Декабрё

О Иисусо ԥэндя, кай во, сар пастухо, ай лэстирэ ученикоря, сар бакрорэ (Иоан. 10:14). И кадэва примеро драго поджал. И бакрорэ ӷанэн пэстирэ пастухос и ӷатярэн лэско ӷолосо. Акэ со пала када росԥэнэн ек мануш: «Амэ камлям тэ злас по видео дэсавэ бакрорэн и ақардям лэн каринг пэстэ. Но вонэ на авелэ, важ кода кай на ӷанэн амарэ ӷолосоря. Но потом поджыля ек тэрно пастушочко, ақардя лэн каринг пэстэ и вонэ сразу авелэ». Кадэва случаё напоминает амэнди лэ Иисусостирэ алава, савэ во ԥэндя пала пэстирэ ученикоря: «Вонэ ашунэна мэрно ӷолосо». Но о Иисусо по нэбо. Сар тоди амэ можэм тэ ԥэнас, кай ашунас лэс? Амэ сыкавас, кай ашунас лэ Ӷосподиноско ӷолосо, кала жувас кадя, сар во сытярэлас (Матф. 7:24, 25). w21.12 16, абз. 1, 2

Варикала о апостало Павло холяса ӷонияс лэ христианонэн. Но потом во прижангля, кай сас нэправо и полностью паруделя (1 Тим. 1:12—16). Лэ Дэвлэстирэ зорэса о Павло ашэля любящё, смирено барэдэр ԥрал, саво полэлас и жалуияс аврэн. Кала во гиндояс пала кода, со терэлас най кадя, во на шолас пэ када бари сама и патялас, кай о Иегова лэс простия (Рим. 7:21—25). О Павло на аштярэлас, кай авэла совершэно. Но пристолас вся пэско зор, кай тэ сытёл лэ Иисусостар и мангэлас лэ Иеговастар помощь андэ служэния (1 Кор. 9:27; Флп. 4:13). Сости можно тэ сытён? Если лэ ԥралэс назначают барэдэрэ ԥралэса, када на сыкавэл, кай во совершэно. О Иегова аштярэл, кай во лэла тэ прижанэн пэстирэ ошыбки и тэ пристол зор, кай тэ сытёл лэ Иисусостар (Эф. 4:23, 24). О барэдэр ԥрал трэбуй драго тэ уӷанэн и Библия, кай тэ полэл, андэр со инке лэсти трэбуй тэ парудёл. Тоди о Иегова поможыя, кай во тэ авэл инке май бахтало и кай лэстэ вся тэ вижал (Иак. 1:25). w22.03 29, 30, абз. 13—15

Со тэ терэн, если тумэ полинэ, кай тумэндэ исин привычка тэ сындон аврэн? Сэрэн, кай и христианоря трэбуй тэ любин лэ ԥралэн и лэ ԥэян (Иак. 2:8). Анда оди мангэн лэ Иеговас тэ поможый тумэнди тэ парашэн тэ сындон, ай потом терэн кадя. Например, пэрви пашон кай кодэва мануш, пала кастэ тумэ вэрыто гиндонас. Ақарэн лэс андэ служэния или кай вмести тэ побэшэн тэ хан, тэ пэн. Кай инке май драго тэ уӷанэн лэ ԥралэс, терэн кадя жэ, сар о Иегова и о Иисусо, и родэн варисо лашо андэр лэстэ. Кадя тумэ сыкавэна, кай ашунэн лэ лашэ пастухос, саво приԥэндя тэ парашэн тэ сындон. Сар и бакрорэ ашунэн лэ пастухоско ӷолосо, кадя и лэ Иисусостирэ ученикоря ашунэн лэс. Нэ важно, сави амэндэ надежда, тэ жувас по нэбо или пэ ԥув, всаворэ амэ трэбуй тэ ашунас лэ лашэ пастухоско ӷолосо и тэ кандас лэс (Луки 12:32; Иоан. 10:11, 14, 16). w21.12 19, абз. 11; 21, абз. 17, 18

Кала о Ровоамо ашэля царёса андо Израилё, о народо мангля лэс тэ на дэл лэнди кадя бут бути, сар када терэлас лэско дад о Соломоно. Спэрва о Ровоамо тердя годявэрнэс и пушля совето кай и ԥорома. Вонэ ԥэндэ лэ царёсти, кай, если во стерэла кадя, сар мангэл о народо, тоди всаворэ мануша лэна тэ служын лэсти (1 Цар. 12:3—7). Но лэ царёсти када най фартэ чалеля. Важ када о Ровоамо пушля совето кай пэстирэ друӷоря, савэнца вибареля. Вонэ ԥэндэ, кай о во тэ дэл лэ манушэнди инке май бут бути (1 Цар. 12:9—11). О Ровоамо моӷ спэрва тэ пушэл кай о Иегова, сави ришэния во трэбуй тэ прилэл. Но во када на стердя и приашунделя каринг пэстирэ ровэсникоря. Кадэя ришэния андя бари бида и лэ царёсти, и всаворэ́ народости. Сости амэ сытювас? Най кажно совето чалёла амэнди, но если во дэлпэ па Библия, амэ трэбуй лэс тэ прилас. w22.02 9, абз. 6

