Iulia

I excluderea si iech măsura prin savi o Iehova ortosarel pherdo iubirea ieche manușes. Cadaia si ando miștimos savorengo, vi codolesco cai silo excluso. Butivar, codola cai phenen că ci lea-pe iech lași decizia cana varecon sas ortosardo încăren i partea codoleschi cai silo excluso hai ci camen te phenen buchia nasul anda leste. Trebul te hachiaras că ci prinjianas sea le buchia. Sicavas că sam goghiaver cana si amen pachiamos că le phure anda o comiteto judiciaro dine sea penghi zor te respectin le principii biblico hai te judechin „anda o Iehova”. (2 Cron. 19:6) Cana varecon cuci amenghe sas-lo excluso hai amen respectisaras i decizia le phurenghi, daisaras te ajutisaras-les te avel parpale co Iehova. I Elisabeth phenel: „Sas zurales pharo anda amende te na mai das duma amare bare șiaveia. Tha, pala soste avilo parpale andi congregația, vo phendea că meritisardea te avel ortosardo. Pala codoia, phendea că anda cadai experiența sichilea but buchia. w21.09 28, 29 ¶11, 12

Te gândisaras-ame ca i ciori phivli. Siguro că cadai phivli camlea te del mai but le Iehovas. Cu sea cadala, voi dea-les chichi daisardea, sea so sas-la mai lașio. O Isus jianglea că andel iacha le Iehovasche sas zurales cuci lachi contribuția. Ce șucar lecția anda amende: O Iehova bucuril-pe cana das-les sea so si amen mai lașio, iech servicio sacro cărdo sea le ileia hai sea le sufletoia! (Mat. 22:37; Col. 3:23) O Iehova bucuril-pe cana dichel că cheras sea so daisaras! Cado principio aplichil-pe ca o timpo hai co zuralimos cai das-les anda amari închinarea, sar avelas i lucrarea de predicare hai le întruniri. Sar daisaras te aplichisaras so sichileam anda i relatarea anda i phivli? Gândisar-tu ca chichiva jene cai daștin te aven zuriarde dacă anes lenghe amintea că andel Iehovasche iacha sile cuci lenghe eforturi. Daștilas te avel iech phei phuri cai simțosarel-pe doșali sau că ci mai sili lași chancesche, anda codoia că sili nasfali sau ci mai sila o zuralimos te slujil le Iehovasche cadea sar mai anglal. w21.04 6 ¶17, 19; 7 ¶20

O Iehova jianel cana si o mai lașio momento te anel o sfârșito cadala lumeaco nasul. Leschi răbdarea cărdea posibilo te avel chidini iech bari mulțimea, cărdi anda milioanea manușa cai anen lesche închinarea hai așaren-les. Sam recunoscători că o Iehova sicadea răbdarea cadea de but ca amen te daisaras te năștisaras-ame, te sichioas te iubisaras-les hai te dedichisaras amari viața lesche. Cana o Iehova va binecuvântila milioanea manușen cai perseverisarde ji co sfârșito, leschi decizia te suportil o nasulimos va sicavela-pe că sas ciaci. Chiar cana o Satan andea but duch, o Iehova așel o ‘fericime Del’. (1 Tim. 1:11) Vi amen daisaras te avas bucurime ando timpo cana ajucăras pherde răbdarea ca o Iehova te sfințil pesco anav, te sicavel că vo si o Suverano ciacio hai te chosel o nasulimos hai le pharimata cai si amen acana. Cadea că, te avas hotărâme te na mechas-ame hai te na bâstras că vi amaro Dad cerisco suportil o nasulimos. w21.07 13 ¶18, 19

But manușa anda o iechto secolo ci pachiaie ando Isus. Anda lende, vo sas numai o șiav ieche tâmplarosco. Mai but, vo sas-lo anda Nazaret, iech foro, anda savo but manușa pachianas că ci sas-lo importanto. Chiar vi o Natanael, cai cărdilea pala codoia iech discipolo le Isusosco, phendea mai anglal: „Daștil te înclel vareso lașio anda Nazaret?”. Daștil-pe că vo gândilas-pe ca i profeția anda Mica 5:2, cai phenelas că o Mesia avelas te năștil-pe ando Betleem, na ando Nazaret. O profeto Isaia phendea de mai anglal că le dușmani le Isusosche ‘ci va avena interesime la mai țâne buchiandar cai sicaven catar avel o Mesia’. (Is. 53:8) Dacă avileas te roden mai mișto, avileas te jianen că o Isus năștisailo ando Betleem hai că sas-lo iech urmașo le regesco David. (Luca 2:4-7) Cadea, von avileas te hachiaren că o than ande savo năștisailo o Isus sas codo sicado andi profeția anda Mica 5:2. Atunci, sostar ci acceptisarde le manușa le Isusos? Anda codoia că sighiarde te țârden concluzii bi te prinjianen sea-l buchia. w21.05 3 ¶4-6

