Maj

Ko jekh period, ki celo phuv hine baro bokhalipe. Ni e hrišćanenđe ko prvo veko na hine lokho. O roditeljija šaj sikirinđe pe da li ka ovel len so te den pe ćhavenđe te han. Isto ađahar, disave terne šaj planirinđe te đan pana pobuter ki služba, ama akana morandilje te ćeren odova ked i situacija ka ovel hari pošukar. Ama, save god okolnostija hine len, o hrišćanija prilagodinđe pe. On koristinđe svako prilika te propovedinen i šukar vest hem te delinen averencar odova so hine len (Dela 11:29, 30). Okola so dobinđe odova so valjanđa lenđe šaj hine te dikhen sar o Jehova pomožini len (Mat. 6:31-33). On verovatno hine pana popaše e phralencar hem e phenjencar kola pomožinđe len. Isto ađahar, okola kola bićhalđe pomoć ja okola kola pomožinđe ko aver način šaj hine te dikhen kobor bahtalipe isi ked dela pe (Dela 20:35; w23.04 16 ¶12-13).

Podijekh puti, o Jehova odgovorini ko amare molitve ađahar so podstaknini disave manušen kola na služinena lese te pomožinen amen. Na primer, ov podstakninđa e kralje kova vićinđa pe Artakserks te mukhel e Nemija te đal ko Jerusalim te pomožini te obnovini pe i diz (Nem. 2:3-6). Isto ađahar, hem avdije o Jehova šaj te podstaknini disave manušen kola na služinena lese te pomožinen amen. O Jehova na odgovorini ko amare molitve ko disavo neobično način. Ama, ked odgovorini, ov dela amen baš odova so valjani amenđe te šaj te aćhova lese verna. Odolese, hem amen valjani te razmislina sar o Jehova odgovorini ko amare molitve (Ps. 66:19, 20). Amen valjani te mothova vera na samo ked molinaja amen e Jehovase, nego hem ked prihvatinaja oleso odgovor ko amare molitve, bizo obzir savo tano (Jevr. 11:6; w23.05 11 ¶13; 12 ¶15-16).

Ked predajinđam amen e Jehovase, amen obećinđam so ka služina lese hem ka ćera olesi volja. Amen mora te ićera amen ko amaro obećanje. Odija tani bari odgovornost, ama amenđe nane but pharo te ćera odova. Amen hijam stvorime te ćera e Jehovasi volja (Otkr. 4:11). O Jehova stvorinđa amen premali pi slika hem ćerđa te ovel amen duhovna potrebe. Sebepi odova, amen šaj te ova paše e Jehovaja hem hijam but bahtale ked ćeraja olesi volja. Isto ađahar, ked šunaja e Jehova hem ked oponašinaja e Isuse, amen „dobinaja nevi snaga“ (Mat. 11:28-30). Odolese hem ponodri zorjaćer to mangipe premalo Jehova. Odova šaj te ćere ađahar so ka razmisline ando šukar buća kola o Jehova već ćerđa tuće hem ando odova so ov mangela te ćerel tuće ki budućnost. So pobuter barjaćereja to mangipe premalo Jehova, ka ovel tuće pana polokho te šune le (1. Jov. 5:3). O Isus šaj hine te ćerel e Jehovasi volja odolese so molinđa e Jehova asi pomoć hem hor razmislinđa andi pi nagrada (Jevr. 5:7; 12:2). Sar o Isus, molin tut e Jehovase te zorjaćeri tut hem te pomožini tut i nada ko večno životi uvek te ovel tuće realno (w23.08 27-28 ¶4-5).

Sare amen ceninaja e manušen kola tane strpljiva. Amen isi amen šukar mišljenje okolendar kola ađićerena diso bizo te nervirinen pe. Hijam zahvalna hem so neko tano strpljivo amencar ked ćeraja disave greške. Isto ađahar, hijam but zahvalna e osobaće koja proučinđa amencar so hine strpljivo đi pomožinđa amen te sikljova, te prihvatina hem te primenina odova so i Biblija sikavi. A soj tano najvažno, but hijam zahvalna e Jehovase soj tano strpljivo amencar. Iako but ceninaja e manušen kola tane strpljiva, amenđe šaj nane uvek lokho te mothova odija osobina. Na primer, šaj amenđe pharo te aćhova smirime ked isi gužva ko saobraćaj, pogotovo ako harinaja. Ili šaj but holjanaja ked avera nervirinena amen. A podijekh puti šaj te ovel amenđe pharo te ađićera o Jehova te ispunini pe obećanja ando nevo sveto. Ipak, ko sa akala situacije, valjani te ova strpljiva (w23.08 20 ¶1-2).