О мануш, саво сэжо и на заваздэл о шэро, на лэла тэ гиндой пала тэрнорэ, кай вонэ нисо на ӷанэн и на полэн. Наоборот, кацаво мануш диқэл, кай лэндэ исин бут зор и вонэ бут со моӷут тэ стерэн. И во на гиндой, кай и тэрнэ ԥрала камэн тэ авэн май лашэ аврэндар, ай наоборот, во камэл тэ терэл лэнца ек дила. Ԥрала и ԥэя, савэ андэ бэршэндэ, ԥэнэн, кай и май тэрнэ андэ собрания важ лэндэ, сар блаӷословения, и вонэ фартэ блаӷодарни лэ Иеговасти пала лэндэ! Вонэ полэн, кай лэндэ ужэ нинай скати зор, важ када вонэ цэнин лэ тэрнорэ ԥралэн и ԥэян, кай вонэ камэн тэ терэн май бут дила андэ собрания и андэ служэния. Погиндосарам пала Ноеминь, пала сави пистромэ андэ Библия. Вой тожэ сас ужэ андэ бэршэндэ, но дицолас, кай вой сас блаӷодарно тэ прилэл и помощь лэ май тэрнэндар. Спэрва и Ноеминь ԥэнэнас, кай латири бори и Руфь, савятэ муля о хулай, тэ рийпэ каринг пэско народо. Но и Руфь на камэлас тэ ашавэл ла и ԥэндя, кай жала ласа андо Вифлеемо. И Ноеминь фартэ сас блаӷодарно, кай латири бори кадя ла подритярэлас и на ашадя ла (Руфь 1:7, 8, 18). Кадя кадэлэ манушняндэ заляпэ нэви бахтали жызня! (Руфь 4:13—16). И ԥрала и ԥэя, савэ андэ бэршэндэ и савэ най ӷорди, лэна тэ терэн кадя, сар и Ноеминь. w21.09 10, 11, абз. 9—11

Амаро небесно Дад полэл, кай кажнонэстэ андар мэндэ разни ситуацыи. Возможно, ту можэш тэ терэс май бут, чем тирэ друӷоря. Ай можэт наоборот, через о найлашо зор, ԥурэ бэрша или бут дила андо ери, тутэ на вижал тэ терэс кадя бут, сар камэлпэ. Но на умэк и вас (Гал. 6:4). О Иегова никала на бистрэла, со ту терэс важ лэстэ. Если ту всаворэ одеса отдэс лэсти со май лашо, во фартэ радуийпэ. О Иегова диқэл тиро ди, со ту камэс тэ терэс. Во камэл, кай ту тэ авэс бахтало, кала терэс кода, со па тиро зор. Амэ ӷанас, кай амаро небесно Дад обязательно поможыя амэнди, если авэла ԥари ситуацыя, и кадэлэстар ашэл спокойно по ди (Ис. 41:9, 10). Кадяжэ, сар и о апостало Иоанно, амэ камас тэ ԥэнас лэ Иеговасти: «ту достойно тэ прилэс слава и честь, важ кода кай ту вся создал» (Отк. 4:11). Важ када тэ тэлювас лэсти важ амэндэ бари бах! w22.03 24, абз. 16; 25, абз. 18

Амэ на трэбуй тэ умэкас и вас, если амэндэ на вижал андэ вся тэ терас точно кадя, сар о Иисусо (Иак. 3:2). О мануш, саво кати ля тэ рисуий, нэ можэт сразу тэ ашэл ашунгло художнико. Но если во сытёл пэ пэстирэ ошыбки и старыийпэ тэ шолпэ пэ учителёря, лэстэ вижала шукарнэс тэ рисуий. Када жэ можно тэ ԥэнас и пала амэндэ. Если амэ прилас кода, со уӷанас пэ лично изучения, и терас вся, кай тэ парудювас, тоди амэндэ вижала тэ жувас па лэ Иисусоско примеро (Пс. 119:59). Адес андэ кадэя люма фартэ бут мануша гиндон кати пала пэстэ, но лэ Дэвлэско народо совсем авэр. Амэ камас тэ сытювас лэ Иисусостар и тэ жас пэ жэртвы важ авэр (1 Пет. 2:21). Кала амэ, сар о Иисусо, жас пэ жэртвы важ авэр, тоди о Иегова абурой амэнца. Тэ ӷанас када — фартэ бари бах! w22.02 24, абз. 16; 25, абз. 18

О Иегова дэл пэско руковоцтво через и Библия. Если амэ витидас время, кай драго тэ розмышляем пала кода, сости сытярэл о Иегова, амэ аваса ӷотови тэ прилас лэско руковоцтво и тэ поможысарас лэ манушэнди тэ ашэн ученикоря (1 Тим. 4:15, 16). Инке о Иегова руководий пэстирэ народоса через «о кандино и годявэрно рабо» (Матф. 24:45). Можэт тэ авэл кадя, кай о рабо дэла кацаво руковоцтво, саво амэнди авэла нэпонятно. Например, погиндосарам пала тревожно чемоданчико. И ԥрала моӷут тэ ԥэнэн амэнди тэ подӷотовимся каринг и природно бида, сави, сар амэнди здэлпэ, никала на авэла пэ амарэ краёря. Со амэнди поможыя, если здэлпэ, кай о руковоцтво най фартэ годявэрно? Амэ можэм тэ погиндосарас пала лэ Иеговастирэ служытеля, савэ приашунделэ каринг лэ Дэвлэско руковоцтво, саво спэрва, можэт, сас нэ понятно, но потом спасысардя лэндири жызня (Суд. 7:7; 8:10). w22.03 18, 19, абз. 15, 16

