Iulia

O daro te das duma avel catar amaro Del iubitorii. Tha, le manușa folosisarde ande iech modo nasul cado daro. O Satan o Beng hohadea la Eva, hai cado hohaimos îngărdea le manușen ca o păcato hai ca i imperfecțiunea. (Gen. 3:1-4) O Adam folosisardea o daro te del duma ande iech modo nasul cana doșardea la Eva hai chiar vi le Iehovas anda peschi doș. (Gen. 3:12) O Cain hohadea le Iehovas pala so mudardea pesche phrales. (Gen. 4:9) Aghies si pharo te araches iech filmo ande savo te na del-pe duma melales. Le șiave așunen sar del-pe duma melales ca i școala, hai le bare manușa, ca i buchi. Anda codoia că traisaras mașcar le manușa cai den duma sea o timpo jiungales, daisaras vi amen, bi te das amari sama, te arăsas te das duma nasul sar von. Si ciaces, sar creștini camas te avas cuci andel iacha le Iehovasche hai cadaia însemnol mai but sar te na das duma melales. Amen camas te folosisaras amari șib caște așaras le Devles. w22.04 4 ¶1-3

O Isus dichlea ande iech modo echilibrime le buchia materialo, mașcar save sas vi o haben hai o pimos. Vo chiar bucurisardea-pe cadalendar. (Luca 19:2, 6, 7) Mai but, o iechto miracolo cai cărdea-les, sas cana lea o pai hai cărdea anda leste i mai lași mol. (Ioan 2:10, 11) Sa cadea, ando ghies cana mulea, vo phiradea iech hureaimos cuci. (Ioan 19:23, 24) Cu sea cadala, ci mechlea ca le buchia materialo te aven po iechto than ande leschi viața. O Isus sicadea-ame că, atunci cana rodas mai anglal o Regato, o Iehova va lela sama amendar. (Mat. 6:31-33) Bute jenen sas-len bare miștimata, anda codoia că line-pe pala le sfaturi goghiaver cai del-len i Biblia andal love. Ita so phenel o Daniel, iech phral corcoro: „Cana somas tărno șiavo, alosardem te șioav le buchia spiritualo po iechto than andi viața”. Vo camlea te avel-les iech viața simplo, caște daștil te del pesco timpo hai zuralimos anda i buchi le Iehovaschi. Vo mai phenel: Le love ci daștin te len o than le șucar buchiango cai dea-len manghe o Iehova!”. w22.05 21, 22 ¶6, 7

Daisaras te sicavas că si amenghe cuci o ciacimos dacă das amari zor te prinjianas mai but sicaimata andai Biblia hai anda le publicații bazome pi Biblia. Ji la urmă, indiferento de chichi timpo sam co ciacimos, si amen sea o timpo vareso te sichioas. Si ciaces că trebul te das sea amari zor caște studiisaras, tha cana cheras cadea, va avena amen but miștimata. Jianas vi, că na savoren anda amende placial-ame te citisaras hai te sichioas mai but buchia. Tha o Iehova phenel amenghe ‘te rodas mai dur’ caște hachiaras mai mișto o ciacimos. (Prov. 2:4-6) Cana das amari zor caște prinjianas mai but, si amen sea o timpo miștimata. Iech phral po anav Corey phenel că, atunci cana citisarel andai Biblia, lel fiesavo verseto hai rodel te hachiarel-les mai mișto. Vo phenel: „Citisarav fiesavi nota de subsol, rodav sea le referințea marginalo hai rodav vi te prinjianav mai but buchia anda codo verseto. Cadea, sichioav zurales but buchia andai Biblia”. Indiferento sar cheras cana sichioas andai Biblia, sicavas că anda amende si cuci o ciacimos dacă cheras amenghe timpo hai das amari zor te prinjianas mai but buchia anda leste. (Ps. 1:1-3) w22.08 17 ¶13; 18, 19 ¶15, 16

Cana sas-lo pi phuv, o Isus folosisardea i creația caște sicavel pesche discipolen sar si lesco Dad. Te dichas chichiva sicaimata. O Iehova iubil sea le manușen. Andi Predica pa o plain, o Isus dea duma pesche discipolența anda dui buchia anda i creația: o cham hai o brâșând. Chiar cana but manușa ci gândin-pe prea but cadale buchiande, bi lengo amen ci daisaras te traisaras. O Iehova daisardea te alosarel te na del le manușen nasul cadal daruri. Tha, anda codoia că vo silo iubitorii, vo cherel te avel o cham hai te del o brâșând opral sea le manușa. (Mat. 5:43-45) So camlea o Isus te sicavel pesche discipolen? Că o Iehova camel te iubisaras sea le manușen. Ori chichivar dichas so șucar mechel-pe tele o cham sau sar del o brâșând, daisaras te gândisaras-ame că o Iehova iubil savore manușen. Lesco exemplo zuriarel-ame te sicavas vi amen sa codoi iubirea hai te phenas i vestea lași savorenghe. w23.03 17 ¶9, 10

