Iunia

I viața la phivleache na-i ușoro. Daștil-pe că ande fiesavo ghies si lache pharo te avel-la so trebula caște trail. Cu sea cadala, voi jial caring iech andal cutii hai ci camel te dichela chonic cana șiol dui țânorre love cai, cana peren, bașon loches. O Isus jianel chichi șiutea: dui lepta, le mai țânorre love cai folosinas-pe ande codoi vremea. Cadale lovența ci daisardea te chinel nici măcar iech țâni ciricli, cai sas i mai ieftino andal ciriclea bichinde sar hamos. Cana dichlea cadala phivlea, le Isusosco ilo barilea, achardea peste le discipolen caște sicavel-la lenghe hai phendea: „Cadai ciori phivli șiutea mai but sar soavră”. Pala codoia phenel: „Soavră [vi mai but codola barvale] șiute anda lengo butimos, tha voi șiutea anda laco ciorâmos sea so mai sas-la caște trail”. (Mar. 12:43, 44) Cana dea le ultimii țâne love cai mai sas-la, voi șiutea peschi viața andel vasta le Iehovasche, amaro Dad iubitorii. (Ps. 26:3) w21.04 6 ¶17, 18

Ande sea pesco servicio pa i phuv, le Isusos sas-les iech atitudinea lași caring i predicarea hai camlea ca vi lesche discipolen te avel-le sea cadai lași atitudinea. (Ioan 4:35, 36) Chichi timpo o Isus sas-lo lența, le discipolen sas-le iech baro zelo anda i lucrarea de predicare. (Luca 10:1, 5-11, 17) Cu sea cadala, pala soste o Isus sas-lo phandado hai mudardo, le discipoli hasarde iech timpo penghi dorința te predichin. (Ioan 16:32) Pala lesco jiuvindimos, o Isus phendea lenghe te șion i lucrarea de predicare po iechto than ande lenghi viața. Cadea că, pala soste vo gălea opre ando cerii, von predichisarde cu cadichi de but zelo, că lenghe dușmani phende le cuvintea anda o texto de aghies. O Isus îndrumisardea le creștinen anda o iechto secolo ando timpo so predichinas i vestea lași, hai o Iehova ajutisardea-le prin o fapto că but manușa primisarde lengo mesajo. Sar exemplo, ca i Penticosta anda 33 a.e., bolde-pe cam 3 000 manușa. (Fap. 2:41) Hai pala codaia, o număro le discipolengo barilea mai dur vi mai but. (Fap. 6:7) O Isus phendea de mai anglal că, andel ghiesa de palal, sea mai but manușa va acceptina i vestea lași. (Ioan 14:12; Fap. 1:8) w21.05 14 ¶1, 2

Anes tuche amintea i iechto data cana dean chi seama că arachlean o ciacimos? Pachiaian că sea codola cai prinjianes-le va avena vi von bucurime te așunen le buchia cai arăslean te pachias-le. Pachiaian zurales că o mesajo la Bibliaco va paruvela lenghi viața hai că va dela-le iech viitorii șucar. (Ps. 119:105) Anda codoia, pherdo bucuria, phendean che neamurenghe hai che amalenghe le ciacimata cai arachlean-le. Tha ci ajucărdean-tu ca but jene anda lende te na camen te așunen so camlean te phenes lenghe. Ci trebulas te avas uimime cana aver ci camen te așunen o mesajo cai predichisaras-les. Ando iechto secolo, le mai but manușa ci acceptisarde le Isusos, chiar cana vo cherelas miracolea prin save sicavelas că o Del ajutilas-les. Sar exemplo, cana o Isus jiuvindisardea le Lazăros, codola cai așile lesche contra ci daisarde te phenen că codo miracolo ci sas ciacio. Cu sea cadala, le conducători iudei ci acceptisarde le Isusos sar Mesia. Mai but, camle te mudaren vi les hai vi le Lazăros. (Ioan 11:47, 48, 53; 12:9-11) w21.05 2 ¶1, 2

Cher sea so daștis caște jias ca fiesavi întrunirea. O programo va zuriarela-tu hai va daștia te prinjianes mai mișto le phralen hai le pheian andai congregația. Rode te aves amal codolența andai congregația castar daștis te sichios vareso, chiar cana sile mai tărne sau mai phure sar tu sau aven anda iech medio diferime. I Biblia anel amenghe amintea că „codola phure sile goghiaver”. (Iov 12:12) Vi codola mai phure daștin te sichion but buchia le phralendar mai tărne. O David sas but mai tărno sar o Ionatan, tha cadaia ci așadea-le te avel-le iech amalimos chidino. (1 Sam. 18:1) Von ajutisarde-pe iech averes te slujin le Iehovasche chiar cana nachle prin bare pharimata. (1 Sam. 23:16-18) I Irina, cai si i corcori Martora ande lachi familia, phenel: „Amare phrala hai pheia daștin te aven anda amende sar amare dada, phrala hai pheia. Cadea o Iehova del-ame i familia cai trebul amenghe”. Che amala camen te zuriaren-tu hai te aven pașa tute, tha trebul te phenes lenghe sar daștin te ajutin-tu. w21.06 10, 11 ¶9-11

