Ngond wa 5

Kupwa kwa kuyikol atushalapol end mu usuk mu idjibit, Yehova watonda in kupesh mulong wa kusadin ku dizang. Atondang kand in Levi mulong wa kusal yom yikwau mu dizang. Ov antu asadinang ku dizang ap ading ashicha piswimp, ayibanginang nakash kud Yehova kuyisutamu antu akwau? Bwat! Yehova kakwetingap kasolikany. Muntu mwawonsu wading mu chibeng, wading ni mutapu wa kusanger urund wa piswimp ni Yehova. Chilakej, Yehova wasala anch muchid wawonsu utwisha kuman dinguj da didj ni dinguj da kasu kadinga piur pa dizang. (Kub. 40:38) Pashemunikang didj mulong wa kuya ndond yindj, ap antu ading palemp ni dizang amanang didj dined, akungamejang yom yau, asuburilang minkand yau ni kuya pamwing ni muchid wawonsu. (Kuch. 9:15-23) Chilik chimwing ni nlel, chikalap nchik ndond tushicha, Yehova utukatin, utubangidin ni utukingin. w24.06 4-6 par. 10-12

Mwom wa David wading mu ubaj. Mwanend Abisalom wakwata mupak wa kumujip mulong ndiy ikal mwant. (2 Sam. 15:12, 13) David wafanyina kuchinin ku Yerusalem pakad kulab. Pading payilau atushalapol end, David wamana anch kufanyidin kushal muntu mulong wa kwijik yom yawonsu yading yitonginay Abisalom kusal. Chawiy wamutuma Sadok ni in kupesh akwau kuchirik mu musumb mulong wa kwak nsang. (2 Sam. 15:27-29) Ading afanyidin kubabal nakash. David wamwita Sadok ni murunend ushinshamena Hushay, mulong wa kutenchik yom kanang. (2 Sam. 15:32-37) Kusutin kutenchik kwinoku, Hushay wasala mud umukwashin Abisalom ni kumwinkish chiyul mutapu ukutwishay kumurishikish David. Chisu chateshay Abisalom chiyul cha Hushay, Hushay wamuleja Sadok ni Abiatar yom yatenchikay. (2 Sam. 17:8-16) Amakundj inay aad afanyina kushikij kamu nawamp uruu kud David anchawanyisha chisend cha usey nakash mulong wa kumuchidij David.​—2 Sam. 17:21, 22. w24.07 5 par. 9-10

Atushalapol a Yehova amwing anenganen mulong wa yitil yasalau pakur kurutu ayibatish ap kupwa kwa kuyibatish. Pakwez tufanyidin kuvurik anch Yehova wapana difut mulong utukatin nakash. Komb, tufanyidin kwikal ni kashinsh anch ukat kutulikishin kamu chakin. Yehova utwinkishin kashinsh anch ang ‘twarijek’ yom ni ndiy, ukutulikishin kamu rawonsu. Tukwet musangar nakash mulong Tatukwetu wa rukat, Yehova, ukat kulikishin yitil yetu! Pa chisu chawiy chimwing, kakuvuramenangap yom yiwamp twasala. (Kus. 103:9, 12; Heb. 6:10) Anch ukat kwifish nich mulong wa yom wasala pakur, sal usu wa kushinshikin pa yom ukutwisha kusal katat ni mu machuku ma kurutu. Ukutwishap kuswimp yom yasuta kal. Pakwez ukutwish kumushiman Yehova kusutin yom usadina katat ni ukutwish kutongijokin pa yom yiwamp yakukaninay kal mu machuku ma kurutu. w24.10 8 par. 8-9

Anch watang Bibil ukutwish kuziy yisu yimwing mulong ukutwish kuman anch kud yom yivud nakash ufanyidina kuwapish mu mwom wey. Chilakej, tong bil mud anch dichuku dimwing mu dilejan dey da Bibil wilej piur pa kasolikany. (Yak. 2:1-8) Waman anch kud yom ufanyidina kuswimp piur pa mutapu ukata kuyisadin antu akwau, chawiy wakwat mupak wa kuswimp yom kanang. Kupwa pa dichuku dilondwilaku, watang maverse mamwing malejena anch chid cha usey kubabel yom ulondina. (Yak. 3:1-12) Wajingunin anch yisu yimwing ukat kulond yom yiziyishena. Chawiy wakwat mupak wa kulond yom yiwamp ni yikasikeshena chisu wambambina nau antu akwau. Dichuku dilondwilaku mu dilejan dey da Bibil, akubabesh anch ufanyidinap kwikal murund wa mangand. (Yak. 4:4-12) Waman anch ufanyidin kuwapish mutapu wey wa kwipuwangej. Dichadiril, ukutwish kuman anch chikasiken nakash kusadin yom yiney yawonsu. Kangal waziy. Vurik kand anch, kudjal “wuntu usu,” kukwetap disuden. w24.09 6 par. 11-12

