April

E Jehovase sluge ko purano vreme hine len but problemija kola na očekujinđe. Te dikha o primer ando Jakov. Oleso dad phenđa lese te đal ki pi familija ko Lavan, kova služinđa e Jehovase hem te ženini pe jekha olese ćhajaja. Oleso dad hine sigurno so o Jehova but ka blagoslovini le (Post. 28:1-4). O Jakov ćerđa odova. Mukhlja pi phuv Hanan hem đelo ko Lavan kova hine le duj ćhaja, i Lija hem i Rahela. O Jakov zaljubinđa pe upro olesi potikni ćhaj i Rahela hem hine spremno olaće te ćerel buti efta berš (Post. 29:18). Ama, ked alo o vreme te ženini pe olaja, o Lavan prevarinđa le. Umesto te del le e Rahela, ov dinđa le pe pobare ćhaja e Lija. Phenđa lese so palo jekh kurko ka del le hem e Rahela, ako ka ćerel olaće buti pana efta berš (Post. 29:26, 27). O Lavan hine but nepravedno premalo Jakov hem 20 berš iskoristinđa le (Post. 31:41, 42; w23.04 15 ¶5).

Ko šaj te del amen šukar savet hem ko šaj te utešini amen? O Jehova. Amen šaj te molina amen olese hem ov podstaknini amen te ćera odova. Ov mangela uvek te molina amen olese (1. Sol. 5:17). Ked god valjani te ana disavi odluka, amen šaj te roda lestar savet (Posl. 3:5, 6). Ov tano velikodušno Devel hem odolese na phenđa kobor putija šaj te molina amen olese, nego odova šaj te ćera ked god mangaja. O Isus đanđa so amare molitve tane but važna e Jehovase. Angleder te avel ki phuv, ov dikhlja sar o Jehova uslišini o molitve ando pe verna sluge. Na primer, o Isus hine e Jehovaja ked uslišinđa e Anaki, e Davidesi hem e Ilijasi molitva (1. Sam. 1:10, 11, 20; 1. Kralj. 19:4-6; Ps. 32:5). Sebepi odova, o Isus phenđa pe učenikonenđe često te molinen pe sose oleso Dad ka uslišini olenge molitve (Mat. 7:7-11; w23.05 2 ¶1, 3).

O prvosveštenik o Jodaj hine le strahopoštovanje premalo Jehova. Odova dićhilo ked e Jezaveljaki ćhaj, i Gotolija, ćhivđa kokri pes te vladini ki Juda. Oj hine but lošno hem manglja te ovel kraljica. Odolese pokušinđa te mudari sa pe unukonen te šaj oj te vladini (2. Let. 22:10, 11). Jekh ando odola unukija hine o Joas, kova aćhilo đivdo odolese so e Jodajesi romni, i Josaveta, spasinđa le. Oj hem olako rom garavđe odole ćhave hem brininđe pe olestar. Ađahar neko kotar Davidesi loza hem ponodri šaj hine te ovel kralj. Ama, ov hine verno e Jehovase hem na dozvolinđa i dar andi Gotolija te ćhinavi le te ćerel odova soj tano ispravno. Ked o Joas hine le efta berš, o Jodaj palem mothovđa soj tano verno e Jehovase. Ov ćerđa jekh plan. Ako bi odova plan uspini o Joas, kova hine e Davideso nasledniko, bi ovela kralj. A ako na, o Jodaj šaj hine te našalji po životi. Uzi Jehovasi pomoć, odova plan uspinđa (w23.06 17 ¶12-13).

