Аштярас «о форо, саво трэбуй тэ авэл англэ»

1. Со о Иисусо ԥэндя пала Иерусалимо?

АНГЛА кода сар о Иисусо тэ мэрэл, во ԥэндя, со авэла англэ. Во ԥэндя пэстирэ учениконэнди, кай о Иерусалимо окружына «бут халавдэ» и тоди лэнди трэбуй авэла тэ нашэн андэ Иудея (Лука 21:20—22).

2. Пэр со шутя сама о апостало Павло, кала пистросардя лэ христианонэнди, савэ жувэнас андэ Иудея и Иерусалимо?

² Важ дэсавэ бэрша англа кода, сар о Иерусалимо тэ окружын и римски халавдэ, о апостало Павло пистросардя о письмо лэ христианонэнди андэ Иудея и андо Иерусалимо. Адес амэ ԥэнас пэр лэстэ Письмо лэ евреёнэнди. О Павло ԥэндя лэ ԥралэнди и лэ ԥэянди, со вонэ трэбуй тэ терэн. Када поможысардя лэнди тэ авэн ӷотови каринг кода, со трэбуй сас тэ авэл англэ. Ай со имено трэбуй сас тэ авэл? О Иерусалимо трэбуй сас тэ розмарэн. Кай лэ христианонэн тэ обжал кадэя бида, вонэ трэбуй сас тэ ужан анда кадэва форо. Лэнди трэбуй сас тэ ашавэн пэстирэ цэра и о затеримос. О Павло пистросардя пала Иерусалимо: «Но амэ всаворэ́ одеса аштярас о форо, саво трэбуй тэ авэл англэ» (Евр. 13:14).

3. Со када «о форо, саво састэс тердёл» и васо амэ лэс аштярас?

³ Лэ христианонэнди, савэ ужанас анда Иерусалимо и Иудея, сас найвушэро. Лэндар, наверно, приасанаспэ и лажаварэнас важ кадэя решэния. Но имено вой спасысардя лэнди и жызня. Адес амэнди тожэ найвушэро. Дэсавэ мануша гиндон, кай амэ дилорэ, важ кода кай на камас тэ розбарвадювас и на надеисавас пэ мануша, савэ моӷут тэ решын и проблемы андэ кадэя люма. Ай пэр со жэ амэ надеисавас? Амэ ӷанас, кай ӥто кадэя найлащи люма будэр на авэла, важ када амэ аштярас «о форо, саво састэс тердёл»a (Евр. 11:10; Матф. 6:33). Андэ кадэя статья амэ уӷанаса, сар лэ Павлоско письмо поможысардя лэ христианонэнди андо пэрво вико тэ аштярэн «о форо, саво трэбуй тэ авэл англэ». Сар о Павло поможысардя лэнди тэ авэн ӷотови каринг кода, со лэн аштярэл англэ, и саво лашымос моӷут тэ анэн лэстирэ советоря амэнди?

ПАТЯ ЛЭ ИЕГОВАСТИ —ВО НИКАЛА ТУТ НА АШАВЭЛА

4. Васо о Иерусалимо сас важ и христианоря фартэ куч?

⁴ О Иерусалимо сас важ и христианоря фартэ куч. Котэ сас стиди пэрво христианско собрания андо 33 бэрш андэ амари эра. Кадяжэ котэ сас о руководящё совето. Ай инке кай бут христианоря андэ кодэва форо сас пэстирэ цэра и авэр мищимос. Но о Иисусо ԥэндя пэстирэ учениконэнди, кай лэнди прижалапэ тэ унашэн най кати анда Иерусалимо, но дажэ анда Иудея (Матф. 24:16).

5. Сар о Павло поможысардя лэ христианонэнди тэ авэн ӷотови каринг кода, со трэбуй тэ авэл англэ?

⁵ О Павло камэлас, кай и христианоря тэ авэн ӷотови тэ ашавэн о Иерусалимо. Важ када во поможысардя лэнди тэ полэн, сар о Иегова диқэл пэ кадэва форо. О апостало ԥэндя лэнди, кай о храмо, и священикоря и жэртвы, савэ анэнас котэ, будэр на сас свынти важ о Дэл (Евр. 8:13). Ай инке май бут мануша андэ кодэва форо на патяе андо Иисусо. Лэ манушэнди будэр на трэбуй сас тэ жан андо Иерусалимо, кай тэ тэлён лэ Иеговасти. Важ када кадэва форо и о храмо розмарэна (Лука 13:34, 35).