Le apostolosche Ioan ce avelas lesche te pachial so dichlea mai dur. Iech jiuvli cai beșelas pe iech anda le fiare. Anda late phenel-pe că si sar ‘iech bari prostituata’ cai bușiol „o Babilono o Baro”. I jiuvli cherel „imoralitatea sexualo” le ‘regența pa i phuv’. (Rev. 17:3-5) Cas reprezentil o Babilono o Baro? Cadai jiuvli ci daștil te avel iech organizația politico anda codoia că, cadea sar phenel i profeția, cherel imoralitatea le bare manușența andai politica cadala lumeachi. (Rev. 18:9) Mai but, voi sili sicadi sar cana beșel pe iech fiara hai cherel sea so daștil caște șiol tela pesco pânro cadale conducătoren. Voi ci daștil te reprezentil nici o sistemo comercialo hașvalo andai lumea le Satanoschi. Anda cado del-pe duma ande aver than hai silo reprezentime catar „le negustori la phuveache”. (Rev. 18:11, 15, 16) Anda codoia că o Babilono purano sas o centro la închinareaco neciaci, o Babilono o Baro trebul te reprezentil sea le forme andai închinarea neciaci. Mai but, cadai prostituata si o imperio mondialo la religiaco neciaci. (Rev. 17:5, 18) w22.05 11 ¶14-16

Si normalo ca iech dei te pușel-pe poiechdata dacă lache șiave va slujina le Iehovasche. Le dada jianen mișto chichi de but zumaimata si șiute angla lenghe șiave andi lumea le Satanoschi. Sa cadea, but deia trebun te bariaren corcore penghe șiaven sau silen iech rrom cai ci slujil le Iehovasche. Prin cadal pharimata nachen na numai codola cai sile ande iech familia cai iech anda le dada ci slujil le Iehovasche. Chiar cana vi i dei hai vi o dad sile ando ciacimos, si lenghe pharo te arăsăn co ilo lenghe șiavengo caște ajutin-le te cărdion slujitori le Iehovasche. Dacă si cadea, na av peradi. O Iehova silo pașa tute caște ajutil-tu. Daștis te pușes avere daden sar folosisarde von ca i închinarea andi familia le instrumentea anda o sicaimos cai si amen. (Prov. 11:14) Mang le Iehovas te ajutil-tu te des duma șucar che șiavența hai te șios lenghe pușimata lașe caște jianes so si ande lengo ilo hai ande lenghi goghi. (Prov. 20:5) w22.04 17 ¶4, 7; 18 ¶9

Daisaras te bariaras amari iubirea anda o Iehova cana prinjianas mai mișto lesche Șiaves, cai sicavel perfecto i personalitatea pesche Dadeschi. (Evr. 1:3) O mai lașio modo te prinjianas mai mișto le Isusos si te sichioas mai but buchia andal Evanghelii. Dacă ci si tut încă o obiceio te citisares ande fiesavo ghies andai Biblia, daștis te astares de acanara. Ando timpo so citisares le relatări andai viața le Isusoschi, de chi zor te diches lesche calități. Le manușa daștinas te pașion lestar. Chiar vi le șiave simțonas-pe mișto pașa leste. Andi Biblia, phenel-pe că vo, pherdo iubirea, lea le șiavorren ande peschi angali. (Mar. 10:13-16) Anda codoia că o Isus sas-lo lașio hai phiravelas-pe sar iech lașio amal, le discipoli simțonas-pe mișto pașa leste hai ci încărenas-pe parpale te phenen lesche so pachian. (Mat. 16:22) Cadea că, o Isus sicadea i personalitatea pesche Dadeschi cerisco. Vi catar o Iehova le manușa daștin te pașion. Daisaras te mangas-ame lesche oricana hai daisaras te pâtras amaro ilo angla leste. Sa cadea, daisaras te pachias că o Iehova ci doșarel-ame. Vo iubil-ame hai camel amaro miștimos. (1 Pet. 5:7) w22.08 3 ¶4, 5

Anda codoia că o Iehova cărdea-ame, vo jianel sea anda amende. Bariol amaro ilo cana gândisaras-ame că o Iehova prinjianel sea-l buchia anda fiesavo manuș pa i phuv. (Ps. 139:15-17) Vo dichel sea le imperfecțiuni cai si amen catar amare dada. Mai but, vo jianel sea le buchia prin save nachleam cai cărde-ame te avas le manușa cai sam aghies. O Iehova hachiarel mișto sar sam amen, le manușa. Cadaia cherel-les te sicavel amenghe îndurarea. (Ps. 78:39; 103:13, 14.) O Iehova sicadea că camel anda sea o ilo te iertil-ame. Vo jianel că, prin so cărdea o iechto manuș, Adam, savore anda amende arăsleam tela o armai le păcatosco hai le merimasco. (Rom. 5:12) Amen ci daisardeamas te cheras chanci caște na mai avas tela cado armai. (Ps. 49:7-9) Anda codoia, pherdo iubirea hai lașimos, o Del cărdea vareso caște ajutil-ame. Ando Ioan 3:16, phenel-pe că o Iehova bișaldea pesche Șiaves unico-năștime caște merel anda amende. (Mat. 20:28; Rom. 5:19) w22.06 3 ¶5, 6

