Шај ли те пенџаре о чачипе?

1. Сар дикхеа ко чачипе?

Е ЈЕХОВАСКОРО народо мангела о чачипе кова со аракхљовела ко е Девлескоро Лафи. Амари вера темелинела пе ко адава чачипе (Рим. 10:17). Амен сием увериме кај о Јехова чхивѓа о христијанско собрание сар „стубо хем поддршка е чачипаске“ (1. Тим. 3:15). Амен цело вилеа сием послушна адаленге со водинена амен соске ола објаснинена о чачипе тари Библија хем дена амен упатствија кола сој спрема е Девлескири волја (Евр. 13:17).

2. Спрема Јаков 5:19, со шај те случинел пе аменге иако прифатинѓем о чачипе?

² Ама, иако прифатинѓем о чачипе хем прифатинѓем те следина о водство тари е Девлескири организација, сепак шај те случинел пе хари по хари те цида амен таро чачипе. (Читин Јаков 5:19.) О Сатана бут би мангела те нашава амари доверба ки Библија хем ко водство со добинаја ле тари е Девлескири организација (Еф. 4:14).

3. Соске ваљани цврсто те икера амен ко чачипе? (Ефешања 6:13, 14).

³ Читин Ефешања 6:13, 14. Панда хари о Бенг ка користинел силно пропаганда те шај те чхивел са е народон те овен против о Јехова (Отк. 16:13, 14). Исто аѓаар, шај те очекујна кај о Сатана ка пробинел панда повише те ховавел е Јеховаскере народо (Отк. 12:9). Адалеске, важно тано те сикљова те кера разлика машкар о чачипе хем о ховајба, хем те ова послушна е чачипаске (Рим. 6:17; 1. Пет. 1:22). Таро адава ка зависинел дали ка преживина и бари неволја!

4. Со ка дикха ки акаја статија?

⁴ Ки акаја статија ка дикха дуј особине со ваљани те овен амен те шај те пенџара о чачипе со авела тари Библија хем те прифатина о водство со авела тари е Девлескири организација. Пало адава, ка дикха трин буќа кола со мора те кера лен те шај понадари да цврсто те икера амен ко чачипе.

ОСОБИНЕ СО ВАЉАНЕНА АМЕНГЕ ТЕ ШАЈ ТЕ ПЕНЏАРА О ЧАЧИПЕ

5. Сар и дар таро Јехова поможинела амен те пенџара о чачипе?

⁵ Дар таро Јехова. Ако иси амен исправно дар таро Јехова, добором бут ка манга ле со никогаш нане те кера нешто со ка дукхавел ле. Ка овел амен бут бари желба те сикљова сој исправно, а сој погрешно, сој чачипе, а сој ховајбе те шај те овел амен е Јеховаскоро одобрување (Изр. 2:3-6; Евр. 5:14). Никогаш на смејнаја те мукха амари дар таро мануш те овел побари таро амаро мангипе спрема о Јехова, соске адава со свиџинела пе е манушенге бут пути на свиџинела пе е Јеховаске.

6. Сар и дар таро мануш керѓа о 10 израелска поглаварија те превртинен о чачипе?

⁶ Ако повише дараја таро мануш него таро Девел, адава шај те керел те почмина те цида амен таро чачипе. Размислин башо пример е 12 поглаваренгоро кола со сине бичхалде те дикхен и пхув која со о Јехова ветинѓа ла е Израелцонге. 10 таро адала шпиоња со геле те дикхен и пхув, сикавѓе кај ленгири дар таро Ханаанција сине побари таро ленгоро мангипе спрема о Јехова. Ола вакерѓе е Израелцонге: „Нашти те џа против адава народо, соске ов тано посилно амендар“ (4. Мој. 13:27-31). Дикхиндор манушикане, о Ханаанција чаче сине посилна таро Израелција. Ама, секој со вакерѓа кај о Израелција нашти те побединен пле душманен цидинѓа е Јехова ки страна. Адала 10 шпиоња ваљани сине те концентриринен пе ко адава со о Јехова мангела о Израелција те керен. Исто аѓаар, ола ваљани сине те размислинен со керѓа ленге о Јехова кратко англедер адава. Аѓаар ка хаљовен сине кај и сила е Ханаанцонгири сине ништо ки споредба е Јеховаскере силаја која со нане ла крајо. Различно таро адала 10 шпиоња со на сине лен вера, о Исус Навин хем о Халев мангле те овел лен е Јеховаскоро одобрување. Ола вакерѓе е народоске: „Ако о Јехова тано задоволно амендар, ов ка ингарел амен ки адаја пхув хем ка дел ла аменге“ (4. Мој. 14:6-9).

7. Сар шај те бајрара амари дар спрема о Јехова? (Дикх хем и слика.)

