Iunia

Le Iovos sas-les iech șucar hai lași viața. Vo bucurilas-pe catar iech amalimos chidino le Iehovaia, sas-les iech bari hai șucar familia hai sas-lo zurales barvalo. (Iov 1:1-5) Tha, ande iech ghies, vo hasardea aproape sea. Mai anglal, vo hasardea pesco barvalimos. (Iov 1:13-17) Pala codoia, sea lesche șiave mule. Tha te gândisaras-ame chichi de pherdo duchatar hai calo sas o ilo le Iovosco hai lesco rromniaco cana așunde că sea lenghe deș șiave mule! Cadea că dichas mișto sostar o Iov șindea pesco hureaimos hai, astardo duchatar, pelea tele pi phuv! (Iov 1:18-20) Pala codoia, o Satan dea le Iovos iech nasfalimos zurales jiungalo, cai cărdea te avel lesche lajiav hai hasardea peschi pachiv. (Iov 2:6-8) Mai anglal, o Iov sas iech manuș mișto dichlo hai prinjiando mașcar le manușa cai beșelas. Le manușa avenas leste caște manghen lesco sfato. (Iov 31:18) Tha acana, lesche phrala, lesche pașarde hai chiar vi lesche slujitori anda lesco chăr duriarenas-pe lestar. (Iov 19:13, 14, 16) w22.06 21 ¶5, 6

Pala o bolimos, savore trebul te las-ame pala o sfato cai dea-les o apostolo Pavel pesche phralenghe anda Efes. Vo zuriardea-len te arăsăn te aven creștini zurale spiritualo. (Ef. 4:13) Aver varesar phendo, trebunas te barion vi mai dur spiritualo. Si ciaces că tu iubis deja zurales but le Iehovas. Tha cadai iubirea daștil te bariol vi mai but, cadea sar sicadea o Pavel ando Filipeni 1:9. Vo manglea-pe le Iehovasche ca i iubirea le creștinenghi anda Filipi „te bariol sea mai but”. Sa cadea, vi amari iubirea daștil te bariol. Sar? O Pavel phendea că iech modo si codo ‘te avel amen prinjianimos exacto hai vi te avas goghiaver’. Cadea că, chichi va avela te prinjianas mai mișto le Iehovas, cadichi va avela te iubisaras-les vi mai but hai va avela cuci anda amende o modo sar silo vo hai so cherel. Va avela te camas sea mai but te avas cuci ande lesche iacha hai te na holiaras-les niciechdata. Va avela te das amari zor te hachiaras so camel vo amendar hai te cheras cadea. w22.08 2, 3 ¶3, 4

O lil Revelația ci sas scriime anda sea le manușa, tha numai anda le slujitori le Iehovasche. Anda codoia, pachias că si iech bari buchi cana hachiaras că vi amen las partea caște pheren-pe le profeții anda cado șucar lil. O phuro apostolo Ioan sicadea o timpo cana avileas te pheren-pe: „Tela o zuralimos le spiritosco sfânto arăslem ando ghies le Raiesco”. (Rev. 1:10) Cam ando bărș 96 a.e., cana o Ioan scriisardea cadal cuvintea, „o ghies le Raiesco” sas încă zurales dur. (Mat. 25:14, 19; Luca 19:12) Cadea sar sicaven le profeții andai Biblia, cado ghies astardea ando bărș 1914, cana o Isus sas-lo cărdo Rege ando cerii. Anda cado bărș, le profeții andai Revelația cai silen phanglimos le poporoia le Devlesco astarde te pheren-pe. Cadea că sam chiar ando „ghies le Raiesco”! (Rev. 1:3) w22.05 2 ¶2, 3

Vi i fiara hai vi o hohamno profeto sas-le șiudine de jiuvinde ando iagalo laco cai thabol sulfosa”. Cadea că, ando timpo so încă rain, cadal dușmani le Devlesche va avena distrugime anda sea o timpo. So sichioas amen? Sar slujitori le Iehovasche, trebul te sicavas amari loialitatea caring leste hai caring lesco Regato. (Ioan 18:36) Cadaia însemnol te așias neutri, te na șioas-ame ande le buchia politico cadala lumeache. Tha daștilas te avel amenghe zurales pharo te încăras amari neutralitatea, anda codoia că le guvernea la lumeache manghen amendar te așias de lenghi partea, vi prin so phenas, hai vi prin so cheras. Codola cai mechen-pe athade primisaren o semno la fiaraco. (Rev. 13:16, 17) Tha o Iehova va duriarela pestar sea codolen cai primin cado semno hai von va hasarena i posibilitatea te train veșnico. (Rev. 14:9, 10; 20:4) Cadea că, hachiaras chichi de importanto si te așias zurale hai neutri, indiferento chichi de but presiuni șion-pe pe amende! w22.05 10, 11 ¶12, 13