Codola cai iertin va avena iertime. O Iehova sicadea sa cado principio bute bărșența mai anglal, cana traisardea o Iov. Cado manuș pherdo pachiamos sas-lo zurales duchado hai pusado ando ilo catar le buchia nasul cai phende-len lesche le trin murșa, po anav Elifaz, Bildad hai Țofar. Atunci, o Iehova phendea caring o Iov te manghel-pe anda lende. O Iov cărdea cadea hai o Iehova dea-les but miștimata. (Iov 42:8-10) Cheras amenghe nasul cana încăras holi ando ilo. O Iehova camel te avel amen pacea hai te hastras catar o baro pharimos cai anel-les i holi cai încăras-la ando ilo. (Ef. 4:31, 32) Vo zuriarel-ame: „Mech i holi hai duriar-la tutar”. (Ps. 37:8) Cana încăras conto catar cado sfato, sicavas că sam goghiaver. I holi cai încăras-la ande amaro ilo daștil te cherel nasul amare sastimasche hai amara goghiache. (Prov. 14:30) Cana încăras holi ande amaro ilo, si sar cana pias otrava; ajucăras-ame te cherel nasul codolesche cai holiardea-ame, tha o ciacimos si că numai duchavas-ame corcore. Pe aver rig, cana iertisaras, si sar cana cheras amenghe corcore iech cadouo. Si amen pacea andi goghi hai ando ilo, hai daisaras te jias angle ando servicio le Iehovasco. w22.06 10 ¶9, 10

Amari speranța si sar iech coifo cai feril amari goghi hai ci mechel-ame te rodas iech viața bazome pe le camnimata le ilesche, cai daștilas te rimosarel amaro amalimos le Iehovaia. (1 Cor. 15:33, 34) coifo la speranțaco feril amari goghi vi catar o gândo că sea so cheras caște avas cuci andel iacha le Iehovacshe si de ivea. Te na bâstras că o Elifaz, iech andal amala neciace le Iovosche, gândisardea sa cadea. Vo phendea: „So si o manuș cai merel, caște avel ujo?”. Pala codoia, anda o Del phendea: „Ita! Vo ci pachial-pe ande pesche sfinți hai nici chiar le ceruri ci sile uje ande lesche iacha”. (Iov 15:14, 15) So bare hohaimata! Te na bâstras că o Satan si codo cai gândil cadea. Vo jianel că, dacă va avela te pheres chi goghi cadale buchianța, va astareia te hasares chi speranța. Cadea că, șiude tutar sigo cadal hohaimata. Na mech niciechdata ca i îndoiala te covliarel chio pachiamos că o Iehova camel te trais veșnico hai că silo pașa tute te ajutil-tu te arăsăs code. (1 Tim. 2:3, 4) w22.10 25, 26 ¶8-10

O Satan camlea ca o Iov te pachial că avile pe leste cadal pharimata anda codoia că o Iehova sas-lo holiarico pe leste. Cadea că, o Satan folosisardea-pe catar iech bari barval caște marel tele o chăr ande savo sas le deș șiave le Iovosche cai hanas ande iech than. (Iov 1:18, 19) Sa cadea, vo cărdea te perel iech iag anda o cerii cai mudardea sea le animalea le Iovosche, ande iech than le slujitorența cai lenas sama pe lende. (Iov 1:16) Anda codoia că i barval hai i iag avilea anda o cerii, o Iov pachiaia că o Iehova Del cărdea te avel pe leste cadal pharimata. Vo gândisardea-pe că holiardea pesche Dades cerisco. Chiar cana sas-lo zurales perado, vo ci dea armaia le Devles. Vo chiar andea pesche amintea că, ji atunci, o Iehova dea-les but lașe buchia. Anda codoia, o Iov gândisardea-pe că, cadea sar primisardea o lașimos, trebulas te primil vi o nasulimos. Vo phendea: „Așardo te avel vi de acanara mai dur o anav le Iehovasco!”. (Iov 1:20, 21; 2:10) w22.06 21 ¶7

Mai târzio, o Isus dea pesche discipolenghe iech avertismento cai arachas-les ando Ioan 17:14. Amen dichleam sar pherdilea-pe cadai partea andai profeția, vi mai but andel palutne 100 bărșa cai nachle. Ca țâra timpo pala so o Isus sas-lo cărdo Rege, ande 1914, o Satan sas-lo șiudino tele anda o cerii. Vo sas-lo șiudino pașa i phuv, cai ajucărel peschi distrugerea. (Rev. 12:9, 12) Tha, anda codoia că jianel că mai siles țâra timpo, vo ci ajucărel de ivea hai, anda codoia că silo zurales holiardo, o Satan șiorel peschi holi opral o poporo le Devlesco. (Rev. 12:13, 17) Anda codoia, i lumea le Satanoschi urâl-ame mai but sar oricana. Tha ci trebul te daras catar o Satan hai codola cai sile de leschi rig. Mai but, daștil te avel amen sa codo pachiamos cai sas le apostolos Pavel, cai scriisardea: „Dacă o Del silo amența, con va avela contra amenghe?”. (Rom. 8:31) Daștil te avel amen iech pachiamos zuralo ando Iehova. w22.07 18 ¶14, 15

