Tauturuanga ia Etai ke kia Kite i te Au Umuumu Anga a te Atua

“Kare oki au e tika kia kore: e ae oki toku kia kore au e tutu i te evangelia!”​—1 KORINETIA 9:16.

1, 2. (a) Eaa nga tuanga angaanga e rua ta Iehova e umuumu maira ia tatou kia rave? (e) Eaa ta te aronga ngakau tiratiratu te ka tika kia apii kia riro ei au tangata no to te Atua ra Patireia?

E TUATUA meitaki ta Iehova na te au tangata katoa. E Patireia tona, e te anoano ra aia kia akarongo atu te au tangata i te au ngai ravarai i te reira! Me kite anake tatou i teia tuatua meitaki, te umuumu ra te Atua kia tua aere tatou i te reira kia etai ke ra. E rua tuanga o teia angaanga. Te mea mua, ka tika tatou kia akakitekite i te tuatua meitaki o te Patireia o te Atua ra. I tana totou no “te openga o te akatereanga o te au mea nei,” kua tuatua a Iesu: “E kia tutu aereia teia tuatua meitaki o te patireia ki te au enua tei tangataia ei kite ki te au pa enua ravarai; i reira e tae mai ei te openga.”​—Mataio 24:3, 14, NW.

² Te tuanga rua o teia angaanga te kapiti ra i te apiianga i te aronga tei akarongo mareka mai i te akakitekiteanga Patireia. I muri ake i tona tuakaouanga, kua tuatua atu a Iesu ki tetai pupu maata o tana au pipi: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.” (Mataio 28:19, 20) Te ‘au mea katoa ta Karaiti i akaue atu’ kare i akamata mai iaia; kua apii aia ia etai ke ra kia akono i ta te Atua au akauenga, me kare au umuumu anga. (Ioane 14:23, 24; 15:10) No reira, ko te apiianga ia etai ke ra kia ‘akono i te au mea ta Karaiti i akaue atu ra’ te kapiti katoa ra i te tauturuanga ia ratou kia kite i te au umuumu anga a te Atua ra. Ka tika te aronga ngakau tiratiratu ra kia rave i ta te Atua au umuumu anga kia riro ei ei au tangata no tona Patireia.

3. Eaa te Patireia o te Atua, e eaa ta te reira ka akatupu te akariro ra i te tuatua no te Patireia ei tuatua meitaki?

³ Eaa te Patireia o te Atua? E eaa ta te reira te ka akatupu ei akariro i te tuatua o te Patireia ei tuatua meitaki roa? Te Patireia o te Atua e kavamani ia i te rangi. E mea akaperepere maata ia ki te ngakau o Iehova, no te mea ko te apinga te reira ei akatapu nana i tona ingoa, ei akaateaanga i te akakino anga katoa. Ko te Patireia te apinga te ka taangaangaia e Iehova ei akatupu i tona anoano kia akonoia i te enua nei mei to te rangi katoa ra. No reira a Iesu i apii ei ia tatou kia pure no te Patireia o te Atua kia aere mai e kua raurau ia tatou kia tuku i te reira ei mea mua i to tatou oraanga. (Mataio 6:9, 10, 33) Te kite ra ainei koe eaa te reira i puapinga maataʼi kia Iehova e kia apii tatou ia etai ke ra no tona Patireia?

E Akaaoanga Inara Kare i Tetai Apainga Teiaa

4. Akapeea te akatutu anga e kare ta tatou apainga i te tutu aere i te tuatua meitaki ra i tetai apainga teiaa?

⁴ E apainga teiaa ainei kia tutu aere i teia tuatua meitaki? Kare rava ia! Ei akatutu anga: E apainga ta te metua tane kia oronga apinga no tona ngutuare tangata. Ko te kore e rave i te reira te aite ra ki te kopaeanga i te akarongo Kerititiano. Kua tata te apotetoro ko Paulo e: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.” (1 Timoteo 5:8) Inara e apainga teiaa ainei te reira apainga no te tangata Kerititiano ra? Kare me te aroa ra aia i tona ngutuare tangata, no te reira tu te anoano ra aia kia oronga apinga na ratou.