O Isus cărdea iech ilustrarea anda iech rege hai lesco sclavo. O rege choslea le sclavosco baro camimos, cai ci daisardeas te pochinel-les niciechdata. Mai târzio cado sclavo ci camlea te chosel o camimos but mai țâno ieche avere sclavosco. Ji la urmă, o rege șiudea ando phandaimos le sclavos cai ci sicadea îndurarea. O modo sar phiradea-pe o sclavo cărdea nasul na numai lesche, tha vi averenghe. Mai anglal, bi te sicavel mila le coavere sclavosche, „șiutea te avel șiudino ando phandaimos ji cana avelas te pochinel sea o camimos”. Pala codoia, vo cărdea te suferin vi codolen cai dichle cado neciacimos. „Cana dichle so întâmplosardea-pe, le coaver sclavi sas-le zurales duchade”. (Mat. 18:30, 31) Sa cadea, vi so cheras amen daștil te duchavel averen. So întâmplol-pe cana iech phral greșil amenghe hai amen ci camas te iertisaras-les? Mai anglal cheras nasul lesche, anda codoia că ci camas te iertisaras-les hai ci das-les amari atenția hai iubirea. Pala codoia, cheras le coaveren andai congregația te simțosaren-pe nasul cana dichen că ci sam andi pacea codole phraleia. w21.06 22 ¶11, 12

Le Satanos placial-les zurales but te rimosarel le manușen cai sas-le cărde pala o chipo le Devlesco. Andel ghiesa le Noesche cana „dichlea că o nasulimos le manușesco sas baro . . . le Iehovas falea-les nasul că cărdea le manușen pi phuv hai sas-lo duchado ande pesco ilo”. (Gen. 6:5, 6, 11) Parudea-pe i situația de atunci? Nici. Chichi de fericime si o Diavolo te dichel cai arăslea i imoralitatea sexualo tela sea lache forme hai vi mașcar le manușa de sa codo sexo. (Ef. 4:18, 19) Tha vi mai fericime silo cana cherel le slujitoren le Iehovasche te peren ando păcato. Tela i conducerea le Satanoschi, pașa o fapto că o manuș „stăpânisarel pe aver manuș ande leschi paguba”, vo distrugil vi i phuv hai i creația animalo savi o Iehova dea-la ande leschi grija. (Ecl. 8:9; Gen. 1:28) Savo si o rezultato? Unii specialiști phenen că prin le buchia cai le manușa cheren-le, daștinas te hasaren-pe mai but sar iech miliono specii ande chichiva bărșa. w21.07 12 ¶13, 14

Unii anda le slujitori le Iehovasche mechen-pe perade anda le sentimentea cai doșaren-le. O ilo doșarel-le hai cherel-le te pachian că o Iehova ci daștilas te iertil-len niciechdata vi cana căisarde-pe anda ilo. Dacă vi tut si tut cadal sentimentea, na bâstăr că o Iehova camel anda sea o ilo te sicavel tuche iubire loialo. Daisaras te slujisaras le Iehovasche pherde bucuria hai te avel-ame iech conștiința uji anda codoia că „o rat le Isusosco, lesco Șiav, ujiarel amen catar orisavo păcato”. (1 Ioan 1:7) Cana san perado anda chichiva greșeli na bâstăr că o Iehova camel, chiar si gata te iertil codolen cai căin-pe. Te dichas o phanglimos cai cherel-les o psalmisto David mașcar i iubirea loialo hai i iertarea. Vo phendea: „Chichi de dur sile le ceruri catar i phuv cadea de bari si leschi iubirea loialo anda codola cai daran lestar. Chichi de dur si o than catar înclel o cham le thanestar cai perel, cadichi de but duriardea vo amendar amare păcatea”. w21.11 5 ¶12, 13