O Isus ci darailea că, co sfârșito le sistemosco, ci va avena destui creștini cai te cheren i lucrarea de predicare. Vo jianelas că avelas te pherel-pe i profeția cai avel: „Chio poporo va avela gata anda sea o ilo ando ghies cana va avela te îngăres chi armata co marimos”. (Ps. 110:3) Dacă vi tu des duma anda i vestea lași, sicaves că așes pașa o Isus hai o sclavo fidelo hai cheres chi partea caște pherel-pe cadai profeția. Si ciaces, i predicarea jial angle, tha si vi pharimata. Iech pharimos cai si șiuto angla i lucrarea de predicare si că le manușa așen amenghe contra. Le apostați, le conducători religioși hai le politicieni phenen că i buchi cai cheras-la si nasul. Athade catar cadal hohaimata, amare neamuri, le manușa cas prinjianas-les sau amare colegi catar i buchi daștinas te camen te cheren-ame te na mai slujisaras le Iehovasche hai te na mai das duma anda i vestea lași. Ande chichiva thema, i opoziția si cadea de nasul că amare phrala sile darade, phandade sau chiar condamnime co phandaimos. w22.07 8 ¶1; 9 ¶5, 6

O Iehova ajucărel amendar te cheras amenghe timpo caște las i Biblia hai te prinjianas-les mai mișto, hai te gândisaras-ame ca so citisardeam. Cana cheras so sichileam, amaro pachiamos bariol hai silo mai zuralo, hai pașioas mai but amare Dadestar cerisco. Cadea, arăsas te avas mai zurale caște daisaras te nachas părdal le pharimata. O Iehova del pesco spirito sfânto codolenghe cai șion pengo pachiamos ande lesco Cuvânto. Sea prin o spirito, primisaras „i zor cai nachel orisavi buchi” caște daisaras te nachas părdal le zumaimata. (2 Cor. 4:7-10) Le ajutoroia le Iehovasco, „o scalvo fidelo hai prevăzătorii” cherel but articolea, materialea video hai ghilea, cai ajutin-ame te zuriaras amaro pachiamos hai te așias pașa o Iehova. (Mat. 24:45) O Iehova phenel amenghe te sicavas iubirea iech caring aver hai te zuriaras-ame andel timpuri phare. (2 Cor. 1:3, 4; 1 Tes. 4:9) Le phrala hai le pheia sile gata te ajutin-ame te așias zurale ando pachiamos cana nachas prin pharimata. w22.08 12, 13 ¶12-14

Te na încăras-ame parpale te das duma anda le șucar buchia cai dichas-le ca amare phrala hai pheia. Cana cheras cadea, von va pașiona vi mai but iech averestar, hai cadaia va cherela te bariol i iubirea andi congregația. Poiechdata, vi mașcar le creștini zurale spiritualo daștin te aven nehachiarimata anda so pachian sau so phenen. O apostolo Pavel hai lesco lașio amal o Barnaba nachle prin iech pharimos sar cado. Ando timpo so pregătinas-pe te jian andi călătoria misionaro cai avelas, mașcar lende astardea-pe iech bari holi anda codoia că ci hachiarde-pe dacă te len pența le Marcos sau nici. Pala so astardea-pe cadai „bari holi”, le dui ci mai găle pe iech drom. (Fap. 15:37-39) Tha o Pavel, o Barnaba hai o Marcu lașiarde le buchia mașcar pende hai sas-le pale amala. Pala codoia, o Pavel dea duma șucar anda o Barnaba hai o Marcu. (1 Cor. 9:6; Col. 4:10) Vi amen camas te rezolvisaras amare nehachiarimata cai daștin te aven amen amare phralența andai congregația, hai te dichas so si lașio ande lende. Cadea, va avela te rodas i pacea hai i unitatea. w22.08 23 ¶10, 11

Ando timpo so das sea amari zor caște traisaras pala le norme orta le Iehovasche, trebul te încăras-ame parpale te na judechisaras averen hai te na pachias că sam mai orta sar von. Te na bâstras că o Iehova si o „Judecătoro sea la phuveaco”. (Gen. 18:25) Vo ci dea amen i buchi te judechisaras. Te gândisaras amen co exemplo le Iosifosco, iech manuș cai sas-lo orta. Vo încărdea-pe parpale te judechil averen, chiar vi codolen cai phirade-pe nasul leia. Lesche phrala cărde lesche but nasul: astarde-les, bichinde-les sar sclavo hai cărde lenghe dades te pachial că lesco șiavo mulea. Pala mai but bărșa, o Iosif sas-lo pale pașa le jene anda leschi familia. Acana, o Iosif, cai sas iech zuralo conducătoro, daisardeas te judechil zurales pesche phralen hai daisardeas te risarel lenghe parpale o nasulimos. Exacto cadalatar daraile lesche phrala, cai falas-len zurales pharo anda sea so cărde. Tha o Iosif dea duma șucar lența hai phendea lenghe: „Na daran! Som me ando than le Devlesco?”. (Gen. 37:18-20, 27, 28, 31-35; 50:15-21) Pherdo umilința, o Iosif mechlea i judecata andel vasta le Iehovasche. w22.08 30 ¶18, 19