O Jehova phenđa e Gedeonese te bićhali skoro sa pe vojnikonen te đan ćhere. O Gedeon šaj hine te mislini: „Da li tano odova mudro? Da li ćaće ka uspina ađahar?“ Ama, ov ipak hine poslušno e Jehovase. Avdije, o starešine tane sar o Gedeon ako spremno prihvatinena sa o promene kola ovena ki organizacija (Jevr.13:17). O Gedeon ćerđa sa odova so o Jehova phenđa lese, iako darandilo hem oleso zadatko hine opasno (Sud. 9:17). Palo odova so o Jehova phenđa lese soj tano oleja, o Gedeon hine le poverenje so ov ka pomožini le te zaštitini olese narodo. Avdije, o starešine kola živinena ko phuvja kuri tane amare aktivnostija zabranime, oponašinena e Gedeoneso primer. On hrabro predvodinena ko sastankija hem ki služba, iako tane svesna so šaj te oven phanle, ispitime, maltretirime ja šaj te našaljen pi buti. Đi ka trajini i bari nevolja, o starešine ka valjani hrabro te ićeren pe ko smernice kola ka dobinen, čak iako olengo životi šaj ka ovel ki opasnost (w23.06 5-6 ¶12-13).

O Jehova dinđa ki Biblija te pisini pe odova so o Jodaj ćerđa, te bi amen sikljovaja diso olestar (Rimlj. 15:4). Ked o Jodaj mulo, ov mothovđa lese posebno čast, ađahar so „parunđe le maškaro kraljija ki Davidesi diz, sose ko Izrael ćerđa odova soj tano šukar, služinđa e ćaćutne Devlese hem brininđa pe ando oleso ćher“ (2. Let. 24:15, 16). O izveštaj ando Jodaj šaj te pomožini amen te mothova pana pobaro strahopoštovanje premalo Jehova. O starešine šaj te oponašinen e Jodajeso primer, ađahar so uvek ka trudinen pe te zaštitinen e phralen hem e phenjen ki skupština (Dela 20:28). O phure šaj te sikljon ando Jodaj so ako isi len strahopoštovanje hem aćhona verna e Jehovase, ov šaj prekalo lende te ispunini pi namera. O terne šaj te razmislinen odolestar savo o Jehova hine premalo Jodaj hem te oponašinen le ađahar so ka mothoven poštovanje e phure phralenđe hem e phenjenđe, pogotovo okolenđe kola beršencar služinena e Jehovase (Posl. 16:31). Hajde sare amen verno te podupirina okolen kola predvodinena, ađahar so ka ova lenđe poslušna (Jevr. 13:17; w23.06 17 ¶14-15).

Razmislin kobor često ka vazde to vas to sastanak. Ako but puti vazdeja to vas, tegani o phral kova vodini disavi tačka šaj te osetini pe neprijatno hem so mora te del tut komentari, iako avera na hine len prilika te komentarišinen. Sebepi odova, avera šaj na ka mangen te vazden po vas (Prop. 3:7). Ked ko sastanko but objaviteljija vazdena po vas, amen šaj na ka dobina prilika but puti te komentarišina. Podijekh puti, o voditelj našti sarinenđe te del komentarija. Odova šaj te obeshrabrini amen, ama na valjani te uvredina amen ako na dobinđam komentari (Prop. 7:9). Ako našti te komentarišine odobor kobor bi mangeja, tegani sose ne bi pažljivo šuneja averen sar komentarišinena hem palo sastanko te đa te phene lenđe so hine len šuže komentarija? Ked pohvalineja te phralen hem te phenjen, tu šaj te ohrabrine len isto sar hem ked deja komentari (w23.04 23-24 ¶14-16).

