Кобор ваљани те овел аменге важно е Јеховаскоро анав?

1-2. Котар џанаја кај е Исусеске тано важно е Јеховаскоро анав?

Е ИСУСЕСКЕ ништо нане поважно таро е Јеховаскоро анав. Нијекх на керѓа добором бут те шај те вакерел башо е Јеховаскоро анав сар со керѓа ов. Сар со дикхлем ки англуни статија, о Исус сине спремно те мерел те шај те докажинел кај о Јехова тано свето хем кај са со керела тано праведно (Мар. 14:36; Евр. 10:7-9). А откеда ка завршинен о милја берша коте со ка владинел о Исус, ов спремно ка иранел пле Дадеске са пли власт соске мангела са и слава те припадинел е Јеховаске (1. Кор. 15:26-28). Освен адава, е Исусескоро мангипе спрема е Девлескоро анав, сикавела кобор бут паше сине ов пле Дадеа. Ни хари на сумнинаја амен кај о Исус бут мангела е Јехова.

² О Исус ало ки пхув пле Дадеске ко анав (Јован 5:43; 12:13). Ов вакерѓа адава анав пле следбениконге (Јован 17:6, 26). Ов сикавѓа е јаверен ко е Јеховаскоро анав хем керѓа чудија ко адава анав (Јован 10:25). Уствари, о Исус молинѓа е Јехова те аракхел лескере ученикон „башо [пло] анав“ (Јован 17:11). Спрема адава, ако е Исусеске сине добором важно е Јеховаскоро анав, тегани сар шај некој те вакерел кај тано чачутно следбенико е Христосескоро, а те на џанел хем те на користинел о анав лескере Дадескоро?

3. Со ка дикха ки акаја статија?

³ Сар чачутне христијања, амен џаја пало е Исусескоро пример аѓаар со сикаваја мангипе хем поштовање спрема е Јеховаскоро анав (1. Пет. 2:21). Ки акаја статија ка дикха соске о Јехова денѓа пло анав околенге со проповединена о „шукар хабери башо Царство“ (Мат. 24:14). Исто аѓаар, ка дикха кобор важно ваљани те овел е Јеховаскоро анав секоле јекхеске амендар лично.

„НАРОДО СО КА ПХИРАВЕЛ ЛЕСКОРО АНАВ“

4. а) Сави задача денѓа о Исус пле учениконге англедер те иранел пе ко небо? б) Кова пучибе ка дикха ки акаја статија?

⁴ Кратко англедер те иранел пе ко небо о Исус вакерѓа пле учениконге: „Кеда е Девлескири сила ка авел упри туменде, ка добинен сила хем ка сведочинен баши манде ко Ерусалим, ки цело Јудеја, ки Самарија хем џи ко најдур тхана ки пхув“ (Апо. 1:8). Значи, о ученикија ваљани сине те проповединен о шукар хабери сегде, а на само ко Израел. Сар со ка накхел сине о време е манушен таро са о народија ка овел лен сине прилика те овен е Исусескере следбеникија (Мат. 28:19, 20). Ама, о Исус вакерѓа: „Ка сведочинен баши манде“. Дали акала неве ученикија ваљани сине те џанен е Јеховаскоро анав, или само ка овен сине е Исусескере сведокија? О буќа кола сој опишиме ко Апостолија поглавје 15 ка поможинен аменге те дознајна о одговор ко акава пучибе.

5. Сар о апостолија хем о старешине ко Ерусалим сикавѓе кај са о мануша ваљани те џанен е Јеховаскоро анав? (Дикх хем и слика.)

⁵ Ко 49 берш тари а.е., о апостолија хем о старешине ко Ерусалим кхединѓе пе те керен лафи башо адава со ваљани те керен окола со на сине Евреија хем со на сине сунети те шај те овен прифатиме сар христијања. Ко крајо тари адаја дискусија о Јаков, е Исусескоро пхрал, вакерѓа акава: „[О Петар] детално објаснинѓа сар о Девел акана прифатинѓа е манушен таро јавера народија, те шај лендар те керел народо со ка пхиравел лескоро анав“. Ко кова анав мислинѓа о Јаков? Кеда цитиринѓа таро пророко о Амос, ов исто аѓаар вакерѓа: „Те шај о мануша со ка ачхон, искрено те роден е Јехова, заедно е манушенцар таро са о народија, околенцар со пхиравена мло анав, вакерела о Јехова“ (Апо. 15:14-18). О неве ученикија на само со ка сикљовен сине башо Јехова него хем ка пхиравен сине лескоро анав. Адава значинела сине кај ола ка вакерен башо е Девлескоро анав е јаверенге хем кај о мануша ка пенџарен лен пало адава кај ола претставинена адава анав.

