«Кадэя война лэ Иеговастири»

Вся заляпэ андо 1999 бэрш, кала и Франция шутя фартэ баро налоӷо пэ пожэртвовании, савэ сас стидэ андо французско филиало лэ 1993 бэршэстар жы каринг о 1996 бэрш. Спэрва амэ камлямас тэ домардювас о чачимос андэ сындоря андэ Франция. Но амэндэ нисо на вижыля. Посли кода сар амэ процэлдям, кала подямас и апеляция, о правительство заля кай о филиало май бут чем 4,5 милионоря евро. Послиднё, ко моӷ амэнди тэ поможый, када сас о ЕСПМ. Но англа сындо амэ трэбуй самас тэ диқаспэ лэ юристонэнца анда Франция. Инке котэ трэбуй сас тэ авэл о прецтавителё анда Европейско сындо. Кадэя встреча трэбуй сас, кай, если када возможно, амэ екжэнэ тэ розласпэ андэ амаро вопросо и вся тэ обжалпэ би сындоско.

Амэ поласас, со авэла: о Европейско сындо лэла тэ заставий амэн тэ потинас лэ правительствости андэ Франция дэсави часть анда кодэя сума, сави вонэ мангэнас, и тэ на домэкас, кай и дила тэ дожал каринг о сындо. Но амэ драго поласас, кай если потинаса хоть ек мардо, тоди амэ жаса против лэ Дэвлэско законо. И ԥрала и ԥэя отдэнас пэстирэ ловэ важ лэ Дэвлэстири дила и кай о правительство на сас право тэ залэл кадэла ловэ (Матф. 22:21). Но через и патив каринг о сындо амэ авелям пэ кодэя встреча.

И встреча прожалас андо шукарно зало. Спэрва вся сас най кадя драго. И манушни анда Европейско сындо сразу ԥэндя, кай амэнди прижалапэ тэ випотинас дэсави часть анда сума, сави замангля о французско правительство. Лэ Дэвлэско зор цырдя амэн тэ пушас латар: «Ай ту ӷанэс, кай о правительство ужэ зля па амаро счето май бут чем 4,5 милионоря евро?»

Па лако муй дицолас, кай вой вобще пала када на ӷанэнас. Кала и французски юристоря ԥэндэ лати, кай када чачимос, вой полностью парудя пэско гиндо. Вой прицыписайля пэр лэндэ и сразу жэ ужылятар. Мэ полэм, кай о Иегова стердя кадя, кай амэ тэ вицэлас кадэя дила. Анда сындо амэ вижылям фартэ радосни и амэнди дажэ на патяласпэ, кай вся кадя получисайля.

30 июнё 2011 бэрш о Европейско сындо приля решэния: кай о французско правительство на сас право тэ шол кацаво баро налоӷо. О сындо приԥэндя лэнди тэ рин и ловэ, савэ вонэ залинэ, и инке упрал тэ потинэн процэнторя! Кадэя решэния поможый амэнди андэ Франция свободно тэ андярас лэ Дэвлэстири время. Кода, со амэ пушлям, сас сар о бар, саво вуряйля андо шэро лэ Голиафости. Васо амэ вицэлдям кадэя дила? Важ кода кай, сар ԥэндя о Давидо, «кадэя война лэ Иеговастири» (1 Сам. 17:45—47).

Када сас най пэрво разо, кала амэ вицэлдям и дила андо сындо. Хоть пар мэндэ тасавэн авэр правительства и авэр веры, лэ Иеговастирэ свидетеля вицэлдэ 1 225 дила андэ ӷлавни сындоря андэ 70 страны и андэ дэсавэ международни сындоря. Када поможый тэ фэрисарас кода, со амэнди прижал: амэндэ исин право свободно тэ андярас лэ Иеговастири время, тэ росԥэнас важ о Дэл, тэ отԥэндювас тэ ӷуляс андэ лэ правителёнэндири дила и тэ отԥэндювас лэ ратэстар.

Сар вижыля, кай мэ сымас пэ кодэва сындо андэ Европа, хоть мэ терав лэ Дэвлэстири дила андэ США андэ лэ Иеговастирэ свидетелёнэндири всемирно ӷлавно управления?