Iech buchi cai ajutil-tu te barios spiritualo, si: te sichios te cheres iech buchi mișto. Dacă sichioas te cheras chichi mai mișto anumime buchia, va avela te daisaras te cheras mai but buchia ando servicio le Iehovasco. Gândisar-tu chichi de bute phralendar si nevoia te vazden-pe le Beteluri, le săli andal congresea hai le săli le Regatosche. But anda cadala sichile te cheren neve buchia cana cărde buchi pașa le phrala cai jianenas te cheren buchi mișto. Aghies, vi phrala hai vi pheia, sichion te cheren neve buchia, cana len partea ca i buchi ande savi lel-pe sama catar le săli andal congresea hai le săli le Regatosche. Cadea, o Iehova Del, ‘o Rege anda sea o timpo’, hai o Cristos Isus, ‘o Rege le regengo’, cheren bare buchia prin phrala hai pheia cai cheren mișto penghi buchi. (1 Tim. 1:17; 6:15) Amen camas te das sea amari zor hai te folosisaras le buchia cai jianas te cheras-len mișto caște anas pachiv le Iehovasche, na amenghe. (Ioan 8:54) w22.04 24 ¶7, 11

O Solomon sas-lo zurales barvalo hai trailas ando luxo ande iech șucar chăr. (1 Regi 10:7, 14, 15) Tha, le Isusos sas-les țâra buchia hai ci sas-les iech chăr. (Mat. 8:20) Cu sea cadala, le dui dichle ande iech modo echilibrime le buchia materialo, anda codoia că lengo goghiaverimos avelas catar o Iehova Del. O Solomon phendea că le lovența daisaras te chinas le buchia cai trebun-ame hai chiar daisaras vi te las amenghe le buchia cai camas-le. Cu sea cadala, chiar cana sas-lo zurales barvalo, o Solomon arăslea te hachiarel că si buchia but mai importanto sar le barvalimata. Vo scriisardea: „Si mai mișto te alosares te avel-tu iech lașio anav [sau „te aves mișto prinjiando”, n.s.] sar te aven-tu bare barvalimata”. (Prov. 22:1) Sa cadea, vo dichlea că codola cai iubin le love, o mai butivar ci sile fericime hai mulțumime. (Ecl. 5:10, 12) Vo phendea amenghe te na pachias-ame prea but andel love anda codoia că, chiar cana si amen but, daisaras te hasaras-le oricana. (Prov. 23:4, 5) w22.05 21 ¶4, 5

Cana gândisaras-ame ca le miștimata cai si amen aghies, pașioas vi mai but le Iehovastar. Hai cana gândisaras-ame ca le miștimata cai o Iehova va dela-len amenghe ando viitorii, camas vi mai but te anas lesche închinarea anda sea o timpo. Sea cadala ajutin-ame te slujisaras le Iehovasche le ilența pherde bucuria. O Iehova „va vazdela-pe” ande pesche poporosco miștimos cana va chosela cu sea cadai lumea nasul. Daisaras te pachias ciaces că o Iehova, cai si „iech Del le ortomasco”, ci va mechela ca i lumea le Satanoschi te existil niciech ghies mai but sar trebul. (Is. 25:9) Amen ajucăras pherde răbdarea cadea sar o Iehova, te avel o ghies andai eliberarea. Ji atunci, va avela te mangas-ame mai dur, va avela te citisaras hai te cheras so sichileam anda lesco Cuvânto, hai va avela te gândisaras-ame ca le miștimata cai si amen. Cadea, o Iehova va ajutila-ame te na mechas-ame hai te anas lesche închinarea pherde bucuria. w22.11 13 ¶18, 19

Chiar cana i Biblia ci sicavel amenghe chanci anda o bolimos le Timoteiosco, ci si amenghe pharo te imaginisaras amenghe i bari bucuria cai simțosardea-la leschi dei, i Eunice, ande codo ghies. (Prov. 23:25) Chiar cana ci sas lache ușoro te sicavel pesche șiaves te iubil le Iehovas hai le Isus Cristosos, voi dea sea peschi zor te cherel cadaia hai sas-la but miștimata. O Timotei barilea ande iech familia cai lesche dades sas-les iech religia hai lesca deia iech aver. Lesco dad sas greco, hai leschi dei hai phuri sas-le evreice. (Fap. 16:1) Pala so fal-pe, o Timotei sas iech tărno șiavo cana i Eunice hai i Lois parude penghi religia, hai alosarde te aven creștini. Tha lesco dad așilea andi religia cai sas-lo. So drom avelas te alosarel o Timotei? Sa cadea, le deia creștino de aghies iubin zurales but penga familia. Von camen mai but sar oriso, te ajutin penghe șiaven te avel len iech amalimos chidino le Iehovaia. (Prov. 1:8, 9) O Iehova dichel zurales cuci i phari buchi cai cheren-la cadala deia. Vo ajutisardea bute deian te sicaven penghe șiaven te iubin-les hai te bariaren-len ando ciacimos. w22.04 16 ¶1-3

