Noiembria

Sam siguro că vi tu dichlean o vast le Iehovasco mai butivar ande chi viața. Sar exemplo, ajutisardea tut te na holiares-tu cana varecon phiradea-pe nasul tuia andi predicarea. Vo mai ajutisardea tut te anes tuche amintea o verseto potrivime caște phenes-les ieche manușesche cai camlea te așunel tut. Sa cadea, vo dea tut o zuralimos te jias mai dur andi predicarea vi cana le manușa anda chio teritorio ci camle te așunen tut. (Ier. 20:7-9) Sa cadea, dichas o lașimos le Iehovasco cana sicavel-ame so te cheras andi predicarea. Ca i întrunirea anda o mașcar le curchesco, dichas conversații model mișto gândime, hai sam sicade te folosisaras-le vi amen andi predicarea. Daștil-pe te avel amenghe pharo te încercosaras vareso nevo andi predicarea, tha, cana cheras cadea sar sam sicade ca i întrunirea, dichas că jial mișto ando teritorio. Ca le întruniri hai le congresea, sam zuriarde te folosisaras neve metodea andi predicarea cai ci încercosardeam-le niciechdata mai anglal. Cana paruvas amare metode andi lucrarea hai ci mai cheras codola buchia cai samas sicade, o Iehova va binecuvântila-ame. w21.08 27 ¶5, 6

Ande pesco dintuno lil caring le corinteni, o apostolo Pavel dea-le sfaturi zurale. Pala so scriisardea o lil, vo bișaldea le Titos ando Corint. So but barilea o ilo le Pavelosco cana așundea că von line-pe pala lesche sfaturi. (2 Cor. 7:6, 7) Le phure len-pe pala o exemplo le Pavelosco cana beșen mai but timpo ande iech than penghe phralența. Sar exemplo, von jian mai sigo ca le întruniri caște den duma averența anda buchia cai zuriaren-le. Butivar arăsăn numai chichiva minutea ca le phure te zuriaren o ilo le phralengo. (Rom. 1:12) Sa cadea sar o Pavel, le phure folosin o Cuvânto le Devlesco caște zuriaren o pachiamos penghe phralengo hai phenen lenghe că sile cuci andel iacha le Iehovasche. Von roden sea o timpo te așaren-le anda le lașe buchia cai cheren-le. Cana le phure trebun te den sfaturi, von cheren cadaia anda o Cuvânto le Devlesco hai pala i situația fiesaveschi. Tha, sicaven but lașimos le phralenghe anda codoia că von camen ca le sfaturi te arăsăn ande lengo ilo. (Gal. 6:1) w22.03 28, 29 ¶11, 12

Aghies, o Iehova del pesche slujitoren „o zuralimos cai nachel o normalo” caște ajutil-le te slujin lesche mai dur pherde pachiamos. Iech buchi prin savi sam zuriarde si o manglimos. Ando Efeseni 6:18, o apostolo Pavel phenel amenghe te mangas-ame „oricana” le Devlesche. O Iehova va dela răspunso ca amare manglimata prin o fapto că va dela-ame zuralimos. Poiechdata, daștil-pe că simțosaras că ci mai si amen zuralimos sau că ci jianas so te mangas ando manglimos. Tha o Iehova phenel amenghe te mangas-ame, chiar cana si amenghe pharo te phenas so si ande amari goghi hai ande amaro ilo. (Rom. 8:26, 27) Vo zuriarel-ame vi prin Biblia. O Pavel citisardea le Scripturi caște primisarel zuralimos hai mângâierea. Sa cadea daisaras te cheras vi amen. (Rom. 15:4) Cana citisaras o Cuvânto le Devlesco hai meditosaras leste, o Iehova daștil te ajutil-ame prin pesco spirito te hachiaras sar aplichin-pe le Scripturi ande amari situația. (Evr. 4:12) w21.05 22 ¶8-10

Anda amende i lucrarea te sicavas averen si zurales importanto, chiar cana si ame pharimata cai daștinas te așiaven-ame te cheras cadai lucrarea cadea sar camas. I situația ande savi sam ci mechel-ame te cheras chichi de but camas. Sar exemplo, unii phrala sile mai phure sau nasfale. San vi tu ande cadai situația? Dacă da, an tuche amintea că daisaras te încăras mișto studii biblico prin o telefono sau prin aver dispozitivea electronico. Cadea, i tehnologia ajutil-ame te daisaras te începosaras hai te încăras studii biblico chiar vi de chăral. Mai daisaras te phenas încă iech lași buchi. Unii manușa camen te studiin i Biblia ca ore diferime codolendar ande save le mai but phrala sile obișnuime te predichin, sar exemplo, de teharin sau pi riat târzio. Daștias te studiis vi tu cadale manușența? O Isus sicadea le Nicodimos ciacimata importanto ando timpo la rachiaco, cana cado daisardea te dichel-pe le Isusoia. (Ioan 3:1, 2) w21.07 5 ¶10, 11

