Martia

O apostolo Petru phendea pesche phralenghe te folosin penghe daruri caște zuriaren codolen andai congregația. Vo scriisardea: „Cadea sar fiesavo primisardea iech daro, folosin-les, hai slujin iech averesche sar lașe administratori le lașimasche nemeritime le Devlesco”. (1 Pet. 4:10) Ci trebulas te încăras-ame parpale te folosisaras chichi mai mișto amare daruri anda codoia că daras că le coaver daștinas te aven invidioși pe amende sau te aven perade. Pe aver partea si si importanto te na das-ame bare lența. (1 Cor. 4:6, 7.) Te na bâstras că orisavi buchi cai jianas te cheras-la si iech daro le Iehovastar. Trebul te folosisaras cadal daruri caște zuriaras le phralen, na caște țârdas i atenția caring amende. (Filip. 2:3) Cana folosisaras amaro zuralimos hai talentea caște cheras i voința le Devleschi amaro ilo silo pherdo bucuriatar. Amen sam bucurime na anda codoia că cheras mai but sar aver sau că camas te sicavas că sam mai lașe sar von, tha anda codoia că folosisaras amare daruri caște așaras le Iehovas. w22.04 11, 12 ¶7-9

O Isus dichlea zurales cuci o Cuvânto le Devlesco hai cadaia sicadea-pe ande iech modo profetico prin le cuvintea anda o Psalmo 40:8: „Mânri plăcerea, o, mânro Del, si te cherav so tu cames hai chi legea si ande mande”. Cadea că, vo sas-lo zurales bucurime hai slujisardea anda sea o ilo le Iehovasche. Vi amen daisaras te avas pherde bucuria hai te slujisaras sea o timpo le Iehovasche dacă mechas ca o Cuvânto le Devlesco te arăsăl ji ando mai garado than anda amaro ilo. (Ps. 1:1-3) Le cuvintea hai o exemplo le Isusosco zuriaren-ame te das amari zor te lașiaras o modo sar citisaras i Biblia. Caște hachiaras mai mișto le pasajea biblico, si importanto te mangas-ame, te na sighiaras cana citisaras, te șioas amenghe pușimata hai te cheras amenghe harne notițe. Amen daisaras te folosisaras amaro discernământo caște rodas atento te hachiaras so citisardeam le ajutoroia cai arachas-les ande amare publicații bazome pi Biblia. O Cuvânto le Devlesco va cherela buchi ande amende dacă si amen iech atitudinea lași atunci cana citisaras-les. Dacă cheras sea so daisaras caște cheras cadal buchia cai dichleam-le, i citirea la Bibliachi va anela amenghe bare miștimata hai va avela te pașioas vi mai but le Iehovastar. (Ps. 119:17, 18; Iac. 4:8) w23.02 13 ¶15, 16

Alosar te sichios te cheres mișto iech anumime buchi hai pala codoia, de chi zor te cheres cadal buchia chichi mai mișto. Dacă șiutean tuche andi goghi te lașiares o modo ande savo sicaves averen, daștis te diches atento i broșura Dedichisar-tu te citisares hai te sicaves. Cana si tuche dini iech tema ca i întrunirea anda o mașcar le curchesco, daștis te manghes ieche phrales cai jianel te încărel șucar teme, te așunel-tu sar încăres chi tema angal so te încăres-la ca i sala le Regatoschi hai te phenel tuche so daștis te cheres mai mișto. De chi zor te aves prinjiando sar iech phral vreanico hai demno pachiamasco, na numai sar iech phral cai jianel te încărel șucar teme. (2 Cor. 8:22) Tha dacă cames te aves mai lașio ca iech buchi cai si tuche pharo te cheres-la? Na mech-tu! Arăslea o Timotei te del duma zurales șucar angla aver sau te avel iech sicaitorii zurales lașio? I Biblia ci phenel cadaia. Tha daisaras te pachias că anda codoia că lea-pe pala o sfato le Pavelosco, o Timotei daisardea te cherel peschi buchi anda o Iehova sea mai mișto. (2 Tim. 3:10) w22.04 24 ¶8-11

Con si i fiara cai sila efta șăre? Cadai fiara si sar o leopardo, tha lache pânre si sar ieche rișesche, laco mui si sar o mui ieche leosche, hai sila vi deș șinga. Sea cadal buchia sicaven-pe vi anda le ștar fiare anda o lil Daniel, o capitolo 7. Tha ando lil Revelația ci sile sicade ștar fiare, tha numai iech corcori, cai sila sa cadal caracteristici. I fiara cai sila efta șăre ci reprezentil iech corcoro guverno sau iech corcoro imperio. Mai but, anda late phenel-pe că sila zuralimos „opral orisavo tribo, poporo, șib hai națiunea”. Cadea că hachiaras că la fiara sila mai but zuralimos sar ieche corcore guvernos naționalo. (Rev. 13:7) I fiara reprezentil sea le zuralimata politico cai raisarde opral le manușa ji acana. (Ecl. 8:9) Iech aver buchi cai sicavel că voi reprezentil sea le zuralimata politico si o număro deș, cai silo folosime butivar andi Biblia caște sicavel-pe vareso completo. w22.05 9 ¶6