Na pa but timpo, o Iehova ‘va șiola ando ilo’ le conducătorengo politico „te îngăren ji le șăreste lesco gândo”. So va anela cadaia? Le „deș regi”, adică le zuralimata politico, va jiana contra le organizații religioso neciace hai va chosena-len cu sea. (Rev. 17:1, 2, 12, 16) Tha catar jianas că o sfârșito le Babilonosco o Baro si pașă? Caște arachas o răspunso cadale pușimaste, ajutil-ame te anas amenghe andi goghi că o purano foro Babilono sas-lo ferime catar le paia anda i bari len Eufrat. O lil Revelația sicavel că le milioanea manușa cai așen pașa o Baro Babilono sile sar niște ‘paia’. (Rev. 17:15) Tha voi mai phenel vi că le paia avenas te șuchion hai cadaia sicavel că o imperio mondialo la religiaco neciaci avelas te hasarel bute manușen. (Rev. 16:12) Cadai profeția pherel-pe aghies anda codoia că but manușa risarde o dumo la religiache hai astarde te roden răspunsuri ca lenghe pușimata aver varecai. w22.07 5, 6 ¶14, 15

Cana iertisaras sicavas recunoștința. Ande iech ilustrarea, o Isus phendea anda o Iehova că si sar iech stăpâno cai ci mai manglea ieche sclavostar le but love cai dea-len lesche po camimos hai cai ci daștilas te pochinel-len parpale. Tha cado sclavo ci camlea te iertil ieche avere sclavos cai trebulas te del-les but mai țâra love. (Mat. 18:23-35) So camlea o Isus te sicavel-ame? Cana sicavas ciaci recunoștința anda i bari îndurarea le Iehovaschi caring amende, cadaia va zuriarela vi amen te iertisaras averen. (Ps. 103:9) Bărșența mai anglal, ande O Turno de Veghe phendea-pe: „Orichichi de but iertisaras amare pașarden, ci va avela te arăsas niciechdata te iertisaras cadea de but sar amaro Del, cai iertil fiesaves anda amende hai sicavel amenghe îndurarea prin o Cristos”. O Iehova sicavel îndurarea codolenghe cai sile îndurători. (Mat. 5:7; Iac. 2:13) O Isus phendea claro cadai buchi cana sicadea pesche discipolen sar te manghen-pe. (Mat. 6:14, 15) w22.06 10 ¶8, 9

O Isus avilea pi phuv sar manuș. Vo sicadea ande iech modo perfecto sar si lesco Dad. (Ioan 14:9) Cadea, prin leste, arăsleam te prinjianas hai te iubisaras amare Devles, Iehova. Sa cadea, si amen miștimata anda le sicaimata le Isusosche, hai vi anda leschi îndrumarea pherdi iubirea, cai del-la amenghe sar Șăro la congregațiaco creștino. Vo sicadea amenghe sar te traisaras amari viața caște avas cuci andel iacha le Iehovasche. Mai but, o merimos le Isusosco anel savorenghe anda amende but miștimata. Pala so sas-lo jiuvindime, o Isus sicadea le Iehovasche leschi jertfa perfecto cai, prin o rat șiordo, „ujiarel amen catar orisavo păcato”. (1 Ioan 1:7) Acana vo silo iech rege zuralo cai ci va mai avela te merel niciechdata. Na pa but timpo, o Isus va nichiarela o șăro le sapesco. (Gen. 3:15) So bari bucuria va avela ando ilo sea le manușengo loialo cana o Satan ci va mai avela! Ji atunci, te na mechas-ame! Si amen pachiamos că amaro Del pherel sea o timpo pesche promisiuni. Vo va anela bare miștimata opral „sea le națiuni la phuveache”. w22.07 18 ¶13; 19 ¶19

Sostar trebul te paruvas le buchia cai camas te cheras-le anda o Iehova pala amari situația? Anda codoia că ci jianas so paruimata va avena ande amari viața. Vi o apostolo Pavel nachlea prin cadaia. Vo ajutisardea te avel cărdi iech nevi congregația ando foro Tesalonic. Tha, anda codoia că le manușa așile lesche contra, o Pavel trebuisardea te tiliarel anda o foro. (Fap. 17:1-5, 10) Dacă avileas te așel, avileas te cherel numai nasul le phralenghe. Tha o Pavel, ci mechlea-pe hai camlea te ajutil-le vi mai dur, cadea că vo parudea-pe pala i nevi situația. Mai târzio, o Pavel bișaldea le Timoteios caște zuriarel i nevi congregația. (1 Tes. 3:1, 2) Daisaras te pachias că le creștini anda Tesalonic sas-le zurales bucurime. Daisaras te sichioas but buchia anda so nachlea o Pavel ando Tesalonic. Daștil-pe că camas te cheras mai but ando servicio le Iehovasco, tha bi te ajucăras-ame avel iech paruimos ande amari viața cai ci mai mechel-ame te cheras cadaia. (Ecl. 9:11) Cana nachas prin cadaia, trebul te gândisaras-ame ca so daisaras te cheras anda o Iehova pala amari situația. w22.04 25, 26 ¶14, 15

