Сар о Иегова поможый амэнди тэ ашаспэ састэ андэ ԥари время

1. Васо амэнди трэбуй тэ ашаспэ састэ и ко можэт тэ дэл амэнди помощь? (1 Пётро 5:10).

АНДЭ кадэла ԥарэ послидни деса лэ Иеговастирэ манушэнди трэбуй тэ ашэнпэ састэ. Дэсавэ андар мэндэ мучинпэ лэ насвалимастар, саво на прожал бэршэнца. Аврэндэ можэт тэ дуқал оди, кай муля варико анда лэндирэ чаче. Ай пэ варикастэ тасавэл о ери или и рая (Матф. 10:18, 36, 37). Ай саво ԥаримос пэрэандярэс ту? Патя, о Иегова поможыя тути тэ виритярэс любо ԥаримос и тэ ашэспэ састо. (Проадинон 1 Пётро 5:10.)

2. Со поможыя амэнди тэ ашаспэ састэ?

² Со када тэ ашэспэ састо? Амэ ашаспэ састэ, кала на парашас тэ кандас лэ Иеговас и радостяса терас лэстири дила. Дажэ кала амэн ӷонин, камэн тэ змарэн па правильно дром или кала исин авэр ԥаримос. Кацаво мануш на парашэл тэ патял, кай вся авэла драго. Нико не можэт тэ пэрэандярэл о ԥаримос би лэ Иеговастирэ вастэско. Када во дэл амэнди «зор, саво май баро лэ манушэндирэ зорэстар» (2 Кр. 4:7). Андэ кадэя статья амэ роздиқаса, сар о Иегова поможый амэнди тэ ашаспэ састэ. Ай инке подаса дума, со амэ можэм тэ терас, кай во тэ дэл амэнди пэстири помощь.

МАНГПЭ ЛЭ ИЕГОВАСТИ

3. Васо можно тэ ԥэнас, кай и молитва — када райкано подарко?

³ Кай тэ поможый амэнди тэ авас састэ, о Иегова дя амэнди райкано подарко — возможность тэ взвисавас каринг лэстэ андэ молитва. Хоть амэ всаворэ и бэзэхэстирэ, амэ можэм тэ дас дума лэса (Евр. 4:16). Кати погиндосар: амэ можэм тэ дас дума лэ Иеговаса андэ любо время, пэ любо тема и пэ любо шыб. Во ашунэл амэн, кай бы амэ тэ на авас, дажэ если амэ андо баруно или совсем екжэнэ (Иона 2:1, 2; Дила 16:25, 26). Кала амэ пережываем и нащи стидас и алава, о Иегова всаек полэл, со амэ камас тэ ԥэнас (Римо 8:26, 27). Чаче, и молитва — када па чачимастэ райкано подарко!

4. Катар амэ ӷанас, кай о Иегова ашунэла и поможыя амэнди, кала амэ мангас лэс тэ ашаспэ састэ?

⁴ Андэ Библия ԥэнэнпэ: «Со амэ тэ на манглоп лэ Дэвлэстар, во ашунэл амэн, если мангас кода, со уӷодно лэсти» (1 Иоан. 5:14). Ай можно тэ мангас лэ Иеговас, кай во тэ поможый амэнди тэ ашаспэ састэ андэ ԥари время? Да, када уӷодно лэсти. Васо можно кадя тэ ԥэнас? Если амэ на парашас тэ кандас лэ Дэвлэс, лэстэ авэла, со тэ ԥэнэн пэ лэ Сатанаско хохаимос (Прит. 27:11). Тай инке андэ Библия ԥэнэнпэ, кай о Иегова камэл «тэ поможый кодэлэнди, ко кандэл лэс всаворэ одеса» (2 Лет. 16:9). Амэ можэм тэ патяс, кай лэстэ исин зор и во камэл тэ дэл лэс амэнди, кай амэ тэ ашаспэ састэ (Ис. 30:18; 41:10; Лука 11:13).

