Бахталэ кодэла, ко тэлён лэ «бахталэ Дэвлэсти»
«Бахтало миро, каско Дэл о Иегова!» (ПСАЛОМ 144:15).
1. Васо лэ Иеговастирэ свидетеля бахталэ мануша? (Диқэн и картинка англа статья.)
ЛЭ ИЕГОВАСТИРЭ СВИДЕТЕЛЯ бахталэ мануша. Кала вонэ стидэнпэ пэ собрании чи пэ конӷрессоря, чи тэ хан, тэ пэн, вонэ вся время лошалэ. Васо вонэ бахталэ? Важ кода кай вонэ ӷанэн «бахталэ Дэвлэс» лэ Иеговас, тэлён лэсти и камэн тэ терэн, сар во (1 Тимофею 1:11; Псалом 16:11). О Иегова камэл, кай амэ сар и во, тэ авас бахталэ. О Иегова бут со дэл, кай амэ тэ авас лошалэ (Второзаконие 12:7; Экклезиаст 3:12, 13).
2, 3. а) Со сыкавэл о алав бах? б) Состар амэнди ԥарэс тэ авас бахталэ?
2 Ай ту? Па чачимастэ ту бахтало? Алав бах сыкавэл, кай лэ манушэстэ драго по ди, лэсти чалёл лэстири жызня и во лошало. Андэ Библия пистромэ, кай о мануш па чачимастэ бахтало тоди, кала о Дэл лэсти дэл лашимос. Но андэ кадэла деса тэ авас бахталэ найвушэро. Васо?
3 Лэ манушэсти ԥарэс тэ авэл бахтало, кала лэстэ варисо терэлпэ. Ԥэнаса, кала варико анда чаче мэрэл, кала розжалпэ о ери чи, кала хасарэл и бути. Лэ манушэсти ԥарэс тэ авэл лошало, кала кодэва, ко важ лэстэ куч, будэр най лэ Иеговаско свидетелё. Инке ԥарэс, кала андо ери вся и время ханпэ. Кадяжэ ԥарэс, кала кодэла, каса сытён андэ школа чи терэн бути приасанпэ, чи, кала ӷонин важ и вера и бэшарэн. На бистрэн, кай о Иисус Христос, пала саво андэ Библия пистромэ, кай во «бахтало и фартэ зорало Ӷосподо», камэл кай амэндэ по ди тэ авэл май вушэро и кай амэ тэ авас бахталэ (1 Тимофею 6:15; Матфея 11:28 жы кай 30). Андэ пэстири ашунгли дума по плай о Иисусо ԥэндя, сар тэ авас бахталэ, хоть и амэндэ ԥаримос, кай жувас андэ лэ Сатанаско миро.
БИ ЛЭ ИЕГОВАСКО АМЭ НА АВАСА БАХТАЛЭ
4, 5. Сар тэ виарақас и бах и тэ на хасарас ла?
4 Спэрва андэ пэстири ашунгли дума по плай о Иисусо ԥэндя, со май фартэ трэбуй, кай тэ авас бахталэ: «Бахталэ, ко полэн, кай лэнди трэбуй о Дэл, важ кода кай о царство, саво по нэбо, лэнго» (Матфея 5:3). Кала амэ полас, кай амэнди трэбуй о Дэл, амэ ласа тэ адиносарас и Библия, тэ кандас лэс и стаса пэ пэрво ҭан, кай тэ росԥэнас пала лэско алав. Кати тоди амэ аваса па чачимастэ бахталэ, и май фартэ ласа тэ патяс андэ кода, пала со о Дэл дя алав. Ай о «бахтало лашимос, саво амэ аштярас англэ», саво уӷанас анда Библия, дэла амэнди зор (Титу 2:13).
