Ngond wa 3

Tutangin mu Bibil piur pa antu atentamina ikala akad kutentam. Chilakej Mwant Salomon. Ading amufumbin nawamp mu jinjil ja Nzamb ni wading ni yiyukish yivud ya Yehova, pakwez wakarumuka ni wifukwila anzamb a makasu. Chinech chamujimesha Yehova nakash ni muchid wawonsu wa Isarel wamana mar mu yitot ya mivu mulong wa yitil ya Salomon. Chakin kamu, Mifund yilondin anch Salomon “walala ku malal nau atatukwend,” kuwejinaku Mwant David ikundj ushinshamena. (1 Ant 11:5-9, 43; 2 Ant 23:13) Ov, mutapu wamujikau muntu wafil kal umekeshina anch ukuvumbuk? Bibil kalejenap patok mulong winou. Divumbuk chid chipan cha rukat chidokila kud Nzamb. Ukat kupan kud antu amenay anch akutwish kumusadin chikupu. (Job 14:13, 14; Yoh. 6:44) Ov, Salomon ukutambul chipan chinech? Yehova ndiy wija chakul, etu twijap. Pakwez twij anch Yehova ukusal yom yida yiwamp. w24.05 4 par. 9

Chisu tukata kwikal mu urund wa piswimp ni Yehova, tukat kwikal angendj mu mwinkand wend wa chifanakesh. Tukat kusanger yakuda ya mu spiritu yivud ni urund wa piswimp ni antu akwau ada niyau angendj a Yehova. Mwinkand wend wa chifanakesh udap kwau ching pa ndond yimwing. Mwinkand wa Yehova ud kwi ndond kwawonsu kudau atushalapol end ashinshamena. (Kuj. 21:3) Chid nchik piur pa atushalapol end ashinshamena afila kal? Ov, tukwet mayingishin ma kulond anch niyau adandamedin kwikal angendj mu mwinkand wend? Inge! Mulong wak? Mulong ad aom mu manangu mend. Yesu walonda anch: ‘afu akat kuvumbuk kwikal aom. Pafunday rusangu ra kasu ku yifukis yakad kutem, Moses wamujimbula Yehova anch: ‘Nzamb wa Aburaham, Nzamb wa Izak, Nzamb wa Yakob.’ Ndiy kadap Nzamb wa afu, pakwez ud Nzamb wa aom, mulong kud ndiy awonsu ad aom.’​—Luka 20:37, 38. w24.06 3 par. 6-7

Sadok waya ku Heburonni mat ni wading wirijekin mulong wa kurish. (1 Jsng. 12:38) Kidjidjekap kumulondul David kwi njit mulong wa kuyirishikish akankuny a in Isarel. Sadok kadingap ni ukaliweny wa kurish njit, pakwez wasala mwamu mulong wading utakamen nakash. Kwisu kwatanay mwin kupesh Sadok kutakaman mud kwinoku? Ading amunyingumukin kud amakundj a usu ni atakamena. Chakin kamu wilejina ku chilakej chau. Chilakej, mulong David “wayitakela ni kuyitwal in Isarel” nich kutakaman pakad wom, in Isarel awonsu akata kumudish want. (1 Jsng. 11:1, 2) David wamuchingejina Yehova chisu chawonsu mulong wa kumukwash pantaliken nau akankuny end. (Kus. 138:3) Sadok wikala kand nich kutakaman kusutin amakundj adingay nend​—mud Jehojada ni mwanend mwin kurish njit Benaja ni antakel akwau 22 a michid ibomba ku mutambu wa David.​—1 Jsng. 11:22-25; 12:26-28. w24.07 3 par. 5-6

Saul wa ku Tarisis wading mwin kuyizengol in kwilej a Yesu muyimp nakash. In Kristu avud amana pamwing ap anch kakezap ap pakemp kukarumuk. Pakwez, chinyim ni manang ma wuntu, Yesu wading wij anch Paul wafanyina kuswimp ni kukarumuk. Ndiy ni Tatukwend amana mikadil yiwamp muday Saul. Yesu walonda anch: “Am namutond kal ndiy.” (Mid. 9:15) Yesu washikena ni ku kusal chilay mulong wa kumukwash Paul kukarumuk. (Mid. 7:58–8:3; 9:1-9, 17-20) Kupwa kwa kwikal mwin Kristu, Saul wijikana kwikal kambuy Paul, wamekesha yisu yivud kujikitish kwend piur pa mutapu wamumekeshinau kuwap ni riy kud Yehova ni Yesu. (1 Tim. 1:12-15) Pateshay Paul piur pa mwikadil wa masandj ukwatishena usany wading mu chikumangen cha ku Korint, mutapu ik wapwishay mulong winou? Kusutin yom yalonday, tukutwish kwilej mutapu umekeshiningay Yehova rukat pakatay kuyipup atushalapol end nich ranaken ni kuyovil riy anch akarumuk, ni mutapu tukutwisha kumwimburij. Tukwisambin yom yiney chikurikina mu mutu wa mulong wambakedinap. w24.08 13 par. 15-16