Con va țârdela miștimata anda cadal buchia? Ando iechto than, i bari mulțimea cai va așela andi viața co Armaghedono, ande iech than le șiavența cai daștinas te năștin-pe lenghe andi lumea nevi. Tha i Revelația, o capitolo 20, phenel că le mule va avena jiuvindime. (Rev. 20:11-13) ‘Codola orta’, le slujitori le Iehovasche cai mule, ande iech than ‘codolența neorta’, le manușa cai ci arăsle te prinjianen mai but buchia anda o Iehova, va avena uștiade viațate pi phuv. (Fap. 24:15; Ioan 5:28, 29) Sicavel cadaia că sea le manușa cai mule va avena jiuvindime ando Raimos de Iech Mia Bărș? Nici. Codola cai anda nasulimos ci camle te slujin le Iehovasche chichi traisarde ci va avena andine parpale viațate. Len sas len cadai ocazia, tha prin so alosarde te cheren, von sicade că ci meritin te train ando Paradiso. (Mat. 25:46; 2 Tes. 1:9; Rev. 17:8; 20:15) w22.05 18 ¶16, 17

Prin „o sclavo fidelo hai prevăzătorii”, o Isus cărdea pi phuv iech șucar organizația, ande savi daisaras te anas iech închinarea uji le Iehovasche. (Mat. 24:45) Sar diches cadai organizația? Daștil-pe că vi tu simțosares sa cadea sar o apostolo Petru, cai phendea caring o Isus le dumes anda o texto de aghies. Cai avileamas aghies dacă ci prinjiandeamas i organizația le Iehovaschi? Prin late, o Cristos lel sama te del-ame sicaimos caște avas zurale spiritualo. Sa cadea, sicavel-ame caște avas mai lașe andi lucrarea de predicare hai ajutil-ame te las pe amende „i nevi personalitatea”, caște avas cuci andel iacha le Iehovasche. (Ef. 4:24) O Isus del-ame iech îndrumarea goghiaver ande cadal timpuri phare. Cadai buchi dichilea-pe mișto cana astardea i pandemia de COVID-19. Ando timpo so but manușa ci jianenas so te cheren, o Isus lea sama te primisaras îndrumări claro, cai avenas te ferin-ame. w22.07 12 ¶13, 14

Andel puraimata, o Iehova phendea le israelițenghe te sicaven penghe șiaven anda leste mai butivar. (Deut. 6:6, 7) Le dada daștinas mai butivar ande iech ghies te den duma penghe șiavența hai te ajutin-le te bariaren ande pengo ilo i iubirea anda o Iehova. Iech șiavorro israelito daștilas te beșel but timpo pașa pesco dad cana ajutilas-les te cherel buchi i phuv sau te chidel i recolta. Iech șeiorri israelito daștilas te beșel but timpo pașa peschi dei cana ajutilas-la te suvel hai ca aver buchia ando chăr. Ande cado timpo, le dada daștinas te den duma penghe șiavența anda mai but buchia importanto, sar exemplo, anda sar si o Iehova hai anda o modo sar vo lelas sama pe lenghi familia. Ande but thema, le dada ci daștin te beșen penghe șiavența ando timpo le ghiesesco. Daștil-pe că le dada sile ca i buchi, hai le șiave ca i școala. Cadea că, le dada trebun te cheren penghe timpo te den duma penghe șiavența. (Ef. 5:15, 16) w22.05 28 ¶10, 11

Le bare păcatea si cana uștaren-pe zurales nasul le norme le Devlesche. Dacă iech creștino cherel iech baro păcato, cado trebul te manghel iertarea le Iehovastar ando manglimos hai te jial ca le phure de congregație. (Ps. 32:5; Iac. 5:14) So trebun te cheren le phure? Numai le Iehovas siles o zuralimos te iertil cu sea le păcatea prin i jertfa de răscumpărare le Isusoschi. Cu sea cadala, o Iehova dea le phuren i buchi te dichen, pe baza la Bibliachi, dacă iech jeno cai păcătuisardea daștil te mai așel andi congregația. (1 Cor. 5:12) Mașcar aver buchia, von trebun te roden o răspunso ca le pușimata cai aven: Camlea codo jeno te păcătuil hai chiar cărdea pesche iech plano? Garadea averendar so cărdea? Cărdea o păcato mai but timpo? Si dovezi cai sicaven că căisardea-pe ciaces? Dichiol-pe că o Iehova iertisardea-les? (Fap. 3:19) w22.06 9 ¶4