Jianglean că o Iehova daștil te folosil tut caște del răspunso ca o manglimos cai cherel-les iech anda lesche slujitori? Daștis te ajutis averen vi cana san iech phuro de congregație, slujitoro auxiliaro, pioniero sau vestitoro. Sa cadea, daștis te cheres vareso anda aver vi cana san tărno sau phuro, phral sau phei. Cana varecon cai iubil le Iehovas del cingar caring leste anda ajutorii, amaro Del folosil butivar le phuren de congregație hai avere slujitoren loialo caște aven ‘iech ajutorii cai zuriarel’ anda codo jeno. (Col. 4:11) Ce bari pachiv si te slujisaras le Iehovasche hai amare phralenghe ande cado modo! Daisaras te ajutisaras amare phralen cana astarel iech baro nasfalimos, iech dezastro naturalo sau iech persecuția. Chiar cana camas te ajutisaras averen, cadaia daștil te avel amenghe pharo dacă le jene anda amari familia sile nasfale sau nici amen ci si amen cadea de but love. Cu sea cadala, o Iehova dichel că camas te ajutisaras anda sea o ilo codolen cai silen nevoia hai sam zurales cuci anda leste cana cheras so daisaras anda lende. (Prov. 19:17) w22.12 22 ¶1, 2

I iubirea cherel-ame te pachias-ame ande le coaver. O Isus phendea că le mai bare porunci si te iubis le Iehovas hai che pașardes. (Mat. 22:37-39) I iubirea anda o Iehova zuriarel vi amen te camas te las-ame pala amaro Dad cerisco, cai silo o mai demno pachiamasco. I iubirea ande amare phrala hai pheia cherel-ame te încăras anda amende le buchia cai phenen-le amenghe. Ci camas niciechdata te phenas vareso anda lende cai daștilas te cherel lenghe vroiech nasul sau duch sau te cheras-le lajiavestar. Vi i umilința ajutil-ame te avas manușa demno pachiamasche. Iech creștino umilo ci va camela te avel sea o timpo vo o iechto jeno cai phenel le coaverenghe iech buchi cai așundea-la. (Filip. 2:3) Vo ci zumavel te cherel averen te pachian că vo jianel buchia importanto hai garade, cai ci daștil te phenel-le. Sa cadea, i umilința ajutil ieche creștinos te încărel-pe parpale te del mai dur so pachial vo anda anumime buchia cai ci sile sicade andi Biblia sau ande amare publicații. w22.09 12 ¶12, 13

Iech îngero phendea le Danielosche că o poporo le Devlesco avelas te hachiarel mai mișto le dumes profetico anda o lil Daniel, tha că „ niciech anda codola nasul ci va hachiarela”. Acana si o timpo te sicavas prin amaro phiraimos că ci sam mașcar codola cai si nasul. (Mal. 3:16-18) O Iehova va chidela peste codolen cai dichel-le sar iech cuci națiunea, adică codolen cai sile cuci ande lesche iacha. Vi amen camas ciaces te avas mașcar cadala. ciaces, traisaras timpuri zurales interesanto. Tha, ando viitorii pașardo, va avena buchia vi mai bare – codola nasul va avena distrugime hai o Iehova va pherela peschi promisiunea cai cărdea-la le Danielosche: „Va avela te vazdes-tu caște avel tuche dini chi partea co sfârșito le ghiesengo”. (Dan. 12:13) Ajucăres o ghies cana o Daniel hai codola drago tuche ‘va vazdena-pe’? Dacă da, de chi zor te așes loialo le Iehovasche! Cadea, daștis te aves siguro că chio anav va așela scriime ando lil la viațaco. w22.09 24 ¶17; 25 ¶19, 20

Cadal dumes zuriarde le Ezechielos. Vo siguro andea ande peschi goghi că o Iehova folosisardea dumes sar cadala cana numisardea sar profeți le Moises hai le Isaias. (Ex. 3:10; Is. 6:8) Vo jianelas vi că o Iehova ajutisardea cadale duie profețen te nachen părdal le pharimata cai sas-len. Cadea că, cana o Iehova phendea lesche dui-var: „Bișialav-tu”, o Ezechiel pachiaia ciaces că o Iehova va avela pașa leste. Sa cadea, ando lil Ezechiel arachas butivar i expresia: „O cuvânto le Iehovasco avilea mande”. (Ezec. 3:16) Mai but, vi i expresia: „O cuvânto le Iehovasco avilea pale mande” sili folosime butivar. (Ezec. 6:1) Cadea că, o Ezechiel jianelas anda sea o ilo că vo sas-lo bișialdo le Iehovastar. Mai but, anda codoia că sas o șiavo ieche rașaiesco, daștil-pe că vo jianelas catar lesco dad sar, ando timpo cai nachlea, o Iehova zuriardea pesche profețen că va avela pașa lende. Sar exemplo, Vo phendea caring o Isaac, o Iacob hai o Ieremia: „Me som tusa”. (Gen. 26:24; 28:15; Ier. 1:8) w22.11 2 ¶3