Le discipolenghe le Ioanosche o Botezătorii, ci avilea lenghe te pachian că le discipoli le Isusosche ci postinas. O Isus phendea lenghe că, chichi timpo vo sas-lo jiuvindo ci sas-len sostar te postin. (Mat. 9:14-17) Cu sea cadala, le farisei hai aver manușa cai sas lesche contra doșarde le Isusos că ci respectilas lenghe obiceiuri hai holiarde-pe cana sastiardea le manușen ando sabato. (Mar. 3:1-6; Ioan 9:16) Pe iech partea, von sas-le baricane te phenen că respectinas o sabato, tha, pe aver partea, bichinenas bi te avel lenghe lajiav buchia ando templo. Von holiarde-pe cana o Isus doșardea-le anda cadai buchi. (Mat. 21:12, 13, 15) Tha le iudei, casche predichisardea andi sinagoga anda Nazaret, sas-le zurales holiarde cana o Isus folosisardea exemplea anda i istoria le Israeloschi caște sicavel chichi de egoisto hai bi pachiamasco sas-le von. (Luca 4:16, 25-30) O phiraimos le Isusosco ci sas cadea sar ajucărde-pe but manușa anda lesco timpo, hai cadaia cărdea bute jenen anda lende te poticnin-pe. (Mat. 11:16-19) w21.05 5, 6 ¶13, 14

Iech modo prin savo o Iehova phenel amenghe de mai anglal o pericolo le baricanimasco hai le hașvalimasco si le experiențea prin save nachle unii anda lesche slujitori. Cana phenas hașvalimos, daștil-pe, că gândisaras-ame co Satan. Vo sas iech andal îngeri le Iehovasche hai sas-les but bare privilegii. Cu sea cadala, vo ci sas-lo mulțumime lența. O Satan camlea ca lesche te anel-pe i închinarea cai numai le Iehovasche trebul dini. Anda codoia că camel te avas sar vo, camel te cherel-ame te avas nemulțumime soia si amen. I iechto cai vo athadea ande cado felo sas i Eva. Ande peschi bari iubirea o Iehova dea la Eva hai le Adamos but hai lașio hamos. Von daștinas te han „anda orisavo cașt andai bar”, numai anda iech corcoro nici. (Gen. 2:16) Cu sea cadala, o Satan athadea la Eva caște pachial că trebulas te hal vi anda codo cașt. Voi ci sas mulțumime soia sas-la, camlea mai but, tha jianas mișto so întâmplosardea-pe mai dur. I Eva păcătuisardea hai ji la urmă, mulea. (Gen. 3:6, 19) w21.06 14 ¶2, 3; 17 ¶9

O Adam hai i Eva trebunas te cheren șiave hai te len sama pe pengo chăr, i phuv. Dacă o Adam hai i Eva avileas te ascultisaren le Iehovastar hai avileas te train pala lesco scopo, vi von hai vi lenghe șiave avileas te așen ande leschi familia anda sea o timpo. Le Adamos hai la Eva sas-le iech cuci than andi familia le Iehovaschi. O David dea duma anda sar cărdea o Del le manușes hai phendea: „Cărdean-les iech țâra mai tele sar le îngeren hai dean-les i coroana la gloriachi hai le șucarimaschi”. (Ps. 8:5, n.s.) Si ciaces, o Iehova ci dea le manușen sa codo zuralimos, goghiaverimos hai sa codol capacități sar le îngeren. (Ps. 103:20) Cu sea cadala, le manușa sile numai „iech țâra mai tele” sar cadal creaturi spiritualo zurale. Si nasul că o Adam hai i Eva hasarde pengo than cai sas-le andi familia le Iehovaschi. Cadaia andea bare pharimata lenghe șiavenghe. Cu sea cadala, o scopo le Iehovasco ci parudea-pe. Vo camel ca le manușa ascultători te aven lesche șiave anda sea o timpo. w21.08 2, 3 ¶2-4

