Кобор тано важно е Јеховаскоро анав е Исусеске?

1-2. а) Со керѓа о Исус и рат англедер те овел мудардо? б) Кола пучиба ка дикха ки акаја статија?

ЧЕТВРТОК раќате, ко 14 нисан 33 берш а.е., о Исус икерѓа е Господарескири вечера заедно пле верна апостоленцар. Ов џанља кај панда хари о Јуда ка предајнел ле, кај ка овел мучимо хем пало адава лескере душмања ка мударен ле. Адалеске, пали вечера ов вакерѓа несаве охрабрувачка лафија пле апостоленге. Кратко англедер те џан песке, о Исус вакерѓа јекх бут важно молитва. Адаја молитва, која со пишинѓа ла о апостол Јован, аракхљола ко Јован 17 поглавје.

² Ки акаја статија ка дикха со шај те сикљова тари е Исусескири молитва. На пример, башо со сине секиримо кратко англедер те мерел? Хем со сине важно е Исусеске џикоте сине ки пхув? Те дикха о одговор таро акала пучиба.

„ВАКЕРЃУМ ЛЕНГЕ ТЛО АНАВ“

3. Со пхенѓа о Исус башо е Јеховаскоро анав, хем со мангља те вакерел адалеа? (Јован 17:6, 26).

³ Ки пли молитва о Исус вакерѓа: „Вакерѓум ленге тло анав“. Уствари, ов дуј пути спомнинѓа кај вакерѓа е Јеховаскоро анав пле учениконге. (Читин Јован 17:6, 26.) Со мангља те вакерел адалеа? Дали откринѓа ленге анав кова со ола на џанена ле сине? О ученикија е Исусескере сине Евреија хем адалеске ола више џанена сине кај е Девлескоро анав тано Јехова. Ко Хебрејска списија адава анав појавинела пе скоро 7.000 пути. Значи, о Исус на мислинѓа ко адава кај о Девел викинела пе Јехова, него ко адава со претставинела лескоро анав. О Исус вакерѓа е Девлескоро анав пле учениконге ки адаја смисла со поможинѓа ленге пошукар те запознајнен е Јехова. Ко адава тане вклучиме е Јеховаскири намера е пхувјаја хем е манушенцар, адава со керѓа, адава со ка керел хем лескере особине. О Исус пенџарела е Јехова пошукар таро било кој јавер хем адалеске ов најшукар шај сине те објаснинел сави тани и личност со пхиравела адава анав.

4-5. а) Сар шај некаскоро анав те овел аменге панда поважно? Вакер пример. б) Сар е Јеховаскоро анав уло панда поважно е Исусескере учениконге?

⁴ Те дикха јекх пример. Замислин туке кај ко тло собрание иси јекх старешина со викинела пе Давид хем ов тано доктори. Адале пхрале џанеа ле бершенцар. Ама јекх диве ваљани итно те керен тут операција. Џаја ки болница коте со керела бути о пхрал хем ов користинела пле вештине сар доктори те шај те спасинел тло живото. Дали о анав акале пхралескоро акана значинела туке повише? Џанѓола пе кај оја. О Давид нане више само о старешина коле со пенџареа ле него хем о доктори кова со спасинѓа тло живото.

⁵ Слично, е Исусескере ученикија више џанена сине е Јеховаскоро анав. Ама, адава анав уло ленге панда поважно адалеске со о Исус поможинѓа ленге пошукар те запознајнен е Јехова. Соске шај те вакера акава? Адалеске со о Исус сикавела сине пле Дадескере особине ко са адава со вакерела сине хем со керела сине. Значи, лескере апостолија пошукар запознајнѓе е Јехова таро начин сар о Исус сикавела сине хем аѓаар со дикхена сине сар постапинела е манушенцар (Јован 14:9; 17:3).

„ТЛО АНАВ КОВА СО ДЕНЃАН МАН“

6. Ки која смисла о Јехова денѓа е Исусеске пло анав? (Јован 17:11, 12).