5 Амэ камас тэ авас бахталэ, со бы тэ на авэл андэ амари жызня. Важ када амэнди трэбуй тэ терас вся, кай май драго тэ полас лэ Дэвлэс, сар кодэлэс, каса ладисарас, хас и пас. О апостоло Павло пистросардя: «Лошавэн, кай тэлён лэ Ӷосподости [лэ Иеговасти]. И инке еқвар ԥэнав, лошавэн!» (Филиппийцам 4:4). Кала амэ камас тэ авас май пашэ каринг о Иегова, тоди амэнди трэбуй лэстири мудрость. Андэ лэ Дэвлэско алав ԥэнэнпэ: «Бахтало мануш, саво виарақля и мудрость и о мануш, саво сытёл, кай бут со тэ полэл... Вой ла жызнятири витка важ кодэла, ко хутилдёл пала латэ, и пэ кодэла, ко састэс ритярдёлпэ пала латэ, ԥэнэна, кай вонэ бахталэ» (Притчи 3:13, 18).
6. Со лэ манушэсти трэбуй тэ терэл, кай тэ ашэлпэ бахтало?
6 Но кай вся и время тэ авас бахталэ, трэбуй най кати тэ адиносарас лэ Дэвлэско алав, ай и тэ терас, сости сытювас котар. О Иисусо шутя сама пэ када и ԥэндя: «Тумэ бахталэ, кала ӷанэн када и терэн кадя» (Иоанна 13:17; адиносар Иакова 1:25a). Би кадэлэско нащи тэ уӷанэс лэ Дэвлэс и тэ ашэс па чачимастэ бахтало. Андэ кадэва миро фартэ ԥарэс тэ ашэспэ бахтало, важ кода кай исин бут через со о мануш хасарэл и бах. Акана погиндосарам, пала со инке о Иисусо ԥэндя андэ пэстири ашунгли дума по плай.
ПЭ САВЭ МАНУША ԤЭНЭСА, КАЙ ВОНЭ БАХТАЛЭ?
7. Васо кодэлэндэ, кастэ ровэл оди, вижала тэ авэн бахталэ?
7 «Бахталэ, кастэ ровэл оди, важ кода кай о Дэл улэла лэндири дук» (Матфея 5:4). Хэба ԥэнэса по мануш, савэстэ ровэл оди, кай во бахтало? О Иисусо ԥэндя най пала всаворэ, кастэ ровэл оди. Важ кода кай и бутэ найлашэ манушэндэ ровэл оди, кала лэндэ баро ԥаримос, андэ кадэя «фартэ ԥари время» (2 Тимофею 3:1). Но вонэ на гиндон пала Иегова, ай гиндон кати пала пэстэ. Вонэ на камэн тэ авэн май пашэ каринг о Дэл и важ када лэндэ на вижал тэ авэн бахталэ. О Иисусо дэлас дума пала кодэла, ко полэл, кай лэнди трэбуй о Дэл. Лэндэ ровэл оди, важ кода кай вонэ диқэн, скати мануша на камэн тэ полэн лэ Дэвлэс и на жувэн кадя, сар во камэл. Вонэ полэн, кай вонэ най би бэзэхэско и шылинпэ, и диқэн, саво ԥаримос терэлпэ андэ кадэва миро. О Иегова шол сама пэ мануша, савэндэ па чачимастэ ровэл оди. О Иегова через пэско алав терэл, кай лэндэ тэ авэл май вушэро по ди. Инке терэл, кай вонэ тэ авэн бахталэ и тэ аштярэн англэ о лашимос тэ жувэн вечно пэ ԥув. (Адиносар Иезекииля 5:11b; 9:4c).
8. Сар лэ манушэндэ, савэндэ ковло ди, вижала тэ авэн бахталэ?
8 «Бахталэ, кастэ ковло ди, важ кода кай лэнди ашэлапэ и ԥув» (Матфея 5:5). Сар манушэндэ, савэндэ ковло ди, вижала тэ авэн бахталэ? Кала и мануша уӷанэн о чачимос анда Библия, вонэ парудён. Файма, варикала вонэ найдраго обжанаспэ манушэнца и сас фартэ холинатирэ. Но акана вонэ ашэн «нэвэ манушэса», и сыкавэн пэ дила пэстири бари любовь, полэн и жалуин, терэн лашимос, на гиндон пала пэстэ бут, лэндэ ковло ди, и вонэ ӷанэн тэ аштярэн и на холявэн (Колоссянам 3:9 жы кай 12). Лэндэ андо ди ашэл лашимос, любовь и лошалимос. О Дэл кадяжэ дэл алав, кай кацавэ манушэнди ашэлапэ и ԥув (Псалом 37:8 жы кай 10, 29).
