Septembria

Cana folosisaras ande iech modo lașio o daro te das duma, sicavas că sam slujitori le Iehovasche. Cadea, codola de pașa amende va dichena i „deosebirea . . . mașcar codo cai slujil le Devlesche hai codo cai ci slujil lesche”. (Mal. 3:18) Te dichas i experiența iecha pheiachi po anav Kimberly. Co liceo, voi sas-li șiuti te cherel iech proiecto ande iech than iecha colegaia anda lachi clasa. Ando timpo so cherenas buchi ande iech than, lachi colega dichlea că voi ci sas cadea sar le coaver șiave andai școala. Voi ci delas duma anda aver pala o dumo, delas duma lașimaia hai ci folosilas dumes melale. Cana dichlea chichi de șucar phiravelas-pe hai delas duma i Kimberly, lachi colega camlea te sichiol mai but buchia andai Biblia. Cana das duma ande iech modo cai țârdel le manușen co ciacimos, o ilo le Iehovasco bariol! Savore camas ca, prin o modo sar das duma, te das pachiv le Iehovasche. w22.04 5, 6 ¶5-7

O Isus hastradea la Maria Magdalena de tela o zuralimos le efta benghengo. Lachi recunoștința cărdea-la te avel iech anda lesche continuatori hai te ajutil-les ande lesco servicio. (Luca 8:1-3) Chiar cana i Maria dichelas zurales cuci so cărdea o Isus anda late, daștil-pe că ci ajucărdea-pe ca i buchi but mai bari cai avelas te cherel-la vo ande laco miștimos. O Isus avelas te del peschi viața sar jertfa „ca oricon sicavel pachiamos ande leste” te daștil te bucuril-pe viațatar veșnico. (Ioan 3:16) I Maria sicadea peschi recunoștința caring o Isus vi prin peschi loialitatea. Cana o Isus sas-lo po stâlpo de tortură, i Maria așilea pașa leste anda codoia că duchalas-la lestar hai camelas te avel pașa o ilo codolengo cai sas-le duchade code. (Ioan 19:25) Pala so o Isus mulea, i Maria hai aver dui jiuvlea andine mirodenii anda lesco prahimos. (Mar. 16:1, 2) La sas-la i bari bucuria te dichel le Isusos pala so sas-lo uștiado andal mule hai chiar te del duma leia. Bute discipolen ci sas-len cado baro privilegio. (Ioan 20:11-18) w23.01 27 ¶4

Ci trebul te pachias că le buchia cai cărdeam-le mai anglal ande lesco servicio arăsăn hai ci mai trebul te cheras chanci. Chiar cana aghies, daștil-pe că ci mai daisaras te cheras cadea de but sar mai anglal, trebul te cheras sea so daisaras „andi buchi le Raieschi” hai te așias uștiade ji co sfârșito. (1 Cor. 15:58; Mat. 24:13; Mar. 13:33) Te cheras mai but buchia andi predicarea hai te slujisaras le Iehovasche anda sea o ilo. O mesajo le Isusosco caring i congregația anda Laodiceea sicadea iech aver problema. Le phrala sas-le ‘tachiorre’ ande soste privealas lenghi închinarea. Anda codoia că sas-le indiferento, o Isus phendea: „San bibahtalo [hai] demno roimasco”. Lengo ilo trebulas te thabol anda o Iehova hai anda i închinarea uji hai te aven pherde zelo. (Rev. 3: 16, 17, 19) So sichioas amen? Dacă hasardeam anda amaro zelo hai ci mai si cadea de baro, trebul te das sea amari zor te dichas cuci le barvalimata spiritualo cai si amen. (Rev. 3:18) Ci camas niciechdata te mechas ca le buchia spiritualo te arăsăn po duito than ande amari viața, anda codoia că camas te rodas te avel-ame iech viața mai lași. w22.05 3, 4 ¶7, 8

De mii bărșa, o Iehova scriil iech lil specialo. Ande cado lil si anava hai astarel le anaveia codolesche cai sas o iechto martoro loialo, o Abel. (Luca 11:50, 51) Ando timpo so nachle le bărșa, o Iehova scriisardea mai dur ande cado lil, cadea că, aghies, ande leste si milioanea anava. Andi Biblia, cado lil silo numime „iech lil de amintire”, „lil la viațaco” sau „sulo la viațaco”. (Mal. 3:16; Rev. 3:5; 17:8) Ande cado lil specialo, si le anava sea codolenghe cai anen închinarea le Iehovasche le ilența pherde pachiv hai dar sfânto hai anda save lesco anav si zurales cuci. Lenghe si dini i ocazia te primin i viața veșnico. Aghies, amare anava sile scriime ande cado lil numai dacă das amari zor te avel amen iech amalimos chidino le Iehovaia, bazome pi jertfa de răscumpărare lesche șiaveschi, o Isus Cristos. (Ioan 3:16, 36) Si ciaces, savore camas ca amare anava te aven scriime ande cado lil, orisavi avelas amari speranța – cerisco sau te traisaras pi phuv. w22.09 14 ¶1, 2

