Nawume
1 Dzrungula ledzri hlayiwiki ku lwisana ni doropa dzra Ninivha. Buku dzra xivoniso xa Nawume* wa Muelkoxi.
2 Yehovha i Xikwembu Nkulukumba lweyi a djulaka leswaku mhunu a tinyiketela kwake hi lani ku heleliki nakone a dzrihiselaka;
Yehovha awa dzrihisela futsrhi a tiyimisele ku kombisa mahlundzru yake.
Yehovha awa tidzrihisela ka lava va lwisanaka na yene
Nakone a va hlundzrukela ngopfu valala vake.
3 Yehovha a hlwela ku hlundzruka* nakone a ni ntamu wa wukulu ngopfu swinene,
Kambe Yehovha a nge ti tsrhika ku va khatisa lava swi va fanelaka.
Loko a famba, ku hunga moya ni xidzedze leswi honetelaka,
Nakone a matlavi ma fana ni ntsrhuzri wa minkondzro yake.*
4 A kawuka lwandle a va a dzri womisa;
Nakone a womisa milambu hinkwayu.
A swimilana swa Baxani ni swa Karmeli swa buna,
Ni swiluva swa Lebanoni swa buna.
5 A tinhava ta tsrekatsreka hi mhaka yake,
Nakone a maganga ma nyivilika.
A misava yi ta tsrekatsreka hi kola ka wuso byake,
Misava kun’we ni hinkwavu lava va tsrhamaka ka yone.
6 I Mani lweyi a nga yimaka mahlweni ka mahlundzru yake?
Nakone i mani lweyi a nga tiyiselelaka mahlundzru yake lamakulu?
A mahlundzru yake ma ta txhululiwa ku fana ni ndzrilo,
A ta yentxa leswaku mazribye ma khemekela.
7 Yehovha i munene, i khokholo hi siku dzra mahlomulo.
Awa va hlayisa* lava djulaka ku tumbela kwake.
8 Hi ndhambhi leyi honetelaka, a ta helisa hi ku helela mbangu lowu a nga ka wone,*
Nakone a munyama wu ta hlongolisa valala vake.
9 Hi wani maqhinga lawa mi taka ma hamba ku lwisana na Yehovha?
A ta mi helisa hi ku helela.
A nge ti vilela ku mi buyisela mahlomulo ka wubidzri.*
10 A vhanu va Ninivha va fana ni mitwa leyi tsrimbelelaniki
Nakone va fana ni lava va popswaka hi byala,*
Kambe va ta hisiwa ku fana ni byanyi bya ku woma.
11 Kwaku* ku ta huma lweyi a kunguhataka swa ku biha ku lwisana na Yehovha,
Lweyi a nyikelaka swilayu leswi kalaka swi nga pfuni ntxhumu.
12 Yehovha a li:
“Nambileswi va nga ni ntamu va tlhela va va vanyingi,
Va ta helisiwa va va va nga ha vi kone.*
Ni ku xanisile kambe a ni nge he ti tlhela ni ku xanisa.*
13 Kambe swoswi ni ta tsrhova kangi dzrake ledzri dzri nga kwaku,
Nakone ni ta phinya mapindzra yake.
14 Yehovha a hlaya leswi mayelanu na wene:*
‘A ku nge he ti va ni lixaka ledzri taka vitaniwa hi vito dzraku.
Ni ta helisa swithombe leswi vatliwiki ni swithombe leswi hambiwiki hi nsimbi* leswi nga ndlwini ya* swikwembu swaku.
Ni ta ku lulamisela sizra, hikusa wene a wu pfuni ntxhumu.’
15 Ma swi twa! Lweyi a tisaka madzrungula lamanene,
A huwelelaka ku zrula, a ta hi le tinhaveni.
Tlangela minkhuvu yaku, Wene Yuda, hetisisa swidumbiso swaku,
Hikusa kwaku a ku nge he tlheli ku tsremakanya mhunu lweyi a kalaka a nga pfuni ntxhumu.
A ta helisiwa hi ku helela.”