Kia Mura Ua “te Uira o Iehova”

1. Akapeea te Pipiria te akatutu anga mai i te inangaro mou?

“MURA [inangaro] e mura ai ïa, mei te uira o Iehova ra. Maata ua rai te vai, kare te inangaro e mate kia pi, kare katoa e mate i te vai puke.”b (Peʼe. 8:6, 7) Mei teaa atura teia akatutu anga manea no te inangaro mou! Te akapapu maira teia au tuatua i tetai tika no te au tokorua akaipoipo: Ka rauka ia korua tetai inangaro mutu kore.

2. Eaa ta tetai nga tokorua ka akapapu kia kore to raua inangaro e ngaro?

² Kia tupu te inangaro mutu kore i rotopu i te nga tokorua akaipoipo, tei runga ua te reira ia raua. Ei akatutuanga, ka kā mutu kore ua te aʼi no tetai tuatau roa—tera ua kia tāuruuruia te reira. Me kare te reira e akonoia, ka mate te aʼi. Pera te inangaro i rotopu i te tane e te vaine ka vai mutu kore te reira—me akamatutu raua i to raua pirianga. I tetai au taime, penei ka ngaro te inangaro o te nga tokorua, me tupu te ngatā o te moni, te makimaki, e te au taomi anga o te utuutu tamariki. Me kua akaipoipo koe, akapeea koe me akamura i “te uira o Iehova” i roto i toou akaipoipo? I teia atikara, ka uriuri tatou e toru mataara kia matutu toou pirianga e kia mataora te akaipoipo.c

E AKAMATUTU I TOOU PIRIANGA KIA IEHOVA

3. Akapeea te pirianga matutu kia Iehova me tauturu i te nga tokorua kia akaperepere ia raua? (Koheleta 4:12) (Akara katoa i te tutu.)

³ Kia mura ua “te uira o Iehova,” ka anoanoia te tane e te vaine kia angaanga pakari kia rauka tetai pirianga matutu kia Iehova. Akapeea teia pirianga me tauturu i te akaipoipo? Me akaperepere te nga tokorua i te pirianga ki to raua Metua i te rangi, ka taangaanga raua i tana akoanga, e ka autu raua i te au manamanata tei akatupu i te inangaro kia ngaro. (E tatau ia Koheleta 4:12.) Ka tauta katoa te aronga pae vaerua i te aru i to Iehova akaraanga e tona au tu, mei te takinga meitaki, akakoromaki, e te akakore i te ara. (Ephe. 4:32–5:1) Te nga tokorua tei akaari i teia tu, ka māmā ua i te inangaro kia tupu. Karanga tetai tuaine ko Lena, tei akaipoipo e 25 tuma mataiti, “E māmā ua i te akaperepere e te akangateitei i tetai e tu pae vaerua tona.”

4. Eaa a Iehova i iki ei ia Iosepha e Maria ei nga metua no te Mesia?

⁴ Akamanako ana i tetai akaraanga Pipiria. Te iki anga a Iehova i tetai nga tokorua ei nga metua no te Mesia, kua iki Aia ia Iosepha e Maria no roto mai i te uanga o Davida. Eaa te tumu? No te mea e pirianga vaitata to raua kia Iehova, e kua kite a Iehova e ka akamaroiroi raua i to raua akaipoipo na te akaperepere anga iaia. E te au tokorua akaipoipo, eaa ta kotou ka apii mai mei ia Iosepha e Maria?

5. Eaa ta te au tane ka apii mai mei ia Iosepha?

⁵ Kua taangaanga a Iosepha i ta Iehova arataki anga, e kua riro aia ei tane meitaki atu. E toru atianga, kua rauka iaia ta te Atua apiianga no runga i tona ngutuare tangata. Kua akarongo ua aia, noatu e ka rave aia i te au taui anga maata. (Mata. 1:20, 24; 2:13-15, 19-21) Na te aru anga i te arataki anga a te Atua, kua paruru, kua turu, e kua akono a Iosepha ia Maria! Akamanako ana i ta Iosepha i rave e kua akaperepere e kua akangateitei a Maria iaia. E te au tane, ka rauka ia koe te aru i to Iosepha akaraanga na te aruanga i te akoanga Pipiria no te akono i toou ngutuare tangata.d Me taangaanga koe i teia ako anga, e te rave i te au taui anga, te akaperepere ra koe i taau vaine e te akamatutu ra i toou akaipoipo. Karanga tetai tuaine i Vanuatu tei akaipoipo e 20 tuma mataiti e: “Me kimi e me taangaanga taku tane i te arataki anga a Iehova, ka akangateitei maata atu au iaia. Ka manako tinamou au, ma te irinaki i tana au ikianga.”