Iech rrom creștino trebul te sicavel pachiv pesca rromniache. (1 Pet. 3:7) Te das pachiv însemnol te sicavas atenția hai respecto averenghe. Sar exemplo, iech rrom del pachiv pesca rromniache cana phiravel-pe șucar laia. Vo ci ajucărel latar so ci daștil te cherel. Hai mai but, vo ci comparil-la avere jiuvleanța. So sentimentea avelas iecha rromnia dacă laco rrom cherelas cadea? O rrom iecha pheiaco po anav Rosa cai ci silo Martoro, comparil-la butivar avere jiuvleanța. Prin lesche cuvintea jiungale, cărdea la Rosa te pachial că ci sili lași chancesche hai chiar arăslea te pușel-pe dacă meritilas te avel iubime. Voi phenel: „Simțosarav că trebul te avel manghe phendo sea o timpo că anda o Iehova som cuci”. Iech rrom creștino sicavel pachiv pesca rromniache anda codoia că jianel că cana cherel cadea, leschi relația laia hai le Iehovaia va avela mai lași. Iech rrom cai sicavel pachiv pesca rromniache, del duma șucar anda late angla aver, phenel lache butivar că iubil-la hai sicavel lache că anda leste si zurales cuci. w21.07 22 ¶7, 8

Sar simțosares tut cana iech pacheto savestar si tut iech bari nevoia ci avel cana ajucăres-les? Poate că holiares-tu. Tha, dacă așunes că si lașe motivea sostar o pacheto ci avilea, sicaves răbdarea hai cames vi mai but te ajucăres? O verseto anda Proverbe 13:11, sicavel sostar trebul te avas răbdători. Cade phenel-pe: „O barvalimos cai cherel-pe sigo, țâniarel-pe. Tha, o barvalimos codolesco cai chidel-les țâra po țâra bariol”. Dichlean so principio sichioas catar? Sam goghiaver cana cheras le buchia țâra po țâra hai pherde răbdarea. Iech aver principio si codo anda Proverbe 4:18, cai phenel-pe: „O drom codolengo orta si sar i lumina cai strălucil de teharin, cai strălucil sea mai zurales ji co mașcar le ghiesesco”. Cado verseto sicavel claro că o Iehova ajutil le manușen te hachiaren lesco scopo – țâra po țâra. Cu sea cadala, cadal cuvintea referin-pe vi co progreso spiritualo ieche creștinosco. O bariarimos spiritualo cherel-pe ando timpo, ci daștil te avel sighiardo. w21.08 8 ¶1, 3, 4

Si amen but buchi te cheras ando servicio le Iehovasco ando timpo so o sfârșito cadale sistemosco pașiol. (Mat. 24:14; Luca 10:2; 1 Pet. 5:2) Savore camas te das le Iehovasche sea so si amen mai lașio. Anda codoia but jene camen te cheren mai but buchi ando servicio le Iehovasco. Chichiva camen te slujin sar pionieri, aver camen te slujin co Betelo sau andel proiectea de construcții. Sa cadea, but phrala den sea penghi zor caște arăsăn slujitori auxiliari sau phure de congregație. (1 Tim. 3:1, 8) O Iehova si zurales bucurime te dichel că lesco poporo camel te cherel sea mai but ande lesco servicio! (Ps. 110:3) Dacă san perado anda codoia că ci arăslean ca iech anumime obiectivo spiritualo, de duma le Iehovaia anda che pharimata. (Ps. 37:5-7) Mai but, mang le phralen maturi te phenen tuche sar daștis te cheres mai mișto chio servicio anda o Del hai pala codoia, de chi zor te cheres so phende tuche von. Cadea, va avela te primis o privilegio cai cames-les hai te arăsăs co obiectivo cai șiutean-les tuche. w21.08 20 ¶1; 21 ¶4

I profetesa Ana, cai sas-li phivli, chiar cana sas-la 84 bărșa „ci nachelas nici iech ghies ca voi te na jial co templo”. Cadea că o Iehova binecuvântisardea-la anda codoia că jialas „sea o timpo co templo” hai dea-la o baro pochinimos te dichel le șavorres Isus. (Luca 2:36-38) Aghies, but slujitori loialo le Iehovasche mai phure sile iech lașio exemplo anda le tărne. Va avena amen but miștimata cana cheras amenghe timpo te pașioas lendar hai te ascultisaras-le ando timpo so phenen amenghe ce bucurii sas-len andi organizația le Iehovaschi. Amare phralen hai pheian mai phure silen iech cuci than andi organizația le Iehovaschi. Von dichle sar o Iehova binecuvântisardea ande mai but feluri peschi organizația hai len personalo. Sichile but lecții importanto anda le greșeli cai cărde-le. Dichen-le sar iech ‘haing goghiaverimaschi’ hai sichion anda le buchia prin save nachle. (Prov. 18:4) Dacă cheren tumenghe timpo te prinjianen-le, tumaro pachiamos va avela mai zuralo. w21.09 3 ¶4; 4 ¶7, 8; 5 ¶11, 13