⁶ Ки јекх прилика, о Исус молинѓа пе башо пле ученикија акале лафенцар: „Аракх лен башо тло анав кова со денѓан ман“. (Читин Јован 17:11, 12.) Дали акава значинела сине кај е Исусеске ка овел дендо о анав Јехова? На. Приметин кај о Исус молинѓа пе е Јеховаске е лафенцар: „Аракх лен башо тло анав“. Значи, е Јеховаскоро анав на уло е Исусескоро анав. Тегани, со мангља те вакерел о Исус кеда вакерѓа кај сине леске дендо е Јеховаскоро анав? Прво, о Исус претставинела сине е Јехова хем керела сине лафи ко лескоро анав. Ов ало пе Дадеске ко анав хем керѓа моќна буќа ко адава анав (Јован 5:43; 10:25). Дујто, о анав Исус значинела „о Јехова тано спасение“. Значи, е Девлескоро анав тано паше поврзимо е Исусескере анавеа.

7. Соске о Исус шај сине те керел лафи е Јеховаске ко анав? Вакер пример.

⁷ Размислин башо акава пример. Адалеске со јекх амбасадори тано претставнико јекхе претседателескоро, ов шај те керел лафи ко анав адале претседателеске. Адалеске, кеда керела лафи о амбасадори, ле иси ле о исто авторитети сар е претседателе. Слично, о Исус претставинела сине е Јехова хем керела сине лафи е манушенцар леске ко анав (Мат. 21:9; Лука 13:35).

8. Соске о Јехова вакерѓа кај о Исус пхиравела сине лескоро анав панда англедер ов те авел ки пхув? (2. Мојсеева 23:20, 21).

⁸ Ки Библија, о Исус тано викимо о Лафи соске о Јехова користинела ле сине те шај те пренесинел информацие хем упатствија е ангеленге хем е манушенге (Јован 1:1-3). Веројатно о Исус сине о ангели коле со о Јехова бичхалѓа те шај те грижинел пе е Израелцонге џикоте ола сине ки пустина. Кеда вакерѓа е Израелцонге те овен послушна адале ангелеске, о Јехова вакерѓа: „Ов пхиравела мло анав“.a (Читин 2. Мојсеева 23:20, 21.) О Јехова вакерѓа акава соске о Исус керела сине лафи леске ко анав хем адалеске со ов тано и главно личност која со докажинела кај са адава со керела о Јехова тано исправно хем кај ов тано свето.

„МО ДАД КЕР ТЛО АНАВ ТЕ ОВЕЛ ФАЛИМО“

9. Кобор сине важно е Јеховаскоро анав е Исусеске? Објаснин.

⁹ Сар со више дикхлем, панда англедер о Исус те авел ки пхув, е Јеховаскоро анав сине леске најважно. Адалеске, нане чудно со џикоте сине ки пхув, са адалеа со керѓа сикавѓа кобор леске важно е Јеховаскоро анав. Ко крајо тари пли служба, о Исус ки молитва родинѓа таро Јехова: „Мо Дад кер тло анав те овел фалимо“. Лескоро Дад одма одговоринѓа леске силно гласоја таро небо: „Ме фалинѓум мо анав хем ка керав палем мо анав те овел фалимо“ (Јован 12:28).

10-11. а) Сар о Исус фалинѓа е Јеховаскоро анав? (Дикх хем и слика.) б) Соске ко е Јеховаскоро анав ваљани сине те дикхел пе сар свето хем те чистинел пе тари лаџ која со сине леске анди?

¹⁰ О Исус да фалинѓа пле Дадескоро анав. Сар? Јекх начин тано аѓаар со вакерела сине е јаверенге кобор шуже особине иси е Јехова хем кобор шукар буќа керела. Ама ваљани сине нешто јавер да те шај те фалинел пе адава анав. Ко е Јеховаскоро анав ваљани сине те дикхел пе сар свето хем те чистинел пе тари лаџ со сине леске анди. О Исус сикавѓа кобор тано важно акава кеда сикавѓа пле следбеникон сар те молинен пе. Ов вакерѓа: „Амаро Дад со сиан ко небо, те дикхен сарине ко тло анав сар свето“ (Мат. 6:9, фус.).