Aghies, but slujitori le Iehovasche nachen prin o pharimos că aver manușa așen lenghe contra. Sar exemplo, ande chichiva thema, le guvernea den sea penghi zor te așiaven amari buchi. Cadea că, amare phrala daștin te aven phandade hai ‘îngărde angla le guvernatori hai regi sar mărturia anda lende’. (Mat. 10:17, 18) Ande aver thema cai le phrala daștin te anen închinarea le Iehovasche libero, chichiva anda lende nachen prin o pharimos că le jene anda lenghi familia așen lenghe contra. (Mat. 10:32-36) Tha butivar, cadala den penghi sama că ci daștin te cheren amare phralen te na mai slujin le Iehovasche, cadea că ci mai așen lenghe contra. Hai, poiechdata, codola cai așile lenghe contra zurales, cărdile vi von mai târzio Martori le Iehovasche. Dacă vi tu naches prin o pharimos că aver așen tuche contra, av tromano, na mech-tu! O Iehova silo pașa tute hai ajutil-tu prin lesco zuralo spirito sfânto. Cadea că na-i sostar te daras. w22.03 16 ¶8

I Biblia sicavel că o Iehova urâl „le iacha cai den-pe bare, i hohamni șib [hai] le vasta cai șioren rat nedoșalo”. (Prov. 6:16, 17) Sa cadea, „vo urâl le manușen cai șioren rat hai codolen cai athaven”. (Ps. 5:6) O Iehova urâl cadichi de but cado phiraimos, că vo choslea pa i phuv sea le manușen nasul anda o timpo le Noesco, anda codoia că von pherde i phuv le buchianța nasul cai cherenas-le. (Gen. 6:13) Vi prin o profeto Maleahi, o Iehova phendea că urâl codolen cai phiraven-pe nasul caring lengo rrom sau rromi hai roden te șinen o solaharimos la căsătoriaco bi te avel-len iech motivo biblico. O Iehova ci camel lenghi închinarea hai va anela-le ca i cris anda so cheren. (Mal. 2:13-16; Evr. 13:4) O Iehova camel te „urâsaras zurales o nasulimos”. (Rom. 12:9) Te urâsaras zurales vareso, însemnol că ci camas nici măcar te dichas-les angla amare iacha. Cadea că, vi numai o gândo te cheras vareso nasul andel iacha le Iehovasche trebulas te cherel-ame te simțosaras-ame jiungales. w22.03 4, 5 ¶11, 12

Ando viitorii pașardo, amaro Dad cerisco va dela-ame but binecuvântări prin pesco Regato. Codolen cai ajucăren mai dur le Iehovas va avela-le but miștimata, vi aghies, tha vi andi lumea i nevi. Cana le slujitori le Iehovasche va jiana andi lumea nevi, von ci va mai nachena prin pharimata cai aghies duchaven lengo ilo. I duch hai o neciacimos ci va mai avena. (Rev. 21:4) Andi lumea nevi sea le manușen va avela-le sea so trebul-le. (Ps. 72:16; Is. 54:13) Ce șucar viitorii ajucărel-ame. O Iehova pregătil-ame încă de acana anda i viața andi lumea nevi hai ajutil-ame te nachas părdal le obiceiuri greșime hai te bariaras calități creștino. Te na hasaras amaro tromai hai te na mechas-ame! Angla amende si i ciaci viața. Cadea că, te ajucăras mai dur pherde răbdarea ca o Iehova te cherel peschi buchi! w21.08 13 ¶17-19

Na pala but timpo pala so primisarde cado lil catar o apostolo Pavel, le creștini anda Iudeea trebuisarde te mechen penghe chăra, penghe afaceri hai le neamuri cai ci sas-le creștini hai trebuisarde „te nașen ca le plaina”. (Mat. 24:16) Si ciaces că, ande codo timpo, sas zurales importanto ca von te ajutin-pe iech averes. Dacă angla cadaia von cărde so phendea lenghe o Pavel te den vi averen anda so sas-le, siguro sas lenghe mai ușoro te paruven pengo modo viațaco ande codo nevo than. Amare phrala hai pheia ci va phenena amenghe sea o timpo dacă trebul lenghe vareso. Cadea că de chi zor te phiraves-tu cadea ca le coaver te daștin te pașion ușoro tutar. Siguro că vi ande chi congregația, si phrala hai pheia cai camen anda ilo te ajutin averen. Von ci sicaven niciechdata că si pharo anda lende te cheren so mangas-le. Jianas că de fiesavi data cana mangas lengo ajutorii von va dena-les amenghe hai camas te las-ame pala lengo exemplo. w22.02 23, 24 ¶13-15