Prin pesco Cuvânto, i Biblia, o Iehova zuriarel amaro ilo hai del amen iech speranța anda o viitorii. Te dichas chichiva sicaimata cai daștin te zuriaren-ame cana nachas prin zumaimata. O Iehova phenel amenghe că chanci, nici o mai pharo zumaimos, ‘ci daștil te încărel-ame dur catar leschi iubirea’. (Rom. 8:38, 39) Sa cadea, vo promitil amenghe că va avela „pașă sea codolendar cai acharen-les” ando manglimos. (Ps. 145:18) Dacă șioas amaro pachiamos ande leste, daisaras te nachas părdal orisavo zumaimos hai chiar te simțosaras bucuria ando ilo, chiar cana sam duchade. (1 Cor. 10:13; Iac. 1:2, 12) Lesco Cuvânto anel ande amari goghi că le zumaimata nachen hai încăren țâra timpo, pașa le miștimata veșnico cai o Iehova va dela-le amenghe. (2 Cor. 4:16-18) Sa cadea, andi Biblia, o Iehova promitil amenghe că vo va chosela ciaces le Satanos o Beng, codo cai cherel amenghe le pharimata, hai vi codolen cai așen de leschi partea. (Ps. 37:10) Dean chi zor te încăres ande chi goghi versetea biblico cai te ajutin-tu te naches părdal le zumaimata cai va avena? w22.08 11 ¶11

Pușlean-tu vroiechdata dacă daștis te trais pala le norme orta le Iehovasche ghies pala ghies, bărș pala bărș? O Iehova phenel că amaro ortomos daștil te avel „sar le valuri la mareache”. (Is. 48:18) Imaginisar tuche că beșes po malo la mareaco hai că diches sar le valuri aven caring o țărmo, iech pala aver. Ande codo șucar than liniștime, daștias te gândis-tu că ande iech ghies le valuri ci va mai avena caring o țărmo? Nici! Tu jianes că von va avena vi mai dur. Vi chio ortomos daștil te avel sar le valuri la mareache. Sar? Cana trebul te cheres iech alosarimos, gândisar-tu mai anglal so camelas o Iehova te cheres. Numai pala codoia cher so alosardean. Indiferento chichi de pharo daștil te avel iech alosarimos, chio Dad iubitorii va avela sea o timpo pașa tute. Vo va ajutila-tu te așes zuralo hai pherdo pachiamos hai te trais chi viața ande fiesavo ghies pala lesche norme orta. (Is. 40:29-31) w22.08 30 ¶15-17

Pala so va nachena le 1 000 bărș, o Satan va avela mechlo avri hai va zumavela te țârdel de peschi rig le manușen perfecți. Ande cado testo, sea le manușa perfecto pa i phuv va daștina te sicaven ciaces de caschi rig camen te aven hai dacă sicaven pachiv le anavesche le Iehovasco hai dacă așen pașa leschi guvernarea. (Rev. 20:8-10) So va alosarela te cherel fiesavo anda lende cana o Satan va zumavela-le si zurales importanto anda codoia că, bazome pe lengo phiraimos, o Del va jianela dacă va scriila lenghe anava ando lil la viațaco anda sea o timpo. Chichiva manușa – iech număro cai ci jiangliol-pe – ci va camena i guvernarea le Iehovaschi, cadea sar o Adam hai i Eva. So va avela lența? I Revelația 20:15 phenel: „Con ci sas-lo arachlo scriime ando lil la viațaco sas-lo șiudino ando iagalo laco”. Cadala manușa cai vazdine-pe contra le Iehovasche va avena chosle anda sea o timpo, tha le mai but manușa perfecți va nachena părdal o palutno testo. w22.09 23 ¶15, 16

