Ka Rauka ia Koe te Itae i Toou au Akakoroanga Pae Vaerua

1. Eaa te manamanata te tupu nei kia tatou?

KUA itae ainei koe i tetai akakoroanga pae vaerua, e e ngatā te reira?b Me koia ia, kare ko koe ua. Ei akaraanga, kua inangaro a Philip kia meitaki atu e kia putuputu tana pure, inara e ngatā kia rauka te taime no te pure. To Erika akakoroanga kia tae vave aia ki te au uipaanga no te tutu aere; inara e reiti ua ana aia ki te reira. Kua tauta putuputu a Tomáš i te tatau i te katoaanga o te Pipiria. Karanga aia: “Kare au e reka ana i te tatau Pipiria. E toru taime toku tauta anga, kua tae ua au kia Levitiku e kua akamutu.”

2. Eaa tatou ka kore ei e taitaia me kare te akakoroanga pae vaerua i rauka ake?

² Me e akakoroanga toou kare i rauka ake, eiaa e taitaia. Ka anoanoia rai te taime e te angaanga pakari kia rauka tetai akakoroanga. No te mea te inangaro ra koe kia taeria toou akakoroanga, te akaari maira e te akaperepere ra koe i toou pirianga kia Iehova e te rave meitaki i te reira. Akaperepere a Iehova i taau tauta anga. Tika, kare aia e tapapa mai i te au mea kare e rauka ia koe i te rave. (Sala. 103:14; Mika 6:8) No reira e iki i te akakoroanga ka rauka ia koe te itae. Eaa taau ka rave kia rauka te reira? Ka uriuri tatou i tetai au ravenga.

E MEA PUAPINGA KIA AKAKEUIA

3. Eaa i puapinga ai kia akakeuia?

³ E mea puapinga kia akakeuia ma te itae i toou akakoroanga pae vaerua. Te tangata tei akakeu maataia, te inangaro ra me kore te anoano ra aia i te angaanga pakari. Penei ka akaaite tatou i te akakeuanga ki te matangi tei akatere i tetai poti ki tona ngai tei akakoroia. Me pupui ua te matangi, ka tae te mataro ki te ngai i akakoroia. Me ririnui te matangi, ka tae viviki aia. Pera rai, me akakeu maataia tatou ka taeria to tatou akakoroanga. “Me akakeuia koe, ka tauta pakari koe,” i na David ei, e taeake i El Salvador. “Kare koe e akatika i tetai apinga kia arai i toou akakoroanga.” Eaa i reira taau ka rave ei akakeu ia koe?

4. Ka pure tatou no teaa? (Philipi 2:13) (Akara katoa i te tutu.)

⁴ Pure no te akakeuanga. Na roto i tona vaerua, ka akakeu a Iehova ia koe kia taeria toou akakoroanga. (E tatau ia Philipi 2:13.) Tetai taime ka itae tatou i tetai akakoroanga no te mea e mea tau e te meitaki te reira. Inara penei kare tatou e inangaro i te rave i te reira. Kua tupu teia ki te tuaine ko Norina, i Uganda. E akakoroanga tona te rave i tetai apii Pipiria, noatu kare aia i akakeuia, manako aia kare aia i te puapii meitaki. Eaa tei tauturu iaia? Akakite aia: “Kua akamata au i te pati kia Iehova i te au rā kia akakeu iaku kia rave i tetai apii Pipiria. Kia tau ki taku pure, kua tauta au i te akameitaki atu i toku tu ei puapii karape. I nga mārama i muri mai, kua kite mai au e te maata maira toku inangaro. I taua mataiti, e rua aku apii Pipiria i akamata.”

5. Eaa ta tatou ka akamanako kia akakeuia?

⁵ Akamanako i ta Iehova i rave noou. (Sala. 143:5) Kua akamanako te apotetoro ko Paulo i to Iehova aroa takinga meitaki, e na teia i akakeu iaia kia angaanga pakari na Iehova. (1 Kori. 15:9, 10; 1 Timo. 1:12-14) Pera katoa, me akamanako koe i ta Iehova i rave noou, ka akakeuia koe kia itae i toou akakoroanga. (Sala. 116:12) Akamanako eaa tei tauturu i tetai tuaine i Honduras kia taeria tona akakoroanga kia riro ei painia tamou. Karanga aia: “Kua akamanako au i to Iehova akaperepere iaku. Kua akavaitata aia iaku ki tona iti tangata. Kua akono e kua paruru aia iaku. Kua akamatutu teia iaku kia akaperepere iaia e kua akakeu maata iaku.”