Andi Biblia arachas na numai exemplea nasul sar codola anda save deam duma mai anglal, ande late si vi exemplea lașe manușenghe cai camle te așunen le sfaturi hai sas-le but miștimata. Iech anda cadala sas o Iov. Chiar cana daralas le Devlestar, vo ci sas iech manuș perfecto. Anda codoia că nachlea prin bare zumaimata, vo phendea buchia cai ci sas-le ciace. Cadea că, vi o Elihu, hai vi o Iehova dine-les sfaturi. So cărdea o Iov? Pherdo umilința, vo așundea o sfato hai phendea: „Dem duma, tha bi te hachiarav . . . Anda codoia lav parpale mânre cuvintea hai căiv-ma andi phuv hai ando uciar”. Anda codoia că o Iov sicadea iech bari umilința, o Iehova dea-les but miștimata. (Iov 42:3-6, 12-17) Vo așundea o sfato cai dea-les lesche o Elihu, chiar cana cado sas but mai tărno. (Iov 32:6, 7) I umilința va ajutila vi amen te așunas iech sfato, chiar cana pachias că ci si lașio anda amende sau cana codo cai dea-les amenghe silo mai tărno sar amen. Savo anda amende ci trebul te cherel buchi ca pesco phiraimos creștino, te del peschi zor te avel mai lașio andi predicarea hai cana sicavel averen i vestea lași? w22.02 11 ¶8; 12 ¶12

Savore andai congregația trebun te sicaven iubirea hai pacea ca chonic te na simțosarel-pe corcoro. So phenas hai so cheras daștil te zuriarel but averen. So daștis te cheres caște ajutis codolen cai sile corcore ando ciacimos te simțosaren că cheren partea andai congregația? Te cheras amenghe amala anda codola neve. O iechto paso si te primisaras anda ilo codolen neve andi congregația. (Rom. 15:7) Cu sea cadala, camas te cheras mai but sar te salutisaras-le. Camas te sicavas iech ciacio intereso codolenghe neve, ca ando timpo, te daștil te avel-ame iech amalimos chidino lența. Bi te șios-tu ande lenghi viața, încercosar te hachiares prin ce pharimata nachen. Anda unii anda lende daștil te avel mai pharo te phenen so si ande lengo ilo. Anda codoia le sama te na cheres-le te den duma cana ci camen. Mai mișto avelas te ajutis-le te pâtren pengo ilo cana șios lenghe pușimata mai discreto hai cana ascultis pherdo răbdarea so silen te phenen. Sar exemplo, daștis te pușes-len sar prinjiande o ciacimos. w21.06 11 ¶13, 14

Si amen o baro privilegio te slujisaras le Iehovasche andi unitatea, sar „iech corcori turma ieche corcore păstoroia”. Ando lil Organizați caște cheras i voința le Iehovaschi, ca i pagina 165 phenel-pe: „Anda codoia că cadai unitatea anel tuche miștimata, trebul te cheres vi tu chi partea caște încăres-la”. Cadea că, te sichioas „te dichas amare phralen cadea sar dichel-le o Iehova”. Andel iacha le Iehovasche, savore sam cuci, cadea sar niște ‘țânorre’. Cadea trebulas te dichas vi amen amare phralen. O Iehova dichel amare eforturi hai anda leste si zurales cuci sea so cheras caște ajutisaras-le hai te las sama pe lende. (Mat. 10:42) Iubisaras amare phralen, hai anda codoia sam ‘hotărâme te na șioas iech bar de poticnire sau iech obstacolo angla lende’. (Rom. 14:13) Pachias că amare phrala hai pheia sile mai bare amendar hai camas te iertisaras-le anda ilo. Mai but, camas te cheras sea so daisaras caște na poticnisaras-ame ande aver. Cadea că, „te alosaras le buchia cai îngăren ca i pacea hai le buchia cai cheren te zuriaras-ame iech averes”. (Rom. 14:19) w21.06 24 ¶16, 17

Dacă studiisaras atento hai aplichisaras le sfaturi cai primisaras-le anda o Cuvânto le Devlesco hai catar leschi organizația, ando timpo va avena-ame sea mai but calități creștino. Mai but, va avela te prinjianas mai mișto le Devles. Prin iech ilustrarea, o Isus sicadea că o mesajo anda o Regato si sar iech sămânța cai bariol țâra po țâra ando ilo le manușengo sinceri. Vo phendea: „Le semințea astaren rădăcini hai barion bi ca vo, codo cai șiol andi phuv te jianel sar. I phuv dea rodo pestar ando timpo: mai anglal o firo, pala codoia o spico hai ji la urmă i cuchi pherdi ando spico”. (Mar. 4:27, 28) O Isus phendea că, cadea sar iech planta bariol țâra po țâra, sa cadea vi iech manuș cai acceptil o mesajo anda o Regato bariol spiritualo țâra po țâra. Ando timpo so le manușa savența studiisaras i Biblia, cai silen o ilo ujo, pașion le Iehovastar, începosaras te dichas le but paruimata cai trebuisarde te cheren-le caște barion spiritualo. (Ef. 4:22-24) Tha, ci trebul te bâstras că o Iehova si codo cai cherel te bariol cadai sămânța. w21.08 8, 9 ¶4, 5

