СТАТЬЯ ВАЖ И ИЗУЧЕНИЯ 33
ДИЛИ 4 «Иегова мэрно Пастухо»
На параш тэ патяс, кай о Иегова любий тут
«Через и предано любовь мэ пашардэм тут каринг пэстэ» (ИЕР. 31:3).
АМЭ УӶАНАСА
Васо важно тэ доԥэнэс корко пэсти, кай о Иегова любий тут и сар када тэ терэс.
1. Васо ту закамлян тэ отдэс пэстири жызня лэ Иеговасти? (Кадяжэ диқэн и картинка.)
ТУ СЭРЭС, сар дян алав лэ Иеговасти, кай лэса тэ уӷодис лэсти вся и жызня? Ту закамлян када тэ стерэс, кала уӷанглян лэ Дэвлэс и полюбисардян лэс. Андэ молитва ту ԥэндян лэсти, кай само ӷлавно важ тутэ авэла тэ терэс кода, со во камэл, и ту лэса тэ любис лэс всаворэ́ одеса, всаворя жызняса, всаворя годяса и всаворэ́ зорэса (Мар. 12:30). Дес десэстар тири любовь каринг лэстэ барёлас и ашэлас инке май састи. И если адес варико пушэла тутар: «Ту точно любис лэ Иеговас?» — ту ни чуть на замешкеисапэ и ԥэнэса: «Мэ никас и нисо на любисарав май фартэ, чем лэ Иеговас!»
Сэрэс, сар дэ фартэ ту любисас лэ Иеговас, кала дян алав тэ жувэс важ лэстэ и болделян? (Диқэн о абзацо 1.)
2, 3. Со важно тэ доԥэнас корко пэсти и пала со амэ подаса дума андэ кадэя статья? (Иеремия 31:3).
2 Но со, если варико пушэла: «Ай ту точно ӷанэс, кай о Иегова любий тут?» Замешкеисапэ ту, кай тэ дэс ответо? Загиндосапэ, кай ту на ашэс, кай во тут тэ любий? И ԥэй, савятэ сас ԥаро децтво, росԥэнэн: «Мэ ӷанав, кай любисарав лэ Иеговас. Мэ всаворэ одеса када полав. Но часто манди ԥарэс тэ патяв, кай и во любий ман». Со па чачимастэ андо ди кай о Иегова каринг тутэ?
3 О Иегова камэл, кай ту всаворэ́ одеса тэ патяс, кай во тут любий. (Проадинон Иеремия 31:3.) Во пашардя тут каринг пэстэ важ кода, кай полюбисардя тут. Ай кала ту закамлян тэ отдэс пэстири жызня андэ лэстирэ вас и болделян, во полюбисардя тут инке май фартэ. Када сыкавэл, кай во приԥанделя каринг тутэ лэ одеса и ужэ никала тут на ашавэла. О Иегова ԥэнэн, кай лэстирэ кандинэ мануша, машкар савэ исин и ту, фартэ куч важ лэстэ (Мал. 3:17). О Дэл камэл, кай тутэ по ди тэ авэл, сар кай о апостало Павло. Андо Римо 8:38, 39 о Павло пистросардя: «Мэ патяв, кай нинай нисо, со можэт тэ одмарэл лэ Дэвлэс тэ любий амэн: ни и смэрть, ни и жызня, ни и анӷелоря, ни и барэ мануша, ни кода, со исин и со авэла, ни о зор, ни кода, со упрэ и со тэлэ, нисо авэр, со исин андэ люма». Андэ кадэя статья амэ подаса дума, васо важно тэ доԥэнэс корко пэсти, кай о Иегова любий тут, и сар када тэ терэс.
ВАСО ВАЖНО ТЭ ПАТЯС, КАЙ О ИЕГОВА ЛЮБИЙ ТУТ
4. Сар о Сатана старыийпэ тэ змарэл амэн па правильно дром и сар амэнди пэс тэ фэрисарас?