O Isus zuriardea pesche continuatoren te roden o ortomos. (Mat. 5:6) Cadaia însemnol te cames anda sea o ilo te cheres sea so si orta, lașio hai ujo andel iacha le Devlesche. Iubis vi tu o ciacimos hai o ortomos? Amen pachias anda sea o ilo că da. Tu urâs o hohaimos hai sea so si neorta hai nasul. (Ps. 119:128, 163.) Codola cai hohaven sicaven că len-pe pala o Satan, o conducătoro cadala lumeaco. (Ioan 8:44; 12:31) O Satan camel te meliarel o sfânto anav le Iehovasco. O Beng astardea te phenel hohaimata anda o Del încă de cana le manușa risarde o dumo le Iehovasche ando Eden. Vo camel te sicavel că o Iehova si iech conducătoro cai gândil-pe numai peste hai silo nepachivalo, cai garavel le lașe buchia le manușendar. (Gen. 3:1, 4, 5) O Satan pherel vi mai dur i goghi hai o ilo le manușengo hohaimatanța anda o Iehova. Cana le manușa alosaren te na iubin o ciacimos, o Satan daștil te îngărel-le ca iech phiraimos nasul hai te arăsăn te cheren buchia neorta. (Rom. 1:25-31) w23.03 2 ¶3

Daștil-pe că des sea chi zor te na mai cheres iech buchi cai jianes că si nasul, tha, poiechdata, des chi sama că arăsăs te cheres-la pale. Sau daștil-pe că san holiardo sau hasares chi răbdarea, anda codoia că pachias că ci va avela te arăsăs niciechdata te boles-tu. So daștil te ajutil-tu te na meches-tu? I iubirea anda o Iehova. Chi iubirea anda o Iehova si i mai șucar calitatea cai si tut. (Proverbe 3:3-6) Chi zurali iubirea anda o Del daștil te ajutil-tu te naches părdal orisavo pharimos cai daștil te avel ande chi viața. I Biblia del duma butivar anda i iubirea loialo cai sicavel-la o Iehova caring pesche slujitori. I iubirea loialo le Iehovaschi cherel-les te na mechel niciechdata pesche slujitoren hai ca lesco ilo te marel sea o timpo anda lende. (Ps. 100:5) Anda codoia că san cărdo pala o chipo le Devlesco, vi tu daștis te sicaves cadai iubirea. (Gen. 1:26) Sar? Mai anglal, de chi zor te sicaves recunoștința. (1 Tes. 5:18) Si mișto te pușes-tu ande fiesavo ghies: „Sar sicadea o Iehova peschi iubirea caring mande?”. Pala codoia, na bâstăr te mulțumisares le Iehovasche andel manglimata anda sea le lașe buchia cai cărdea-len anda tute. Dich ande sea cadala i iubirea le Iehovaschi caring tute. w23.03 12 ¶17-19

O Isus sicadea lașimos hai iubirea caring sea le 12 apostoli. So sichioas cathar? Na-i importanto numai so cheren aver, tha vi so cheras amen cana dichas lenghe imperfecțiuni hai greșeli. So trebul te cheras cana iech phral sau phei holiaren-ame? Daisaras te pușias-ame: „Sostar holiarel-ma cadea de but so cărdea o phral? Sicavel mânro phiraimos iech buchi nasul anda mande cai trebul te lașiarav-la? Nachel o jeno cai holiardea-ma prin iech pharimos? Vi cana si man sostar te avav holiardo, daștiv te sicavav iubirea hai te iertisarav?”. Cana phiravas-ame iubireaia averența sicavas că sam ciace continuatori le Isusosche. O exemplo le Isusosco sicavel-ame că trebul te das amari zor caște hachiaras amare phralen hai pheian. (Prov. 20:5) Amen ci daisaras te dichas so si ando ilo le manușengo cadea sar o Isus. Tha daisaras te sicavas răbdarea cana amare phrala hai pheia holiaren-ame. (Ef. 4:1, 2; 1 Pet. 3:8) Daștil te avel amenghe mai ușoro te cheras cadaia, cana das amari zor te hachiaras o modo sar barile von. w23.03 30 ¶14-16

O Satan daștilas te folosil-pe catar iech urgența medicalo caște cherel-ame te na mai avas loialo le Iehovasche. Le doctori sau amare neamuri cai ci slujin le Iehovasche, daștinas te încăren-pe amendar caște cheren-ame te las rat, hai cadea te uștaras i legea le Iehovaschi. Sau aver daștinas te camen te cheren-ame te pachias că trebul te las aver tratamentea cai aven contra i Biblia. Chiar cana ci camas te meras, jianas că o Iehova va iubila-ame vi mai dur, chiar cana ci mai sam andi viața. (Rom. 8:37-39) Cana le amala le Iehovasche soven ando merimos, von așen ande leschi goghi, sar cana sile încă jiuvinde. (Luca 20:37) Vo abia ajucărel te anel-le parpale viațate. (Iov 14:15) O Iehova pochindea iech prețo zurales baro ca amen ‘te avel amen viața veșnico’. (Ioan 3:16) Jianas chichi de bari si i grija hai i iubirea le Iehovaschi caring amende. Cadea că, cana sam darade că va avaia mudarde sau sam nasfale, ci camas te mechas le Iehovas. Mai but, amen camas te ortosaras-ame caring leste caște del-ame mângâierea, goghiaverimos hai zuralimos. Exacto cadaia cărde i Valérie hai laco rrom. (Ps. 41:3) w22.06 18 ¶16, 17