O kralj Navuhodonosor šaj hine te mislini so o Danilo tano oleso dušmani hem šaj hine te mudari le. Ama, o Danilo hine hrabro hem sa phenđa lese. So pomožinđa e Danilose te ovel hrabro celo po životi? Đi hine terno, olese roditeljija sigurno mothovđe lese šukar primer (Pon. zak. 6:6-9). O Danilo na đanđa samo o osnovna buća ando Zakon, sar soj tane o deš zapovestija, već hem disave detaljija. Na primer, so o Izraelcija šaj te han, a so na (Lev. 11:4-8; Dan. 1:8, 11-13). Isto ađahar, o Danilo sikljilo i istorija ando Devleso narodo hem đanđa so desinđa pe lenđe ked na ićerđe pe ko Jehovase merilija (Dan. 9:10, 11). Sa odova so o Danilo nakhlja ko po životi, uverinđa le so o Jehova hem olese moćna anđelija uvek ka pomožinen lese (Dan. 2:19-24; 10:12, 18, 19; w23.08 3 ¶5-6).

I Rebeka hine mudro đuvli koja celo po životi anđa šukar odluke hem đanđa ked hem sar diso te ćerel (Post. 24:58; 27:5-17). Isto ađahar, poštujinđa averen hem hine podložno (Post. 24:17, 18, 65). Ako hijan ponizno sar i Rebeka hem ako podržineja okolen kase o Jehova dinđa autoritet, ka ove šukar primer ki ti porodica hem ki skupština. I skromnost tani pana jekh osobina koja valjani sa e hrišćanenđe. I Jestira hine skromno hem verno e Jehovaso sluga. Odolese so hine skromno, oj na ulji ponosno ked ulji kraljica. Ićerđa pe ko savetija kola dinđa la olako rođako o Mardohej (Jest. 2:10, 20, 22). Tu šaj te mothove so hijan skromno, ako rodeja savet averendar hem primenineja le (Titu 2:3-5). I Jestira mothovđa skromnost ko pana jekh način. Oj hine but šuži ćhaj, ama na privucinđa pažnja upro peste (Jest. 2:7, 15; w23.12 19-20 ¶6-8).

O Jehova na mangela te ovel amen but baro osećaj andi krivica. Odova teret valjani te forda amendar. Ako priznajinđam amaro greh, kajinđam amen hem daja sa amendar te na ćera odova so ćerđam, amen šaj te ova uverime so o Jehova oprostinđa amenđe (Dela 3:19). Palo odova so ćerđam akala buća, o Jehova na mangela hem ponodri te ovel amen osećaj andi krivica. Ov đanela so odova šaj but te povredini amen (Ps. 31:10). Ako mukhaja i tuga te lel amari snaga, tegani na ka šaj te prasta više ki trka aso životi (2. Kor. 2:7). Ked isi tut baro osećaj andi krivica, razmislin ando odova so o Jehova ćaće oprostini o grehija (Ps. 130:4). Ked ov oprostini okolenđe kola iskreno kajinena pe, ov obećini: „Na ka avel maje ki godi olengo greh“ (Jer. 31:34). Odova značini so o Jehova na razmislini ando greh kova već oprostinđa tuće. Odolese, ma mislin so o posledice kola isi tut sebepi o greh kova ćerđan tane dokaz so o Jehova na oprostinđa tuće. Ma razočarin tut ako sebepi odova više nane tut disave odgovornostija ki skupština. O Jehova više na razmislini ando greh kova ćerđan, odolese na valjani ni tu te ćere odova (w23.08 30-31 ¶14-15).

Đi trajinđa i pandemija kotar koronavirus. E Jehovase svedokija kola šunđe o smernice kola dobinđe andi organizacija, na brininđe pe odobor kobor o manuša kola šunđe odola hovavne informacije (Mat. 24:45). Amen valjani te usredsredina amen ko „buća kola tane ćaće važna“ (Fil. 1:9, 10). Ked disave buća lena amari pažnja, amen našalaja but vreme hem snaga. Disave uobičajena buća sar soj tane o habe, o pibe, i rekreacija hem i buti šaj te len amari pažnja ako tane amenđe najvažna ko životi (Luka 21:34, 35). Isto ađahar, svako dive šunaja hem čitinaja ando protestija hem politička rasprave. Valjani te pazina odola buća te na utičinen upro amende. Ako na pazinaja, lokho šaj te desini pe ko amaro vilo hem ki amari godi te ova ki nekasi strana. O Satana koristini razna metode te ćhivel amen te ćera odova soj tano pogrešno (w23.07 16-17 ¶12-13).