Cadea sar phendea vi o Isaia, o poporo le Iehovasco „piel o thud le națiunengo”. (Is. 60:5, 16) Amare cuci phrala hai pheia părdal le șucar calități cai silen, ajutin ca i lucrarea de predicare te cherel-pe ande 240 thema hai teritorii, hai i literatura sili cărdi ande mai but sar 1 000 șiba. Ande cado timpo le sfârșitosco, o izdraimos le națiunengo cherel le manușen te alosaren mașcar: te așen pașa o Regato le Devlesco sau te șion pengo pachiamos andel guvernea cadala lumeache. Fiesavo anda amende trebul te alosaras so te cheras. Chiar cana le slujitori le Iehovasche respectin le legi anda o them cai train, von ci șion-pe andi politica cadala lumeachi hai așen cu sea neutrii. (Rom. 13:1-7) Von jianen că numai o Regato daștil te rezolvil sea le pharimata le manușenghe hai cado Regato ci cherel partea andai lumea. (Ioan 18:36, 37) w21.09 17, 18 ¶13, 14

Cana varecon cuci tuche mechel le Iehovas, si importanto te zuriares mai dur chio pachiamos hai vi chia familiaco. Caște avel tut zuralimos catar o Iehova, citisar ande fiesavo ghies andai Biblia. Gândisar-tu ca so citisardean hai le partea ca le întruniri creștino. Ita so phenel i Joanna pala so laco dad hai lachi phei mechle o ciacimos: „Cana citisarav andai Biblia andal manușa sar avelas i Abigail, i Estera, o Iov, o Iosif hai o Isus, simțosarav iech bari pacea ando ilo. Lengo exemplo pherel mânri goghi buchianța lașe hai cherel mai țâni mânri duch. Cana san zurales duchado mang-tu vi mai dur le Iehovasche. Mang le Iehovas te ajutil-tu te diches le buchia cadea sar dichel-le vo, te del-tu goghiaverimos hai te sicavel-tu o drom pe savo trebul te jias. (Psalmo 32:6-8) Daștilas te avel tuche zurales pharo te des duma le Iehovaia anda so simțosares ciaces. Tha, vo prinjianel mișto i duch anda chio ilo hai manghel-tu te phenes lesche sea le sentimentea garade anda chio ilo. (Ex. 34:6; Ps. 62:7, 8) w21.09 28 ¶9, 10

Pala i patraghi anda 32 a.e., le apostoli o Petru, o Iacov hai Ioan line partea ca iech viziunea zurales șucar. Pe iech plain ucio, pala sar fal-pe, pe o ucimos le plaiesco Hermon i fața le Isusoschi parudea-pe angla lande. „Leschi fața strălucisardea sar o cham hai lesco hureaimos cărdea-pe strălucitorii sar o udud.” (Mat. 17:1-4) Le apostoli așunde le Devles cai phendea: „Cado si mânro Șiav, codo iubime, cas aprobisardem-les. Te ascultisaren lestar!”. Le trin apostoli sicade că ascultisarde le Isusostar ande sea lenghi viața, hai amen camas te las-ame pala lengo exemplo. Chichi de recunoscători sam că o Iehova îndrumil-ame iubireaia prin „o șăro la congregațiaco”, o Isus Cristos. (Ef. 5:23) Cadea sar le apostoli Petru, Iacov hai Ioan, sam hotărâme ‘te ascultisaras lestar’. Cana cheras cadea, va primisaraia but miștimata acana hai va simțosaraia bucuria veșnico ando viitorii. w21.12 22 ¶1; 27 ¶19

Iech creștino anda Corint trailas la rromneaia lesche dadeschi. O Apostolo Pavel phendea caring le corinteni te den avri andai congregația codole murșes. Lesco phiraimos imoralo cărdea nasul le coaverenghe andai congregația. Chichiva anda lende ci dichenas chanci jiungalo ande lesco phiraimos lajiavuno. (1 Cor. 5:1, 2, 13) Pala iech timpo, o Pavel așundea că codo manuș cai sas-lo excluso căisardea-pe ciaces. O Pavel phendea le phurenghe: „Te iertisaren-les pherde lașimos hai te den duma șucar leia”. Te dichas sostar phendea o Pavel cadai buchi: „Ca leschi bari duch te na phaghel lesco ilo”. O Pavel simțosardea mila caring cado manuș cai căisardea-pe. Vo ci camlea ca o manuș te avel cadea de perado, te na mai rodel iertarea. (2 Cor. 2:5-8, 11) Le phure de congregație len-pe pala o exemplo le Iehovasco hai camen te sicaven îndurarea. Von va ortosarena mai zurales codoles cai păcătuisardea cana trebul, tha va sicavena îndurarea chichi de but daștil-pe. Cana ci cheren cadea, von ci sicaven îndurarea, tha mechen te aven cărde buchia nasul andi congregația. w21.10 11, 12 ¶12-15