Mu yitot ya mivu, pakemp pakemp, Yehova wamekesha patok mutapu ukutwishau antu akayitil kumusejin piswimp. Abel, mwan wa kaad wa Adam ni Ev, wading muntu wa kusambish kwikal ni ritiy muday Yehova kupwa kwa wintombwij wasadika mu chir cha Eden. Mulong Abel wading umukatin Yehova ni wading ukatin kumusangaresh ni kumusejin piswimp, wapana yakupesh. Abel wading kafung, chawiy wasenda amisamb a amikoku end amwing, wayijip ni wayilambul kud Yehova. Mutapu ik wakulay Yehova? “Wasangara mulong wa Abel ni mulambu wend wapanay.” (Dis. 4:4) Yehova wasangera kand yakupesh ya mutapu winou yapeshau antu ading amukatina ni amuchingejidina​—mud Now. (Dis. 8:20, 21) Kusutin kwitiy yakupesh mud yiney, Yehova wamekesha anch antu akayitil akutwish kwikal ni dilau dend ni kumusejin piswimp. w24.08 3 par. 5-6

Tukutwish kwiyov nayimp nakash ni kunenganan mulong wa kuburen kutentam. (Mul. 7:7) Atushalapol ashinshamena, mud Job ni Abakuk ni awiy iyova mu mutapu winou. (Job 6:2, 3; Aba 1:1-3) Chiyipinap kwau kwiyov mwamu pakwez tufanyidin kubabel yom tukusala chakwel kangal twasal yom ya usup. Kusal mwamu kukutwish kuyipish yom nakash. Anch antu ayimp ameken mud kayipupinap, tukutwish kusambish kuman mud chidap kwau cha usey kusal yom yiwamp. Kashalapol umwing wa Yehova wamana anch antu awamp ading akat kuman mar pakwez antu ayimp ading ameken mud akwet musangar. Walonda anch: “Mwamu mudiau antu ayimp, ashich nawamp machuku mawonsu.” (Kus. 73:12) Wajimana nakash mulong wa kuburen kutentam ni watonga anch chadingap kwau cha usey kumusadin Yehova. Walonda anch: “Napakisha kutong pa yom yiney ap anch yirumburikinap nchik, pakwez chadi chom chikash kudi am.”​—Kus. 73:14, 16. w24.11 3 par. 5-7

Tukat kumutumbish Yehova mulong tumulimishin chikurikina. Tukwet kamu mayingishin mavud ma kumulimishin. Yehova ud Nzamb wa dikand dawonsu; kakatap kuziy ap pakemp. (Kus. 96:4-7) Manang mend makat kumeken mu yom yasalay. Ndiy uda Musul wa mwom wetu ni Ndiy kand ukata kuulam. (Kuj. 4:11) Ushinshamen. (Kuj. 15:4) Yom yawonsu yikatay kusal yikat kurumburik, ni ukat kuwanyish chisu chawonsu kushilamu kwend. (Jos. 23:14) Yawiy yalondinay muprofet Yeremiy piur pa Yehova anch: “Kwikil mukwau udia mudi ey pakach pa in mangand awonsu a michid, ap pakach pa ant au”! (Jer. 10:6, 7) Chakin kamu, tukwet mayingishin mavud ma kumulimishin Tatukwetu uda mwiur. Pakwez Yehova kadap kwend ching Nzamb uwanyidina kutambul kalimish ketu. Tukat kumutumbish Yehova mulong tumukatin nakash. w25.01 3 par. 5-6

Akankuny a Nzamb akat kusal usu wa kuyipish yom yiwamp yisadina dirijek da Yehova. Chilakej, Bibil utulejin anch Yehova ukatin anch tushala ishitwila ku mujimbu, mu yisal, ni kumwifukwil ndiy mu mutapu ukatinay. Ulondin anch muntu mwawonsu wakad kukarumuk chifanyidin kumudosh mu chikumangen. (1 Kor. 5:11-12; 6:9, 10) Tukat kuziyin ku yom yilondinay Bibil. Pakwez akankuny netu akat kupakish kusadin makasu anch tuyikatinap antu mulong tukat kuyidosh antu akad kukarumuk mu chikumangen ni tukuyovilangap riy. Tufanyidin kujingunin antu inay akata kuturishikish. Satan Djabul ukat kupalangesh makasu piur pa dirijek. Ud kamu ‘tatuku wa makasu.’ (Yoh. 8:44; Dis. 3:1-5) Chawiy tufanyidin kuchingej anch Satan ukusadin antu end mulong wa kupalangesh nsangu ja makasu piur pa dirijek da Yehova. w24.04 10-11 par. 13-14