Aso Jehovaso narodo, o dive ked o Isus mulo tano najvažno dive ko berš. Akava tano jedino događaj aso kova o Isus phenđa pe učenikonenđe te ićeren (Luka 22:19, 20). I Spomen-svečanost podstaknini amen te razmislina ando šukar buća kola isi amen sebepi i otkupnina. Setinćeri amen sar šaj te mothova so hijam zahvalna asi Isusesi žrtva (2. Kor. 5:14, 15). Isto ađahar, dela amen prilika zajedno te ohrabrina amen e phralencar hem phenjencar (Rimlj. 1:12). But manuša tane oduševime odoleja so šunena hem so dikhena hem odolese mangena te proučinen i Biblija. Razmislin ando odova sar i Spomen-svečanost ćerela o phralja hem o phenja te oven ko jekhipe. Sarinenđe amenđe i Spomen-svečanost tani but važno (w24.01 8 ¶1-3).

So pobuter razmislinaja andi cena koja o Jehova hem o Isus platinđe, pana pobuter haljovaja kobor mangena svakone amendar (Gal. 2:20). I otkupnina na hine platimi samo sebepi te zadovoljini pe e Jehovasi pravda, već tani dindi sar poklon amenđe. O Jehova mothovđa po mangipe ađahar so žrtvujinđa diso soj tano najvredno olese, pe Ćhave, e Isuse. Ov dozvolinđa o Isus te patini hem te merel sebepi amaro. O Jehova na samo so osetini mangipe premalo amende, već hem mothovi amenđe kobor mangela amen (Jer. 31:3). Ov privucinđa amen koro peste sose mangela amen (Uporedin e stihoncar ando Ponovljeni zakoni 7:7, 8). Niko hem ništa našti te cidel amen kotar oleso mangipe (Rimlj. 8:38, 39). Sar osetineja tut sebepi odova? (w24.01 28 ¶10-11).

O pomazanikija but ceninena i nebesko nada. Jekh olendar, o phral Frederik Franc, ando vilo phenđa: „Amari nada sigurno ka ispunini pe hem svako amendar ando 144 000 ka dobini odova so o Devel obećinđa. Amari nagrada ka ovel but pošukar nego bilo so aver so hine amen.“ Ko 1991. berš o phral Franc pana phenđa: „Amen pana ceninaja but amari nada. . . So pobuter ađićeraja la, pana poviše hijam zahvalna. Hijam spremna te ađićera, ako valjani hem milionija berša. Akana pana pobuter ceninava amari nada.“ Bilo te očekujina te živina ko nebo ili ki phuv, amen hijam bahtale sebepi amari nada. Odija nada šaj te ovel pana pozorali (w23.12 9 ¶6; 10 ¶8).

Angleder te khuvel pe ko sveto šatori hine jekh bakarno oltari ko kova dinđe pe o životinje sar žrtva e Jehovase (Izl. 27:1, 2; 40:29). Ama, odola žrtve našti hine potpuno te ućharen e manušenge grehija (Jevr. 10:1-3). Odova so uvek valjanđe te den žrtve ko sveto šatori mothovđa so valjani te del pe jekh žrtva koja potpuno ka oslobodini e manušen ando greh. O Isus đanđa so o Jehova bićhalđa le ki phuv te del po životi sar otkupnina aso sa o manuša (Mat. 20:28). Odolese, ked krstinđa pe, o Isus mothovđa e Jehovase so mangela te ćerel olesi volja (Jov. 6:38; Gal. 1:4). O Isus dinđa po životi sar žrtva „jekh puti hem zauvek“ te šaj te otkupini e manušen ando greh (Jevr. 10:5-7, 10; w23.10 26-27 ¶10-11).

