Ngond wa 4

Mu usu wa kukwol ukweta mujimbu ni mash ma Yesu, tufanyidin kumekesh ritiy mu difut. (Efes 1:7) Antu atazukay Yesu anch “amikoku akwau” kafanyidinap kuda mukat ni kuna nviny pa chisu cha Yakuda ya Urel ya Mwant. (Yoh. 10:16) Pakwez akat kuda ‘mukat wa mwom’ mu mutapu wa chifanakesh. Akat kusal mwamu kusutin kumekesh ritiy rau mu usu wa kukwol wa yakupesh ya Yesu. (Yoh. 6:53) Chinyim ni antu akat kumekesh anch ad mu mansuk masu ni akwet ruchingej ra kuyikel pamwing ni Yesu mu Want wa mwiur. Chawiy, twikal azizidilau many ap amikoku akwau mulong wa kutambul mwom wa chikupu, tufanyidin kukudish ritiy rikash. w24.12 13 par. 14, 16

Chisu cha Yakuda ya Urel ya Mwant, Yesu wapana mukat wakad chivish kud atwimbuy end, ni wayileja anch mukat winou wading umekeshin mujimbu wend. Kupwa wayinkisha kand rupas ra nviny ni wayileja anch nviny winou wading umekeshin ‘mash ma mansuk.’ (Mar. 14:22-25; Luka 22:20; 1 Kor. 11:24) Mansuk masu wamasala pamwing ni “in Isarel [a mu spiritu]” akwikala “mu Want wa Nzamb,” kadap nau antu awonsu. (Heb. 8:6, 10; 9:15) Mazu malonday Yesu pa chisu cha Yakuda ya Urel ya Mwant mading mayitadil antu ada mu “chisak chikemp.” Chisak chinech chikemp chasambisha nau atwimbuy ashinshamena adingay nend pamwing mu kapalikany pa chisu chinicha. Awiy inay antu akushakama ni Yesu pamwing mwiur. w24.12 11 par. 9-10

Yesu amupana, amukwata, amuswingisha, amudimbena makasu, amufisha nich, ni amuzengola. Amasalay amutwala kwi ndond ya kumujipin ni amupampina pa mutond wa mar. Pading pajijamedinay nich kushinshaman mar minam mawonsu makash, kwading Muntu wading wovila kusansan nakash kupandakan. Muntu winou wading Yehova Nzamb. Wading ukwet usu ni mutapu wa kukangesh mar minam kumushiken Mwanend, pakwez kasalap mwamu. Mulong wak? Mu wiswimp, rid rukat. Chakupesh cha Yesu ud uman upandakena kujimb umekeshina mutapu Yehova utukatinay. Chimekeshin anch Yehova ukukatin ey nakash, nakash kamu,wapana chom cha usey nakash chadingay nich ni wajijamena kusansan kukash mulong wa kukukamunin ey ku chitil ni rufu. (1 Yoh. 4:9, 10) Chakin kamu, ukatin kumukwash umwing ni umwing pakach petu kurish ni chitil ni kuchipandakan! w24.08 6 par. 13-14

Tukujingunin mutapu utukatinay Yehova nakash anch twatongin piur pa mutapu wiyovay pamumanay Mwanend ukat kuman mar. Satan ukat kulond anch kwikil kashalapol wa Yehova ukutwisha kushal ushinshamena anch chamukasiken kusal mwamu. Mulong wa kumekesh anch Satan ud mukamakasu, Yehova wamulika Yesu chakwel amana mar kurutu kwa kufa. (Job 2:1-5) Yehova wading utadin mutapu wamusipangau Yesu kud in kubwambwil a chirelijon, mutapu wamubulau nfimbu kud amasalay ni kumupamp pa mutond wa mar. Kupwa Yehova wading utadin mutapu wafay Mwanend mukatish rufu risansena nakash. (Mat. 27:28-31, 39) Yehova wading ukwet usu wa kukangesh yom yiney yawonsu. (Mat. 27:42, 43) Pakwez, anch Nzamb wasala mwamu, mud ing difut kadifutap ni twafanyina kudandamen kushal pakad ruchingej. Chawiy Yehova wamulika Mwanend aman mar kushik ni pakatwilay mupim. w25.01 22 par. 7