I Biblia phenel: „I dar le Iehovastar si o începuto le goghiaverimasco hai o prinjianimos Codolesco Preasfânto si hachiarimos”. (Prov. 9:10) Cadea că, cana trebul te las iech bari decizia, trebul te las-ame pala „o prinjianimos Codolesco Preasfânto”, adică te rodas te dichas so pachial o Iehova anda codoi buchi. Daisaras te cheras cadaia cana studiisaras i Biblia hai amare publicații biblico. Cadea, sicavas că sam ciaces goghiaver. (Prov. 2:5-7) O Iehova si o corcoro cai daștil te del-ame ciacio goghiaverimos. (Rom. 16:27) Sostar daisaras te phenas cadaia? Iech: anda codoia că vo si o Creatorii hai prinjianel sea-l buchia anda leschi creația. (Ps. 104:24) Dui: sea so cherel vo sicavel goghiaverimos. (Rom. 11:33) Hai trin: lesche sfaturi goghiaver anen miștimata sea o timpo codolenghe cai len-pe pala lende. (Prov. 2:10-12) Caște avel amen iech ciacio goghiaverimos, trebul te hachiaras cadal ciacimata de bază hai te mechas-le te cheren buchi ca amare decizii hai phiraimos. w22.10 19 ¶3, 4

Anda o războio cai del-pe duma andi Revelația, capitolo 12, hachiaras că o Satan hasardea o marimos hai, ande iech than pesche benghența, sas-lo șiudino tele pașa i phuv. Cadaia îngărdea ca bare vaiuri pi phuv hai, de atunci, o Satan șiorel peschi holi opral le manușa. (Rev. 12:9-12) Sar zuriaren-ame cadal profeții? Sea so si aghies pi phuv hai le paruimata cai dichion-pe mișto ando phiraimos le manușengo, sicaven ciaces că o Isus sas cărdo Rege. Cadea că, ando than te mechas-ame holiarde cana dichas că le manușa cheren buchia nasul andai ura, te anas amenghe andi goghi că sea so cheren pheren le profeții andai Biblia. Amen jianas că o Regato rail! (Ps. 37:1) Anda codoia, daisaras te ajucăras-ame ca le pharimata andai lumea te aven vi mai nasul ando timpo so o Armaghedono pașiol vi mai but. (Mar. 13:8; 2 Tim. 3:13) Sam zurales recunoscători că amaro Dad cerisco iubitorii ajutil-ame te hachiaras sostar traisaras ande cadal timpuri phare! w22.07 3, 4 ¶7, 8

Daisaras te mangas le Iehovas te ajutil-le amare phralen cana nachen prin nasfalimata, dezastrea naturalo, războaia, persecuții sau aver pharimata. Daisaras te cheras manglimata vi anda le phrala hai pheia cai cheren phares buchi andel operațiuni de ajutorare caște len sama pe codola cai sile andi nevoia. Prinjianes vi tu varecas cai nachel prin cadal zumaimata? Dacă da, daștis te phenes lesco anav ande chio manglimos? Cana mangas le Iehovas te ajutil cadale phralen te na mechen-pe hai te așen zurale, sicavas că iubisaras-len anda sea o ilo. Le phrala cai silen responsabilități andi congregația dichen cuci amare manglimata cai phenas-len ande lengo miștimos hai cadaia ajutil-len zurales but. Vi o apostolo Pavel jianglea că sas-les nevoia ca aver te cheren manglimata anda leste. O Pavel scriisardea: „Manghen tumen vi anda mande ca, atunci cana pâtrav mânro mui, te aven manghe dine lașe cuvintea caște daștiv te dav duma pherdo tromai hai te cherav prinjiando o secreto sfânto la vesteaco lași”. (Ef. 6:19) Vi aghies, si but phrala cai cheren phares buchi anda amende andi congregația. Amen sicavas amari iubirea anda lende cana mangas-ame le Iehovasche te del-len but miștimata anda i buchi cai cheren-la. w22.07 23, 24 ¶14-16

O coifo cherelas partea anda i armura ieche soldatoschi, hai cado ferilas lesco șăro. Ande amaro marimos spiritualo, trebul te ferisaras amari goghi catar le atacuri le Satanosche. Vo folosisarel-pe catar but buchia caște zumavel-ame hai te athavel amari goghi. Cadea sar o coifo ferilas o șăro le soldatosco, sa cadea i speranța feril amari goghi, caște așias loialo pașa o Iehova. Dacă amari speranța ci mai si cadea de zurali hai mechas ca amari goghi te așel ca le buchia la masesche, daisaras te bâstras amari speranța anda i viața veșnico. Cadea arăsle chichiva creștini anda o Corinto purano. Von hasarde pengo pachiamos ando jiuvindimos, iech promisiunea importanto cai cărdea-la o Del. (1 Cor. 15:12) O Pavel phendea că le manușen cai nai-le i speranța ande iech viața ando viitorii train numai anda aghies. (1 Cor. 15:32) But manușa cai ci pachian andel promisiuni le Devlesche train anda lenghe plăceri, hai roden te cheren penghi viața chichi mai lași acana. Tha amen ajucăras pherde pachiamos o viitorii cai promitisardea-les amenghe o Iehova. w22.10 25, 26 ¶8, 9