Yesu wamekeshang kwilam chisu chawonsu mulong ‘ndiy wamuchingejina Nzamb Nkalansambu utentamina.’ Yesu wading wij anch mutapu wading umenay Yehova yom chawiy chom chading cha usey. Wading ni kashinsh anch Yehova ukupwish kuburen kutentam kwawonsu pa chisu chiwanyidina. Tukutwish kumwimburij Yesu kusutin kushinshikin yom tulondina anch atusadin mu mutapu uyimp. Yisu yimwing chidap kwau cha usey kwakul ap kusal chom kanang anch yom yatusalangau yid kwau yikemp. Ap tukutwish kutond kuninet kwau anch twaman anch yom tukulonda yikutwish kuyipish chad yom nakash. (Mul. 3:7; Yak. 1:19, 20) Yisu yikwau, tukutwish kwikal ni kuswir kwa kumulondin muntu usadidinau mu mutapu uyimp ap kulondin yitiyij yetu. (Mid. 6:1, 2) Anch twakwat mupak wa kulond, tufanyidin kusal usu wetu wawonsu mulong wa kulond nich kwitudish ni kalimish kakurikina. Tukutwish kand kumwimburij Yesu kusutin kumuchingejin “Nzamb Nkalansambu utentamina.”​—1 Pita 3:15. w24.11 5-6 par. 10-12

Muntu wasalang chitil wakarumuk, chinech chikat kulet musangar nakash! (Luka 15:7) Nany ukata kumukwash chakin muntu kukarumuk? Ov, ad amakurump? Vurik yom yafunday kambuy Paul piur antu akata kusal yitil. Wafunda anch: ‘Ukuman ap Nzamb wayinkish mutapu wa kukarumuk.’ (2 Tim. 2:25) Chawiy, Yehova, ndiy ukata kumukwash mwin Kristu kuswimp yitongijok ni yisal yend, kadap muntu. Paul warumburila yom yiwamp yikata kushiken anch muntu wakarumuk. Muntu winou ukutwish kwikal nich ronganyin rakin ra uyakin, ukat kuchirish manang mend mawamp, ni ukutwish kukwasinik mu mupit wa Satan. Anch muntu wasalang chitil wakarumuk, komite wa amakurump ukurijek mulong wa kumwendin muntu winou mu ukafung chakwel adandamen kutambul ukwash uswirikedinay mulong wa kurish ni mipit ya Satan ni kwonin jinjil mwendidina yijdjatil yend.​—Heb. 12:12, 13. w24.08 23 par. 14-15

Antu inkishau yakuda kud Yesu ading ashinshikidin pa kuwanyish maswir mau ma ku mujimbu. Mulong wak? Dichuku dalondulaku, kamumanap Yesu nau atwimbuy end mulong ading ayang kal. ‘Maat makwau madokala ku musumb wa Tiberiad mashika piswimp ni ndond yadilau antu mikat.’ Chawiy antu akandama mwinimwa ni aya ku Kapernaum mulong wa kumukimb Yesu. (Yoh. 6:22-24) Ov, asala weny winou mulong ading akwet kuswir kwa kutesh yom yivud piur pa Want wa Nzamb? Bwat. Ading ayil kwau mulong wa kuda mikat. Mulong wak tulondina mwamu? Shinshikin yom yashikena pamutanau Yesu kud antu inay ku Kapernaum. Yesu wayileja patok anch eza kwau mulong wa kuda. Wayileja anch ‘wadangany mikat ni wikutany . . .  yom yikata kuyip.’ Pakwez wayikasikesha kusal mudimu mulong wa ‘yakuda yakad kuyip, yikata kulet mwom wa chikupu.’ (Yoh. 6:26, 27) Yesu walonda anch Tatukwend ndiy ukata kulet yakuda yiney. w24.12 5 par. 8-9

Mulong wa kwikal mwin kufundish muwamp, akadivar, mafundish ni yiyul uyinkishina antu akwau, yifanyidin kwimen pa Dizu da Nzamb. Ikal mwin kwilej muwamp wa Bibil ni mikand ya kashalapol ushinshamena ni ubabela. (Jnsw. 15:28) Chisu wilejina, shinshikin nawamp mutapu urumburilau maverse ma Bibil mu mikand yetu ni mutapu ukutwisha kumasadin mu mwom wey. Ni chisu ufundishina, ikasikesha kupukun michim ya antu akuteshina. Ukutwish kwikal ni ukaliweny wa kufundish anch wit ukwash kud amakurump akweta ukaliweny ni kusadin yiyul yau. (1 Tim. 5:17) Amakurump afanyidin kutwish . . . kuyikasikesh akadivar ni anambaz nau; pakwez yisu yimwing, akutwish kuyinkish yiyul ap kand kuyikand. Ku mutambu wau, amakurump afanyidin kumekesh kudimuk. Anch ud muntu udimukina ni ukweta rukat, mafundish mey ma kwimen pa Dizu da Nzamb ni ukwikal mwin kufundish muwamp mulong ukumwimburij Yesu uda Mulej Mujim.​—Mat. 11:28-30; 2 Tim. 2:24. w24.11 24 par. 16