Proučin e Devleso Lafi hem hor razmislin ando odova so proučinđan. Sar so jekh kaš aćhola zoralo ako isi le hor korenija, ađahar hem amen ka aćhova zorale ako isi amen zorali vera ko Devleso Lafi. Sar jekh kaš barjola, olese korenija ovena sa pohor hem sa poviše širinena pe. Ked proučinaja hem hor razmislinaja, amen zorjaćeraja amari vera hem ovaja uverime so e Jehovase drumija tane najšukar (Kol. 2:6, 7). Razmislin sar o Jehova ko purano vreme pomožinđa pe slugenđe prekalo savetija hem smernice kola dinđa len. Na primer, o Jezekilj pažljivo posmatrinđa sar o anđeo merini o hram kova dikhlja ki vizija. Akija vizija but zorjaćerđa e Jezekilje, a amen olatar šaj te sikljova sar ko ispravno način te služina e Jehovase (Jezek. 40:1-4; 43:10-12). Isto ađahar, hem amenđe but ka pomožini ako ka odvojina vreme te proučina hem te razmislina ando pohor buća kotar Devleso Lafi. Amaro vilo šaj te ovel verno e Jehovase ađahar so ka ovel amen potpuno poverenje upro leste (Ps. 112:7; w23.07 18 ¶15-16).

Ki Biblija isi but primerija ando terne murša kolen šaj te oponašine. On manglje e Devle hem pomožinđe e Devlese narodose ko razna načinija. Isto ađahar, šukar primerija šaj te arakhe hem ki ti porodica ja ki skupština (Jevr. 13:7). Uzo odova, isi tut jekh savršeno primer, o Isus Hrist (1. Petr. 2:21). Đi ka proučine akala primerija, razmislin kola osobine koro lende najviše sviđinena pe tuće (Jevr. 12:1, 2). Palo odova, razmislin sar šaj te oponašine len. O manuš kova isi le sposobnost te razmislini, na ćerela o buća sigate, već odvojini vreme te razmislini angleder diso te ćerel. Odolese, de sa tutar te razvijine akija sposobnost. Počmin ađahar so ka sikljove o načelija andi Biblija hem razmislin sose tane tuće korisna. Palo odova, koristin odola načelija te ane odluke kola ka oven ugodna e Jehovase (Ps. 119:9). Ako razvijineja akija sposobnost, odova ka pomožini tuće te ove zrelo (Posl. 2:11, 12; Jevr. 5:14; w23.12 24-25 ¶4-5).

O roditeljija valjani te sikaven pe ćhaven sar ko blago način te odgovorinen okolenđe so marena lenđe muj (Jak. 3:13). Disave roditeljija odova ćerena ko porodično proučibe. On razmotrinena o teme kola šaj te pojavinen pe lenđe ki škola, vežbinena sar te odgovorinen hem sar odova te ćeren ko jekh blago način. Ako o terne ko porodično proučibe vežbinena so te ćeren ko disave situacije, odova ka pomožini len te uverinen kokri pes hem te sikljon sar te objasninen sose verujinena ko diso. Ko amaro sajt, ko deo „O terne pućena“ isi radna listija aso tinejdžerija. On tane ćerde te pomožinen e ternenđe te uverinen pe ko odova ko so verujinena hem te spreminen o odgovorija pe lafencar. Ako odova materijali proučinaja sar porodica, tegani sare šaj te sikljova sar te branina amari vera ko jekh blago hem ljubazno način (w23.09 17 ¶10; 18 ¶15-16).

Da li nekad hine tuće pharo te ispunine disavo duhovno cilj kova ćhivđan tuće? Ako ja, na hijan jedino. Na primer, o Filip manglja olese molitve te oven pana pošukar hem te molini pe počesto. Ama, hine lese pharo te arakhi vreme aso odova. I Erika hine la cilj te resel ko vreme ko sastankija asi služba, ama skoro svako puti harinđa. Ako akana ćhivđan tuće disavo cilj hem na ispuninđan le, ma obeshrabrin tut. Ma bistri so hem aso disave tikne ciljija valjani vreme hem trud. Odova so mangeja te ispunine to cilj mothovi so cenineja to amalipe e Jehovaja hem so mangeja te de olese to najšukar. Naravno, ov na rodela amendar odova so našti te da le (Ps. 103:14; Mih. 6:8). Odolese, amaro cilj valjani te ovel razumno hem te da e Jehovase odova so ćaće šaj (w23.05 26 ¶1-2).