Andel palutne bărșa, but congregații hai circumscripții sas-le parude. Dacă manglea-pe amendar te jias ande iech nevi congregația, daștil-pe că sas amenghe pharo te mechas amare amalen hai amara familia. Tha phenel o Del directo le phurenghe ande so congregația te șion fiesave phrales? Nici. Anda codoia, daștil te avel amenghe pharo te respectisaras i îndrumarea cai sas amenghe dini. O Iehova pachial-pe andel phure cana len cadal decizii, anda codoia vi amen trebul te pachias-ame ande lende. Sostar trebulas te cheras buchi mișto ande iech than le phurența hai te încăras conto catar le decizii cai len-le, chiar cana ci placian-ame cadala? Anda codoia că cana cheras cadea ajutisaras ca o poporo le Devlesco te așel chidino. I congregația sili zurali cana savore încăras conto pherde umilința, catar le decizii cai lel-le o corpo le phurengo. (Evr. 13:17) Hai, vi mai importanto, sicavas că si amen pachiamos ando Iehova, cana cheras buchi mișto ande iech than codolența ande caste vo șiutea pesco pachiamos hai alosardea-le te len sama pe amende. (Fap. 20:28) w22.02 4, 5 ¶9, 10

Dacă san iech phral, daștis te cheres buchi caște des duma mai șucar hai te sicaves mai mișto. Cana meches tut „astardo” catar o fapto te citisares mai mișto, te des duma mai șucar hai te sicaves, cadaia va avela iech binecuvântarea anda codola cai așunen tut. (1 Tim. 4:15) Studiisar hai șiu andi aplicarea fiesavi calitatea sicadi andi broșura Dedichisar-tu te citisares hai te sicaves. Studiisar fiesavi calitatea, iech po iech hai cher so sichilean cana încăres teme. Mang sfaturia catar o consilierii sau le coavere phurendar cai „cheren buchi phares anda o cuvânto hai anda o sicaimos”. (1 Tim. 5:17) Cher eforturi na numai te sichios i lecția andai broșura, tha ajutisar vi codolen cai așunen tut te zuriaren pengo pachiamos hai te cheres-len te nachen ca acțiunea. Cadea, vi chi bucuria hai vi lenghi va bariola. w21.08 24 ¶17

Dacă dichas le coaveren că sile mai bare amendar, ci va avela te camas te avas mai lașe sar codola cai jianen te cheren mai but buchia hai mai mișto sar amen. Tha, amen sam bucurime anda lende, vi mai but cana folosisaren penghe talentea caște așaren le Iehovas. Cadea, savore anda amende va avela te rodas i pacea hai i unitatea andi congregația. Daisaras te încăras tela controlo i invidia dacă sicavas modestia. Cadaia însemnol vi te prinjianas amare limite. Dacă sam modești, ci va avela te camas te sicavas că amen si amen mai but talentea sau că sam mai lașe sar aver. Mai but, va avela te das sea amari zor caște sichioas averendar cai jianen mai but buchia sar amen. Sar exemplo, daisaras te pușias ieche phrales cai silo iech lașio sicaitorii, sar pregătisarel pesche cuvântări. Iecha pheia cai jianel te cherel mișto haben, daisaras te mangas-la te phenel vi amenghe sar cherel-les. w21.07 16 ¶8, 9

Ando lil Numerea dichas că o Iehova phendea ca iech israelito te avel mudardo anda codoia că chidea cașta ando sabato. Hai ando 2 Samuel phenel-pe că, pala mai but șăla bărșa, o Iehova iertisardea le reges David, cai cărdea adultero hai mudardea. (Num. 15:32, 35; 2 Sam. 12:9, 13) Cadea că, daisaras te pușias-ame: „Sostar iertisardea o Iehova le Davidos anda mudarimos hai adultero, hai sostar phendea te avel mudardo ocoaver manuș anda iech păcato cai falas-pe but mai țâno?”. Caște das răspunso cadale pușimaste, te dichas trin buchia cai trebulas te încăras-le andi goghi cana citisaras andai Biblia. I Biblia ci sicavel sea o timpo sea le buchia anda iech relatarea. Sar exemplo, anda o David jianas că falea-les nasul anda ilo anda so cărdea. (Ps. 51:2-4) Tha so jianas anda o murș cai uștardea i legea anda o sabato? So felo manuș sas-lo vo? Falea-les nasul anda so cărdea? Mai uștardea vi aver data le Iehovasche legi? Camlea vo te așunel cana sas lesche phendo de mai anglal că so cherel na-i mișto? I Biblia ci phenel amenghe cadal buchia. Cu sea cadala, so jianas anda o Del arăsăl amenghe caște avas siguri că vo „silo orta ande sea lesche droma”. (Ps. 145:17) w22.02 2, 3 ¶3, 4