O lil Revelația del duma anda „iech baro balauro lolo sar i iag”. (Rev. 12:3) Cado marel-pe contra o Isus hai lesche îngeri. (Rev. 12:7-9) Vo va avela contra o poporo le Devlesco prin iech ataco. Sa cadea, vo del zuralimos le guvernenghe, cai sile sar le fiare. (Rev. 12:17; 13:4) Cado balauro si „o purano sap, codo cai bușiol Beng hai Satan”. (Rev. 12:9; 20:2) Vo silo pala o dumo sea le coavere dușmanenghe le Iehovasche. Sar va arăsăla o balauro o baro? Andi Revelația 20:1-3 phenel-pe că iech îngero va avela te șiudel le Satanos ando abiso, cai si sar iech phandaimos. Atunci, o Satan ‘ci va mai athavela le națiunen ji cana ci va sfârșina-pe le 1 000 bărș’. Ji la urmă, o Satan hai lesche benga va avena chosle anda sea o timpo. Cadaia va întâmplola-pe cana va avena șiudine ando „iagalo laco hai pherdo sulfo”. Te gândisaras-ame sar va avela i lumea bi le Satanosco hai lesche benga! So șucar va avela atunci! w22.05 14 ¶19, 20

O Isus cărdea buchi phares. Cana sas-lo tărno cărdea buchi sar tâmplaro. (Mar. 6:3) Vo ajutisardea but pesche daden cana lenas sama pe lenghi bari familia. Anda codoia că sas iech manuș perfecto, i buchi cai cherelas-la sas perfecto hai, cadea că, rodenas-la but manușa. Daștil-pe că le Isusos placialas-les so cherelas. Chiar cana delas anda pesco timpo hai zuralimos anda peschi buchi, vo ci mechlea de iech partea le buchia anda o Iehova. (Ioan 7:15) Mai târzio, cana slujisardea le Iehovasche cu timp integral, vo phendea codolenghe cai așunenas-les: „Cheren buchi na anda o haben cai nachel, tha anda o haben cai așel, cai îngărel ca i viața veșnico”. (Ioan 6:27) Hai andi Predica pa o plain, phendea: „Mai mișto chiden tumenghe barvalimata ando cerii”. (Mat. 6:20) O goghiaverimos cai avel catar o Del ajutil-ame te dichas ande iech modo echilibrime i buchi. I Biblia zuriarel-ame ‘te cheras buchi phares, hai te cheras iech buchi pachivali’. w22.05 22 ¶9, 10

I Eunice sas iech lașio exemplo anda o Timotei. Vo dichlea că, iubilas zurales but le Iehovas hai că arachelas bucuria ando servicio andino le Iehovasche. Sa cadea vi aghies, but deia arăsăn co ilo codolengo anda lenghi familia prin lengo phiraimos hai prin lengo pachiamos sicado „bi cuvântosco”. (1 Pet. 3:1, 2) Vi tu daștis te cheres sa cadea. Sar? Șiu po iechto than chio amalimos le Iehovaia. (Deut. 6:5, 6) Cadea sar le mai but deia, vi tu cames o miștimos che șiavengo hai caște les sama pe lende daștil-pe că des anda chio zuralimos, chio timpo, che love hai poiechdata arăsăs nici te na soves. Tha sea cadala ci trebunas te cheren-tu niciechdata te na mai avel-tu timpo caște zuriares chio amalimos le Iehovaia. Șiu tuche de iech partea timpo caște manghes-tu le Iehovasche, te les i Biblia hai te beșes corcori le Iehovaia caște prinjianes-les mai mișto hai caște jias ca le întruniri. Cadea, va avela te zuriares chio pachiamos hai va aveia iech lașio exemplo anda chi familia hai vi anda le coaver. w22.04 16 ¶1; 19 ¶12, 13

Anel amenghe iech bari pacea te jianas că ci așel pe amare dume i phari buchi te judechisaras averen. Sar O Mai Baro Judecătorii, o Iehova si codo cai cherel cadai buchi importanto. (Rom. 14:10-12) Daisaras te pachias ciaces că andi judecata le Iehovaschi, va dichiola-pe sea o timpo că vo încărel conto catar pesche bare norme anda so si mișto hai so si nasul. (Gen. 18:25) Vo ci va cherela niciechdata so si neorta! Abia ajucăras o timpo cana o Iehova va chosela cu sea le buchia nasul cai andea-len i imperfecțiunea hai o păcato. Atunci, le ducha fizico hai le ilesche va avena cu sea sastiarde. (Ps. 72:12-14; Rev. 21:3, 4) Ci va mai avena nici măcar andi amari goghi. Ji atunci, sam zurales recunoscători le Iehovasche că daisaras te las-ame pala lesco exemplo hai dea vi amen o zuralimos te iertisaras averen. w22.06 13 ¶18, 19