O hrabra manuša šaj te daran, ama na mukhena i dar te ćhinavi len te ćeren odova soj tano ispravno. O Danilo hine but hrabro ćhavo. Ov proučinđa odova so pisinđe o prorokija, sar soj tano o Jeremija. Sebepi odova, kasnije haljilo so pana hari o Jevreja ka ikljon ando Vavilon (Dan. 9:2). Ked dikhlja sar ispuninena pe o proročanstvija, oleso pouzdanje upro Jehova ulo pana pobaro. A okola so isi len baro pouzdanje upro Jehova, šaj te oven but hrabra (Uporedin o stihija ando Rimljanima 8:32, 37-39). Isto ađahar, o Danilo često molinđa pe e Jehovase (Dan. 6:10). Priznajinđa e Jehovase sa pe grehija, vaćerđa lese sar osetini pe hem rodinđa lestar pomoć (Dan. 9:4, 5, 19). Ov hine manuš sar amende, odova značini so na bijandilo hrabro. Ov razvijinđa odija osobina ađahar so proučinđa, molinđa pe hem hine le baro pouzdanje upro Jehova (w23.08 3 ¶4; 4 ¶7).

Ked amen šunaja o vlastija, odova šaj te pomožini hem amenđe hem averenđe. Sar? Ako ićeraja amen ko zakon, tegani na ka doživina o lošna posledice (Rimlj. 13:1, 4). Amari poslušnost šaj te utičini ko odova sar o vlastija dikhena ko Jehovaso narodo. Na primer, but berša angleder, ki Nigerija o vojnikija khuvđe ki dvorana đi trajinđa o sastanko hem rodinđe okolen kola ćerđe protestija sose na manglje te platinen o porez. Ama, o oficiri phenđa: „E Jehovase svedokija uvek platinena o porez.“ Svako puti ked šuneja o zakon, tu ćereja amen te ova ko šukar glaso hem jekh dive odova šaj te zaštitini te phralen hem te phenjen (w23.10 9 ¶13).

Disave e Jehovase sluge odobor berš služinena olese so mislinena so o krajo već valjanđa te avel. Ama, o Jehova haljola sar osetinena pe olese sluge. Odolese, ov uverinđa e Avakume: „Odija vizija ka ispunini pe ko vreme kova tano odredimo aso odova. Oj prastala premalo po krajo hem na ka hovavi. Čak hem te harini, ađićer la! Odolese so sigurno ka ispunini pe hem na ka harini!“ (Avak. 2:3). Da li o Jehova akale lafencar manglja te ohrabrini samo e Avakume? Na, ov manglja hem amen te ohrabrini. O apostol Pavle akala lafija primeninđa upro hrišćanija kola ađićerena te avel o nevo sveto (Jevr. 10:37). Čak iako dićhola so o kraj harini, amen šaj te ova sigurna so o Jehova ka ispunini po obećanje (w23.04 30 ¶16).

But Izraelcija na manglje te prihvatinen o jasna dokazija so o Jehova vodini len prekalo Mojsije (Br. 14:10, 11). But putija, buninđe pe protiv oleste. Odolese, o Jehova na mukhlja celo odija generacija te khuvel ki Obećimi phuv (Br. 14:30). Ama, hine hem disave Izraelcija kola sledinđe e Jehovaso vođstvo. Na primer, o Jehova phenđa: „O Halev [. . .] hine maje poslušno celone vileja“ (Br. 14:24). O Jehova nagradinđa e Haleve hem čak dozvolinđa lese te birini kaj ka živini ki Obećimi phuv (Is. Nav. 14:12-14). Sar o Halev, hem avera Izraelcija kola khuvđe ki Obećimi phuv sledinđe e Jehovaso vođstvo. Isto ađahar, ked o Isus Navin ulo vođa umesto o Mojsije, on „hor poštujinđe le celo oleso životi“ (Is. Nav. 4:14). Odolese, o Jehova blagoslovinđa len ađahar so dinđa len i phuv koja obećinđa lenđe (Is. Nav. 21:43, 44; w24.02 21 ¶6-7).

Sar so jekh doktori šaj te đanel savo tano amaro vilo ađahar so merini amaro puls hem amen šaj te dikha savo tano amaro mangipe premalo Jehova ađahar so ka razmislina ando amaro mangipe premalo phralja hem phenja. Ako primetinaja so nane amen mangipe premalo phralja hem phenja sar angleder, odova značini so amaro mangipe premalo Jehova nane sar angleder. Ama, ako uvek mothovaja mangipe e phralenđe hem e phenjenđe, odova značini so amaro mangipe premalo Jehova tano baro. Ako amaro mangipe premalo phralja hem phenja nane sar angleder, tegani isi amen jekh ozbiljno problemi. Sose? Odolese so odova značini so amaro amalipe e Jehovaja tano ki opasnost. O apostol Jovan istakninđa odova ked phenđa: „Ako neko na mangela pe phrale, kas dikhela, našti te mangel e Devle, kas na dikhela“ (1. Jov. 4:20). So šaj te sikljova akalestar? O Jehova tano zadovoljno amencar ako mangaja jekh jekhe (1. Jov. 4:7-9, 11; w23.11 8 ¶3; 9 ¶5-6).