Amen kokri niked ne bi šaj te oslobodina amen ando greh hem ando meribe (Ps. 49:7, 8). O Jehova hem o Isus ćerđe bare žrtve te šaj te spasinen amaro životi. So pobuter razmislinaja andi Isusesi žrtva, pana pobuter ka cenina i otkupnina. Ked o Adam grešinđa, ov našalđa i prilika te živini zauvek. Odija prilika našalđe hem sa olese ćhave. Te šaj te dobini pe napalal odova so o Adam našalđa, o Isus dinđa po savršeno životi sar žrtva. Ked hine ki phuv, o Isus „na ćerđa nijekh greh hem nijekh hovavno lafi na ikljilo ando oleso muj“ (1. Petr. 2:22). Ked o Isus mulo, ov hine savršeno sar so o Adam hine ki početka. Odolese, šaj hine te platini i cena aso odova so o Adam našalđa (1. Kor. 15:45; 1. Tim. 2:6; w24.01 10 ¶5-6).

Palo odova so o Isus hine uskrsnimo, ov khuvđa ki Svetinja upro svetinje. Akate jasno dikhaja so o način te služina e Jehovase ko oleso duhovno hram kova temeljini pe ki Isusesi žrtva hem ki olesi svešteničko služba tano but pošukar ando način sar o Izraelcija služinđe e Jehovase. Ko Izrael, o prvosvešteniko e rateja ando životinje khuvđa ki Svetinja upro svetinje koja ćerđa o manuš. Ama, o Isus khuvđa ko nebo, ko najsveto than, te pojavini pe anglo Jehova. Odothe o Isus predstavinđa i vrednost ando po savršeno životi kova dinđa sar žrtva amenđe te šaj te oslobodini amen ando greh (Jevr. 9:24-26). Savi god nada te ovel amen, sare šaj te služina e Jehovase ko oleso duhovno hram (w23.10 28 ¶13-14).

Razmislin andi Isusesi uloga koja isi le sar Kralj hem Prvosveštenik. Prekalo leste amen šaj te ava anglo Devleso „presto ando bizaslužimo šukaripe“ ki molitva hem te roda lestar milosrđe hem pomoć „ked valjani amenđe“ (Jevr. 4:14, 15). Ma te mukha nijekh dive te nakhel, a te na razmislina ando odova so o Jehova hem o Isus ćerđe amenđe hem so akana ćerena. O mangipe kova mothovena amenđe valjani te pogodini amen ko vilo hem te podstaknini amen te ova revna đi služinaja e Jehovase (2. Kor. 5:14, 15). Jekh šukar način sar šaj te mothova so hijam zahvalna e Devlese hem olese Ćhavese tano te pomožina averenđe te oven e Jehovase svedokija hem e Isusese učenikija (Mat. 28:19, 20). Odova ćerđa hem o apostol Pavle. Ov đanđa so e Jehovasi volja tani „te spasinen pe sa o manuša hem šukar te penđaren o ćaćipe“ (1. Tim. 2:3, 4; w23.10 22-23 ¶13-14).

Đi propovedinaja e manušenđe, but putija čitinaja lenđe akala stihija. Sar šaj te uverina averen hem amen so ka ispuninen pe o lafija ando Otkrivenje 21:3, 4? O Jehova na samo so dinđa akala šuže obećanja, već hem dinđa amen razlogija sose šaj te verujina so ka ispuninen pe. Ki Biblija pisini sose šaj te verujina so ka ispuninen pe e Jehovase obećanja. Odothe pisini: „Okova so bešela ko presto vaćerđa: ’Dikh, sa nevo ćerava!‘ Pana vaćerđa: ’Pisin, sose ko akala lafija šaj te verujini pe hem ćaćutne tane‘. Hem phenđa maje: ’Ispuninđe pe! Me hijum Alfa hem Omega, početak hem kraj‘ “ (Otkr. 21:5, 6a; w23.11 3 ¶3-5).