6-7. а) Соске о Исус ало ки пхув? б) Која сине јавер поважно причина соске о Исус ало ки пхув?

⁶ О анав Исус значинела „о Јехова тано спасение“ хем о Јехова преку о Исус спасинела са околе манушен со сикавена вера. О Исус ало ки пхув те шај те дел пло живото са е манушенге (Мат. 20:28). Адалеа со платинѓа и откупнина ов денѓа прилика е манушенге те овен спасиме хем те добинен вечно живото (Јован 3:16).

⁷ Ама, соске е манушенге ваљани откупнина? Башо адава со случинѓа пе ки еденско градина. Сар со спомнинѓем ки англуни статија, амаре парародителија о Адам хем и Ева бунинѓе пе против о Јехова хем адалеске нашавѓе и прилика те живинен вечно (1. Мој. 3:6, 24). Ама, о Исус ало ки пхув те шај те керел нешто панда поважно таро адава те спасинел е грешна манушен. Башо Јехова сине вакерде ховајба хем аѓаар лескоро анав сине каљардо (1. Мој. 3:4, 5). Значи, о спасение е Адамескере хем е Евакере чхавенгоро сине поврзимо нештолеа сој бут поважно — те дикхел пе ко е Јеховаскоро анав сар свето. Адалеске со о Исус претставинела сине е Јехова хем пхиравела сине лескоро анав, ле сине ле и главно улога ко адава те сикавел пе кај е Јеховаскоро анав тано свето.

8. Со ваљани сине те хаљовен са окола со ка сикавен сине вера ко Исус?

⁸ Са окола со ка сикавен сине вера ко Исус, хем о Евреија хем окола со на сине Евреија, ваљани сине те хаљовен кај ленгоро спасение уствари авела таро е Исусескоро Дад, о Јехова о Девел (Јован 17:3). Освен адава, исто сар е Исусе, е јаверен да ка пенџарен сине пало е Јеховаскоро анав. Исто аѓаар, ола ваљани сине те хаљовен кобор тано важно те дикхел пе ко е Јеховаскоро анав сар свето. Ленгоро спасение зависинела сине таро адава (Апо. 2:21, 22). Значи, са о верна следбеникија е Исусескере ваљани сине те сикљовен башо Јехова хем башо Исус. На чудинела амен адава со пли молитва, која сој пишими ко Јован 17 поглавје, о Исус завршинела ла акале лафенцар: „Вакерѓум ленге тло анав хем понадари да ка вакерав ле, те шај те сикавен мангипе саво со ту сикавѓан манге хем те шај те овав ко јекхипе ленцар“ (Јован 17:26).

„ТУМЕН СИЕН МЛЕ СВЕДОКИЈА“

9. Сар следбеникија е Исусескере, со ваљани те овел аменге најважно?

⁹ Таро адава со дикхлем џи акана јасно тано кај те дикхел пе ко е Јеховаскоро анав сар свето ваљани те овел важно са е Исусескере чачутне следбениконге (Мат. 6:9, 10). Уствари, амаре постапкенцар ваљани те сикава кај е Јеховаскоро анав аменге најважно. Тегани со шај те кера те шај те сикава кај е Јеховаскоро анав тано свето, јавере лафенцар, те докажина кај адава со вакерѓа о Сатана башо Јехова тано ховајбе?

10. Саво симболично судско случај тано опишимо ко 42 џи ко 44 поглавје таро лил Исаија? (Исаија 43:9; 44:7-9; дикх хем и слика.)