Ked hine terno, o kralj Joas anđa šukar odluke. Iako na hine le dad, ov šunđa odova so sikavđa le o verno prvosveštenik, o Jodaj. Odova sveštenik sikavđa e Joase sar pe ćhave. Sebepi odova, o Joas odlučinđa te služini e Jehovase hem pomožinđa e narodose te služinen e Devlese. Isto ađahar, o Joas obnovinđa e Jehovaso hram (2. Let. 24:1, 2, 4, 13, 14). Ako te roditeljija ja neko ando Jehovase svedokija sikavđe tut te mange e Jehova, tegani dinđe tut jekh but šužo poklon (Posl. 2:1, 10-12). Te roditeljija šaj te sikaven tut ko razna načinija. On ka oven bahtale ked ka šune o savet kova dena tut ando Devleso Lafi. Soj tano najvažno, o Jehova ka ovel bahtalo hem to amalipe oleja ka ovel pana pozoralo (Posl. 22:6; 23:15, 24). Akala tane šukar razlogija te oponašine o primer ando Joas ked hine terno (w23.09 8-9 ¶3-5).

O Jehova obećini so ka šunel amare molitve. Amaro Devel mangela pe verna slugen, odolese niked na ka phanel pe kana ked molinena pe (Ps. 10:17; 37:28). Ama, odova na značini so ka del amen sa so rodaja lestar. Aso disave buća šaj ka valjani te ađićera đi na avela o nevo sveto. O Jehova razmislini andi pi namera đi šunela amare molitve (Is. 55:8, 9). Jekh buti koja o Jehova mangela te ćerel tani te pherel i phuv e manušencar kola spremno šunena le sar pe Vladare. Ama, o Satana phenela so o manuša ka oven bahtale ako on vladinena (Post. 3:1-5). Te šaj te mothovi so o Beng hovavi, o Jehova mukhlja e manušen kokri te vladinen. Ama, odova anđa bare problemija (Prop. 8:9). Amen haljovaja so o Jehova našti te cidel odmah sa amare problemija (w23.11 21 ¶4-5).

O Jehova dinđa po lafi so prekalo Avraham but manuša ka oven blagoslovime. Ama, ked o Avraham hine le 100 berš, a i Sara 90 on pana na hine len ćhave. Šaj hine te dićhol soj tano nemoguće te ovel len ćhave. Odija ćaće hine bari kušnja aso Avraham. Ama, „iako na hine sose te nadini pe, ipak hine le nada hem odolese verujinđa so ka ovel dad ando but narodija“ (Rimlj. 4:18, 19). Ama, ko krajo ispuninđa pe odova so o Avraham ađićerđa. Ov ulo dad sose dobinđa e Isake (Rimlj. 4:20-22). O Devel šaj te ovel zadovoljno amencar hem te ova pravedna anglo olese jaćha, sar so o Avraham hine. U stvari, akalestar o Pavle vaćerđa ked pisinđa: „Ama odova so upro leste ’dikhlja sar pravedno‘ na hine pisimo samo olese nego hem amenđe upro kola ka dikhel pe sar pravedna, sose verujinaja ko okova kova uskrsninđa e Isuse, amare Gospode“ (Rimlj. 4:23, 24). Sar o Avraham, hem amen valjani te ovel amen vera ko Jehova, te ćera šukar buća averenđe hem te ovel amen baro poverenje so o Jehova ka ispunini odova so phenđa (w23.12 7 ¶16-17).