Daisaras te arachas bucuria dacă rodas-la ando than potrivime. Iech manuș cai bucuril-pe catar so dichen lesche iacha silo mulțimime soia siles ande leschi situația. Tha, iech manuș cai phirel pala le buchia cai camel len rodel vareso cai ci va avela-les niciechdata hai ci arachel bucuria. So sichioas catar? Caște arachas bucuria, trebul te gândisaras-ame ca so si amen hai te șioas amenghe obiectivea savende daisaras te arăsas. Daisaras te avas bucuroși soia si amen acana, chiar cana placial-ame te sichioas te cheras buchia neve? Da, daisaras ciaces te bucurisaras-ame le buchiandar cai ‘dichen-le amare iacha’. So ajutil-ame te cheras cadaia? Arachas o răspunso andi ilustrarea le Isusoschi andal talanți anda Matei 25:14-30, cai sicavel-pe so daștil te ajutil-ame te arachas mai but bucuria ande amari situația. w21.08 21 ¶5, 6

O Iehova sicavel iech bari grija codolenghe „cai sile perade hai silen o spirito umilo”. Savore daisaras te zuriaras amare cuci phralen hai pheian, na numai le phure de congregație. Iech modo prin savo daisaras te zuriaras-le, si codo te sicavas lenghe că sam ciaces interesime lendar. O Iehova camel te phenas lenghe că vo iubil-le hai sile cuci ande lesche iacha. (Prov. 19:17) Mai daisaras te ajutisaras amare phralen cana sam umili hai modești. Dacă țârdas i atenția caring amende, daisaras te cheras-le te aven invidioși. O mai mișto avelas te folosisaras le buchia cai jianas te cheras-le hai amaro prinjianimos caște zuriaras averen. (1 Pet. 4:10, 11) Daisaras te sichioas but buchia anda o modo sar phiradea-pe o Isus pesche continuatorența. Chiar cana vo sas o mai baro manuș cai traisardea vroiechdata pi phuv, vo ‘sas-lo blândo hai sas-les iech ilo umilo’. (Mat. 11:28-30) Cana sicavelas le manușen, vo delas duma simplo hai folosisarelas ilustrări cai daștinas te aven hachiarde ușoro hai cai arăsănas ando ilo codolengo umili. (Luca 10:21) w21.07 23 ¶11, 12

Caște prinjianas mai mișto cadale phralen mai phure, amen trebul te cheras o iechto paso hai te das duma lența. Si ciaces, von ci mai dichen cadea de mișto, phiren mai locăs, den duma mai phares, tha ando ilo von sile tărne hai cărde penghe „iech lașio anav” co Iehova. (Ecl. 7:1) Na bâstren sostar andel iacha le Iehovasche von sile cuci. Sicaven lenghe mai dur pachiv cadea sar o Elisei, cai camlea zurales but te așel pașa o Ilie andel palutne ghiesa cai sas-le ande iech than. O Elisei phendea lesche trin-var: „Ci va avela te mechav-tu!”. (2 Regi 2:2, 4, 6) Sicaven iech ciacio intereso codolenghe mai phure, hai pherde lașimos, cheren-le te pâtrăn-pe caring tumende. (Prov. 1:5; 20:5; 1 Tim. 5:1, 2) Daștin te șion lenghe pușimata sar cadala: „Cana sanas mai tărno, so cărdea-tu te pachias că arachlean o ciacimos?”, „Sar cărde-tu le buchia prin save nachlean te pașios mai but le Iehovastar?”, „So ajutisardea-tu te așes bucurime ando servicio le Iehovasco?”. (1 Tim. 6:6-8) Pala codoia ascultisaren-le cana den duma anda lenghi viața. w21.09 6, 7 ¶14, 15

Cana das amari zor te respectisaras i porunca le Isusoschi, sicavas le Iehovasche că iubisaras-les. (1 Ioan 5:3) Te gândisaras-ame ca iech buchi: i iubirea anda o Iehova cărdea-ame te predichisaras chăr chărestar. Daștil-pe că i iechto data ci sas amenghe ușoro. Mai jianes so simțosardean cana mardean co iechto udar? Siguro sas-tu emoții. Tha jianglean că o Isus camel te cheres cadai lucrarea hai dean chi zor te ascultis catar leschi porunca. Daștil-pe că acana i lucrarea chăr chărestar ci mai fal-tu cadea de phari. Tha, so daștis te phenes anda o fapto te încăres studii biblico? Vi numai o gândo daravel-tu? Dacă da, mang le Iehovas te ajutil-tu te naches părdal chi dar hai te del-tu tromai caște începosares iech studio biblico. Vo daștil te ajutil-tu te cames vi mai but te cheres discipoli. w21.07 3 ¶7

