Peea te Akataka Anga i te Akamorianga Mou

TE MAATAANGA i te au akonoanga te karanga ra e no ko mai i te Atua ta ratou apiianga. No reira, e mea meitaki kia akarongo tatou i te au tuatua a Ioane te apotetoro a Iesu, ko tei tata: “E aku au akaperepere e, auraka e akarongo atu i te au vaerua ravarai, e timata ra i taua au vaerua ra, kia kitea e, no ko mai aina i te Atua ra: no te mea e manganui te peroveta pikikaa i aere atu na na te ao nei.” (1 Ioane 4:1) Ka akapeea ra tatou i te timata anga i tetai apinga kia kiteaia e me no ko mai rai i te Atua?

Te au mea ravarai no ko mai i te Atua ka akaata mai i tona tu peretana, i tona tu maata roa atu, koia oki te aroa. Ei akaraanga, to tatou tu natura kia ongi i te aunga, tei tauturu ia tatou kia mareka i te aunga kakara o te au mea raurau kairo kai, te au tiare, me kore te varaoa maoa ou ua, e akakiteanga te reira i to te Atua aroa. To tatou tu kite kia akara i te ra e opu atura, te pepe, me kore i te mata katakata o tetai manga tamaiti, te akaata maira i to te Atua aroa no tatou. Mei te reira katoa to tatou tu kite kia akarongo i te tangi reka o te imene, te tangi o te manu, me kore i te reo o tetai tei akaperepereia. E to tatou tu tangata katoa nei, noatu e tu apa ua, te akaata maira i to te Atua aroa. No reira i rauka ai ia tatou kia kite i te tika o ta Iesu au tuatua: “E mea meitaki i te oronga atu i te rave mai.” (Angaanga 20:35) E mea reka na tatou i te akaari i te aroa no te mea i angaia mai tatou “i te tu o te Atua.” (Genese 1:27) Noatu oki e e maata to Iehova au tu ke atu, ko te aroa ra te tuanga takake roa atu o tona tu peretana.

Te au tataanga no ko mai i te Atua, ka akaata mai i tona aroa. E manganui ua atu te au tataanga taito a te au akonoanga o teia ao. Te puapingaia ra ainei taua au tataanga ra i te akaata anga i to te Atua aroa?

Ko te tika koia oki, te maataanga i te au tataanga taito a te akonoanga, e iti ua rai te akamarama maira no runga i to te Atua aroa no tatou me kore i to tatou aroa no te Atua. No reira, kare e rauka mai te pauanga a te mirioni ua atu au tangata me ui ratou e, “Eaa i reira te tumu e kite ua nei tatou i te akairo o to te Atua aroa i roto i te au mea i angaia e oti akera, te tupu ua atura te mamae e te kino?” I tetai tua, ko te Pipiria ua rai te tataanga taito a te akonoanga e akamarama pu maira i to te Atua aroa. Te apii katoa maira te reira ia tatou e ka akapeea i te taangaanga anga i te aroa.

Te Puka no Runga i te Aroa

Te akaari maira te Tuatua a te Atua, koia oki te Pipiria, e ko Iehova “te Atua nona te aroa.” (2 Korinetia 13:11) Te akataka maira te Pipiria e akapeea te aroa i te akakeu anga ia Iehova kia oronga i tetai oraanga kare e maki e kare e mate no nga tangata mua. Inara kua riro te meameaau i te mana akatere o te Atua, i te apai mai i te kino ki runga i te tangata. (Deuteronomi 32:4, 5; Roma 5:12) Kua rauka ia Iehova i te akaoki akaou mai i tei ngaro ana. Te na ko maira te Tuatua a te Atua e: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Te akamarama meitaki maira te au Tuatua Tapu i to te Atua aroa, i te akataka mai anga te reira e kua oronga mai te Atua i tetai kavamani apa kore i roto i te rima o Iesu, ei akaoki akaou mai i te au ki te au tangata akarongo.​—Daniela 7:13, 14; 2 Petero 3:13.

Te akakite poto ua maira te Pipiria i ta te tangata apainga na roto i teia au tuatua: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata. E mei te reira katoa ra te rua, ‘E aroa atu koe i toou tangata tupu mei te aroa ia koe uaorai.’ Te ture katoa e te au peroveta ra, tei teianei puke ture e rua.” (Mataio 22:37-40) Te akapapu maira te Pipiria e e mea akauruia te reira e te Atua. I te mea te akaata meitaki maira te reira i tona tu peretana, papu tikai ia tatou e no ko mai te reira i “te Atua nona te aroa.”​—2 Timoteo 3:16.

Na te taangaanga anga i teia turanga okotai, ka rauka ia tatou kia akataka e ko teea tikai te au tataanga taito no ko mai i te Atua. Te akataka katoa maira te aroa e koai ma te aronga akamori mou tikai, no te mea te aru ra ratou i te Atua i te akaari anga i te aroa.

Akapeea i te Akataka Anga i te Aronga Tei Aroa i te Atua

Ka taka meitaki ua e koai te aronga aroa mou tikai i te Atua, i teianei tikai, ia tatou e noo nei i roto i ta te Pipiria e karanga ra e ko “taua tuatau openga ra.” Te maata ua atura te tangata i te “akaperepere ia ratou uaorai, ei noinoi, . . . ei anoano i te au mea e navenave ei ra, kare i anoano i te Atua.”​—2 Timoteo 3:1-4.