9. а) Сар тэ полас, кай кодэлэнди, кастэ ковло ди, ашэлапэ и ԥув? б) Васо кодэла, «ко фартэ камэл, кай тэ авэл чачимос», авэна бахталэ?
9 Лэ помазанниконэнди, савэ жувэна по нэбо, ашэлапэ и ԥув. Сар када тэ полас? Вонэ лэна тэ правин, сар царёря и рашая (Откровение 20:6). Ай миллионоря кодэла, ко на аштярэл тэ жувэл по нэбо, ашэна би бэзэхэсти и лэна тэ жувэн пэ ԥув вечно. Вонэ ладина машкар пэстэ и лэндэ авэла бах. Пала кацавэ мануша о Иисусо ԥэндя: «Бахталэ, ко камэл и ко фартэ камэл, кай тэ авэл о чачимос» (Матфея 5:6). Кода, кай вонэ камэн тэ ӷанэн лэ Дэвлэс и фартэ камэн, кай тэ авэл о чачимос, лэндэ вижала, кала о Иегова улэла вся о найлашимос (2 Петра 3:13). Андо нэво миро и мануша авэна бахталэ и лэндэ будэр никала на дуқала оди лэ вэрытимастар, саво терэн и найлашэ мануша (Псалом 37:17).
10. Со када тэ жалуис анда вся оди?
10 «Бахталэ, ко жалуин анда вся оди, важ кода кай лэн кадяжэ анда вся оди жалуина» (Матфея 5:7). Кала о мануш жалуий анда вся оди аврэс, во полэл лэс, промэкэл через оди лэстири дук и жалуий, важ кода кай любий. Андэ Библия пистромэ, кай о мануш, саво жалуий анда вся оди, во терэл када най кати андо ди, ай и сыкавэл када пэ дила.
11. Сости амэ сытювас анда притча пала самаритянино, саво терэлас лашимос?
11 Адиносар Луки 10:30 жы кай 37d. Анда лэ Иисусостири притча пала самаритянино, саво терэлас лашимос, драго дицол, сар када тэ жалуис анда вся оди. О самаритянино, саво промэкля через оди лэ манушэстири дук и саво жалуияс анда вся оди, поможысардя лэ манушэсти, савэс помардэ. Посли кода, сар о Иисусо росԥэндя и притча, во ԥэндя: «Жа и тер кадяжэ». Пуш пэстар: «Терав мэ кадяжэ? Промэкав мэ через оди аврэндири дук кадя жэ, сар о самаритянино? Кала аврэндэ ԥаримос, со мэ терав, кай тэ поможысарав лэнди? Ԥэнаса, кодэлэнди, ко ԥуро, ко ԥивло чи лэ бэятонэнди, савэндэ о дад и дэй на тэлён амэнца еқэ Дэвлэсти? Шав сама мэ пэ кодэла, кастэ ровэл оди и терав вся, кай лэнди тэ авэл май вушэро?» (1 Фессалоникийцам 5:14; Иакова 1:27).
Анда вся оди жалуин аврэн и тумэ авэна бахталэ (Диқэн о абзацо 12.)
12. Васо и мануша, савэ жалуин анда вся оди, бахталэ?
12 Васо и мануша, савэ жалуин анда вся оди бахталэ? Кала амэ жалуисарас аврэн анда вся оди, амэ ашас лошалэ, кай дас аврэнди. Кала амэ кадя терас, амэ чалювас лэ Иеговасти (Деяния 20:35; адиносар Евреям 13:16e). Пала мануш, саво поможый аврэнди, о царё Давидо пистросардя: «О Иегова лэла тэ фэрий лэс и фэрия лэстири жызня. Пэ кацаво мануш пэ ԥув ԥэнэна, кай во бахтало» (Псалом 41:1, 2). Сар амэ жалуисарас анда вся оди аврэн, о Иегова жалуий анда вся оди амэн. Кадэлэстар амэ аваса бахталэ вся и вечность (Иакова 2:13).