¹¹ Соске ко е Јеховаскоро анав ваљани сине те дикхел пе сар свето хем те чистинел пе тари лаџ која со сине леске анди? Адалеске со ки еденско градина о Сатана о Бенг вакерѓа ховајба башо Јехова о Девел. О Сатана вакерѓа кај о Јехова ховавела хем кај чхинавела нешто шукар е Адаместар хем е Еватар (1. Мој. 3:1-5). Адалеа о Сатана, уствари, мангља те вакерел кај о Јехова на постапинела исправно. О ховајба е Сатанаскере каљарѓе е Јеховаскоро анав, јавере лафенцар лескоро углед. Покасно, ко време е Јовескоро, о Сатана вакерѓа кај адала со служинена е Јеховаске керена адава само адалеске со добинена лестар нешто. Исто аѓаар, адава клеветнико вакерѓа кај нијекх мануш на мангела доволно е Јехова те шај те продолжинел те служинел леске кеда ка аракхљовел ко пхарипа (Јов 1:9-11; 2:4). Ваљани сине време те шај те докажинел пе кој ховавела — о Јехова или о Сатана.

„ДАВА МЛО ЖИВОТО“

12. Со сине спремно те керел о Исус адалеске со мангела е Јеховаскоро анав?

¹² Адалеске со мангела е Јехова о Исус мангља те керел са со шај те шај те сикавел кај е Јеховаскоро анав тано свето хем те чистинел ле тари лаџ со сине леске анди. Ов вакерѓа: „Дава мло живото“ (Јован 10:17, 18). Значи, о Исус сине спремно чак те мерел башо е Јеховаскоро анав.b О прва дуј совршена мануша, о Адам хем и Ева, иранѓе думо е Јеховаске хем геле тари страна е Сатанаскири. Појавер лендар, о Исус сине спремно те авел ки пхув хем те докажинел кај мангела е Јехова. О Исус керѓа адава аѓаар со ачхило послушно е Јеховаске ко са (Евр. 4:15; 5:7-10). Ов ачхило верно цело пло живото џи ко пло мерибе ко стубо мучибаске (Евр. 12:2). Адалеа докажинѓа пло мангипе спрема о Јехова хем спрема лескоро анав.

13. Соске о Исус шај сине најшукар те сикавел кај о Сатана ховавела? (Дикх хем и слика.)

¹³ Адалеа сар живинѓа, о Исус целосно докажинѓа кај о Сатана ховавела, а на о Јехова! (Јован 8:44). О Исус џанља е Јехова пошукар таро било кој јавер. Ако нешто таро адава со вакерѓа о Сатана сине чаче, о Исус ка џанел сине башо адава. Ама, о Исус сине одлучно те бранинел е Јеховаскоро углед, јавере лафенцар лескоро анав. Чак кеда изглединела сине кај о Јехова мукхља ле, о Исус сине спремно попрво те мерел него те иранел думо пле мангле Дадеске (Мат. 27:46).c

„ЗАВРШИНЃУМ И БУТИ СО ДЕНЃАН МАН ТЕ КЕРАВ ЛА“

14. Сар о Јехова наградинѓа е Исусе баши лескири верност?

¹⁴ Ки молитва со вакерѓа и рат англедер те мерел, о Исус шај сине те вакерел: „Завршинѓум и бути со денѓан ман те керав ла“. Ов сине уверимо кај о Јехова ка наградинел ле баши лескири верност (Јован 17:4, 5). Адава со о Исус сине ле доверба ко пло Дад на сине џабе. О Јехова на дозволинѓа ов те ачхол ко гробо (Апо. 2:23, 24). Ов воскреснинѓа е Исусе хем денѓа ле побари положба ко небо (Фил. 2:8, 9). Покасно, о Исус почминѓа те владинел сар Цари ко е Девлескоро Царство. Со ка керел адава Царство? О одговор аракхаја ко дујто дело тари пример молитва: „Те авел тло Царство. Те овел тли волја, [е Јеховаскири] сар ко небо аѓаар ки пхув да“ (Мат. 6:10).