5. Сар и молитва дэл амэнди помощь, кай тэ авэл спокойно по ди? (Исайя 26:3).

⁵ Кала амэ мангаспэ важ кода, пала со пережываем, «о Дэл дэла амэнди покоё по ди, саво май зорало любонэ гиндонэндар», и во лэла тэ фэрий амаро ди и годи (Флп. 4:7). Сар када тэ полас? И мануша, савэ на андярэн лэ Иеговастири время, родэн, со тэ терэн, кай тэ ашэнпэ спокойни и тэ бистрэн пала пэско ԥаримос. Например, варико старыийпэ тэ вишол всаворэ гиндоря анда шэро, кай тэ ашэлпэ спокойно. Пэ када ԥэнэн медитацыя. Но кала о мануш кадя терэл, када можэт тэ анэн каринг и бида: пэр лэстэ моӷут тэ лэн тэ хулаин и найвужэ (Сыстон Матфеё 12:43—45.) Но нисо никала не сможэт тэ дэл кацаво покоё по ди, саво дэл кати о Иегова. Кала амэ мангаспэ, о Дэл диқэл, кай амэ патяс лэсти анда вся ди, и дэл амэнди «мирно жызня», сави никала на прожала. (Проадинон Исайя 26:3.) Сар во када терэл? Например, во дэл амэнди помощь тэ сэрас и стихоря анда Библия, савэ поможын амэнди тэ ашаспэ спокойни. Кадя амэ полас, кай о Иегова фартэ любий амэн и заботийпэ пала амэндэ и кадэлэстар амэнди ашэл спокойно по ди (Пс. 62:1, 2).

6. Пала со можно тэ мангаспэ? (Кадяжэ диқэн и картинка.)

⁶ Со можэш тэ терэс ту. Андэ найвушэро время «отдэ пэско ԥаримос лэ Иеговасти» и мангпэ лэсти, кай во тэ поможый тути тэ ашэспэ спокойно (Пс. 55:22). Ай инке манг лэстар годи, кай тэ ӷанэс, со тэ терэс андэ тири ситуацыя (Прит. 2:10, 11). И на бистэр тэ ԥэнэс лэ Иеговасти наис (Флп. 4:6). Старысав тэ додиқэс, сар во подритярэл тут андэ ԥари время, и ав блаӷодарно важ лэстири помощь. На домэк, кай через о ԥаримос ту тэ бистрэс пала лашымос, саво тутэ ужэ исин (Пс. 16:5, 6).

АДИНОСАР И БИБЛИЯ

7. Сар и Библия поможый амэнди тэ ашаспэ састэ?

⁷ Кай тэ поможый амэнди тэ ашаспэ састэ, о Иегова дя амэнди и Библия. Андэр латэ исин бут стихоря, савэ сыкавэн, кай о Дэл ритярэл амэн вастэстар. Роздиқаса кати ек примеро. Андо Матфеё 6:8 ԥэнэнпэ: «Тумаро Дад ӷанэн, со тумэнди трэбуй, инке жы каринг кода, сар тумэ лэс мангэна». Кадэла алава ԥэндя о Иисусо, ай во ӷанэн лэ Иеговас фэдэр всаворэндар. Важ када, саво бы ԥаримос амэндэ тэ на авэл, амэ можэм тэ патяс, кай о Иегова ӷанэн, со амэнди трэбуй, и обязательно дэла амэнди помощь. Андэ Библия исин инке бут авэр гиндоря, савэ поможына амэнди тэ ашаспэ састэ (Пс. 94:19).

8. a) Призындярэн примеро, сар и советоря анда Библия поможын амэнди тэ пэрэандярас о ԥаримос. б) Со поможыя амэнди тэ сэрас и советоря анда Библия, кала трэбуй тэ прилас решэния?

