О Исусо ԥаболас лэ Дэвлэстиря диласа. Сытюв лэстар

1. Соса лэ Дэвлэстирэ мануша на шонпэ пэ авэр?

СОСА на шонпэ лэ Дэвлэстирэ мануша пэ кодэла, ко кати ԥэнэн пэр пэстэ христианоря? Вонэ всаворэ́ одеса росԥэнэн пала Дэл и пристон бут зор андэ кадэя дила (Тито 2:14). Но дэкала вобще нинай пэ када охота. Можэт, тирэ одести авэна пашэ еқэ старейшынастирэ алава, саво пристол бут зор андэ дила. Во ԥэнэн: «Дэкала манди прижалпэ тэ застависарав пэс».

2. Васо дэкала амэнди можэт тэ авэл ԥарэс тэ жас тэ росԥэнас важ о Дэл?

² Можэт, авэр дила важ о Дэл тэ терас амэнди чалёл май фартэ, чем тэ росԥэнас пала Дэл. Васо? Важ кода кай амэ можэм сразу тэ диқас, со амэ домарделям. Например, кала амэ строисарас и диқас пала амарэ Залоря, поможысарас кодэлэнди, ко попэля андэ природно бида, или варисар па аврятэ дас помощь, амэндэ можэт тэ авэл по ди, кай амэ стердям бари дила. Кала амэ терас ек дила лэ ԥралэнца и лэ ԥэянца, амэндэ вижал тэ ладисарас и тэ любисарас ек еқэс. Кадяжэ амэ ӷанас, кай аврэнди фартэ куч вся, со амэ терас важ лэндэ. Но инке амэ можэм бэршэнца тэ росԥэнас и лащи новость андэ ек ҭан и амэнди фартэ ридко тэ попэрдён и мануша, савэнди па чачимастэ интересно тэ уӷанэн пала Библия. Ай дэсавэ вобще на камэн амэн тэ ашунэн. И амэ ӷанас: со май набут время ашэлпэ кадэла люмати, со май набут лэла тэ чалёл амари новость лэ манушэнди (Матф. 10:22). Со поможыя амэнди инке май баря хваткаса тэ цырдаспэ тэ росԥэнас важ о Дэл?

3. Со амэ уӷанас пала Исусо анда примеро, саво запистромэ андо Лука 13:6—9?

³ Амэ можэм тэ лас примеро лэ Исусостар андэ кода, сар тэ терас и дила. Во никала на парашэлас тэ росԥэнэн пала Дэл, и со май долӷо во када терэлас, со май бут зор пристолас. (Проадинон Лука 13:6—9.) Во сыстосардя пэс лэ манушэса, саво залэлпэ лэ виноӷрадоса. Кадэва мануш трин бэрш заботияспэ пала инжырово витка и аштярэлас, кай пэр латэ варисо тэ вибарёл. О Исусо тожэ варикай трин бэрш росԥэнэнас лэ евреёнэнди пала Дэл, но май бут андар лэндэ кадя и на ашэлэ лэстирэ ученикоря. О мануш анда примеро на умэкля и вас. Точно кадя жэ и о Исусо на ля тэ гиндой, кай лэ манушэндар на авэла нисаво толко, и на парашэля лэн тэ сытярэл. Андэ пэстирэ послидни шона пэ ԥув во инке май бут ля тэ пристол зор, кай тэ лэл лэ евреёнэн лэ одестар.

4. Со поможыяс лэ Исусости тэ на парашэл тэ росԥэнэн пала Дэл?

⁴ Анда кадэя статья амэ уӷанаса, со поможыяс лэ Исусости хваткаса тэ терэл и дила, особено андо послиднё епаш бэрш пэ ԥув. Если амэ ласа тэ приашундювас каринг лэстирэ советоря и тэ терас сар во, амэ тожэ ласа анда вся ди тэ росԥэнас важ о Дэл. Давайте роздиқаса, со поможыяс лэ Исусости тэ терэл кадэя дила: 1) само важно важ лэстэ сас тэ терэл кода, со камэл о Иегова; 2) во жувэлас кадя, сар май данглал сас пистромэ андэ Библия; 3) во надеияспэ пэ лэ Иеговаско зор; 4) во патялас, кай варико точно приашундёла каринг и лащи новость.

