Сикљов те размислине сар о Јехова хем о Исус

1-2. Сар ваљани те манга е Јехова хем сар о Исус керѓа адава?

О ИСУС објаснинѓа која тани и најважно заповед ко е Мојсеескоро закони кеда вакерѓа: „Манг е Јехова, тле Девле, са тле вилеа, са тле душаја, са тле силаја хем са тле гоѓаја“ (Лука 10:27). Значи, мангаја е Јехова са адалеа со иси амен хем цело амаре вилеа. А ко адава тане вклучиме амаре желбе, емоцие хем сила. Исто аѓаар вклучими тани амари годи или адава сар дикхаја ко буќа. Џанѓола пе, амен никогаш нане целосно те хаљова сар размислинела о Јехова. Ама шај пошукар те хаљова о начин сар размислинела о Девел аѓаар со ка проучина е Христосескири годи соске о Исус совршено сикавела сар размислинела лескоро Дад (1. Кор. 2:16).

² О Исус мангља е Јехова са пле гоѓаја. Ов џанља која тани е Девлескири волја леа хем сине одлучно те постапинел ко склад адалеа, иако адава значинела сине кај ка ваљани те цидел муке. Адалеске со сине леске најважно те керел пле Дадескири волја, о Исус на дозволинѓа ништо те цидел лескоро внимание тари адаја цел.

3. Со шај сине о апостол Петар те сикљол таро Исус хем ко со поттикнинѓа о Петар е христијанен? (1. Петарескоро 4:1).

³ Е Петаре хем е јавере апостолен сине лен бут шужи прилика те овен заедно е Исусеа хем те сикљовен сар ов размислинела. Кеда о Петар водимо тари е Девлескири сила пишинѓа пло прво писмо, ов поттикнинѓа е христијанен ленгоро оружје те овел о исто стави сар со сине е Христосе. (Читин 1. Петарескоро 4:1.) О Петар користинѓа воено израз кеда вакерѓа „тумаро оружје“. Значи, ако о христијања трудинена пе те овел лен е Исусескоро стави или те размислинен сар о Исус, тегани ка овел лен моќно оружје баши ленгири борба против о грешна желбе хем против акава свето ко кова со владинела о Сатана (2. Кор. 10:3-5; Еф. 6:12).

4. Сар акаја статија ка поможинел амен те применина е Петарескоро совет?

⁴ Ки акаја статија ка дикха нешто повише башо начин сар размислинела о Исус хем сар шај те џа пало лескоро пример. Ка дознајна сар шај 1) те сикљова те размислина сар о Јехова, 2) те ова понизна, хем 3) те ова разборита.

СИКЉОВ ТЕ РАЗМИСЛИНЕ САР СО РАЗМИСЛИНЕЛА О ЈЕХОВА

5. Сар о Петар ки јекх прилика на размислинѓа сар о Јехова?

⁵ Те дикха јекх прилика ки која о Петар на размислинѓа сар о Јехова. О Исус вакерѓа пле апостоленге кај мора те џал ко Ерусалим, те овел предајмо е верско водаченге, те трпинел муке хем ко крајо те овел мудардо (Мат. 16:21). О Петар џанља кај о Исус тано о ветимо Месија кова со ка спасинел е Девлескере народо. Шај адалеске сине леске пхаро те верујнел кај о Јехова ка дозволинел о Исус те овел мудардо (Мат. 16:16). Адалеске цидинѓа ле ки страна хем вакерѓа леске: „Ов шукар спрема туте Господаре, адава никогаш нане те случинел пе туке“ (Мат. 16:22). О Петар хем о Исус различно размислинена сине баши акаја бути соске о Петар на размислинела сине сар о Јехова.

6. Сар о Исус сикавѓа кај размислинела скроз исто сар о Јехова?

⁶ О Исус размислинела сине скроз исто сар лескоро небесно Дад. Ов вакерѓа е Петареске: „Наш мандар Сатано! Ту сиан манге бар сопкибаске, соске тле мисле нане е Девлескере, него манушикане“ (Мат. 16:23). О Исус џанља кај те шај те керел е Девлескири волја мора те цидел муке хем те мерел. Адалеске отфрлинѓа е Петарескоро совет, иако е Петаре сине ле шукар намере. Ки адаја прилика о Петар сиклило јекх важно лекција — ваљани те размислинел сар о Девел. Адаја поука важинела аменге да!

7. Сар о Петар сикавѓа кај мангела те сикљол те размислинел сар о Јехова? (Дикх и слика тари .)