6. Васо лэ христианонэнди трэбуй сас тэ сэрэн лэ Павлостирэ алава, савэ запистромэ андэ Евреёря 13:5,6?

⁶ Кала о Павло пистросардя о письмо лэ евреёнэнди, бут ко камэлас тэ жувэл андо Иерусалимо. Ек мануш, саво жувэлас андэ кодэя время, ԥэндя по Иерусалимо, кай када «само лашо анда всаворэ фороря най кати андэ Иудея, но и па вся кодэва краё». И евреёря анда разни страны авэнас интя кажно бэрш пэ празникоря. Важ када вонэ тратинас андэ кодэва форо бут ловэ. Наверно, када дэлас возможность лэ христианонэнди тэ затерэн лашэ ловэ. Можэт, важ када о Павло ԥэндя лэнди: «Тумэ на трэбуй тэ здран пала ловэ, авэн лошалэ кодэлэсти, со тумэндэ исин». Ай потом во ԥэндя, сави обещяния о Иегова дя кажнонэ пэстирэ манушэсти: «Мэ никала на ашавава тут и никала на помэкава тут» (проадинон Евреёря 13:5, 6; Втор. 31:6; Пс. 118:6). И христианоря, савэ жувэнас андо Иерусалимо и андэ Иудея, трэбуй сас тэ сэрэн кадэла алава. Васо? Важ кода кай через набут время, лэнди прижыляпэ тэ ашавэн пэстирэ цэра, лащи бути и почти вся пэско мищимос. Лэнди трэбуй сас тэ присытён каринг совсем авэр жызня андо чужо форо.

7. Васо амэнди ужэ акана трэбуй тэ надеисавас по Иегова?

⁷ Сости амэ сытювас? Ай со трэбуй авэла тэ пэрэжувас амэнди? «И само бари бида» и о Армагеддоно (Матф. 24:21). Важ када, амэнди важно тэ отшас и линдра и тэ авас ӷотови каринг кода, со амэн аштярэл англэ (Лука 21:34—36). Кала авэла и само бари бида, возможно, амэ хасараса пэско цэр и вся амаро мищимос. Тоди амэнди трэбуй авэла всаворэ одеса тэ патяс, кай о Иегова никала амэн на ашавэла. Но тэ надеисавас по Иегова трэбуй ужэ акана. Важ када пуш пэстар: «Со дицол па кода, со мэ витидав и сар камав тэ жував? Мэ надеисавав пэ ловэ или по Иегова?» (1 Тим. 6:17). И ԥрала и ԥэя анда пэрво вико ашадэ амэнди райкано примеро. Амэ можэм тэ сытювас лэндар, сар тэ на парашас тэ кандас лэ Дэвлэс андэ ԥари время. Но кацави бида, сави амэн аштярэл англэ, инке никала на сас. Катар амэ уӷанаса, сар амэнди трэбуй пэс тэ андярас андэ кацави ԥари время?

ПРИАШУНДЁН КАРИНГ КОДЭЛА, КО АНДЯРЭЛ АМЭН

8. Со о Иисусо приԥэндя пэстирэ учениконэнди?

⁸ Прожылэ дэсавэ бэрша посли кода, сар и христианоря проадиносардэ лэ Павлоско письмо и вонэ додиқлэ, сар и римски халавдэ окружысардэ о Иерусалимо. И ԥрала и ԥэя ӷанэнас, со вонэ трэбуй тэ терэн — лэнди трэбуй тэ унашэн. Вонэ полэнас, кай ӥто о форо авэла розмардо (Матф. 24:3; Лука 21:20, 24). Но каринг тэ нашэн? О Иисусо просто ԥэндя: «Кодэла, ко андэ Иудея, мэк нашэн андэ плая» (Лука 21:21). Круӷом лэндэ сас бут плая. Пэ саво андар лэндэ вонэ моӷли тэ гарадён?

9. Андэ савэ плая моӷли тэ унашэн и христианоря? (Кадяжэ диқэн и карта.)