КАЙ МЭРНЭ РОДИТЕЛЯ ԤАБОЛАС ОДИ АНДЭ ЛЭ ДЭВЛЭСТИРИ ДИЛА

Мэрнэ родителя, о Джорджо и Люси́ль, сытелэ андо 12-то класо андэ школа Галаадо и лэн бишалдэ андэ Эфиопия. Котэ мэ и арақаделэм андо 1956 бэрш. Вонэ динэ манди алав Фи́липо — кадя ақарэнас лэ Дэвлэстирэ манушэс, саво жувэлас андо пэрво вико. Андо 1957 бэрш андэ Эфиопия пар мэндэ стодэ запрето. Хоть мэ и сымас совсем бэято, мэ драго сэрав, кай амэ чоралэс росԥэнасас важ о Дэл и ԥирасас пэ собрании. Манди, сар бэятости, вся када здэласпэ фартэ интересно. Но андо 1960 бэрш амэн видарадэ анда страна.

Мэрнэ родителя пэрэлаглэ андо Уи́чито (штато Канза́со, США). Кала вонэ уладэнас анда Африка, лэндэ всаек ԥаболас оди андэ лэ Дэвлэстири дила. Вонэ сытярэнас ман, мэрня барэдэра ԥья, савя ақарэнас Джу́ди, и мэрнэ цыкнэдэрэ ԥралэс, савэс ақарэнас Ле́сли, — савэ тожэ арақаделэ андэ Эфиопия, — кай амэ тэ любисарас лэ Иеговас и тэ терас лэстири дила анда вся оди. Мэ болделэм, кала манди сас 13 бэрш. Ай через трин бэрш вся амаро ери пэрэлагля андэ Ареки́па (Перу), кай на хутилэлас манушэн тэ росԥэнэн важ о Дэл.

Андо 1974 бэрш, кала манди сас 18 лет, мэ и инке авэр штар ԥрала лям тэ терас лэ Дэвлэстири дила сар спецыальни пианероря андэ Перу. Амэнди трэбуй сас тэ росԥэнас важ о Дэл андэ Цэнтральни Анды — котэ, кай када инке нико на терэлас. Котэ амэ росԥэнасас и лащи новость лэ манушэнди, савэ дэнас дума пэ шыба ке́чуа и аймара́. Амэ ездисарасас и жувасас андэ бари машына, сави амэ любисарасас и пэ сави ԥэнасас «ковчеӷо», важ кода кай вой шоласпэ по баро ящико. Манди чалёлас тэ сыкавав лэ манушэнди, со пистромэ андэ Библия, — кай ӥто о Иегова улэла о чорымос, о насвалимос и смэрть (Тайна 21:3, 4). Бут мануша болдёнас. Мэ фартэ цэнисарав кодэя время.

ЛАВ ТЭ ТЕРАВ ЛЭ ДЭВЛЭСТИРИ ДИЛА АНДЭ ВСЕМИРНО ӶЛАВНО УПРАВЛЕНИЯ

Андо 1977 бэрш андэ Перу авеля о А́льберто Шрёдеро анда лэ Иеговастирэ свидетелёнэнго Руководящё совето. Во ԥэндя манди, кай мэ моӷу тэ пистросарав заявления, кай тэ попэрав андо Вефилё. Кадя мэ и стердэм. На прожыля бут время, и лэ 17 июнёстар андо 1977 бэрш, мэ лэм тэ терав лэ Дэвлэстири дила андо бруклинско Вефилё. Штар бэрш мэ поможысаравас, кай андэ здании тэ авэл вужэс и вся драго тэ терэл.

Андо июнё андо 1978 бэрш андо Нэво Орлеа́но (штато Луизиа́на) прожалас международно канӷрэсо. Котэ мэ уӷанглэм ла ԥья, савя ақарэн Эли́забет Авалло́н. Латирэ родителя, кадя жэ сар и мэрнэ, андярэнас лэ Дэвлэстири время. И Элизабет ужэ штар бэрш сас общё пианеро, и вой камэлас вся и жызня тэ терэл лэ Иеговастири дила. Амэ лям общаца и посли канӷрэсо. Кала амэ уӷанглям ек еқэс май драго, амэ фартэ полюбисардям ек еқэс. Андо 20 октябрё андо 1979 бэрш амэ цэлдям ябьяв, и Элизабет ля тэ служый андо Вефилё вместе манца.