⁷ Покасно, о Петар сикавѓа кај мангела те сикљол те размислинел сар о Јехова. Ало о време кеда о Јехова одрединѓа о мануша таро јавера народија те овен дело таро лескоро народо. О Петар добинѓа задача те проповединел е Корнелијаске, кова со покасно уло јекх таро прва христијања кола со на сине Евреија. Е Евреен на сине лен скоро нисаво контакт е манушенцар кола со на сине Евреија. Адалеске, о Петар ваљани сине те исправинел пло размислибе те шај те керел акаја задача. Кеда халило сар дикхела о Девел ко адала со нане Евреија, ов менинѓа пло стави. Адалеске, бизо те бунинел пе ов гело адари коте со сине бичхалдо (Апо. 10:28, 29). О Петар проповединѓа е Корнелијаске хем лескере кхерутненге кола со пало адава крстинѓе пе (Апо. 10:21-23, 34, 35, 44-48).

8. Сар шај те сикава кај размислинаја сар о Јехова? (1. Петарескоро 3:8).

⁸ Бершенцар покасно, о Петар поттикнинѓа е Христијанен те „овен јекх ко мисле“. (Читин 1. Петарескоро 3:8.) Сар е Јеховаскоро народо адава шај те кера ако размислинаја ко начин сар со размислинела о Јехова, а адава сикљоваја таро лескоро лафи. На пример, о Исус поттикнинѓа пле следбеникон о Царство те овел ленге ко прво тхан ко живото (Мат. 6:33). Акале мислаја ки годи, некој таро тло собрание шај ка одлучинел те почминел полновремено службаја. Наместо те советина ле те овел шукар спрема песте, амен ваљани те кера позитивно лафи баши лескири шукар цел хем те поддржина ле.

ОВ ПОНИЗНО

9-10. Сар о Исус сикавѓа бари понизност?

⁹ И рат англедер те овел мудардо, о Исус сикавѓа е Петаре хем е јавере апостолен јекх важно лекција баши понизност. Англедер, о Исус бичхалѓа е Петаре хем е Јоване те спреминен са со ваљани сине баши последно вечера со ваљанѓа те овел ле ленцар англедер те мерел. Исто аѓаар, изгледа ваљанѓе те спреминен јекх леѓени пањеа хем пешкири те шај те овен тховде е гостонгере пре англедер те хан. Ама кој ка овел добором понизно те шај те керел јекх асавки задача?

¹⁰ Бизо те мислинел пе о Исус сикавѓа бари понизност. Кобор шај сине изненадиме о апостолија кеда дикхле кај о Исус керѓа нешто со обично керена ле о слуге. О Исус мукхља ки страна пли упруни наметка хем пханља пе ки половина јекх пешкири, чхорѓа пани ко леѓени хем почминѓа те тховел ленгере пре (Јован 13:4, 5). Ов тховѓа е содешудује апостоленгере пре, а адалеске шај ваљани сине бут време. О Исус чак тховѓа е Јудаскере пре, кова со ваљани сине те предајнел ле. Сепак ов адава керѓа ле понизно. Пало адава о Исус стрпливо објаснинѓа: „Дали халилен соске тховѓум тумаре пре? Тумен викинена ман ’Учителе‘ хем ’Господару‘, хем точно вакерена, соске ме сиум адава. Адалеске, ако ме о Господари хем о Учители тховѓум тумаре пре, тумен да ваљани те тховен јекх јекхескере пре“ (Јован 13:12-14).

11. Сар о Петар сикавѓа кај сиклило те овел понизно? (1. Петарескоро 5:5; дикх хем и слика).

¹¹ О Петар сиклило поука баши понизност таро Исус. Откеда о Исус гело ко небо, о Петар чудоја сасљарѓа јекхе мануше кова со бијандило сакати (Апо. 1:8, 9; 3:2, 6-8). Нормално, о мануша со дикхле адава кхединѓе пе околу о Петар (Апо. 3:11). Адалеске со о Петар живинела сине ко општество ко кова сине бут важно о углед хем и положба, дали ка користинел сине адава моменти те уживинел ки слава? На, него о Петар понизно вакерѓа е манушенге кај ваљани те дел пе слава околенге каске со ваљани те дел пе — е Јеховаске хем е Исусеске. Ов вакерѓа: „Преку е Исусескоро анав хем адалеске со верујнаја ко лескоро анав, о пре акале манушескере, коле со дикхена хем пенџарена, састиле“ (Апо. 3:12-16). Покасно ко јекх таро пле писмија џи ко христијања, о Петар пишинѓа кобор тано важно те ова понизна. О лафија со вакерѓа лен шај сетинкерена амен ки прилика кеда о Исус пханља пе ки половина пешкири хем тховѓа пле апостоленгере пре. (Читин 1. Петарескоро 5:5.)

12. Сар шај те ова сар о Петар хем понадари да те сикљова те ова понизна?