Tukutwish kumutumbish Yehova kusutin yom tulondina piur pend. Atushalapol a Yehova ayitin‘kumuwangin Yehova,’ ‘kushiman dijin dend,’ ‘kulejan dipandish dend,’ ni ‘kulejan uyaj wend pakach pa michid.’ (Kus. 96:1-3) Yiney yawiy mitapu tukutwisha kumutumbish Tatukwetu wa mwiur. (Mid. 4:29) Tukutwish kumutumbish Yehova kusutin kumwinkish yom yetu ya usey. In kwifukwil akin a Nzamb akweting chaku cha kumutumbish Yehova mu mutapu winou. (Jnsw. 3:9) Chilakej, in Isarel apana nfalang jau ni yom yau ya usey mulong wa kukwash mudimu wa kutung ni kurijek tempel. (2 Ant 12:4, 5; 1 Jsng. 29:3-9) In kwilej amwing a Yesu ‘asadinang yom yau’ mulong wa kumukwash nich ndiy nau atwimbuy end. (Luka 8:1-3) In Kristu a mu mivu chitot ya kusambish niyau apana yom yau mulong wa kuyikwash nich akadivar ni anambaz nau. (Mid. 11:27-29) Nlel, niyetu tukutwish kumutumbish Yehova kusutin yipan yetu ya kwikatin. w25.01 4 par. 8; 5 par. 11

Yom ik yamukwasha Korney kutambul dibatish? Tutangin mu Bibil anch: Wading “mwin kumwifukwil Nzamb pamwing ni dijuku diend diawonsu.” Korney wamulembilang kand Nzamb chisu chawonsu. (Mid. 10:2) Pamulejau rusang ruwamp kud Pita, ndiy ni dijuku dend amwitiya Kristu ni ayibatisha. (Mid. 10:47, 48) Korney wading ukatin kuswimp yom kanang mu mwom wend mulong wa kumwifukwil Yehova pamwing ni dijuku dend. (Jos. 24:15; Mid. 10:24, 33) Korney wafanyina pamwing ap kulikidil mwaz wend umukangesh kwikal mwin Kristu. Pakwez kasalap mwamu. Ov, niyey chikwitin kuswimp yom yijim mu mwom wey mulong wa kwitiy uyakin? Anch chid mwamu, ijik anch Yehova ukukukwash. Ukukuyukish anch wakwat mupak wa kusadin mbil ja Bibil mu mwom wey mulong wa kumwifukwil. w25.03 5 par. 12-13

Anch watesh nsang ja makasu jitadina dirijek ap piur pa akadivar atakedina, vurik mutapu wamusalau Yesu ni in Kristu akusambish kud akankuny a Nzamb. Nlel, antu a Yehova akat kuyizengol mud mwatakelay kamu Bibil kulejan. (Mat. 5:11, 12) Tufanyidinap kwitiyij nsang ja makasu anch twij kujidokila ni tufanyidin kamu kukwat mupak pakad kulab. Mupak ik tufanyidina kukwat? Ipuk nsangu ja makasu. Kambuy Paul walejana patok piur pa yom tufanyidina kusal ni kutesh. Wamuleja Timote “kuyikand antu adia kwinikwa akata kulejan malejan ma makasu” ni “alika kukat yishimu yamwamu.” (1 Tim. 1:3, 4) Tukat kwipuk nsang ja makasu mulong twij ku musul kujidokila. Pakwez tukat kutesh ‘mazu mawamp’ ma uyakin.​—2 Tim. 1:13. w24.04 11 par. 16; 13 par. 17

Shal mu uumwing nau antu ashinshamena kud Yehova. Nzamb ukatin anch tumwifukwil mu uumwing nau akadivar ni anambaz netu. Tukudandamen kushal mu uumwing anch twalamat ku uyakin. Antu awonsu akuya kuns kwa uyakin akuletish kwaurok mu chikumangen, chawiy Nzamb utubabeshin anch: “Iyipukany antu inay.” Anch bwat, akutwish kutupumbul ni kututwal kulemp ni uyakin. (Rom 16:17) Anch twajingunin uyakin ni twaulam ba, tukushal piswimp ni Yehova ni tukulam ritiy retu rikash. (Efes 4:15, 16) Tukwichidij ku mafundish ma makasu ni nsang ja makasu ja Satan, ni tukwikal mu diking da Yehova pa chirung cha mar makash. Dandamenany kulam ba yom yida yakin ni “Nzamb ukata kutwinkish chisambu ukwikal ni yenen.”​—Filip 4:8, 9. w24.07 13 par. 16-17