Iech manuș modesto ci ajucărel pestar mai but sar daștil te cherel. Cadea, vo va așela bucurime hai va cherela mai dur sea so daștil. Daisaras te phenas anda iech manuș cai si modesto că si sar varecon cai conducil iech mașina pe iech drom cai jial caring opre. O șoferii trebul te paruvel ca iech viteza mai țâni caște daștil te jial mai dur caring opre. Si ciaces, daștil-pe că va jiala mai locăs, tha va jiala mai dur. Sa cadea, iech manuș cai silo modesto jianel cana si o timpo te cherel paruimata hai te „mechel-la mai locăs” caște cherel mai dur buchi ando servicio le Iehovasco hai te ajutil averen. (Filip. 4:5) Te gândisaras-ame co exemplo cai mechlea-les o Barzilai, cai sas les 80 bărșa cana o rege David achardea-les te cherel partea andai bar regalo. Pherdo modestia, o Barzilai ci camlea te acceptil i oferta le regeschi hai phendea te jial ande lesco than iech murș mai tărno po anav Chimham. (2 Sam. 19:35-37) Cadea sar o Barzilai, le murșa mai phure sile bucurime te mechen codolen mai tărne te cheren buchi ando servicio le Iehovasco. w21.09 10 ¶6, 7

Si amenghe pharo te dichas le Iehovas sar iech Dad iubitorii? Anda chichiva anda amende daștil te avel. Anda codoia că barileam ande iech familia cai ci simțosardeam i iubirea ieche dadeschi si amenghe pharo te jianas sar si te avel tut iech dad iubitorii. Tha, so but zuriarel-ame te jianas că o Iehova hachiarel mișto so si ande amaro ilo. Vo camel te avel pașă amendar. Anda codoia, lesco Cuvânto zuriarel-ame: „Pașion le Devlestar hai vo va pașiola tumendar!”. (Iac. 4:8) O Iehova iubil-ame hai camel te avel o mai lașio Dad cai daștilas te avel-ame. O Isus daștil te ajutil-ame te pașioas le Iehovastar. Vo prinjianel zurales mișto le Iehovas hai sicavel perfecto lesche calități. Anda codoia daisardea te phenel: „Con dichlea man dichlea vi le Dades”. (Ioan 14:9) Cadea sar iech phral mai baro, o Isus sicavel-ame te respectisaras amare Dades hai te ascultisaras lestar, te cheras le buchia cai placian-les hai te avas cuci ande lesche iacha. Tha, chichi timpo sas-lo pi phuv, o Isus sicadea amenghe vi mai but chichi de lașio hai iubitorii silo o Iehova. w21.09 21 ¶4, 5

O poporo le Iehovasco silo chidino andi închinarea andini le corcore ciace Devlesche. O Iehova dea le phurenghe i phari buchi te încăren uji i congregația. Dacă iech phral cherel iech baro păcato, o Iehova ajucărel le phurendar te dichen dacă cado mai daștil te așel andi congregația. Mașcar aver buchia, von trebun te dichen dacă codole phrales fales ciaces nasul anda ilo anda so cărdea. Chiar cana phenel că fal-les nasul, urâl vo ciaces so cărdea? Camel anda sea o ilo te na mai cherel codo păcato? Dacă arăslea te păcătuil anda codoia că siles amala nasul, camel vo te mechel-pe lendar? Le phure manghen-pe hai roden te dichen so phenel i Biblia anda so cărdea codo manuș hai dichen atento dacă codoles cai păcătuisardea fales ciaces nasul anda ilo anda so cărdea. Pala codoia, von hachiaren dacă codo manuș daștil te avel mai dur iech Martoro le Iehovasco. Tha poiechdata, vo trebul te avel dino avri andai congregația. (1 Cor. 5:11-13) w22.02 5 ¶11, 12

Chiar cana sam bolde de țâra timpo sau de mai but bărșa, savore camas te avel amen iech personalitatea cuci andel iacha le Iehovasche. Caște avel amen iech șucar personalitatea trebul te încăras tela o controlo amari goghi. Sostar? Anda codoia că i goghi cherel buchi ca amari personalitatea. Cana gândisaras-ame sea o timpo ca buchia nasul, cadala daștin te îngăren-ame te phenas sau te cheras buchia greșime. (Ef. 4:17-19) Tha, dacă pheras amari goghi gândurența lașe von va cherena-ame te das duma hai te cheras lașe buchia andel iacha amare Dadesche Iehova. (Gal. 5:16) Cu sea cadala, poiechdata, ande amari goghi daștin te phiren gânduri nasul. Tha daisaras te alosaras te încăras cadal gânduri tela controlo, caște na arăsas te cheras buchia nasul. Angla so te bolas-ame, trebuisardea te mechas-ame catar le buchia nasul cai o Iehova urâl-le hai te na mai das duma melales. Cado sas o iechto hai o mai baro paso caște das tele pa amende i purani personalitatea. Tha, caște avas cuci andel iacha le Iehovasche, trebul te las pe amende i nevi personalitatea. w22.03 8 ¶1, 2