Ked isi tut disavi kušnja andi koja ukljela tut i dar, ma bistri so o Jehova đanela sova borineja tut hem sar osetineja tut. Na primer, o Jehova na samo so dikhlja sar tane o Izraelcija maltretirime ko Egipat, već dikhlja hem olengi dukh (Izl. 3:7). Šaj tano amenđe pharo te dikha sar o Jehova pomožini amen. Odolese, molin tut e Jehovase te dikhe sar pomožini tut (2. Kralj. 6:15-17). Palo odova, razmislin ando akala pućiba: „Da li disavo govor ja komentari ko sastanko ohrabrinđa man? Da li disavi publikacija, video ja disavi savremeno đili ohrabrinđa man? Da li neko phenđa maje disavi utešno misao ja stih?“ But tano lokho te bistra sar pomožinđe amen amare phralja hem phenja hem i duhovno hrana. Ama, on tane baro poklon ando Jehova (Is. 65:13; Mar. 10:29, 30). On mothovena so o Jehova brinini pe amendar hem so ov zaslužini te ovel amen poverenje upro leste (Is. 49:14-16; w24.01 4-5 ¶9-10).

Hari angleder te irini pe ko nebo, o Isus setinćerđa pe učenikonen so ka valjani te propovedinen „ko Jerusalim, ki celo Judeja hem Samarija, hem sa đi o najdur thana ki phuv“ (Dela 1:8; Luka 24:46-48). Hari palo odova, o jevrejska religiozna vođe ćhivđe ko phanlipe e Petare hem e Jovane hem legarđe len anglo Sinedrion. On zabraninđe lenđe te propovedinen hem čak pretinđe lenđe (Dela 4:18, 21). Ama, o Petar hem o Jovan phenđe: „Kokri dikhen da li tano ispravno anglo Devel te šuna tumen, a na e Devle. Amen našti, a te na vaćera ando odova so dikhljam hem so šunđam“ (Dela 4:19, 20). Ked o Petar hem o Jovan hine oslobodime ando phanlipe, o učenikija molinđe pe e Jehovase te del len snaga hem ponodri te ćeren olesi volja. O Jehova uslišinđa odija iskreno molitva (Dela 4:31; w23.05 5 ¶11-12).

Milionija berša, o Jehova hem oleso manglo Ćhavo hine zajedno ko nebo. Sebepi odova, on hine but paše hem but manglje jekh jekhe. O Jehova jasno mothovđa kobor mangela pe Ćhave sar so dikhaja ko lafija ando avdisutno citat. Ov šaj hine samo te phenel: „Akava tano okova kova tano pali mi volja“. Ama, o Jehova manglja amen te đana kobor manglja e Isuse hem odolese phenđa soj tano oleso „manglo Ćhavo“. O Jehova hine ponosno upro Isus, posebno sebepi odova so hine spremno te del po životi amenđe (Ef. 1:7). O Isus niked na sumnjinđa da li oleso Dad mangela le. Ov hine sigurno ko odova. O Isus nekobor putija phenđa so o Jehova mangela le (Jov. 3:35; 10:17; 17:24; w24.01 28 ¶8).

Zamislin akija situacija: Neko kas mangeja vaćeri diso but lošno tutar. Tu đaneja so odova tano hovajbe, ama ipak disave verujinena ko odova. Soj tano pana pološno, odola manuša vaćerena averenđe odova hovajbe hem but avera verujinena ko odova. Sar bi osetineja tut? Ako brinineja tut so ka mislinen o manuša tutar hem da li ka ove ko šukar glaso, odova hovajbe but ka povredini tut. Akava primer šaj te pomožini amen te haljova sar o Jehova osetinđa pe ked oleso anav hine klevetimo. Jekh ando olese anđelija vaćerđa hovajbe olestar e prvo romnjaće, e Evaće. I Eva verujinđa ko odova hovajbe. Sebepi odova, oj hem o Adam pobuninđe pe protiv o Devel. Odolese, sa o manuša tane grešna hem merena (Post. 3:1-6; Rimlj. 5:12). Sa o problemija kola isi ko sveto, sar soj tane o meribe, o ćororipe hem o maribe, postojinena sose o Satana vaćerđa hovajba ko edensko vrt. Da li o Jehova osetini dukh ko vilo sebepi odola hovajba hem o problemija kola anđa odova hovajbe? Naravno! Ama, o Jehova na ićeri i holi. Ov tano „bahtalo Devel“ (1. Tim. 1:11; w24.02 8 ¶1-2).