Амари пэрво собрания сас «Бруклино, Испанско». И ԥрала и ԥэя котэ анда ди шутэ амэн сама. Ӷэт май интя амэ самас андэ трин авэр собрании. Андэ кажно собрания амэ диқасас, кай амэн любин и цэнин кодэя дила, сави амэ терасас андо Вефилё. Амэ блаӷодарни лэ Дэвлэстирэ ерести, ай кадяжэ лэ друӷонэнди и лэ чаченди, савэ поможынас амэнди тэ заботисавас пала амарэ ԥурэ родителя.

НЭВИ ДИЛА: ЮРИДИЧЕСКО ОТДЕЛО

Андо январё андо 1982 бэрш ман пэрэандярдэ андо юридическо отдело. Мэ када совсем на аштярдэм. Через трин бэрш ман манглэ тэ жав тэ сытював, кай тэ авав адвокато. Важ кадэя время манди сас приятно тэ уӷанав, кай через кода, кай лэ Иеговастирэ свидетеля вицэлэнас бут дила андэ сындоря, акана андэ США и андэ авэр страны кай и мануша исин май бут свобода. И адес бут мануша дажэ на загиндонпэ, кай када ашэля возможно через лэ Дэвлэско народо. Кала мэ сытювавас, амэ бут дасас дума важ кода, сар дэ бут важни сындоря вицэлэнас лэ Иеговастирэ свидетеля.

Андо 1986 бэрш, кала манди сас 30 бэрш, ман стодэ барэдэрэса по юридическо отдело. Сас фартэ приятно, кай манди кадя патян, но кадяжэ мэ пережывал, важ кода кай полавас: и дила найвушэро, ай мэ инке бут со на ӷанав.

Андо 1988 бэрш мэ залэм о дипломо. Но тоди мэ на полавас, пэскати через када можэт тэ римойпэ и дружба лэ Дэвлэса. Кала о мануш посли школа отдэл бут бэрша, кай инке тэ сытёл, во можэт тэ запутёл и тэ залэл тэ гиндой, кай лэсти пэрэл май бут патив, чем аврэнди. Ман спасысардя мэрни Элизабет. Вой поможысардя манди тэ рисавав каринг о ӷрафико важ лэ Дэвлэстири дила, саво мандэ сас. Прожыля время, и мэ упалэ ашэлэм май пашэ каринг о Иегова. Ԥэнава сар исин: тэ авэс ӷрамотно и бут тэ ӷанэс — када най само ӷлавно андэ жызня. Кай тэ авэс па чачимастэ бахтало, трэбуй тэ дружыс лэ Иеговаса и тэ любис лэс и лэстирэ народос.

ДОМАРДЮВАВ, КАЙ ПА ЗАКОНО ТЭ АВЭЛ ПРАВО ТЭ РОСԤЭНАС И ЛАЩИ НОВОСТЬ

Кала мэ ашэлэм юристо, мэ лэм тэ поможысарав лэ Дэвлэстирэ народости тэ зашолпэ пала пэско право тэ росԥэнэн важ о Дэл. И бути сас интересно, но най фартэ вушэро, важ кода кай вся и время варисо парудёлас. Например, бут бэрша амэ ашавасас лэ манушэнди литература и мангасас, кай вонэ тэ дэн важ латэ пожэртвовании. Но андо 1990 бэрш и ԥрала закамлэ када тэ парувэн. Амаро отдело трэбуй сас тэ ԥэнэн, сар када тэ стерэн правильно. Посли када лэ Иеговастирэ свидетеля роздэн и публикацыи бесплатно. Кадэлэстар ашэля май вушэро лэ ԥралэнди и лэ ԥэянди, амэнди андо Вефилё и поможысардя лэ Дэвлэстирэ народости тэ фэрийпэ, кай тэ на авэл ԥаримос через и налоӷоря. Дэко пережывал, кай если амэ кадя стераса, тоди амэнди на лэла тэ хутилэл ловэ, кай тэ вимэкас и литература, и амэндэ на вижала тэ росԥэнас важ о Дэл май бутэ манушэнди. Но вся вижыля па аврятэ. Посли 1990 бэрш лэ Иеговастирэ свидетелёнэн ашэля дувар май бут и адес любо мануш можэт тэ адиной амарэ публикацыи бесплатно. Мэ най еқвар пэстирэ яқэнца диқлэмас, сар варисо парудёлас андэ лэ Дэвлэско народо. Мэ драго полэм: амэндэ вся вижал кати важ кода, кай амэнди поможый о Иегова и кай амэ приашундювас каринг о кандино рабо (Исх. 15:2; Матф. 24:45).