Tud machuku ma ngond 16 Ngond wa Nisan muvu wa 33 C.C. In kwilej a Yesu ading ovil ushon ni wom. Aad pakach pau adokala ku Yerusalem ni aya ku Emaus. Ikundj umwing wayisejina, wasambish kuya nau pamwing. In kwilej inay amurumburila yom yiyimp yamushikena Yesu. Ikundj winou wasambisha kuyilej yom yishimokishena nakash. ‘Kusambishin ku yom yafunday Moses ni Aprofet awonsu,’ wayirumburila mulong wak Mesiya wafanyina kuman mar ni kufa. Pashikau ku Emaus, in kwilej ajingunina anch ikundj winou wading Yesu wavumbulau kud Nzamb! (Luka 24:13-35) Mu machuku 40 ma nsuden masalay pa divu, Yesu wayibudikina in kwilej end tupamp tuvud. Pa chisu chinicha, Yesu wayikasikesha in kwilej end mulong ading ovil ushon ni wom, pakwez asangara nakash ni ikala ni kutakaman kwa kulejan ni kufundish rusang ruwamp ra Want. w24.10 12 par. 1-3

Tukat kupam kumujimbu mu kusut kwa chisu, pakwez kwikil muntu upamining mu spiritu kapamp kamwing. Chilakej, akadivar nau anambaz a ku Korint itiya rusangu ruwamp, ayibatisha, atambula spiritu utumbila ni ileja yom yivud kusutin kambuy Paul. (Mid. 18:8-​11) Pakwez, mivu yikemp kupwa kwa kuyibatish, avud ashala akad kukul. (1 Kor. 3:2) Mulong wa kwikal uswila, tufanyidin kukudish maku ma kukul. Antu “ayisup,” kakatiningap kwau kukul mu spiritu. (Jnsw. 1:22) Tufanyidinap kwikal mud antu apamina kal ku mujimbu pakwez adandamedin kuyikwatin mipak kud anvaj au. Pakwez, tufanyidin kusend chisend chetu ayinetu ni kwikal nich kashinsh anch urund wetu ni Yehova udandamedin. Anch usadin usu wa kukul, mulembila Yehova “chakwel wikalany nich rusot, wikalany kand nich usu wa kusal mudi mudia kutenchik kwend.”​—Filip 2:13. w24.04 4 par. 9-10

Pakatay kuyirumburish antu, Yehova utulejin mutapu ukatay kwiyov. (Ezek. 33:11) Yehova kakutwishap kumushesh muntu chikupu anch kwikil diyingishin dakin da kusal mwamu. Wizul sens nich ranaken, ni ukat kumekesh ranaken chisu chawonsu anch chitiy kusal mwamu.Yom ik twija piur pa antu akulika kuvumbu? Bibil ulejen yilakej yikemp. Yesu walejana anch Yudas Isakariot kakuvumbukap. (Mar. 14:21; tal kand Yoh. 17:12 ni note d’etude.) Yudas wading wij anch yom yisadinay piur pa Yehova ni mwanend yid yiyimp. (Tal Mar. 3:29 ni note d’etude.) Chilik chinging Yesu walond anch antakel amwing a marelijon ading amupompatina anch afang kakwetap ruchingej ra divumbuk. (Mat. 23:33; tal Yoh. 19:11 ni note d’etude “muntu.”) Ni kambuy Paul wakasikesina palonday anch antu akad kukarumuk kakuvumbukap.​—Heb. 6:4-8; 10:29. w24.05 4 par. 10-11

Anch twadandamen kwikal mu urund wa piswimp ni Yehova, Satan kakutwishap kutusal chom chiyimp chikutwisha kutumesh mar chikupu. (1 Yoh. 3:8) Mwi ngand yisu, Yehova ukudandamen kuyichidij atushalapol end ashinshamena ku ubaj wa mu spiritu ni ku rufu. (Kuj. 21:4) Kwikal angendj mu mwinkand wa Yehova did kamu dilau dijim nakash tusangaradin urund wa piswimp ni wa chikupu pamwing ni ndiy. (Ezek. 37:27) Yom ik tufanyidina kusal anch tukatin kudandamen kwikal angendj end? Anch akutazuk kwa muntu, ukukat kusal yom yikutwisha kumusangaresh. Chilik chimwing tukatin kwijik yom yitinay Yehova kud antu akatina kudanadamen kwikal angendj. Mulong tumukatin Yehova, tukat kusal chom chin chawonsu tukutwisha mulong wa ‘kumusangaresh mu yom yawonsu.’ (Kol. 1:10) Tufanyidinap kuvuramen kumulimish chikurukina chisu chawonsu. Kalimish kinak kakutukwash kwipuk ap kulik yaku yikutwisha kumujimesh. Tukatin kamu nakash ‘kwend ni Nzamb wetu nich kwikepish.’​—Mika 6:8. w24.06 4 par. 8-9