Jekh način sar šaj jekh terno phral te mothovi so razvijinđa i sposobnost te razmislini tano ađahar so anela šukar odluke ando odova so ka uravi hem savi frizura ka ovel le. But manuša kola ćerena i moda hem reklamirinena o nevo stil ando urajbe na poštujinena e Jehova hem nemoralno živinena. Odolese, odola šeja tane but tesna hem o murš ko odola šeja šaj te izgledini sar đuvli. Ked odlučini so te uravi, jekh terno phral kova mangela te ovel zrelo mukhela te vodinen le e biblijake načelija hem oponašini o šukar primerija andi skupština. Ov šaj te pućel pe: „Da li mo urajbe mothovi so hijum razborito hem so poštujinava averen? Da li o način sar uravava man ka mothovi so hijum e Devleso sluga?“ (1. Kor. 10:31-33). Jekh terno phral kova isi le sposobnost te razmislini na samo so ka poštujini e phralen hem e phenjen, već hem pe nebesko Dade (w23.12 26 ¶7).

Angleder, o „kralj ando jug“ progoninđa e Devlese narodo (Dan. 11:40). Na primer, ki prvo polovina ando 20. veko, but phralja hine ćhivde ko phanlipe, a disave ćhave hine fordime andi škola sebepi so aćhilje neutralna. Ko zadnja nekobor berš, i vera ando Jehovaso narodo kova živini odothe kuri vladini o kralj ando jug, hine ispitimi ko disave avera načinija. Na primer, đi trajinena o izborija aso glasanje, jekh hrišćanin šaj te avel ko iskušenje te podržini disavi političko stranka ja disave kandidate. Odova hrišćanin šaj na ka đal ko glasanje, ama ki pi godi hem ko po vilo šaj te ovel ki nekasi strana. Odolese, te šaj te aćhova neutralna, valjani te pazina na samo ko odova so ćeraja već hem so mislinaja hem so osetinaja (Jov. 15:18, 19; w23.08 12 ¶17).

Đi prastaja ki amari trka aso životi, amen valjani te šuna akava savet: „Prastan ađahar te osvojinen [i nagrada]!“ (1. Kor. 9:24). O Isus phenđa so valjani te pazina amaro vilo „te na ovel opteretimo bute hajbaja, pijbaja hem e problemencar ando đivdipe“ (Luka 21:34). Akala hem avera stihija šaj te pomožinen amen te haljova kola promene valjani te ćera koro amende đi prastaja ki trka aso životi. Amen šaj te ova sigurna so ka osvojina i nagrada ki trka aso životi sose o Jehova ka del amen snaga te ćera odova (Is. 40:29-31). Odolese, ma usporin! Oponašin e Pavle kova dinđa sa pestar te osvojini i nagrada koja hine anglo leste (Fil. 3:13, 14). Niko ko amaro than našti te prastal ki akija trka, ama uzi Jehovasi pomoć tu šaj te uspine. O Jehova šaj te pomožini tuće te akhare o teret kova valjani hem te forde o teret kova na valjani te akhare (w23.08 31 ¶16-17).

Ked o Isus hine le 12 berš, ov pe roditeljencar đelo ko Jerusalim (Luka 2:46-52). Ama, ked pođinđe te đan pese ćhere, olese roditeljija na primetinđe so ov nane olencar. Olengi odgovornost hine sa olenge ćhave palo prazniko te irinen pe olencar ćhere. Ko krajo, ked o Josif hem i Marija arakhlje e Isuse, i Marija krivinđa le aso odova so aćhilo ko Jerusalim. O Isus šaj hine te phenel lenđe so nepravedno postupinđe premalo leste. Ama, umesto odova, ov odgovorinđa lenđe ko jekh jednostavno način hem mothovđa so poštujini len. O Josif hem i Marija „na haljilje so ov phenđa lenđe.“ Ama, o Isus „hine lenđe poslušno.“ Ternalen, da li tano tumenđe pharo te šunen tumare roditeljen ked ćerena disavi greška ja ked pogrešno haljona tumen? So tegani šaj te ćeren? Razmislin sar o Jehova osetini pe. I Biblija phenela so ked tu šuneja te roditeljen, tegani ćereja odova „so o Gospod mangela“ (Kol. 3:20). O Jehova đanela so podijekh puti te roditeljija na haljona tut ja ćhivena disave pravilija ko kola tano tuće pharo te ićere tut. Ama, ked tu šuneja len, o Jehova tano bahtalo (w23.10 7 ¶5-6).