¹⁰ Ко Исаија таро 42 џи ко 44 поглавје тано истакнимо кобор тани важно амари улога ко адава те сикавел пе кај е Јеховаскоро анав тано свето. Ко адала поглавја тано опишимо јекх симболично судско случај колесте со о Јехова викинела е манушен кола со на обожавинена ле, те докажинен кај ленгере девела тане чачутне. Исто аѓаар, ов пучела дали иси сведокија кола со шај те докажинен адава. Ама нане нијекх асавко сведоко! (Читин Исаија 43:9; 44:7-9.)

11. Спрема Исаија 43:10-12, со вакерела о Јехова околенге со служинена леске?

¹¹ Читин Исаија 43:10-12. Адаленге со служинена е Јеховаске ов вакерѓа: „Тумен сиен мле сведокија... а ме сиум о Девел“. О Јехова поттикнинела лен те одговоринен ко акава пучибе: „Иси ли Девел освен манде?“ (Иса. 44:8). Спрема адава, амен иси амен чест те одговорина ко акава пучибе. Амаре лафенцар хем постапкенцар амен сведочинаја кај само о Јехова тано чачутно Девел. Лескоро анав тано најважно таро са о анава. Адалеа сар живинаја, докажинаја кај искрено мангаја е Јехова хем кај сием леске верна бизи разлика саво притисок керела о Сатана упри аменде. Аѓаар, амен иси амен прилика те сикава кај е Јеховаскоро анав тано свето.

12. Сар исполнинѓа пе о пророштво таро Исаија 40:3, 5?

¹² Кеда бранинаја е Јеховаскоро анав, јавере лафенцар лескоро углед, амен џаја пало пример е Исус Христосескоро. О Исаија пророкујнѓа кај некој ка рамнонел, јавере лафенцар ка спреминел о друмо е Јеховаске (Иса. 40:3). Сар исполнинѓа пе адава? О Јован Крстител спреминѓа о друмо е Исусеске, кова со ало хем керѓа лафи ко е Јеховаскоро анав (Мат. 3:3; Мар. 1:2-4; Лука 3:3-6). Ко исто пророштво пишинела: „Ка откринел пе е Јеховаскири слава“ (Иса. 40:5). Сар исполнинѓа пе адава? Кеда ало ки пхув о Исус добором совршено претставинѓа е Јехова со адава сине сар те пхене лично о Јехова ало ки пхув (Јован 12:45).

13. Сар шај те џа пало е Исусескоро пример?

¹³ Исто сар о Исус, амен сием е Јеховаскере сведокија. Амен пхираваја е Јеховаскоро анав хем сариненге вакераја кобор шуже буќа керѓа ов. Ама те шај шукар те сведочина башо Јехова амен мора исто аѓаар те вакера е манушенге со са керѓа о Исус те шај те дикхел пе ко е Јеховаскоро анав сар свето (Апо. 1:8). Никој на сведочинѓа башо Јехова пошукар таро Исус хем адалеске амен џаја пало лескоро пример (Отк. 1:5). Ама ко саве јавера начинија сикаваја кај е Јеховаскоро анав тано важно аменге?

ЈАВЕРА НАЧИНИЈА САР СИКАВАЈА КАЈ Е ЈЕХОВАСКОРО АНАВ ТАНО АМЕНГЕ ВАЖНО

14. Спрема Псалм 105:3, со осетинаја башо е Јеховаскоро анав?

¹⁴ Амен дичинаја амен е Јеховаскере анавеа. (Читин Псалм 105:3.) О Јехова бут радујнела пе кеда фалинаја амен лескере анавеа (Ерем. 9:23, 24; 1. Кор. 1:31; 2. Кор. 10:17). „Те фалина амен е Јеховаја“ значинела те дичина амен адалеа со о Јехова тано амаро Девел. Аменге тано чест те вакера кај о Јехова тано свето хем кај са лескере постапке тане праведна. Никогаш на ваљани те лаџа те вакера амаре колегенге, соучениконге, комшиенге хем е јавере манушенге кај сием е Јеховаскере сведокија! О Бенг мангела те чхинава те вакера е јаверенге башо е Јеховаскоро анав (Ерем. 11:21; Отк. 12:17). Уствари, о Сатана хем лескере ховавне пророкија мангена о мануша те бистрен е Јеховаскоро анав (Ерем. 23:26, 27). Ама, адалеске со иси амен мангипе спрема е Јеховаскоро анав мангаја те славина ле ки секоја прилика (Пс. 5:11; 89:16).