Yehova wamwita Aburaham, kumupesh mwanend Izak. Chakin kamu Aburaham wamana anch chinech chading chisend chisansena nakash. Chikalap nchik mwamu, witenchika mulong wa kuchiwanyish. Pakwez Nzamb wamukangesha padingay kamu piswimp ni kusal mwamu. Chawiy, chilakej chinech chifundishin uyakin ujim kud antu awonsu akweta ritiy. Yehova wafanyina kumupan Mwanend mukatish kwa kwikatin kwikal chakupesh. Yehova uyikatin antu nakash. (Dis. 22:1-18) Kupwa kwa yitot ya mivu, Chijil chapanau ku muchid wa Isarel chayita antu a Nzamb kupan yakupesh ya annam mulong wa kuyilikishin yitil yau. (Lev. 4:27-29; 17:11) Yakupesh yiney yading yimekeshin chakupesh chijim chafanyina kuyikwol rawonsu antu ku chitil. Aprofet a Nzamb ayipepila mulong wa kufund piur pa rubut rakanau, arumburila anch Mwan wa pakampwil wa Nzamb afanyina kumumesh mar ni kumujip, mulong wa kuyipandish antu ku chitil ni ku rufu​—kukuwejaku niyey! Isay 53:1-12. w24.08 4 par. 7-8

Chisu ukata kusutish mulong wa kutang Bibil, ikal ni mutapu wa kusadin yom utangina. Chisu utangina verse wa Bibil, iyipula anch, ‘Mutapu ik nikutwisha kusadin yom yiney katat ni mu machuku ma kurutu?’ Chilakej, sal bil mud utangin 1 Tesalonik 5:17, 18. Kupwa kwa kutang maverse miman maad, ukutwish kwiman ni kutongijokin pa tupamp ukata kulembil ni kukurik kwa malembil mey. Chikwau kand, ukutwish kutongijokin pa yom ukutwisha kumujikitishin Nzamb. Pamwing ap ukutwish kukwat mupak wa kumujikitish Yehova piur pa yom yisatu ya pakampwil. Ap anch twasutish kwetu aminit akemp mu kutongijokin pa yom tutangina mu Bibil, yikutwish kutukwash kutesh nawamp Dizu da Nzamb ni kusadin yom yidamu. Ni anch ukat kusadin yom utangina mu Bibil dichuku dawonsu, mu kusut kwa chisu, ukwikal kashalapol muwamp nakash wa Yehova! w24.09 4-5 par. 9-10

Yehova watutanga ni ukaliweny wa pakampwil nakash. Ap anch tukat kwovang musangar anch twatambul chom, tukat kusangar kand nakash anch twayinkish antu akwau. Tukat kwov nawamp anch tukwet mutapu wa kuyikwash ambay netu in Kristu. Ni tukat kusangar anch atujikitish. Chakin kamu, mwin kutambul ajikitish ap bwat, tukutwish kwikal ni musangar mulong twasalang yom yiwamp. Kangal wavuramen anch chom chawonsu ukupana “Nzamb ukwet ya kukwinkish yivud kupadakan yiniya.” (2 Jsng. 25:9) Chawiy, ukutwishap kupan nakash kusutamu yom yikutwishay Yehova kukwinkish! Ni kwikil difut dikutwisha kusutamu dikutwishay kutwinkish. Chawiy komb, el etu awonsu tudandamenany kumwimburij Tatukwetu wa mwiur ukata kupan nich muchim umwing. w24.09 31 par. 20-21