15. Со јавер ка керел о Исус?

¹⁵ Панда хари о Исус ка боринел пе против е Девлескере душмања хем ка уништинел е лошнон ко Армагедон (Отк. 16:14, 16; 19:11-16). Одма пало адава, ов ка фрдел е Сатана „ки бездна“ коте со ка овел сар муло (Отк. 20:1-3). Џикоте ка трајнен о милја берша коте со ка владинел о Исус, ов ка иранел о мир хем ка поможинел е манушенге те овен совршена. Ов ка воскреснинел е мулен хем ка керел цели пхув рај. Е Јеховаскири намера ка исполнинел пе (Отк. 21:1-4).

16. Саво ка овел о живото откеда ка завршинен о милја берша коте со ка владинел о Исус?

¹⁶ Саво ка овел о живото откеда ка завршинен о милја берша коте со ка владинел о Исус? О мануша повише нане те овен грешна хем несовршена. Ола повише нане те ваљанел те молинен те простинен пе ленгере гревија преку и откупно жртва. Исто аѓаар, повише нане те ваљанел ленге и свештеничко служба таро 144.000, а ни палем е Исусескири задача сар ленгоро Првосвештенико те шај те овел лен шукар однос е Јеховаја. Освен адава, „сар последно душмани о мерибе ка овел уништимо“. О муле ка овен воскресниме. Сарине ки пхув ка овен совршена (1. Кор. 15:25, 26).

17-18. а) Со ка случинел пе откеда ка завршинен о милја берша? б) Со ка керел о Исус кеда ка завршинел лескоро владибе? (1. Коринќања 15:24, 28; дикх хем и слика.)

¹⁷ Со јавер ка случинел пе откеда ка завршинен о милја берша коте со ка владинел о Исус? Нешто бут посебно — ка овел решимо о спорно пучибе коте сој вклучимо те дикхел пе сар свето ко е Јеховаскоро анав. Соске? Ки еденско градина о Сатана вакерѓа кај о Јехова ховавела хем кај на владинела е манушенцар адалеске со мангела лен. Оттегани па са џи акана, ко лескоро анав секова пути дикхела пе сар свето таро окола со сикавена леске чест хем поштујнена ле. Значи, откеда ка завршинен о милја берша коте со ка владинел о Исус, е Јеховаскоро анав ка овел целосно чистимо тари лаџ која со сине леске анди. Ов целосно ка докажинел кај тано небесно Дад пхердо мангипаја!

¹⁸ Конечно, сарине ка џанен кај адава со вакерѓа о Сатана башо Јехова тано ховајбе. Со ка керел о Исус кеда ка завршинел лескоро владибе? Дали ка џал пало е Сатанаскоро пример хем ка бунинел пе против о Јехова? На! (Читин 1. Коринќања 15:24, 28.) О Исус ка дел о Царство пле Дадеске хем ка подложинел пе ко лескоро владибе. Поразлично таро Сатана, о Исус тано спремно те откажинел пе таро са адалеске со мангела е Јехова.

19. Кобор тано важно е Јеховаскоро анав е Исусеске?

¹⁹ Нане чудно со о Јехова сине спремно те дел пло анав е Исусеске! О Исус совршено сикавѓа саво тано лескоро Дад. Таро адава со дикхлем ки акаја статија, со шај те вакера башо адава кобор тано важно е Јеховаскоро анав е Исусеске? Адава тано леске најважно таро са. Ов сине спремно те мерел башо адава анав хем ко крајо таро милја берша таро лескоро владибе спремно ка дел са е Јеховаске. Сар шај те џа пало е Исусескоро пример? О одговор таро акава пучибе ка дикха ле ки јавер статија.