6. Eaa ta te au vaine ka apii mai mei ia Maria?

⁶ E pirianga rai to Maria kia Iehova; kare aia i aru ua ana i te akarongo o Iosepha. Kua mārama meitaki aia i te au Tuatua tapu. Kua akamanako oonu katoa aia i te reira. (Luka 2:19, 51) Kare e ekoko anga, na to Maria tu pae vaerua i meitaki atu ei aia ei vaine. I teia rā, te tauta nei te au vaine kia aite ratou mei ia Maria. Karanga tetai tuaine ko Emiko e: “I toku tuatau kare au i akaipoipo ake, e akapapaanga pae vaerua taku. Te akaipoipo anga au, kua aru ua au i te akarongo o taku tane no te mea nana e pure e te arataki i te akamorianga. Kite mai au ka anoanoia au kia akamatutu i toku pirianga kia Iehova. I teianei e akanoo ana au i tetai tuatau ki te Atua—te pure, te tatau i te au Tuatua Tapu, e te akamanako oonu i tona au manako.” (Gala. 6:5) E te au vaine, ia koe e akamatutu ra i toou pirianga oa kia Iehova, ka akapaapaa e ka akaperepere maata atu taau tane ia koe.​—Mase. 31:30.

7. Eaa ta te au tokorua ka apii mai mei ia Iosepha e Maria no te akamori kapiti?

⁷ Kua angaanga kapiti a Iosepha e Maria kia matutu to raua pirianga kia Iehova. Kua mārama raua i te puapinga no te akamori kapiti ia Iehova ei ngutuare. (Luka 2:22-24, 41; 4:16) Penei e ngatā te rave i te reira, i te tamariki e anau maira, inara kua rauka ia raua. E akaraanga meitaki tikai no te au tokorua akaipoipo i teia rā! Me e tamariki ta korua, mei ia Iosepha e Maria, penei ka ngatā i te aere ki te au uipaanga me kore te akapapa i te tuatau no te akamorianga a te ngutuare. Penei e ngatā i te akatano i tetai taime no te apii me kore te pure kapiti ei nga tokorua. Akamaara, me akamori kapiti korua ia Iehova, ka akavaitata atu korua kiaia e ki tetai e tetai. E akariro i te akamorianga ei mea puapinga rava.

8. Eaa ta tetai nga tokorua tei apikepike te akaipoipo ka rave kia puapinga mei te akamorianga a te ngutuare?

⁸ Akapeea me kua apikepike to korua akaipoipo? Penei kare te akamorianga a te ngutuare e reka ana. Me koia ia, e akamata i tetai akamorianga poto ua e te mataora, ta korua i inangaro i te uriuri. Ka akamatutu teia i to korua pirianga e te anoano kia rave kapiti i te au mea pae vaerua.

AKAPOU KAPITI I TETAI TAIME

9. Eaa te tane e te vaine ka akapou ei i tetai taime kia raua?

⁹ E te au tokorua akaipoipo, ka akamura korua i to korua inangaro me akapou kapiti korua i tetai taime kia korua. Me pera korua, kare i reira to korua inangaro e apikepike—i te pae manako e te ngakau. (Gene. 2:24) Akara i ta Lilia e Ruslan i kite mai te akaipoipoanga raua e 15 mataiti i teianei. Karanga aia: “Kite mai maua e kare e maata ana to maua taime kia maua mei tei manakoia. Kua pou to maua taime ki runga i te ngai angaanga, te angaanga ngutuare, e i muri mai ki te tamariki. Kite mai maua me kare maua e akapou i tetai taime kia maua ei nga tokorua, ka ngaro aere to maua inangaro no tetai e tetai.”

10. Akapeea te au tokorua akaipoipo me taangaanga i te kaveinga ia Ephesia 5:15, 16?

¹⁰ Eaa ta te au tokorua ka rave kia akapou kapiti raua i tetai taime? Penei ka akanoo raua me kore ka akapapa, i tetai taime no tetai e tetai. (E tatau ia Ephesia 5:15, 16.) Karanga tetai tane i Nigeria ko Uzondu e: “Me akapapa au i taku angaanga, ka akanoo au i tetai taime no taku vaine kia akapou kapiti maua i tetai taime no maua, e ka akariro au i teia taime ei mea puapinga rava.” (Phili. 1:10) Akamanako akapeea a Anastasia, te vaine a tetai akaaerenga kotinga i Moldova, te taangaanga meitaki anga i tona taime. Karanga aia: “E rave ana au i taku angaanga e te maroiroi ra taku tane te rave i tana au apainga. Me oti te reira, ka akapou kapiti maua i tetai taime a muri ake.” Inara akapeea me riro taau akapapaanga ei mea ngatā, kare e rauka te taime no te akapou kapiti?