Yehova ud wa riy ni ranaken. (Kus. 103:13; Isay 49:15) Anch twovil ushon, niyend ukat kwov ushon. (Zak. 2:8) Ukat kutukwash kumwijik ni kwikal arunend. (Kus. 25:14; Mid. 17:27) Wikepishin mulong “ukat kutal mes pa yom yidia kwishin, ni kutal yom mudi muyidia mwiur ni pansh. Ukat kulangwish mukemp ku rufunfut.” (Kus. 113:6, 7, TMK.) Mulong wa mayingishin minam mawonsu, tukatin kamu kumutumbish Nzamb wetu mujim.Tukat kumutumbish Yehova mulong tukatin anch antu akwau amwijik. Antu avud kijap uyakin piur pa Yehova. Mulong wak? Mulong Satan wayibwikin kal manang kusutin kupalangesh makasu mavud piur Pend. (2 Kor. 4:4) Satan wayibachikin kal antu kwitiyij anch Yehova ud Nzamb wa ujim nakash, wakad kuyibanginang antu, ni ndiy uda musul wa mar mavud mada pa mangand. Pakwez etu twij uyakin piur pa Nzamb wetu! Tukwet dilau da kuyilej antu akwau chiday kamu chakin ni kuyikwash kumutumbish.​—Isay 43:10. w25.01 3 par. 6-7

Mu mivu chitot ya kusambish, antu amukwashina Satan alonda makasu piur pa muntu utentamina wasala yilay yishimokishena, Yesu Kristu Mwan a Nzamb. Chilakej, antakel a marelijon ayileja antu anch usu wa Yesu wopatay nich ayilembil udokil kud “mwant wa ayilembil.” (Mar. 3:22) Padingay Yesu mu chikokujol, antakel a marelijon amufunda anch wasalana ni ayibachika antu kulond anch amujipa. (Mat. 27:20) Kupwa, palejanau in kwilej a Yesu rusangu ruwamp, antu ading ayipompatina “ayibachika antu a michid yikwau” mulong wa kuyizengol in Kristu. (Mid. 14:2, 19) Kukwatijan ni Midimu 14:2, Chinong cha Kalam cha 1 Ngond wa 12, 1998, charumburila anch: “Antu amukwashina Satan kitiyap uruu walejanau kud in Kristu ni alonda yom yiyimp piur pau chawiy antu a michid kayiteshap kand ni ayikisa.” Nlel Satan udandamedin kand“kuyipumbol antu a mangand mawonsu.” w24.04 11 par. 15-​16

Pakwez, mwom wa chikupu wa machuku ma kurutu wimedinap kwau pa chirung chafay muntu. Yehova ud nkalansambu utentamina​—ukat kukwat mipak yitentamina chisu chawonsu. (Kus. 33:4, 5) Tukutwish kwikal nich kashinsh anch “nkalansambu wa mangand mawonsu” ukusal yom yitentamina. Tukutwish kand kulond anch antu akwikala ni dilau da kushakam chikupu mu machuku ma kurutu yimedinap kwau kwi ndond yishichau. Yehova kakurumburishap mamiliyon ma antu kapamp kamwing kwikal “ampemb” mulong kikalap ni mutapu wa kutesh rusangu ruwamp ra Want mwi ngand yading yishichau. (Mat. 25:46) Nkalansambu utentamina wa mangand mawonsu ukat kuyibangin antu inay mu chilik twakad kutongin. Tukutwishap kwijik yom yikusalay Yehova pa chirung cha mar makash. Pamwing ap antu amwing akwikal ni mutapu wa kwilej piur pa Yehova, kutek ritiy muday ndiy, ni kwikal ku mutambu wend pakutumbishay dijin dend kud antu a michid yawonsu.​—Ezek. 38:16. w24.05 12 par. 14-15

Antu a Yehova akatining kukwashijan umwing ni mukwau. (2 Kor. 8:4) Pakwez, chisu chimwing chitin kwikal atakamena mulong wa kusal mwamu. Chilakej, anch kwashiken njit, amakurump a chikumangen ijing anch akadivar nau anambaz akwet kuswir kwa kuyikasikesh, kuyikwash mu spiritu ap ku mujimbu. Amakurump ayikatining akadivar nau anambaz, yiney yawiy yom yikwetau nich kuswir, ap anch chid cha ubaj kusal mwamu. Pa yisu mud yiney, chikwikal cha usey kushal mu uumwing. Yitin kuziyin kwi mbil jidokila ku mutiy wa mwi ngand yen. (Heb. 13:17) Amakurump afanyidin ushinshikin chisu chawonsu mbil jitadina piur pa kwirijek mulong wa mar madokila ku yom yatangau ni yom yifanyidina kusal anch mar minam mashiken. (1 Kor. 14:33, 40) Ikal utakamena kusutin antu akwau. (Jnsw. 22:3) Kurutu kwa kusal yom ufanyidin kutong. Kangal wiyandjikish mu ubaj. Muchingejina Yehova. Vurik anch Yehova ukubangidin nakash ey ni akadivar ney. Ukutwish kukukwash chakwel uyikwash akadivar ney kwikal mu diking. w24.07 4 par. 8; 5 par. 11