О Иисусо ӷанэнас, кай ек о Иегова можэт тэ ришый, со лэса авэла англэ. И во патялас, кай лэско Дад никала на бистрэла пала лэстэ. Важ када во ԥэндя и алава, савэ запистромэ андо адесутно стихо. Сости амэ сытювас анда лэ Иисусостирэ алава? Отдэ пэстири жызня лэ Иеговасти андэ вас. Важ када трэбуй анда вся оди тэ патяс лэ Иеговасти (Прит. 3:5). Уӷанам пала ԥрал Джошуа, савэсти сас кати 15 бэрш, кала во муля лэ насвалимастар, саво на виличияспэ. Во отԥэнделя, кай лэс тэ личин кодэлэса, со жал против лэ Дэвлэско законо. И англа пэстири смэрть во ԥэндя пэстиря дати: «Мэ отдав пэстири жызня лэ Иеговасти. [...] ...Мамунь, мэ патяв, кай о Иегова рия ман каринг и жызня. Во ӷанэн вся, со мандэ по ди, и ӷанэн, сар мэ лэс дэ фартэ любисарав». Кажно андар мэндэ трэбуй тэ пушэл пэстар: «Ай со если андэ мэрни жызня авэла кацаво, кай манди прижалапэ тэ хасарав и жызня, кай тэ ашавпэ преданно лэ Дэвлэсти. Тоди патява мэ лэ Иеговасти? Отдава мэ пэстири жызня лэ Иеговасти? И патява, кай если мэ отдава мэрни жызня важ лэстэ, во сэрэла пала мандэ и рия ман каринг и жызня?» w21.04 12, 13, абз. 15, 16

О Иегова подритярэл пэско народо через и служэния. Ашунэн амэн андэ служэния и мануша чи на ашунэн, всаек и служэния придэл зор. Дэсавэ ԥрала и ԥэя нэ моӷут бут тэ служын лэ Иеговасти. Если тутэ кадя, тоди ӷан, кай важ о Иегова важно най скати ту терэс андэ служэния, ай кай ту терэс вся, со па тиро зор. Варикастэ можэт найлашо зор и во нэ можэт через када тэ вижал анда цэр. Но о Иегова диқэл, кай кадэва мануш фартэ камэл тэ служый лэсти и цэний када. О Иегова дэла возможность, кай во тэ росԥэнэн кодэлэнди, ко авэл каринг лэстэ, например, лэ врачонэнди. Если вонэ лэна тэ сыстон, сар вонэ варикала служынас и сар акана, тоди вонэ моӷут тэ умэкэн и вас. Но если вонэ лэна тэ шон сама, сар о Иегова лэн подритярэл акана, лэндэ авэла зор, кай тэ виритярэн любо ԥаримос и тэ на парашэн тэ лошавэн. Кала амэ росԥэнас пала Дэл, амэ на ӷанас, ко анда мануша ашунэна амэн, и ко прилэла о чачимос анда Библия (Эккл. 11:6). w21.05 24, 25, абз. 14—17

О Иегова бут со стердя важ о Давидо. Дя лэсти барвалимос и стердя, кай во тэ авэл ашунгло. О Иегова поможыяс лэсти тэ вицэлэл най андэ ек война. О Давидо сас блаӷодарно лэ Иеговасти важ всаворэ блаӷословении. Во дажэ пала лэндэ ԥэндя кадя: «Нащи пэрэадиносарав кода, сар дэ бут лэн» (Пс. 40:5). Но еқвар о Давидо бистэрдя пала вся, со стердя важ лэстэ о Иегова, и змарделя па правильно дром через и жадность. Хоть лэстэ сас най ек хулаи, во всаек закамля чужона хулая ла Вирсавия. Во пэля ласа и вой заԥирдя лэстар. Но инке во стердя кадя, кай латирэ хулас тэ умарэн пэ война! (2 Сам. 11:2—15). Хоть о Давидо на парашэлас тэ служый лэ Иеговасти, во всаек сыкадя пэстири жадность и стердя баро бэзэх. Сар кацаво мануш, сар о Давидо, саво андэ вся ди кандэлас лэ Дэвлэс, моӷ кадя тэ стерэл? Но драго, кай о Давидо поля пэстири ошыбка и каисайля. Во сас фартэ блаӷодарно, кай о Иегова лэс простисардя (2 Сам. 12:7—13). w21.06 17, абз. 10

Возможно, ту пэрэжываешь, кай нэ сможэш драго тэ проандярэс изучения Библии. Дэко можэт тэ гиндой, кай англа кода, сар тэ лэл тэ изучает варикаса и Библия, во спэрва трэбуй екжэно вся драго тэ ӷанэн анда Библия. Если тутэ тожэ кацаво гиндо, тоди на бистэр, кай о Иегова патял, кай тутэ вижала тэ росԥэнэс аврэнди пала лэстэ и тэ проандярэс изучения Библии. Инке трэбуй тэ сэрэс, кай тути кадэя дила дя тэ терэс лэ Дэвлэско Шаво о Иисусо (Матф. 28:18). Кадяжэ тути андэ када поможын о Иегова, и ԥрала, и ԥэя анда собрания. О Иегова росԥэндясас лэ Иисусости, сар тэ сытярэл лэ манушэн. Кадяжэ о Иегова сытярэл и амэн (Иоан. 8:28; 12:49). Инке сар тэ залэс тэ проандярэс изучения Библии тути можэт тэ поможый о барэдэр ԥрал анда тири ӷруппа важ и проповедническо служэния. Инке моӷут тэ поможын и вазвещятеля, савэ драго ӷанэн тэ проандярэн изучения или и пианероря. Манг лэн, кай вонэ тэ ақарэн тут пэса пэ изучения, кай ту лэндар тэ сытёс, сар тэ проандярэс изучения. w21.07 6, абз. 12