O Iehova acharel-tu te manghes-tu lesche. Vo dichel orisavo pharimos prin savo naches hai daștis te pachias că vo așunel-tu ciaces de fiesavi data. O Iehova bucuril-pe te așunel le manglimata cai cheren-len lesche slujitori. (Prov. 15:8) Anda so daștis te des duma le Iehovaia cana simțosares-tu corcoro? Daștis te șiores chio ilo angla leste. (Ps. 62:8) De duma anda so si ande chio ilo, anda che phare gânduri hai mang-les te ajutil-tu te încăres-le tela controlo. Mang-tu te avel-tu tromai caște daștis te șios mărturia hai te del-tu goghiaverimos caște des duma pherdo tacto. (Luca 21:14, 15) Sau, dacă san perado, mang le Iehovas te ajutil-tu te des duma ieche phraleia cai si zuralo spiritualo. Mang-les te ajutil vi le phrales te așunel-tu hai te hachiarel-tu. Av atento te diches sar del-tu răspunso ca che manglimata hai mech averen te ajutin-tu. Dacă cheres cadea, ci va avela te simțosares-tu cadea de corcoro. w22.08 10 ¶6

I nevi congregația anda Tesalonic, nachlea prin bare persecuții. Iech data, but manușa nasul chidine ande iech than îngărde „chichiva phralen ca codola cai conducinas o foro”. (Fap. 17:6, 7) Te gândisaras-ame chichi de but daraile cadala neve creștini anda Tesalonic, cai sas-le bolde de țâra timpo! Von daisardeas te na mai cheren cadea de but buchia ando servicio le Iehovasco, tha o apostolo Pavel ci camlea te întâmplol-pe cadaia. Vo lea sama ca i congregația nevi cărdi te avel zuriardi. Vo phendea caring le tesaloniceni: „[Bișialav] le Timoteios, amaro phral . . . caște zuriarel tumen hai te sastiarel tumaro ilo, ca tumaro pachiamos te avel vazdino, ca chonic te na perel catar cadal pharimata”. (1 Tes. 3:2, 3) O Timotei dichlea chichi de but dea peschi zor o Pavel caște zuriarel le phralen anda Lystra, hai vi sar sas-lo o Iehova pașa lende. Cadea că, o Timotei daisardea te zuriarel le jenen andai nevi congregația anda Tesalonic că sea le buchia va înclena mișto vi anda lende. (Fap. 14:8, 19-22; Evr. 12:2) w22.08 21 ¶4

Co sfârșito le secolosco 19, iech grupo murșengo cai rodenas te hachiaren mai mișto i Biblia, cărdo catar o Charles Taze Russell, astarde te studiin atento le Scripturi. Von camenas te jianen so însemnol ciaces o merimos le Isusosco hai sar trebulas comemorime. Aghies, si amen but miștimata anda codoia că dine penghi zor te hachiaren sea mai mișto i Biblia. Sar? Le ajutoroia le Iehovasco, amare iacha sas-le pâtărde te dichas o ciacimos anda i jertfa le Isusoschi hai so cherel voi anda amende hai anda sea le manușa. (1 Ioan 2:1, 2) Sa cadea, hachiardeam că i Biblia del duma anda dui speranțe cai o Iehova del-le codolenghe cai sile cuci ande lesche iacha: viața bi merimasco ando cerii anda iech țâno număro manușengo hai viața anda sea o timpo pi phuv anda milioanea manușa. Cana gândisaras-ame ca i bari iubirea le Iehovaschi caring amende hai ca le miștimata cai va avena amen prin i jertfa le Isusoschi, pașioas sea mai but amare Dadestar cerisco, Iehova. (1 Pet. 3:18) Anda codoia, cadea sar amare phrala loialo andal puraimata, te acharas vi averen te aven ande iech than amența ca i Comemorarea, cai încăras-la cadea sar sicadea-ame o Isus. w23.01 21 ¶6, 7

Amaro ilo silo pherdo recunoștința, cana gândisaras-ame ca i viața hai o merimos le Isusosco. Cana sas-lo pi phuv, o Isus dea duma le manușența anda le miștimata cai va anela-le o Regato le Devlesco. Anda amende si zurales cuci cadal ciacimata. Sam zurales recunoscători că i răscumpărarea pâtărdea amenghe o drom caște daisaras te bucurisaras-ame catar iech amalimos chidino amare Devleia, Iehova, hai lesche Șiaveia, Isus. Sa cadea, codola cai sicaven pachiamos ando Isus daștin te ajucăren-pe te train anda sea o timpo hai te dichen pale codolen drago lenghe cai mule. (Ioan 5:28, 29; Rom. 6:23) Amen ci cărdeam chanci caște meritisaras cadal miștimata hai nici ci va daisaraia vroiechdata te pochinas parpale le Devles hai le Cristosos anda sea so cărde von anda amende. (Rom. 5:8, 20, 21) Tha, amen daisaras te sicavas lenghe chichi de recunoscători sam. Sar? Cana folosisaras amaro timpo, zuralimos hai love caște cheras amari buchi anda o Regato. Sar exemplo, daisaras te das iech vast caște ajutisaras cana vazden-pe sau cherel-pe buchi ca le thana folosime andi închinarea uji. w23.01 26 ¶3; 28 ¶5