Ap kurutu kwa mar makash kusambish, chikuyiswapel antu amwing akumana disheshik da “Babilon mujim” kuvurik yom yalejanangau atuman a Yehova anch yikushiken. Ov, antu amwing akumana yinship yiney akutwish kutek ritiy muday Yehova? (Kuj. 17:5) Anch yashiken, yikwikal mud yom yasadikang mu Idjibit pa chirung cha Moses. Vurik anch “yisak ya mitapu ni mitapu yaya nau” in Isarel pabudikau mu Idjibit. Antu amwing asambisha kukudish ritiy muday Yehova pamanau anch kubabesh kwa Moses piur pa yilay Dikum kwawanyina. (Kub. 12:38) Anch yom ya mutapu winou yashiken kupwa kwa Babilon Mujim kusheshik, Ov, tukwiyov nayimp mulong antu ez kal kwimbomb netu mu kachisu kakemp kashala kal kurutu disuden deza? Bwat kamu! Tukatin kwimburij wuntu wa Tatukwetu wa mwiur, “Nzamb wa ranaken ni mwin riy, wakad kwovang ujim swa, wizwila sens nich rukat ni uyakin.”​—Kub. 34:6. w24.05 11 par. 12-13

Yom ik yikutushikena anch twalik kulam ‘chilakej cha mazu mawamp’? Shinshikin chilakej ech: Mu mivu chitot ya kusambish, chimeken anch rusang ra makasu rapalangana pakach pa in Kristu anch dichuku da Yehova dading dashikin kal. Chimeken anch kwading mukand watongau antu anch aufunda kud kambuy Paul, ni mukand winou wawiy walonda yom yiney. Pakad kwitekin chisu cha kushinshikin uman, in Kristu amwing a ku Tesalonik itiyija makasu minam ni kumapalangesh. Kafanyinap kuyidimb anch avurika yom yayifundishau kud Paul chisu chadingay nau pamwing. (2 Tes. 2:1-5) Paul wayiyula akadivar nend kulik kwitiyij chom chin chawonsu chiteshinau. Ni mulong wa kuyikwash mu machuku ma kurutu, Paul wapwisha mukand wend wa kaad kud in Tesalonik nich mazu malondina anch: “Yam Paul, nifundila kulangwish kwinoku nich chikas cham. Chinech chawiy chijingidij cha mikand yamam yawonsu, mutapu unikata kufund.”​—2 Tes. 3:17. w24.07 12 par. 13-14

In Kristu a mu Yudeya ading afanyidin kujijamen yikokujol yapaka ritiy rau chisu chayipa yom mwi ngand yau. Ap anch amwing pakach pau arisha ni rupompat rikash, akwau itiya uyakin pa chisu cha chisambu. Kambuy Paul walonda anch ap anch ajijamena yom yiney yapaka ritiy rau, ading kandikal arishap ni yikokujol mud yarishay nich Yesu charumburik anch kushik mu chilik cha kufa. (Heb. 12:4) In Yuda avud ajimana ni ikala ni chisum mulong antu avud ikala in Kristu. Muvu umwing kurutu . In Yuda 40 ni kusut ‘achipa anch kakudap ap kuna chom ap chimwing anch kamujipinap Paul.’ (Mid. 22:22; 23:12-14) Ap anch afanyina kuyikis ni kuyizengol, in Kristu afanyina kudandamen kukumangan, kulejan rusang ruwamp ni kulam ritiy rau. w24.09 12 par. 15

Yohan wading kambuy ukatinay Yesu Kristu nakash. (Mat. 10:2) Yohan wasutisha chisu chivud nakash pamwing ni Yesu mu mudimu wa kulejan ni wimenap amwinend mutapu wasalangay Yesu yilay. Washala ushinshamena kud Yesu. Wamana mutapu wamujipau Yesu ni kupwa wamumana kand pavumbukay. Wamana kand mutapu wading uyila chikumangen cha win Kristu mu kujimb. Yohan washakama mivu yivud ni wamana mutapu wapalangana rusang ruwamp kud ‘antu a mangand mawonsu.’ (Kol. 1:23) Piswimp ni kwinsuden kwa mwom wend, Yohan wikala ni dilau da kufund buku wa Kujingunik. (Kuj. 1:1) Yohan wafunda kand Evanjil ukweta dijin dend. Wafunda kand mikand yikwau yisatu. Mukand wend wa kasatu wamufundinau Gayus Mwin Kristu ushinshamena wading umenay Yohan mud mwanend wa mu spiritu. (3 Yoh. 1) Yom yafunday ipal winou ushinshamena yikat kuyikasikesh in kwilej a Yesu djat kamu ni nlel. w24.11 12 par. 15-16