6. Eaa te ka tauturu ia tatou kia akakeu maataia?

⁶ Akamanako i te au akameitakianga me itae i toou akakoroanga. Akara eaa tei tauturu ia Erika, kia tae vave aia. Karanga aia: “Kite mai au e maata taku mea e ngere ra me reiti au no te uipaanga tutu aere. Me tae vave au, ka rauka iaku te aravei i te au taeake e te au tuaine e te akapou i te taime kia ratou. Kua rauka katoa iaku te akarongo ki te au manako, e mataora ai e kia meitaki atu taku tutu aere.” Kua akamanako a Erika i te au akameitakianga kia tae vave, e kua rauka iaia te itae i tona akakoroanga. Eaa te au akameitakianga taau ka akamanako? Me ko te tatau Pipiria me ko te pure, akamanako akapeea te reira me akamatutu i toou pirianga oa kia Iehova. (Sala. 145:18, 19) Me ko te akatupu anga i te tu Kerititiano, e akamanako akapeea me akameitaki atu i toou pirianga ki tetai ke. (Kolo. 3:14) E tata i te au tumu i inangaro ei koe i te itae i toou akakoroanga. E akara putuputu i te reira au tumu. Karanga a Tomáš e: “Ko te maata atu taku tauta te itae i tetai akakoroanga, kare au e tuku i te au.”

7. Eaa tei tauturu ia Julio e tana vaine kia taeria to raua akakoroanga?

⁷ Akapou i te taime ki te aronga te ka akamaroiroi ia koe. (Mase. 13:20) Akamanako eaa tei tauturu ia Julio e tana vaine kia taeria to raua akakoroanga kia akamaata atu i ta raua tutu aere. Karanga aia: “Iki maua i te au oa te ka akamaroiroi mai ia maua, e ka akakite maua i to maua akakoroanga kia ratou. Maata anga ia ratou kua rauka takere te reira, rauka i reira ia ratou te akakite mai i te au manako tauturu. Ka ui katoa mai ratou te peea ua ra ta maua parani, ma te akamaroiroi mai ia maua.”

ME KARE E AKAKEUANGA

8. Eaa te ka tupu me itae ua tatou i tetai akakoroanga no te mea kua akakeuia tatou? (Akara katoa i te tutu.)

⁸ Tika rai, te vaira tetai au rā kare tatou e manako maroiroi ana. Ko te aiteanga ainei kare tatou e itae i to tatou akakoroanga? Kare. Ei akatutuanga: Ka riro te matangi ei akakeu anga ririnui no te akatere i te poti ki te ngai i akakoroia. Inara tukeke te ririnui o te matangi, e tetai au rā, kare e matangi. Ko te aiteanga ainei kare te poti e tere ana? Kare. Ei akaraanga, ko tetai au poti e matini to ratou; ko tetai e oe to ratou. Ka rauka i te mataro te taangaanga i teia ei akatere i te poti ki te ngai i akakoroia. Aite to tatou akakeuanga ki te matangi; ka tukeke te reira. E tetai au rā, kare o tatou maroiroi te akakeu ia tatou. No reira me itae ua tatou i tetai akakoroanga no te mea kua akakeuia tatou, penei kare te reira e taeria. Mei te mataro e kimi ra i tetai au ravenga kia tae aia ki te ngai i akakoroia, ka rauka ia tatou i te itae i te reira noatu kare tatou i akakeuia. Ae, kare i te mea māmā, inara ka mataora tatou me taeria te reira. I mua ake ka uriuri ei eaa ta tatou ka rave, ka uriuri tatou i tetai uianga.