⁹ Давай погиндосараса, каринг и христианоря моӷли тэ нашэн: Самарийски плая, Галилейски плая, плай Ермоно и Ливански плая, ай кадяжэ пэ авэр риг лэ Иорданостар. (Диқэн и карта.) Дэсавэ фороря андэ кадэла плая сас фартэ безопасни. Например, о форо Га́мла тердёлас по вучо плай и тэ дожас каринг лэстэ сас фартэ найвушэро. Варико моӷ тэ погиндой, кай котэ и трэбуй тэ гарадён. Но май интя андэ Гамла динэ и римляноря и поумардэ котэ бутэ миросb.

10, 11. а) Через кастэ о Иегова ԥэндя лэ христианонэнди, со тэ терэн? (Евреёря 13:7, 17). б) Васо лэ христианонэнди трэбуй сас тэ приашундён каринг кодэла, ко андярэл лэ Дэвлэско народо? (Кадяжэ диқэн и картинка.)

¹⁰ Сар амэ диқас, через и ԥрала, савэ андярэнас лэ христианонэн, о Иегова ԥэндя со тэ терэн. Ек учоно, савэс ақарэн Евсе́вий, ӷэт май интя пистросардя пала кодэя время. Во ԥэндя, кай «о Дэл дя тэ ӷанэн дэсавэ ԥралэнди андо Иерусалимо, кай и христианоря трэбуй тэ ужан анда форо и тэ жан андэ Пе́лла, саво андэ Пере́я». Кадэва форо драго поджалас, кай котэ тэ жувэн и христианоря. Во сас найдур лэ Иерусалимостар и тэ авэс интя сас най фартэ ԥарэс. Андэ кодэва форо почти на сас евреёря. Важ када котэ на сас мануша, савэ старысайлоп тэ жан против римляноря. (Диқэн и карта.)

¹¹ И христианоря, савэ приашунделэ каринг кодэла, ко андярэл лэ Дэвлэско народо, унашлэ андэ плая. (Проадинон Евреёря 13:7, 17.) Вонэ канглэ лэн и важ када спасысайлэ. Кадэла ԥрала и ԥэя аштярэнас «о форо, саво састэс тердёл» — када лэ Дэвлэско Царство. И о Иегова на ашадя лэн (Евр. 11:10).

12, 13. Сар о Иегова андярэл пэстирэ народос андэ ԥари время?

¹² Сости амэ сытювас? О Иегова ворта ԥэнэн пэстирэ манушэнди, со лэнди тэ терэн через и ԥрала, савэ андярэн лэстирэ народос. Андэ Библия исин бут примероря, сар андэ ԥари время о Иегова андярэлас пэско народо через и мурша, савэ лэс кандэн (Втор. 31:23; Пс. 77:20). О Иегова терэл кадя жэ и адес.

¹³ Например, кала ԥирэлас насвалимос КОВИД-19, «кодэла, ко андярэл лэ Дэвлэско народо» ԥэндэ амэнди, со трэбуй тэ терас. Андэ кодэя время лэ ԥралэнди ԥэндэ, сар трэбуй тэ проандярэн и встречи и тэ росԥэнэн пала Дэл. Ай через дэсавэ шона посли кода, сар заляпэ и пандэмия, амэ проандярдям о канӷрэсо пэ 500 шыба. И ԥрала и ԥэя диқэнас лэс па интэрнэто, па телевизоро, ай кадяжэ ашунэнас па радио. Кацаво канӷрэсо амэндэ инке никала на сас! О Иегова на парашэлас амэн тэ сытярэл дажэ андэ кацави время. Важ када амэ ашасаспэ сар ек ери. Амэ ӷанас, саво бы ԥаримос амэн тэ на аштярэл англэ, о Иегова поможыя кодэлэнди, ко амэн андярэл, тэ прилэн годявэрнэ решэнии. Вижал, кай тэ пэрэжувас и послидни деса кадэла люмати, амэнди трэбуй тэ патяс лэ Иеговасти и тэ кандас лэс. Ай сости инке амэ трэбуй тэ сытювас, кай тэ авас ӷотови каринг и само бари бида?

ЛЮБИН ЕК ЕҚЭС, САР ԤРАЛА, И ШОН САМА ЕК ЕҚЭС

14. Сар пистромэ андэ Евреёря 13:1—3, сости трэбуй сас тэ сытён и христианоря, савэ жувэнас андо пэрво вико?