Chichiva jene andai congregația anda o iechto secolo phenenas că le neevrei cai cărdile creștini trebunas te cheren i circumcizia. Cadea, daștil-pe că von camenas te na arăsăn te aven prasade catar le coaver evrei. (Gal. 6:12) Chiar cana o apostolo Pavel ci pachialas că si mișto te cheren cadaia, vo ci încărdea ca le buchia te cheren-pe cadea sar camelas vo, tha, pherdo umilința, rodea o ajutorii le apostolengo hai le phurengo anda o Ierusalimo. (Fap. 15:2) Prin o modo sar phiradea-pe, o Pavel ajutisardea cadale creștinen te na hasaren penghi bucuria hai te încăren i pacea andi congregația. (Fap. 15:30, 31) Dacă arăsăl te avel amen iech baro nehachiarimos averența, sicavas că rodas i pacea cana rodas i îndrumarea codolenghi cai sile alosarde le Iehovastar te len sama pe i congregația. Butivar, arachas sfaturi lașe hai goghiaver ande le publicații bazome pi Biblia sau andel instrucțiuni cai den-le amenghe i organizația. Dacă va avela te las-ame pala lende hai ci va așela amari goghi numai ca o modo sar dichas amen le buchia, va avela te încăras i pacea andi congregația. w22.08 22 ¶8, 9

Le mai but anda amende simțosaras poiechdata i nevoia te pâtras amaro ilo angla iech amal pașardo. Tha cadaia ci si sea o timpo ușoro. Daștil te avel amenghe pharo te das duma averența anda so si ande amari goghi hai ilo. Cadea că, dacă așunas că amaro amal phendea vi averenghe so phendeam lesche te încărel anda peste, avelas te avas zurales perade. Tha, si amenghe zurales cuci iech jeno cai jianel te încărel anda peste so phendeam lesche. Le phure cai jianen te încăren anda pende le buchia cai sas lenghe phende sile „sar iech garaimos contra i barval” anda lenghe phrala. (Is. 32:2) Amen daiasaras te das duma lența bi te încăras-ame parpale, anda codoia că jianas că von ci va phenena mai dur so phendeam lenghe. Amen ci cheras presiuni pe lende te phenen amenghe le buchia cai trebun te încăren-le anda pende. Sa cadea, anda amende si zurales cuci le rromnia cadale phurenghe, anda codoia că von ci camen te cheren penghe rromen te phenen lenghe buchia personalo anda aver. Mai but, anda lende si ciaces iech baro miștimos că ci jianen sea le buchia personalo anda lenghe phrala hai pheia. w22.09 11 ¶10, 11

Daisaras te pachias ciaces că vo va salvila pesche slujitoren loialo ando ‘baro necazo’, cai pașiol cadea de sigo. (Mat. 24:21; Dan. 12:1) Vo va ferila pesche poporos cana o Gog anda Magog, iech coaliția anda națiuni, va astarela iech baro ataco, pe sea i phuv, contra le slujitori le Iehovasche. Chiar cana ande cadai coaliția va avena sea le 193 state membre andai Organizația Națiunilor Unite, von ci va daștina te așen contra Codo cai si O Mai Baro hai lesche armate andal ceruri. O Iehova promitil amenghe: „Va avela te vazdav-ma, va avela te sfințosarav-ma hai va avela te cherav-ma prinjiando tela le iacha bute națiunenghe; hai von va jianena că me som o Iehova”. (Ezec. 38:14-16, 23) O ataco cai va cherela-les o Gog va astarela o Armaghedono, o palutno marimos le Iehovasco, cana vo va chosela sea „le regen pa sea i phuv”. (Rev. 16:14, 16; 19:19-21) I Biblia promitil că „numai codola orta va beșena pi phuv hai numai codola cai încăren penghi integritatea va așena pe late”. (Prov. 2:21, n.s.) w22.10 16, 17 ¶16, 17

Amen ci daisaras te citisaras le ile, numai „o Iehova daștil te rodel te dichel so si ando ilo”. (Prov. 16:2) Vo sicavel iubirea caring sea le manușa, indiferento so cultura silen sau catar aven. O Del zuriarel-ame: „Pâtren vi tumen buhles tumaro ilo!”. (2 Cor. 6:13) Cadea că, te das amari zor te sicavas iubirea caring amare phrala hai te na judechisaras len. Si zurales importanto te na judechisaras nici codolen avreal i congregația. Avelas te phenes anda vroiech anda che neamuri, cai ci siles sa codo pachiamos sar tut, că ci va avela niciechdata co ciacimos? Dacă avelas te cheres cadea, avelas te sicaves că san baricano hai că pachias că san mai orta sar aver. Tha o Iehova încă del ‘le manușen anda sea le thana’ i ocazia te căin-pe. (Fap. 17:30) Te na bâstras niciechdata că atunci cana pachias că sam mai orta sar aver, o Iehova dichel-ame sar neorta. Amari iubirea caring le norme orta le Iehovasche va pherela amaro ilo bucuriatar hai va ajutila vi averen te pașion mai but amendar hai amare Devlestar. w22.08 31 ¶20-22