Andal phure de congregație si iech phari buchi te jianen dacă iech manuș cai cărdea iech baro păcato sicavel ciaci căința. Anda codoia că ci daștin te dichen ando ilo ieche manușesco, le phure trebun te roden dovezi anda o phiraimos lenghe phralesco caște dichen dacă vo hachiarel că so cărdea sas zurales nasul. Le phure trebun te dichen că codo cai păcătuisardea paruvel pesco modo gândimasco, pesche sentimentea hai pesco phiraimos. Cadal paruimata daștin te len lestar mai but timpo. Iech manuș cai silo excluso sicavel ciaci căința cana jial de fiesavi data ca le întruniri hai lel-pe pala o sfato le phurengo te manghel-pe hai te studiil. Mai but, va avela atento te așel dur catar le buchia cai îngărde ca lesco păcato. Dacă del sea peschi zor te avel-les pale iech lași relația le Iehovaia, daștil te avel siguro că o Iehova va iertila-les ciaces hai că le phure va ajutina-les te avel pale andi congregația. w21.10 6 ¶16-18

Anda codoia că iubisardea zurales le Iehovas, o Isus andea închinarea numai lesche cadichi ando cerii, hai vi pi phuv. (Luca 4:8) Vi pesche discipolen sicadea-le te închinin-pe numai le Iehovasche. Nici vo, nici lesche discipoli, ci folosisarde vroiechdata imagini andi închinarea. Anda codoia că o Del silo Spirito, niciech buchi cărdi le vastendar le manușenghe ci daștil te sicavel i gloria le Iehovaschi. (Is. 46:5) Tha si mișto te cheras amenghe imagini anda chichiva cadea numime sfinți hai te mangas-ame lende? Andi duito anda le deș porunci, o Iehova phendea le cuvintea anda o texto de aghies. Anda codola cai camen te anen închinarea le Devlesche, cadea sar camel vo, cadal cuvintea sile zurales claro. I istoria laico phenel că le iechto creștini anenas închinarea numai le Devlesche. Aghies, le Martori le Iehovasche len-pe pala o exemplo mechlo catar le creștini anda o iechto secolo. w21.10 19, 20 ¶5, 6

O Isus phendea le creștinenghe anda o iechto secolo cai beșenas andi Iudeea că, atunci cana va dichena o Ierusalimo „înconjurime catar le armatea cai șiute penghe țărhea code”, von trebunas „te nașen ca le plaina”. (Luca 21:20-24) Chiar dacă așile andi viața anda codoia că nașle, von hasarde but buchia. Acana chichiva bărșa, i revista O Turno de veghe phendea cadai buchi: „Von mechle penghe phuvea hai penghe chăra bi te chiden nici le buchia anda penghe chăra. Von pachiaie-pe ando Iehova că avelas te lel sama pe lende hai că avelas te ajutil-le, von șiute i închinarea co Iehova mai opre sar oriso aver vareso cai daștilas te fal importanto”. Ande O Turno de veghe anda savo deam duma mai anglal, phenel-pe mai dur: „Daștil-pe că va avena vi zumaimata cai va sicavena sar dichas amen le buchia materialo; si cadala mai importanto anda amende sau mai importanto si i salvarea cai va avela anda fiesavo anda amende catar o Del? Cana va avela o sfârșito daștil-pe te nachas prin pharimata hai te na aven amen le buchia cai trebun amenghe. Trebul te avas gata te cheras oriso trebul”. w22.01 4 ¶7, 8

Țâra timpo pala so încaladea pesche poporos anda o Egipto, o Iehova sicadea chichiva buchia le Moisesche anda peste hai dea lesche duma anda pesco anav hai anda pesche calități. Vo phendea: „Iehova, Iehova, iech Del îndurătorii hai pherdo compasiunea, cai ci holiavel-pe sigo hai barvalo andi iubirea loialo hai ciacimos, cai sicavel iubirea loialo anda mii, cai iertil o nasulimos, i greșeala, hai o păcato!”. (Ex. 34:6, 7) Prin cadal cuvintea cai arăsen ando ilo, o Iehova sicadea le Moisesche iech șucar buchi anda peschi iubirea loialo. Savi si cadaia? O Iehova phendea anda peste na numai că sicavel iubirea loialo tha că silo „barvalo andi iubirea loialo”. Cadal cuvintea apărin andi Biblia de încă efta-var. (Num. 14:18; Neem. 9:17; Ps. 86:15; 103:8; Ioel 2:13; Iona 4:2) De fiesavi data voi referil-pe numai ca o Iehova, niciechdata ca le manușa. Si zurales interesanto că chiar o Iehova alosardea te sicavel anda peste cadai șucar calitatea. Hachiaras catar că i iubirea loialo si zurales importanto anda leste. w21.11 2, 3 ¶3, 4

