Mpfuletelo Lowu Yamukeliwiki Hi Yohane
9 A ntsrumi ya wuntlhanu yi txhaya xipalapala* xa yone. Kutani ni vona nyeleti leyi wiki misaveni na yi sukela tilweni, yi gama yi nyikiwa* mpfungulu wa xikhele* xa ku yenta. 2 Yi pfula* xikhele xa ku yenta, kutani ka xikhele xolexo ku huma ximusi xa ku fana ni ximusi xa ndzrilo lowukulu, a dambu ni moya swi mphumisiwa hi ximusi lexi a xi huma a xikheleni xolexo. 3 Kutani ka ximusi xolexo ku huma mintete yi ya misaveni, yi nyikiwa ntamu wa ku fana ni lowu swizavanana* swa le misaveni swi nga na wone. 4 Yi byeliwa leswaku yi nga honi swimilana swa misava, swinsinyana kumbe minsinya, kambe yi yela ntsena vhanu lava kalaka va nga na wone mfungu wa Xikwembu Nkulukumba a mimombyeni yavu.
5 Yi nyikiwe mpfumelelo wa kuva yi va xanisa ku dzringana ntlhanu wa tihweti, kambe yi nga va dlayi, nakone a ku xaniseka kwavu* a ku fana ni ku xaniseka loku mhunu a ku twaka loko a lumiwa hi xizavanana. 6 A masikwini wolawo, vhanu va ta djuletela lifu kambe a va nge ti dzri kuma, nakone va ta navela ku fa, kambe a lifu dzri ta va tsrutsruma.
7 A mintete yoleyo a yi fana ni makavhalu lama lulameliki yimpi; a tinhlokweni ta yone a ku ni leswi a swi tikomba ingiki i tingiyana ta woru, a mawuso ya yone a ma fana ni mawuso ya vhanu, 8 kambe a yi ni misisi ya ku fana ni misisi ya vavasati. A matinyo ya yone a ma fana ni ya tinghonyama, 9 a swisizrelelo swa yone swa swifuva a swi fana ni swisizrelelo swa xifuva leswi hambiwiki hi nsimbi. A mpfumawulu wa timpapa ta yone a wu fana ni mpfumawulu wa tin’qolo leti kokiwaka hi makavhalu lama tsrutsrumelaka yimpini. 10 Nakone yi ni minkila leyi nga ni mintsrhombo ya ku fana ni ya swizavanana,* a ntamu wa ku vavisa vhanu ku dzringana ntlhanu wa tihweti wu le minkileni ya yone. 11 A mintete leyi yi ni hosi, ku nga ntsrumi ya xikhele xa ku yenta. Hi Xiheberu a vito dzra yone i Abadoni,* kambe hi Xigriki i Apoliyoni.*
12 A khombo dzra ku sungula kutani dzri khalutile. Kambe ka ha ta makhombo mabidzri ntsrhaku ka mintxhumu leyi.
13 A ntsrumi ya wu 6 yi txhaya xipalapala xa yone. Kutani ni twa zritu ledzri humaka hi ka timhondzro leti nga ka altari dzra woru ledzri nga mahlweni ka Xikwembu Nkulukumba 14 dzri byela ntsrumi ya wu 6 leyi a yi ni xipalapala dzri ku: “Ntsrhunxa mune wa tintsrumi leti tsrimbiwiki a nambyeni lowukulu wa Ewufrata.” 15 Kutani ku ntsrhunxiwa mune wa tintsrumi leti a ti yimele wora, siku, hweti, ni lembe akuva ti dlaya xiyenge xitsrongo xa vhanu.
16 A nhlayu ya masotxha lawa a ma famba hi makavhalu a yi li 200.000.000;* ni yi twile nhlayu ya wone. 17 A makavhalu kun’we ni lava a va tsrhame ka wone ni va vonise xileswi a xivonisweni: A va ni swisizrelelo swa xifuva swa ku pshwuka ku fana ni ndzrilo, swa muvala wa nkuxe,* ni swa muvala wa halandi* ku fana ni xivavula,* a tinhloko ta makavhalu a ti fana ni tinhloko ta tinghonyama, nakone a ku huma ndzrilo, ximusi, ni xivavula a minon’wini ya wone. 18 Kutani a xiyenge xitsrongo xa vhanu xi dlayiwa hi mintungu leyizrazru, ku nga ndzrilo, ximusi ni xivavula leswi a swi huma hi le minon’wini ya wone. 19 Hikusa a ntamu wa makavhalu wu le minon’wini ni le minkileni ya wone, swanga hi leswi a minkila ya wone yi fanaka ni tinyoka futsrhi yi nga ni tinhloko, nakone ma vavisa vhanu hi minkila yoleyo.
20 Nambitanu, a vhanu lavan’wana lava kalaka va nga dlayiwanga hi mintungu leyi a va tisolanga ka mintizro ya mavoko yavu; kambe va tame va gandzrela mademona, swithombe swa woru, swa prata, swa kobri, swa zribye ni swa ku vatliwa, leswi swi kalaka swi nga voni, ku yingela nambi ku famba. 21 A va tisolanga ka swidoho swavu, ku nga ku dlaya, wungoma, swiyentxo swa tingana hi tlhelo dzra tinkuku* nambi ku yiva.