Iech lașio judecătorii trebul te prinjianel mișto i legea. Vo trebul te jianel so si mișto hai nasul. Prin so aver vareso dichiol-pe că iech judecătorii silo lașio? Vo trebul te jianel sea le buchia anda iech cazo, mai anglal te lel iech decizia. Cadea că, o Iehova si o mai lașio Judecătorii, anda codoia că vo jianel sea o timpo sea le buchia. Na cadea sar le manușa cai si judecători, o Iehova jianel sea o timpo sea le buchia anda orisavi situația. (Gen. 18:20, 21; Ps. 90:8) Les ci siles limite sar le manușen; vo dichel hai așunel sea. O Iehova hachiarel mișto so daștil te îngărel ieche manușes te cherel vareso. Vo jianel sea le buchia anda iech manuș: so calități siles catar lesche dada, so sicaimos sas lesche dino, cai barilea hai vi savo si lesco sastimos la goghiaco sau emoționalo. O Iehova daștil vi te dichel so si ande amaro ilo. Vo jianel so camel hai so rodel te cherel fiesavo anda amende. Chanci ci daștil te avel garado angla lesche iacha. (Evr. 4:13) Cadea că, cana o Iehova iertil varecas, vo hachiarel mișto sea le buchia anda iech situația. w22.06 4 ¶8, 9

Trebul te las sama hai te prinjianas mișto le athaimata cai o Satan folosisardea-le contra o Iov, anda codoia că vi aghies vo cherel sa cadea. O Satan phenel că amen ci iubisaras ciaces le Iehovas hai că va avela te risaras o dumo le Iehovasche dacă cadaia va trebula caște salvisaras amari viața. Sa cadea, vo doșarel le Devles că ci iubil-ame hai că, anda leste, sea le buchia cai cheras-le caște avas cuci ande lesche iacha si de ivea. Anda codoia că prinjianas le athaimata cai folosil-le o Satan, amen cai sperisaras ando Iehova, ci va avela te avas athade lestar. Trebulas te dichas le zumaimata sar ocazii te prinjianas-ame mai mișto. Le pharimata prin save nachlea o Iov ajutisardea-les te dichel so covlimata siles hai te ortosarel-le. Sar exemplo, vo hachiardea că trebul te avel mai umilo. (Iov 42:3) Vi aghies, le zumaimata daștin te ajutin-ame sa cadea. Cana nachas prin pharimata daisaras te prinjianas mai but buchia anda amende. Iech data so dichleam save si amare covlimata, daisaras te astaras te lașiaras-le. w22.06 23 ¶13, 14

O Iehova phenel amenghe că va avela pașa amende. Sar exemplo, chiar angla so te phenel: „Tumen san mânre martori”, vo phendea: „Cana va avela te naches prin paia, me va avela te avav tusa, cana va avela te naches prin lena, von ci va pachiarena-tu. Cana va avela te phires prin iag, ci va avela te thabos hai i iag ci va thabarela-tu”. (Is. 43:2) Poiechdata, andi predicarea, nachas, te phenas cadea, prin paia hai iag, adică si amen but pharimata hai phare zumaimata. Cu sea cadala, le ajutoroia le Iehovasco, amen predichisaras mai dur. (Is. 41:13) O mesajo cai phenas-les ci silo așundo catar le mai but manușa. Tha amen jianas că o modo sar phiraven-pe ci sicavel că amen ci cărdeam mișto amari buchi sar martori le Devlesche. Amare ile sile zuriarde anda codoia că amen jianas că o Iehova bucuril-pe cana phenas mai dur pherde pachiamos lesco mesajo. O apostolo Pavel scriisardea: „Fiesavo va primila pesco pochinimos pala leschi phari buchi”. (1 Cor. 3:8; 4:1, 2) w22.11 3, 4 ¶5, 6