Mwant David wading umwij Yehova ni wamuchingejinang. Pading pamulondwilau kud akankuny nend kuwejaku Mwant Saul, David wamulembila Yehova chakwel amukwash. kupwa kwa kumwakul malembil mend kud Nzamb ni kumwitiy, David walonda anch: “Yehova ud mwom!” (Kus. 18:46) Mu mazu mend, David kasangerap kwend ching kwijik anch Nzamb udaku. Mazu mada mu referans umwing mamekeshin anch David wamuchingejina Yehova “mud Nzamb mwom ukata kuyikwash antu end.” Chakin kamu yom yamushikena David yamwinkisha kashinsh anch Nzamb wend ud mwom, ni kashinsh kinak kamwinkisha kutakaman kwa kumusadin Yehova ni kumutumbish. (Kus. 18:28, 29, 49) Kwikal nich kashinsh anch Yehova ud Nzamb mwom kukutwish kutukwash kumusadin ni mushiku. Tukutwish kwikal nich usu wa kujijamen yikokujol ni kudandamen kusal mudimu wend. Tukutwish kand kukwat mupak wa kushal piswimp ni Yehova. w24.06 20-21 par. 3-4

Yom ik tukutwisha kwilejin ku mazu mayifundinau in Tesalonik kud kambuy Paul? Anch twatesh yom yakad kukwatijan ni yom twilejina mu Bibil ap anch twatesh nsang jitapena ku muchim, tufanyidin kubabal. Pasak, mu Union Soviétique, akankuny netu apana mukand kud akadivar, wamekeshau mud udokil ku biro mujim wa pa mangand mawonsu. Mukand winou wading uyikasikeshin akadivar kwiyauril, ni kusal dirijek dau. Mukand winou wading umeken mud wakin. Pakwez akadivar ashinshamena kayidimbap. Ajingunina anch uruu wadinga mu mukand wadingap ukwatijadina ni uyakin wayifundishau. Nlel, akankuny a uyakin akat kusadin yisu yimwing tekinoliji mulong wa kupakish kulet kanrumbangesh ni kutwauril. Pa ndond pa ‘kurumbangan swa mu manang metu’ tukutwish kwichidij kusutin kushinshikin nawamp yom tuteshina ap tutangina ni kuman anch yikwatijadin ni uyakin twilejina kal.​—2 Tes. 2:2; 1 Yoh. 4:1. w24.07 12 par. 14-15

Mupak wa usey nakash ukutwishay muntu win mwawonsu kukwat ud mupak wa kwipan amwinend kud Yehova ni kwikal mu dijuku da in kumwifukwil End. Yehova ukatin anch muntu ni muntu asala mwamu. Mulong wak? Ukatin anch asanger urund pamwing ni ndiy ni ashakam chikupu. (Kuv. 30:19, 20; Gal. 6:7, 8) Pakwez, Yehova kakatap kumushindin muntu chakwel amusadin. Ukat kumulik muntu ni muntu akwata mupak wa yom yikusalay. Chad chikwikal nchik anch mwin Kristu wabatishinau kal wajip chijil cha Nzamb, wasal chitil chikash? Anch walik kukarumuk, akumudosh mu chikumangen. (1 Kor. 5:13) Pakwez chikalap nchik mwamu, Yehova ukat kuchingej anch muntu wasalang chitil ukuchirik kud Ndiy. Chakin kamu, dawiy diyingishin dasala anch apana chakupesh cha difut​—chakwel kwikal mutapu wa kuyilikishin akayitil akarumukina. Yehova, Nzamb wetu wa rukat, uyikasikeshin antu asadina kal yitil yikash kukarumuk.​—Zak. 1:3; Rom 2:4; Yak. 4:8. w24.08 14 par. 1-2