Cana cheras amari buchi andi predicarea, daisaras te ajucăras-ame ca le manușa te așen amenghe contra. Daștil-pe că, ando viitorii, cadaia va avela sea mai but. (Dan. 11:44; 2 Tim. 3:12; Rev. 16:21) Cu sea cadala, si amen o pachiamos că o Iehova va dela-ame o ajutorii cai trebul amenghe. Sostar? O Iehova ajutisardea de fiesavi data pesche slujitoren te daștin te cheren le buchia cai sas lenghe dine, ori chichi de phare sas-le cadala. Te gândisaras amen co profeto Ezechiel, cai predichisardea le iudeienghe îngărde ando Babilono. So felo manușa sas-le codola savenghe trebulas te predichil o Ezechiel? O Iehova phendea anda lende că sas-le „bilajiavune”, că sas-len iech „ilo baresco” hai că ‘vazdine-pe contra lesche’. Von sas-le cadea sar le canră hai le scorpioni. Cadea că, hachiaras sostar o Iehova phendea mai butivar le Ezechielosche: „Te na daras”. (Ezec. 2:3-6.) O Ezechiel daisardea te cherel peschi buchi hai te predichil cadale manușenghe anda codoia că: 1) sas-lo bișialdo le Iehovastar, 2) sas-lo zuriardo catar o spirito sfânto hai 3) zuriardea pesco pachiamos prin le Devlesche dumes. w22.11 2 ¶1, 2

O Iehova cărdea sea le jiuvindimata pa i phuv te train ji ca iech anumime momento, tha le manușen ci cărdea-len cadea. Vo dea-len iech șucar speranța te train veșnico hai te na meren niciechdata. Sa cadea, o Iehova cărdea-ame te camas te traisaras. I Biblia phenel că vo „șiutea i veșnicia ando ilo le manușengo”. (Ecl. 3:11) Cado si iech andal motivea cai cherel-ame te dichas o merimos sar ieche dușmanos. (1 Cor. 15:26) Sar exemplo, dacă peras zurales nasfale, beșas bi te cheras chanci hai numai ajucăras te meras? Nici. Butivar jias co doctorii hai daștil-pe că las draba caște sastiaras-ame. Cheras sea so așel ande amaro zuralimos caște na meras. Hai cana varecon drago amenghe merel, vi cana sas-lo tărno sau phuro, simțosaras iech bari duch ando ilo. (Ioan 11:32, 33) Si ciaces, dacă o scopo le Iehovasco ci avileas ca le manușa te train veșnico, vo ci avileas te șiol ando ilo le manușengo i zurali dorința te train hai te na camen te meren. w22.12 3 ¶5; 4 ¶7

Ande cadal phare ghiesa prin save nachas, but mașcar amare phrala sile nasfale, darade sau corcore.De chi zor te încăres o phanglimos che phralența hai pheianța andai congregația. Cana astarel iech nasfalimos cai lel-pe, daștil-pe că trebul te așias dur vi catar amare phrala. Daisares te simțosares-tu cadea sar o apostolo Ioan, cai camelas te dichel pesche amales o Gaius hai te beșen ande iech than. (3 Ioan 13, 14) Cu sea cadala, o Ioan hachiardea că, iech timpo, ci daștilas te dichel le Gaiusos. Tha vo ci mechlea-pe perado hai cărdea sea so daisardea andi situația ande savo sas-lo: vo scriisardea caring o Gaius iech lil. Dacă ci daștis te jias te diches che phralen hai pheian, de chi zor te des duma lența prin iech aver modo. Cadea, ci va avela te simțosares-tu corcoro hai va avela tut mai but pacea. Dacă chi goghi sili pherdi phare gânduri, de duma le phurența hai mech-len te zuriaren-tu. (Is. 32:1, 2) w22.12 17, 18 ¶6, 7

I Biblia sicavel că, anda iech timpo, lesche pânre sas-le phangle andel cașta, hai leschi cor sas-li șiuti andel sastra. (Ps. 105:17, 18) Le buchia anda o Iosif jianas sea mai nasul. Vo arăslea catar iech sclavo cai sas cuci andel iacha lesche stăpânosche, te avel iech manuș phandado, cai hasardea peschi pachiv. Nachlean vroiechdata prin iech situația phari cai cărdilea sea mai nasul, chiar cana manglean-tu anda sea o ilo le Iehovasche? Daștil-pe că da. O Iehova ci feril-ame catar le zumaimata anda cadai lumea cai si tela o zuralimos le Satanosco. (1 Ioan 5:19) Cu sea cadala, daștis te pachias ciaces că o Iehova jianel prin so naches hai vo lel sama pe tute. (Mat. 10:29-31; 1 Pet. 5:6, 7) Mai but, vo promitisardea tuche: „Niciechdata ci va avela te mechav-tu hai niciechdata ci va avela te duriarav-ma tutar”. (Evr. 13:5) O Iehova daștil te ajutil-tu te așes zuralo hai te na meches-tu cana fal-pe că ci mai daștis te încles anda i situația phari ande savi san. w23.01 16 ¶7, 8