Ӥто кадэя найлащи люма на авэла, важ када амэнди фартэ трэбуй тэ доверяем лэ Иеговасти. Васо? Кала авэла и само бари бида, амэнди моӷут тэ дэн указании, савэ, сар можэт тэ здэлпэ, найгодявэрнэ и нэпонятни. Трэбуй тэ полас, кай о Иегова на лэла тэ дэл дума амэнца лично. Наверно, во дэла амэнди указании через и назначени ԥрала. Тоди ужэ на авэла время тэ на допатяс и тэ гиндосарас: «Чаче кадэла указании лэ Иеговастар или и ԥрала ԥэнэн када пэстар?». Сар тумэ андярэна пэс? Лэна тумэ тэ доверяете лэ Иеговасти и лэстиря арӷанизацыяти андэ кодэя важно время? Када зависит кодэлэстар, сар тумэ ужэ акана диқэн пэ ришэнии, савэ прилэн и ԥрала. И если тумэ доверяете кодэлэсти, со вонэ ԥэнэн адес, и сразу жэ када прилэн, тоди, май ӥто всаворэстар, кала авэла и само бари бида, тумэ лэна тэ андярэн пэс кадя жэ. w22.02 6, абз. 15

О Гедеоно и лэстирэ 300 воиноря лэ Иеговастирэ зорэса вицэлдэ и бари война. Авэр пэ лэнго ҭан ужэ ашэлоп ӷорди. И акэ каринг о Гедеоно авелэ и ефремляноря, но най кай тэ поблаӷодарин лэс, кай во вицэлдя и война, ай наоборот тэ дошалярэн лэс, кай пэ война во на ля лэн пэса (Суд. 8:1). Тоди о Гедеоно ԥэндя, кай вонэ лэ Иеговастирэ зорэса тожэ вицэлдэ андэ авэр бари война, и лэнца на сас о Гедеоно. Посли кадэла алава вонэ парашэлэ тэ холявэн (Суд. 8:3). Кала о Гедеоно лэнца дэлас дума лэстэ андэ дума на сас ни ӷрама ӷордость. Кадя во стердя кай машкар о народо тэ авэл мирно. Анда кода сар андярдэ пэс и ефремляноря дицол, кай если о мануш фартэ пэрэжывает со пала лэстэ гиндоя о миро, тоди во можэт тэ бистрэл пала само важно, када кай тэ прославляет лэ Иеговаско алав. Кай о Гедеоно моӷут тэ сытён и хула́я андо ери и барэдэр ԥрала андэ собрания. Если пэр лэндэ варико холяйля, тоди лэнди трэбуй тэ старыинпэ тэ полэн лэ манушэско гиндо. Вонэ моӷут тэ похвалин кадэлэ манушэс, кай во варисо драго терэл. Вонэ трэбуй тэ на авэн ӷорди. И вонэ полэн, кай андэ собрания или андо ери со май ӷлавно, тэ авэл мирно, чем тэ доԥэнэн, кай вонэ прави. w21.07 16, 17, абз. 10—12

О Иегова создал лэ манушэс «кацавэс, сар во». Важ када амэ можэм тэ терас, сар во. Када тэ любисарас аврэн, тэ жалуисарас, тэ авас надёжни и справедливи (Пс. 86:15; 145:17). Кала амэ старысавас тэ терас, сар о Иегова, кадя амэ прославляем лэс и сыкавас, кай блаӷодарни лэсти пала вся (1 Пет. 1:14—16). И кала амэ терас, сар лэсти чалёл, кадэлэстар амэ екжэнэ бахталэ. Инке кала о Иегова амэн создал, во ужэ диқэлас, кай амэ аваса кацавэ мануша, савэн во камэл тэ диқэл андэ пэско ери. О Дэл кадяжэ подарисардя амэнди райкано цэр, када амари Ԥув. Во стердя ла май пэрво, чем лэ манушэн (Иов 38:4—6; Иер. 10:12). О Иегова щедро Дэл, важ када во стердя вся кадя, кай и жызня пэ ԥув тэ анэн амэнди бут радость (Пс. 104:14, 15, 24). И лэ Иеговасти фартэ чалёлас тэ диқэл пэ вся, со во создавал пэ ԥув (Быт. 1:10, 12, 31). w21.08 3, абз. 5, 6