Dichas aghies sea mai claro, sar pheren-pe tela amare iacha le profeții biblico. Le manușa anda sea-l națiuni sichion te den duma ‘i șib uji’, adică prinjianen o ciacimos cai arachel-pe andi Biblia. (Zah. 8:23; Țef. 3:9) Mai but sar 8 000 000 manușa anda 240 thema hai thana cheren parte anda i organizația le Iehovaschi hai, ande fiesavo bărș, șăla mii manușa bolen-pe. Tha mai importanto sar o fapto că amaro număro bariol si că cadala neve discipoli line pe pende „i nevi personalitatea” hai sicaven calități spiritualo. (Col. 3:8-10) But anda lende sas-le mai anglal imoralo, marenas-pe, cherenas diferențea mașcar pende sau încărenas zurales ca lengo them. Vi i profeția scriime ande Isaia 2:4 pherel-pe, anda codoia că von ‘ci mai sichion o războio’. But manușa sile țârdine ca i organizația le Devleschi cana dichen că amen das amari zor te las pe amende i nevi personalitatea hai uștaras pe le urme amare supraveghetorosche, Cristos Isus. (Ioan 13:35) Sea cadala ci daștinas te aven cărde bi le ajutorosco le Isusosco. w22.07 9 ¶7, 8

Cana mangas-ame, trebul te avel amen iech atitudinea pherdi respecto hai te las sama te sicavas sea o timpo pachiv le Iehovasche. Te gândisaras-ame ca le bare viziuni cai dichle-le angla pende o Isaia, o Ezechiel, o Daniel hai o Ioan. Fiesavi viziunea sicavel le Iehovas sar iech baro Rege. O Isaia dichel le Iehovas sar beșelas pe iech baro hai ucio trono. (Is. 6:1-3) O Ezechiel dichel-les sar beșel pe lesco vurdon cerisco; peste sea pașa leste sas iech strălucirea sar codoia catar iech curcubeo. (Ezec. 1:26-28) O Daniel dichel „Codoles Phuro Ghiesendar” hureado ando hureaimos parno hai anda Lesco trono înclel iag. (Dan. 7:9, 10) O Ioan dichel le Iehovas sar beșel pe iech trono cai, peste sea pașa leste, si iech șucar curcubeo cai ameal sar o smaraldo. (Rev. 4:2-4) Cana gândisaras-ame ca i bari gloria le Iehovaschi, hachiaras că o manglimos si iech baro privilegio. Anda codoia, trebul te sicavas lesche iech bari pachiv. w22.07 20 ¶3

O Satan va camela te așiavel-tu caște na mai barios spiritualo. Vo daștil te șiol tuche andi goghi îndoieli ande soste priveal chichiva sicaimata la Bibliache. Daștil-pe că si manușa cai va camena te cheren-tu te pachias andi teoria anda i evoluția, cai ci anel pachiv le Devlesche. Daștil-pe că mai anglal ci interesilas-tu prea but cadai teoria, tha acana sili tuche sicadi ca i școala. Le buchia cai phenen-le le profesori anda i evoluția daștil-pe că fan tuche logico hai ciace. Cu sea cadala, daștil-pe că von ci zumade niciechdata te roden te dichen dacă si iech Creatoro. An tuche andi goghi o principio anda Proverbe 18:17: „Codo cai del duma mai anglal ande iech proceso fal-pe că siles ciacimos, ji cana avel ocoaver hai șiol lesche pușimata”. Cadea că, ando than te pachias sea so si tuche sicado ca i școala, trebulas te diches atento le ciacimata cai arachen-pe ando Cuvânto le Devlesco, i Biblia hai ande amare publicații. w22.08 2 ¶2; 4 ¶8

Caște țârdas miștimata cana citisaras o Cuvânto le Devlesco, si importanto te hachiaras so citisaras. Te dichas so dea duma o Isus ieche manușeia cai „prinjianelas mișto i Legea”. (Luca 10:25-29) Cana o murș pușlea-les so trebulas te cherel caște avel-les viața veșnico, o Isus ortosardea i atenția caring o Cuvânto le Devlesco hai pușlea-les: „So si scriime andi Legea? Sar citis ande late?”. O murș dea iech răspunso lașio hai phendea anda șăro dui pasajea andal Scripturi, iech anda i iubirea caring o Del hai aver anda i iubirea caring le pașarde. (Lev. 19:18; Deut. 6:5) Tha te dichas so pușlea vo pala codoia: „Hai con si ciaces mânro pașardo?”. Prin cadal cuvintea, o murș sicadea că ci hachiardea mișto so citisardea. Cadea că, vo ci jianelas sar te lel-pe ande peschi viața pala le buchia cai citisardea-le andal Scripturi. Caște hachiaras mișto le Scripturi, si amen nevoia catar o ajutorii le Iehovasco. Cadea că, si importanto te mangas-ame anda o spirito sfânto, ca amari goghi te așel ca so citisaras hai te hai te mangas-les te ajutil-ame te las-ame pala le buchia cai sichileam-le. w23.02 9 ¶4, 5