Ngatan umukatina mukajend ukat kumubangin nakash. Ukat kumuman mukajend mud chipan chiwamp chidokila kud Yehova. (Jnsw. 18:22; 31:10) Mud chibudikin, ukat kumusadin mu mutapu uwamp ni wa kalimish, ap pa chisu cha kulalijan. Kafanyidinap kumushindin mukajend kusal yom yakaday kukat ni yikutwisha kurumbangesh kom kend chisu chilalijadinau. ufanyidin kand kudandamen kulam kom kada zwang ku mes ma Yehova. (Mid. 24:16) Angatan, ikalany ni kashinsh anch Yehova umen ni usangaredin usu usadinanya mulong wa kuyilimish akajen mu yom yawonsu. Kwat mupak wa kumulimish mukajey kusutin kwipuk mwikadil wawonsu wakad kumulimish. Ikal muntu muwamp, mwin kalimish ni mwin kumumekeshin mukwau rukat. Anch wasal mwamu, ukumekesh anch umukatin mukajey ni umukwatin ni usey. Anch wamulimish mukajey, ukulam urund wey wa usey nakash, charumburik anch urund wey ni Yehova.​—Kus. 25:14. w25.01 13 par. 17-18

Chom chimwing chikata kuyikadish atushalapol a Yehova ashalijadina nau antu akwau afiling mukan anch ad in Kristu, ud mushiku wau mu mudimu wa kulejan. Yom ik yikutwisha kutukwash kulam ap kupandakesh mushiku wetu ni kudandamen kulejan? Tukutwish kwilej mutapu wa kwikal ni mushiku mu mudimu wa kulejan kusutin kushinshikin chilakej cha Yesu. Padingay pa divu, Yesu kimikap mudimu wa kulejan ap kapamp kamwing. Pakwez dichuku dawonsu dasutang, wapandakeshang mushiku wend mu mudimu wa kulejan. Mud mwin kulam chir wasutisha mivu yisatu mu kukun mutond wa nfung walika kubudish mabuj, Yesu wasutisha piswimp mivu yisatu mu kulejan rusang ruwamp kud in Yuda, pakwez avud kikalap in kwilej end. Mud mwalikay kalam wa chir kuziy ap kushadish ruchingej anch mutond ukusongap mabuj, Yesu niyend kaziyap ap kukepish mushiku mu mudimu wend. (Luka 13:6-9) Kwilej yom yafundishay ni kwimburij yom yasalay kukutukwash kulam mushiku. w25.03 14-15 par. 1-4

Chikwikal nchik anch watong anch muntu kanang ukwikal mbay wa uruw muwamp? Ov, ukutwish kulond kamu kapamp kamwing anch ndiy ukusangareshina? Bibil ulondin anch Muntu mwawonsu wa manangu ukat kusal ni ronganyin kurutu kwa kukwat mupak. Chawiy ufanyidin kwikal ni manang ma kumushinshikin muntu ku ujindj kurutu umekesha anch ukusangareshin. Mutapu ik ukutwisha kumushinshikin muntu ku ujindj? Ku yikumangan ap ku jindond jikwau, ukutwish kuman yom piur pa mwikadil wend wa mu spiritu, wuntu wend ni yisal yend. Anany arund nend, yom ik yikatay kwisambin? (Luka 6:45) Ov, ntong jend jikwatijadin ni jeyey? Ukutwish kwambamb nau amakurump a chikumangen chend ap mwin Kristu uswila umwija nawamp. (Jnsw. 20:18) Ukutwish kwipul piur pa yisal yend ni mikadil yend. (Rut 2:11) Chisu umushinshikidina muntu ikal nich kashinsh anch usadinap chom chikutwisha kumovish nayimp. Limish yovil yend, yom yimutadina, ni kumulimish. w24.05 22 par. 7-8