Yesu wayibangina pakampwil antu ading iyovila nayimp mulong ading akayitil, ni wayitazuka kwikal in kwilej end. Yesu wading wij anch chitil wawiy musul wa milong yirishinau nich an a antu. Chawiy wayikwasha amakundj ni amband ading amena mar mulong wa yitil yasalau. Kusutin chilakej chimwing, warumburila anch: “Antu akash [kaswirikediningap] mwingang, ching kusu antu ayedila.” Walonda kand anch: “Am kinezap kuyitazuk antu atentamina, pakwez neza mulong wa kuyitazuk akayitil.” (Mat. 9:12, 13) Yawiy kamu yom yasalay Yesu. Nich ranaken, walikishina yitil ya mband umwing wowisha yidjatil yend nich mansoj. (Luka 7:37-50) Wamufundisha mband mwin Samariya dilejan da usey ku dijiy da mem, ap anch wading wij anch ushich ni ikundj wakad kwikal nfumwend. (Yoh. 4:7, 17-19, 25, 26) Nzamb wamwinkisha kand Yesu usu wa kupwish chibudikin cha nsuden cha chitil​—rufu. Mutapu ik? Yesu wayivumbula antu​—amakundj ni amband, anikanch ni amakurump.​—Mat. 11:5. w24.08 4 par. 9-10

Mutapu ik ukutumbishay Yehova dijin dend piswimp ap? Kusutin kurumburish nich kutentam. Piswimp ap ukumushesh Babilon Mujim mulong wasaadikishin kal dijin dend nakash. (Kuj. 17:5, 16; 19:1, 2) Antu amwing akumana kusheshik kwa Babilon Mujim akutwish kusambish kumwifukwil Yehova pamwing niyetwetu. Kupwa, kwi njit ja Armagedon, Yehova ukushesh mangand mawonsu ma Satan ni antu awonsu akata kumubwambwil ni kusaal dijin dend, pakwez ukuyipandish awonsu amukatina, amuziyidina ni akatina kumutumbish. (Mar. 8:38; 2 Tes. 1:6-10) Kupwa kwa kupak kwa nsuden kukushikena kwinsuden kwa Winyikel wa Mivu Kanan wa Kristu, Yehova ukutumbish kamu dijin dend rawonsu. (Kuj. 20:7-10) Pa chisu chinacha, ‘divu dikez kwizul nich ronganyin ra katumb ka Yehova mud mem mizwila mu karung.’ (Hab. 2:14) Kukwikal musangar nakash pakupanay muntu mwawonsu kud Yehova katumb kawanyidina dijin dend! w25.01 7 par. 15-16

Yom ik yafanyina kuyikwash in Kristu a mu Yudeya kujijamen rupompat? Kambuy Paul wading wij anch ading afanyidin kwikal ni chitongijok chiwamp piur pa yikokujol yau. Chawiy warumburila anch ang in Kristu arish ni yikokujol, Nzamb ukutwish kusadin yikokujol yiney mulong wa kuyifumb. Kufumb kwinoku kukutwish kumukwash Mwin Kristu kukudish ni kuwapish mikadil ya usey. Kushinshikin pa yom yiwamp yamanau mu yikokujol yarishau nich, kwafanyina kuyikwash in Kristu inay kujijaman. (Heb. 12:11) Paul wayikasikesha in Kristu a mu Yudeya kwikal atakamena ni kulik kuziy anch arish ni yakamish. Kambuy Paul wading ni mutapu wa kupan yiyul yiwamp piur pa mutapu wa kujijamen rupompat. Kurutu kwa kwikal Mwin Kristu, wayipompata in Kristu ni wamana mutapu wayimeshau mar. Wading kand wij mutapu wa kujijamen rupompat. Kupwa pikalay Mwin Kristu, warisha ni yikokujol kushalijan.​—2 Kor. 11:23-25. w24.09 12-13 par. 16-17