Амэндэ кажнонэстэ исин фартэ важно дила. Када тэ росԥэнас лэ манушэнди пала Дэл и тэ проандярас лэнца и изучения Библии (Матф. 28:19, 20; Рим. 10:14). Камлоп ту тэ сытёс май драго тэ терэс кадэя дила? Тути андэ када поможыя и брашура «Сытю май драго тэ адинос и тэ сытярэс». Кала ту розлэс варисаво уроко андар латэ, тоди старысав тэ прилэс и советоря, савэ котэ пистромэ. Кала ту камэс тэ стерэс варисо важ о Иегова, на бистэр, кай важно кода, кай тэ старыиспэ тэ авэс кацавэ манушэса, саво уӷодий лэ Дэвлэсти (Кол. 3:12; 2 Пет. 1:5—8). Чаче, кажно андар мэндэ камэл тэ терэл важ о Иегова инке май бут, чем можэт щяс. Андо раё пэ ԥув амэ сможэм када тэ стерас. Ай пока на авеля кодэя время, амэ трэбуй тэ цэнисарас вся, со амэ можэм тэ стерас андэ служэния лэ Иеговасти адес. Тоди кажно андар мэндэ авэла май бахтало и на лэла пэрэжывать, кай варисо нэ сможэт тэ стерэл важ о Иегова. И со май важно, сар амэ служысарас анда вся оди, кадя амэ прослависарас лэ Иеговас, амарэ «бахталэ Дэвлэс» (1 Тим. 1:11). И тоди амэ ласа тэ лошавас всаворэсти, со амэ можэм тэ терас важ о Иегова! w21.08 24, 25, абз. 18—20

Если ту барелян андо ери, кай всаворэ сас лэ Иеговастирэ свидетеля, тоди ту жы бэятостар ӷанэс пала Иегова. И родителя тути росԥэнэнас, кай во вся создал, ай кадяжэ саво во, и саво лашымос во стерэла англэ важ и мануша (Быт. 1:1; Деян. 17:24—27). Но дэсавэ най просто на патян, кай о Иегова вся создал, но и на патян, кай во вообще исин. Вонэ гиндон, кай спэрва и жызня ляпэ корко пэстар и потом через и эволюцыя появисайля вся пэ люма. Дэсавэ анда кадэла мануша фартэ ӷрамотни и вонэ камэн тэ доԥэнэн, кай кода со пистромэ пала наука андэ Библия най чачимос. И андэ кода, кай исин Создателё патян кати, кодэла, ко всаворэсти патял и ко найгодявэрно. Скати бэрша амэ тэ на служысарас лэ Иеговасти, всаворэ амэ трэбуй тэ виарақас, со доԥэнэн, кай Иегова вся создал. Тоди амэн нисо и нико на змарэла «через и мудрость кадэлэ миростири и через хохавни и йвутни дума» пала Библия (Кол. 2:8). w21.08 14, абз. 1—3

О Авелё, о Ноё, о Авраамо и о Иово любинас лэ Иеговас и стонас патив пэр лэстэ. Сар када дицолас? Вонэ патянас андэр лэстэ, кандэнас лэс и анэнас лэсти жэртвы. Амэ можэм тэ авас уверени, кай вонэ стонас пэр лэстэ бари патив и лэндири поклонения сас уӷодно лэ Дэвлэсти. Потом о Иегова дя лэ Авраамостирэ потомконэнди лэ Моисеёско законо, кай росԥэнэнаспэ, сар трэбуй тэ тэлён лэ Иеговасти. Кала о Иисусо муля и рисайля каринг и жызня, лэ Иеговастирэ служытеля ужэ на трэбуй сас тэ жувэн па лэ Моисеёско законо (Рим. 10:4). О Иегова дя лэ манушэнди авэр законо — «лэ Христоско законо» (Гал. 6:2). Андэ кадэва законо нинай бут правила, со можно тэ терэн, ай со най. И христианоря трэбуй тэ сытён лэ Иисусостар и тэ жувэн кадя, сар во сытярэлас. Адес амэ тожэ радосарас лэ Иеговас, кала анда вся оди служысарас лэсти и старысавас тэ сытювас лэстирэ Шавэстар. Кадэлэстар амэ лас зор (Матф. 11:29). w22.03 20, 21, абз. 4, 5

О Иегова виашунэн пэстирэ бэятонэн. Кала о Иисусо сас пэ ԥув, во вся и время мангэласпэ лэ Иеговасти, ай о Иегова драго ашунэнас. О Иегова ашунэнас пэстирэ Шавэс, кала во мангэласпэ, кай тэ витидэл 12 апосталонэн (Луки 6:12, 13). Кадяжэ о Иегова ашунэнас лэ Иисусостири молитва, кала во андо ԥаро маменто андэ пэстири жызня росԥэнэнас пала пэстирэ пэрэжывании. И рят англа пэстири смэрть, кала лэс придинэ, о Иисусо всаворэ одеса мангэласпэ пэстирэ Дадэсти, кай во тэ дэл лэсти зор тэ виритярэл о ԥаримос, саво лэстэ авэла англэ. О Иегова най кати виашундя лэ Иисусостири молитва, но и бишалдя лэ анӷелос, кай тэ подритярэл лэс (Луки 22:41—44). Кадяжэ и адес о Иегова ашунэн, кала лэстирэ служытеля мангэнпэ лэсти. Во дэл май лашо атвето, чем амэ лэстар када манглям и дэл атвето андэ кодэя время, кала када трэбуй (Пс. 116:1, 2). Ек ԥэй анда Индия пала вся фартэ пэрэжывала и лати сас най спокойно по ди. Вой всаворэ одеса мангэлас лэ Иеговас тэ поможый лати. Вой диқля о Бродкастинго пала маё 2019 бэрш. Котэ ԥэнэнаспэ, сар тэ улас пэстар и пэрэжывании. И ԥэй ԥэнэн, кай во сас, сар важ латэ, и када сас атвето пэ латирэ молитвы. w21.09 21, 22, абз. 6, 7