Codola cai va raina ando Regato le Devlesco va trebuna te len sama catar miliardea manușa cai va traina pe sea i phuv. So baro privilegio dea o Iehova codolen 144 000! Cadea sar o Isus, codola 144 000 va avena regi hai rașaia. (Rev. 5:10) Tela i Legea mozaico, le rașaia lenas sama ca le manușen te avel-len iech sastimos lașio hai te așen pașă le Iehovastar. Anda codoia că i Legea sas „iech ucial le buchianghe lașe cai va avena”, hachiaras că codola cai va raina ande iech than le Isusoia va ajutina le manușen le Devlesche te aven sasteveste hai te așen pașă le Iehovastar. (Evr. 10:1) Sar va dena duma von le manușența pa i phuv, opral save va raila o Regato? Va trebula te ajucăras hai te dichas. Orisar va alosarela o Iehova te cherel cadai buchi, amen daisaras te pachias ciaces că, ando Paradiso cai va avela, sea le manușa va primina i îndrumarea cai trebul lenghe. (Rev. 21:3, 4) w22.12 11 ¶11-13

Camas te acharas chichi mai bute manușen ca i Comemorarea caște ajutisaras-le te prinjianen o ciacimos anda so cărdea o Iehova hai o Isus ande savorengo miștimos. (Ioan 3:16) Sperisaras anda sea o ilo că so va dichena hai va așunena ca i Comemorarea va cherena-le te camen te prinjianen mai but buchia anda o ciacimos, hai ji la urmă te arăsăn te aven slujitori le Iehovasche. Amen acharas ca i Comemorarea vi codolen cai ci mai slujin activo le Iehovasche. Cadea, anas lenghe amintea că o Del ci bâstărdea-le hai că iubil-le vi mai dur. Cana dichas că von aven ca i Comemorarea, amaro ilo bariol bucuriatar. I Comemorarea ajutil-le te anen penghi amintea i bari bucuria cai pherelas lengo ilo cana slujinas le Iehovasche. (Ps. 103:1-4) Indiferento că le manușa așunen-ame sau nici, amen das amari zor te acharas chichi mai bute manușen caște aven ande iech than amența ca i Comemorarea, anda codoia că jianas că o Iehova silo interesime mai but andal manușa, na ande chichiva numerea. (Luca 15:7; 1 Tim. 2:3, 4) Cadea că, amen daisaras te pachias ciaces că o Iehova folosil-pe catar cadal campanii ande save acharas le manușen ca i Comemorarea caște ajutil-ame te arachas le manușen cai silen o ilo ujo. (Hag. 2:7) w23.01 20 ¶1; 23 ¶9-11

Andi riat angla so te merel, o Isus cărdea pesche Dadesche iech manglimos specialo. Vo manglea-les te lel sama pe lesche continuatori. (Ioan 17:15, 20) Si ciaces, o Iehova lea sama sea o timpo pe pesche slujitori hai ferisardea-le. Cu sea cadala, o Isus jianglea că o Satan avelas te așel zurales contra lesche discipoli, cadea sar ci mai cărdea-la niciechdata. Vo jianelas că trebulas lenghe o ajutorii le Iehovasco caște daștin te nachen părdal cadal bare zumaimata. Aghies, i lumea cai si tela o zuralimos le Satanosco anel but pharimata opral le ciace creștini. Amen nachas prin zumaimata, cai daștin te peraven-ame sau chiar te zumaven amari loialitatea caring o Iehova. Cu sea cadala, nai-ame sostar te daras. O Iehova lel sama pe amende. Vo dichel so pharimata si amen hai silo sea o timpo gata te del-ame iech vast caște ajutil-ame. Da, o Iehova „dichel caring codola cai daran lestar”. (Ps. 33:18-20) w22.08 8 ¶1, 2

Amen încăras i porunca le Isusoschi anda codoia că iubisaras-les zurales but. (Ioan 14:15) Ande fiesavo bărș, ande le curche angla hai pala i Comemorarea, amen sicavas amari recunoștința anda so cărdea vo ande amaro miștimos, cana cheras amenghe timpo te mangas-ame hai te gândisaras-ame ca so însemnol lesco merimos anda amende. Sa cadea, amen sam zurales bucurime că daisaras te jias mai but andi predicarea hai te acharas chichi mai bute manușen te aven ande iech than amența ca cado baro evenimento. Hai vi amen, sam hotărâme ande amaro ilo te cheras sea so daisaras caște jias ca i Comemorarea. Ca i Comemorarea, amen așunas iech cuvântarea bazome pi Biblia cai del-ame răspunso ca mai but pușimata importanto. Sar exemplo, daisaras te jianas sostar le manușen silen nevoia catar i răscumpărarea hai sar daștil-pe ca o merimos ieche corcore manușesco te chosel le păcatea cadichi de bute manușenghe. Sa cadea, anel-pe amenghe amintea so însemnol o manro hai i mol hai con daștil te lel anda lende. (Luca 22:19, 20) Si iech șucar ocazia vi te gândisaras-ame ca le miștimata cai sile șiute de iech partea anda le creștini cai silen i speranța te train pi phuv. (Is. 35:5, 6; 65:17, 21-23) Ci trebul te bâstras chichi de but miștimata si amen anda codoia că hachiaras cadal ciacimata. w23.01 20 ¶2; 21 ¶4