Chiar cana o Adam hai i Eva păcătuisarde, hai cadea andine o merimos pe sea lenghe șiave, o Iehova ci parudea pesco scopo. (Isa. 55:11.) Vo camel vi mai dur ca le manușa loialo te train veșnico. O Iehova promitisardea că va uștiavela pale viațate codolen cai mule hai va dela-len i posibilitatea te train veșnico. (Fap. 24:15; Tit 1:1, 2) O Iov, iech murș loialo, pachialas anda sea o ilo că o Iehova camel te jiuvindil codolen cai soven ando merimos. (Iov 14:14, 15) O profeto Daniel jianelas că le manușa va avena jiuvindime hai că va daștina te train veșnico. (Ps. 37:29; Dan. 12:2, 13.) Andel ghiesa le Isusosche, le evrei jianenas că o Iehova daștil te del „viața veșnico” pesche slujitorenghe loialo. (Luca 10:25; 18:18) O Isus dea duma butivar anda cadai promisiunea, hai vi vo sas-lo uștiado andal mule catar lesco Dad. (Mat. 19:29; 22:31, 32; Luca 18:30; Ioan 11:25) w22.12 4, 5 ¶8, 9

O Iehova acharel-ame te pașioas lestar. (Iac. 4:8) Vo camel te avel amaro Del, amaro Dad hai amaro Amal. O Iehova așunel amare manglimata hai ajutil-ame andel pharimata. Sa cadea, prin leschi organizația, vo sicavel-ame hai feril-ame. Daisaras te pașioas le Iehovastar cana mangas-ame lesche, cana citisaras anda lesco Cuvânto hai cana gândisaras-ame ca so citisardeam. Cadea, amaro ilo pherel-pe bucuriatar hai aprecierea caring leste. Mai but, sam vi mai zuriarde te așunas lestar hai te așaras-les, cadea sar vi meritil. (Rev. 4:11) Chichi prinjianas mai mișto le Iehovas, cadichi mai but pachias-ame ande leste hai ande leschi organizația. Tha o Beng, camel țâra po țâra te na mai pachias-ame ando Iehova hai ande leschi organizația. Tha amen daisaras te așias zurale angla lesche athaimata. Dacă amaro pachiamos ando Iehova silo zuralo, ci va avela te duriaras-ame niciechdata catar amaro Del hai leschi organizația. (Ps. 31:13, 14) w22.11 14 ¶1-3

Andel bărșa cai nachle, sas but creștini ciace cai sas-le gata te hasaren penghi libertatea hai chiar viața anda codoia că iubisarde le Iehovas, lengo Suverano. Von sas-le hotărâme ande pengo ilo te încăren penghi integritatea ji co sfârșito. Len sas-len sa codoi atitudinea cai sas le trine tărnen evrei cai sas-le salvime anda o thabardo bov anda codoia că așile loialo Codolesche cai si O Mai Baro opral savore. Andel cuvintea cai aven o David scriisardea chichi de importanto si te așias integri caring o Del: „O Iehova va phenela i cris contra le popoarea. Judechisar-ma, o, Iehova, pala mânro ortomos hai pala mânri integritatea!”. (Ps. 7:8) Ande iech aver psalmo, o David scriisardea: „I integritatea hai o ortomos te feril-ma”. (Ps. 25:21) Daisaras te avas ciaces fericime cana așias zurale ando pachiamos hai încăras ca amari loialitatea caring o Iehova bi te cheras vareso nasul ande lesche iacha, indiferento prin so zumaimata nachas. Cadea, va avela te simțosaras ando ilo sa cadea sar o psalmisto cai scriisardea: „Fericime sile codola cai încăren penghi integritatea . . ., cai phiren pala i legea le Iehovaschi”. (Ps. 119:1, n.s.) w22.10 17 ¶18, 19

Ande peschi viața, o Iov dea duma bute jenența. Tha o mai baro Jeno saveia dea duma sas o Iehova Del. Caște zuriarel le Iovosco pachiamos ande Lesco goghiaverimos, tha vi ande Lesco zuralimos te lel sama pe pesche slujitori, o Iehova ortosardea lesco dichimos caring chichiva șucar buchia cai Vo cărdea-le. Sar exemplo, andea lesche amintea că Vo lelas sama pe sea le animalea, cadea că daștilas te lel sama vi pe leste. (Iov 38:39-41; 39:1, 5, 13-16) Cana gândisardea-pe ca sea so cărdea o Iehova, o Iov sichilea mai but buchia anda le șucar calități le Devlesche. Vi amen daisaras te prinjianas mai mișto amare Devles cana dichas le buchia cai cărdea-le. Tha poiechdata si pharo te cheras cadaia. Dacă beșas ande iech foro, ci daisaras te dichas ande fiesavo ghies i natura. Vi cana beșas ande iech gav, daisaras te das amari sama că ci si amen cadea de but timpo caște dichas mai atento i natura. Tha si importanto te cheras amenghe timpo hai te das amari zor caște dichas i creația. w23.03 15 ¶1, 2