Dichuku dawonsu disutina dikat kusal anch mudimu wetu wa kulejan wikal wa kuswapej nakash. Mulong wak? Mulong chisu chisutin mau nakash. Shinshikin yom yasambelay kulond Yesu piur pa mudimu wa kulejan mu machuku ma nsuden kukwatijan ni yom yifundinau mu Marko 13:10. Kukwatijan ni rusang ra Mateu, Yesu walonda anch rusangu ruwamp akurilejan pa mangand mawonsu kurutu “disuden” deza. (Mat. 24:14) Dizu dined dimekeshin kusheshik kwa chikupu kwa mangand mayimp ma Satan. Yehova watekin kal “dichuku . . . ni chisu” mulong wa yinship yikusadika piswimp ap. (Mat. 24:36; Mid. 1:7) Dichuku dawonsu dikat kutusejish nakash ku chisu chinech. (Rom 13:11) Patuchingedina, tufanyidin kudandamen kulejan djat ni pakushika disuden.Chisu tutongijokidina piur pa mudimu wa kulejan, chid cha usey kutongijokin chipul ech: Mulong wak tukata kulejan rusangu ruwamp? Mu wiswimp, rukat rawiy ritubachikining kulejan. Yom tukata kusal mu mudimu wa kulejan yimekeshining rukat retu​—rukat retu mulong wa rusangu ruwamp, rukat retu mulong wa antu, ni cha usey nakash, rukat retu mulong wa Yehova ni mulong wa dijin dend. w24.05 14-15 par. 2-3

Anvaj yikasikeshany aney kutongin piur pa yom yatangay Yehova. Chisu wendinanya mu park ap chisu usadinanya mudimu ku chir, mukwasha mwaney kuman yom yikutwishay kwilej kusutin yitang. Mulong wak? Mulong yom yiney yimekeshin patok anch kud muntu kanang ukweta manang wayitanga. Chilakej in siyans akat kwilej maspiral pasut kal mivu yivud. Mwin siyans umwing utazukinau anch Nicola Fameli urumburil anch, ang wachind uvud wa maspiral mu chitang chimwing ukutwish kujingunin manombre kanang malondulijadina. Kulondulijan kwa manombre kwinoku akutazukin anch suite de Fibonacci. Tukutwish kutan maspiral mu yom yivud, mud mu magalaksi mamwing, chibalakat cha nkal kal, mayij ma mitond ni mu yisalamb ya tournesol. w24.12 16 par. 7

Moses, David ni Yohan adingaku pasut kal mivu yivud nakash. Ni mashakamin mau mading kamu mashalijadin kulemp ni metwetu. Pakwez niyetu tusadin yom yivud yasalau kand awiy. Mud etu, niyau amwifukwilang Nzamb wakin. Mud awiy, niyetu tukat kumulembil Yehova, kumuchingejin ni kukimb umutakel wend. Mud amakundj inay, niyetu tukwet kashinsh anch Yehova ukat kuyiyukish antu awonsu amuziyidina. El komb etu awonsu tulondulany yiyul yapanau antu inay ni kuziyin ku yijil ya Yehova. Anch twasal mwamu, tukutwish yom yawonsu tukusala. Tukwikal ni mwom ni ‘tukushakam machuku mavud’ inge, chikupu kamu! Ni tukwikal ni musangar anch twamusangaresh Tatukwetu wa rukat uda mwiur, ukata kutufut mu mutapu twakad kutongin.​—Efes 3:20. w24.11 13 par.  20-21

Mu mivu chitot ya kusambish, akadivar amwing ayitonda kwikal ankwash a mudimu. (1 Tim. 3:8) Chimeken anch antu inay asalang mudimu wa “kuyikwash akwau” mud mwafunday Paul. Chawiy chimeken anch ankwash a mudimu asalang midimu ya usey nakash mulong wa kuyikwash amakurump kushinshikin pa mudimu wa kufundish ni wa ukafung. Chilakej, pamwing ap ankwash a mudimu akwashang kufundiril makopi ma Mivungur ap kulandol yom yading yiswirikedinau mulong wa kufund nich. El tushinshikinany midimu yimwing ya usey yisadinau ankwash a mudimu mu chikumangen chen. (1 Pita 4:10) Akutwish kuyinkish chisend cha kulam chipau cha chikumangen ap madosiye ma teritwar, kulam mikand ni kuyipan kud akadivar nau anambaz, kusutish mikro ni kusadin yingambangamb ya kasu, kwakan ap kulam nawamp Chot cha Want. Midimu yiney yawonsu yid ya usey chakwel chikumangen chisal nawamp.​—1 Kor. 14:40. w24.10 19 par. 4-5