Le răni afectivo daștin te aven comparime codolența fizico. Chichiva anda lende sile țâne, hai aver sile bare. Sar exemplo, o fapto te șinas-ame ande iech plico anda hârtia daștilas te cherel amenghe iech șinimos ușoro. Chiar cana duchal-ame, daștil-pe că pala iech ghies sau dui ci mai dichiol. Sa cadea, chichiva buchia cărde contra amenghe sile țâne. Sar exemplo, dacă iech amal del duma sau phiravel-pe ande iech modo cai ci sicavel lașimos, daștil-pe că va avela te iertisaras-les sigo. Tha, cana si iech rana mai bari,daștilas te avel nevoia catar iech medico caște suvela hai te șiol bandajo pe late. Tha, dacă avelas te șioas sea o timpo o vast ando than cai cărdeam amenghe i rana hai te șinas i crusta, avelas te cheras amenghe nasul corcore. Iech manuș duchado emoționalo daștilas te cherel chiar cadai buchi. Vo daștilas te gândil-pe vi mai dur ca i rana hai ca i duch cai cărdea-pe lesche. Tha, codola cai încăren holi ando ilo cheren penghe corcore nasul. O fapto te respectisaras o sfato anda o texto de aghies sicavel goghiaverimos. w21.12 12 ¶15

Te dichas iech exemplo. Iech phuro de congregație daștilas te avel îngrijorime anda sar iech phral sau phei hureavel-pe sau cherel pesche bal. Vo daștilas te pușel-pe: „Si vroiech baza biblico caște dav duma leia?”. Anda codoia că ci camel te phenel so pachial vo, daștilas te del duma ieche avere phureia sau ieche phraleia zuralo spiritualo. Von daștinas te dichen ande iech than so phendea o Pavel anda o hureaimos hai anda sar trebul te sicavas de avreal. (1 Tim. 2:9, 10) O Pavel sicadea chichiva principii, anda sar trebulas te hureavel-pe iech creștino. Amaro hureaimos trebul te avel șucar, te sicavel că si amen iech goghi sastevesti hai te na anel lajiav pe amaro Del. O Pavel ci cărdea reguli anda so daisaras te phiravas hai so nici. Vo jianelas că fiesavo creștino daștilas te alosarel so te phiravel, chichi timpo lesco hureaimos ci avelas contra so sicavelas i Biblia. Cadea că, le phure trebun te dichen dacă o hureaimos cai alosardea-les sicavel că siles iech goghi sastevesti sau sicavel baricanimos. Trebul te hachiaras că dui phrala zurale spiritualo, daștin te alosaren te cheren diferime le buchia, tha cadaia ci sicavel că iech anda lende cărdea so si mișto hai ocoaver nici. Ci trebul te cheras le phralen te len-pe pala so pachias amen că si mișto sau nasul. w22.02 16 ¶9, 10

Si amen but motivea te sicavas iubirea loialo iech caring aver. Arachas chichiva anda cadala ande le proverbe inspirime cai aven: „Te na mechel tut i iubirea loialo hai i fidelitatea. . . . Atunci va avela te primis favoarea hai va aveia prinjiando sar iech manuș cai silo goghiaver andel iacha le Devlesche hai le manușenghe”. „Iech manuș cai siles iubirea loialo cherel pesche mișto.” „Con rodel o ortomos hai i iubirea loialo va arachela viața.” (Prov. 3:3, 4; 11:17, n.s.; 21:21) Dichleam trin motivea anda save trebul te sicavas iubirea loialo. O iechto: Sam cuci andel iacha le Iehovasche. O duito: Cheras mișto amenghe, sar exemplo phandas amalimata chidine. O trinto: Ando viitorii va avela-ame viața veșnico hai but aver miștimata. Ciaces, meritil te das amari zor caște ascultisaras so phenel amenghe o Iehova: „Sicaven iech caring aver iubirea loialo hai îndurarea!”. (Zah. 7:9) w21.11 8 ¶1, 2

Dacă le zumaimata prin save nachlean sau prin save naches sicade le covlimata che pachiamasche, na av perado. Cadaia daștil te avel iech ocazia te zuriares chio pachiamos. Mang-tu anda sea o ilo le Iehovasche vi mai but cana naches prin situații zurales phare. Av siguro că o Iehova daștil te ajutil tut prin chi familia sau le amala. Cana meches le Iehovas te del tut lesco vast andel zumaimata de aghies, arăsăs te pachias vi mai zurales că vo va ajutila tut te naches părdal vi le zumaimata anda o viitorii, orisave avenas cadala. O Isus ajutisardea le discipolen te hachiaren ande so situații trebulas lenghe mai but pachiamos. Cu sea cadala, vo ci phendea niciechdata că von ci avenas te nachen părdal le zumaimata cai avenas ando viitorii. (Ioan 14:1; 16:33) Vo sas-lo siguro că, prin iech pachiamos zuralo, iech bari mulțimea va așela jiuvindi ando baro necazo. (Rev. 7:9, 14) Va aveia vi tu mașcar codola manușa dacă cheres sea so daștis acana caște zuriares chio pachiamos! (Evr. 10:39) w21.11 25 ¶18, 19