САМО ВАЖНО ВАЖ ЛЭСТЭ САС ТЭ ТЕРЭЛ КОДА, СО КАМЭЛ О ИЕГОВА

5. Пар со дицол, кай важ о Исусо сас само важно тэ терэл кода, со камэл о Иегова?

⁵ О Исусо хваткаса росԥэнэнас «и лащи новость пала лэ Дэвлэско Царство». Во ӷанэнас, кай о Дэл лэс бишалдя ек важ када (Лука 4:43). Кадэя дила важ о Исусо сас по пэрво ҭан андэ жызня. Дажэ англа пэстири смэрть во ԥирэлас «па фороря и па гава и сытярэлас лэ мирос» (Лука 13:22). Кадяжэ во сытярэлас нэвэ учениконэн, кай вонэ тэ росԥэнэн пала Дэл вместе лэса (Лука 10:1).

6. Сави дила важ лэ Иеговаско народо само ӷлавно? (Кадяжэ диқэн и картинка.)

⁶ Адес важ амэндэ нинай нисо май важно, чем тэ росԥэнас и лащи новость. О Иегова и лэско шаво камэн, кай амэ тэ заласпэ имено кадэлэса (Матф. 24:14; 28:19, 20). Авэр дила, сави амэ терас важ лэ Иеговаско народо, сԥангли кодэлэса, кай тэ росԥэнас важ о Дэл. Например, амэ строисарас амарэ Залоря, кай тэ ақарас интя манушэн, савэ камэн вместе амэнца тэ андярэн лэ Иеговастири время. Авэр дила андо Вефилё кадяжэ сԥангли кодэлэса, кай тэ росԥэнас пала Дэл. Ай кала терэлпэ бида, амэ поможысарас лэ ловэнца амарэ ԥралэнди и ԥэянди, кай вонэ май ӥто упалэ тэ терэн лэ Дэвлэстири дила, андэ сави ужал кода, кай тэ росԥэнас важ о Дэл. Если амэ сэрас, кай само важно дила важ о Иегова — када тэ росԥэнас и лащи новость, тоди амэ ласа тэ терас када инке май часто. О Я́нош, старейшына анда Венгрия, ԥэнэн: «О Иегова дэл амэнди тэ терас бут разно дила. Но мэ кажно разо ԥэнав корко пэсти, кай само ӷлавно андар лэндэ — када тэ росԥэнав пала Дэл».

7. Васо о Иегова камэл, кай амэ тэ на парашас тэ росԥэнас и лащи новость? (1 Тимафеё 2:3, 4).

⁷ Со поможыя амэнди хваткаса тэ терас лэ Дэвлэстири дила? Амэнди трэбуй тэ диқас пэ кажно мануш кадя жэ, сар о Иегова. Во камэл, кай со май бут мануша тэ ашунэн и лащи новость и тэ взвинпэ пэр латэ. (Проадинон 1 Тимафеё 2:3, 4.) О Иегова сытярэл амэн май драго тэ терас кадэя дила, важ кода кай и лащи новость можэт тэ спасый лэ манушэс. Например, и брашура «Любин лэ манушэн» поможый амэнди тэ андярас и дума кадя, кай лэ манушэсти тэ закамэлпэ тэ сытёл па Библия и тэ ашэл лэ Исусоско ученико. Дажэ если и мануша на лэна тэ кандэн лэ Иеговас адес, можэт, вонэ закамэна када тэ терэн, кала залэлапэ и само бари бида. Англэ лэнди можэт тэ авэл по гиндо кода, со вонэ ашунэнас амэндар. Но када можэт тэ авэл, если амэ на парашаса тэ росԥэнас пала Дэл.

ВО ЖУВЭЛАС КАДЯ, САР МАЙ ДАНГЛАЛ САС ПИСТРОМЭ АНДЭ БИБЛИЯ

8. Со поможыяс лэ Исусости годяса тэ тратий и время?