Tukwikal ni usu wa kujijamen chikokujol chin chawonsu, chikala chijim ap chikemp anch twavurik anch Yehova ud mwom ni udaku mulong wa kutukwash. Ukutwish kutukwash mulong kwikil chom chimukasikedina ud mwin Dikand Dawonsu ni ukutwish kutwinkish usu mulong wa kujijaman. Chinech chitwinkishin kashinsh anch twarish ni yikokujol. Ni anch twaman anch Yehova utukwashin mu tuyikokujol tukemp, tukutwish kwikal nich kashinsh anch ukutukwash mu yikokujol yikash. Shinshikin yom yaad yamushikena Mwant David yakasikesha kashinsh kend muday Yehova. Padingay David nsand kafung, kangol ni ntambu akwata amikoku a tatukwend. Pa yisu yiney yaad, David wayopata ni kutakaman annam inay ni wapandisha amikoku. Pakwez, David katongap anch wasala mwamu ni usu wend. Wading wij anch Yehova ndiy wamwinkisha usu wa kusal mwamu. (1 Sam. 17:34-37) Kusutin kutongijokin pa yom yiney, David wading ni kashinsh anch Nzamb mwom ukutwish kumukwash mu machuku ma kurutu. w24.06 21 par. 5-6

Tong bil mud anch akutazuk ku musambu umwing. Ov, ukuyaku? Anch umwijap kamu nawamp muntu utenchikina musambu ap anch wijap mutapu urijekinau musambu winou, mwipula yipul mud: “Kwisu, ni chisu ik chikusambisha musambu? Kukwikal antu inch? Nany ukutakela musambu win? Anany akwikalaku? Yom ik yikusadikaku? Ov, kukwikal maar?” Yakul ku yipul yiney yikutwish kukukwash kukwat mupak uwamp. Kupwa kwa kwikal ni jinsang jawonsu, tongijokin chad piur pa mulong wawonsu. Chilakej, yom ik ukusala anch watesh ang kukwikal antu akad kulimish mbil ja Bibil ni anch antu akwinilap maar mukatidinau pakad mwin kuyishinshikin? Ov, umen anch musambu winou ukutwish kwikal usutina chipim? (1 Pita 4:3) Anch washinshikin yom yawonsu nawamp, chikutwish kukuswapel kukwat mupak uwamp. w25.01 15 par. 4-5

Yehova usadidin mazu mulong wa kutukwash kuman mutapu ukatay kujimwangesh yitil ya antu akarumukina kusutin yakupesh ya difut. Chikasikening nakash kukusul chitaj chisunz pa disun. Pakwez, kusutin dizu dined Yehova utwinkishin kashinsh anch yitil yetu akuyitokish chakwel kangal kand yimekana. Yitil yid mud “mabaz.” (Mat. 6:12; Luka 11:4) Chawiy chisu chawonsu tukata kumurumbukin Yehova, chid mud dibaz detu dikat kujimb nakash. Tukwet chisend cha kumufut usey uvud nakash! Pakwez anch Yehova watulikishin, chid mud ukat kulikishin dibaz twafanyina kumufut. Kakatap kand kwit chakwel tumufut mulong wa chitil chalikishinay kal. Mud mutapu ukatay muntu kwov musangar anch amulikishin dibaz dend, niyetu tukat kwov musangar anch Yehova watulikishin yitil yetu! w25.02 9-10 par. 9-10

Anvaj akutwish kuswiriken ukwash anch ananap, ni an avud akat kwirijek mulong wa kusal mwamu. (1 Tim. 5:4) Pakwez anvaj in Kristu ijing anch musangar wau ujim udokiling ku kuyikwash an kwikal atushalapol a Yehova, kadap ku kuyilil ni chitongijok chakwel anch an ez ayikwasha mu machuku ma kurutu. (3 Yoh. 4) Kusutin chilakej chey, yifundisha aney kumuchingejin Yehova chisu uyikwashina kuman mutapu ukutwishau kuwanyish maswir mau anch apam. Pachidau an akemp, yikwasha kuman usey wa kusal mudimu nakash. (Jnsw. 29:21; Efes 4:28) Payilau mu kupam, yikwasha kwilej ni mushiku. Anvaj in Kristu akutwish kukimbijol mbil ja Bibil mulong wa kuyikwash nich anau kukwat mipak ya manang piur pa shikol yikutwishau kwilej. Chitongijok chau chid cha kuyikwash an chakwel ez iwanyishinap maswir mau ayinau ni kwikal ni chisu cha kulejan ap kusal mudimu wa uchibol. w25.03 30-31 par. 15-16