ВАСО БАХТАЛЭ КОДЭЛА, «АНДЭ КАСТИРЭ ГИНДОРЯ НИНАЙ НИСАВО НАЙЛАШИМОС?»
13, 14. Васо кодэла, «андэ кастирэ гиндоря нинай нисаво найлашимос», бахталэ?
13 «Бахталэ кодэла, андэ кастирэ гиндоря нинай нисаво найлашимос, важ кода кай вонэ диқэна лэ Дэвлэс» (Матфея 5:8). И мануша, савэндэ андэ гиндоря нинай нисаво найлашимос, вонэ камэн тэ терэн кати о лашимос. Кай тэ ашаспэ вужэ англа Дэл, амэнди трэбуй тэ диқас, кай андэ амарэ гиндоря тэ на авэл нисаво найлашимос. (Адиносар 2 Коринфянам 4:2f; 1 Тимофею 1:5.)
14 Кодэлэндэ, андэ кастирэ гиндоря нинай нисаво найлашимос, вижала тэ полэн лэ Дэвлэс, сар кодэлэс, каса ладин, хан и пэн. Андэ Откровения 22:14 пистромэ лэ Дэвлэстирэ алава: «Бахталэ, ко вихаладя пэстири йда». И помазанникоря вихаладэ пэстири йда. Сар када тэ полас? Важ о Иегова вонэ вужэ и во дэл алав, кай тэ умарэн лэн будэр никастэ на вижала. Вонэ авэна вечно лошалэ. Авэр фартэ бут мануша, савэ жувэна пэ ԥув, кадяжэ авэна лашэ андэ лэ Дэвлэстирэ яқа и полэна лэ Дэвлэс, сар кодэлэс, каса ладин, хан и пэн. Андэ Библия пистромэ: «вонэ вихаладэ пэстири йда и випарнярдэ ла андэ лэ бакрорэско рат» (Откровение 7:9, 13, 14).
15, 16. Сар кодэла, «андэ кастирэ гиндоря нинай нисаво найлашимос», диқэн лэ Дэвлэс?
15 «Ни кай ек мануш на вижала тэ диқэл... [лэ Дэвлэс] и тэ ашэлпэ жундо». Тоди, сар кодэла, «андэ кастирэ гиндоря нинай нисаво найлашимос», додиқэна лэс? (Исход 33:20). Андо ӷреческо алав, саво пэрэандярдэ «тэ диқэс», ужал «тэ полэс, тэ гиндос и тэ уӷанэс». Кодэла, ко диқэн лэ Дэвлэс, «лэ одеса» драго ӷанэн лэс и важ лэндэ куч, сар во пэс андярэл (Эфесянам 1:18). О Иисусо андярэлас пэс кадя, сар о Иегова, важ када во ԥэндя: «Ко диқля ман, диқля и мэрнэ дадэс» (Иоанна 14:7 жы кай 9).
16 Кадяжэ амэ диқас лэ Дэвлэс тоди, кала шас сама, сар во поможый андэ амари жызня (Иов 42:5). Инке амэ диқас лэ Дэвлэс, кала гиндосарас акэ пала со. Пала лашимос, саво о Иегова дэла кодэлэнди, ко терэн вся, кай тэ авэн лашэ андэ лэстирэ яқа и на парашэн лэс тэ кандэн. Ай и помазанникоря па чачимастэ диқэна лэ Дэвлэс, кала лэндэ авэла о лашимос тэ жувэн упрэ по нэбо (1 Иоанна 3:2).
БАХТАЛЭ, ХОТЬ И ИСИН ԤАРИМОС
17. Васо ԥэнэса, кай кодэла, ко терэн ладо машкар и мануша, бахталэ?