Cana dea pesche Șiaves sar răscumpărarea caște aven pachiarde amare păcatea, o Iehova cărdea posibilo anda amende te avel amen viața veșnico. (Mat. 20:28) O apostolo Pavel sicadea cadai buchi importanto anda o scopo le Devlesco cana scriisardea: „Cadea sar o merimos avilea prin iech manuș, vi o jiuvindimos le mulengo avel sea prin iech manuș. Cadea sar savore meren prin o Adam, sa cadea savore va avena pale viațate prin o Cristos”. (1 Cor. 15:21, 22) O Isus sicadea pesche discipolen te manghen-pe caște avel o Regato le Devlesco hai caște cherel-pe Leschi voința pi phuv. (Mat. 6:9, 10) Anda o scopo le Devlesco cherel partea vi o șucar daro ca le manușa cai așunen lestar te daștin te train veșnico pi phuv. Caște cherel cadaia, o Iehova șiutea pesche Șiaves Rege le Regatosco mesianico hai alosardea pa i phuv 144 000 manușa caște cheren buchi ande iech than le Isusoia, ca le Devlesco scopo te pherel-pe. (Rev. 5:9, 10) w22.12 5 ¶11, 12

Cana merel amenghe varecon drago, iech baro doro astarel ande amaro ilo. Daștil-pe că sam zurales duchade cana gândisaras-ame ca le palutne ghiesa anda leschi viața, vi mai but cana codo jeno nachlea prin bare ducha angla so te merel. Tha, pala so mai nachel o timpo, daștil-pe că astaras te simțosaras pale iech țâra bucuria cana gândisaras-ame ca vareso cai vo sicadea-ame, ca vareso cai vo phendea sau cărdea caște zuriarel-ame sau caște cherel-ame te asas. Sa cadea, sam zurales duchade cana citisaras anda le ducha prin save nachlea o Isus hai anda lesco merimos. Ande le curche de angla hai pala i Comemorarea, cheras amenghe timpo te gândisaras-ame mai but ca so bari buchi cărdea o Isus anda amende, cana dea peschi viața sar răscumpărarea. (1 Corinteni 11:24, 25) Cu sea cadala, arachas vi iech bari bucuria cana gândisaras-ame ca le buchia cai cărdea-len hai phendea-len vo cana sas-lo pi phuv. Sa cadea, zuriarel-ame but te gândisaras-ame ca so cherel o Isus anda amende aghies hai so va cherela vi ando viitorii. w23.01 26 ¶1, 2

Cana o Isus mulea, le discipoli sas-le zurales duchade. Gândisar-tu so avelas ande chio ilo dacă avileanas ande lengo than. Von hasarde na numai iech cuci amal, tha pachiaie că hasarde vi penghi speranța. (Luca 24:17-21) Tha, cana o Isus sicadea-pe lenghe, vo cărdea pesche timpo te ajutil-le te hachiaren sar pherdea vo le profeții biblico. Sa cadea, vo dea-le te cheren iech buchi importanto. (Luca 24:26, 27, 45-48) Pala 40 ghiesa, cana o Isus vazdea-pe co cerii, i duch le discipolenghi parudea-pe ande iech bari bucuria. Von sas-le zurales voime anda codoia că jianenas că o Isus sas-lo jiuvindo hai că avelas te ajutil-len te cheren i buchi cai dea-la lenghe. Lenghi bucuria cărdea-len te așaren le Iehovas sea o timpo. (Luca 24:52, 53; Fap. 5:42) Daisaras te las amen pala le Isusosche discipoli cana șioas o Regato po iechto than ande amari viața. Si ciaces, trebul amenghe zuralimos te na mechas-ame hai te slujisaras sea o timpo le Iehovasche. Tha, cana cheras cadea, o Iehova va dela-ame but miștimata. (Prov. 10:22) ) w23.01 30, 31 ¶15, 16