Pafunday kambuy Yohan mukand wend wa kasatu antu amwing apalangeshang mafundish ma makasu ni aletang kwaurok mu chikumangen. Pakwez, akwau adandamena ‘kwendil mu uyakin.’ Amuziyina Yehova ni ading ‘endil kukwatijan ni yijil yend.’ (2 Yoh. 4, 6) In Kristu inay ashinshamena amusangaresha Yohan ni amusangaresha kand Yehova. (Jnsw. 27:11) Disu dilejan kud etu? Kushinshaman kukat kulet musangar. (1 Yoh. 5:3) Chilakej, tukat kusangar anch twasangaresh muchim wa Yehova. Ukat kusangar chisu tukata kulik kuwil mu yoziu ya mangand minam ni kwitiy uyakin. Angel niyau akat kusangar. (Luka 15:10) Niyetu tukat kusangar chisu tukata kuyiman akadivar nau anambaz netu akat kushal ashinshamena. (2 Tes. 1:4) Chisu chikusheshika mangand minam, tukusangar nakash pa kwijik anch twamekeshin kal kushinshaman kwetu kud Yehova ap anch twad tushich mu mangand matakedinau kud Satan. w24.11 12 par. 17-18

Machuku minch ufanyidina kumushinshikin muntu kurutu kwa kumekesh anch umukatin? Anch wamusejin muntu kapamp kamwing, antu akwau akwiyov anch watongangap kwey nawamp kurutu kwa kukwat mipak. (Jnsw. 29:20) Chikwau kand, anch wasend chisu chilemp, ukutwishap kukwat mupak anch muntu mukwau wa kukatish. (Mul. 11: 4) Vurik anch, kurutu umusejina muntu, ufanyidinap kwikal ni kashinsh anch ukwatijan ni muntu winou. Pakwez ufanyidin kwikal nich kashinsh anch wirijekin kal mulong wa kwandam mu uruw ni muntu mukwau ukutwish kwikal mbay wa uruw muwamp kud ey. Yom ik ukusala anch waman anch muntu kanang ukukatishin? Anch yovil yitanijadinap, sal usu wa kumekesh patok mu yisal. Chiwapinap kumumekeshin muntu mud ukwendijadinany pakwez anch ey utongin yom yindj.​—Efes 4:25. w24.05 22-23 par. 9-10

Ching kusu ada in Kristu azizidinau many akin ni ashinshamena awiy ‘akusendau’ kud Yesu mu Want wa mwiur. Mwin Kristu mwawonsu uzizidinau many wakad kuchish ku mes mu spiritu, kakumukumangejap pamwing ni ‘antu atondau.’ (Mat. 24:31) Ni antu awonsu akweta ruchingej ra kushakam pa divu chikupu, niyau afanyidin kuchish ku mes ni kushal ashinshamena. Mulong twamwijikin kal Yehova nawamp, tukat kuchingejin mu dirumburish dend. Chawiy twiyakamishinap mulong Yehova udandamedin kutond antu amwing ashinshamena pa chirung chetu. Tukat kuvurik yom yalonday Yesu piur pa ansala mudimu a mu chir cha nviny ashika pa saa ya katan ya kupwa kwa midi. (Mat. 20:1-16) Antu asambelau kutazuk mulong wa kusal mudimu mu chir cha nviny, atambula difut dimwing ni antu atazukau kwinsuden. Chilik chimwing, chikalap nchik chisu chikuyitondau, in Kristu azizidinau many awonsu akutambul difut dau mwiur anch ashal ashinshamena. w24.09 24 par. 15-17

Yesu washa chilakej chiwamp nakash piur pa mutapu wa kujijamen kuburen kutentam. Amusadina mu mutapu wakad kutentam kud antu avud, kuwejaku ni antu a mu dijuku dend. Antu a mu dijuku dend amwela anch uzarikin, antakel a chirelijon amwela anch wading usadidin usu wa ayilembil ni amasalay a in Rom amusipa, amubula ni kupwa amujipa. (Mar. 3:21, 22; 14:55; 15:16-20, 35-37) Pakwez, Yesu wajijamena kuburen kutentam kwinoku kwawonsu ni kasalap chitil. Yom ik tukutwisha kwilejin ku chilakej chend? (1 Pita 2:21-23) Yesu ud chilakej chiwamp nakash tufanyidina kulondul anch turishin ni kuburen kutentam. Wading wij chisu cha kulond ni chisu cha kuninet. (Mat. 26:62-64) Kakulangap ku makasu mawonsu mamudimbenangau. (Mat. 11:19) Palondangay, kayisaalangap antu amumeshang mar. w24.11 4-5 par.  9-10