Кала амэ вицэлас андэ сындоря, када най ек кати через и адвокаторя. Часто и сындомаря и авэр барэ мануша зашонпэ пала амэндэ через кода, кай амэ андярас пэс пативалэс. Например, андо 1998 бэрш пэ Куба прожанас особи канӷрэсоря. Интя авелэсас трин ԥрала анда Руководящё совето пэстирэ хулаянца. Амэ ужэ най еқвар диқасаспэ лэ барэ манушэнца, кай вонэ тэ полэн, кай лэ Иеговастирэ свидетеля на камэн тэ ӷулен андэ лэ правителёнэндири дила. Но кала и ԥрала анда Руководящё совето пативаса динэ дума лэнца, вонэ полинэ када май драго, чем кала лэнца дасас дума амэ.

И всаек дэкала, кай тэ зашаспэ пала лащи новость и тэ домардювас, кай па законо тэ авэл право ла тэ росԥэнас, амэнди прижалпэ тэ жас андо сындо (Флп. 1:7). Например, бут бэрша и барэ мануша андэ дэсавэ европейски страны и андэ Южно Корея на камэнас тэ прижанэн, кай амэндэ исин право тэ отԥэндювас тэ жас андэ халавдия. Через када варикай 18 000 ԥрала андэ Европа и май бут чем 19 000 ԥрала андэ Южно Корея сас бэшардэ андо баруно важ кода, кай отԥэндёнас тэ служын андэ халавдия через пэстири вера.

И акэ, андо 7 июлё андо 2011 бэрш о Европейско сындо приля фартэ важно решэния па дила «О Баятяно против Армения». Акана всаворэ европейски страны трэбуй тэ дэн лэ манушэнди возможность тэ прожан альтернативно служба. Ай 28 июня 2018 бэрш кацави жэ решэния приля о сындо андэ Южно Корея. Вся када на авелоп, если бы дажэ дэсавэ амарэ ԥрала тэ на авэн састэ андэ кадэва вопросо.

И юридически отделоря андэ ӷлавно управления и андэ филиалоря па вся и ԥув пристон бут зор, кай тэ зашонпэ пала амаро право тэ тэлювас лэ Иеговасти и тэ росԥэнас и лащи новость пала Царство. Важ амэндэ бари бах тэ поможысарас лэ ԥралэнди и лэ ԥэянди, савэн ӷонин. Вицэласа амэ или най, кажно дила, сави розлэлпэ по сындо, дэл возможность лэ правителёнэнди и лэ манушэнди анда авэр народоря тэ ашунэн и лащи новость (Матф. 10:18). Лэ сындомаренди, лэ барэ манушэнди, лэ журналистонэнди и аврэ манушэнди, савэнди интересно, сар жал о сындо, прижалпэ тэ ашунэн и тэ адинон и стихоря анда Библия, савэ амэ стас андэ лила и ԥэнас пэ сындоря. И мануша, савэндэ лашо ди, уӷанэн, ко када лэ Иеговастирэ свидетеля и андэр со вонэ патян. Дэсавэ андар лэндэ ашэн амарэ ԥрала и ԥэя.

НАИС, ИЕГОВА!

Акэ ужэ май бут чем 40 бэрш мэ дав помощь сар юристо лэ филиалонэнди па вся и ԥув. Манди прижылясаспэ бут разоря тэ дав дума пэ сындоря и най еқвар тэ диқавпэ лэ барэ манушэнца. Мэ любисарав и цэнисарав лэ ԥралэн, савэнца терав андэ ӷлавно управления и андэ юридически отделоря андэ разни страны. Мандэ фартэ интересно и бахтали жызня.

Мэ и Элизабет вместе ужэ 45 бэрш. Всаворэ кадэла бэрша — и андэ лащи, и андэ найлащи время — вой на парашэлас ман тэ любий и вся и время подритярэлас. Мэ абуросарав ласа, важ кода кай вся када вой терэл через о насвалимос, саво одлэл латар о зор.

Амэ най еқвар диқасас, кай дажэ если амэ варисо драго ӷанас тэ терас — када най само ӷлавно. Вся о зор жал лэ Иеговастар, сар и ԥэндя о Давидо: «О Иегова — када лэстирэ народоско зор. Во ԥэнэса састо форо, андэ саво спасыйпэ лэско избрано» (Пс. 28:8). Чаче, «кадэя война лэ Иеговастири»!