Andel puraimata, codolenghe cai sas-le sclavi sas lenghe cărdo iech semno cai sicavelas claro con sas lengo stăpâno. Sa cadea, ando viitorii va manghela-pe savorendar te avel-len iech semno simbolico po vast sau po cicat. Le manușendar va manghela-pe te sicaven prin o modo sar gândin hai prin so cheren că sile tela i autoritatea le guvernenghi hai că așen de lenghi partea. Va avela te camas cado semno simbolico hai va avela te așias pașa le guvernea le manușenghe? Codola cai ci camen te primin o semno, va nachena prin pharimata hai pericolea. Ando lil Revelația phenel-pe: ‘Chonic ci va daștila te chinel sau te bichinel, numai codo cai siles o semno’. (Rev. 13:17) Le slujitori le Devlesche jianen so va cherela vo codolenghe cai silen o semno phendo andi Revelația 14:9, 10. Von ci va camena o semno, tha ande iech modo figurato va avela-len scriime po vast: „Le Iehovasco”. (Is. 44:5) Acana si o timpo te jianas dacă amari loialitatea caring o Iehova sili zurali. Cadea, o Iehova va avela bucurime te phenel că sam lesche! w21.09 18 ¶15, 16

Caște daisaras te cheras mișto amaro servicio trebul te sichioas anda averenghi experiența. O Pavel sicadea le Timoteios sar te predichil hai te sicavel, hai pala codoia phendea lesche te sicavel vi vo averen. (1 Cor. 4:17) Cadea sar o Timotei, vi amen daisaras te sichioas catar amare phrala andai congregația cai silen mai but experiența. Mai but, trebul te mangas-ame caște primisaras ajutorii. Mang o ajutorii le Iehovasco de fiesavi data cana jias andi predicarea. Si amen nevoia catar o spirito sfânto te ajutil-ame, anda codoia că bi lesco ci daisaras te cheras chanci. (Ps. 127:1; Luca 11:13) Cana mangas le Iehovas te ajutil-ame, si importanto te phenas lesche exacto so si amen nevoia. Sar exemplo, te mangas-les te îngărel-ame codolende cai camen te așunen amaro mesajo. Sa cadea, trebul vi te studiisaras personalo. O Cuvânto le Devlesco phenel: „Caște pachian corcore savi si i voința lași, plăcuto hai perfecto le Devleschi”. (Rom. 12:2) Chichi pachias mai but că si amen o ciacimos, cadichi va avela te predichisaras pherde pachiamos vi averenghe. w21.05 18 ¶14-16

Daștil-pe că iech manuș casa studiisaras i Biblia ci cherel progrese hai trebul te mechas o studio, vi cana cărdeam sea so daisardeam hai mangleam-ame anda leste. Sau daștil-pe că ci ajutisardeam chanicas te arăsăl te bolel-pe. Trebulas te simțosaras-ame doșale hai te gândisaras-ame că o Iehova ci binecuvântisardea-ame? Te dichas ca so buchia silo atento o Iehova cana si i duma anda amaro succeso. Anda o Iehova amari perseverența hai că cheras sea so daisaras si zurales importanto. Andel iacha le Iehovasche, cheras iech șucar buchi cana das sea amari zor hai șioas iubirea, vi cana le manușa camen sau nici te așunen amaro mesajo. O Pavel phendea: „O Del na-i neorta caște bâstrel tumari buchi hai i iubirea cai sicadean-la anda lesco anav cana slujin codolenghe sfinți hai cana slujin mai dur lenghe”. (Evr. 6:10) O Iehova ci bâstrel i iubirea hai amare eforturi chiar cana cadala ci daștin te aven cărde cadea de mișto sar camas. Cadea că, le cuvintea cai phendea-le o Pavel ando texto de aghies daștin te zuriaren vi amen. w21.10 25 ¶4-6