Прецтавьте, сар дэ ԥарэс сас лэ христианонэнди андо пэрво вико вся тэ ашавэн и тэ жувэн по нэво ҭан. Вонэ трэбуй сас тэ надеинпэ по Иегова, кай во дэла лэнди вся, со трэбуй важ и жызня. Важ и панч бэрш жы каринг кода, сар и римляноря тэ дэн по Иерусалимо, о апостало Павло дя лэ евреёнэнди лашо совето: «Мэк андэ тумари жызня на авэла любовь каринг и ловэ. Авэн лошалэ кодэлэсти, со исин, важ кода кай во ԥэндя: „Никала на ашавава тут и никала на мэкава тут“. Важ када амэ би дарако можэм тэ ԥэнас: „О Иегова мэрно помошнико, на авава тэ дарав. Со стерэла манди о мануш?“» (Евр. 13:5, 6). Кодэлэнди, ко приля лэ Павлоско совето, авелоп май вушэро тэ андярэн просто жызня по нэво ҭан. Вонэ моӷли тэ патян, кай о Иегова заботияпэ пала кода, со лэнди трэбуй важ и жызня. w22.01 4, абз. 7, 9

Кала по мануш ԥэнэн, кай во «полэл и жалуий», кас тумэ пэсти прецтавляете? Можэт, одялэ манушэс, саво добро и поможый аврэнди. Ай можэт, тумэ сгиндон пала самаритянино, пала саво росԥэнэнпэ андэ лэ Иисусостири притча. Во сыкадя пэстири жалость каринг о евреё, пэ саво динэ и бандиторя. Кадэлэ самаритяниности ашэля жалко лэ евреёс, важ кода кай во чуть на муля. И во сыкадя пэстири любовь, кай ля тэ заботийпэ пала лэстэ, хоть во сас най анда лэско народо (Луки 10:29—37). Кадэя притча сыкавэл, со када, кала полэн и жалуин. Точно кадяжэ терэл амаро Дэл. Во кажно дес сыкавэл пэстири любовь каринг амэндэ, кай полэл и жалуий. Андэр со инке дицол, кай о мануш полэл и жалуий аврэн? Кацаво мануш можэт тэ ришый тэ на просытярэл лэ манушэс, саво дошало андэ варисо. И сар ԥэнэнпэ андо Псалом 103:10, о Иегова кадя и обжалпэ пэстирэ служытелёнэнца. Котэ ԥэнэнпэ: «Во на обжалпэ амэнца па амарэ ӷрехоря». Но дэкала можэт тэ авэл и па аврятэ. О Иегова можэт строӷо тэ просытярэл кодэлэс, ко стердя бэзэх. w21.10 8, абз. 1, 2

О Иегова сыкавэл и предано любовь кати каринг пэстирэ служытеля. Пала када андэ Библия пистросардя о царё Давидо и о пророко Даниило. Например, о Давидо ԥэндя: «На параш тэ любис кодэлэн, ко тут ӷанэн»; «О Иегова авэла вся и вечность предано тэ любий кодэлэн, ко дарал лэстар и стол патив» (Пс. 36:10; 103:17). Ай о пророко Даниило ԥэндясас: «Иегова, чачуно и велико Дэл, савэстар даран и стон бари патив, ту зритярэс пэско доӷоворо и предано любис кодэлэн, ко любий тут и жувэл па тиро законо!» (Дан. 9:4). Када сыкавэл, кай о Иегова предано любий пэстирэ служытелёнэн, важ кода кай вонэ ӷанэн лэс, даран лэстар, стон патив пэр лэстэ, любин лэс и жувэн па лэско законо. Кати кацавэ служытелёнэн предано любий о Иегова, и будэр никас! Кала амэ инке на самас лэ Иеговастирэ служытеля, во любияс амэн кадя жэ, сар и всаворэ́ манушэн (Пс. 104:14). Но, кала амэ лям тэ служысарас лэсти, амэ пар пэстэ лям тэ диқас лэстири предано любовь. w21.11 4, абз. 8, 9

Со бы тэ на авэл андэ амари жызня, амэ камас тэ кандас лэ Иисусос. Лэстирэ алава запистромэ андо адесутно стихо. Адес исин рашая, савэ фартэ ашунглэ, и лэн ӷанэн бут миро. И кода, сар и мануша ашунэн лэндирэ проповеди, дэкала, можно тэ ԥэнэс, кай кабута вонэ полэн лэн, сар дэвлэн. Фартэ бут мануша авэн андэ қандиря, тинэн лэндирэ книӷи, пэрэандярэн лэнди фартэ барэ ловэ и патян кажнонэ лэндирэ алавэсти. Кала вонэ лэн диқэн, вонэ кадя фартэ шон сама лэн, кай дажэ, можэт, лэ Иисусос кадя на шутоп сама, сар лэн! Ай со можно тэ ԥэнэс пала чачунэ лэ Иеговастирэ служытеля? Амэндэ кацаво нинай. Да, амэ стас патив пэ барэдэр ԥрала андэ собрания, но о Иисусо драго ԥэндя, кай «тумэ всаворэ ԥрала» (Матф. 23:8—10). Важ када амэ на терас ни анда рашая, ни анда барэдэра анда политика, кай вонэ важ амэндэ тэ авэн, сар дэл. Амэ на ӷуляс андэ политика и на подритярас лэндирэ арӷанизацыи. И кадэлэса амэ совсем на шаспэ ни пэ савэ христиански веры (Иоан. 18:36). w21.10 20, абз. 6, 7