Si ciaces, amen ci camas te cheras i bari doș cai cărde-la o Adam hai i Eva. Ci va avela te arăsas te cheras cadaia dacă va avela te sichioas mai dur anda o Iehova, va avela te dichas cuci lesche calități hai va avela te das amari zor ta hachiaras sar gândil vo. Cadea, amari iubirea anda o Iehova va bariola ciaces. Te dichas o exemplo ieche murșesco pherdo pachiamos, o Avraam. Vo iubisardea anda sea o ilo le Iehovas. Chiar vi atunci cana ci daisardea te hachiarel sostar alosardea o Del te cherel anumime buchia, o Avraam ci vazdinea-pe contra lesche. Mai but, vo dea peschi zor te prinjianel mai mișto pesche Dades cerisco. Sar exemplo, cana așundea că o Iehova lea i hotărârea te chosel i Sodoma hai i Gomora, mai anglal o Avraam darailea că „o Judecătoro sea la phuveaco” avelas te mudarel codolen orta ande iech than codolența nasul. Tha le Avraamosche sas lesche pharo te pachial că o Iehova daștilas te cherel cadaia. Anda codoia, pherdo umilința, șiutea mai but pușimata le Iehovasche, hai o Iehova dea-les răspunso pherdo răbdarea. Ji la urmă, o Avraam hachiardea că o Iehova rodel te dichel fiesave manușesco ilo hai ci pedepsil codoles nedoșalo ande iech than codoleia doșalo. (Gen. 18:20-32) w22.08 28 ¶9, 10

Ando bărș 455 a.a.e, pala so vazdea pale le ziduri le Ierusalimosche, o guvernatoro Neemia rodea murșa demno pachiamasche, save te len sama po foro. Iech anda cadala sas o Hanania, cai sas o șăro catar i Fortăreața. Andi Biblia, anda leste phenel-pe că sas „iech manuș demno pachiamasco [cai] daralas catar o ciacio Del mai but sar but aver”. (Neem. 7:2) Vo iubilas le Iehovas hai camelas te avel cuci ande lesche iacha, anda codoia cărdea mișto i buchi cai sas lesche dini. Cadal calități ajutin vi amen aghies te avas slujitori le Iehovasche ande save le coaver daștin te pachian-pe. Iech aver lașio exemplo anda amende si o Tihic. Vo sas o amal le apostolosco Pavel hai sas iech manuș demno pachiamasco. Vo daisardea te pachial-pe ando Tihic că avelas te ajutil-les hai chiar phendea anda leste că si „iech slujitoro loialo”. (Ef. 6:21, 22) O Pavel pachiaia-pe ande leste na numai te îngărel le lila ca le phrala anda Efes hai Colose, tha vi dea-les i buchi te zuriarel-len. O lașio exemplo cai sicadea-les o Tihic anel amenghe amintea catar le phrala demno pachiamasche hai loialo de aghies cai len sama pe amende caște avas zurale spiritualo. (Col. 4:7-9) w22.09 9, 10 ¶5, 6

O Iosif nachlea prin mai but zumaimata cai încărde cam 13 bărșa. O Iosif daisardeas te pușel-pe dacă o Iehova iubilas-les sau dacă mechlea-les corcoro ande cadal phare situații. Tha vo ci mechlea ca lesco ilo te pherel-pe holiaia. Vo așilea lucido hai ci holiardea-pe. Cana sas-les i ocazia te risarel parpale o nasulimos pesche phralenghe, vo na numai că încărdea-pe parpale te cherel cadai buchi, tha vi sicadea lenghe iubirea hai iertisardea-le. (Gen. 45:4, 5) O Iosif phiradea-pe cadea, anda codoia că sas-les iech lași gândirea. Ando than te gândil-pe ca lesche pharimata, vo alosardea te dichel părdal cadala: o scopo le Iehovasco. (Gen. 50:19-21) Catar o Iosif sichioas că, atunci cana aver phiraven-pe nasul amența, ci trebul te holiaras-ame po Iehova hai nici te pușias-ame dacă mechlea-ame. Si zurales importanto te gândisaras-ame sar ajutil-ame vo te nachas părdal cado pharimos. Mai but, cana simțosaras-ame duchade averendar, te das amari zor te pachiaras lenghe imperfecțiuni iubireaia. w22.11 21 ¶4

O profeto Daniel dichlea mai but viziuni cai sicade claro că le Iehovas siles zuralimos opral sea le coaver autorități. Mai anglal, o Daniel dichlea ștar bare fiare, cai sicaven le zuralimata mondialo andal puraimata hai de aghies: o Babilono, i Medo-Persia, i Grecia hai i Roma, hai vi o zuralimos cai avilea anda late, o Zuralimos Mondialo Anglo-Americano. (Dan. 7:1-3, 17) Pala codoia, o Daniel dichlea le Devles Iehova, cai beșelas pe iech trono sar iech judecătorii andi bar cerisco. (Dan. 7:9, 10) O Del lel i autoritatea cai si aghies le guvernen pa-i phuv hai del-la codolenghe cai meritin-la mai but hai sile mai zurale. Casche va avela te del-la? O Daniel dichel „varecas sar iech șiav le manușesco”, mai exacto le Isus Cristosos, hai vi codolen „sfinți Codolesche O Mai Baro”, le 144 000 cai va raina „anda sea o timpo hai veșnico”. (Dan. 7:13, 14, 18) Cadea că, o Iehova si O Mai Baro. So dichlea o Daniel andi viziunea sicavel iech ciacimos cai phendea-les mai anglal, hai cado si că o Del „del tele regi hai șiol regi”. Sa cadea, o Daniel mai phendea: „Codova O Mai Baro rail opral o regato le manușengo . . . [hai] del-les casche camel vo”. (Dan. 2:19-21) w22.10 14, 15 ¶9-11