Sar prinjiandean o ciacimos? Daștil-pe că deam duma anda cadaia mai butivar. Cado si iech anda le dintune pușimata cai șioas-len cana prinjianas varecas. Bucurisaras-ame te așunas sar arăsle amare phrala hai pheia te prinjianen hai te iubin le Iehovas. Vi amen sam voime te phenas lenghe so si o ciacimos anda amende. (Rom. 1:11) Cana das duma anda cadal buchia amare phralența, savore anas ande amari goghi chichi de cuci si anda amende o ciacimos. Sa cadea, zuriarel-ame te ‘phiras mai dur ando ciacimos’, adică te traisaras cadea te avas cuci andel iacha le Iehovasche hai te aven amen miștimata lestar. Anda amende si cuci o ciacimos anda mai but motivea. O mai baro anda lende si că iubisaras amare Devles, Iehova, castar avel o ciacimos. Prin lesco Cuvânto, i Biblia, arăsleam te prinjianas-les na numai sar O Mai Zuralo Del, cai cărdea o cerii hai i phuv, tha vi sar amaro lașio Del cerisco, cai lel sama pe amende pherdo iubirea. (1 Pet. 5:7) w22.08 14 ¶1, 3

O apostolo Pavel zuriardea pesche phralen hai pheian te sicaven iubirea prin ‘buchia lașe’. (Evr. 10:24) Vo ajutisardea-le na numai prin so phendea, tha vi prin so cărdea. Sar exemplo, cana le phrala anda Iudeea nachle prin iech bari boch, o Pavel andea lenghe le buchia cai trebunas lenghe. (Fap. 11:27-30) Chiar cana sas-les but buchia te cherel andi predicarea hai te sicavel averen, vo rodea sea o timpo moduri caște ajutil codolen cai sas-le andi nevoia. Cana cărdea cadea, o Pavel zuriardea o pachiamos pesche phralengo că o Iehova lel sama lendar. Vi amen daisaras te zuriaras o pachiamos amare phralengo hai pheiango cana folosisaras amaro timpo, zuralimos hai sea so jianas te cheras caște ajutisaras codolen cai nachen prin dezastrea. Sa cadea, daisaras te cheras donații anda i buchi cai cherel-pe pe sea i phuv. Cadala si numai chichiva moduri prin save daisaras te ajutisaras le phralen te daștin te pachian-pe ando Iehova, că vo ci va mechela-le niciechdata. w22.08 24 ¶14

Andi Biblia arachas but profeții cai pherdile-pe. Chichiva anda cadala sas-le scriime șăla bărșența mai anglal te pheren-pe. Vi i istoria sicavel că cadal profeții pherdile-pe ciaces. Amen ajucăras-ame te avel cadea, anda codoia că jianas că Codo cai cărdea le profeții si o Iehova. Te gândisaras-ame ca le profeții cai sicaven sar sas-lo perado o purano foro Babilon. Ando ohto-to secolo a.a.e., o profeto Isaia phendea de mai anglal tela inspirația că cado zuralo foro avelas te avel perado. Vo phendea chiar vi o anav codolesco cai avelas te lel tela pesco zuralimos o foro, o Cirus, hai vi sar avelas te cherel cadaia. (Is. 44:27–45:2) Sa cadea, o Isaia phendea că o Babilono avelas te avel ji la urmă distrugime cu sea hai că niciech manuș ci avelas te mai beșel ande leste. (Is. 13:19, 20) Ando bărș 539 a.a.e., o Babilono sas-lo perado catar le mezi hai perși, hai aghies, anda o baro foro ci așilea numai iech grămada barenghi. w23.01 4 ¶10

O Iehova alosardea-ame te cheras partea anda leschi familia de închinători pa sea i phuv. Cado si iech șucar privilegio, cai anel amenghe but miștimata! (Mar. 10:29, 30.) Pe sea i phuv, si amen phrala hai pheia cai, cadea sar amen, iubin zurales but le Iehovas hai den penghi zor te train cadea sar camel vo. Chiar cana amari șib, cultura hai hureaimos daștil te avel diferime, amen daisaras te simțosaras-ame pașă iech averestar, vi cana dichas amen i iechto data. Placial-ame zurales but te avas ande iech than amare phralența caște așaras amare Dades cerisco hai te anas lesche închinarea. Si zurales importanto te așias pașa amare phrala hai pheia. (Ps. 133:1) Von ajutin-ame te îngăras amare pharimata. (Rom. 15:1; Gal. 6:2) Sa cadea, von zuriaren-ame te cheras but buchia ando servicio le Iehovasco hai te das amari zor te avel amen mai dur iech amalimos chidino le Iehovaia. (Evr. 10:23-25) Te gândisaras-ame chichi de but feril-ame o fapto că cheras partea andai congregația, cai ajutil-ame te așias zurale angla amare dușmani – o Satan o Beng hai leschi lumea nasul. w22.09 2, 3 ¶3, 4