Le Scripturi phenen că o Del ci va avela te mechel-ame cana cheras greșeli. Le israeliți păcătuisarde contra o Iehova mai butivar, tha, cana căisarde-pe ciaces, o Iehova iertisardea-le anda sea o ilo. Vi le creștini anda o iechto secolo simțosarde i iubirea le Devleschi. Tela inspirația, o apostolo Pavel zuriardea pesche phralen ‘te iertisaren pherde lașimos hai te den duma șucar’ ieche manușeia cai cărdea iech baro păcato, tha căisardea-pe anda sea o ilo. (2 Cor. 2:6, 7; 1 Cor. 5:1-5) Zuriarel-ame but te jianas că o Iehova ci duriardea pestar pesche slujitoren numai anda codoia că greșisarde! Mai but, vo ajutisardea-len, ortosardea-len hai achardea-len te aven parpale ande leschi bari angali. Vo promitil că va avela te cherel sa cadea vi aghies codolența cai căin-pe anda sea o ilo. (Iac. 4:8-10) I Biblia sicavel o goghiaverimos, o ortomos hai i iubirea le Devleschi. Ande lache pagini, arachas but buchia cai sicaven că o Iehova camel te prinjianas-les hai te avas lesche amala. w23.02 7 ¶16, 17

Si amen motivea zurale te avas interesime ande le buchia cai întâmplon-pe aghies pe sea i phuv, cai pheren le profeții biblico. Sar exemplo, o Isus dea duma anda chichiva buchia cai ajutin-ame te hachiaras cana o sistemo le Satanosco va avela te phandavel-pe. (Mat. 24:3-14) O apostolo Petru zuriardea-ame te dichas sar le profeții pheren-pe, ca amaro pachiamos te așel zuralo. (2 Pet. 1:19-21) Vo camel te ajutil-ame te hachiaras sostar trebul te prinjianas mișto le profeții biblico. Vo zuriarel-ame „te încăras ande amari goghi o ghies le Iehovasco”. (2 Pet. 3:11-13) Sostar? Na anda codoia că camas te prinjianas „o ghies hai i ora” cana o Iehova va anela o Armaghedono, tha anda codoia că camas te folosisaras chichi mai mișto o timpo cai mai așilea caște sicavas că sam ‘manușa savengo phiraimos si sfânto hai cheras buchia cai sicaven că slujisaras anda sea o ilo le Devlesche’. (Mat. 24:36; Luca 12:40) Amen camas te phiravas-ame șucar hai te avas siguri că sea so cheras ando servico le Iehovasco sicavel amari iubirea anda leste. Caște cheras cadaia, trebul te las sama pe amende. w23.02 16 ¶4, 6

So trebun te cheren încă de acanara „le aver bacrea” caște daștin te train ando Paradiso? Trebul te sicavas chichi de cuci si anda amende o Isus. Sar exemplo, sicavas amari iubirea anda leste prin o modo sar phiravas-ame caring lesche phrala machle. O Isus phendea că vo va judechila le bacrean pala o modo sar phiraven-pe lesche phralența. (Mat. 25:31-40) Sicavas că așias pașa le phrala le Cristososche cana ajutisaras-len pherde zelo andi predicarea hai andi buchi te cheren discipoli. (Mat. 28:18-20) Ci trebul te ajucăras ji cana va avela te traisaras ando Paradiso caște avas le manușa cai o Iehova camel-len code. Încă de acanara, trebul te das amari zor te avas pachivale ande so phenas hai ande amaro phiraimos hai te avel amen iech limita ande sea so cheras. Sa cadea, trebul te avas loialo le Iehovasche, amare rromesche sau rromniache hai amare phralenghe. Dacă cheras sea so daisaras caște încăras le norme le Iehovasche ando timpo so traisaras ande cadai lumea nasul, va avela amenghe mai ușoro te încăras-len ando Paradiso. Mai but, daisaras te sichioas te cheras diferime buchia hai te bariaras calități caște sicavas că pregătisaras-ame te traisaras andi lumea nevi. w22.12 11, 12 ¶14-16