Akapeea koe e kite ei i te iti tangata e aroa ra i te Atua? Te na ko maira te Pipiria e: “Teia oki te inangaro i te Atua, ko te akono i tana au akauenga.” (1 Ioane 5:3) Na te aroa i te Atua e akakeu i te tangata kia akangateitei i te au turanga o te Pipiria no te tu tau. Ei akaraanga, e au ture to roto i te Tuatua a te Atua no runga i te ainga e te akaipoipoanga. Ka tikaia te au pirianga ainga i roto ua ra i te akaipoipoanga, e e mea tinamou te akaipoipoanga. (Mataio 19:9; Ebera 13:4) I te aere anga tetai vaine i Paniora tei apii orometua ana ki tetai uipaanga, te ngai e apii maroiroi ra te Au Kite o Iehova i te au ture a te Pipiria no te tu tau, kua karanga aia e: “I toku akaruke anga kua akamaroiroiia au, e te au akoanga Tuatua Tapu, e pera katoa te tu rotai i rotopu i teia iti tangata, to ratou tu akono tau, e to ratou tu mako.”

Kapiti atu ki to ratou aroa no te Atua, ka taka ua te au Kerititiano mou na te mataara e akaari ra ratou i te aroa no to ratou tangata tupu. Ta ratou angaanga puapinga roa atu ko te tuatua ki etai ke no runga i te manakonakoanga okotai no te tangata, te Patireia o te Atua. (Mataio 24:14) Kare e apinga ke atu e rauka i te apai mai i te au puapinga mou ki to ratou au tangata tupu mari ra ko te tauturu ia ratou kia rauka te kite i te Atua. (Ioane 17:3) Te akaari katoa ra te au Kerititiano mou i to ratou aroa na roto i te au mataara ke atu. E oronga ana ratou i te tauturu tau ki te aronga tei rokoia e te kino. Ei akaraanga, te akatupu anga tetai ngaruerue enua i te tumatetenga i Itaria, kua ripoti mai tetai nuti pepa e kua rave te Au Kite o Iehova i te “angaanga na roto i te mataara tau tikai, i te oronga anga i te tauturu ki te aronga i rokoia e te kino, ma te kore e apiapi atu e eaa ta ratou akonoanga.”

I te pae mai i te aroa anga i te Atua e te tangata tupu, te aroa ra te au Kerititiano mou i tetai e tetai. Kua tuatua a Iesu: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.”​—Ioane 13:34, 35.

Te kite puia ra ainei te tuke i te aroa o te au Kerititiano mou no tetai e tetai? Te karanga ra tetai vaine tama are ko Ema tona ingoa e ae. E angaanga ana aia i La Paz, Porivia, te ngai e riro putuputu ana te au tu eteniki tuke tuke ei akatakake i te aronga apinga nui mei te aronga putaua. Kua akakite aia e: “I te taime mua i aere ei au ki te uipaanga a te Au Kite o Iehova, kua kite atu au i tetai tangata kua akamanea meitaki e noo ra ki te pae i tetai vaine Initia. Kare roa au i kite ana i tera tu i mua ana. I taua atianga rai, kua kite au e ko teia tikai te iti tangata o te Atua.” Mei te reira rai tetai vaine Paratiri mapu ua ko Miriam te ingoa tei akakite e: “Kare au i kite e ka akapeea au e mataora ai, e kare katoa i roto i toku pamiri. Te taime mua i kite ei au i te aroa e taangaangaia ra koia oki i rotopu i te Au Kite o Iehova.” I Marike, kua tata te akaaere o te nuti no tetai ngai tivi e: “Naringa te maataanga i te tangata e noo ana na te mataara e noo ra ta kotou akonoanga, kare ia teia enua e o ki te turanga tei roto aia i teianei. Ko au tetai tangata tata nuti tei kite e kua akatumuia to kotou akaaerenga ki runga i te aroa e te akarongo ngaueue kore i roto i Tei Anga mai.”

E Kimi i te Akamorianga Mou

E tu kitea puia te aroa no te akamorianga mou. Kua akaaite a Iesu i te kitea anga te akamorianga mou ki te kitea anga te mataara tano e te iki anga kia aere na reira. Ko te mataara anake ua ia te arataki atura ki te ora mutu kore. Kua akakite a Iesu: “E tomo kotou na te ngutupa o iti; te atea maata nei te ngutupa, e te pararauare nei te ara, e tae atu ei ki te mate; e manganui te na reira i te tomo. Te kokota ua nei te ngutupa, e te piri oki o te ara, e tae atu ei ki te ora, e tokoia ua ake tei kite atu i te reira.” (Mataio 7:13, 14) E tai ua rai pupu Kerititiano mou e aere tavaitai ra ma te Atua i runga i te mataara o te akamorianga mou. No reira, e mea puapinga tikai e ko teea taau akonoanga ka iki. Me kitea ia e koe taua mataara ra e ka iki kia aaere na reira, kua kitea ia i reira e koe te mataara meitaki roa atu no te mea ko te mataara ia o te aroa.​—Ephesia 4:1-4.

E akamanako ana i te rekareka ka rauka ia koe, i te aaere anga koe na runga i te mataara o te akamorianga mou! Kua aite rai te reira mei te aaere anga ma te Atua. Ka rauka ia koe i te apii i te tu pakari e te aroa mei ko mai i te Atua kia rauka te rekareka i te au pirianga meitaki ma etai ke. Ka rauka ia koe i te apii no runga i te akakoroanga o te oraanga, e ka rauka ia koe kia marama i te au taputou a te Atua e ka rauka tetai manakonakoanga no te tuatau ki mua. Kare roa koe e taitaia i te kimi anga i te akamorianga mou.

[Tutu i te kapi 5]

I roto i te au tataanga taito a te akonoanga, ko te Pipiria anake ua te akakite maira i te aroa o te Atua

[Au Tutu i te kapi 7]

Ka kite uaia te au Kerititiano mou no te mea te taangaanga ra ratou i te aroa