15. Со значинела те викинел пе е Јеховаскоро анав?

¹⁵ Амен викинаја е Јеховаскоро анав (Јоил 2:32; Рим. 10:13, 14). Те викинел пе е Јеховаскоро анав значинела бут повише него само те џанел пе хем те користинел пе адава анав. Амен пенџараја е Девле сар личност, иси амен доверба ки лесте хем родаја лестар помош хем водство (Пс. 20:7; 99:6; 116:4; 145:18). Вакераја е јаверенге башо лескоро анав хем особине, поттикининаја лен те каинен пе хем те керен нешто те шај о Јехова те дикхел шукар ки ленде (Иса. 12:4; Апо. 2:21, 38).

16. Сар шај те докажина кај о Сатана тано ховавно?

¹⁶ Амен сием спремна те цида муке башо е Јеховаскоро анав (Јак. 5:10, 11). Адалеа со ачховаја верна е Јеховаске, чак кеда цидаја муке башо адава, докажинаја кај о Сатана тано ховавно. Ко време кеда живинела сине о Јов, о Сатана вакерѓа акала лафија те шај те кривинел околен со служинена е Јеховаске: „О мануш ка дел са со иси ле башо пло живото“ (Јов 2:4). О Сатана вакерѓа кај о мануша ка служинен е Јеховаске само кеда ка овел ленге са шукар ко живото хем кај ка откажинен пе лестар кеда ка овен лен пхарипа. О верно Јов докажинѓа кај адала лафија сине ховајбе. Амен да иси амен чест те докажина кај нане те чхинава те служина е Јеховаске бизи разлика со ка керел о Сатана те шај те обесхрабринел амен. Шај те ова целосно увериме кај о Јехова понадари да ка заштитинел амен башо пло анав (Јован 17:11).

17. Спрема 1. Петарескоро 2:12, ко саво јавер начин шај те фалина е Јеховаскоро анав?

¹⁷ Амен сикаваја кај иси амен поштовање спрема е Јеховаскоро анав (Изр. 30:9; Ерем. 7:8-11). Адалеске со претставинаја е Јехова хем пхираваја лескоро анав, амен шај или те фалина ле или те лаџакера ле. (Читин 1. Петарескоро 2:12.) Адалеске, амен мангаја те кера са со шај те фалина е Јехова амаре лафенцар хем постапкенцар. Аѓаар, иако сием несовршена, амен ка фалина е Јеховаскоро анав.

18. Ко саво јавер начин шај те докажина кај е Јеховаскоро анав тано аменге важно? (Дикх хем и фуснота.)

¹⁸ Аменге тано поважно е Јеховаскоро анав таро амаро углед (Пс. 138:2). Соске акава тано добором важно? Адалеске со кеда кераја о буќа со свиџинена пе е Јеховаске, адава бут пути на свиџинела пе е манушенге хем адалеске керена лошно лафи баши аменде.a О Исус сине спремно те мерел сар злосторнико хем те овел лаџакердо те шај те фалинел е Јеховаскоро анав. Ов на мислинѓа ки лаџ, јавере лафенцар на сине превише секиримо или вознемиримо башо адава со ка мислинен о јавера баши лесте (Евр. 12:2-4). Леске сине најважно те керел е Девлескири волја (Мат. 26:39).

19. Со осетинеа башо е Јеховаскоро анав, хем соске?

¹⁹ Амен дичинаја амен е Јеховаскере анавеа хем дикхаја сар чест ко адава те ова викиме е Јеховаскере сведокија. Адалеске, амен сием спремна те трпина било сави лаџ. Е Јеховаскоро анав аменге тано бут поважно чак таро амаро углед. Адалеске, те ова одлучна понадари да те фалина е Јеховаскоро анав бизи разлика со ка керел о Сатана те шај те чхинавел амен ко адава. Аѓаар, ка докажина кај е Јеховаскоро анав тано аменге најважно исто сар со сине е Исус Христосеске.