¹² Амен шај те џа пало е Петарескоро пример хем понадари да те сикљова те ова понизна. Јекх понизно мануш керела бут повише него само те вакерел исправна лафија. О израз со користинела о Петар акате башо лафи понизност, сикавела кај ки понизност тане вклучиме амаре најгаравде мисле. Амен кераја шукар буќа е јаверенге адалеске со мангаја е Јехова хем мангаја е манушен, а на адалеске со мангаја о мануша те фалинен амен. Ако радосно служинаја е Јеховаске хем амаре пхраленге ко било кова начин, бизи разлика дали некој дикхела амаро трудо или на, амен сикаваја кај сием понизна (Мат. 6:1-4).

ОВ РАЗБОРИТО

13. Објаснин сој вклучимо ко адава некој те овел разборито.

¹³ Сар постапинела јекх христијани кова сој тано разборито? (1. Пет. 4:7). Ов керела са те шај те анел шукар одлуке ко склад е Јеховаскере размислибаја. Асавко христијани џанела кај ко живото нане ништо поважно таро лескоро амалипе е Јеховаја. Ле нане ле баро мислење баши песте хем хаљола кај на џанела са. Освен адава, сикавела кај иси ле доверба ко Девел аѓаар со често родела лестар водство ки молитва.a

14. Сар о Петар ки јекх прилика на родинѓа помош таро Јехова?

¹⁴ И рат англедер те мерел, о Исус предупрединѓа пле ученикон: „Адава со ка случинел пе манге ерат ка керел тумари вера те слабонел“. Тегани о Петар уверимо ки песте вакерѓа: „Чак ако сариненгири вера слабонела башо адава со ка случинел пе туке, мли вера никогаш нане те слабонел!“ Адаја рат о Исус денѓа акава совет несавенге таро пле ученикија: „Ачховен џангавде хем ма чхинавен те молинен тумен“ (Мат. 26:31, 33, 41). Ако о Петар англедер шунела сине акава совет, шај ка овел сине доволно храбро те признајнел кај тано е Исусескоро ученико. Ама, о Петар откажинѓа пе пле Учителестар, а адалеске ов покасно бут каинѓа пе (Мат. 26:69-75).

15. Сар о Исус сикавѓа разборитост и рат англедер те мерел?

¹⁵ Е Исусе сине ле целосно доверба ко Јехова. Иако сине совршено, и рат англедер те мерел, ов бут пути молинела пе сине е Јеховаске. Адава денѓа ле храброст те постапинел ко склад е Јеховаскере волјаја (Мат. 26:39, 42, 44; Јован 18:4, 5). Адава со о Исус молинѓа пе бут пути адаја рат сине нешто со о Петар изгледа никогаш на бистерѓа ле.

16. Сар о Петар сикавѓа кај уло разборито? (1. Петарескоро 4:7).

¹⁶ Сар накхела сине о време, о Петар сиклило те овел ле повише доверба ко Јехова аѓаар со молинела пе сине. Откеда воскреснинѓа о Исус, уверинѓа е Петаре хем е јавере апостолен кај ка добинен е Девлескири сила те шај те проповединен о шукар хабери. Ама, о Исус вакерѓа те ачховен ко Ерусалим џикоте адава на овела (Лука 24:49; Апо. 1:4, 5). Со керѓа о Петар џикоте аџикерѓа? Ов хем о јавера пхраља хем пхења „на чхинавѓе те молинен пе“ (Апо. 1:13, 14). Покасно ко пло прво писмо, ов поттикнинѓа е христијанен те овен разборита хем те овел лен доверба ко Јехова аѓаар со ка молинен пе. (Читин 1. Петарескоро 4:7.) О Петар сиклило те овел ле доверба ко Јехова хем уло стубо ко собрание (Гал. 2:9).

17. Бизи разлика саве способностија иси амен, со ваљани стално те кера? (Дикх хем и слика.)

¹⁷ Те шај те ова разборита, мора често те молина амен е Јеховаске. Хаљоваја кај ваљани стално те рода лестар водство ки молитва бизи разлика саве способностија иси амен. Адалеске, посебно кеда ваљани те ана важна одлуке, молинаја амен е Јеховаске те дел амен водство, хем увериме сием кај ов џанела сој тано аменге најшукар.

18. Со шај те кера те шај те размислина сар о Јехова?

¹⁸ Бут сием благодарна е Јеховаске со денѓа амен способност те сикава сар лескере особине (1. Мој. 1:26). Џанѓола пе, амен нашти совршено те кера адава (Иса. 55:9). Ама, исто сар о Петар, амен шај понадари да те сикљова те размислина сар о Јехова, те ова понизна хем те ова разборита.