⁷ Те шај те бајрара амари дар спрема о Јехова, ваљани те размислина со свиџинела пе леске секогаш кеда ваљани те ана несави одлука (Пс. 16:8). Џикоте читинеа несаво извештај тари Библија пуч тут: „Те овав сине ме ки адаја ситуација сави одлука ка анав сине?“ На пример, замислин туке кај шунеа сар о 10 израелска поглаварија вакерена кај о Израелција ка нашти те побединен е Ханаанцон. Дали ка верујне лен сине хем ка мукхе сине те побединел тут и дар таро мануш? Или, ка мукхе сине те побединел тло мангипе спрема о Јехова хем тли желба те радујне ле? Јекх цело генерација таро Израелција на пенџарѓе о чачипе кова со вакерѓе ле о Исус Навин хем о Халев. Адалеске, о Јехова на мукхља те кхувен ки Ветими Пхув (4. Мој. 14:10, 22, 23).

8. Која особина мора бут те трудина амен те развина ла, хем соске?

⁸ Понизност. О Јехова откринела о чачипе околенге сој понизна (Мат. 11:25). Амен понизно прифатинѓем помош те шај те дознајна о чачипе (Апо. 8:30, 31). Сепак, мора те пазина те на ова горда. Ако сием горда, шај те почмина те мислина аменге кај амаро мислење тано исто добором мудро сар о библиска начелија хем о водство со добинаја ле тари е Јеховаскири организација.

9. Сар шај те ачхова понизна?

⁹ Те шај те ачхова понизна, на ваљани те бистра кобор сием тикне ки споредба е Јеховаја (Пс. 8:3, 4). Исто аѓаар, ваљани те молина е Јехова те поможинел амен те ова панда попонизна хем те ова спремна те сикљова. Тегани, о Јехова ка поможинел амен лескере мисле, кола со дознајнаја лен таро лескоро Лафи хем лескири организација, те овен аменге поважна таро амаре. Џикоте читинеа и Библија, роде доказија кај о Јехова мангела и понизност, а мрзинела и гордост, и арогантност хем и вообразеност. А посебно трудин тут те ачхове понизно ако добинеа несави задача која со дела тут несаво авторитети или керела тут те ове пенџардо англо јавера.

САР ШАЈ ТЕ ИКЕРА АМЕН ЦВРСТО КО ЧАЧИПЕ

10. Кас користинѓа о Јехова те шај те дел водство хем упатствија пле народоске?

¹⁰ Понадари да нека овел тут доверба ки е Јеховаскири организација. Ко пурано Израел, о Јехова дела сине упатствија пле народоске преку о Мојсеј, а пало адава преку о Исус Навин (Ис. Нав. 1:16, 17). О Израелција сине благословиме кеда ко акала водачија дикхена сине сар мануша кола со претставинена е Јехова. Веконцар покасно, кеда керѓа пе о христијанско собрание, упатствија дена сине о 12 апостолија (Апо. 8:14, 15). Покасно ки адаја група сине вклучиме јавера да старешине таро Ерусалим. Адалеске со слединена сине о водство таро акала верна мурша, „о собранија понадари да овена сине зорале ки вера хем бајрона сине таро диве ко диве“ (Апо. 16:4, 5). Ко амаро да време, о Јехова благословинела амен кеда слединаја о упатствија тари лескири организација. Ама, сар ка осетинел пе о Јехова ако на мангаја те шуна о упатствија таро окола со ов чхивѓа лен те предводинен? Те шај те одговорина ко акава пучибе, те дикха со случинѓа пе џикоте о Израелција џана сине ки Ветими пхув.

11. Со случинѓа пе околе Израелцонцар со бунинѓе пе против е Јеховаскири одлука о Мојсеј те овел ленгоро водачи? (Дикх хем и слика.)

¹¹ Џикоте о Израелција патујнена сине џи ки Ветими пхув, несаве мурша со сине лен несаво авторитети бунинѓе пе против о Мојсеј хем лескири улога која со денѓа ле о Јехова. Ола вакерѓе: „Цело народо тано свето [а на само о Мојсеј], сарине, хем о Јехова тано машкар ленде“ (4. Мој. 16:1-3). Иако сине точно кај англо е Девлескере јакхја „цело народо“ сине свето, о Јехова биринѓа е Мојсее те водинел лескере народо (4. Мој. 16:28). Адалеа со критикујнѓе е Мојсее, адала бунтовникија уствари критикујнѓе е Јехова. Ола на концентриринѓе пе ко адава со о Јехова мангља, него ко адава со ола мангле — те овел лен побари моќ хем те овен истакниме англо јавера. О Девел мударѓа адален со почминѓе те бунинен пе хем буте јаверен со геле ленгири страна (4. Мој. 16:30-35, 41, 49). Авдиве да шај те ова сигурна кај о Јехова на одобринела околен со на шунена о упатствија тари лескири организација.

12. Соске шај понадари да те овел амен доверба ки е Јеховаскири организација?