Sar šaj te oponašine e Josife? Tu šaj akana te odlučine so ka ćere ked ka ove ki kušnja. Sikljov odmah te phene na aso buća kola o Jehova mrzini hem čak ma razmislin olendar (Ps. 97:10; 119:165). Odova ka pomožini tut te na ćere greh ked hijan ki kušnja odolese so već đaneja so te ćere. Šaj đaneja so arakhljan o ćaćipe hem mangeja te služine e Jehovase, ama mislineja so pana na hijan spremno aso predanje hem krštenje. Tegani valjani te ćere odova so ćerđa o kralj David. Šaj ki molitva te phene e Jehovase: „Devla penđar mo vilo hem dikh savo manuš hijum. Ispitin hem dikh me mislija kola uznemirinena man. Dikh isi li ano mande diso so cidela man ko lošno drumo hem legar ma ko drumo andi večnost“ (Ps. 139:23, 24). O Jehova blagoslovini „okolen kola revno rodena le“. Tu mothoveja e Jehovase so revno rodeja le ađahar so deja sa tutar te rese đi o predanje hem o krštenje (Jevr. 11:6; w24.03 6 ¶13-15).

O prvosvešteniko predstavinđa e narodo anglo Devel. Prvo manuš kova služinđa sar prvosvešteniko hine o Aron. O Jehova dinđa le odija odgovornost ked hine posvetimo o sveto šatori. Ama, sar so o apostol Pavle objasninđa, „o meribe ćhinavđa e sveštenikonen trajno te aćhon ki odija služba“ (Jevr. 7:23-26). Isto ađahar, odolese so hine nesavršena, on valjanđe te den žrtve aso pe grehija. Kotar akava dikhaja koja bari razlika hine maškaro izraelska prvosveštenikija hem o Prvosvešteniko, o Isus Hrist. Sar amaro Prvosvešteniko, o Isus Hrist tano „sluga ko [. . .] pravo šatori kova vazdinđa o Jehova, a na o manuš“ (Jevr. 8:1, 2). O Pavle objasninđa so o Isus „živini zauvek, olesi svešteničko služba niko na ka lel.“ O Pavle pana phenđa so ov tano „bizi mana, čisto, odvojimo ando grešnikija“ hem so „na valjani, sar okola avera sveštenikija svako dive te del žrtve“ aso pe grehija (w23.10 26 ¶8-9).

O lafija „okova nebo“ odnosini pe ko politička vladavine upro kola vladini o Satana hem olese demonija (Mat. 4:8, 9; 1. Jov. 5:19). Ki Biblija, o lafi „phuv“ šaj te odnosini pe upro manuša (Post. 11:1; Ps. 96:1). O lafija „okija phuv“ odnosinena pe ko lošna manuša. O Jehova na ka preuredini „o nebo“ hem „i phuv“, već potpuno ka menini len. Ov ka menini o nebo hem i phuv ađahar so ka ćerel „nevo nebo hem nevi phuv“, avere lafencar nevi vladavina hem ki phuv ka živinen pravedna manuša. O Jehova ka obnovini i phuv ađahar so ka ćerel te ovel raj hem ka saćari e manušen. Sar so o Isaija prorekninđa, i phuv ka ovel but šukar than, sar so hine o edensko vrt. Isto ađahar, o manuša ka oven neve, avere lafencar, ka oven potpuno saste. O sakatija, o kašuke, o korore ka oven saste hem čak o mule ka ušten (Is. 25:8; 35:1-7; w23.11 4 ¶9-10).

I „bari nevolja“ ka avel iznenada (Mat. 24:21). Ama, oj ka razlikujini pe ando avera katastrofe odolese so but manuša ka oven spremna. Angleder oko 2 000 berš, o Isus phenđa pe učenikonenđe te spreminen pe aso odova dive. Ako hem amen avdije spreminaja amen asi bari nevolja, ka ovel amenđe polokho te istrajina ked ka avel hem te pomožina averenđe te istrajinen (Luka 21:36). Ka valjani amenđe istrajnost te šuna e Jehova hem te verujina so ov ka zaštitini amen. So ka ćera ako neko kotar amare phralja našalji nekas ja našaljena sa pe materijalna buća? (Avak. 3:17, 18). Tegani ka valjani te mothova saosećanje hem te pomožina amare phralenđe kobor god šaj. So ka ćera ako ka valjani jekh vreme zajedno te živina amare phralencar hem phenjencar odolese so i koalicija ando narodija ka napadini e Jehovase narodo? (Jezek. 38:10-12). Tegani ka valjani te mothova baro mangipe jekh jekhese te šaj te istrajina (w23.07 2 ¶2-3).