Jekh amal ki škola šaj te phenel so e Jehovase svedokija valjani te meninen po stav ando homoseksualcija. Šaj ka valjani te uverina le so amen mothovaja mangipe sa e manušenđe hem so poštujinaja svakoneso izbor (1. Petr. 2:17). Palo odova, šaj ka ovel amen prilika te phena lese so i Biblija vaćeri hem sar šaj te ovel amen bahtalo životi. Ako neko na složini pe amencar, na valjani sigate te pretpostavina so đanaja ko so verujini. Na primer, so ako to amal ki škola marela tuće muj odolese so verujineja ko Devel? Da li valjani te pretpostavine so ov verujini ki evolucija hem so đanela but buća odolestar? U stvari, ov šaj samo ponovini odova so šunđa averendar. Možda šaj te uputine le ko amaro sajt hem uduri te dikhel so vaćeri pe ando stvaranje. Kasnije, ov šaj ka mangel te vaćeri ando disavo članko ja video kova arakhlja uduri. Ked mothovaja poštovanje averenđe, odova šaj te podstaknini len te mangen te đanen pobuter andi Biblija (w23.09 17 ¶12-13).

Amen šaj te ova uverime so ov ka koristini amen hem ka blagoslovini amen, čak iako ćerđam disavi greška (Posl. 28:13). O Samson na hine savršeno, ama na odustajinđa ando odova te služini e Jehovase, čak hem ked ćerđa greška e Dalilaja. Ama, ni o Jehova na odustajinđa olestar. Ov koristinđa le ko jekh šukar način. O Jehova pana upro leste dikhela sar jekh manuš kova hine le bari vera, odolese hem ćhivđa le ko spisko avere verno manušencar kolendar šaj te čitina ko Jevrejima 11. poglavlje. But ohrabrini amen odova so đanaja so amen služinaja amare nebesko Dadese kova mangela te zorjaćeri amen, posebno ked hijam slaba. Odolese, sar o Samson, hajde hem amen te molina e Jehova: „Molinava tut, setin tut upro mande [hem] de man snaga“ (Sud. 16:28; w23.09 7 ¶18-19).

Đanaja soj tano e Jehovaso dive but paše. Odolese, mangaja te da sa amendar te propovedina i šukar vest e manušenđe. Ama, disavo puti nane amen hrabrost te vaćera e manušencar. Sose? Odolese so isi amen dar so ka mislinen amendar ja so ka ćeren amenđe. Odova desinđa pe hem e Petarese i rat ked astarđe e Isuse. Ov darandilo te phenel soj tano jekh ando Isusese učenikija. Čak nekobor putija phenđa so na penđari le (Mat. 26:69-75). Ama, kasnije o Petar pobedinđa pi dar hem pisinđa: „Ma daran kotar odova sostar on darana hem ma oven uznemirime“ (1. Petr. 3:14). E Petarese lafija uverinena amen so hem amen šaj te pobedina i dar ando manuš. So šaj te pomožini amen te pobedina i dar ando manuš? O Petar phenđa: „O Hrist sar Gospod nek ovel sveto ko tumaro vilo“ (1. Petr. 3:15). Akava uključini te razmislina odolestar savi uloga o Isus isi le hem kobor bari moć isi le sar Kralj (w23.09 27-28 ¶6-8).

Amen valjani hem ponodri te pazina „te na ćera o buća kola tane deo andi tama“ (Ef. 5:11). Ako jekh manuš dikhela, šunela, ja vaćeri ando melale ja nemoralna buća šaj lokho te perel ki zamka te ćerel odova soj tano lošno (Post. 3:6; Jak. 1:14, 15). E Satanaso sveto mangela te hovavi amen, te ćhivel amen te verujina so odova so o Jehova phenela soj tano nemoralno hem melalo u stvari nane pogrešno (2. Petr. 2:19). O Beng uvek manglja te bunini e manušen te na ćeren razlika maškaro odova soj tano šukar hem lošno (Is. 5:20; 2. Kor. 4:4). Odolese, nane čudno so ko but filmija, emisije ja veb-sajtija isi buća kola tane protiv e Jehovase pravedna merilija. O Beng mangela te ćhivel amen te mislina so o nemoralna postupkija nane diso sostar valjani te cida amen, već so valjani te uživina ko odova hem so nane opasna (Ef. 5:6; w24.03 22 ¶8-10).