O Isus phendea de mai anglal pesche continuatorenghe că, angla so te avel o sfârșito, va avena bare „izdraimata phuveache” hai aver dezastrea. (Luca 21:11) Vo phendea vi că „o nasulimos va bariola”, hai cadaia dichiol-pe aghies anda o fapto că le manușa maren-pe, mudaren-pe hai si atacuri teroristo. (Mat. 24:12) Tha o Isus ci phendea niciechdata că cadal pharimata avenas te aven numai pe codola cai o Iehova mechlea-le. O ciacimos si că but slujitori loialo le Iehovasche nachle prin dezastrea. (Is. 57:1; 2 Cor. 11:25) O Iehova ci feril-ame prin iech miracolo catar sea le dezastrea, tha vo ajutil-ame te avel amen pacea ando ilo hai te așias liniștime. Va avela amenghe mai ușoro te așias liniștime dacă cărdeam amenghe timpo te pregătisaras-ame anda late. Tha, dacă pregătisaras-ame, sicavas că ci pachias-ame ando Iehova? Nici. Mai but, cana cheras cadea, sicavas că si amen pachiamos ande lesco zuralimos te lel sama pe amende. O Cuvânto le Devlesco del-ame o sfato te pregătisaras-ame andal dezastrea naturalo cai daștinas te aven. w22.12 18 ¶9, 10

Ando timpo so o Iosif sas-lo ando phandaimos, o Iehova cărdea ca le reges anda o Egipto te aven-les dui sune cai darade-les but. Cana o rege așundea că o Iosif jianenas te phenel so sas andel sune, vo manglea te avel andino leste. Le ajutoroia le Iehovasco, o Iosif phendea le faraonosche so sicavenas lesche sune hai o faraono sas-lo zurales uimime cana așundea le sfaturi goghiaver cai dea-le o Iosif. Mai but, cana vo dichlea că o Iehova sas-lo pașa cado tărno manuș, vo dea-les i buchi te lel sama pe o haben anda sea o Egipto. (Gen. 41:38, 41-44) Mai târzio, avilea iech baro bochalimos na numai ando Egipto, tha vi ando Canaan, o them cai beșelas i familia le Iosifoschi. Acana, o Iosif daștilas te salvil pesca familia hai, cadea, te lel sama te jial mai dur i linia genealogico pe savi trebulas te avel o Mesia. Si claro că o Iehova cărdea le Iosifos te jial lesche mișto ande sea. Ji la urmă, o Iehova parudea o nasulimos cărdo catar le phrala le Iosifosche ande iech buchi prin savi daisardea te pherel Pesco scopo. w23.01 17 ¶11, 12

Te las sama pe amende însemnol te dichas de mai anglal le buchia cai daștinas te rimosaren amaro amalimos le Iehovaia hai te cheras sea so daisaras caște na întâmplol-pe cadaia. Cadea, așias andi iubirea le Devleschi. (Prov. 22:3; Iuda 20, 21) O apostolo Pavel zuriardea le creștinen te len sama pe pende. Sar exemplo, vo phendea caring le creștini anda Efes: „Len sama sar phiren, na sar codola cai nai-le goghiaver, tha sar codola cai sile goghiaver”. (Efes. 5:15, 16) O Satan camel sea o timpo te rimosarel amaro amalimos le Iehovaia, anda codoia i Biblia phenel amenghe: „Hachiaren savi si i voința le Iehovaschi”. (Efes. 5:17). Cadea, amen daisaras te așias zurale angla orisavo zumaimos cai avel catar o Satan. Caște cheras alosarimata goghiaver, trebul te hachiaras savi si „i voința le Iehovaschi”. Amen daisaras te cheras cadaia cana las o Cuvânto le Devlesco hai citisaras-les ande fiesavo ghies hai pala codoia gândisaras-ame ca so citisardeam. Dacă das amari zor te hachiaras chichi mai mișto i voința le Iehovaschi hai te avel amen „i goghi le Cristososchi”, ‘va avela te phiras sar niște manușa goghiaver’ chiar vi ande le situații cai ci si amen iech regula cai phenel amenghe so te cheras. (1 Cor. 2:14-16) w23.02 16, 17 ¶7-9