Amakurump kafanyidinap kulond kapamp kamwing anch muntu wasalang chitil kakukarumukap. Antu amwing akutwish kukarumuk kapamp ka kusambish katanijadinau ni komite wa amakurump, pakwez akwau akwet kuswir kwa chisu chilemp. Chawiy amakurump akutwish kwirijek mulong wa kutanijan kand ni muntu wasalang chitil tupamp tuvud. Pamwing ap kupwa kwa kutanijan kapamp ka kusambish, mwin Kristu warumbukang ukutwish kusambish kutongijokin chikurikina piur pa yom yalondangay. Ukutwish pamwing ap kumusejin Yehova mu malembil nich kwikepish ni kumwit dilikishin. (Kus. 38:18) Mwamu, pakutanijanau nend kapamp kakwau, muntu wasadina chitil ukutwish kwikal ni yitongijok yindj yishalijadina ni yadingay nich patanijanangau kapamp ka kusambish. Mulong wa kumukwash muntu wasalang chitil chakwel akarumuka, amakurump akat kwitek pa ndond yend ni kwikal antu awamp. Akat kumulembil Yehova chakwel ayukisha usu wau ni kuchingej anch mukadivar nau wasadina chitil ukuchirish manang ni kukarumuk.​—2 Tim. 2:25, 26. w24.08 22-23 par. 12-13

Yehova kakatinap anch muntu ap umwing asheshikUkatin anch antu asadina yitil achakul ni ndiy. (2 Kor. 5:20) Dawiy diyingishin dasalang anch Yehova ayibabesh antwend apumbukang tupamp ni tupamp chakwel akarumuka ni kuchirik kud ndiy. Amakurump a chikumangen akwet dilau da kwikal ambay a mudimu a Yehova chisu chisadinau usu wa kuyikwash antu akata kusal yitil chakwel akarumuka. (Rom 2:4; 1 Kor. 3:9) Tongin musangar ukata kwikal mwiur anch antu akarumuk ku yitil yau! Tatukwetu wa mwiur Yehova ukat kusangar nakash chisu chawonsu chikatay mukoku wend washadika kuchirik mu chikumangen. Rukat retu mulong wa Yehova ridandamen kukul patutongijokidina pa ranaken rend rijim ni riy rend.​—Luka 1:78. w24.08 31 par. 16-17

Anch Yesu witiya kwikal mwant, wafanyina kwiyandjik mu milong ya politik ya in Yuda ading atakedinau kud in Rom. Ov, mwawiy mwasalay? Bwat. Bibil ulondin anch Yesu ‘wachirika ku mukandu amwinend.’ Chawiy chikalap nchik yibachikin ya antu akwau, kiyandjikap mu milong ya politik. Dilejan diwamp mud ik kud etu! Chakin kamu, antu kakutwishap kutwit kuyinkish yakuda mu chilay, kuyok ayej ap kwikal nyikel wa ngand. Pakwez akutwish kutubachik kuvot ap kumukwash muntu kampand umenau anch ukutwish kwikal nyikel muwamp. Pakwez, chilakej cha Yesu choviken nawamp. Walika kwiyandjik mu milong ya politik, ni kupwa walonda anch: ‘Want wam udap wa mangand minam.’ (Yoh. 17:14; 18:36) Mulong tud in Kristu, tufanyidin kutong mud Yesu ni kwimburij chilakej chend. Mud ndiy tukat kukwash Want wa Nzamb, kuyilej antu akwau piur pa Want winou ni kulembil chakwel weza.​—Mat. 6:10. w24.12 4 par. 5-6

Chisu wilejina, kimb mitapu ya kusadin yom wilejina. Chilakej, imburij kutentam kwa Yehova kusutin kuyisadin antu akwau pakad kasolikany. Imburij rukat radingay nich Yesu mulong wa Tatukwend kusutin kwitiyin kuman mar mulong wa dijin da Yehova ni kusutin kwipan mulong wa ambay ney in Kristu. Chikwau kand, mwimburija Yesu kusutin kulejan kud antu akwau chakwel niyau ikal ni mutapu wa kwitiy difut, chipan cha usey nakash cha Yehova. Anch twov kurumburik kwa difut ni twadisanger, tukumukat kand Yehova ni Mwanend nakash. Mud chibudikin, niyau akutukat kand nakash. (Yak. 4:8) Komb tusadinany amboku yom yitwinkishinay Yehova mulong wa kudandamen kwilej piur pa difut. w25.01 25 par. 16-17

Mufund wa nlel akutwish kand kuukarumun anch: Ey ukat kudjibul yitil yam yawonsu kwi nyim kwey. Mazu minam mamekeshina anch Yehova ukat kudjibul yitil ya antu akarumukina ni kakatap kand kuyivurik. Verse winou akutwish kumukarumun kand anch: “Ey wasala anch [yitil yam] yikal mud yadingapaku kwau.” Bibil ukasikeshidin pa chitongijok chinech pasadidinay dizu dikwua dida mu Mike 7:18, 19. Mu maverse minam Yehova ulondin anch ukat kudjibul yitil yetu mu difut dikurikina da karung. Pakur, chading chikasiken nakash kud muntu kunon chom chadjibwilangau mu difut dikurikina da karung. Kusutin mazu minam, twilej kal anch, ang Yehova watulikishin, ukat kudosh chisend cha yitil yetu. Chakin kamu, mud mwalonday David “ayuk kwau antu alikishidinau kal yisal yau yiyimp ni abwikidinau kal yitil yau.” (Rom 4:7) Dawiy dined dilikishin dakin! w25.02 9 par. 7-8

