e te akamatakite putuputu maira ia tatou i te reira. Te manako ra ainei koe e e arairai anga teia au akamatakite anga i toou tu rangatira? Me kare te akameitaki ra ainei koe e no te manako mai o ta Iehova ra akaaerenga ia koe na, i akamatakite putuputu mai ei ia koe i taua au tu kino ra?​—Salamo 19:7; 119:95.

²² Auraka e ngaropoina e noatu no ko mai ia Iehova ra to tatou tu rangatira, e apainga ra ta tatou e ka akapeea tatou i te akono anga i te reira. Me ka akarongo kore tatou i te ako meitaki e ka tuku i te au tika tarevake, kare tatou e tau kia akaapa i tetai ke ra. Kua karanga te apotetoro ko Paulo e: “Ka ope takiri rava tatou i te aaki i te tuatua iaia uaorai i te Atua ra.”​—Roma 14:12; Ebera 4:13.

Tapapa Marie i te Tu Rangatira o te Tamariki a te Atua

23. (a) Eaa te au akameitakianga no runga i te tu rangatira te rekarekaia nei e tatou i teianei? (e) Eaa te au akameitakianga ta tatou e tapapa marie atu nei?

²³ E au tangata akameitakiia tikai tatou nei. Kua matara tatou i te akonoanga pikikaa e te purepure. Akameitaki i te atinga oko, e kua rauka ia tatou i te akavaitata kia Iehova ma te akava ngakau tamaia, kua matara mai tatou i te tuikaaanga ki te ara e te mate. Kare e roa atu ana ka tupu “te akakite angaia mai i te tamariki a te Atua.” Ia Aramakito ka akakiteia mai ki te au tangata te au taeake o Iesu i to ratou tu kaka i te rangi ra, ei aronga akapou i to Iehova ra au enemi. (Roma 8:19; 2 Tesalonia 1:6-8; Apokalupo 2:26, 27) A muri ake i te reira, ka akakiteia mai teia au tamariki a te Atua ei aerenga mai no te au akameitakianga te ka taʼe mai mei te terono o te Atua ki te au tangata. (Apokalupo 22:1-5) I te openga ra, ka riro teia akakiteanga i te tamariki a te Atua ra ei akameitakianga i te au tangata tiratiratu ra ma te tu rangatira kaka o te tamariki a te Atua ra. Te tapapa atura ainei koe no te reira tuatau? E akono pakari ra koe i toou tu rangatira Kerititiano. E tavini atu i te Atua i teianei, e ka rekareka koe i taua tu rangatira umere ra no te tuatau mutu kore ua atu!

[Au Tataanga Rikiriki i Raro]

Pia Manako Akaou Anga

◻ Akapeea ta te aronga akatainuia ra, e te au mamoe ke atu oki akakaka anga ia Iehova?

◻ Eaa i tau ei te au Kerititiano kia akangateitei i te aronga mana tutara o te enua nei?

◻ Na teea au mataara e raukai i te Kerititiano ra i te taokotai atu ma te aronga pakari ra?

◻ No runga i te kakau, eaa to te Au Kite o Iehova tu tuke anga i to te manganui o to teianei ao?

◻ Eaa te mea tau na tatou kia kopae ke i te akono anga i te tamataora anga?

[Tutu i te kapi 17]

E mea tau tikai no tatou kia aroa i te aronga pakari ra e kia taokotai atu kia ratou

[Au Tutu i te kapi 18]

E mea tika rai te kakau o te Kerititiano kia tau, e kia mako oki, e kia tano no te atianga