11. Eaa te angaanga ta Akuila e Peresila i rave kapiti?

¹¹ Ka rauka i te aronga akaipoipo te apiianga mei te akaraanga o Akuila e Peresila, tei akaperepereia e te au Kerititiano mua. (Roma 16:3, 4) Noatu kare te Pipiria i akakite maata mai ana i to raua oraanga akaipoipo, kua angaanga, kua tutu aere, e kua tauturu kapiti raua i te au taeake. (Anga. 18:2, 3, 24-26) Te tika, me taiku te Pipiria ia Akuila e Peresila, kua taiku kapitiia mai raua.

12. Eaa ta te tane e te vaine ka rave kia akapou maata atu i tetai taime kia raua? (Akara katoa i te tutu.)

¹² Akapeea te au tokorua me aru i te akaraanga o Akuila e Peresila? Akamanako i te au mea taau e toou tokorua ka anoanoia kia rave. Ka rauka ainei ia korua te rave kapiti i teia au angaanga kare e ko koe anake ua? Ei akaraanga, kua tutu aere kapiti a Akuila e Peresila. Te rave putuputu ra ainei korua i te reira. Kua angaanga kapiti katoa a Akuila e Peresila. Noatu kare e aiteite ana ta korua ngai angaanga, ka rauka ainei ia korua te rave kapiti i te angaanga o te ngutuare? (Kohe. 4:9) Me tauturu korua i tetai e tetai, ka taokotai korua ei pupu e ka rauka ia korua te tuatua kapiti. E 50 tuma mataiti to Robert e Linda akaipoipo anga i teianei. Karanga aia: “E tika, kare e maata ana to maua taime te kanga kapiti. Inara me tāmā au i te kapu ka tamaro taku vaine i te reira e me vaere au te ngangaere i vao kua tauturu mai aia iaku, kua mataora au. Na te rave kapiti anga i te reira kua piri vaitata maua. Kua mura ua atu to maua inangaro.”

13. Kia taokotai, eaa ta tetai tane e te vaine ka rave?

¹³ E akamaara, noatu te noo kapiti ra kare te aiteanga e kua taokotai tikai te au mea. Karanga tetai vaine i Brazil e: “I teia au rā, no te au tamanamanata anga, e māmā ua i te manako e akapou kapiti ana maua i tetai taime no te mea okotai o maua ngutuare. Kite mai au e maata atu te anoanoia ra. Ka anoanoia au kia oronga i tetai taime no toku tokorua.” Akara akapeea a Bruno e tana vaine, ko Tays, te akapapu anga e te inangaro ra raua ia raua. Karanga aia: “I to maua tuatau va, ka akaruke maua i te tereponi apaipai kia mataora to maua taime no tetai e tetai.”

14. Me kare te nga tokorua e mataora i te akapou kapiti i to raua taime, eaa ta raua ka rave?

¹⁴ Akapeea, me kare korua e reka ana te akapou kapiti i tetai taime? Penei e tuke ta korua e reka ana, penei te akariri ra korua i tetai e tetai. Eaa taau ka rave? Akamanako ana i te aʼi tei taikuia i te akamata anga. Kare te aʼi e mura viviki ana. Ka tāuruuru marie koe i te reira ki te au vaie mamaata. Kore i reira e akapou i tetai manga taime no korua i te au rā? E rave i tetai mea te reka ra korua i te rave, kare i te mea ka akatupu i te riri. (Iako. 3:18) Na te akamata rikiriki anga, ka akamura korua i to korua inangaro.