Daisaras te das amari sama că si pharo te încăras-ame parpale cana folosisaras le rețele de socializare. Dacă ci las sama, disaras te phenas bi te camas buchia cai trebulas te încăras-le anda amende bute jenenghe. Iech data so i informația tiliardea amendar po drom electronico, ci mai si amen niciech controlo opral o modo sar va avela folosime sau o nasul cai daștilas te cherel-les. Trebul te încăras-ame parpale vi cana codola cai așen amenghe contra camen te cheren-ame prin buchia subtilo te phenas informații anda amare phrala hai pheia, hai cadea te șioas-le ando pericolo. Situații sar cadala daștin te aven andel thema cai amari buchi sili așadi, hai le phrala sile interoghime catar i poliția. Ande cadai situația, hai vi ande aver, si goghiaver te las-ame pala o sfato cai phenel ‘te șioas pe amaro mui iech frâo’. (Ps. 39:1) Trebul te avas manușa demno pachiamasche sea o timpo, andi familia, ande amare amalimata, amare phralența hai vi sea le coavere manușența. Caște daisaras te cheras cadaia, trebul te încăras-ame parpale. w22.09 13 ¶16

Caște avas ciaces fericime, trebul te citisaras hai te sichioas mai but buchia anda o Cuvânto le Devlesco. Anda codoia, o Isus phendea: „O manuș te na trail numai manreia, tha vi orisave cuvântoia cai înclel anda o mui le Iehovasco”. (Mat. 4:4) Cadea că, ci trebulas te mechas te nachel niciech ghies bi te citisaras anda o cuci Cuvânto le Devlesco, i Biblia. O Iehova, sar iech Dad iubitorii, phendea amenghe ande pesco Cuvânto sar daștil te avel-ame iech viața fericime. Vo sicadea amenghe savo si o scopo amara viațaco, sar daisaras te pașioas lestar hai sar daștin te aven iertime amare păcatea. Sa cadea, vo phenel amenghe so șucar viitorii ajucărel-ame. (Ier. 29:11) Cadal ciacimata cai arachas-len pala so studiisaras i Biblia pheren amaro ilo bucuriatar. Oricana simțosaras-ame perade catar le pharimata la viațache, trebul te das amari zor te citisaras vi mai but anda o Cuvânto le Devlesco hai te gândisaras-ame ca so citisardeam. w22.10 7 ¶4-6

I Biblia zuriarel-ame te na așias manușa bi prinjianimasco. Bariaras amaro goghiaverimos cana cheras ande amari viața cadea sar sichileam andal principii la Bibliache. Țâra po țâra, va avela te dichas sar ajutin-ame cadal principii te na cheras amenghe pharimata hai te las decizii goghiaver. Si zurales importanto te dichas mai butivar chichi de mișto cărdeam cadaia. Sar exemplo, dacă studiisares i Biblia de iech timpo hai jias ca le întruniri, daștis te pușes-tu so așavel-tu te des chi viața le Iehovasche hai te boles-tu. Dacă san boldo, daștis te des chi zor te predichis hai te sicaves i vestea lași mai mișto? Sicaven le buchia cai alosares te cheres-le că meches-tu îngărdo catar le principii biblico? Phiraves-tu șucar averența hai sicaves calități creștino caring lende? Dacă dichas că trebul te cheras chichiva paruimata, te gândisaras-ame ca le buchia cai o Iehova camel te anas-le amenghe amintea hai cai „cheren goghiaver codoles cai nai-les prinjianimos”. (Ps. 19:7) w22.10 20 ¶8

O Ezechiel hachiardea chichi de zuralo si o spirito sfânto cana dichlea ande iech viziunea sar cado cherel buchi opral le creaturi spiritualo zurale hai opral le bare roți catar iech vurdon cerisco. (Ezec. 1:21) So cărdea o Ezechiel cana dichlea cadai viziunea? Chiar vo phenel: „Pelem la fațaia ca i phuv”. (Ezec. 1:28) O profeto cărdea cadai buchi anda codoia că lesco ilo pherdilea-pe catar iech bari pachiv caring o Del. Daisaras te pachias că, ori chichivar gândisardea-pe ca i bari viziunea cai dichlea-la, o Ezechiel zuriardea vi mai but pesco pachiamos că daștilas te cherel peschi buchi le ajutoroia cai avel prin o spirito sfânto le Devlesco. O Iehova poruncisardea le Ezechielosche: „Șiav le manușesco, vazde-tu ande pânrende caște dav duma tusa”. Cadai porunca ande iech than le spiritoia le Devlesco dine le Ezechielos o zuralimos cai trebulas lesche caște vazdel-pe. (Ezec. 2:1, 2) Țâra timpo pala codoia, tha vi ande sea lesco servicio, o Ezechiel sas-lo zuriardo catar „o vast le Iehovasco”, adică catar o spirito sfânto. (Ezec. 3:22; 8:1; 33:22; 37:1; 40:1) w22.11 4 ¶7, 8