Kud paradis wa chifanakesh nlel unou pa divu wizwila ni antu akwatikena mu kusal yom yiwamp. Wizwil too ni ma miliyon ma antu akweta musangar ni chisambu. Antu ada mu paradis winou akwatin kal mupak wa kulik kudokalamu. Akatin kand anch antu avud ibomba nau mu ditenchik dined da pakampwil. Ditenchik ik dined? Paradis wa mu spiritu! Mu mutapu ushimokishena, Yehova watanga ndond ya chifanakesh mushichau antu end mu chisambu ni mu uumwing ap anch ashich mu mangand mayimp ma Satan ni ma ubaj muda antu akisijadina umwing ni mukwau. (1 Yoh. 5:19; Kuj. 12:12) Nzamb wetu wa rukat umen ubaj mu mangand minam ni ukat kusal anch atushalapol end iyova anch ad mu diking ni adandamen kumusadin ni musangar. Dizu Dend dirumburil paradis wa muspiritu mud “ndond ya kwikangil” ni “chir chidiminau ku mem.” (Isay 4:6; 58:11) Antu ashicha mu paradis winou akat kwiyov anch ad mu chisambu ni mu diking.​—Isay 54:14; 2 Tim. 3:1. w24.04 20 par. 1-2

Chakin kamu, mulong wa kutan mbay wa uruw mud mu usotina ufanyidin kulembil. Chakin kamu, Yehova kakatap kumutondin muntu mbay wa uruw. Pakwez ukat kubangin pa maswir ni yovil ni ukutwish kukukwash mutapu wa kutan mbay wa uruw. Chawiy dandamen kumulej maku ni yovil yey. (Kus. 62:8) Lembil mulong wa kwikal nich manangu ni kushimpish muchim. (Yak. 1:5) Ap anch utaninap mbay wa uruw muwamp kapamp kamwing, Yehova ushidinamu kudandamen kubangin maswir mey ma ku mujimbu ni mu manangu. (Kus. 55:22) Ufanyidin kubabal: Kangal walikidil kukimb mbay ney wa uruw chikala chom cha usey nakash mu mwom wey. (Filip 1:10) Kwikal ni musangar wakin kadap anch ching ud mu uruw ap mu ujich, Pakwez ukat kudokal ku urund wey ni Yehova. (Mat. 5:3) Ni pa chisu uda mujich, ukutwish kwikal ni want ipey wa kutanduril mudimu wey. (1 Kor. 7:32, 33) Sal usu wa kusadin chisu chinech nawamp. w24.05 21 par.  4; 22 par. 6

Kwendijadin kufanyidin kwikal ni kulep ik? Chawiy kwendijadin kwen kufanyidin kwikal kulemp kushik ni mu chilik cha kwijikijan. (Jnsw. 21:5) Pakwez, anch watondijanany ufanyidinanyap kusutish chisu chilemp pakad diyingishin da usey. Bibil ulondin anch: “Ruchingej ra kulab labe rikat kuyedish muchim.” (Jnsw. 13:12) Yom ik yikutwishau antu akwau kusal piur pa antu endijadidina? Tufanyidin kuyitazuk mulong wa kuda nau pamwing, ku difukwil da mu dijuku, ap mulong wa kwipuwangej nau. (Rom 12:13) Ov, akwet kuswir kwa kashindikij, ukwash wa transport, ap ndond yifanyidinau kwisambin yom ya ujindj? Anch chid mwamu, Ov, ukutwish kwipan mulong wa kuyikwash? (Gal. 6:10) Anch antu endijadina akwit kuyishindikijaku, ov, umenap anch didi dilau mulong wa kuyikwash? Ikal ni nkeu kangal kuyisha ayinau, pakwez ufanyidin kujingunin chisu chikwetau kuswir kwa kwisamb yom ya ujindj. w24.05 30 par. 13-14