Amen iubisaras le Isusos, amaro Rege, anda codoia că vo silo o mai lașio conducătorii. Chiar o Iehova sicadea pesche șiaves hai dea lesche i buchi te rail. (Is. 50:4, 5) Sa cadea, te gândisaras-ame ca i iubirea pherdi sacrificio cai sicadea-la o Isus. (Ioan 13:1) Anda codoia că si amaro Rege, o Isus meritil amari iubirea. O Isus phendea că codola cai iubin-les ciaces încăren lesche porunci hai si lesche amala. (Ioan 14:15; 15:14, 15) So bari buchi si te avas amal le șiaveia le Iehovasco! Hachiares că o Isus silo umilo hai că lel-pe perfecto pala lesco Dad. Sichilean sar dea vo haben codolenghe bochale, sar zuriardea o ilo codolengo perade, hai sar sastiardea le nasfalen. (Mat. 14:14-21) Diches o modo ande savo conducil i congregația creștino aghies. (Mat. 23:10) Sa cadea, jianes că ando viitorii, va anela vi mai but miștimata le manușenghe, sar Rege le Regatosco le Devlesco. Sar daștis te sicaves chi iubirea anda leste? De chi zor te les tut pala leste. Iech anda le buchia cai daștis te cheres-len si te des chi viața le Iehovasche hai te boles tut. w23.03 4 ¶8, 10

O Iehova pherdea na numai o cerii tha vi i phuv hai i marea le șucar buchianța cai cărdea-len, ca amen te daisaras te sichioas anda lende sar silo vo ciaces. (Ps. 104:24, 25) Sa cadea, te gândisaras-ame so șucar cărdea-ame o Iehova. Vo șiutea ande amende o zuralimos te dichas o șucarimos andai natura. Mai but, vo dea-ame panji simțurea caște bucurisaras-ame cu sea catar leschi creația: te dichas, te așunas, te simțosaras le vastența, te zumavas so has sau pias hai te simțosaras sar chanden le buchia de pașa amende. Andi Biblia arachas vi aver motivo importanto anda savo trebul te dichas atento i creația. Voi sicavel amenghe le calități le Iehovasche. (Rom. 1:20) Sar exemplo, dich le buchia cai cărdea-len o Iehova hai chichi de șucar sile cărde von. Cadala sicaven o goghiaverimos le Devlesco. Sa cadea, te gândisaras-ame ca so but feluri habena cărdea o Iehova. Cadaia sicavel chichi de but iubil vo le manușen. Cana dichas sar silo o Iehova prin le buchia cai cărdea-len, arăsas te prinjianas-les mai mișto hai te pașioas lestar vi mai but. w23.03 16 ¶4, 5

Ando timpo so cadai lumea rimosarel-pe sea mai but, amaro pachiamos ando ciacimos daștilas te avel zumado. Daștil-pe că le manușa va camena te șion îndoieli ande amari goghi ande soste priveal o ciacimos andai Biblia sau ando fapto că o Iehova alosardea iech sclavo fidelo hai prevăzătorii cai îndrumil-ame. Tha dacă amen pachias că ando Cuvânto le Iehovasco arachas sea o timpo o ciacimos, va avela amen o zuralimos te nachas părdal cadal zumaimata le pachiamasche. Amen va avela te avas hotărâme te încăras le „dispoziții [le Iehovasche] sea o timpo, ji co sfârșito”. (Ps. 119:112) ‘Ci va avela amenghe lajiav’ te das duma averența anda o ciacimos hai te zuriaras-len te train penghi viața pala le sicaimata andai Biblia. (Ps. 119:46) Sa cadea, va avela te daisaras te nachas părdal le mai phare situații, vi chiar părdal le persecuții, „pherde răbdarea hai bucuria”. (Col. 1:11; Ps. 119:143, 157) O ciacimos ajutil-ame te avel-ame pacea ando ilo hai sicavel-ame sar te traisaras amari viața ande cadai lumea hasardi, cai rimosarel-pe sea mai but. Anda codoia că prinjianas o ciacimos, amen jianas că ajucărel-ame iech viitorii mai lașio, tela o raimos le Regatosco le Devlesco. w23.01 7 ¶16, 17

Andi riat angla so te merel, o Isus manglea-pe but anda le discipoli hai manglea pesche Dades ‘te lel sama pe lende andai cauza le nasuleschi’. (Ioan 17:15) Cadaia sicadea chichi de but iubilas-le! Chiar cana jianglea că ande țâra timpo avelas te nachel prin iech pharo zumamimos, o Isus gândisardea-pe mai but ca o miștimos pesche apostolengo. Cadea sar o Isus, amen ci gândisaras amen numai amende. Mai but, amen mangas-ame le Iehovasche ande fiesavo ghies anda amare phrala hai pheia. Cadea, cheras so phenel amenghe o Isus, te iubisaras-ame iech averes, hai sicavas le Iehovasche chichi de cuci si anda amende amare phrala. Ci camas te arăsas te pachias că hasaras amaro timpo cana mangas-ame anda amare phrala. Ande pesco Cuvânto, o Iehova phenel amenghe că „baro zuralimos si le manglimas cai cherel-les iech manuș orta”. (Iac. 5:16) Trebul te mangas-ame anda amare phrala anda codoia că nachen prin but zumaimata. w22.07 23 ¶13-15