Đi hine ki pustinja, o Izraelcija legarđe o sveto šatori kotar jekh than ko aver. On koristinđe le oko 500 berš, sa đi na ćerđa pe o hram ko Jerusalim (Izl. 25:8, 9; Br. 9:22). O sveto šatori hine than kuri o Izraelcija ćedinđe pe te služinen e Devlese hem te den žrtve (Izl. 29:43-46). Ama, o sveto šatori predstavinđa hem diso but pobaro so valjanđa te ovel. O sveto šatori kotar purano vreme hine „slika hem senka kotar odova soj tano ko nebo“ hem predstavinđa e Jehovaso duhovno hram. O apostol Pavle phenđa so „odova šatori predstavini odova so postojini ko avdisutno vreme“ (Jevr. 9:9). Ko vreme ked pisinđa lil e Jevrejenđe, o duhovno hram već postojinđa. Ov počminđa te postojini kotar 29. berš ki n. e. Ko odova berš, o Isus krstinđa pe hem počminđa te služini sar Prvosvešteniko ko duhovno hram (Jevr. 4:14; Dela 10:37, 38; w23.10 25-26 ¶6-7).

Amen valjani te ova prilagodljiva te šaj te služina e Jehovase radosno ked amare okolnostija ko životi meninena pe. Sar šaj te uspina ko odova? Valjani te ova razumna – te prilagodina amen ked amare okolnostija meninena pe hem te poštujina averengo mišljenje hem odluke. Sar e Jehovase sluge, amen mangaja te ova razumna. Isto ađahar, mangaja te ova ponizna hem saosećajna. Aso Jehova phenela pe soj tano „Stena“ odolese soj tano zoralo hem so niked na menini pe (Pon. zak. 32:4). Ama, ki aver strana, ov tano razumno. Na primer, ked o buća ko sveto meninena pe, o Jehova prilagodini pe te šaj te ispunini pi namera. Odolese so stvorinđa amen premali pi slika, ov hem amenđe dinđa sposobnost te prilagodina amen ked amare okolnostija meninena pe. Ki Biblija isi amen načelija kola pomožinena amen te ana mudra odluke, bizo obzir savo pharipe te ovel amen. Ando Jehovaso primer hem načelija kola dinđa amen, dikhaja so ov tano „Stena“, a ko isto vreme hem razumno (w23.07 20 ¶1-3).

Ki Biblija, o Jehova kokri pes uporedini jekha saosećajno dajaja (Is. 66:12, 13). Zamislin jekha daja koja saosećajno brinini pe kotar pi beba. Oj nežno lela e beba ki angalja hem nežno vaćeri olaja. Ked amen diso dukhala, šaj te ova sigurna so o Jehova ka mothovi amenđe po mangipe. Ov na vazdela pe vasta amendar ked amen ćeraja diso soj tano pogrešno (Ps. 103:8). O Izraelcija but putija razočarinđe le. Ama, ked hine lenđe pharo hem ked pokajinđe pe, ov uverinđa len so pana mangela len. Na primer, ando odova narodo phenđa: „Tu hijan vredno ko me jaćha, me ceninava tut hem mangava tut“ (Is. 43:4, 5). E Devleso mangipe na meninđa pe. Čak hem ked ćeraja disavi ozbiljno greška, ov na irini amenđe po dumo. Ako kajinaja amen hem irinaja amen olese, amen ka dikha so ov pana mangela amen. O Jehova obećini amenđe so „spremno ka oprostini“ amare grehija (Is. 55:7). Ki Biblija pisini so ked o Devel oprostini, tegani hem „zorjaćeri amen“ (Dela 3:19; w24.01 27 ¶4-5).