Amakurump akat kusal usu wa kwijik yom yamushikijang muntu kusal chitil. Chilakej, ov, mwin Kristu wasalang chitil wading wasambishin kal pakemp pakemp kudiul dilejan da pakampwil ap mudimu wa kulejan? Ov, wading kwend kumulembilang Yehova pa chipatu ap piur piur kwau? Ov, walikididin maku mayimp chakwel mamutakela? Ov, watondin arund ayimp ap kwipuwangej kuyimp? Kutond kwinoku kwikadin ni usu ik pa yitongijok ni yovil yend? Ov, wij mutapu mipak ni yisal yend yamusadina nayimp Tatukwend Yehova? Amakurump akutwish kumwipul muntu yipul yikutwisha kumukwash kutongijokin pa yom yaziyishina urund wend ni Yehova ni kumushikij ku kusal chitil, akutwish kusal mwamu mu mutapu uwamp pakad kumwipul piur pa yom ya mwom wend wa pakampwil yakadau amakurump kuswir kwa kwijik. (Jnsw. 20:5) Chikwau kand, akutwish kusadin yilakej mulong wa kumukwash muntu kutongijok ni kuman uyimp wa yisal yend, mud mwasalay Natan kud David. Pamwing ap kapamp ka kusambish kakutanijanau nend, muntu ukusambish kwov ushon piur pa mupak wakwatinay ni piur pa yitongijok yend. Ukutwish pamwing ap kukarumuk. w24.08 22 par. 9-11

Yesu walejanang “rusang ruwamp ra Want wa Nzamb” nich mushiku, mulong wading wij anch wawiy mudimu wading ukatinay Nzamb anch asal. Kud Yesu, kulejan rusang ruwamp wawiy mudimu wading wa usey nakash. Ap mu angond akemp a kwinsuden kwa mudimu wend, wendangana “mu misumb ni mu mal,” mulong wa kuyilej antu. (Luka 13:22) Wayifumba kand in kwilej akwau mulong wa kulejan nau pamwing. (Luka 10:1) Nlel kand, Yehova ni Mwanend atuchingejidin anch tutek mudimu wa kulejan pa ndond ya kusambish. (Mat. 24:14; 28:19, 20) Tukutwish kupandakesh mushiku wetu mu mudimu wa kulejan kusutin kuyiman antu mud muyimenau kud Yehova. Ukatin anch antu avud atesha rusang ruwamp ni kuritiy. (1 Tim. 2:3, 4) Mulong rusang ruwamp rikutwish kupandish mwom ya antu. Ap anch antu kitiyinap uruu wetu nlel, akutwish kuwitiy kurutu kwa mar makash kushik. w25.03 15-16 par. 5-7

Mwin Kristu mwawonsu ufanyidin kusadin kom kend kafumbinau kud Bibil. Amwing akutwish kuman anch akutwish kwau kumwinkish muntu mud winou moy ap kumwezishaku ku chikumangan. Ap mwamu, tufanyidinap kwambamb chisu chilemp ni muntu winou ap kusutish nend chisu mu kusal yom yikwau. Antu amwing akutwish kwiyipul anch, ‘Ov, Bibil ulondin anch mwin Kristu umwinkishina muntu wa mutapu winou moy unungin chikas ku yisal yend yiyimp?’ ( 2 Yoh. 9, 11) Maverse mada kwiur ni kwinshin kwa 2 Yohan 9-11 mamekeshin anch umutakel winou wisambidin piur pa in kupumbuk ni antu ayikasikeshina akwau kusal yom yiyimp. (Kuj. 2:20) Chawiy, anch muntu ukasikeshin mafundish ma in kupumbuk ap yisal yikwau yiyimp, amakurump kafanyidinap kuya kumutal. Pakwez, tukutwish kwikal nich ruchingej anch dichuku dimwing ukutwish kuchirish manang. Chawiy, tufanyidinap kumwinkish muntu wa mutapu winou moy ap kumutazuk ku chikumangan, kwij anch wez wakarumuk. w24.08 30-31 par. 14-15

Papwishay Yesu kudish chisak cha antu, wayileja atwimbuy end kudokal kwinikwa ni kuchirik ku Kapernaum mu waat ni ndiy wachirika ku mukandu mulong wa kuyichin antu akimba kumudish want. (Yoh. 6:16-20) Pading paukinau atwimbuy, kweza rinkind mukash ni waleta mambek. Kupwa Yesu weza kud awiy, ukat kwend pa mem. Ni wamuleja kambuy Pita kwendin pa mem mud ndiy. (Mat. 14:22-31) Pandamay Yesu mu waat, rinkind wanineta. In kwilej ashimwoka nakash ni alonda anch: “Chakin kamu ey ud Mwan a Nzamb.” (Mat. 14:33) Chishimwokishin pa kuman anch in kwilej alonda yom yiney kupwa kwa Yesu kwendin pa mem, pakwez kadap kupwa kwa kuvudish mikat mu chilay. Marko uwejidinaku anch: “[Atwimbuy] ashimwoka nakash, kwovap kurumburik kwa chilay cha mikat.” (Mar. 6:50-52) In kwilej kajinguninap anch Yehova wamwinkisha Yesu usu wa kusal yom yivud kusutamu kuvudish mikat. w24.12 5 par. 7

