Nawume
2 Ninivha, ku nga lweyi a hangalasaka, a tlhantukile ku ta lwisana na wene.
Sizrelela muru.*
Tsrhama na u zrindzre ndlela.
Tilulamiseli* nakone yentxa hinkwaswu leswi u nga swi kotaka akuva u lulamela yimpi.
2 Hikusa Yehovha a ta yentxa leswaku Yakobe a tlhela a va ni xintsrhuti,
Ni leswaku Israyele a tlhela a va ni xintsrhuti,
Hikusa lava honetelaka va honetele tiko dzravu;
Va va va wisa mazrwavi* yavu lamampshwa.
3 A switlhangu swa vavanuna vake va ntamu swi pendiwe swi va swa ku pshwuka,
A valwi vake va yimpi va yambale mpahla ya ku pshwuka.
A swiyenge leswi nga swa nsimbi swa tin’qolo take ta yimpi swi phatima ku fana ni ndzrilo
Hi siku ledzri a tilulamiselaka ha dzrone ku lwa,
Nakone a matlhazri lawa ma hambiwiki hi nsinya wa yunipa ma hlakahliwa.
4 A tin’qolo ta yimpi ti tsrutsruma tindleleni hi ndlela leyi nga lawulekiki.
Ti tsrutsruma ti tlhantuka na ti fulamela a mimbangwini leyi pfulekiki.
Ti phatima ku fana ni swisa swa ndzrilo, ti tlhela ti hatima ku fana ni lihati.
5 A ta vitana* vazrangeli vake.
Va ta wa nkama lowu va fambaka.
Va ta tsrutsruma va ya ka muru wake;*
Va ta sizrelela muru.
6 A tinyangwa ta milambu ti ta pfuliwa,
Nakone a yindlu ya wuhosi yi ta helisiwa.*
7 Ku tsremiwe leswi: A doropa dzra Ninivha dzri le nkangala,
Dzri ta tekiwa dzri yisiwa kule;
Nakone a swikazrawa swa dzrone swa xisati swi ta dzrila, swi ta dzrila ku fana ni matuva swi tlhela swi tiba swifuva.*
8 A doropa dzra Ninivha nkama hinkwawu dzri ve swanga mbangu wa ku hlayisela ka wone mati,
Kambe swoswi a mati ma phondla.
“Yimani! Yimani!”
Kambe a ku na lweyi a tlhelaka ntsrhaku.
9 Phangani prata, phangani woru!
A wukosi a byi na wugamu.
Byone byi tale hi mixaka hinkwayu ya mintxhumu ya lisima.
10 A doropa a dzri na ntxhumu, i zrumbi, dzri honeteliwile!
A timbilu tavu ta nyivilika hi ku txhava, a matsrolo yavu ma gudlagudla ni mintsrhumbi yavu ya zruzrumela.
A mawuso yavu hinkwawu ma kombisa ku xukuvala.
11 He kwini lomu tinghonyama ti tumbelaka kone, lomu swinghonyamana swi daka kone,
He kwini lomu nghonyama ni n’wana wa yone swi humaka kone,
Lakakuva ku nga vi ni mhunu lweyi a swi txhavisaka?
12 A nghonyama a yi hlotela* vana va yone nyama leyi a yi ta va dzringana
Yi tlhela yi dlayela tinghonyama ta xisati swihazri.
A yi tsrhama na yi tate timhakwa ta yone hi leswi yi swi khomiki,
Mimbangu leyi yi tumbelaka ka yone na yi tale hi swihazri leswi yi swi dlayiki.
13 “Lavisa! Ni lwisana na wene,” ku hlaya Yehovha wa makhandzra,
“Ni ta hisa tin’qolo take ta yimpi ti mpukuka musi,
Nakone a xipada xi ta helisa swinghonyamana swake.
Ni ta helisa a misaveni leswi u swi phangaka,
A zritu dzra vazrangeli vaku a dzri nge he ti twala.”