На дэн тэ мудардёл «и яг кай о Йахо!»

1. Сар андэ Библия росԥэнэнпэ пала чачуни любовь?

И ЛЮБОВЬ... «Вой — ԥабарди яг. Вой — яг кай о Йахо. И барэ пая на мударэна и любовь, и лэна на схалавэна ла» (Песня 8:6, 7)b. Савэ дэ шукарнэ алава пала чачуни любовь! Вонэ поможын лэ хуласти и ла хулаяти тэ полэн важно гиндо: тумари любовь можэт тэ ԥабол вся и вечность.

2. Со трэбуй тэ терэл о хулай и хулаи, кай лэндири любовь тэ на шудрёл?

² Лэла о хулай и хулаи тэ любин ек еқэс вся и жызня? Када зависит лэндар. Призындярам примеро. И яг можэт тэ ԥабол вся и время — но кати тоди, если андэр латэ подшон и каш. Если нико када на терэл, и яг полокорэс можэт тэ мудардёл. Кадяжэ и любовь машкар о хулай и хулаи можэт тэ ашэлпэ састи вся и время кати тоди, если вонэ заботинпэ пала латэ. Дэкала о хулай и хулаи моӷут тэ полэн, кай лэндири любовь шудрёл. Када можэт тэ авэл через и проблемы лэ ловэнца, лэ зорэса или через и трудности, кай тэ барярэн лэ бэятонэн. Важ када, кучутнэ хула́я и хулая́, сар тумэ можэте тэ подритярэн «и яг кай о Йахо»? Андэ кадэя статья амэ роздиқаса трин советоря, савэ поможына тумэнди тэ фэрин тумари любовь и тэ авэн бахталэ андо ериc.

САСТЯРЭН ПЭСТИРИ ДРУЖБА ЛЭ ИЕГОВАСА

3. Сар и пашутни дружба лэ Иеговаса поможый, кай и любовь андо ери тэ авэл май састи? (Экклезиаст 4:12). (Диқэн кадяжэ и картинка.)

³ Кай «лэ Иеговастири яг» тэ ԥабол, о хулай и хулаи трэбуй тэ пристон вся о зор, кай тэ ашэн май пашэ каринг о Иегова. Саво лашымос када анэна лэндирэ ерести? Если о хулай и хулаи цэнин пэстири дружба лэ Иеговаса, вонэ анда вся оди прилэн лэстирэ советоря. Ай када поможый лэнди тэ виритярэн о ԥаримос, через саво лэндири любовь можэт тэ шудрёл. (Проадинон Экклезиаст 4:12.) Кодэла, кастэ лащи дружба лэ Иеговаса, старыинпэ тэ терэн кадя жэ, сар о Иегова, и андэ вся тэ шонпэ пэр лэстэ. Вонэ пристон о зор, кай тэ обжанпэ ек еқэса по доброму, на грабинпэ тэ холявэн и анда вся оди простин ек еқэс (Эф. 4:32—5:1). Андэ кацаво ери и любовь лэла кати тэ барёл. И Лена, сави миростэ ужэ май бут чем 25 бэрш, ԥэнэн: «Если кай о мануш лащи дружба лэ Иеговаса, лэс май вушэро тэ любис и тэ стос патив пэр лэстэ».

4. Васо о Иегова витидя лэ Иосифос и ла Мария, кай вонэ тэ авэн родителя важ о Иисусо?

⁴ Роздиқам примеро анда Библия. Кала о Иегова витидэлас лэ родителёнэн важ о Иисусо, машкар бут лэ Давидостирэ потомкоря, во шутя сама по Иосифо и Мария. Васо? Важ кода кай лэндэ сас лащи дружба лэ Иеговаса. О Дэл ӷанэнас, кай ӷлавно андэ лэнго ери авэла и любовь каринг лэстэ. Хула́я и хулая́, сости тумэ можэте тэ сытён кай о Иосифо и Мария?

5. Сости и хула́я моӷут тэ сытён кай о Иосифо?