Tukutwisha kumekesh kujikitish kwetu mulong wa rukat ra Yehova, kuusadin chirung chinech cha Chivurikish mulong wa kumekesh kujikitish kwetu mulong wa difut. Kudoshaku kwirijek mulong wa kwikalaku ku Chivurikish, tukutwish kand kuyitazuk antu akwau chakwel niyau akumangan ku chinship chinech. Yirumburila antu utazukina yom yikusadika ku Chivurikish. Ukutwish kusal mwamu kusutin kuyilej mavideo mada pa jw.org mud, Mulong wak Yesu Wafa? ni Kuvurik Rufu ra Yesu. Amakurump afanyidin kuyitazuk antu alikinap kal kusal mudimu wa kulejan ni kukumangan. Tongin musangar ukwikala mwiur ni pansh anch amikoku amwing a Yehova ashadikina kal achirik mu ditang dend! (Luka 15:4-7) Ku Chivurikish, tufanyidinap kwetu ching kusal usu wa kulangwishijan amwing ni akwau pakwez pakampwil kuyilangwish antu asu ni antu alikinap kal kukumangan mu machuku mavud. Tufanyidin kuyezishaku nich musangar!​—Rom 12:13. w25.01 29 par. 15

Difut ditukwashin kuman kutentam kwa Yehova, pakwez ditukwashin kand pakampwil kuman kujimb kwa rukat rend. (Yoh. 3:16;1 Yoh. 4:9,10) Mafundish ma difut mamekeshin anch Yehova ukatin anch twikal ni mwom wa chikupu, pakwez ukatin kand anch twikal mu dijuku dend. Tong bil: Pasalay Adam chitil, Yehova wamwopata mu dijuku da atushalapol end. Mud chibudikin, etu awonsu twavadikina pol pa dijuku da Nzamb. Pakwez kusutin difut, Yehova ukat kulikishin yitil yetu ni ukuyandjik antu awonsu amekeshina ritiy ni aziyidina mu dijuku dend. Ap katat tukutwish kwikal mu urund uwamp ni Yehova nau ambay netu in Kristu. Chakin kamu, Yehova utukatin nakash!​—Rom 5:10, 11. w25.01 21 par. 6

Chakin kamu witiyin anch difut chid chipan chikweta usey nakash! (2 Kor. 9:15) Ukutwish kwikal mu urund wa piswimp ni Yehova, mulong Yesu wapana mwom wend mulong wetwetu. Ukutwish kand kwikal ni ruchingej ra kushakam chikupu. Tukwet mayingishin mavud ma kumujikitishin Yehova wapana difut mulong utukatin nakash. (Rom 5:8) Mulong wa kutukwash kudandamen kumekesh muchim wa kujikitish ni kulik kuvuramen yom yatusadinau kud Yehova ni Yesu, Yesu watuleja kuvurikang rufu rend muvu ni muvu. (Luka 22:19, 20) Muvu winou, Chivurikish chikusadik Dakanying, 2 Ngond wa 4, 2026. Pakad kwidjidjek etu awonsu twirijekin mulong wa kwikalaku. Tukutaninamu nakash anch pa chirung cha Chivurikish twitekin chisu cha kutongijokin pa yom yatusadidinau kal kud Yehova ni Mwanend. w25.01 20 par. 1-2

Ukutwish kudandamen kwilej piur pa rukat rikwetay Yehova Nzamb ni Kristu Yesu mulong wetwetu anch wadandamen kuritongijokin. Pamwing ap pa chirung chinech cha Chivurikish, ukutwish kutang ni kutongijokinaku Evanjil umwing ap mavud. Kangal watang yom yivud nakash kapamp kamwing. Pakwez yang pakemp pakemp, imanaku, ni kimb mayingishin makwau matubachikina kumukat Yehova ni Yesu. Anch ukwet mivu yivud mu uyakin, ukutwish pamwing ap kwiyipul anch chitwishikin kand kujingunin yom yisu piur pa mitu ya milong yijikena nakash mud kutentam kwa Nzamb, rukat rend ni difut. Uyakin ud anch tukudandamen kujingunin yom yisu piur pa mitu ya milong yiney ni yikwau kand. Tang ni kwilej yom yiwamp nakash yida mu mikand yetu. w25.01 24-25 par. 13-15