¹⁴ Кала дэла и само бари бида, амэнди трэбуй авэла инке май фартэ тэ любисарас ек еқэс. Амэ можэм тэ сытювас кай и христианоря, савэ жувэнас андо Иерусалимо и Иудея. Вонэ никала на парашэнас тэ любин ек еқэс (Евр. 10:32—34). Но англа кода, сар тэ розмарэн о Иерусалимо, лэнди трэбуй сас инке май фартэ тэ любин и тэ шон ек еқэс сама. (Проадинон Евреёря 13:1—3.)c Кадэлэсти трэбуй тэ сытювас и амэ, важ кода кай амэ жувас андэ само послидни деса кадэла люмати.

15. Васо и христианоря трэбуй сас тэ на парашэн тэ любин ек еқэс, сар ԥрала, и драго тэ обжанпэ ек еқэса?

¹⁵ Кала и римляноря оджылэ лэ форостар, кай и христианоря сас возможность тэ нашэн. Лэндэ сас набут время и вонэ не моӷли пэса тэ лэн бут мищимос (Матф. 24:17, 18). Важ када вонэ трэбуй сас тэ поможын ек еқэсти най кати па дром, но и андэ Пе́лла. Наверно, сас фартэ бут кодэлэн, «касти срочно трэбуй помощь» (Тито 3:14). Лэ ԥралэнди и лэ ԥэянди трэбуй сас хамос, ӥда и цэр. Кала и христианоря заботинаспэ ек пала ек, вонэ сыкавэнас, сар дэ фартэ вонэ любин ек еқэс.

16. Сар амэ можэм тэ сыкавас, кай любисарас лэ ԥралэс или ла ԥья, савэнди трэбуй помощь? (Кадяжэ диқэн и картинка.)

¹⁶ Сости амэ сытювас? Амэ любисарас лэ ԥралэн и лэ ԥэян. Важ када, кала лэнди варисо трэбуй, амэ на тердювас андэ риг. Например, бутэ свидетелёнэнди прижыляпэ тэ мэкэн пэстирэ цэра через и война или природно бида. Амэ сразу дас лэнди помощь и заботисавас пала лэндэ. Акэ со ԥэндя ек ԥэй, савяти через и война андэ Украина прижыляпэ тэ мэкэл пэско цэр: «Амэ диқасас, кай о Иегова андярэлас амэн и подритярэлас через и ԥрала. Каринг бы амэ тэ на авас, амэн всегда шонас сама и заботинаспэ пала амэндэ амарэ ԥрала и ԥэя. Кадя сас андэ амари страна, потом андэ Венгрия, ай акана андэ Германия!» Кодэла, ко заботинпэ пала ԥрала и ԥэя и анда ди лэн шон сама, терэн ек дила лэ Иеговаса (Прит. 19:17; 2 Кр. 1:3, 4).

17. Васо фартэ важно ужэ акана тэ сытювас тэ любисарас ек еқэс и тэ шас сама?

¹⁷ Кала авэла и само бари бида, амэнди трэбуй авэла ек еқэстири помощь пэбутэстэ май фартэ, чем акана (Авв. 3:16—18). Важ када о Иегова сытярэл амэн тэ любисарас ек еқэс, сар ԥрала, и тэ шас сама. Андэ кодэя найвушэро время кадэлэстар авэла зависеть амари жызня.

СО АШТЯРЭЛ АМЭН АНГЛЭ

18. Сости амэ можэм тэ сытювас кай и христианоря, савэ жувэнас андо Иерусалимо и Иудея андо пэрво вико?

¹⁸ И христианоря, савэ унашлэ андэ плая, спасысайлэ. Вонэ ашадэ о форо, но о Иегова на ашадя лэн. Сости амэ сытювас? Амэ точно на ӷанас, сар вся авэла англэ. Но амэ сэрас лэ Иисусостирэ алава «Авэн ӷотови» (Лука 12:40). Кадяжэ амэ можэм тэ гиндосарас пала кода, со о апостало Павло пистросардя лэ евреёнэнди. И советоря, савэ о Павло дя лэ христианонэнди андо пэрво вико, трэбуй тэ прилас и амэ. Инке о Иегова дэл алав, кай никала на ашавэла и никала на помэкэла амэн (Евр. 13:5, 6). Давайте тэ на парашас тэ аштярас «о форо, саво трэбуй тэ авэл англэ» — када лэ Дэвлэско Царство. И тоди амэн аштярэл о лашымос вся и вечность (Матф. 25:34).