O Isus phiradea-pe pherdo lașimos hai iubirea le discipolența. Vo jianelas ande ce situația sas fiesavo anda lende hai so jianenas te cheren. Cadea că, ci daștinas te cheren savore sa codol buchia hai te avel-le sa codol rezultatea andi lucrarea de predicare. Cu sea cadala, anda leste sas zurales cuci sea i phari buchi cai cărdea-la fiesavo anda lende. O Isus sicadea că hachiarel le manușen cana phendea i parabola andal talanți. Ande cadai ilustrarea, o rai dea „fiesave sclavosche buchi pala lesco zuralimos”. Iech anda cadal dui sclavi harnici cărdea mai but sar ocoaver, tha o rai phendea le duienghe sa codol șucar cuvintea: „Mișto, sclavo lașio hai fidelo!”. (Mat. 25:14-23) O Isus silo sea o timpo iubitorii hai lașio amența. Vo silo bucurime te dichel că das le Iehovas sea so si amen mai lașio, pala so daisaras ande amari situația. Te phiravas-ame vi amen averența cadea sar phiravel-pe o Isus amența. w21.07 23 ¶12-14

O rege David ci sicadea îndurarea sea o timpo. Sar exemplo, cana o Nabal, iech manuș aspro, dea duma nasul caring leste hai ci camlea te del les hai lesche manușen haben, o David holiardea-pe hai camlea te mudarel le Nabalos hai sea le murșen anda lesco chăr. Tha, anda codoia că i Abigail, i rromni le Nabaloschi iech jiuvli lași hai răbdătorii, cărdea sigo vareso, o David ci șiordea rat bidoșalo. (1 Sam. 25:9-22, 32-35) Astardo holiatar, o David lea i hotârărea că o Nabal hai sea le murșa anda lesco chăr trebunas te meren. Hai pala codoia, o David phendea că o manuș andai ilustrarea cai phendea-la o Natan trebulas te merel. Daștil-pe că pușias-ame sostar andi duito situația iech manuș pherdo lașimos sar o David cărdea iech judecata cadea de phari? Te gândisaras-ame cana phendea o David cadal cuvintea. Les sas-les iech conștiința pherdi. Iech spirito aspro cai judechil sea o timpo ci sicavel iech lași spiritualitatea. w21.10 12 ¶17, 18; 13 ¶20

Cadal cuvintea anda o texto de aghies, sicaven că daisaras te las-ame pala o exemplo le Iehovasco, o mai baro modelo anda i sfințenia. Trebul te avas sfinți ande amaro phiraimos. Tha, anda codoia că sam imperfecți, cadai buchi daștilas te avel zurales phari. Chiar vi o apostolo Petru greșisardea ande chichiva situații. Cu sea cadala, lesco exemplo sicavel că daisaras ‘te avas sfinți’. But manușa pachian că iech manuș sfânto si iech manuș cai ci siles bucuria, cai phiravel hureaimata rașaienghe hai siles sea o timpo iech fața smerime. Tha, cadai buchi na-i cadea sar phenel i Biblia. O Iehova si numime ‘o fericime Del’. (1 Tim. 1:11) Vi anda lesche slujitori phenel-pe că sile ‘fericime’. (Ps. 144:15) Sa cadea, o Isus condamnisardea codolen cai phiravenas hureaimos specialo hai sicavenas pengo ortomos angla le manușa. (Mat. 6:1; Mar. 12:38) Sar slujitori le Iehovasche, hachiaras so însemnol te avas sfinți anda so phenel i Biblia anda o Iehova. Pachias zurales că amaro Dad iubitorii ci avelas te del-ame niciechdata iech porunca savi ci daisaras te respectisaras-la. w21.12 2 ¶1, 3

Iech andal mai șucar cadouri cai dea-les amenghe o Iehova si te daisaras te anas lesche închinarea. Sicavas amari iubirea anda o Iehova cana ‘respectisaras lesche porunci’. (1 Ioan 5:3) Cana dea duma anda o anav pesche Dadesco, o Isus phendea amenghe te cheras discipoli, bolindoi-le. (Mat. 28:19) Sa cadea, phendea amenghe te iubisaras-ame iech averes. (Ioan 13:35) O Iehova va anela codolen cai ascultin lestar ande leschi familia închinătorenghi pa sea i phuv. (Ps. 15:1, 2) Te sicavas iubirea averenghe. I iubirea si i mai bari calitatea le Iehovaschi. (1 Ioan 4:8) Chiar angla so te prinjianas-les, o Iehova sicadea amenghe iubirea. (1 Ioan 4:9, 10) Amen las-ame pala lesco exemplo cana sicavas iubirea averenghe. (Ef. 5:1) Hai iech anda le mai lașe moduri caște sicavas iubirea caring aver si te ajutisaras-le te prinjianen le Iehovas chichi mai si timpo. (Mat. 9:36-38) Cadea, ajutisaras-le te daștin vi von te aven andi familia le Devleschi. w21.08 5, 6 ¶13, 14