O Jehova šaj te pomožini amen ked hijam ki disavi phari situacija. Na primer, ked pućaja amare šefe te del amen slobodna dive te đa ko kongres ili ked pućaja le te menini amaro raspored ki buti te šaj te resa ko sa o sastankija, amen daja e Jehovase prilika te blagoslovini amen. Tegani šaj ka ova iznenadime ko kova način o Jehova ka pomožini amen. Ađahar amaro poverenje upro Jehova ka ovel pana pobaro. O Jezdra ponizno molinđa pe e Jehovase asi pomoć. Svako puti ked brininđa pe sar ka ćerel pe odgovornostija, o Jezdra ponizno molinđa pe e Jehovase te pomožini lese (Jezd. 8:21-23; 9:3-5). E Jezdraso stav podstakninđa averen te podržinen le hem te oponašinen olesi vera (Jezd. 10:1-4). Ked but sekirinaja amen da li amari porodica ka ovel la sa so valjani laće ili da li ka ovel bezbedno, tegani valjani te roda e Jehovastar pomoć (w23.11 18 ¶15-17).

O Jehova na phenđa so ako mangaja te ova pravedna mora te ćera baš odova so o Avraham ćerđa. Isi but načinija sar šaj te mothova so isi amen vera. Na primer, šaj te pozdravina e neven ki dvorana. Šaj te pomožina amare phralenđe ili nekase andi amari porodica (Rimlj. 15:7; 1. Tim. 5:4, 8; 1. Jov. 3:18). Jekh ando najvažno način sar šaj te mothova vera tano ađahar so ka propovedina (1. Tim. 4:16). Sare šaj prekalo amare delija te mothova so verujinaja so o Jehova ka ispunini pe obećanja hem so ov đanela soj tano najšukar amenđe. Ako ađahar ćeraja, šaj te ova sigurna so anglo Jehovase jaćha ka ova pravedna hem ka ova olese amala (w23.12 2 ¶3; 6 ¶15).

O Kralj David phenđa e Solomonese akala lafija angleder te merel (1. Kralj. 2:1, 3). Sa o phralja avdije valjani te primeninen akava savet. Te šaj te ćeren odova, valjani te šunen e Devleso zakon hem te ićeren pe ko biblijake načelija ko sa so ćerena (Luka 2:52). Sose tano važno jekh terno phral te ovel zrelo? O murša isi len bare odgovornostija ki porodica hem ki skupština. Terne phraljalen, sigurno razmislinđen ando odgovornostija kola ka oven tumen ki budućnost. Šaj isi tumen cilj te oven ki punovremeno služba, te služinen sar sluge pomoćnikija, a kasnije sar starešine. Isto ađahar, šaj mangena te khuven ko brak hem te oven tumen ćhave (Ef. 6:4; 1. Tim. 3:1). Te šaj te ispuninen akala ciljija hem te oven uspešna, tumen valjani te oven zrela hrišćanija (w23.12 24 ¶1-2).

Avdije, o starešine isi len odgovornost te brininen pe kotar Jehovaso stado. On but ceninena odova zadatko so šaj te pomožinen pe phralenđe hem pe phenjenđe. Odolese, dena sa pestar te oven „pastirija kola šukar ka brininen pe olendar“ (Jer. 23:4; 1. Petr. 5:2). But hijam zahvalna so isi amen asavke starešine ki skupština. On šaj but te sikljon ando sudija o Gedeon (Jevr. 6:12). Ov zaštitinđa e Devlese narodo hem brininđa pe olestar (Sud. 2:16; 1. Let. 17:6). Sar o Gedeon, hem o starešine dena sa pestar te brininen pe kotar Devleso narodo ko pharo vreme (Dela 20:28; 2. Tim. 3:1). Odolese, o starešine šaj but te sikljon andi Gedeonesi skromnost, poniznost, poslušnost hem istrajnost. Isto ađahar, sarinenđe ki skupština šaj te pomožini e Gedeoneso primer pana pobuter te ceninen e starešinen (Jevr. 13:17; w23.06 2 ¶1; 3 ¶3).