Ande cado verseto, o profeto Isaia phenel anda o Iehova că silo sar iech sicaitorii atento, cai jial pala pesche elevi hai phenel lenghe caring te jian. Aghies, vi amen așunas le Devles cai del duma pala amende. Sar? Lesche dumes inspirime sas-le scriime acana mii bărșa. Cadea că, cana citisaras andai Biblia, si sar cana așunas le Iehovas pala amaro dumo. (Is. 51:4) Sar daisaras te țârdas sea mai but miștimata anda o sicaimos cai o Iehova del-les amenghe? Te dichas dui buchia cai phendea-le o Isaia. O iechto: „Ita o drom!”. Hai i duito: „Phiren pe leste!”. Cadea că, hachiaras că ci arasăl te prinjianas „o drom”. Amen trebul vi ‘te phiras pe leste’. Prin o Cuvânto le Iehovasco hai prin o ajutorii cai del-les amenghe leschi organizația caște hachiaras-les, amen daisaras te jianas so ajucărel Vo amendar. Sa cadea, jianas sar te cheras so sichileam. Trebul te cheras cadal dui buchia caște daisaras te cheras mai dur pherde bucuria amaro servicio anda o Iehova. Numai cadea va dela-ame o Iehova miștimata. w22.11 10, 11 ¶10, 11

Țâra timpoia pala so mule le mai but apostoli, andi congregația avile creștini neciace. (Mat. 13:24-27, 37-39) Cadala ‘dine duma buchia rimome caște țârden le discipolen pala pende’. (Fap. 20:30) Iech andal buchia rimome sicade catar le creștini neciace sas că o Isus ci dea pesco corpo „iech corcori data caște phiravel bute jenenghe păcatea”, cadea sar sicavel i Biblia. (Evr. 9:27, 28) Von arăsle te sicaven că leschi jertfa trebul neviardi mai butivar. Aghies, but manușa pachian cado sicaimos neciacio. Von chiden-pe ande iech than andel changherea ande fiesavo curco sau, poiechtada, ande fiesavo ghies caște încăren i „Jertfa la Liturghiachi”, cadea sar phenen lache von. Aver religii ci încăren i Comemorarea le merimaschi le Isusoschi cadea de but, tha le mai but manușa anda codola changherea ci hachiaren mișto so miștimata anel amenghe o merimos le Isusosco. w23.01 21 ¶5

Ando Raimos de Iech Mia Bărș le Isusosco, le mule va avena uștiade pale viațate, hai le manușa cai așunen le Devlestar va arăsăna perfecți. Codola cai o Iehova phenel anda lende că sile orta „va stăpânina i phuv hai va traina pe late anda sea o timpo”. (Ps. 37:10, 11, 29) So bari bucuria va pherela amaro ilo cana ‘o palutno dușmano, o merimos, va avela choslo cu sea’! (1 Cor. 15:26) Amari speranța te traisaras veșnico si bazome po Cuvânto le Devlesco. Cadai speranța daștil te ajutil-ame te așias zurale ando pachiamos ande cadal phare ghiesa de palal. Tha, caște avas cuci andel iacha le Iehovasche, trebul te cheras mai but sar numai te camas te așias jiuvinde. O mai baro motivo sostar amen așias loialo le Iehovasche hai le Isusosche si codo că amen iubisaras-len zurales but. (2 Cor. 5:14, 15) Cadai iubirea cherel-ame te las-ame pala lende hai te das duma vi averența andai speranța cai si amen. (Rom. 10:13-15) Cana sichioas te gândisaras-ame na numai ca amaro miștimos tha vi ca le coaverengo hai das andal buchia so si amen vi averen, arăsas manușa savența o Iehova camel te avel amal anda sea o timpo. (Evr. 13:16) w22.12 6, 7 ¶15, 16