¹² Шај понадари да те овел амен доверба ки е Јеховаскири организација. Кеда овела јасно кај ваљани те овел несави промена ко амаро хаљојбе башо несаво библиско чачипе или башо адава сар те кера амари служба башо Јехова, о пхраља таро Водечко тело на мислинена пе дали те керен о потребна промене (Изр. 4:18). Ола керена адава адалеске со ленге најважно таро са тано те керен и волја е Јеховаскири. Ола дена пестар са те шај ленгере одлуке те овен темелиме ко е Девлескоро Лафи, колесте со аракхљона о библиска сикљојба коленде со мора те икерен пе са е Јеховаскере слуге.

13. Сој тане „о састе лафија“, хем со мора те кера?

¹³ „Сар пример нека овен туке о састе лафија“ (2. Тим. 1:13). „О састе лафија“ тане о христијанска сикљојба кола со аракхљона ки Библија (Јован 17:17). Адала сикљојба темелинена пе ко са адава ко со верујнаја. Е Јеховаскири организација сикавела амен те икера амен цврсто ко акала чачипа. Са џикоте икераја амен ки ленде ка ова благословиме.

14. Сар несаве христијања чхинавѓе те икерен пе ко „састе лафија“?

¹⁴ Со шај те случинел пе ако чхинаваја те икера амен ко „састе лафија“? Размислин башо акава пример. Ко прво веко, несаве христијања ширинена сине информацие кај о диве е Јеховаскоро више ресља. Шај сине несаво писмо — колеске со о мануша мислинѓе кај тано таро Павле — коте со сине пишимо адава. Бизо те одвојнен песке време те проверинен о фактија, несаве христијања таро Солун верујнѓе ко акала информацие, па чак ширинѓе лен е јаверенге. Ола нане сине те овен ховавде ако сине лен ки годи о буќа со сикавѓа лен о Павле кеда сине ленцар (2. Сол. 2:1-5). О Павле советинѓа е пхрален те на верујнен ко са со шунена. Хем, те шај те поможинел лен ки иднина, о Павле завршинѓа пло дујто писмо џи ко Солунјања акале лафенцар: „Ме, о Павле, пишинава туменге акава поздрав мле вастеа. Адава тано мло знако ко секова писмо — аѓаар пишинава ме“ (2. Сол. 3:17).

15. Сар шај те заштитина амен таро ховајба кола со изглединена сар чаче? Вакер пример. (Дикх хем о слике.)

¹⁵ Со сикљоваја таро лафија со пишинѓа лен о Павле е пхраленге таро Солун? Кеда ка шуна нешто со нане ко склад адалеа со сиклилем тари Библија или кеда ка шуна несаве шокантна информацие кола со нане точна, ваљани те ова прониклива. Ко пурано Советско Сојуз, амаре душмања ки јекх прилика денѓе јекх писмо амаре пхраленге кова со изглединела сине сар те пхене тано таро главно седиште. Адава писмо поттикнинѓа несаве пхрален те керен јекх посебно независно организација. Адава со пишинела сине ко писмо изглединела сине сар те пхене тано чаче. Ама, о верна пхраља на дозволинѓе те овен ховавде. Ола халиле кај адава со пишинела ко писмо на сине спрема адава со сине сикавде. Авдиве, о душмања е чачипаскере понекогаш користинена и современо технологија те шај те бунинен амен хем те керен поделбе машкар аменде. Наместо те дозволина асавке буќа локхесте те бунинен амен хем те керен те на размислина исправно, шај те заштитина амен аѓаар со шукар ка размислина дали адава со шунаја или читинаја тано ко склад е чачипенцар со сиклилем лен (2. Сол. 2:2; 1. Јов 4:1).

16. Спрема Римјања 16:17, 18, со ваљани те кера ако некој ширинела информацие кола со нане ко склад е чачипаја?

¹⁶ Те ачхова ко јекхипе околенцар сој верна е Јеховаске. О Девел мангела те обожавина ле ко јекхипе амаре пхраленцар хем пхењенцар. Ка ачхова ко јекхипе са џикоте икераја амен ко чачипе. Са адала со ширинена информацие со нане ко склад е чачипаја, керена поделбе ко собрание. Адалеске, о Девел предупрединела амен те цида амен асавкендар. Ако на кераја адава шај те цида амен таро чачипе. (Читин Римјања 16:17, 18.)

17. Сар користинела аменге адава со пенџараја о чачипе хем цврсто икераја амен ки лесте?

¹⁷ Ако пенџараја о чачипе хем цврсто икераја амен ки лесте, ка ачхова паше е Јеховаја хем амари вера ка овел зорали (Еф. 4:15, 16). Нане те ова изненадиме тари пропаганда хем таро ховавне сикљојба е Сатанаскере, хем ка ова безбедна џикоте трајнела и бари неволја, соске о Јехова ка грижинел пе аменге. Понадари да икер тут цврсто ко чачипе хем тегани „о Девел со дела мир ка овел [туја]“ (Фил. 4:8, 9).