4 Если ту патяс, кай о Иегова тут любий, када поможыя тэ бориспэ кодэлэса, со хытрияса подтерэл о Бэнг (Эф. 6:11). О Сатана ӷотово тэ вижал анда цыпа, кай ту тэ парашэс тэ уӷодис лэ Дэвлэсти. Например, во старыийпэ тэ заставий тут тэ гиндос, кай о Иегова тут на любий. Но када баро хохаимос. Андэ Библия о Сатана сыстойпэ лэ левоса (1 Пёт. 5:8, 9). О лево дэл пэ слаби жывотни, савэ не моӷут тэ защитин корко пэс. Точно кадя терэл и о Сатана. Во виаштярэл, кала амэ совсем вимардюваса анда зор. Можэт, тутэ идоси дуқал оди через кода, со ту пэрэжудян варикала, или щас ту пэрэандярэс варисаво ԥаримос, или фартэ пережываеш пала кода, со авэла англэ. Тоди о Сатана точно када на промэкэла (Прит. 24:10). Сар тэ на домэкэс лэ Сатанасти тэ змарэл тут па пэрнэ? Старысав инке май фартэ тэ патяс, кай о Иегова тут любий (Иак. 4:7).
5. Васо амэнди важно тэ полас, кай о Иегова амэн любий?
5 Если ту патяс, кай о Иегова тут любий, када поможыя тэ ашэс каринг лэстэ май пашэ. Погиндосар акэ пала со. О Иегова создал амэн кадя, кай важ и чачуни бах амэнди трэбуй тэ любисарас аврэн и кай авэр тэ любин амэн. Кала амэ диқас, кай амэн любин, амаро ди тожэ цырдэлпэ тэ любий. Важ када, со май драго амэ диқас, кай о Иегова любий амэн, со май фартэ амэ лас тэ любисарас лэс (1 Иоан. 4:19). И со май фартэ амэ цырдаспэ каринг лэстэ, со май фартэ во цырдэлпэ каринг амэндэ. Пала када и ԥэнэнпэ андо Иаково 4:8: «Ашэн май пашэ каринг о Дэл, и во ашэла май пашэ каринг тумэндэ». Но со, если тути всаек ԥарэс тэ патяс, кай о Иегова тут любий? Сар тэ доԥэнэс корко пэсти, кай во любий тут?
САР ТЭ ДОԤЭНЭС КОРКО ПЭСТИ, КАЙ О ИЕГОВА ЛЮБИЙ ТУТ
6. Со тэ терас, если амэнди на патялпэ, кай о Иегова любий амэн?
6 На параш тэ мангэс лэ Иеговас тэ сыкавэл тути, сар во тут любий (Лука 18:1; Римо 12:12). Ту можэш най еқвар андо дес тэ мангэс лэ Иеговас, кай во тэ поможый тути тэ диқэс пэр пэстэ кадя, сар диқэл пэр тутэ во. Если амэ дошалярас пэс андэ варисостэ, амэнди можэт тэ авэл ԥарэс тэ патяс, кай о Иегова любий амэн. Но трэбуй тэ сэрас, кай о Иегова май баро амарэ одестар (1 Иоан. 3:19, 20). Во ӷанэн амэн фэдэр, чем амэ. И во диқэл андар мэндэ кодэва лашымос, саво амэнди можэт дажэ тэ на дицол (1 Сам. 16:7; 2 Лет. 6:30). Важ када на дар тэ росԥэнэс лэ Иеговасти вся, со тутэ по ди, и манг лэс тэ поможый тути тэ патяс, кай во любий тут (Пс. 62:8). Ай потом тер кадя, сар пистромэ май англэ.
7, 8. Сар и алава анда Псалмы сыкавэн, кай о Иегова любий амэн?
7 Патя лэ Иеговастирэ алавэсти. И Библия сас пистромэ через лэ Дэвлэско зор. Важ када вся, со ԥэнэнпэ важ лэстэ андэ кадэя книӷа, — када чачимос. Шув сама, со о Давидо пистросардя пала кода, сар о Иегова анда ди заботийпэ пала мануша: «О Иегова паша кодэва, ко бидаса умардо, и фэрий кодэлэс, касти ԥарэс по ди» (Пс. 34:18). Кала тутэ ԥарэс по ди, тути можэт тэ здэлпэ, кай ту совсем екжэно. Но када най кадя. О Иегова паша тутэ. Во ӷанэн, кай андэ кацави время во трэбуй тути со май фартэ. Инке о Давидо пистросардя кацавэ алава: «Фэрисар мэрнэ ясва андэ пэско ӷаравлицко гоно» (Пс. 56:8). О Дэл ӷанэн, со терэлпэ андэ тири жызня. Во полэл, сар тути ԥарэс и дуқанэс. И лэско ди фартэ мучийпэ, кала во диқэл, сар мучиспэ ту. О Иегова ԥэнэса стидэл, гаравэл и фэрий кажно тири ясвин. Вонэ важ лэстэ кадя жэ куч, сар кажно капля паи важ о мануш, саво жал па пустыня. Андо Псалом 139:3 пистромэ: «Ту ӷанэс всаворэ мэрнэ дрома». О Иегова ӷанэн вся, со ту терэс, но со май бут сама во шол пэ тири лащи дила (Евр. 6:10). Васо? Важ кода кай во цэний, кай ту старыиспэ тэ радуис лэско диa.