⁵ О Иосифо анда вся оди прилэлас о руковоцтво лэ Иеговастар, и важ када во смоӷ тэ ашэл лашо хулай. Андэ Библия росԥэнэнпэ пала трин случаёря, кала о Дэл ԥэнэнас лэсти, сар лэ хуласти андо ери, со во трэбуй тэ терэл. И кажно разо во ӥто кандэлас, дажэ кала через када фартэ парудёлас лэстири жызня (Матф. 1:20, 24; 2:13—15, 19—21). Кодэлэса, кай о Иосифо кандэлас лэ Дэвлэс, во фэрияс ла Мария, подритярэлас и заботияспэ пала латэ. Тоди и Мария инке май фартэ любияс лэс и столас пэр лэстэ инке май бари патив. Кучутнэ хула́я, сости тумэ можэте тэ сытён кай о Иосифо? Родэн и советоря анда Библия пала кода, сар тэ заботинпэ пала пэско ериd. Прилэн кадэла советоря, — дажэ тоди, кала через када тумари жызня фартэ парудёла, — тоди тумэ сыкавэна любовь каринг и хулаи, и тумаро брако ашэла инке май бахтало. Ек ԥэй анда Вануа́ту, сави миростэ май бут чем 20 бэрш, ԥэнэн: «Кала мэрно хулай, старыийпэ тэ арақэл и тэ прилэл лэ Иеговаско руковоцтво, мэ став пэр лэстэ инке май бари патив. Мандэ по ди спокойно и мэ патяв, кай во приля правильни ришэнии».

6. Сости и хулая́ моӷут тэ сытён кай и Мария?

⁶ Кай и Мария сас лащи дружба лэ Иеговаса. Вой патялас андо Дэл най важ кода, кай кадя терэлас лако хулай о Иосифо. Вой допутя ӷанэнас и Свынто Писанияe. Кадяжэ вой витидэлас время, кай тэ погиндой пала латэ (Луки 2:19, 51). И дружба лэ Иеговаса поможысардя ла Марияти тэ ашэл лащи хулаи. Адес бут хулая́ старыинпэ тэ терэн кадя жэ, сар и Мария. Например, акэ со росԥэндя ек ԥэй, савя ақарэн Эмико́: «Кала мэ сымас цэрэ, мандэ сас пэско ӷрафико важ и дэвликони дила. Но кала мэ жылэм миростэ, вся паруделя. Акана мангэлпэ мэрно хулай. Во розлэл о стихо по дес и проандярэл и семейно изучения. Андэ ек маменто мандэ сас кацаво андо ди, кай мэрни вера ля зависеть мэрнэ хуластар. Но мэ полэм, кай манди екжэняти трэбуй сас тэ терав вся, кай мандэ тэ авэл састи дружба лэ Иеговаса. Када мэрни атвецтвеность. Важ када мэ лэм тэ витидав время, кай тэ побэшав екжэни мэрнэ Дэвлэса — када тэ мангавпэ, тэ адиносарав лэско Алав и тэ розмышляю пала кода, со проадиносардэм» (Гал. 6:5). Кучутнэ хулая́, если тумэ лэна тэ састярэн пэстири дружба лэ Иеговаса, тумарэ хула́я лэна инке май фартэ тумэн тэ любин и тэ хвалин (Прит. 31:30).

7. Сости адес и еря моӷут тэ сытён кай о Иосифо и кай и Мария, сар тэ тэлён лэ Иеговасти вмести?

⁷ Кадяжэ о Иосифо и Мария вмести терэнас вся, кай лэндири дружба лэ Иеговаса тэ авэл май састи. Вонэ полэнас, сар дэ важно тэ тэлён лэ Иеговасти всаворэ ереса (Луки 2:22—24, 41; 4:16). Возможно, лэнди сас када тэ терэн найвушэро, особено, кала лэндэ арақаделэпэ бэяцэ. Но лэндэ вижыля када тэ стерэн. Саво дэ лашо примеро важ адесутнэ еря! Если тумэндэ исин бэяцэ, тумэнди можэт тэ авэл найвушэро тэ авэн пэ собрании или тэ стон и время и о дес, кала тэ прожал и семейно изучения. Ай инке можэт тэ авэл май ԥарэс тэ виарақэн и время, кай тэ поизучаете лэ Дэвлэско Алав или тэ помангэнпэ лэдуй. Но на бистрэн, если тумэ тэлён лэ Иеговасти вмести, тумэ ашэн май пашэ каринг лэстэ и каринг ек еқэстэ. Важ када мэк и поклонения лэ Иеговасти тумэндэ авэла пэ пэрво ҭан.