Mu Isay shapitre wa 65, Yehova urumburil mutapu ukwikala mashakamin ma antu akushakama mu paradis wa mu spiritu. Uprofet winou wawanyina kapamp ka kusambish mu 537 K.C.C. Pa chisu chinacha, in Yuda akarumuka atwalau mu usuk mu Babilon achirika mwingand yau. Yehova wayiyukisha antu end ni wayikwasha kurijek musumb wa Yerusalem washeshau ni kutunguril tempel ndond ya difukwil dakin. (Isay 51: 11; Zak. 8:3) Kuwanyin kwa kwakaad wa Isay kwasambisha 1919 C.C, padokalau atushalapol a Nzamb a pa chirung chetu mu usuk wa Babilon Mujim. Kupwa paradis wa mu spiritu wasambisha kujimb pa divu. In kulejan a Want avud akweta mushiku asala yikumangan ni asongisha dibuj da mu spiritu. Amakundj nau amband ading in chisum ni ada kusalang yom yijondina ‘adjala wuntu usu watangau mudi mudiay Nzamb mu kutentam kwakin ni mu kutumb.’ w24.04 20-​21 par. 3-4

Mu jingand jimwing, anvaj ni antu akwau apamina kal akutwish kuyichingejin mulong wa kuyitondin anamakwau ajich muntu wa kwatijan nend. Mu jingand jikwau, dijuku ap arund akutwish kutan mbay wa uruw muwamp mulong wa muntu uda mujich ni akutwish kutenchik mulong ikundj ni mband atanijana ni kuman anch akutwish kusambish kwendijadin. Anch akwit mulong wa kutenchik kwendijadin ap uruw, shinshik yom yikimbinay ikundj ap mband kuday mukwau. Anch waman anch muntu kanang ukwikal mbay wa uruw muwamp kund murund ney ap mwanamakwey, sal usu wa kumwijik nawamp, kwijik nawamp mikadil yend, ni cha usey nakash ufanyidin kwijik anch ud muntu wa mu spiritu. Urund wa piswimp ni Yehova ud wa usey nakash kusutamu nfalang, mashikol, ap mwaz. Vurik anch, mukadivar ni nambaz mujich awiy akukwata mupak wansuden piur pa kwatijan. w24.05 23 par. 11

Tukutwish kuyikwash antu endijadina kusutin yom tulondina ap bwat. Yisu yimwing, tufanyidin kwishinshiskin ayinetu. (Jnsw 12:18.) Chilakej, tufanyidinap kwipupwil kuyilejamu antu akwau anch antu ay asambishin kal kwendijadin, pakwez ayinau awiy afanyidina kulejan. Tufanyidinap kunyinyit piur pa antu endijadina ap kulond nayimp piur pa milong yau. (Jnsw. 20:19; Rom 14:10; 1 Tes. 4:11) Chikwau kand, tufanyidinap kulond yom ap kuyipul yom yikutwisha kuyibachik kwatijan mau mau. Chikwikal nchik anch antu akwat mupak wa kwimik kwendijadin? Tufanyidin kwipuk kuyipol yipul ap kumufish nich umwing wa pakach pau. (1 Pita 4:15) Anch antu imik kwendijadin, tufanyidinap kulond anch akwatin mupak uyimp. Pakwez, chimekeshin anch kwendijadin kwawanyish kal rutong rau, kwayikwashin kukwat mupak uwamp. Chakin, mupak winou ukutwish kuyiletin kusansan. Chawiy tufanyidin kukimb mutapu wa kuyikwash. w24.05 31 par. 15-16

Chikokujol chimwing pakach pa yikokujol yikwau yikash chikutwisha kutunenganesh nakash chid anch muntu wa mu dijuku ap murund wa piswimp wamulik Yehova. (Kus. 78:40) Urund wetu wa piswimp ni muntu winou ukutwish kusal anch chitukasiken kujijamen chishiken chinech. Anch yom mud yiney yakushiken, chilakej cha kushinshaman cha Sadok chikutwish kukukasikesh. Washala ushinshamena kud Yehova chisu chaburenay murunend Abiatar kumushinshamen Yehova. Yom yiney yashikena kwinsuden kwa winyikel wa David pananapay David ni kufa. Mwanend Adonija wapakisha kwiyikadish mwant ap anch Yehova wading ukatin anch Salomon ikal mwant. (1 Jsng. 22:9, 10) Abiatar watonda kumunung Adonija chikas. (1 Ant 1:5-8) Mulong wasala mwamu, Abiatar kamubwambwilap ching kusu David ni Sadok pakwez wamubwambwila kand Yehova. Mu mivu yivud Sadok ni Abiatar asala pamwing nau in kupesh.​—2 Sam. 8:17; 15:29; 19:11-14. w24.07 6 par. 14-15