5. Noatu rai e apainga te tutuanga e te angaanga akariroanga tangata ei pipi, eaa tatou i tau ei kia marekaia kia rave i te reira?

⁵ Mei te reira katoa, te angaanga tutu aere e te akariro anga ei pipi e apainga ia, e umuumu anga, tei runga to tatou oraanga i te reira. Kua akataka maira Paulo na teia tu: “Kare oki au e tika kia kore: e ae oki toku kia kore au e tutu i te evangelia!” (1 Korinetia 9:16; akaaite ia Ezekiela 33:7-9.) Inara, to tatou akakeu anga no te tutuanga ko te aroa ia, kare i tetai angaanga ua. Te mea maata te aroa ra tatou i te Atua, inara te aroa katoa ra tatou i to tatou tangata tupu, e te kite ra tatou i te puapinga maata no ratou kia akarongorongo i te tuatua meitaki. (Mataio 22:37-39) Te oronga ra te reira i te manakonako anga no ratou no te tuatau ki mua. Kare e roaia ka akatikatikaia te au ravenga tau kore e te Patireia o te Atua ra, ka takore atu i te takinga kino katoa, e ka akaora mai i te au e te taokotai anga​—pouroa te reira ei akameitakianga mutu kore i te aronga tei kauraro i tana tutara anga tuatua tika. Kare ainei tatou e marekaia, ae e rekareka, kia tua atu i taua tuatua meitaki ra ma etai ke ra?​—Salamo 110:3.

6. Eaa ra te tutuanga e te angaanga akariroanga tangata ei pipi i oronga mai ei i tetai akaaoanga tikai?

⁶ I taua tuatau katoa rai, te oronga maira teia tutuanga e te angaanga akariroanga tangata ei pipi, i tetai akaaoanga. E tuke tuke te au tangata. Kare i aiteite te manako o te katoatoa me kare to ratou au kite. E kite apii meitaki to tetai papaki, e ko etai atu e meangiti ua te kite apii. Te tatauanga​—i te tuatau mua e akapou taime akaperepereia ia—​i teianei e putuputu te manakoia ei tetai angaanga iuia. Te aliteracy, tei akatakaia ra ei “te tu kite i te tatau mari ra kare e inangaro kia rave i te reira,” ko tetai manamanata ia te tupu ra, noatu i te au enua te akaparau ra i te teitei o to ratou kite. Akapeea, i reira, e raukaʼi ia tatou i te tauturu atu i te au tangata ma taua au tu tuke tuke ra e te au inangaro oki kia apii i ta te Atua e umuumu ra?​—Akaaite ia 1 Korinetia 9:20-23.

Kia Papa Tikai no te Tauturu i Etai Ke

7. Akapeea “te tavini akono meitaki e te pakari” i te akapapa anga ia tatou kia tauturu ia etai ke ra kia kite i ta te Atua au umuumu anga?

⁷ Tetai angaanga akaaoanga e ngoie atu kia raveia me tei ia koe te au apinga tika me kare apinga ei rave. Ko tetai apinga te tau ra no tetai angaanga takake i teia tuatau penei ka manga tauiia me kare ka monoia apopo no te umuumu anga tauianga. Mei te reira katoa oki ta tatou angaanga akakitekite i te tuatua no to te Atua Patireia ra. I te au mataiti kua topa, kua orongaia mai e “te tavini akono meitaki e te pakari” kia tatou te au apinga tau tikai, te au puka tei akapapa taka keia no te rave i te au apii Pipiria. (Mataio 24:45) No reira kua akapapaia tatou kia tauturu i te au tangata no “te pa enua ravarai, e te au kopu ravarai, e te . . . au reo katoa oki” kia apii i ta te Atua umuumu anga. (Apokalupo 7:9) Mei tetai tuatau ki tetai tuatau kua orongaia mai etai au apinga ou kia tau ma te umuumu tauianga i te ao katoa nei. Ka akamanako tatou i etai akatauanga tokoiti ua i teianei.

8. (a) Eaa te tuanga a te puka “Let God Be True” i te akatere atuanga i te kite apiianga Pipiria? (e) Eaa te apinga no te angaanga apii Pipiria tei orongaia maira i te 1968, e akapeea tona akapapa anga taka ke? (ng) Akapeea te puka Tuatua-Mou i te tauturu anga i te angaanga akariro tangata ei pipi?