8 Андэ Библия исин инке бут авэр стихоря, савэ лэн лэ одестар. Через лэндэ о Иегова сар бы ԥэнэн: «Мэ камав, кай ту тэ ӷанэс, сар дэ куч ту важ мандэ и сар дэ фартэ мэ тут любисарав». Но о Бэнг камэл тэ доԥэнэн, кай када най кадя. Важ када, кала тути упалэ авэла ԥарэс тэ патяс, кай о Иегова любий тут, пуш пэстар: «Касти мэ лава тэ патяв — кодэлэсти, кастар жал ек о хохаимос, или лэ Дэвлэсти, саво никала на хохавэл?» (Иоан. 8:44; Пс. 31:5).
9. Саво алав дэл о Иегова кодэлэнди, ко лэс любий? (Исход 20:5, 6).
9 На бистэр, кай о Иегова вся и время любий кодэлэн, ко любий лэс. Шам сама, со о Иегова ԥэндя лэ Моисеёсти и всаворэ народости. (Проадинон Исход 20:5, 6.) О Дэл дя алав, кай на парашэла тэ любий кодэлэн, ко любий лэс. О Иегова отдя амэнди пэско ди. Кочай, амэ можэм тэ патяс, кай во никала на отԥэндёла тэ любий кодэлэс, ко любий лэс (Неем. 1:5). Важ када, кала тути авэла ԥарэс тэ патяс, кай о Иегова тут любий, пуш пэстар: «Мэ любисарав лэ Иеговас?» Ай потом погиндосар: если ту любис лэ Иеговас и старыиспэ тэ радуис лэско ди, вижал, и во тут фартэ любий (Дан. 9:4; 1 Кр. 8:3). Аврэ алавэнца, если ту точно ӷанэс, кай любис лэ Дэвлэс, состэ тоди тэ пережываеш, со лэстэ андо ди каринг тутэ? Во вся и время лэла тэ любий тут и никала на ашавэла.
10, 11. Сар трэбуй тэ диқас пэ лэ Иисусостири жэртва? (Галатия 2:20).
10 Гиндосар важ лэ Иисусостири жэртва. О Иегова стердя кучутно подарко лэ манушэнди, кала бишалдя пэстирэ Шавэс пэ ԥув, кай во тэ отдэл пэстири жызня важ амэндэ (Иоан. 3:16). Ай можно тэ ԥэнэс, кай о Иисусо муля лично важ тутэ? Да. Погиндосарам важ о апостало Павло. Англа кода сар тэ ашэл лэ Иисусоско ученико, во тердя най ек баро бэзэх. Кала во болделя, во на парашэля тэ пристол бут зор, кай лэс тэ на цырдэл каринг кода, со неправильно (Римо 7:24, 25; 1 Тим. 1:12—14). И всаек во гиндояс, кай лэ Иисусостири жэртва — када подарко, саво о Иегова стердя лично важ лэстэ. (Проадинон Галатия 2:20.) О Иегова закамля, кай о Павло тэ запистрой кадэва гиндо андэ Библия. Состэ? Кай тэ сытярэл амэн (Римо 15:4). О Иегова камэл, кай ту тожэ тэ полэс: лэ Иисусостири жэртва — када подарко лично важ тутэ. Если ту лэса кадя тэ гиндос, када поможыя тути инке май фартэ тэ патяс, кай о Иегова любий тут.