8. Кала андо ери исин трудности, саво совето поможыя, сар тэ проандярэн и семейно изучения?

⁸ Ай со если андэ тумаро ери исин трудности? Тоди можэт тэ авэл найвушэро тэ стидэнпэ вмести пэ семейно изучения. Если када кадя, розлэн спэрва найбари тема, сави можэт тэ чалёл тумэнди лэдонди. Када поможыя, кай тумэ тэ авэн май пашэ ек еқэсти и тэ камэн тэ терэн лэ Дэвлэстири дила вмести.

ПРОАНДЯРЭН И ВРЕМЯ ВМЕСТИ

9. Васо важно, кай о хулай и хулаи тэ проандярэн и время вмести?

⁹ И любовь машкар хулай и хулаи можэт тэ ԥабол блаӷодаря кодэлэсти, кай вонэ проандярэн и время вмести. Када поможыя лэнди тэ полэн, со гиндой и со андо ди латэ чи лэстэ (Быт. 2:24). Акэ пэр со шутя сама и Лилия и о Руслано посли ябьяв. Ужэ прожыля май бут чем 15 бэрш. И Лилия вспоминает: «Амэндэ на сас возможность тэ проандярас и время ек еқэса скати камасас. Посли бути амэндэ сас дила цэрэ жы па кан, ай потом инке и бэяцэ арақаделэ. Амэ полям, если амэ на ласа тэ витидас время важ пэстэ, тоди через када амэ можэм тэ дурювас ек еқэстар».

10. Сар о хулай и хулаи моӷут тэ прилэн о принцыпо анда Эфесянам 5:15, 16?

¹⁰ Со поможыя тумэнди тэ витидэн и время важ ек еқэстэ? Драго гиндон пала када май данглал. (Проадинон Эфесянам 5:15, 16.) О ԥрал анда Нигерия, савэс ақарэн Узонду, ԥэнэн: «Андэ пэско ӷрафико мэ всегда запистросарав и время, сави камав тэ проандярав пэстиря хулаяса. И кадэя запись тердёл андэ мэрно ӷрафико пэ пэрво ҭан» (Флп. 1:10). Ай акэ со терэл и Настя, савятэ о хулай раёно барэдэр ԥрал андэ Молдова. Вой росԥэнэн: «Мэ терав пэстири дила, пока мэрно хулай занято. Ай кала во свободно, амэ можэм тэ проандярас и время вмести». Но со, если тумэндэ кадя бут дила, кай тумэнди ԥарэс тэ виарақэн и время важ ек еқэстэ?

11. Сави дила терэнас вмести о Акила и Прискилла?

¹¹ И еря моӷут бутэсти тэ сытён кай о Акила и Прискилла. Кадэлэ ерес любинас бут христианоря андэ пэрво вико (Рим. 16:3, 4). Хоть андэ Библия пала лэндири жызня пистромэ найбут, амэ ӷанас, кай вонэ терэнас бути, росԥэнэнас важ о Дэл и поможынас аврэнди. Вся када вонэ терэнас вмести (Дила 18:2, 3, 24—26). Всегда, кала пистромэ андэ Библия пала Акила и Прискилла, лэндирэ алава пистронпэ вмести, ай най по ек.

12. Со поможыя лэ хуласти и ла хулаяти тэ проандярэн и время май бут вмести?