⁸ Mei te 1946 mai ki te 1968, kua taangaangaia te puka “Let God Be True” ei tetai apinga ririnui no te apiianga Pipiria, e 19,250,000 au kopi tei neneiia i roto e 54 au reo. Orongaia mai i te 1968, ko te puka Te Tuatua-Mou te Ka Arataki ki te Ora Mutukore no te au mataiti e manganui kua rave meitakiia i te apiianga i te Pipiria ma te aronga inangaro ra. I mua akera, kare i te mea matau koreia no tetai papaki kia apii ma te Au Kite o Iehova no tetai mataiti i muri ake i tetai mataiti e kare i papetitoia. Inara ko teia apinga kua akapapaia kia kapiti atu i tei apiiia ra, ma te akamaroiroianga iaia kia akono i tana e apii ra. Te tupu anga? Te akakite maira te puka Jehovah’s Witnesses​—Proclaimers of God’s Kingdom: “No nga mataiti angaanga e toru akamata mai ia Tepetema 1, 1968, e tae mai kia Aukute 31, 1971, e 434,906 te aronga tei papetitoia​—e tere atu i te rua taime te numero tei papetitoia i nga mataiti angaanga e toru i mua akera!” Mei te orongaanga mai i te reira, kua rauka i te puka Tuatua-Mou ra tetai tuaanga umere tikai​—e tere atu i te 107,000,000 i te 117 au reo.

9. Eaa te tu taka ke o te puka Ora Mutukore ra, e eaa te akatupu anga a te reira ki runga i te au pupu o te aronga akakitekite aere i te Patireia ra?

⁹ I te 1982 kua riro ko te puka Ka Rauka ia Koe te Ora Mutukore i Paradaiso i te Enua Nei te puka taangaanga maataia ia i te akonoanga i te au apii Pipiria. E tere atu i te 150 au tutu akatutuanga i roto i teia puka, kua akataka tataki tai meitakiia te tuatua anga tei akateitei maira i te tumu apiianga o te au tutu. I te itiu o Our Kingdom Ministry o Okotopa 1982 kua akakiteia mai: “I etai 20 mataiti i raveiaʼi ko te ‘Let God Be True’ ta tatou puka maata tei apiiia (mei te 1946 ki te au mataiti rotopu o te 1960 ra) e tere atu i te 1,000,000 aronga akakitekite ou i te Patireia tei kapitiia mai ki to tatou pupu. I muri akera kua kapiti akaouia mai tetai atu 1,000,000 au papuritia i te riro anga ko Te Tuatua-Mou te Ka Arataki ki te Ora Mutukore te puka maata te apiiia i muri ake i te orongaanga mai i te reira i te 1968. I te taangaanga anga i ta tatou puka apii ou, Ka Rauka ia Koe te Ora Mutukore i Paradaiso i te Enua Nei, ka kite ainei tatou i tetai atu tupuanga aiteite i te au pupu o te au papuritia Patireia ra? Ka tika rava, me ko teia te anoano o Iehova!” I te akara anga ko te anoano ia o Iehova, no te mea mei te 1982 mai ki te 1995, e tere atu i te 2,700,000 tei kapitiia mai ki te au pupu o te aronga akakitekite Patireia ra!

10. Eaa te apinga ou tei orongaia maira i te 1995, e eaa i tau ei te reira kia akatupu viviki i te aronga apiiia i te Pipiria i te pae vaerua ra?

¹⁰ “Te maata ua nei te mou, te iti nei ra te aronga e kokoti,” ta Iesu i tuatua. (Mataio 9:37) E maata tikai, te mou. E maata te vaira kia raveia. I etai enua kua papaia te au ingoa o te au tangata ki tetai papaanga no te au apii Pipiria. No reira ma tetai manakoanga kia akatotoa viviki i te kite i te Atua, kua oronga mai “te tavini akono meitaki e te pakari” i te 1995 i tetai apinga ou, te puka 192 kapi koia te Te Kite te ka Arataki ki te Ora Mutu Kore. Kare teianei apinga puapinga maata e akapou taime ki runga i te au apiianga pikikaa. Te oronga maira te reira i te au tuatua mou o te Pipiria na roto i tetai tu tau tikai. Te manakonakoia ra e ka tauturu te reira i te aronga apii Pipiria kia viviki te tupu anga i te pae vaerua. Te tupu maata nei i teianei te meitaki anga i te ao katoa i te puka Te Kite ma te 45,500,000 au kopi tei neneiia i te 125 au reo e ma te urianga ki roto i etai atu reo e 21 te raveia nei.