Codola căsătorime daștin te sichion but buchia anda o exemplo cai mechlea-les o Petru hai leschi rromni. Pala cam șiov șiona sau chiar iech bărș de cana dichlea i iechto data le Isusos, o Petru trebuisardea te lel iech decizia imoportanto. Leschi buchi sas te astarel mașe. Cadea că, cana o Isus phendea lesche te avel pala leste, o Petru trebulas te lel iech decizia, hai te încărel conto vi catar i situația pesca familiachi. (Luca 5:1-11) O Petru alosardea te jial pala o Isus ande leschi buchi de predicare. Pala so fal-pe, i rromni le Petroschi sas pașa leste ande cadai decizia cai lea-la. I Bibila sicavel că, pala o jiuvindimos le Isusosco, voi gălea ande iech than le Petroia ande chichiva ocazii. (1 Cor. 9:5) Sam siguri că, anda codoia că la sas-la iech lașio exemplo, o Petru daisardea te del bi te încărel-pe parpale sfaturi le rromnianghe hai le rromenghe creștini. (1 Pet. 3:1-7) Si claro că cadichi le Petros, hai vi lesca rromnia sas-len pachiamos andi promisiunea le Iehovaschi că va avela te lel sama pe lende dacă șion o Regato po iechto than. (Mat. 6: 31-34.) w21.11 18 ¶14

O apostolo Pavel iubisardea zurales but pesche phralen. Vo cărdea but buchi caște lel sama pe lende. (Fap. 20:31) Anda codoia lesche phrala hai pheia iubisarde-les cadea de but. Iech data, cana le phure anda Efes hachiarde că ci va mai dichena-les niciechdata, „șindea-le o roimos”. (Fap. 20:37) Sa cadea, le phure de aghies iubin zurales but penghe phralen hai pheian hai den sea penghi zor te ajutin-le. (Filip. 2:16, 17) Cu sea cadala, poiechdata andal phure si pharo te cheren sea so camen. So daștil te ajutil-le te nachen părdal le pharimata cai silen? O exemplo le Pavelosco daștil te ajutil-le zurales but. (1 Cor. 11:1) Vo sas iech manuș sar amen, iech manuș imperfecto cai poiechdata trebuisardea te del sea peschi zor caște cherel so si mișto. (Rom. 7:18-20) Mai but, leschi viața ci sas ușoro hai sas-les but pharimata. Tha o Pavel ci mechlea-pe hai ci hasardea peschi bucuria. Cana len-pe pala o exemplo le Pavelosco, le phure daștin te nachen părdal le pharimata cai silen hai te slujin mai dur le Iehovasche pherde bucuria. w22.03 26 ¶1, 2

Anda o Levitico 19:3 hachiaras că trebul te respectisaras o sabato. Anda codoia că ci sile tela i Legea, le creștini ci trebun te încăren iech sabato ande fiesavo curco. Tha, cana dichas o modo ande savo le israeliți respectinas o sabato hai le miștimata cai sas-len, cadai buchi daștilas te avel lași vi anda amende. Ando sabato, le israeliți mechenas de iech partea i buchi de ghies cu ghies hai ortosarenas pengo dichimos pe închinarea cai anenas-la le Iehovasche. Ci fal amenghe pharo te pachias, că ando sabato, o Isus cherelas pesche obiceio caște jial ca i sinagoga ande pesco foro cai barilea hai te citisarel anda o Cuvânto le Devlesco. (Ex. 31:12-15; Luca 4:16-18) I porunca anda o Levitico 19:3, te încăren-pe le sabate, trebulas te cherel-ame te las anda o timpo cai das-les le buchianghe de ghies cu ghies hai te concentrisaras-ame pe le buchia spiritualo. Pachias că trebulas te cheres chichiva lașiarimata ande cado domenio? Dacă cheres tuche timpo anda le buchia spiritualo, va avela-tu iech amalimos chidino le Iehovaia, hai cado si iech manglimos importanto caște avas sfinți. w21.12 5 ¶13