9. E tarevake ainei te itae i tetai akakoroanga me kare tatou i akakeuia te rave i te reira? Akamārama mai.

⁹ Inangaro a Iehova kia akamori tatou iaia ma te mataora e te puareinga ua. (Sala. 100:2; 2 Kori. 9:7) Ka tauta ainei tatou te itae i te akakoroanga pae vaerua noatu kare tatou e inangaro ana i te rave i te reira? Akamanako ana i te akaraanga o te apotetoro ko Paulo. Karanga aia: “Te moto nei ra au i taku kopapa kia vi: ko te riro ua aea oki au.” (1 Kori. 9:25-27) Kua akakeu pakari a Paulo iaia uaorai kia rave i te mea tika noatu kare aia i inangaro ana. Kua āriki ainei a Iehova i ta Paulo angaanga? Ae! E kua tutaki a Iehova i tana tautaanga.—2 Timo. 4:7, 8.

10. Eaa te au akameitakianga me itae i te akakoroanga noatu kare tatou i akakeuia?

¹⁰ Mataora katoa a Iehova te kite ia tatou e itae ra i to tatou akakoroanga noatu kare tatou i akakeuia. Mataora aia no te mea kua kite aia e noatu kare tatou e inangaro roa ana i te rave i taua angaanga, te rave ra tatou no te akaperepere iaia. Kua akameitaki a Iehova ia Paulo, ka akameitaki rai Aia ia tatou. (Sala. 126:5) Me kite tatou i ta Iehova akameitakianga, penei ka akakeu katoaia tatou. Karanga tetai tuaine ko Lucyna no Poland mai: “I tetai au taime, kare au e inangaro ana i te aere tutu aere, me roiroi tikai au. Noatu ra, kua tupu te rekareka kiaku me tutu aere au, e mea umere tikai.” Ka akara tatou eaa ta tatou ka rave me ngere tatou i te akakeuanga.

11. Akapeea a Iehova me akamaroiroi i to tatou tu akatere-uaorai?

¹¹ Pure no te tu akatere-uaorai. Te tu akatere-uaorai, ko te akatere i to tetai manako e tana e rave ra. E taangaanga putuputuia ana teia tuatua kia tapupu ia tatou uaorai kia kore e rave i te kino. Ka umuumu katoaia te tu akatere-uaorai ei akakeu ia tatou kia rave i te meitaki, me te ngatā ra te reira me kore kare tatou i akakeuia kia rave i te reira. E akamaara, e tuanga te akatere-uaorai no te ua o te vaerua, no reira e pati kia Iehova no te vaerua tapu kia tauturu ia koe te akatupu i te reira tu puapinga. (Luka 11:13; Gala. 5:22, 23) Akamārama mai a David, te tauturu anga te pure iaia. Inangaro aia kia rave putuputu i tana uaorai apii. Karanga aia: “Ka pati au kia Iehova kia tauturu mai iaku te akatupu i te tu akatere-uaorai. Ma tana tauturu, kua rauka iaku te akanoo meitaki e te rave putuputu i tetai porokaramu apii.”

12. Akapeea te kaveinga ia Koheleta 11:4 me tauturu ia tatou te itae i to tatou akakoroanga?

¹² Eiaa e tiaki no tetai taime tau tikai. I roto i teianei ao, papu kare e taime tau tikai. Me ka tiaki ua tatou, penei kare e taeria to tatou akakoroanga. (E tatau ia Koheleta 11:4.) Karanga tetai taeake ko Dayniel: “Kare e taime tau tikai. Ka akatupu tatou i te reira no te akamata atu.” Kua akakite te taeake ko Paulo i Uganda tetai tumu eiaa tatou e tavarevare: “Me akamata tatou noatu eaa te manamanata, ka akameitaki a Iehova ia tatou.”—Mala. 3:10.

13. Eaa te au puapinga me akamata i te au akakoroanga rikiriki?

¹³ Akamata i te mea rikiriki. Penei ka ngere tatou i te akakeuanga no te mea e ngatā roa te itae i te reira akakoroanga. Me te tupu ra teia kia koe, ka akaiti ainei koe ki te au mea rikiriki? Me ko toou akakoroanga kia akatupu i tetai tu meitaki, e akaari i te reira na roto i te au mea rikiriki? Me ko toou akakoroanga kia tatau i te katoa anga o te Pipiria, e tatau i te reira ma te tapotopoto i te tuatau? Ngatā ia Tomáš, te akatupu i tona akakoroanga no te tatau i te Pipiria e tai mataiti. Karanga aia: “Kite mai au e viviki roa taku e rave ra. No reira kua akamata akaou au, kua parani au, i teianei, te tatau i tetai manga parakarapa i te au rā e te akamanako i te reira. E kua mataora au i taku tatau anga.” Ia Tomáš e rekareka maira, kua akamata aia i te akaroaroa atu i te taime o tana tatau. I muri maira, kua tatau aia i te katoaanga o te Pipiria.c