Aghies ci ajucăras-ame ca o Iehova te feril amen prin iech miracolo. Tha jianas că sea codola cai șion pengo pachiamos ando Iehova va avena te primin viața veșnico chiar dacă va avela te meren. Ando viitorii cai pașiol, amaro pachiamos ando zuralimos le Iehovasco te lel sama pe amende va avela șiuto tela zumaimos. Amari viața va fala-pe că si șiuti ando pericolo cana o Gog anda Magog, iech coaliția anda națiuni, va atachila o poporo le Devlesco. Ande codol momentea, va trebula te pachias zurales că o Iehova daștil te hastravel amen hai va cherela cadai buchi. Andel iacha le națiunenghe, va avaia sar niște bacrea cai chonic ci lel sama pe lende. (Ezec. 38:10-12) Ci va avela amen nici arme hai nici na sam sicade te luptisaras. Andal națiuni, o poporo le Devlesco va fala-pe că si ușoro te luptil-pe contra leste. Von ci va dichena so amen va dichaia le iachența le pachiamasche: iech armata îngerenghi cai si pașa amende, gata te feril amen. Hai sar daștinas le națiuni te dichen cadai armata? Len ci silen iech dichimos spiritualo. Ci va avela lenghe te pachian cana le armate cerești va ajutina amen! (Rev. 19:11, 14, 15) w22.01 6 ¶12, 13

Sea le phrala hai le pheia sile cuci anda o Iehova, hai cadea trebulas te aven vi anda amende. Anda codoia, trebulas te cheras sea so daisaras caște ferisaras hai te las sama pe amare phrala. Dacă varesar holiardeam sau duchadeam varecas, ci trebulas te phiravas-ame sar cana ci întâmplosardea-pe chanci, hai te gândisaras-ame că codo manuș silo prea sensibilo hai trebul te nachel părdal corcoro cadai situația. Tha, sostar daștin unii phrala te holiaren-pe mai sigo? Daștil-pe că, anda o felo sar barile sau unii dichen-pe țâne ande penghe iacha. Aver sile neve co ciacimos hai încă ci jianen sar te nachen părdal averenghe greșeli. Orisavi avelas i situația, trebulas te das sea amari zor caște paruvas le buchia. Cu sea cadala, iech jeno cai holiarel-pe sigo trebul te del peschi sama că cadaia si iech trăsătura nelași, hai trebul te cherel buchi late caște na mai avel cadea de sensibilo. Si importanto te cherel cadaia caște avel-les pacea andi goghi hai te avel mișto averența. w21.06 21 ¶7

O Isus hachiarel amare sentimentea. Cana sam perade catar le îngrijorări, bucurisaras-ame te avel amen pașa amende iech amal cai hachiarel amen, cadichi mai but iech cai nachlea prin situații sar amare. Cado amal si o Isus. Vo jianel sar si te simțosares tut covlo hai te avel tut nevoia catar ajutorii. Sa cadea, hachiarel amen sar manușa hai va lela sama te primisaras o ajutorii catar si amen nevoia „co momento potrivime”. (Evr. 4:15, 16) Cadea sar o Isus acceptisardea o ajutorii catar iech îngero andi bar Ghetsimani, vi amen trebulas te acceptisaras o ajutorii le Iehovasco, cai del-les amenghe prin mai but moduri, sar exemplo, prin iech publicația, iech video, iech cuvântarea sau iech vizita cai zuriarel amen cai avel catar iech phuro sau catar iech phral spiritualo. (Luca 22:39-44) O Iehova del amen pacea hai zuriarel-ame. Cana mangas-ame, primisaras i „pacea le Devleschi, cai nachavel orisavo hachiarimos”. (Filip. 4:6, 7) w22.01 18, 19 ¶17-19

Savore jianas, că o Iehova cherel sea o timpo so si orta. Cu sea cadala, daștil te avel amenghe pharo te pachias-ame ande codola cai o Iehova alosardea-le te aven angla amende. Daisaras te pușias-ame dacă le phrala cai sile angla amende andi organizația le Iehovaschi len-pe ciaces pala i îndrumarea le Iehovaschi sau cheren so camen von. O ciacimos si că ci daisaras te phenas că pachias-ame ando Iehova cana ci pachias-ame ande codola cai vo alosardea-le te aven angla amende, hai ande save o Iehova pachial-pe. Aghies, o Iehova del îndrumarea pesca organizațiache pa i phuv prin ‘o sclavo fidelo hai prevăzătorii’. (Mat. 24:45) Cadea sar o corpo de guvernare anda o iechto secolo, cado sclavo lel sama po poporo le Devlesco hai del îndrumări le phurenghe de congregație pa sea i phuv. Pala codoia, le phure den penghi zor te den mai dur cadal îndrumări andi congregația. Sicavas că si amen pachiamos că o modo le Iehovasco te cherel le buchia si o mai lașio cana las-ame pala le îndrumări cai aven catar leschi organizația hai catar le phure. w22.02 4 ¶7, 8