11 Амэ анда вся ди блаӷодарни лэ Иеговасти! Во бишалдя пэ ԥув пэстирэ Шавэс, кай во тэ отдэл важ амэндэ пэстири жызня. Но о Иисусо най кати важ када авеля пэ ԥув. Во трэбуй сас тэ росԥэнэн лэ манушэнди о чачимос пала Дэл (Иоан. 18:37). Например, вонэ трэбуй сас тэ уӷанэн, сар дэ фартэ о Иегова любий пэстирэ бэятонэн.
САР О ИИСУСО ПОМОЖЫЙ ТУТИ ТЭ ПАТЯС, КАЙ О ИЕГОВА ЛЮБИЙ ТУТ
12. Васо можно тэ патяс кодэлэсти, со о Иисусо росԥэнэнас важ о Иегова?
12 Кала о Иисусо сас пэ ԥув, лэсти чалёлас тэ росԥэнэн лэ манушэнди важ о Иегова (Лука 10:22). Лэ Иисусостирэ алавэнди исин патяимос. Васо? Важ кода кай во жувэлас паша Дэл по небо кадя бут бэрша, кай амэ не можэм дажэ када тэ полас (Клс. 1:15). Во диқэлас, сар о Иегова любий лэс, сар во любий лэ анӷелонэн и лэ манушэн. О Иисусо ӷанэн, сар дэ фартэ о Иегова любий пэстирэ кандинэ бэятонэн. Сар лэ Дэвлэско Шаво поможый амэнди тэ патяс, кай амаро Дад любий амэн?
13. Сар о Иисусо поможый амэнди тэ полас лэ Иеговас най кати сар Дэвлэс, но и сар амарэ Дадэс?
13 О Иисусо камэл, кай амэ тэ диқас по Иегова кадя жэ, сар во. Андэ штар Евангелии о Иисусо май бут чем 160 раз ԥэнэнас по Иегова Дад. Кала во дэлас дума пэстирэ учениконэнца, во ԥэнэнас кацавэ алава, сар «тумаро Дад» и «тумаро небесно Дад» (Матф. 6:8, 26). Англа кода сар о Иисусо тэ авэл пэ ԥув, лэ Иеговастирэ кандинэ мануша, кала росԥэнэнас пала лэстэ или взвинаспэ каринг лэстэ, часто ԥэнэнас кацавэ алава, сар «Само Зорало», «Баро Дэл» и «Ашунгло Создателё». Но о Иисусо часто ԥэнэнас пэр лэстэ просто «Дад». Када сыкавэлас, пэскати дэ пашэ о Дэл камэл тэ авэл каринг пэстирэ мануша. Со тоди вижал? О Иисусо камэл, кай амэ тэ полас лэ Иеговас сар Дадэс, саво любий пэстирэ бэятонэн и заботийпэ пала лэндэ. Акана подам дума пала дуй примероря, кала о Иисусо ԥэнэнас алав «Дад».
14. Сар о Иисусо сыкадя, кай кажно андар мэндэ куч амарэ небеснонэ Дадэсти? (Матфеё 10:29—31). (Кадяжэ диқэн и картинка.)
14 Спэрва подаса дума важ лэ Иисусостирэ алава, савэ запистромэ андо Матфеё 10:29—31 (проадинон). Котэ ԥэнэнпэ важ и чириклёра. Хоть кадэла чириклёра не моӷут тэ любин лэ Иеговас и тэ тэлён лэсти, во ӷанэн кажнона андар лэндэ. Пэскати жэ май фартэ о Иегова заботийпэ пала кажно андар мэндэ, важ кода кай амэ любисарас лэс и андярас лэстири время! Андо 30-то стихо ԥэнэнпэ: «Тумэндэ дажэ всаворэ бал по шэро виадиносардэ». Если о Иегова ӷанэн дажэ кацави мелочь, амэ можэм точно тэ ӷанас, кай во анда ди шол сама кажнонэс андар мэндэ. Вижал, о Иисусо фартэ камэл, кай амэ тэ полас, сар жэ амэ куч амарэ небеснонэ Дадэсти.
Если о Иегова шол сама пэ кажно чириклёры, то кати погиндосар, пэскати дэ куч лэсти ту — лэско кандино бэято, саво кадя лэс любий! (Диқэн о абзацо 14.)
15. Со амэ уӷанас пала амаро небесно Дад анда лэ Иисусостирэ алава, савэ запистромэ андо Иоанно 6:44?