⁸ О Исусо полэлас, кай вся ашэла кадя, сар май данглал сас пистромэ андэ Библия. Во ӷанэнас, кай всево трин епашэса бэрш во лэла тэ терэл лэ Дэвлэстири дила пэ ԥув (Дан. 9:26, 27). Кадяжэ во ӷанэнас, кай лэса лэна жэстоко тэ обжанпэ и умарэна (Лука 18:31—34). Во на бистрэлас вся, со сас май данглал ԥэндо пала лэстэ, кочай во годяса тратияс и время. Важ када во на домэкэлас пэсти тэ цырдэл и время и на парашэлас тэ росԥэнэн пала Дэл, кай тэ дотерэл до конца вся, со лэсти сас дино.

9. Сар и Библия поможый амэнди инке май фартэ тэ камас тэ терас лэ Дэвлэстири дила?

⁹ Кода, со сас пистромэ андэ Библия пала амари время, можэт тэ поможый и амэнди тэ на парашас тэ росԥэнас пала Дэл анда вся ди. Кала амэ гиндосарас пала кода, кай ужэ акана вся терэлпэ, сар сас ԥэндо, амэ полас: кадэла люмати ашэляпэ совсем набут время. Андэ Библия точно сас ԥэндо, савэ авэна и мануша андэ послидни деса и со лэла тэ терэлпэ андэ люма. Андэ Библия кадяжэ ԥэнэнпэ, кай о северно царё и о южно царё трэбуй тэ марэнпэ ек еқэса, «кала жана и послидни деса» (Дан. 11:40). Амэ драго полас, кай када сыкавэл пэ Великобритания и США, савэ жан против Россия и против кодэла, ко ла подритярэл. Кадяжэ амэ полас: и талпы кай и бари статуя, пала сави пистромэ андо Даниил 2:43—45, — када и Англо-Американско мирово держава. Амэ патяс, кай ӥто — фартэ ӥто! — лэ Дэвлэско Царство стрия па ԥув всаворэ лэ манушэндирэ правительства. И Библия сыкавэл, кай ашэлпэ мало время, и ӥто кадэя люма будэр на авэла. Вся када придэл амэнди инке май бут зор, кай анда вся ди тэ росԥэнас и лащи новость.

10. Со инке поможый амэнди инке май фартэ тэ камас тэ росԥэнас пала Дэл?

¹⁰ Андэ Библия кадяжэ пистромэ и лашэ новости пала жызня, сави трэбуй тэ авэл англэ, и амэнди фартэ камэлпэ тэ росԥэнас пала када аврэнди. И Кэ́ри анда Даминиканско Республика ԥэнэн: «О Иегова камэл тэ стерэл важ амэндэ райкани жызня. Кадя камэлпэ, кай всаворэ пала латэ тэ уӷанэн!» Инке вой ԥэнэн: «Кай и мануша адес найвушэро жызня. И мэ полав, кай лэнди фартэ трэбуй пала када тэ уӷанэн». Кода, со андэ Библия росԥэнэнпэ пала амари время, поможый амэнди смило тэ дас дума разнонэ манушэнца. Амэ ӷанас, кай када лэ Иеговастири дила. И Лэ́йла анда Венгрия росԥэнэн: «Дэкала манди здэлпэ, кай о мануш на закамэла ман тэ ашунэл. Но мэ старысавав тэ на витидав важ лэстэ. И алава анда Исайя 11:6—9 поможын манди тэ сэрав, кай лэ Иеговастирэ зорэса любо мануш можэт тэ парудёл». О Кри́стаферо анда За́мбия ԥэнэн: «Андо Марко 13:10 сас инке май данглал ԥэндо, кай и лащи новость розжалапэ па вся и люма. Важ мандэ бари бах тэ поможысарав, кай тэ ашэл кадя, сар пистромэ андэ кадэва стихо». Ай савэ лэ Дэвлэстирэ алава пала кода, со трэбуй тэ авэл англэ, поможын тути инке май фартэ тэ росԥэнэс пала Дэл?

ВО НАДЕИЯСПЭ ПЭ ЛЭ ИЕГОВАСКО ЗОР

11. Васо лэ Исусости трэбуй сас тэ надеийпэ по Иегова, кай тэ на парашэл тэ терэл и дила? (Лука 12:49, 53).