Si amen i bari pachiv hai i bucuria te avas Martori le Iehovasche! Simțosaras iech bari bucuria cana ajutisaras ieche manușes ‘cai siles o ilo lașio anda i viața veșnico te arăsăl pachiavalo’. (Fap. 13:48) Si amen sa codol sentimentea sar le Isusos, cai „pherdea-pe bucuriatar prin o spirito sfânto” cana lesche discipoli avile parpale anda iech campania de predicare ande savi cărde iech șucar buchi. (Luca 10:1, 17, 21) O apostolo Pavel phendea le Timoteiosche: „Av atento sea o timpo tute hai sar sicaves averen”. Hai mai phendea: „Căci, cana cheres cadea va hastraveia tut hai codolen cai ascultin-tu”. (1 Tim. 4:16) Cadea că, cadai lucrarea de predicare salvil vieți. ‘Sam sea o timpo atenți amende’, anda codoia că sam cetățeni le Regatosche le Devlesche. Camas te phiravas-ame sea o timpo ande iech modo cai te așiarel le Iehovas hai cai si pala i vestea lași cai predichisaras-la. (Filip. 1:27) Sicavas că sam atenți ca amaro sicaimos dacă pregătisaras-ame mișto anda i lucrarea hai dacă mangas-ame le Iehovasche angla so te predichisaras averenghe. w21.10 24 ¶1-2

Iech manuș cai lea pe peste i nevi personalitatea sicavel prin sea so cherel hai prin o modo sar gândil că imitil le Iehovas. Las pe amende i nevi personalitatea cana dichiol-pe o rodo le spiritosco ande amari viața hai mechas ca o spirito le Devlesco te cherel buchi ca amari goghi, ca amaro ilo hai ca amaro phiraimos. Iech creștino cai lea pe peste i nevi personalitatea iubil le Iehovas hai codolen cai anen lesche închinarea. (Mat. 22:36-39) Încărel peschi bucuria vi cana nachel prin pharimata andi viața. (Iac. 1:2-4) Rodel i pacea. (Mat. 5:9) Silo răbdătorii hai phiravel-pe lașimaia averența. (Col. 3:13) Iubil so si mișto hai cherel-les. (Luca 6:35) Sicavel prin so cherel că siles iech pachiamos zuralo. (Iac. 2:18) Ci astarel-pe sigo holiatar cana aver holiaren-les hai încărel-pe parpale cana silo zumado te cherel vareso nasul. (1 Cor. 9:25, 27; Tit 3:2) Ando Galateni 5:22, 23 hai vi ande aver versetea andai Biblia, arachas le calități cai cheren partea anda o rodo le spiritosco. Caște las pe amende i nevi personalitatea, trebul te bariaras sea cadal calități. w22.03 8, 9 ¶3, 4

Le phure len-pe pala o exemplo le apostolosco Pavel cana den duma anda i vestea lași oricana daștin, na numai cana predichin chăr chărestar. (Ef. 6:14, 15) Hai, cadea sar o Pavel, cana jian andi lucrarea de predicare, le phure daștin te sicaven averen, mașcar save si vi le slujitori auxiliari. (1 Pet. 5:1, 2) Le phure ci trebun te cheren niciechdata cadichi de but buchia caște arăsăn te na mai avel-len timpo andai lucrarea de predicare. (Mat. 28:19, 20) Ca le phuren te avel-len timpo anda sea le buchia cai silen te cheren, von trebun te phenen „na” cana si lenghe dine te cheren mai but buchia andi congregația. Pala so gândil-pe hai manghel-pe, iech phuro daștilas te del peschi sama că dacă avileas te acceptil te cherel iech anumime buchi andi congregația, avelas te mechel de iech rig aver buchia mai importanto, sar avelas i închinarea andi familia, te jial chichi mai but andi lucrarea de predicare hai te sicavel pesche șiaven te cheren vi von cadai buchi. Ande cado cazo, vo trebul te pachial că o Iehova hachiarel că vo camel te cherel pesche timpo anda sea le buchia cai siles te cherel. w22.03 26 ¶4; 27, 28 ¶7, 8