11. Eaa te apinga meitaki tei orongaia maira ei tauturu i te apii i te aronga kite kore me kare e mea ngiti ua te kite i te tatau, e i akapeea ta te reira akatupuanga ririnui i ta tatou porokarama apiianga i te ao katoa nei?

¹¹ Mei tetai tuatau ki tetai tuatau kua oronga maira ‘te tavini akono meitaki’ i etai apinga tei akapapaia ra no tetai pupu taka ke, me kare aronga tei kotingaia ra. Ei akatauanga, akapeea te au tangata penei te umuumuia ra te tauturu taka ke no ta ratou peu me kare tu akonoanga? Akapeea e raukaʼi ia tatou i te tauturu ia ratou kia kite i ta te Atua ra au umuumu anga? I te 1982 kua rauka mai ia tatou te apinga tikai ta tatou i anoano ra​—koia te poroutia Kia Rekareka i te Oraanga ki runga i te Enua e Tuatau Uatu! Kua tau meitaki teia puka akatutu maoraoraia mai ei tetai apinga tano i te apiianga i te aronga kite kore me kare e meangiti te kite i te tatau. Tei roto i te reira tetai oronga anga mama ua e te ngoie oki kia kite i te au apiianga tumu o te Tuatua Tapu. Mei te oronga anga mai i te reira, kua rave te poroutia Kia Rekareka i te Oraanga i tetai oronga anga ririnui ki ta tatou porokarama apiianga. E tere atu i te 105,100,000 au kopi tei neneiia i te 239 au reo, kua akariro ko te reira te puka maata roa tei uriia e te Taiate Punanga Tiaki tae roa mai ki teia tuatau nei!

12, 13. (a) Mei te 1990 mairai, eaa te raveanga ou ta ‘te tavini akono meitaki’ i oronga mai kia itae ki tetai aronga totoa atea ra? (e) Akapeea tatou me taangaanga i te au vitio a te Taiate i ta tatou angaanga tutu aere? (ng) Eaa te apinga ou tei oronga uaia akenei ei tauturu i ta tatou angaanga akariroanga tangata ei pipi?

¹² Kapiti katoa ki te au puka neneiia, akamata mai i te 1990 kua oronga mai ‘te tavini akono meitaki’ kia tatou i tetai apinga ei apiianga tei oronga maira i tetai apinga ou kia itae atu ki tetai pupu totoa maataia ra​—koia te au tepe vitio. Ia Okotopa o taua mataiti ra, kua orongaia mai te vitio e 55 miniti Jehovah’s Witnesses​—The Organization Behind the Name​—ko te vitio mua ia tei maaniia e te Taiate Punanga Tiaki ra. Ka rauka mai te oronga anga taka meitaki e te manea i roto e vaitata i te 35 au reo, te akaari maira i te akaaerenga o te au tangata o Iehova i te ao katoa i te akatupuanga i ta Iesu akauenga kia akakitekite i te tuatua meitaki i te enua katoa nei. Kua akapapa meitakiia taua vitio ra kia tauturu ia tatou i te angaanga akariroanga tangata ei pipi. Kare te au papuritia Patireia i kaimoumou taime e kua rave i teia apinga kua taangaangaia i te tutu aereanga. Kua raveia e tetai papaki ki roto i ta ratou au pute puka, kua papa meitaki kia akaari atu me kare kia oronga atu i te reira ki te aronga inangaro maira. I muri poto ake i te oronga anga mai i te reira, kua tata tetai akaaere tutaka: “Kua riro te au vitio ei tetai apinga no te 21 anere mataiti kia itae atu i te au manako e te au ngakau o te aronga e au mirioni ua atu, no reira te manakonako nei matou e ko teia vitio ko te mea mua ia o tetai papaanga roa o te au vitio ta te Taiate te ka taangaanga i te akatotoa atu i te angaanga Patireia i te ao katoa nei.” E tika oki, kua orongaia mai etai atu vitio, kapiti katoa i te toru tuanga o te papaanga The Bible​—A Book of Fact and Prophecy e te Jehovah’s Witnesses Stand Firm Against Nazi Assault. Me te vai maira te au vitio a te Taiate i roto i toou reo, kua taangaanga ainei koe ia ratou i roto i taau angaanga tutu aere?a