17 «Бахталэ, ко терэн ладо машкар и мануша» (Матфея 5:9). О Иисусо ԥэндя, кай кодэла, ко терэн ладо машкар и мануша, бахталэ. Лэ Иисусоско ученико Иаково пистросардя: «О лашимос кодэлэстар, кай кандэн лэ Дэвлэс авэла, кала ладин аврэнца и терэн кадя, кай и авэр тэ ладин машкар пэстэ» (Иакова 3:18). Кала амэ на ладисарас варикаса андэ собрания чи андо ери, амэнди трэбуй тэ мангаспэ каринг о Иегова, кай во тэ поможый, кай амэндэ тэ вижал тэ ладисарас аврэнца. Тоди о Иегова дэла амэнди пэско свынто духо, саво поможыя тэ андярас пэс, сар христианоря, кадэлэстар амэ аваса май бахталэ. О Иисусо шутя сама, кай фартэ трэбуй пэрви тэ терас вся, кай упалэ тэ ладисарас. Во ԥэндя: «Кала ту анэса даро каринг о жэртвеннико и котэ тути авэла по гиндо, кай тиро ԥрал холинако пэр тутэ, тоди ашав пэско даро англа жэртвеннико и спэрва жа, поладисар тирэ ԥралэса, ай тоди рисав и ан пэско даро» (Матфея 5:23, 24).
18, 19. Васо и христианоря лошалэ и тоди, кала лэн ӷонин важ и вера?
18 О Иисусо ԥэндя: «Бахталэ тумэ, кала и мануша ԥэнэн найлашэ алава, ӷонин тумэн важ и вера и хохавэн пэр тумэндэ пала мандэ». Во ԥэндя: «Лошавэн и фартэ лошавэн кодэла времятар, кала тумэ линэ тэ аштярэн тэ жувэн по нэбо, важ кода кай кадяжэ ӷонинас важ и вера лэ пророконэн, савэ слинэ май англал тумэндар» (Матфея 5:11, 12). Кала лэ апостолонэн мардэ и лэнди приԥэндэ тэ на росԥэнэн пала Дэл, вонэ «ужылэтар анда синедрионо лошалэ». Васо? Най важ кода, кай лэн мардэ, ай важ кода, кай «лэн лажавардэ важ лэско [лэ Иисусоско] алав» (Деяния 5:41).
19 Адес лэ Иеговастирэ мануша кадяжэ на парашэн тэ лошавэн, кала лэн ӷонин важ лэ Иисусоско алав и кала лэндэ баро ԥаримос. (Адиносар Иакова 1:2 жы кай 4g). Важ амэндэ, сар и важ и апостолоря, о ԥаримос, када най состар амэ лошавас. Но кала андо ԥаримос амэ на парашас тэ кандас лэ Дэвлэс, во поможыя амэнди тэ виритярас лэс. Акэ, со сас лэ Хенрикоса Дорникоса и лэстирэ ԥралэса. Андо августо андо 1944 бэрш, лэн стодэ тэ бэшэн андо ҭан, кай сас фартэ ԥарэс и терэнас фартэ ԥари бути. Кодэла, ко лэн бишалдэ, ԥэндэ: «Нисар на стерэса, кай вонэ тэ парувэн пэстирэ гиндоря. Лэнго ԥаримос анэн лэнди лош». О Хенрико ԥэнэн: «Мэ на камавас, кай тэ авэл мандэ кацаво ԥаримос, но манди па чачимастэ анэнас лош, кала мэ виритяравас о ԥаримос и на даравас, важ кода кай на парашавас тэ кандав лэ Иеговас... Кала мэ анда оди мангаваспэ лэ Иеговасти, тоди мэ ашавас май пашэ каринг лэстэ и мэрно Дэл на парашэлас тэ поможый манди».
20. Васо амэ лошалэ, кай тэлювас лэ «бахталэ Дэвлэсти»?
20 Амэн ӷонин важ и вера, о ери жал против амэндэ, амэндэ варисо най кадя лэ зорэса, чи кала амэ ԥурэ. Но амэ всаек бахталэ. Сар? Кала лэ Иеговасти лэ бахталэ Дэвлэсти чалёл, сар амэ пэс андярас (1 Тимофею 1:11). Амэ кадяжэ бахталэ кодэлэстар, кай о Дэл, саво «никала на хохавэл», дэл алав, кай англэ авэла лашимос (Титу 1:2). Кала о Иегова зритярэла пэско алав, амэ на ласа тэ сэрас пала ԥаримос, саво амэндэ сас. Амэнди и андо шэро на дэл, сави райкани жызня авэла андо нэво миро и савэ бахталэ амэ аваса! Лэ Иеговастирэ мануша, савэ на парашэн лэс тэ кандэн, «чалёна кодэлэстар, кай авэла бут лашимос андо ди и всаворэ ладина ек аврэса» (Псалом 37:11).