Gândisar-tu cana vi tu studiisardean i Biblia. Încărdea-tu vareso parpale caște na cărdios iech Martoro le Iehovasco? Phendean tuche că ci va avela te daștis te predichis niciechdata chăr chărestar? Darailean că chi familia sau che amala va așena tuche contra? Dacă da, hachiares codoles casa studiis i Biblia cana nachel vi vo prin cadal sentimentea. O Isus phendea că le manușen daștin te aven-le cadal daraimata. Cu sea cadala, vo phendea pesche continuatorenghe te na mechen ca i dar te așavel-le te slujin le Iehovasche. (Mat. 10:16, 17, 27) Sicav codoles cai studiil te del duma averența anda so sichiol. Cana o Isus bișaldea le discipolen te predichin, daștil-pe că von daraile iech țâra, tha o Isus ajutisardea-le prin o fapto că phendea lenghe casche hai so te predichin. (Mat. 10:5-7) Daisaras te urmisaras o exemplo le Isusosco cana ajutisaras codoles cai studiil te hachiarel casche daștil te predichil. Sar exemplo, daștis te pușes-les dacă jianel varecas casche anelas miștimata iech anumime ciacimos biblico. Pala codoia, ajutisar-les te pregătil-pe hai sicav lesche iech modo simplo ande savo te phenel cado ciacimos. w21.06 6 ¶15-16

„Ande chichiva minutea, le magazinea hai le purane chăra începosarde te peren”. „Orcai dicheias le manușa daranas . . . Vi cana încărdea numai dui minutea, cadea sar phende but manușa, anda mande falas că ci mai terminil-pe”. Cadaia si so phende chichiva anda codola cai așile jiuvinde pala o izdraimos phuviaco cai sas ando Nepal ande 2015. Aghies, si iech aver felo izdraimosco, iech ande savo sile implichime sea le națiuni. O profeto Hagai scriisardea: „Ita so phenel o Iehova le armatengo: «Încă iech data – pa țâra timpo – va avela te cherav te izdran le ceruri hai i phuv»”. (Hag. 2:6) O izdraimos anda savo dea duma o Hagai ci si sar iech izdraimos phuviaco ciacio cai cherel te aven numai ducha. Tha, cado izdraimos cherel te aven buchia lașe. Chiar o Iehova phendea amenghe: „Va avela te cherav te izdran sea le națiuni hai le barvalimata sea le națiunenghe va avena hai va avela te pherav gloriaia cado chăr”. w21.09 14 ¶1-3

Caște avel-tu iech amalimos chidino ieche manușeia trebul te des duma leia butivar hai te phenes lesche sea so si ande chio ilo. Cadai buchi si ciaces vi ande amaro amalimos le Iehovaia. Cana phenas lesche ando manglimos sea so simțosaras, so gândisaras hai so îngrijoril-ame, sicavas că si amen pachiamos ande leste hai că jianas că vo iubil-ame. (Ps. 94:17-19; 1 Ioan 5:14, 15) Beș ande iech than che lașe amalența; von sile iech daro le Iehovastar. (Iac. 1:17) Amaro Dad cerisco sicavel amenghe iech baro intereso prin o fapto că dea-ame iech familia spiritualo phralența hai pheianța cai sicaven iubirea „sea o timpo”. (Prov. 17:17) Ande pesco lil caring le creștini anda Colose, o apostolo Pavel phendea anda chichiva creștini cai sas-le pașa leste, că ‘andine lesche but mângâierea’. (Col. 4:10, 11) Vi le Isusos sas-les nevoia ajutorostar hai anda leste sas zurales cuci o ajutorii cai primisardea-les catar lesche amala, cai sas vi îngeri hai vi manușa. (Luca 22:28, 43) Caște pâtres chio ilo angla iech amal maturo si iech protecția, na iech covlimos. w21.04 24, 25 ¶14-16

So trebulas te cheres cana iech phral holiarel-tu prin lesco phiraimos? Cher sea so daștis caște încăres i pacea. Mang-tu anda sea o ilo le Iehovasche hai mang-les te binecuvântil le manușes cai holiardea-tu hai te ajutil-tu te diches le calități cai siles, calități anda save o Iehova iubil-les. (Luca 6:28) Dacă ci daștis te naches părdal so întâmplosardea-pe, gândisar-tu savo silo o mai lașio modo caște des duma leia. De fiesavi data si mai mișto te pachias că chio phral ci camlea te holiarel-tu. (Mat. 5:23, 24; 1 Cor. 13:7) Cana des duma leia, trebul te pachias că ci silo doșalo. Tha dacă ci camel te cherel pacea sicav răbdarea, anda codoia că i Biblia phenel amenghe ‘te continuisaras te suportisaras-ame iech averes’. (Col. 3:13) Hai, i mai importanto buchi si te na încăres holi ande chio ilo, anda codoia că chio amalimos le Iehovaia daștilas te covliol. Na mech ca nici iech buchi te poticnil-tu. Dacă cheres cadea, sicaves că iubis le Iehovas mai but sar oriso. (Ps. 119:165) w21.06 23 ¶15