Tufanyidin kwikal nich kashinsh anch chitin kusal usu nakash mulong wa kuchish ku mes pantaliken ni choziu. Pa ndond pa “kusanger mu yitil mu kachisu kakemp,” tufanyidin kushakam kukwatijan ni mbil ja Yehova mulong wa kwikal nich musangar upandakena. (Heb. 11:25; Kus. 19:8) Chid mulong twatondin kal kushakam kukwatijan ni mbil jend. (Dis. 1:27) Anch twashakam mu mutapu umusangareshina Yehova, tukwikal ni kom kawamp ni dichuku dimwing tukwikal ni mwom wa chikupu. (1 Tim. 6:12; 2 Tim. 1:3; Yud 20, 21) Chakin kamu, “mujimbu uziyin.” (Mat. 26:41) Pakwez chinech chimekeshinap anch tukutwishap kusal yom yiwamp mulong wa kuziy kwetu. Yehova ud kwaku mulong wa kutwinkish usu tukweta nich kuswir. (2 Kor. 4:7) Pakwez ijik anch, Nzamb ndiy ukata kupan ukash winou upandakenamu ukash win wawonsu. Ukash win wawonsu, ud usu tusadining dichuku dawonsu mulong wa kuchish ku mes pantaliken ni choziu. Chinech chid chisend chetu tufanyidina kuwanyish. Yehova ukwakul ku malembil metu mulong wa kutuwejin ukash pa chisu tuuswirikedina. (1 Kor. 10:13) Chakin kamu, nich ukwash wa Yehova, tukutwish kudandamen kuchish ku mes. w24.07 19 par. 19-21

Kambuy Paul wamufundin mbay nend Timote wading niyend mukurump mazu ma mufund wa nlel piur pa mutapu wa kuyikwash “antu [akata] kusal yitil.” Yom ik yading yifidinay kulond? Kadingap kafidina kamu kulond anch chikumangen cha kabuj chawiy chading “antu awonsu.” Pakwez, wading wisambidin piur pa antu akemp asambedina kal pamwing ap kwijik piur pa yitil yasadinay muntu. Pamwing ap ayinau amumanang muntu mutapu usadinay chitil, ap muntu amwinend wasalang chitil ndiy wayilejang. Amakurump afanyidin kuyijikish ku ujindj anch mulong aushinshikinang kal ni muntu wasalang chitil amukandang. Yisu yimwing, antu avud mu chikumangen akutwish kwijik anch muntu kanang wasadin chitil chikash, ap akutwish pamwing ap kushiken kwijik yom yiney. Anch chid mwamu, “antu awonsu” akutwish kwikal chikumangen cha kabuj. Chawiy mukurump ukutwish kwijikish chikumangen anch mukadivar ap nambaz kanang amupupin. Mulong wak? Paul wakwil anch: ‘Mulong wa kuyibabesh ashadinaku’ chakwel kangal asal yitil yikash. w24.08 23-24 par. 16-17

Tufanyidin kukwatikan nakash mu mudimu wa Yehova djat kamu ni kwinsuden. In Kristu azizidinau many akushal achila ku mes chakwel ‘ayisend’ kud Yesu mulong wa kuyinkish difut dau mwiur. (Mat. 24:40) Antu inay achingedin kamu nich impu nakash chisu ‘chikuyikumangejau pamwing’ kud Yesu mwiur. Kupwa kwa njit ja Armagedon, akwikal ngachik ku musambu wa uruw wa Mwan a Mukoku. (2 Tes. 2:1) Ap anch dirumburish did kamu piswimp nakash, tukwetap mayingishin ma kwov wom. Anch twashal ashinshamena, Tatukwetu wa rukat uda mwiur ukutwinkish ‘usu usutinamu wa antu’ chakwel ‘tutwish . . . kwiman kurutu kwa Mwan a muntu.’ (2 Kor. 4:7; Luka 21:36) Ruchingej retu rikal ra kuya mwiur ap ra kushakam pa divu, tukumusangaresh Tatukwetu anch twaziyin ku kubabesh kuda mu yishimu ya Yesu. Ni ku ranaken rijim ra Yehova, majin metu ‘akumafund mu mukand’ wa mwom.​—Dan. 12:1; Kuj. 3:5. w24.09 24-25 par. 19-20

Ukutwish kwikal ni chisambu cha mu manangu kusutil ukwash wa Dizu da Nzamb. Mutapu ik? Kusutin kuvurik yom yiwamp ukweta katat, yiyukish ya Yehova ni kwijik anch Yehova kakatap kuyikwash antu akad kumusadin. Chikwau kand, antu akad kumusadin Yehova akat kusanger mwom uwamp ukwetau katat mulong kakwetap kwau ruchingej ra machuku ma kurutu. Pakwez, Yehova ushidinamu kukwinkish ey yiyukish yivud yiwakad kutongin. (Kus. 145:16) Shinshikin kand yom yiney: tukutwishap kamu kwijik mutapu wafanyinang kwikal mwom wetu nlel anch twakwata mupak windj. Uyakin ud anch, antu awonsu akwata kal mupak wimedina pa rukat rau mulong wa Nzamb ni mulong wa antu akwau kakatap kwinan. w24.10 27 par. 12-13