Cana sam persecutime, daisaras te hasaras but buchia cai mai anglal ajutisardea-ame te avel amen pacea ando ilo. Daisaras te simțosaras-ame neliniștime hai te daras anda so daștilas te întâmplol-pe. Cadal sentimentea sile normalo, tha trebul te las sama anda codoia că o Isus sicadea că i persecuția daștil te cherel chichivan anda lesche discipoli te peren. (Ioan 16:1, 2) O Isus phendea amenghe că trebul te ajucăras-ame te nachas prin persecuții, tha sa vo phendea amenghe că daisaras te așias zurale ando pachiamos. (Ioan 15:20; 16:33) Cana amari buchi anda o Iehova sili așadi sau ci daisaras te cheras-la libero ande iech măsura mai bari, daștil-pe că primisaras instrucțiuni catar i filiala hai le phurendar. Cadala sile cărde caște ferin-ame, te ajutin-ame te primisaras haben spiritualo hai te predichisaras chichi daisaras. Cher sea so daștis caște les-tu pala cadal îndrumări. (Iac. 3:17) Sa cadea, na phen niciechdata le buchia cai prinjianes-le anda che phrala hai pheia sau anda i buchi la congregațiachi, codolenghe cai ci silen o drepto te prinjianen-len. (Ecl. 3:7) w22.12 20, 21 ¶14-16

Aghies, o Isus lel sama mai dur ca lesche discipoli te predichin anda o Regato le Devlesco pe sea i phuv. Vo pherdea deja cadai promisiunea. Ca amare întruniri hai prin amare publicații, o Isus sicavel-ame sar te predichisaras i vestea lași. Sa cadea, vo del-ame sea so si amen nevoia caște cheras cadaia. (Mat. 28:18-20) Amen cheras so phendea amenghe o Isus, cana predichisaras hai sicavas averen hai așias uștiade ando timpo so ajucăras ca o Iehova te phandavel cado sistemo nasul. Dacă încăras o sfato anda Evrei 6:11, 12, daisaras te încăras zurali amari speranța „ji co sfârșito”. O Iehova alosardea deja iech ghies hai iech ora cana va chosela cu sea o sistemo le Satanosco. Cana va avela codo timpo, o Iehova va pherela sea le profeții cai phendea-le anda i lumea nevi. Poiechdata, daisaras te pachias că o sfârșito cadale sistemosco ci si cadea de pașă. Tha, o ciacimos si că o ghies le Iehovasco „ci va arăsăla târzio”. (Hab. 2:3) Cadea că, camas anda sea o ilo ‘te așias uștiade ando timpo so ajucăras le Iehovas’ hai te sicavas că ‘ajucăras pherde răbdarea le Devles, cai salvil-ame’! (Mica 7:7) w23.02 19 ¶15, 16

Cana jias te phiras pe iech plain, amen camas te arăsas ji opre. Cu sea cadala, po drom așias po than butivar caște dichas le șucar thana cai si pașa amende. Sa cadea, si zurales importanto te așias po than mai butivar hai te gândisaras-ame sar ajutil-ame o Iehova te jial amenghe mișto vi cana nachas prin pharimata. Cana nachel fiesavo ghies, te pușias-ame: „Sar dichlem aghies o vast le Iehovasco? Chiar cana o zumaimos ci nachlea, sar ajutil-ma o Iehova te așiav zuralo hai te jiav angle?”. Rode te diches măcar iech miștimos catar o Iehova cai ajutisardea-tu te jial tuche mișto. Dacă naches prin iech zumaimos, daștil-pe că manghes-tu ca codo te nachel. (Filip. 4:6) Tha na bâstăr le miștimata cai si tut aghies. Încăr ande chi goghi că o Iehova promitisardea că va zuriarela-tu hai că va ajutila-tu te jias angle. Dich sea o timpo cuci o vast cai del-les tuche o Iehova. Cadea, va avela te diches sar o Iehova ajutil-tu te jial tuche mișto vi cana naches prin pharimata. (Gen. 41:51, 52) w23.01 19 ¶17, 18

Puș tut: „Sicavel o modo sar traisarav mânri viața că hachiarav chichi de pașă si o sfârșito cadala lumeaco nasul? Sicaven le alosarimata cai cherav-le ande soste priveal o sicaimos laico sau i buchi că i închinarea co Iehova si po iechto than ande mânri viața? Si man pachiamos că o Iehova va lela sama mandar hai mânra familiatar? Te gândisaras-ame chichi de but bariol o ilo le Iehovasco cana dichel că amen das sea amari zor te traisaras amari viața cadea sar camel vo! (Mat. 6:25-27, 33; Filip. 4:12, 13) Amen trebul te rodas te dichas sea o timpo sar si amaro modo gândimasco, hai pala codoia te cheras le paruimata cai trebun. O Pavel phendea caring le corinteni: „Dichen sea o timpo dacă san ando pachiamos, sicaven sea o timpo so san tumen”. (2 Cor. 13:5) Cadea că, amen trebul te neviaras amari goghi sea o timpo. Daisaras te cheras cadaia cana citisaras o Cuvânto le Devlesco, cana sichioas te gândisaras sar Vo hai cana cheras sea so daisaras caște bucurisaras lesco ilo. (1 Cor. 2:14-16) w23.01 9 ¶5, 6