I bari iubirea caring lesco Dad cărdea le Isusos te cherel sacrificii anda Leste hai anda amende. (Ioan 14:31) Sar sicadea o Isus peschi iubirea caring le manușa cana sas-lo pi phuv? Vo phiradea-pe sea o timpo averența pherdo iubirea hai compasiunea, chiar vi codolența cai așenas lesche contra. Iech aver modo importanto prin savo o Isus sicadea peschi iubirea andal manușa, sas că dea duma lența anda o Regato le Devlesco. (Luca 4:43, 44) I mai bari buchi prin savi o Isus sicadea peschi iubirea anda o Del hai andal manușa, sas că alosardea te nachel prin bare pharimata hai te avel-les iech merimos zurales duchado. Lesco merimos, pâtărdea o udar vi anda amende caște daisaras te traisaras anda sea o timpo. I iubirea caring amaro Dad cerisco cărdea-ame te dedichisaras amari viața lesche hai te bolas-ame. Cadea sar o Isus, vi amen trebul te sicavas amari iubirea anda o Iehova prin o modo sar phiravas-ame averența. O apostolo Ioan scriisardea: „Con ci iubil pesche phrales, cas dichel, ci daștil te iubil le Devles, cas ci dichel”. (1 Ioan 4:20) w22.03 10 ¶8, 9

Camas te das anda amaro timpo le Iehovasche, tha ci si amenghe ușoro de fiesavi data. Savoren si amen but buchia te cheras, anda codoia, daștil-pe te avel amenghe pharo te cheras amenghe timpo anda le activități spiritualo. Daștil-pe că si amen cadea de but buchia te cheras ca i buchi, andi familia sau aver activități, că arăsas te pachias că ci si amen timpo te mangas-ame, te studiisaras sau te meditosaras. Si vi aver athaimos mai garado. Dacă ci las sama, ca le activități cai ci sile greșime cadala daștinas te cioren anda o timpo cai daisaras te folosisaras-les caște pașioas le Iehovastar. Sar exemplo, te gândisaras amen ca le activități cai cheren amen te simțosaras amen mișto. Anda savore si mișto poiechdata te cheras amenghe timpo andai odihna. Tha, chiar cana alosaras destinderi lașe, dacă das prea but timpo anda lende, daștilas te așel amenghe țâra timpo anda le activiăți spiritualo. Anda codoia si importanto te încăras i destinderea ca laco than. (Prov. 25:27; 1 Tim. 4:8) w22.01 26 ¶2, 3

Cana o Iehova poruncisardea le israelițenghe te iubisaren penghe pașarden, vo ci cărdea referirea numai codolende cai sas-le sa codoi rasa sau naționalitatea sar len. Vo phendea lenghe te iubisaren vi le manușen străini cai trainas ande lengo mașcar. Cadai ideea sicavel-pe claro ando Levitico 19:33, 34. Le israeliți trebunas te phiraven-pe ieche manușeia străino sar cana avelas „iech israelito de cana năștisailea”. Lenghe sas poruncisardo vi: „Te iubis-les sar tut”. Sar exemplo, i legea phenelas că cadichi le israeliți cioră hai vi le manușa străini te aven mechle te chiden le spice cai așenas pala o secerișo. (Lev. 19:9, 10) O principio cai cherel referirea ca o modo sar trebulas te phiravel-pe le manușența străino aplichil-pe vi aghies. (Luca 10:30-37) Daștil-pe că vi ande amari zona train manușa străino. Si importanto te sicavas lenghe pachiv hai respecto – indiferento că sile murșa, jiuvlea sau șiave. w21.12 12 ¶16

Dacă aghies rodas sea o timpo i îndrumarea le Iehovaschi va avela te pachias vi mai zurales că vo va daștila te hastravel amen anda le zumaimata cai va avena. Trebul te sicavas pachiamos hai te camas te pachias amen ando Iehova cana mangas codoles caste cheras buchi, te del amen libero caște daisaras te jias ca le congresea sau te paruvel amaro programo ca buchi, caște daisaras te jias ca sea le întruniri hai te jias mai but andi predicarea. Tha te phenas că codo caste cheras buchi ci camel te paruvel amaro programo hai hasaras amari buchi. Va avela amen pachiamos că o Iehova ci va mechela amen niciechdata, tha va lela sama pe amende sea o timpo te avel amen le buchia cai trebun amenghe? (Evr. 13:5) I experiența bute slujitorenghi cai slujin cu timp integral sicavel amenghe că o Iehova ajutisardea-len ande le situații zurales phare prin save nachle. O Iehova silo fidelo. Anda codoia că jianas că o Iehova si pașa amende, si amen sea le motivea te nachas bi te daras părdal le ghiesa cai va avena. Amaro Del ci va mechela amen niciechdata chichi timpo șioas leschi voința po iechto than ande amari viața. w22.01 7 ¶16, 17