⁸ Андэ Библия исин советоря, савэ поможын амэнди тэ ашаспэ састэ и тэ пэрэандярас о ԥаримос. Через лэндэ амэ можэм тэ прилас годявэрнэ решэнии (Прит. 2:6, 7). Например, андэ Библия ԥэнэнпэ, кай амэ тэ на загрыжосавас пала кода, со можэт тэ терэлпэ или тэ на терэлпэ тэся. Авэла фэдэр, кай амэ кажно дес тэ надеисавас по Иегова (Матф. 6:34). Амэнди трэбуй тэ присытювас кажно дес тэ адиносарас и Библия и тэ обгиндосарас, со котэ пистромэ. Тоди амэнди май ӥто авэла по гиндо о совето анда Библия, кала прижалапэ тэ прилас решэния или тэ виритярас о ԥаримос.

9. Со поможый амэнди инке май фартэ тэ патяс, кай о Иегова дэл помощь пэстирэ манушэнди?

⁹ Инке андэ Библия пистромэ важ кацавэ жэ мануша, сар и амэ, савэ надеинаспэ по Иегова, и во дэлас лэнди помощь (Евр. 11:32—34; Иак. 5:17). Кала амэ гиндосарас важ кода, сар о Иегова поможыяс лэнди, амэ лас май фартэ тэ патяс, кай во поможыя и амэнди. Андэ Библия ԥэнэнпэ, кай во важ амэндэ кодэва, «кастэ амэ гарадювас и амаро зор, во поможый ӥто, кала амэндэ ԥаримос и биды» (Пс. 46:1). Кала амэ адиносарас, сар андэ дэлмутни время и мануша на парашэнас тэ кандэн лэ Иеговас, амэнди тожэ камэлпэ, сар и вонэ, тэ патяс лэ Иеговасти и тэ ашаспэ састэ (Иак. 5:10, 11).

10. Сар тумэнди можэт тэ поможый и Библия?

¹⁰ Со можэш тэ терэс ту. Адиносар и Библия кажно дес и витидэ стихоря, савэ тути фартэ придэн зор. Бут касти чалёл тэсара тэ адинон о стихо по дес и о абзацо каринг лэстэ. Если ласа кадя тэ терас, тоди вся о дес амэндэ андо шэро авэна и гиндоря анда Библия, савэ придэн амэнди зор. Акэ со тердясаспэ еқа амаря ԥьяса, савя ақарэн Мари́a. Кай лэдуй латирэ родителя виарақлэ найлащи дук. Со поможыяс лати тэ на умэкэл и вас и тэ заботийпэ пала лэндэ андэ лэндирэ послидни шона? Вой росԥэнэн: «Кажно тэсара мэ адиносаравас о стихо по дес и гиндосаравас пала лэстэ. Када поможыяс манди май набут тэ гиндосарав пала пэстэ и пэско ԥаримос и май бут — пала Иегова и лэстирэ райканэ обещянии» (Пс. 61:2).

ПРОАНДЯР И ВРЕМЯ АМАРЭ ԤРАЛЭНЦА И ԤЭЯНЦА

11. Со тутэ по ди, кала ту гиндос пала ԥрала и ԥэя, савэ ашэлэпэ састэ андэ ԥари время?

¹¹ О Иегова позаботисайля, кай паша амэндэ тэ авэн ԥрала и ԥэя, савэ поможын амэнди тэ ашаспэ састэ андэ ԥари время. Амэ ӷанас, кай амэ най екжэнэ, важ кода кай «кадя жэ мучинпэ всаворэ [амарэ] ԥрала па вся и люма» (1 Пёт. 5:9). Чаче, сар бы ԥарэс амэнди тэ на авэл, варико авэр ужэ пэрэандярдя кацаво ԥаримос и на парашэля тэ кандэл лэ Иеговас. Важ када амэ можэм тэ патяс, кай и амэ када пэрэандяраса! (Дила 14:22).

12. Сар амэнди поможын и ԥрала и ԥэя и со амэ можэм тэ стерас важ лэндэ? (2 Коринфо 1:3, 4).