¹¹ О Исусо патялас, кай о Иегова поможыя лэсти тэ на парашэл хваткаса тэ терэл и дила. Хоть о Исусо всегда обжаласпэ аврэнца пативалэс, во ӷанэнас, кай и лащи новость пала Царство най всаворэнди чалёла. Варикас вой холярэла, ай варико дажэ закамэла ла тэ тердярэл. (Проадинон Лука 12:49, 53.) И священикоря и законикоря вэрыцынас кода, со ԥэнэнас о Исусо, и най еқвар камэнас лэс тэ умарэн (Иоан. 8:59; 10:31, 39). Но лэ Исусос када на тердярдя, важ кода кай во ӷанэнас: о Иегова лэса. Во ԥэндя: «Мэ най екжэно, но манца о Дад, саво ман бишалдя. [...] Во на ашадя ман екжэнэс, важ кода кай мэ вся и время терав кода, со лэсти уӷодно» (Иоан. 8:16, 29).

12. Сар о Исусо поможысардя лэ учениконэнди тэ авэн ӷотови, кай андэ ԥари время вонэ тэ на парашэн тэ росԥэнэн важ о Дэл?

¹² О Исусо най еқвар ԥэнэнас лэ учениконэнди, кай о Иегова лэла тэ дэл лэнди помощь. Кадяжэ во шолас сама, кай о Иегова лэла тэ поможый лэнди, дажэ кала лэн лэна тэ ӷонин (Матф. 10:18—20; Лука 12:11, 12). Инке во ԥэнэнас лэ учениконэнди тэ фэринпэ и тэ авэн осторожни (Матф. 10:16; Лука 10:3). Во сытярэлас лэн, кай вонэ никас тэ на заставин тэ ашунэл пала Царство (Лука 10:10, 11). Кадяжэ во ԥэндя лэнди тэ нашэн, если лэн залэна тэ ӷонин (Матф. 10:23). Хоть о Исусо ԥаболас ла диласа и патялас, кай о Иегова лэсти поможыя, во на ӷулелас евья по ҭув (Иоан. 11:53, 54).

13. Васо амэ можэм тэ патяс, кай о Иегова поможыя амэнди тэ росԥэнас пала лэстэ?

¹³ Адес амэнди най везде дэн спокойно тэ терас лэ Дэвлэстири дила (Тайна 12:17). Важ када амэ на обжасапэ би лэ Иеговастирэ зорэско. Васо амэ можэм тэ патяс, кай о Иегова амэн подритярэла? Шам сама пэ лэ Исусостири молитва, сави запистромэ андэ 17-то ӷлава Иоано. О Исусо мангля лэ Иеговас, кай во тэ фэрий лэ апосталонэн. И о Иегова ответил пэ лэстири молитва. Андэ книжка Дила най еқвар запистромэ, сар о Дэл поможыяс лэ апосталонэнди хваткаса тэ росԥэнэн пала лэстэ, хоть лэн фартэ ӷонинас. О Исусо андэ пэстири молитва мангля лэ Иеговас тэ фэрий най ек лэ апосталонэн, но и кодэлэн, ко патяла лэстирэ алавэнди. Ай значит, и тут. Кодэла времятар нисо на паруделя: сар о Иегова поможыяс лэ апостолонэнди, во поможыя и тути (Иоан. 17:11, 15, 20).

14. Васо амэ тэ патяс, кай нисо на тердярэла амэн тэ росԥэнас важ о Дэл? (Кадяжэ диқэн и картинка.)

¹⁴ Со май пашэ авэла каринг о Армагедоно, со май ԥарэс амэнди авэла тэ росԥэнас пала Дэл. Но о Исусо ԥэндя, кай амэндэ авэла помощь, кай и май дур хваткаса тэ терас кадэя дила (Лука 21:12—15). Кадя жэ сар о Исусо и лэстирэ ученикоря андо пэрво вико, амэ дас лэ манушэнди тэ витидэн — тэ ашунэн амэн чи най. Амэ на ӷуляс никаса тэ спорисавас. Андэ дэсавэ страны и ԥрала и ԥэя не моӷут свободно тэ росԥэнэн и лащи новость. И всаек вонэ на парашэн тэ дэн дума лэ манушэнца пала Дэл, важ кода кай надеинпэ най пэр пэстэ, ай пэ лэ Иеговаско зор. О Дэл подритярэлас пэстирэ народос андо пэрво вико. Во дэла зор амэнди, кай амэ тэ стерас кодэя дила, сави во амэнди дя (2 Тим. 4:17). Амэ можэм тэ патяс: если надеисавас по Иегова, нисо на тердярэла амэн тэ терас лэстири дила.