Cana daștil-pe te avel amenghe pharo te pachias-ame andel phure de congregație? Te phenas că varecon cuci amenghe silo excludime. Ande cadai situația daștil-pe că pușias-ame dacă le phure line i mai lași decizia, sau dacă o Iehova avileas te cherel sa cadai buchi. So daisaras te cheras caște încăras conto catar i decizia le phurenghi sea le ileia? Amen trebul te na bâstras că i excluderea si iech măsura lini le Iehovastar. Voi si ando miștimos la congregațiaco hai daștil te anel miștimata vi codolesche cai păcătuisardea. Dacă iech manuș cai ci fal-les nasul anda so cărdea silo mechlo te așel andi congregația, vo daștil te cherel vi averen te peren ando păcato. (Gal. 5:9) Mai but, daștilas te na del peschi sama chichi de baro si lesco păcato hai ci avelas chanci cai te cherel-les te paruvel pesco phiraimos hai te avel parpale co Iehova. (Ecl. 8:11) Daisaras te avas siguri că atunci cana lel-pe i decizia ca varecon te avel dino avri andai congregația le phure hachiaren mișto penghi responsabilitatea. w22.02 5 ¶13, 14

Iech phuro de congregație trebul te avel răbdătorii hai lașio vi mai but codoleia cai sas lesche dino iech sfato hai ci camel te lel-pe pala leste hai te cherel so phenel i Biblia. Vo trebul te lel sama te na holiarel-pe atunci cana iech phral sau phei ci camel te așunel lesco sfato. Cadea că, ande lesche manglimata, o phuro daștilas te manghel le Iehovas te binecuvântil codoles casche sas dino iech sfato hai te ajutil-les te hachiarel sostar trebuisardea te avel lesche dino, hai vi sar daștil te șiol-les ande pesco ilo. Trebul te nachel mai but timpo ca o phral savesche sas dino o sfato te gândil-pe ca so sas lesche phendo. Dacă o phuro silo răbdătorii hai lașio, codo casche sas dino o sfato ci va gândila-pe ca o modo sar sas dino, tha va încărela ande peschi goghi o sfato. Si ciaces, o sfato trebul te avel dino de fiesavi data anda o Cuvânto le Devlesco. Le sfaturi cai das-le ci trebun te aven numai lașe, tha vi ‘te bucurin o ilo’. (Prov. 27:9) w22.02 18 ¶17; 19 ¶19

Daștil-pe că mangas-ame te nachas părdal iech zumaimos sau iech covlimos cai si amen. Tha, o ajutorii cai ajucăras-les ci avel sigo. Sostar ci del răspunso o Iehova sigo ca sea amare manglimata? Cana mangas-ame anda ilo, vo dichel amaro pachiamos. (Evr. 11:6) Sa cadea, vo camel te dichel chichi de hotărâme sam te cheras so phendeam ande amare manglimata hai te cheras leschi voința. (1 Ioan 3:22) Cana si amen iech obiceio greșime sau iech covlimos, daștil-pe că trebul te avas răbdători hai te sicavas că camas te cheras i voința le Iehovaschi. O Isus phendea că chichiva anda amare manglimata ci va primina răspunso sigo. Vo phendea amenghe: „Manghen mai dur hai va avela te del-pe tumenghe, roden mai dur hai va arachena, maren mai dur hai va avela te pâtrăl-pe tumenghe; că oricon manghel primil, oricon rodel arachel hai oricon marel va avela te pâtrăl-pe lesche”. (Mat. 7:7, 8) w21.08 8 ¶1; 10 ¶9, 10

Caște zuriares chio pachiamos ando Creatorii, trebul te studiis mai dur o Cuvânto le Devlesco. (Ios. 1:8) Gândisar-tu ca sea le buchia cai phendea-le i Biblia de mai anglal cai pherdile-pe hai ce șucar armonia si andi Biblia chiar cana manușa diferime scriisarde-la. Cadea, daștis te zuriares chio pachiamos că iech Creatoro iubitorii hai goghiaver cărdea-ame hai cărdea ca lesco Cuvânto, i Biblia, te avel scriime anda amende. (2 Tim. 3:14; 2 Pet. 1:21) Cana studiis i Biblia, dich ce but ajutin-tu lache sfaturi. Sar exemplo, bute timpoia mai anglal o Cuvânto le Devlesco phendea că i iubirea andal love cherel amenghe nasul hai anel „but ducha”. (1 Tim. 6:9, 10; Prov. 28:20; Mat. 6:24) Ce lașio si cado sfato cai ajutil-ame te na bariol i iubirea andal love ande amaro ilo! Aven ande chi goghi vi aver principii biblico cai ajutisarde-tu? Cana le principii andai Biblia va avena tuche sea mai cuci, va avela te pachias-tu vi mai but ando goghiaverimos amare Creatorosco iubitorii, savesche sfaturi sile sea o timpo lașe. (Iac. 1:5) Cadea că, chi bucuria va bariola. (Is. 48:17, 18) w21.08 17, 18 ¶12, 13