15 Роздиқаса дуйто примеро, кала о Иисусо ԥэндя алав «Дад». (Проадинон Иоанно 6:44.) О Дэл екжэно пашардя тут каринг пэстэ, поможысардя тэ уӷанэс и тэ полюбис лэс. Васо во када стердя? Важ кода кай додиқля тиро лашо ди (Дила 13:48). Кала о Иисусо ԥэндя и алава анда Иоанно 6:44, во, можэт, проԥэндя лэ Иеговастирэ алава, савэ запистромэ андо Иеремия 31:3. Котэ ԥэнэнпэ: «Мэ полюбисардэм тут и кадя авэла вечно... Через и предано любовь мэ пашардэм тут каринг пэстэ». (Сыстон Осия 11:4.) Погиндосар, со када сыкавэл. О Иегова на парашэл тэ диқэл андэр тутэ варисо лашо, дажэ если ту екжэно када на диқэс.
16. а) Сости сытярэлас о Иисусо и васо амэ можэм тэ патяс лэсти? б) Сар инке май драго тэ полас, кай о Иегова — само лашо Дад? (Диқэн и рамка «О Иегова — када тиро само лашо Дад».)
16 Кала о Иисусо ԥэнэн по Иегова «амаро Дад», кадэлэса во камэл тэ ԥэнэн амэнди: «О Иегова най кати мэрно Дад — во и тиро Дад тожэ. Патя манди: во тут фартэ, фартэ любий». Важ када, если дэкала тути ԥарэс тэ патяс андэ кода, кай о Иегова любий тут, сразу гиндосар важ кода, сости сытярэлас о Иисусо. Важ кода кай во фэдэр всаворэндар ӷанэн амарэ Дадэс и вся и время дэл дума ек о чачимос (1 Пёт. 2:22).
СТАРЫСАВ ИНКЕ МАЙ ФАРТЭ ТЭ ПАТЯС, КАЙ О ИЕГОВА ЛЮБИЙ ТУТ
17. Васо амэнди трэбуй тэ на парашас тэ старысавас инке май фартэ тэ патяс, кай о Иегова амэн любий?
17 Амэнди трэбуй тэ на парашас тэ старысавас инке май фартэ тэ патяс, кай о Иегова амэн любий. Сар амэ ужэ полям, амаро хытро вороӷо, о Сатана, ӷотово тэ вижал анда цыпа, кай амэ тэ парашас тэ уӷодисарас лэ Иеговасти. Во камэл, кай амэ тэ вимардювас анда зор и тэ умэкас и вас. Важ када во на парашэла тэ пристол вся о зор, кай тэ доԥэнэн амэнди, кай о Иегова амэн на любий. Но амэ на ласа тэ патяс андэ кадэва хохаимос! (Иов 27:5).
18. Со поможыя амэнди инке май фартэ тэ патяс, кай о Иегова любий амэн?
18 Со поможыя тути май фартэ тэ патяс, кай о Дэл любий тут? Вся и время манг лэ Иеговас андэ молитва, кай во тэ поможый тути тэ диқэс пэр пэстэ кадя, сар диқэл пэр тутэ во. Адиносар андэ Библия и стихоря, андэ савэ росԥэнэнпэ, сар во анда ди заботийпэ пала пэстирэ мануша. На бистэр, кай о Иегова никала на парашэл тэ любий кодэлэс, ко любий лэс. Старысав тэ полэс, кай лэ Иисусостири жэртва — када лэ Иеговаско подарко лично важ тутэ. И патя лэ Иисусостирэ алавэсти, кай о Иегова — тиро небесно Дад. Тоди, если тутар пушэна: «Ай ту точно ӷанэс, кай о Иегова любий тут?» — ту на замешкеисапэ и ԥэнэса: «Да, мэ точно када ӷанав! И мэ кажно дес старысавав тэ терав варисо, кай во тэ диқэл, кай мэ тожэ лэс любисарав!»
ДИЛИ 154 Любовь на прожал
a Инке май бут стихоря, савэндар по ди ашэл май вушэро, исин андэ книжка «И Библия поможый тэ андярас лэ Дэвлэстири время» (диқэн и тема «Здэлпэ, кай нисо на ашас»).