a Иакова 1:25: «Ко придиқэлпэ каринг о совершэнно законо, саво одмэкэл анда рабство, и ашэлпэ андэ кадэва законо, и на забистрэл, со ашундя, ай терэл, со андэр лэстэ ԥэнэнпэ, авэла бахтало, сар терэл кадя».
b Иезекииль 5:11: «Ԥэнэн о хулай, Ӷосподо о Иегова: „Жундо мэ. Ту мэлярдян мэрно храмо пэстирэ хохавнэ дэвлэнца и всаворэ́ пэ́стирэ гряцимаса. Важ када мэ стерава, кай тут тэ авэл май набут. На жалуия тут мэрни як и мэ на полава и на жалуисарава тут“».
c Иезекииль 9:4: «О Иегова ԥэндя лэсти: „Прожа па форо па Иерусалимо и сто о знако по чикат кодэлэ манушэнди, савэндэ ровэл оди и савэ ԥарэс ԥурдэн, важ кода кай диқэн вся о гряцимос, саво терэлпэ андо форо“».
d Луки 10:30 жы кай 37: «Но кадэва мануш камэлас, кай авэр тэ ԥэнэн, кай во ритярэл лэ Дэвлэско законо. Во пушля кай о Иисусо: „Ко манди пашэ?“ Пэ лэстирэ алава о Иисусо ԥэндя: „Ек мануш змэкэласпэ анда Иерусалимо андо Иерихоно. Па дром пэр лэстэ динэ и бидаря. Вонэ злинэ пар лэстэ и йда, мардэ лэс и жылэтар. Вонэ ашадэ лэс еле жундэс. Кадя вижыля, кай па кодэва жэ дром змэкэласпэ о рашай. Но кала во додиқля кадэлэ манушэс, пэрэжыля пэ авэр лэ дромэстири риг. Кадяжэ о левито, кала дожыля жы кай кодэва ҭан и додиқля кодэлэ манушэс, пэрэжыля па авэр лэ дромэстири риг. Ай ек, о самаритянино, саво жалас па кодэва дром, додиқля лэс пэ кадэва дром, и лэсти ашэля лэс жалко. Во пашэля лэстэ и пэрэԥангля котэ, кай сас жы ратэстэ помардо. И кала пэрэԥандэлас лэс, шолас пэр лэстэ о вулей и о чыхыри. Тоди во стодя лэс пэ пэско жывотно и андя андо цэр, кай и мануша ашэнаспэ тэ рятярэн, и диқэлас пала лэстэ. Ай пэ авэр дес виля дуй динария и отдя лэ хуласти кадэлэ цэрэско, и ԥэндя: „Дик пала лэстэ, ай сар жана май бут ловэ, мэ потинава тути, кала рисавава“. Сар ту гиндос, ко анда кадэла трин ашэля май пашэ кодэлэсти, кас мардэ и бидаря? Во ԥэндя: „Кодэва, ко жалуисардя анда вся оди“. Тоди о Иисусо ԥэндя лэсти: „Жа и тер кадяжэ“».
e Евреям 13:16: «На бистрэн тэ терэн лашимос и тэ дэн аврэнди. Када чалёл лэ Дэвлэсти».
f 2 Коринфянам 4:2: «Амэ отԥэнделям ла дилатар, савятар лажаво и пала сави авэр на ӷанэн. Важ када амэ нисо на терас лэ хохаимаса и на пэрэбандярас лэ Дэвлэстирэ алава, ай кала росԥэнас о чачимос, андэ лэ Дэвлэстирэ яқа ашас лашэ манушэса важ кажно манушэско ди».
g Иакова 1:2 жы кай 4: «Ԥрала, кала тумэндэ ԥаримос, лошавэн. Важ кода кай ӷанэн, кодэлэстар, кай тумари вера дицэля, тумэ ужэ полэн, сар тэ виритярэн о ԥаримос».