О христианино, саво камэл тэ авэл свынто, на домэкэла, кай варико или варисо тэ одындярэл лэс лэ Дэвлэстар. И важ кода кай амэ ԥэнас пэр пэстэ лэ Иеговастирэ свидетеля, амэ никала на стераса кода, со мэлярдоп лэско свынто алав (Лев. 19:12; Ис. 57:15). И израильтяноря трэбуй сас тэ ритярэн бут законоря, кай тэ прижанэн лэ Иеговас пэстирэ Дэвлэса. Андэ Левит 18:4 ԥэнэнпэ: «Жувэн па мэрнэ законоря и ритярэн мэрнэ заповеди. Мэ Иегова, тумаро Дэл». Дэсавэ анда кадэла заповеди пистромэ андэ 19 ӷлава Левит. Например, андэ стихоря 5—8, 21 и 22 ԥэнэнпэ, сар и израильтяноря трэбуй сас тэ анэн андэ жэртвы лэ жывотнонэн. Если бы о израильтянино жылоп против кадэла алава, кадя во маӷрисардоп кода, со свынто важ о Иегова. Ай со через кадэла алава камэн тэ терэн и христианоря? Сар ԥэнэнпэ андэ Евреям 13:15, амэ камас тэ отдас лэ Иеговасти амари хвала. Када лэс фартэ радуий. w21.12 5, 6, абз. 14, 15

И тэрнэ еря моӷут тэ пушэн совето кай кодэла, кастэ исин састи вера. Например, дэсавэ христиански еря ужэ най ек бэрш служын лэ Иеговасти полновремено. Если тумэ гиндон, со тэ стерэн важ о Иегова, васо бы тэ на пушэн лэндар совето? Кадя тумэ сыкавэна, кай надеинпэ по Иегова (Прит. 22:17, 19). Сэрэн, кай о брако, када райкано подарко лэ Иеговастар (Матф. 19:5, 6). И во камэл, кай о хулай и хулаи тэ авэн бахталэ. Тэрнэ еря, погиндон, пэр со тумэ тратин пэстири жызня? Терэн тумэ вся, со па тумаро зор, кай тэ сыкавэн лэ Иеговасти пэстири блаӷодарность важ лэско лашымос? Дэн дума лэ Иеговаса андэ молитва, изучайте и Библия, кай тэ виарақэн принцыпоря, савэ поджан андэ тумари ситуацыя, ай тоди терэн кадя, сар уӷанглэ. Патян, если андэ тумари жызня авэла ӷлавно и служэния лэ Иеговасти, тоди вой авэла бахтали и лошали! w21.11 19, абз. 16, 18

О Иаково правильно диқэлас пэр пэстэ. Во на гиндояс, кай май лашо аврэ христианонэндар важ кода, кай о Иисусо сас лэско родо и кай лэстэ сас важни задании андэ собрания. Во ԥэндясас, кай вонэ лэстирэ любими, кучутнэ ԥрала (Иак. 1:16, 19; 2:5). Инке во на старыияспэ, кай и мануша тэ гиндон кабута во совершэно. Уроко: амэ всаворэ нэсовершэни. Амэнди на трэбуй тэ гиндосарас, кай амэ май лашэ кодэлэндар, каса изучаем. Васо? Если амэ ласа тэ сыкавас, кай никала нэ ошыбаемся, со тоди гиндоя о изучающё? Кай во никала нэ сможэт тэ уӷодий лэ Дэвлэсти. Важ када смирено прижанэн, кай тумэнди най всегда вушэро тэ прилэн и советоря анда Библия, и росԥэнэн, сар о Иегова поможый тумэнди андэ ԥари время. Кадя о мануш полэла, кай лэстэ тожэ вся вижала андэ служэния лэ Иеговасти. w22.01 11, 12, абз. 13, 14

Со май бут зор амэ ласа тэ пристас, кай тэ гиндосарас, сар о Христос, со май фартэ амэ ласа тэ шаспэ пэр лэстэ (Евр. 1:3). Варико можэт тэ гиндой: «Канешно, о Иисусо совершэно. Ай мандэ никала на вижала тэ авав, сар во!» Если тутэ исин кацавэ гиндоря, шув сама акэ пэр со. Пэрво, амэ самас создани, кай тэ шаспэ по Иегова и по Иисусо (Быт. 1:26). Но тоди амэ трэбуй тэ пушас пэстар: камас амэ када? Если да, тоди андэ варисостэ амэндэ када вижала. Дуйто, о Иегова дэл амэнди пэско свынто духо — само мощно зор андэ люма. Блаӷодаря кадэлэсти ту можэш тэ стерэс кода, пала со дажэ на гиндосарэсас. Трито, о Иегова на аштярэл, кай амэ сразу андэ вся тэ шаспэ по Иисусо. Амаро любящё небесно Дад дя 1 000 лет, кай амэ тэ ашас совершэни! (Отк. 20:1—3). Со тоди амэндар камэл о Иегова? Кай амэ тэ терас вся, со па амаро зор, и тэ надеисавас, кай во амэн подритярэла. w22.03 9, абз. 5, 6