Tongin bil anch wamwinkish muntu chipan cha pakampwil, cha ufun ni cha ukwash. Ukunenganan anch muntu winou wachitul kwend ni walik kuchibangin! Ku mutambu ukwau, ukusangar anch wachisadin mu mutapu uwamp ni wamekesh anch uchisangaredin. Chilakej chinech chitufundishin yom ik? Yehova wamupana Mwanend chakwel afa mulong wetwetu. Yehova ukusangar nakash anch twamekesh kujikitish mulong wa chipan chinech cha usey nakash ni mulong wa rukat rend, ramubachika kupan difut! (Yoh. 3:16; Rom 5:7, 8) Pakwez, mu kuvul kwa machuku, tukutwish kusambish kukangany kuman difut mud chipan cha pakampwil. Chikutwish kwikal mud kutul chipan cha Nzamb ni kulik kuchibangin. Tukutwish kusangar kuchikal nich, pakwez twachitudin kal kuns. Chakwel yom yiney yilik kutushiken, tufanyidin kutongijokin chisu chawonsu piur pa yom yatusadinau kud Nzamb ni Kristu. w25.01 26 par. 1-2

Mukadivar ukimbina kwikal mukurump kafanyidinap kwikal muntu udokidinap pa kwitiyij. Ap anch ukwetap kuswir kwa kusal mivu yivud kupwa kwa kukubatish, ukwet kuswir kwa chisu mulong wa kwikal Mwin Kristu uswila. Kurutu kwa kwikal mukurump, ufanyidin kumekesh anch mud Yesu, wikepishin ni ukat kumuchingel Yehova mulong wa kutambul yisend kanang mu chikumangen. (Mat. 20:23; Filip 2:5-8) Ukutwish kumekesh anch ‘ushinshamen’ kusutin kushal ushinshamena kud Yehova, kushakam kukwatijan ni mbil jend jitentamina ni kusutin kulondul umutakel udokila ku dirijek dend. Mifund yilondin patok anch atulam afanyidin kwijik kufundish. Ov, mwamu chirumburikin anch ufanyidin kwikal mwin kufundish wa pakampwil? Bwat kwau. Ap anch amakurump avud kadingap in kufundish a pakampwil, akat kufundish nawamp mu mudimu wa kulejan ni kusal mudimu wa ukafung. w24.11 23-24 par. 14-15

Anch watang verse mu Bibil wakad kutesh nawamp, kimbijol. Kupwa mu chisu chikulondulaku, tongijokin pa yom wajinguninang ni malejan wilejidinaku piur pa Yehova, Mwanend ni piur pa mutapu ukakatianu. (Kus. 119:97) Kangal waziy anch yisu yimwing wakangany kujingunin chom chisu ap chikusangareshina pautangina ap ukimbijodina. Ud mud muntu upundina or. Nich kushimpish muchim, in kupund or akutwish kusal masaa ap machuku pakad kutan ap karitit kakemp ka or. Pakwez akat kudandamen, mulong karitit kawonsu ka or kakutwishau kutan kad ka usey kud awiy. Pakwez dipit dawonsu da uyakin wa Bibil tukutwisha kutan did da usey nakash kusutamu or. (Jnsw. 8:10) Komb, shimpish muchim ni dandamen kulimish program wey wa kwilej Bibil.​—Kus. 1:2. w25.01 25 par. 14-15

Yehova ukatin anch tuyilishin antu atusadina nayimp. (Kus. 86:5; Luka 17:4; Efes 4:32) Anch muntu watulond ap watusal yom yiyimp, tukutwish kwiyov nayimp nakash, pakampwil anch muntu winou ud murund wa piswimp ap muntu wa mu dijuku detu. (Kus. 55:13-15) Yisu yimwing, kusansan tukutwisha kwov kukutwish kwikal mud mutapu tukata kwov anch atupamp mpak. (Jnsw. 12:18) Tukutwish kupakish kudiul yovil yetu. Pakwez anch twasal mwamu tukutwish kwikal mud muntu wapampau kal mpak ni wayilikin pa mujimbu. Chilik chimwing, tukutwishap kuchingej anch yovil yetu yikupwa anch twayidiul. Anch muntu waturumbukin chom chakusambish tukutwisha kwov ja kusal chid kujiman. Bibil ulondin anch tukutwish kujiman. Pakwez, utubabeshin kand anch kangal twalik ujim utuyikel. (Kus. 4:4; Efes 4:26) Mulong wak? Mulong ujim ukuletangap yibudikin yiwamp. (Yak. 1:20) Vurik anch, tukutwish kujiman pakwez kulam ujim ud mupak ututadina. w25.02 15 par. 4-6