ВО ПАТЯЛАС, КАЙ ВАРИКО ТОЧНО ПРИАШУНДЁЛА КАРИНГ И ЛАЩИ НОВОСТЬ

15. Пар со дицолас, кай о Исусо диқэлас пэ пэстири дила лащя ригатар?

¹⁵ О Исусо на парашэлас тэ патял, кай варико точно лэла тэ приашундёл каринг и лащи новость. Када поможыяс лэсти тэ на тердёл пэ ек ҭан и тэ на парашэл анда вся ди тэ росԥэнэн пала Дэл. Например, акэ со тердяпэ андо 30 бэрш андэ амари эра. О Исусо додиқля, кай бутэ манушэнди чалёл лэс тэ ашунэн, и сыстосардя лэн лэ малянца, пэ савэ спилосайля о зэрно (Иоан. 4:35). Варикай через бэршэстэ во ԥэндя лэ учениконэнди: «Пэ мал баро урожаё» (Матф. 9:37, 38). Май интя во инке еқвар ԥэндя: «Пэ мал баро урожаё... важ када мангэн ла малятирэ Хулас тэ бишалэл май бутэ манушэн тэ стидэн о урожаё» (Лука 10:2). О Исусо патялас, кай авэна кодэла мануша, савэ прилэна и лащи новость пала Царство. И кала кадя терэласпэ, во фартэ радуияспэ (Лука 10:21).

16. Сар лэ Исусостирэ примероря поможын амэнди лащя ригатар тэ диқас пэ амари дила? (Лука 13:18—21). (Кадяжэ диқэн и картинка.)

¹⁶ О Исусо поможыяс лэ учениконэнди лащя ригатар тэ диқэн пэ пэстири дила. Во сытярэлас лэн, кай кода, со вонэ терэн, анэна розбут лашымос. Кай май драго тэ полас када, роздиқаса дуй лэстирэ примероря. (Проадинон Лука 13:18—21.) Андэ ек примеро о Исусо ԥэндя, кай и новость пала Царство шолпэ пэ фартэ цынёнё зэрницо, саво вибарёл и ашэл бари витка. Када сыкавэл, кай каринг и новость пала Царство приашундёна бут мануша и нисо не сможэт када тэ тердярэл. Андэ авэр примеро о Исусо росԥэндя пала опара. Када сыкавэл, кай и новость пала Царство розжалапэ па вся и люма. Вой лэла тэ парувэл лэ манушэн, хоть када дицола лэ мирости най сразу. Кадя о Исусо поможысардя лэ учениконэнди тэ патян, кай и новость, сави вонэ росԥэнэн, анэна лашымос фартэ бутэ манушэнди.

17. Со инке поможыя амэнди тэ диқас лащя ригатар пэ амари дила?

¹⁷ Кала амэ диқас, кай вся терас най евья, амэнди камэлпэ тэ росԥэнас и лащи новость инке май фартэ. Кажно бэрш милионоря мануша сытён па Библия и авэн пэ Вечеря. Тысячи мануша болдён и лэн тэ росԥэнэн пала Дэл вместе амэнца. Амэ на ӷанас, скати инке мануша взвинапэ пэ лащи новость пала Царство. Но амэ ӷанас, кай о Иегова стидэл баро ӷурто манушэн, савэн во спасыя андэ само бари бида (Тайна 7:9, 14). О Иегова, ла маляко Хулай, диқэл, кай пэ мал най вся стидо. Важ када амэ на ласа тэ парашас тэ росԥэнас пала Дэл.

18. Со доԥэнэн, кай амэ лэ Христостирэ ученикоря?

¹⁸ Лэ Исусостирэ ученикоря вся и время баря хваткаса росԥэнэн и лащи новость. Кадэлэса вонэ на шонпэ пэ авэр. Кала и апосталоря смило росԥэнэнас пала Дэл, и мануша ӷатярэнас кодэлэн, ко «сас лэ Исусоса» (Дила 4:13). Амэ тожэ камас тэ авас смили и хваткатирэ андэ дила — кацавэ жэ, сар амаро Учителё, о Исусо Христос.