Амэ ашас май пашэ каринг о Иегова най кати кала мангаспэ, но и кала изучаем и Библия и ԥирас пэ собрании. Со поможыя май драго тэ используем кадэя время? Пушэн пэстар: «Со ман отвлекает, кала мэ бэшав пэ собрания или проандярав лично изучения?» Можэт, тумэнди варико звоний или бишалэл сообщении. Адес милионоря мануша дажэ нэ прецтавляют пэстири жызня, если лэндэ на авэла телефоно или авэр электроно устройство. Если тумэ полэн, кай пэ собрания или пэ лично изучения варисавэ гиндоря отвлекают тумэн, мангэн лэ Иеговас тэ поможый тумэнди. Кала исин пэрэжывании, найвушэро пала лэндэ тэ бистрэн и тэ гиндон пала варисо авэр. Но фартэ важно када тэ стерэн. Мангэнпэ, кай о Иегова тэ фэрий най кати тумаро ди, но и годи (Флп. 4:6, 7). w22.01 29, 30, абз. 12—14

О царё Уззия на приля совето. Во зажыля андэ лэ Иеговаско храмо андэ кодэва ҭан, каринг зажанас кати и рашая, и закамля тэ сԥабарэл о фимиамо. И рашая ворта ԥэндэ лэсти: «Уззия, тутэ нинай право тэ сԥабарэс о фимиамо важ о Иегова! Кати и рашая трэбуй тэ сԥабарэн о фимиамо». Если бы во смирено прилиноп о совето и вижылоп анда храмо, о Иегова, наверно, простисардоп лэс. Но о Уззия андярдя пэс совсем па аврятэ. Во на кангля лэ Иеговас и фартэ росхоляйля пэ рашая. Васо о Уззия на приля о совето? Во фартэ бут гиндояс пала пэстэ: хабис, сар царё, во можэт тэ терэл вся, со камэл. Но о Иегова диқэлас пэ када па аврятэ. О царё на кангля лэс и стердя кода, пэр со лэстэ на сас право. Важ када о Дэл бишалдя по Уззия проказа и во «сас прокажонно жы каринг и смэрть» (2 Лет. 26:16—21). Сости амэ сытювас? Если амэнди па Библия сыкавэн, сави ошыбка амэ стердям, трэбуй тэ парудювас. Если амэ када на стераса, то, сави бы важно дила андэ арӷанизацыя амэндэ тэ на авэл, амэ нэ сможэм тэ авас лэ Иеговастирэ друӷоря. w22.02 9, абз. 7

О мануш, саво утидо андэ «пурани личность» гиндой и терэл кадя, сар камэл и ӷрешно тила (Кол. 3:9). Кацаво мануш холинако, нэблаӷодарно, ӷордо и гиндой кати пала пэстэ. Лэсти чалёл тэ диқэл билажавардимос и жэстокость. Да, лэстэ исин дэсавэ лашэ качестворя, и, можэт, лэсти дажэ лажаво, кай во акушэлпэ и терэл найлащи дила. Но тэ парувэл пэстири жызня во на камэл (Гал. 5:19—21; 2 Тим. 3:2—5). Всаворэ амэ нэсовершэни, важ када никастэ андар мэндэ на вижала тэ вишон вся о найлашымос, саво исин андэ годи и андо ди. Дэкала амэ ласа тэ ԥэнас или тэ терас кода, пала со амэн лэла тэ хал и совесть (Иер. 17:9; Иак. 3:2). Но, кала амэ злас и «пурани личность», амэ парашас тэ жувас кадя, сар камэл и ӷрешно тила. Тоди амэ ужэ най андо рабство кай и «пурани личность» (Ис. 55:7). w22.03 3, абз. 4, 5

Барэдэр ԥрала, шон сама по лашымос, саво исин андэ ԥрала и ԥэя. Да, амэ всаворэ нэсовершэни, но кажнонэстэ андар мэндэ исин розлашэ качестворя. Чаче, дэкала и барэдэр ԥрала трэбуй тэ дэн совето лэ ԥралэнди и лэ ԥэянди. Но, кадяжэ сар и о апостало Павло, старыинпэ тэ на шон сама пэ кода, со вонэ терэн най кадя. Само ӷлавно, кай вонэ любин лэ Иеговас, виритярэн о ԥаримос андэ служэния и моӷут тэ стерэн инке бут лашымос. Если и барэдэр ԥрала старыинпэ кадя тэ терэн, тоди и ԥрала и ԥэя полэна, кай лэн любин андэ собрания. Сэрэн, о Иегова на аштярэл, кай тумэ авэна совершэни, но во камэл, кай тумэ тэ авэн верни лэсти (1 Кор. 4:2). Авэн уверени: о Иегова фартэ цэний вся, со тумэ терэн андэ служэния лэсти. Во никала на бистрэла «тумари дила и любовь, сави тумэ сыкадэ каринг лэско алав кодэлэса, кай поможынас и на парашэн тэ поможын лэ свынтонэнди» (Евр. 6:10). w22.03 31, абз. 19, 21