¹² Андэ ԥари время и ԥрала и ԥэя моӷут тэ подритярэн ек еқэс пэ алава и пэ дила. Погиндосараса важ о апостало Павло. Кала во сас тала домашнё аресто, и ԥрала и ԥэя подритярэнас лэс и дэнас лэсти помощь пэ дила. Андэ пэстирэ письморя о Павло часто запистрояс па алавэстэ кажнонэс, касти во блаӷодарно (Флп. 2:25, 29, 30; Клс. 4:10, 11). И андэ амари время нисо на паруделя. Кала амэ пэрэандярас варисаво ԥаримос, и ԥрала и ԥэя сразу жэ авэн тэ поможын амэнди. Ай кала трэбуй тэ подритярас лэн, амэ тожэ камас май ӥто тэ дас помощь. (Проадинон 2 Коринфо 1:3, 4.)

13. Со поможысардя ла Майяти тэ пэрэандярэл и ԥари время?

¹³ Акэ сар и ԥрала и ԥэя подритярдэ ла Майя анда Россия. Андо 2020 бэрш лако цэр обродэ и рая, ай май интя ла андярдэ по сындо, пэ саво ла дошалярдэ, кай вой росԥэнэн пала Дэл. И Майя росԥэнэн: «Кала манди сас ԥарэс по ди, и ԥрала и ԥэя звонинас манди, пистронас и ԥэнэнас, кай любин ман. Мэ вся и время полавас, кай мэ андо баро любящё ери, но посли кадэя ситуацыя мэ полэм када инке май драго».

14. Со амэ трэбуй тэ терас, кай и ԥрала и ԥэя тэ дэн амэнди помощь? (Кадяжэ диқэн и картинка.)

¹⁴ Со можэш тэ терэс ту. Если тути щас фартэ ԥарэс, то инке май важно тэ проандярэс май бут время лэ ԥралэнца и лэ ԥэянца. На лажа тэ мангэс помощь кай и старейшыноря. Вонэ моӷут тэ ашэн важ тутэ сар «ҭан, кай тэ гарадён ла балвалятар и... тэ фэринпэ лэ барэ брышындэстар» (Ис. 32:2). И на бистэр: тирэ ԥрала и ԥэя тожэ пэрэандярэн варисаво ԥаримос. Старысав тэ терэс варисо важ лэндэ. Када поможыя тути тэ лэс зор и тути авэла май вушэро тэ пэрэжувэс о ԥаримос (Дила 20:35).

НАДЕИСАВ ПО ЛАШЫМОС, САВО АВЭЛА АНГЛЭ

15. Сар и надежда по лашымос поможыяс лэ Иисусости и сар вой поможый амэнди? (Евреёря 12:2).

¹⁵ Кай тэ ашаспэ састэ, о Иегова дя амэнди райкани надежда (Римо 15:13). Кадэя надежда поможысардя лэ Иисусости тэ виритярэл само ԥаро дес андэ пэстири жызня пэ ԥув. (Проадинон Евреёря 12:2.) О Иисусо ӷанэнас, кай, если во на парашэла тэ кандэл лэ Иеговас, кадэлэса во зашолапэ пала лэско лашо алав. Ай инке во аштярэлас, кай тэ рийпэ кай пэско Дад, ай потом тэ ашэл Царё и тэ правий ла ԥувьяса вместе пэстирэ ԥралэнца. Точно кадя и амари надежда по лашымос, саво амэн аштярэл англэ, поможый амэнди тэ пэрэжувас любо ԥаримос, саво амэндэ можэт тэ авэл андэ лэ Сатанастири люма.

16. Сар еқа ԥьяти поможысардя, кай вой гиндояс пала лашымос, саво трэбуй тэ авэл англэ, и сости ту сытёс анда латирэ алава?