¹³ I mua ua akenei ko tetai apinga ou, koia te poroutia Eaa ta te Atua e Umuumu Maira ia Tatou?, kua orongaia mai ei tauturu i ta tatou angaanga akariroanga tangata ei pipi. Eaa ra i neneiiaʼi te reira? Akapeea me taangaanga i te reira?

Akara Matatioanga i Tetai Apinga Ou

14, 15. Kua akapapaia mai te poroutia Umuumu naai, e eaa to roto i te reira?

¹⁴ Kua akapapaia te puka ou Eaa ta te Atua e Umuumu Maira ia Tatou? no te au tangata kua irinaki ke ana i te Atua e te akangateitei ra oki i te Pipiria. Ko te au akaaere tutaka pera katoa te au mitinari tereniia i Gileada ma te au mataiti e manganui te kiteanga i te au enua te tupu ra na ratou i tauturu i te teateamamao anga i teia poroutia. Tei roto i te reira tetai tuanga apii papa meitaki te kapiti katoa ra i te au apiianga tumu anga o te Pipiria ra. E akapumaana te tuatuaanga, e mama, e te tika tikaʼi. I reira oki, kare te tataanga i akamama ravaia. Te oronga maira ia kare i te “u” anake ua mari ra ko te “kai pakari” katoa oki mei te Tuatua mai a te Atua ra na roto i tetai mataara te ka tau te maata anga o te au tangata kia kite marama.​—Ebera 5:12-14.

¹⁵ I teia au mataiti ua akenei kua pati te au papuritia Patireia i te au enua ke ke no tetai puka kia tau tikai ki taua puka ra. Ei akatauanga, kua tata te opati manga o te Taiate Punanga Tiaki i Papua Nu Kini: “Kua oripu ua te manako o te au tangata ra na te au apiianga akonoanga tapepeanga. Te umuumu ra ratou i te au tuatua tika no te tuatua mou, te turuia ra e etai au irava Pipiria te ka rauka ia ratou i te akara i roto i ta ratou uaorai au Pipiria. Te umuumu ra ratou i tetai oronga anga taka meitaki e te tau no ta te Atua e umuumu maira i te au Kerititiano mou e ko teea te au peu e te au ravenga kare aia e ariki.” Ko te poroutia Umuumu ra ta tatou tikai ia e anoano ra ei tauturu i taua aronga ra kia apii i ta te Atua ra au umuumu anga.

16. (a) Koai tikai te ka puapingaia mei te au akataka anga mama i te poroutia ou ra? (e) Penei akapeea te aronga i toou ngai e puapingaiaʼi i te poroutia Umuumu ra?

¹⁶ Akapeea koe me taangaanga i teia apinga ou? Te mea mua, ka rauka kia taangaangaia te reira ei apii ma te au tangata e rave anga ngata no ratou te tatauanga me kare penei kare ratou e inangaro kia tatau.b Penei ka puapingaia taua aronga ra mei te au akataka anga mama ua i roto i te poroutia ra. I muri ake i te akara matatioanga i tetai kopi mua o taua puka nei, kua tata te au opati manga o te Taiate Punanga Tiaki i tei aru mai nei: “Ka meitaki te poroutia no te taangaanga i te au ngai e manganui o te enua kare ra te au tangata e inangaro kia maata te tatau anga.” (Paratiri) “E maata te aronga no etai enua mai tei kore ra e kite i te tatau i to ratou reo enua e tei vaira etai tu ngata i te tatau anga i te reo Varani. Penei ka meitaki teia poroutia kia taangaangaia ei tetai tauturu i te apiianga ma taua aronga ra.” (Varani) Ka rauka ainei ia koe kia tamanako i etai tangata i toou ngai penei ka puapingaia mei te poroutia Umuumu ra?