E AKANGATEITEI I TETAI E TETAI

15. Eaa te tu akangateitei i puapinga ai kia mura ua te inangaro o te nga tokorua?

¹⁵ E puapinga te tu akangateitei i roto i te akaipoipo. Mei te aʼo tei akakā meitaki i te aʼi. Me kare e aʼo, ka mate te aʼi. Pera rai, me kare e tu akangateitei, ka akaanuanu viviki te inangaro o te nga tokorua. I tetai tua, me tauta te tane e te vaine i te akangateitei i tetai e tetai, te angaanga ra raua kia mura ua to raua inangaro. E akamaara, kare e te manako ra koe e kua akangateitei koe i tetai e tetai, mari ra kia kite toou tokorua e te akangateiteiia atura aia. Kua akaipoipo ana a Penny e Aret no tetai 25 tuma mataiti. Karanga aia: “Na te tu akangateitei e akatupu ana i te inangaro i roto i to maua ngutuare. Tuatua ua maua i to maua manako no te mea te akaperepere ra maua i te manako o tetai e tetai.” Eaa i reira taau ka rave kia kite toou tokorua e te akangateitei ra koe iaia? Akamanako ana i te akaraanga o Aberahama e Sara.

16. Eaa ta te au tane ka apii mai mei te akaraanga o Aberahama? (1 Petero 3:7) (Akara katoa i te tutu.)

¹⁶ Kua akangateitei a Aberahama ia Sara. Kua akamanako aia i to Sara au manako ngakau. I tetai atianga, kua taitaiaia a Sara, e kua akakite i tona au manako ma te riri kia Aberahama, e kua akaapa atu iaia. Kua tuatua riri atura ainei a Aberahama kiaia? Kare. Kua kite aia e e vaine akaaka a Sara e te turuturu iaia. Kua akarongo ua a Aberahama e kua tauta i te rapakau i te manamanata. (Gene. 16:5, 6) Eaa ta tatou ka apii mai? E te au tane, e mana to kotou kia tuku i te au ikianga no te ngutuare. (1 Kori. 11:3) Inara, ma te aroa e akamanako i te manako o taau vaine i mua ake ka tuku ei i toou manako, i te mea e no runga te reira iaia. (1 Kori. 13:4, 5) I tetai au taime, penei te apiapiia ra taau vaine e penei ka inangaro aia i te akakite mai i tona manako. Te akangateitei ra ainei koe i tona au manako na te akarongo meitaki anga i te reira? (E tatau ia 1 Petero 3:7.) Mei te 30 mataiti to Angela e Dmitry akaipoipoanga. Akamārama mai aia i te tu akangateitei o tana tane: “E akarongo ua mai ana a Dmitry me manataia au e me inangaro au i te tuatua kiaia. E tiaki marie mai ana aia, noatu kare au e tuatua maru ana.”

17. Eaa ta te au vaine ka apii mei te akaraanga o Sara? (1 Petero 3:5, 6)

¹⁷ Kua akangateitei a Sara ia Aberahama na te turu anga i tana au tukuanga tika. (Gene. 12:5) I tetai atianga, kua akono a Aberahama i tetai nga manuiri tei tae mai. Kua pati aia ia Sara kia akaruke i tana e rave ra e tunu mai i tetai ākā varaoa. (Gene. 18:6) Kua rave viviki a Sara i te reira e kua turu i ta Aberahama tukuanga tika. E te au vaine, ka rauka ia koe te aru i te akaraanga o Sara na te turuanga i te au tukuanga tika a taau tane. Me pera koe, ka akamatutu koe i toou akaipoipo. (E tatau ia 1 Petero 3:5, 6.) Kua akakite a Dmitry, tei taikuia i mua ake nei, e akangateitei ana tana vaine iaia. Karanga aia: “E reka ana au i ta Angela tauta anga te turu i taku au ikianga, noatu kare to maua manako e aiteite ana. Me kare te tupuanga e meitaki, kare aia e akakino mai iaku.” Mei teaa atura te māmā te akaperepere i tetai tei akangateitei ia koe!

18. Akapeea te au tokorua akaipoipo e puapinga ai me aruaru ratou te akamura i to ratou inangaro?

¹⁸ I teia rā, te inangaro ra a Satani i te takore i te inangaro i roto i te au akaipoipo Kerititiano. Kua kite aia e me ngaro te inangaro o tetai tokorua no tetai, ka akaruke ratou ia Iehova. Inara, kare te inangaro mou e takoreia! Kia aite toou inangaro i roto i toou akaipoipo mei te inangaro tei akatutuia i roto i te Peʼe na Solomona. E akamaroiroi kia tuku ia Iehova na mua, e akanoo i te taime no tetai e tetai, e te akangateitei i te manako ngakau e te au anoano o tetai e tetai. Me pera koe, ka riro toou akaipoipo ei akangateitei i te Tumu o te inangaro mou, ko Iehova, e mei tetai aʼi tei tāuruuru meitakiia, ka mura mutu kore ua atu toou akaipoipo.