¹⁶ Уӷанаса пала ԥэй Алла анда Россия. Акэ сар лати придэлас зор кода, кай вой надеияспэ по лашымос, саво авэла англэ через лэ Дэвлэско Царство. Латирэ хулас залинэ андэ ваздии и бэшардэ тэ аштярэл о сындо. Кала ла ԥьятар пушлэ, со поможый лати тэ на умэкэл и вас, вой ԥэндя: «Мэ часто мангавпэ и гиндосарав пала лашымос, саво авэла англэ. Инке мэ старысавав тэ ритярав андо шэро, кай кадя на авэла вся и время и када прожала. О Иегова победия пэстирэ вороӷонэн и блаӷословия амэн».

17. Сар амэ можэм тэ авас блаӷодарни лэ Иеговасти важ кода, кай во камэл тэ дэл амэнди лащи жызня англэ? (Кадяжэ диқэн и картинка.)

¹⁷ Со можэш тэ терэс ту. Виарак время, кай тэ погиндос важ и райкани жызня, сави камэл тэ дэл тути о Иегова. Старысав тэ гиндос, сави бахтали и лошали жызня тутэ авэла андо раё! Кала амэ ласа тэ сыстосарас амари жызня кодэласа, сави амэн аштярэл англэ, амэнди лэла тэ здэлпэ, кай о ԥаримос, саво амэндэ исин акана, амэ пэрэандярас «най долӷо и вушэро» (2 Кр. 4:17). Инке старысав тэ терэс вся, со па тиро зор, кай тэ росԥэнэс аврэнди, со о Дэл камэл тэ стерэл англэ. Погиндосар важ и мануша, савэ на андярэн лэ Иеговастири время. Лэндэ тожэ бут ԥаримос, но вонэ на ӷанэн, саво лашымос камэл тэ дэл лэнди о Дэл. Возможно, через тирэ алава вонэ закамэна тэ уӷанэн май бут важ лэ Дэвлэско Царство.

18. Васо амэ можэм тэ патяс, кай о Иегова точно зритярэла пэско алав?

¹⁸ О Иово бут со пэрэжудя. Но во вся састэс виритярдя и ԥэндя лэ Иеговасти: «Акана мэ ӷанав, кай ту можэш вся. Со бы ту на загиндосардоп, нинай нисо, со най па тиро зор» (Иов 42:2). О Иово поля: нисо на тердярэла лэ Иеговас, кай во тэ зритярэл пэско алав. Кадэва гиндо можэт тэ придэл зор и амэнди андэ амаро ԥаримос. Погиндосарам пала кацаво примеро. Бут бэрша кай ек жувли сас ԥаро насвалимос. Вой фартэ вицыеля тэ ԥирэл па больницы и нико нащи поможыяс лати. Но май интя вой виарақля лашэ врачос. Во полэл, состар латэ ляпэ кадэва насвалимос, и ԥэнэн лати, сар лэла тэ лечий ла. Хоть во ла инке на вилечисардя, лати ужэ ашэля май спокойно лэстирэ алавэндар. Акана латэ исин зор тэ на здэлпэ, важ кода кай вой ӷанэн, кай ӥто лако насвалимос прожала. Амэ тожэ можэм вся тэ виритярас, важ кода кай патяс: о Дэл точно стерэла о раё, пала саво дя алав.

19. Со поможыя амэнди тэ ашаспэ састэ андэ ԥари время?

¹⁹ Андэ кадэя статья амэ уӷанглям, сар о Иегова поможый амэнди тэ ашаспэ састэ андэ ԥари время. Во подарисардя амэнди возможность тэ мангаспэ лэсти и тэ адиносарас и Библия. Инке во дя возможность тэ проандярас и время лэ ԥралэнца и лэ ԥэянца и тэ аштярас англэ и лащи жызня. Если амэ прилас лэ Иеговастири помощь, тоди лэстирэ зорэса амэ пэрэандяраса любо ԥаримос, саво амэндэ можэт тэ авэл (Флп. 4:13). И амэ пэстирэ яқэнца диқаса кодэва дес, кала лэ Сатанастиря люматар на ашэлапэ и слидо.