Yesu wasadina chilakej chimekeshina anch chidap cha manang kukumangej nfalang pakad kwikal ni “mapit makin ku mes kwa Nzamb.” (Luka 12:16-21) Kwikil muntu wija yom yikushikena damashik. (Jnsw. 23:4, 5; Yak. 4:13-15) Mulong tud in kwilej a Yesu, tukat kurish ni chikokujol cha pakampwil. Yesu walonda anch tufanyidin kwitiy “kusha” yom yawonsu tukweta mulong wa kwikal in kwilej end. (Luka 14:33) In Kristu a mu mivu chitot ya kusambish a mu Yudea asala mwamu nich musangar. (Heb. 10:34) Mu chirung chetu, akadivar avud akat kulikap midimu yau ya nfalang jivud mulong wa kulik kunung chikas ku milong ya politik. (Kuj. 13:16, 17) Yom ik yikata kuyikwash kusal mwamu? Atekining ruchingej rau rawonsu mu kushilamu kwa Yehova kulondina anch: “Kinikukushap, kinikez kakulikap chikupu.” (Heb. 13:5) Tukat kusal usu wa kurijek mwom wetu wa kurutu, ni anch kwashiken yom yakad kutongin, tukat kuchingejin mu ukwash wa Yehova. w25.03 29 par. 13-14

Yehova kakatap kutuchingejin anch tupam ayinetu. Utwinkishin atufung ni alej mu chikumangen atukwashina kwikal ‘akudina’ mu spiritu, “kushik ku chilik chiwanyidina cha Kristu.” (Efes 4:11-13) Yehova ukat kutwink kand spiritu utumbila mulong wa kutukwash kwikal ni “chitongijok cha Kristu.” (1 Kor. 2:14-16) Chikwau kand, Nzamb wayinkisha antu afunda ma Evanjil spiritu mulong wa kutulej mutapu watongangay Yesu, kulond ni yom yasalay mu mudimu wa kulejan. Anch wimburij mutapu watongangay Yesu ni kusal, ukutwish kwikal mwin Kristu uswila. Mulong wa kushiken ku kukul, tufanyidin kuya kurutu mu “malejan ma kusambish ma yom ya Kristu,” chamekesh anch malejan ma pa dishin ma win Kristu. w24.04 4-5 par. 11-12

Tukat kukwat mipak dichuku dawonsu. Yimwing yiswapeling kwau, mud kutond yom ya kuda ap chisu cha kulal. Pakwez yikwau yikasikening nakash. Yikutwish kwikal ni yibachikin pa ukash wetu wa mujimbu, musangar wetu, akatish netu ap difukwil detu. Tukatining anch mipak tukwatina yitukwash etu ni dijuku detu. Pakwez cha usey nakash, tukatining anch mipak yetu yimusangaresh Yehova. (Rom 12:1, 2) Chom cha usey chikutwisha kukukwash kukwat mupak uwamp kud kukimb jinsang jawonsu. Mulong wak chid cha usey? Tong bil mud anch waya kumanijan ni dokter mulong ukwet mayej makash. Ov, dokter ukukwat kwend mupak kukwatijan ni yom yilejay ku shikol pakad kukushinshikin bil nawamp ni kukwipol yipul? Bwat kamu. Niyey ukukwat mipak yiwamp anch wakimbijol bil jinsang jawonsu piur pa mupak wey. w25.01 14 par. 1-3

Yom ik twija piur pa ranaken ra Yehova? Yom ik yimekeshina anch “kasotilap muntu ap umwing kusheshik”? (2 Pita 3:9) Shinshikin mutapu wamekeshay ranaken rend kud antu asala yitil yijim. Mwant David wasala yitil yijim, mud makaj, ni kujipan. Pakwez David wakarumuka, chawiy Yehova wamulikishina kusutin ranaken rend. (2 Sam. 12:1-12) Mwant Manase wasala yom yivud yiyimp nakash mu mwomu wend. Chikalap nchik yom yiney yikash, pakwez, Yehova wamwitiya Ikundj winou wakarumuka ni wikala ni diyingishin da kumwanaken ni kumulikishin. (2 Jsng. 33:9-16) Yilakej yiney yitururishin anch Yehova ukat kumekesh ranaken ang waman anch kud mayingishin ma kusal mwamu. Ukuyivumbul antu amutapu winou mulong ajinguninang anch asala yitil yikash ni kupwa akarumuka. w24.05 4 par. 12