¹² Сости и еря моӷут тэ сытён кай о Акила и Прискилла? Погиндон, сави дила тумэ камэн тэ терэн. Наверно, ла фартэ бут. Можэте тумэ тэ терэн кадэя дила вмести, ай най по ек? Например, о Акила и Прискилла вмести росԥэнэнас пала Дэл. Ай тумэндэ вижал часто тэ служын ек еқэса? О Акила и Прискилла кадяжэ вмести терэнас бути. Дажэ если тумэ терэн бути андэ разни ҭана, вижал тумэндэ тэ терэн вмести цэрутни дила? (Эккл. 4:9). Кала тумэ лэдуй терэн варисави дила, тумэ авэна сар ек команда, и тумэндэ авэла возможность тэ подэн дума ек еқэса. О Роберто и Линда жэнати ужэ май бут чем 50 бэрш. О Роберто росԥэнэн: «Чаче тэ ԥэнав, амэндэ най фартэ бут время, кай тэ отцыювас вмести, но кала мэ халавав и посуда, мэрни хулаи ла виқосэл, ай кала мэ терав бути андо оӷоро́до, вой тожэ терэл дила паша мандэ, и мэ фартэ бахтало! Кала амэ терас ек дила, када пашарэл амэн, и амари любовь ашэл инке май бари».

13. Со трэбуй, кай о хулай и хулаи па чачимастэ тэ авэн пашэ ек еқэстэ?

¹³ Но сэрэн: кай о хулай и хулаи па чачимастэ тэ авэн пашэ ек еқэсти, на хутила просто тэ жувэн еқэҭанэ. Ек хулаи анда Бразилия росԥэнэн: «Адес андэ амари жызня фартэ бут дила. И мануша моӷут тэ гиндон, кай если вонэ жувэн андэ ек цэр, тоди вижал вонэ ужэ проандярэн и время вмести. Но мэ полэм, кай тэ находисавас ек паша ек — када инке най вся. Пэ бутэстэ май важно тэ шас сама ек еқэс». Диқэн, сар када терэл о Бру́но и лэстири хулаи и Таи́с. О Бруно росԥэнэн: «Кала амэ проандярас и время вмести, амэ отстас андэ риг и телефоноря и просто драго проандярас и время вмести».

14. Со моӷут тэ терэн о хулай и хулаи, если лэнди на чалёл тэ проандярэн и время вмести?

¹⁴ Ай со, если тумэнди на чалёл тэ проандярэн и время вмести? Возможно кода, со чалёл еқэсти, совсем на чалёл аврэсти, или тумэ нащи тэрпин ек еқэс. Со тумэ можэте тэ стерэн? Погиндон пала яг, пала сави амэ ужэ дям дума. Вой на росԥабол сразу. Спэрва шон найбарэ каштора, ай тоди ужэ шон май барэ. Кадяжэ и тумэ, спэрва кажно дес хоть набут проандярэн и время вмести. Терэн кодэя дила, сави чалёл тумэнди лэдонди, ай най кода, через со тумэ лэна тэ споринпэ (Иак. 3:18). Дажэ кацави найбари дила поможыя, кай тумари любовь тэ росԥабол май фартэ.

СТОН ПАТИВ ПЭ ЕК ЕҚЭСТЭ

15. Сар и патив можэт тэ поможый лэ хуласти и ла хулаяти, кай лэндири любовь тэ ԥабол?

¹⁵ Кай и яг тэ ԥабол, трэбуй воздухо, андэ саво исин кислородо. Если лэс нинай и яг можэт ӥто тэ мудардёл. Кадяжэ и любовь можэт ӥто тэ шудрёл, если нинай патив. Ай если о хулай и хулаи старыинпэ тэ сыкавэн ек еқэсти патив, вонэ подритярэн, кай лэндири любовь вся и время тэ ԥабол. Но кадяжэ сэр: дажэ если ту гиндос, кай сыкавэс патив ла хулаяти или лэ хуласти, важно кай во или вой када тэ полэл лэ одеса. О Аре́то и Пе́нни жэнати ужэ май бут чем 25 бэрш. И Пенни ԥэнэн: «Амэ стас патив ек пэ еқэстэ. Андэ амаро цэр исин татимос. Амэ вся и время можэм свободно тэ виԥэнас кода, со по ди, важ кода кай ӷанас, кай ек еқэсти када куч». Ай со можэш тэ стерэс ту, кай тиро хулай или хулаи лэ одеса тэ полэн, кай ту стос пэр лэстэ патив? Давайте роздиқаса лэ Авраамоско и ла Саррако примеро.

16. Сости и хула́я моӷут тэ сытён кай о Авраамо? (1 Пётро 3:7).(Диқэн кадяжэ и картинка.)