Dacă phurilean, av siguro că o Iehova anel pesche amintea i buchi cai cărdean-la mai anglal. Lean partea pherdo zelo ca i lucrarea de predicare. Nachlean părdal bare zumaimata cai daștil-pe că duchade but chio ilo. Ascultisardean hai încărdean zurales ca le principii biblico, sas tut bare responsabilități hai sicadean averen. Dean sea chi zor te încăres o paso le paruimatanța cai cărde-pe andi organizația le Iehovaschi. Ajutisardean hai zuriardean averen cai sile ando servicio cu timp integral. O Iehova Del iubil-tu zurales but anda codoia că sanas loialo ji acana. Vo phenel că „ci va mechela codolen cai si lesche loiali”. (Ps. 37:28) Mai but, vo del tuche cadai asigurarea: ‘Ji cana chio bal va parniola, me va avela te avav tusa’. (Is. 46:4) Cadea că, ci trebul te pachias că nai-tu iech than importanto andi organizația le Iehovaschi. Anda o Iehova tu san zurales cuci! w21.09 3 ¶4

O Iehova sicavel îndurarea anda codoia că siles o mai baro goghiaverimos. I Biblia phenel că „o goghiaverimos de opral” silo „pherdo îndurarea hai roade lașe”. (Iac. 3:17) Cadea sar iech dad iubitorii, o Iehova jianel că trebul amenghe leschi îndurarea. (Is. 49:15) Cana sicavel amenghe îndurarea, o Iehova del-ame iech speranța, chiar cana sam imperfecți. Cadea că, prin lesco baro goghiaverimos, o Iehova sicavel amenghe îndurarea de fiesavi data cana arachel iech motivo te cherel cadaia. Tha, o Iehova jianel vi cana ci trebul te sicavel îndurare. Ande lesco baro goghiaverimos, o Iehova silo îndurătorii, tha niciechdata ci silo de acord le buchianța nasul cai cheras-le. Tha, so trebulas te cheras dacă iech anda amare phrala alosarel te avel-les iech viața cai ci placial le Devles? O Pavel scriisardea tela inspirația ‘te na aven-ame phanglimata leia’. (1 Cor. 5:11) Codola cai ci căin-pe sile excluși andai congregația, iech măsura cai trebul te avel lini caște aven ferime le slujitori loiali le Iehovasche. Mai but, voi sicavel i sfințenia le Iehovaschi. w21.10 9, 10 ¶7, 8

Anas închinarea le Iehovasche cana cheras donații anda i buchi le Regatoschi. Le israeliți ci trebunas te aven „angla o Iehova le vasteia nango”. (Deut. 16:16) Von trebunas te anen iech contribuția pala so daștinas te den fiesavo. Cadea, sicavenas penghi recunoștința anda sea so cărdea o Iehova ande lengo miștimos. Sar daisaras vi amen aghies te sicavas amari iubirea anda o Iehova hai recunoștința anda sea so cărdea anda amende? Daisaras te cheras donații anda le cheltuieli la congregațiache anda savi cheras partea, hai vi anda i lucrarea mondialo, pala so si amen. O apostolo Pavel phendea: „Dacă varecon camel te del, lesco daro silo zurales cuci le Devlesche, anda codoia că vo ajucărel ca iech jeno te del pala so siles, na pala so nai-les”. (2 Cor. 8:4, 12) O Iehova dichel cuci amare donații cai cheras-le anda ilo, chiar cana ci das prea but. (Mar. 12:42-44) w22.03 24 ¶13

Le phure de congregație ci daștin te duriaren le pharimata cai si lenghe phralen. Tha o Iehova camel ca le phure te cheren sea so daștin caște zuriaren hai te len sama pe lesche bacrea. Sar daștin le phure cai silen but buchia te cheren, te arachen penghe timpo vi te aven pașa penghe phrala cai nachen prin pharimata hai te zuriaren lenghe ile? Len tumen pala o exemplo le Pavelosco. O Pavel rodea sea o timpo te așarel le coaveren hai te zuriarel-le. Vo silo iech lașio exemplo andal phure creștini anda codoia că vo phiradea-pe lașimaia hai pherdo iubirea pesche phralența. (1 Tes. 2:7) O Pavel phendea lenghe butivar că vi vo hai vi o Iehova iubin-le. (2 Cor. 2:4; Ef. 2:4, 5) Vo dichlea le phralen andai congregația sar lesche amala hai beșelas but timpo ande iech than lența. O Pavel sicadea că pachialas-pe ande lende cana pâtărdea pesco ilo caring lende hai dea duma lența anda lesche daraimata hai covlimata. (2 Cor. 7:5; 1 Tim. 1:15) Cu sea cadala, lesche pharimata ci cărde-les te gândil-pe numai peste, tha vo camlea anda sea o ilo te ajutil pesche phralen. w22.03 28 ¶9, 10