17. Na roto i teea tu e riro ei te poroutia ou ra ei mea meitaki i te au enua e manganui, e no teaa ra?

¹⁷ Te rua, i te au enua e manganui penei ka meitaki te poroutia no te akamataanga au apii Pipiria ma te au tangata mataku i te Atua noatu eaa te maata to ratou kite apiianga. Inara, ka tau kia tauta kia akamata i tetai apii i te puka Te Kite te ka Arataki ki te Ora Mutu Kore. Inara i etai tu penei ka ngoie ake te akamata i tetai apii i te poroutia. I reira i tetai tuatau tau, ka tau kia tauiia te apii ki te puka Te Kite, ta tatou tauturu apii maata e te rekaia. No runga i teia taangaanga i te poroutia Umuumu, kua tata nga opati manga o te Taiate Punanga Tiaki: “E mea ngata te akamataanga i te au apii Pipiria, e i te akaraanga e meitaki atu te akamataanga i tetai apii me akamata te au papuritia ma tetai poroutia.” (Tiamani) “E meitaki maata tetai poroutia mei teia te tu i te akamataanga i te au apii ou i te Pipiria, te ka rauka i reira kia rave ua atuia ma te puka Te Kite.” (Itaria) “Noatu rai e teitei te turanga kite apiianga o te Tiapani, ko te maata anga e kotinga ravaia te kite i te Pipiria e tona au apiianga akatumu anga. Ka tau te poroutia ei tetai toka takaianga atu ki te puka Te Kite ra.”​—Tiapani.

18. Eaa ta tatou te ka tau kia maara no runga i te rave anga i ta te Atua ra au umuumu anga?

¹⁸ Na te au opati manga o te Taiate takapini i teianei ao i pati teia poroutia, e kua orongaia mai te akatika anga kia uriia ki roto e 221 au reo. Kia riro teia puka ou ei mea puapinga i te tauturuanga ia tatou kia tauturu atu ia etai ke ra kia kite eaa ta te Atua ko Iehova e umuumu maira ia ratou. No ta tatou tuanga, kia maara ia tatou e ko te akonoanga i ta te Atua ra au umuumu anga, kapiti katoa i tana akauenga kia tutu aere e kia akariro te tangata ei pipi, te oronga maira i tetai tuatau oko maata no tatou kia akaari kia Iehova i te maata o to tatou aroa iaia. Ae, ta te Atua e umuumu maira ia tatou kare ia i te apainga teiaa. Ko te tu meitaki ia no te ora anga!​—Salamo 19:7-11.

[Au Tataanga Rikiriki i Raro]

Ka Rauka Ainei ia Koe te Akataka?

◻ I roto i teea angaanga e rua tuanga ta Iehova e umuumu ra i tona au tavini kia rave kapiti?

◻ Eaa ra ta tatou apainga kia tutu aere e te akariroanga au tangata ei pipi i kore ei i te apainga teiaa na tatou?

◻ Eaa te au apinga tei orongaia mai e “te tavini akono meitaki e te pakari” no ta tatou angaanga tutu aereanga e te akariroanga tangata ei pipi?

◻ I akapapaia te poroutia Umuumu naai, e akapeea tatou i te taangaanga i te reira i ta tatou angaanga orometua?

[Tutu i te kapi 24]

Kare i te apainga teiaa ta tatou tutuanga e te angaanga akariroanga tangata ei pipi

[Au Tutu i te kapi 26]

“Let God Be True” (1946, tata akaouia i te 1952): 19,250,000 i roto i te 54 au reo

“Te Tuatua-Mou te Ka Arataki ki te Ora Mutukore” (1968): 107,000,000 i roto i te 117 au reo (akaariia te reo Varani)

“Ka Rauka ia Koe te Ora Mutukore i Paradaiso i te Enua Nei” (1982): 80,900,000 i roto e 130 au reo (akaariia te reo Rutia)

“Te Kite te ka Arataki ki te Ora Mutu Kore” (1995): 45,500,000 i roto e 125 au reo (akaariia te reo Tiamani)