Cana sas-lo pi phuv, o Isus beșlea ande iech than orisavo felo manușența. Vo halea le bare manușența hai codolența barvale, tha beșlea but timpo vi mașcar codola cai sas-le ciore hai neajutorime. Mai but, vo sicadea compasiunea caring codola cai sas-le dichle sar „păcătoși”. Anda codoia, unii iudei cai pachianas anda pende că sile orta poticnisarde-pe. Von pușle le discipolen le Isusosche: „Sostar han hai pien codolența cai len impozitea hai codolența păcătoși?”. O Isus phendea lenghe parpale le cuvintea anda o texto de aghies (Luca 5:29-32) Bute timpoia angla so te avel o Mesia, o profeto Isaia phendea anda leste că ci va avela acceptime le manușendar. I profeția phenelas de mai anglal: „Vo sas-lo prasado hai le manușa jianas dur lestar . . . Sas sar cana leschi fața sas-li garadi amendar. Sas-lo prasado hai dichleam-les sar ieche chances”. (Is. 53:3) Cadea sar sicavel i profeția, le manușa avenas te „jian dur lestar”. Cadea că, le iudei anda o iechto secolo trebuisarde te jianen că o Isus avelas te na avel acceptime sar Mesia le mai bute manușendar. w21.05 8, 9 ¶3, 4

Chichiva anda le dintune creștini ci ascultinas sigo le sfaturi. (Iac. 1:22) Aver dichenas lașe iachența numai codolen cai sas-le barvale. (Iac. 2:1-3) Hai aver ci încărenas parpale penghi șib. (Iac. 3:8-10) Chiar cana cadale creștinen sas-len bare problemea, o Iacov pachiaia că daștinas te paruven-pe. Vo dea-len sfaturi pherde lașimos, tha directo hai zuriardea codolen cai sas-le covle spiritualo te manghen o ajutorii le phurengo andai congregația. (Iacov 5:13, 14) O sicaimos: Te dichas le buchia cadea sar sile ciaces, tha te dichas averen ande iech modo lașio. Daștil-pe că bute manușenghe savența studiisaras i Biblia si lenghe pharo te aplichin lache sfaturi. (Iac. 4:1-4) Daștilas te nachel mai but timpo ca von te mechen le buchia nasul anda lengo phiraimos hai te bariaren calități creștino. Trebul te avel amen tromai hai te phenas codolenghe casa studiisaras so paruimata trebunas te cheren, tha sa cadea trebul te avel amen iech atitudinea lași hai te pachias zurales că o Iehova țârdel peste codolen umili hai del lenghe zuralimos caște cheren paruimata. (Iac. 4:10) w22.01 11 ¶11, 12

Sea le creștini den penghi zor te sicaven îndurarea cadea sar o Iehova. Sostar? Iech motivo si codo că o Iehova ci așunel le manglimata codolenghe cai ci sicaven îndurarea caring aver. Niciech anda amende ci camas te arăsas ande cadai situația. Anda codoia, trebul te avas atento te na cărdiol ande amende iech ilo barăsco. Ci camas te phiravas-ame nasul ieche phraleia cai silo duchado, camas ca amaro can te avel sea o timpo pâtărdo caște așunel cana „del cingar codo cioro”. Sa cadea, das amari zor te încăras ande amari goghi le cuvintea: „Anda codo cai ci sicavel îndurarea, i judecata va avela bi îndurareaco”. (Iac. 2:13) Cana pherde umilința das amari sama chichi de but trebul amenghe îndurarea, daștil-pe că va camaia vi mai but te sicavas îndurarea. Camas te avas îndurători vi mai but codolența cai aven parpale andi congregația. O exemplo chichiva manușengo andai Biblia daștil te ajutil-ame te cheras ca i îndurarea te cherel partea anda amende hai te na phiravas-ame nasul averența. w21.10 12 ¶16, 17

Co sfârșito pesca buchiaco pi phuv, andi palutni riat anda leschi viața, o Isus rodea iech than liniștime cai te meditosarel hai te manghel-pe. Cado than sas i bar Ghetsimani. Cade, o Isus dea le discipolenghe iech sfato importanto ande soste priveal o manglimos. Cana arăsle andi bar Ghetsimani, daștil-pe că sas nachlo catar o mașcar la rachiaco. O Isus zuriardea le apostolen ‘te așen uștiade’, pala codoia gălea iech țâra mai dur caște manghel-pe. (Mat. 26:37-39) Tha cana manghelas-pe, le apostoli sovenas. Cana arachlea-len că sovenas, o Isus zuriardea-len pale ‘te așen uștiade hai te manghen-pe sea o timpo. (Mat. 26:40, 41) Vo jianglea că sas-le îngrijorime hai chine. Anda codoia, phendea pherdo iubirea: „O mas silo covlo”. O Isus gălea încă dui-var te manghel-pe, tha, cana avilea parpale, arachlea de fiesavi data le discipolen că sovenas, na că manghenas-pe. (Mat. 26:42-45) w22.01 28 ¶10, 11