O bračna parija šaj but buća te sikljon ando Akila hem i Priskila. Olen but manglje o hrišćanija ko prvo veko (Rimlj. 16:3, 4). Iako i Biblija na vaćeri but buća ando olengo brak, ipak koro late pisini so on uvek zajedno propovedinđe, ćerđe buti hem pomožinđe averenđe (Dela 18:2, 3, 24-26). Ki Biblija o Akila hem i Priskila uvek pominena pe zajedno. Sar šaj o bračna parija te oponašinen len? Razmislin ando but buća kola tu hem to bračno drug valjani te ćeren. Da li šaj odova te ćeren zajedno, umesto te ćeren odvojeno? Na primer, o Akila hem i Priskila zajedno đelje ki služba. Da li hem tumen isi tumen disave zajednička planija asi služba? Isto ađahar, o Akila hem i Priskila zajedno ćerđe buti. Tu hem to bračno drug šaj nane tumen isto buti, ama šaj li zajedno te ćeren o buća ko ćher? (Prop. 4:9). Ked pomožinena jekh jekhese ko akala buća, tumen šaj te osetinen tumen sar tim hem šaj te ovel tumen pobuter vreme te vaćeren jekh jekheja (w23.05 22-23 ¶10-12).

Svako amendar podijekh puti darala. Na primer, ked o kralj Saul manglja te mudari e Davide, ov odlučinđa te našel ki diz Gat. Sigate palo odova, o Ahis, kova hine kralj ki odija diz, šunđa soj tano o David moćno ratniko kova mudarđa „desetine hiljada“ Filistejcen. Odolese, o David „but darandilo“ (1. Sam. 21:10-12). Ov brininđa pe so o kralj Ahis akana ka ćerel lese. So pomožinđa e Davidese te pobedini pi dar? O 56. psalam mothovi sar osetinđa pe o David đi hine ko Gat. Amen dikhaja so darandilo, ama isto ađahar hem sar pobedinđa pi dar. Ked darandilo, ov uzdajinđa pe ko Jehova (Ps. 56:1-3, 11). Ov hine le šukar razlog te uzdajini pe ko Jehova. Ki akija situacija, o David ćerđa diso neobično. Ov ćerđa pe soj tano dilino hem uzi Jehovasi pomoć oleso plan uspinđa. Sebepi odova, o kralj Ahis umesto te mudari le, ov mukhlja le te đal hem ađahar ov našlja (1. Sam. 21:13–22:1; w24.01 2 ¶1-3).

Koj tane okola so pominena pe ko avdisutno stiho? O pomazanikija kola ka uskrsninen. Ked o poslednjo pomazaniko ka đal ko nebo, hari angleder te završini pe i bari nevolja, jekh ando olengo prvo zadatko ka ovel te borinen pe. Razmislin akalestar. Ki phuv, disave pomazanikija tane phure, čak naborme. Ama, ked ka đan ko nebo, on ka oven moćna hem besmrtna stvorenja kaso zadatko ka ovel te borinen pe zajedno pe moćno Kraljeja, e Hristeja. Palo Armagedon, on zajedno e Isuseja ka pomožinen e manušenđe te oven savršena. Tegani, on šaj te pomožinen pe phralenđe hem phenjenđe kotar nebo pobuter nego so šaj hine te pomožinen len ked hine nesavršena manuša (w24.02 6-7 ¶15-16).

Disave tane spremna aso predanje hem krštenje, ama ipak darana. Sose? On šaj pućena pe: „So ako ka ćerav disavo ozbiljno greh hem ka ovav isključimo?“ Ako isi tut asavki dar, ov uverimo so o Jehova ka del tut sa so valjani tuće te ićere tut ko olese merilija „te šaj te [ćere] le te ovel bahtalo“ (Kol. 1:10). Isto ađahar, ov ka del tut snaga te ćere odova soj tano ispravno. Ov mothovđa so šaj te ćerel odova sose butenđe pomožinđa (1. Kor. 10:13). O Jehova pomožini pe slugenđe te aćhon lese verna, odolese samo hari manuša tane isključime. Svako nesavršeno manuš šaj te avel ki situacija te ćerel odova soj tano pogrešno (Jak. 1:14). Ama, tu kokri odlučineja so ka ćere ked hijan ki kušnja. I činjenica tani so tu isi tut kontrola upro to životi. Disave manuša phenena so našti te kontrolišinen odova sar osetinena pe ili so ćerena, ama odova nane tačno. Tu šaj te kontrolišine te pogrešna želje (w24.03 5 ¶11-12).