EIAA E TAITAIA NOATU TE MANAMANATA

14. Eaa te manamanata ka tupu kia tatou?

¹⁴ Noatu kua akakeuia me kore kua apiiia tatou, ka tupu rai te manamanata. Ei akaraanga, penei ka tupu te ‘tuatau manako koreia’ te ka kaimoumou i te taime tei anoanoia kia itae i to tatou akakoroanga. (Kohe. 9:11) Penei ka tupu te manamanata te ka akataitaia e te akaparuparu ia tatou. (Mase. 24:10) Penei ka riro to tatou tu apa ua, ei taroaroa i to tatou akakoroanga. (Roma 7:23) Me kore kua roiroi tatou. (Mata. 26:43) Eaa te ka tauturu ia tatou kia autu i te manamanata?

15. Me tupu te manamanata, te aiteanga ainei kua puapinga kore taau tauta anga? Akamārama mai. (Salamo 145:14)

¹⁵ E akamaara, me tupu te manamanata, kare te aiteanga kua puapinga kore taau tauta anga. Karanga te Pipiria e ka tupu rai te manamanata. Inara, te akakite katoa maira e ka rauka ia tatou, ma to Iehova tauturu. (E tatau ia Salamo 145:14.) Karanga te taeake ko Philip e: “Kare au e manata ana me kare e rauka iaku te itae i toku akakoroanga. Kia rave ua au i te reira noatu eaa te tu.” Karanga a David e: “Ka akara au i te manamanata e te au arairai anga, ei atianga no te akaari kia Iehova e te akaperepere ra au iaia.” Ae, na te tauta anga, te akapapu ra koe kia Iehova te inangaro ra koe i te akamareka iaia. Mei teaa atura to Iehova mataora me kite aia ia koe e tauta ra te itae i toou akakoroanga!

16. Eaa ta te manamanata ka apii mai kia tatou?

¹⁶ Akamanako i te manamanata ei apiianga. Akamanako eaa tei akatupu i te reira, e ui kia koe uaorai: ‘Ka rauka ainei iaku te taui i tetai mea kia kore teia e tupu akaou?’ (Mase. 27:12) Tetai taime ra, me ngatā ia koe te itae i toou akakoroanga, penei kare te reira e rauka. Me te tupu ra teia, akara akaou me ka rauka rai ia koe.d Kare a Iehova e manako e e puapinga kore koe no tei kore i rauka ia koe.—2 Kori. 8:12.

17. Eaa tatou ka akamanako ei i ta tatou i akatupu takere?

¹⁷ Akamanako i taau i akatupu takere. Karanga te Pipiria “kare te Atua i te Atua tuatua-tika kore, ka akangaro atu ei aia i ta kotou angaanga i rave.” (Ebe. 6:10) Auraka e ngaropoina rai ia koe. Akamanako i tei rauka takere ia koe i te akatupu—penei te akatupu i tetai pirianga oa kia Iehova, te tuatua ki tetai ke no runga iaia, me kore kia papetito. Mei ia koe e tere ra ki mua ma te itae i toou au akakoroanga pae vaerua i te tuatau i topa, ka tere rai koe ki mua i teianei.—Phili. 3:16.

18. Eaa ta tatou ka akamaara i te rave me itae tatou i to tatou akakoroanga? (Akara katoa i te tutu.)

¹⁸ Ma to Iehova tauturu, ka rauka ia koe te itae i toou akakoroanga, mei te mataro akatere pai kua mataora te tae anga ki te ngai i akakoroia. E akamaara, e maata te au mataro akatere pai te mataora ra i to ratou tere. Pera rai me tauta koe te itae i toou akakoroanga pae vaerua, auraka e ngaropoina kia mataora i ta Iehova tauturu e te akameitakianga. (2 Kori. 4:7) Auraka e tuku i te ʼau, e maata ua atu te akameitakianga ka rauka.—Gala. 6:9.