Chichivar cheres ujâmos ande chio chăr? Daștil-pe că mai anglal te muchis-tu, cărdean ujimos zurales mișto ande leste. Tha arăsăl te cheres ujimos numai iech data? Nici. Cadea sar jianes, o uciar hai o melalimos chiden-pe zurales sigo parpale. Caște avel tut iech chăr șucar, trebul te cheres ujimos sea o timpo. Sa cadea, amen trebul te ortosaras mai dur amaro modo gândimasco hai amari personalitatea. Si ciaces, angla so te bolas-ame, deam sea amari zor te cheras bare paruimata ande amari viața caște „ujiaras-ame catar sea so meliarel o corpo hai o spirito”. (2 Cor. 7:1) Cu sea cadala, acana amen trebul te las-ame pala o sfato le apostolosco Pavel ‘te neviaras-ame mai dur’. (Ef. 4:23) O uciar hai o melalimos anda cadai lumea daștin te meliaren-ame sigo. Caște încăras-ame uje hai te așas cuci andel iacha le Iehovasche, trebul te dichas sea o timpo sar si amaro modo gândimasco, amari personalitatea hai amare camnimata. w23.01 8 ¶1, 2

Imaginisar tuche sar avelas te așunes le Isusos cana sicavelas le manușen. Vo phendea butivar anda șăro versetea andal Sfintele Scripturi. Co bolimos, cana o Isus sas-lo machlo spiritoia sfânto, vo andea pesche andi goghi le buchia cai cărdea-len cana sas-lo ando cerii. Le dintune cuvintea phende le Isusostar angla lesco bolimos, hai vi chichiva cuvintea cai phendea-le angla te merel arachen-pe andel Scripturi. (Deut. 8:3; Ps. 31:5; Luca 4:4; 23:46) Chichi timpo o Isus sas-lo pi phuv, vo citisardea sau phendea anda pesco șăro angla aver versetea andal Scripturi hai ajutisardea le manușen te hachiaren-len. (Mat. 5:17, 18, 21, 22, 27, 28; Luca 4:17-21) Bute bărșența anglal so o Isus astardea pesco servicio, vo citisardea hai așundea butivar o Cuvânto le Devlesco. Cana sas-lo chăre, vo așundea sar i Maria hai o Iosif denas duma andal Scripturi. (Deut. 6:6, 7) Sa cadea, pachias că o Isus jialas ande fiesavo sabato ca i sinagoga ande iech than pesca familiaia. (Luca 4:16) Code, vo trebulas te așunel atento cana citinas-pe le Scripturi. w23.02 8 ¶1, 2

Si tut but motivea caște iubis le Iehovas. Sar exemplo, hachiardean că vo silo i haing la viațachi hai că lestar avel „orisavi lași buchi hai orisavo daro perfecto.” (Ps. 36:9; Iac. 1:17) Fiesavi lași buchi cai anel tuche bucuria avel catar amaro Dad generoso hai iubitorii. I răscumpărarea si o mai cuci daro cai dea-les amenghe o Iehova. Caște hachiaras chichi de cuci si, te gândisaras-ame ca o phanglimos cai si mașcar o Iehova hai lesco Șiavo. O Isus phendea: ‘O Dad iubil-ma’ hai „me iubiv le Dades”. (Ioan 10:17; 14:31) Andel miliardea bărșa cai nachle, lengo phanglimos arăslea sea mai zuralo. (Prov. 8:22, 23, 30) Te gândisaras-ame so bari duch simțosardea o Del cana mechlea ca lesco Șiavo te nachel prin bare ducha hai te merel. Cu sea cadala, anda codoia că vo iubil zurales but le manușen, hai vi tut, o Iehova camlea te del pesche Șiaves iubime sar jertfa, ca tu hai aver te daștin te train veșnico. (Ioan 3:16; Gal. 2:20) Cado si o mai baro motivo anda savo iubisaras le Devles. w23.03 4, 5 ¶11-13

Te na banghiaras o can ca le sicaimata apostato. O Isus ortosardea chichiva creștinen anda Pergam anda codoia că încărenas zurales ca chichiva sicaimata neciace, cai cărde le phralen te na mai aven chidine ande iech than. (Rev. 2:14-16) Tha, așardea le creștinen anda Tiatira cai încărde-pe dur catar le ‘buchia profundo le Satanosche’ hai phendea lenghe ‘te încăren zurales’ co ciacimos. (Rev. 2:24-26) Le creștini covle spiritualo cai mechle-pe athade catar le sicaimata neciace trebunas te căin-pe. So daisaras te sichioas vi amen catar? Trebul te duriaras amendar orisavo sicaimos cai si contra o modo sar gândil o Iehova. Mai anglal, daștilas te fal-pe că le apostați len-pe pala so phenel i Biblia, tha ‘le buchia cai cheren-le’ sicaven că nici. (2 Tim. 3:5) Dacă das sea amari zor caște prinjianas sea mai mișto o ciacimos andai Biblia, va avela amenghe but mai ușoro te dichas hai te duriaras amendar le sicaimata neciace. (2 Tim. 3:14-17; Iuda 3, 4) Si importanto te las sama ca amari închinarea te avel cuci andel iacha le Iehovasche. Dacă aghies cheras vareso cai daștilas te cherel le Iehovas te na mai camel amari închinarea, trebulas te cheras sigo paruimata caște lașiaras le buchia. (Rev. 2:5, 16; 3:3, 16) w22.05 4 ¶9; 5 ¶11