¹⁶ О Авраамо столас патив пэ Сарра. Во шолас сама пэ кода, со вой ԥэнэнас и лэсти сас куч кода, со латэ по ди. Еқвар и Сарра сас фартэ растроено, кай выԥэндя вся лэ Авраамости и дошалярдя лэс андэ пэско ԥаримос. Со стердя о Авраамо? Андярдя во пэс ласа кадяжэ? Най. Во ӷанэнас, кай и Сарра сас кандини и найӷордо хулаи. О Авраамо виашундя ла и стердя вся, кай тэ ришый латири проблема (Быт. 16:5, 6). Сости лэстар моӷут тэ сытён и хула́я? Тумэндэ исин власть тэ прилэн ришэния важ вся о ери (1 Кор. 11:3). Ту сыкавэса пэстири любовь, кала лэса тэ шос сама пэ кода, со ԥэнэн и хулаи. Када фартэ важно, если и ришэния, можэт фартэ тэ повлияет пэр латэ (1 Кор. 13:4, 5). Дэкала ла хулаяти можэт тэ авэл ԥарэс и лати трэбуй тэ виԥэнэн кода, со латэ по ди. Лэса ту внимательно ла тэ виашунэс? Сыкавэса ту патив каринг латэ пэстиря ригатар? (Проадинон 1 Пётро 3:7.) О Дима и Анжела жэнати почти 30 бэрш. И Анжела росԥэнэн, васо вой уверено, кай лако хулай стол пэр латэ патив: «Кала мэ растроено или кала манди трэбуй просто тэ подав дума, о Дима вся и время ӷотово ман тэ виашунэл. Во на грабийпэ тэ холявэл, дажэ если мэ нэ моӷу тэ зритярав пэс».

17. Сости и хулая́ моӷут тэ сытён кай и Сарра? (1 Пётро 3:5, 6).

¹⁷ И Сарра столас патив, кала подритярэлас лэ Авраамос андэ лэстирэ ришэнии (Быт. 12:5). Еқвар о Авраамо мангля ла тэ ашавэл пэстири дила и тэ гитой бут марно, кай тэ шол сама лэ манушэн, савэ нэожыдано лэндэ авелэ (Быт. 18:6). И Сарра сразу кангля лэ Авраамос. Кучутнэ хулая́, тумэ можэте тэ терэн кадя жэ, сар и Сарра, кала подритярэн пэстирэ хулан андэ лэндирэ ришэнии. Кадя тумэ састярэна пэско ери. (Проадинон 1 Пётро 3:5, 6.) О Дима, пала саво амэ дям дума май данглал, росԥэнэн, васо во уверено, кай лэстири хулаи стол пэр лэстэ патив: «Манди фартэ куч, кала и Анжела старыийпэ тэ подритярэл мэрнэ ришэнии дажэ тоди, кала амэ на гиндосарас еқэндар. Если и ришэния сас най фартэ мудро, вой манди на вихал оди». Сар дэ вушэро тэ любис кодэлэс, ко стол пэр тутэ патив!

18. Васо лэ хуланди и лэ хулаянди важно тэ пристон зор, кай лэндири любовь тэ ԥабол?

¹⁸ О Сатана камэл тэ мударэл и любовь, сави ԥабол андэ христиански еря. Во ӷанэн, кай если о хулай и хулаи парашэна тэ любин ек еқэс, вонэ лэна тэ дурён лэ Иеговастар! Но и чачуни любовь нисоса на мударэса! Важ када мэк тумари любовь андо ери авэла кацави жэ, сар пистромэ андэ лэ Соломоностири дили. Терэн вся со па тумаро зор, кай о Иегова тэ авэл пэ пэрво ҭан андэ тумаро ери. Витидэн и время важ ек еқэстэ. Стон патив пэ кода, со андо ди ек еқэстэ, и пэ кода, со кажно андар тумэндэ камэл. Если тумэ лэна кадя тэ терэн, тумаро ери лэла тэ прославляет лэ Иеговас, савэстар жал и чачуни любовь. Тоди тумари любовь лэла тэ ԥабол вечно!