Fevhereru

Nkama lowu Hosi Ezekiya a a vabya ngopfu, a kombele leswaku Yehovha a mu hanyisa. Yehovha a hlamule xikhongoto xake hi ku mu hanyisa. (2 Tih. 20:1-6) Kambe loko mupostola Pawulo a kombele leswaku Yehovha a mu susa “mutwa a nyameni”, Yehovha a nga swi yentxanga leswo. (2 Kor. 12:7-9) Hosi Heroda a a djula ku dlaya mupostola Yakobe na Petro. Yakobe a dlayiwile kambe Petro a huluxiwile hi ntsrumi. (Mint. 12:1-11) Hi nga ha tivutisa leswi: ‘Ha yini Yehovha a huluxe Petro kambe a pfumelele leswaku Yakobe a dlayiwa?’ A Bibele a dzri hi byeli ntxhumu a mhakeni leyi. Lexi hi nga tiyisekaka ha xone hi leswaku tindlela ta Yehovha ti “lulamile”. (Deut. 32:4) Minkama yin’wana Yehovha a nga hlamula swikhongoto swezru hi minkama leyi a hi nga yi yimelanga. Kambe leswi hi dumbaka leswaku Yehovha a ta hlamula swikhongoto swezru hi ndlela ya lizrandzru ni leyi lulamiki, a hi ganaganeki hi ndlela leyi a hlawulaka ku hi hlamula ha yone.—Yb. 33:13. Xihondzro Xa Ku Zrindzra 11/2023 p. 21 § 6

Yakobe a huhuteliwe ku tsrala leswaku a mhunu wa ku tlhazriha “a lulamele ku yingiseta.” Kambe swi djula ku hlaya yini leswo? Swi hlaya leswaku hi fanela ku tiyimisela ku yingiseta lava Yehovha a va nyikiki wulawuli. Kambe swi le livaleni leswaku Yehovha a nga yimeli leswaku hi yingiseta mhunu lweyi a hi kombelaka kuva hi yentxa leswi lwisanaka ni minkongomiso Yake. (Mint. 4:18-20) I ntiyiso leswaku swi nabyalile kuva hi yingiseta Yehovha ku tlula mhunu hikusa minkama hinkwayu Yehovha a hi nyika minkongomiso leyi hetisekiki. (Amaps. 19:7) Vhanu lava nga ni wulawuli a va hetisekanga nakone a hi minkama hinkwayu va nyikelaka minkongomiso leyinene. Nambitanu, Yehovha a nyikele wulawuli bya kukazri ka vapswele, tihosi ta misava ni vakulu a bandleni. (Amapr. 6:20; 1 Tes. 5:12; 1 Pet. 2:13, 14) Nakunene loko hi va yingiseta, hi va na hi yingiseta Yehovha hi ku kongoma. Xihondzro Xa Ku Zrindzra 10/2023 p. 6 §§ 2-3

Ntxhumu lowu wu nga hi pfunaka ku tiyisa lipfumelo dzrezru i ku yanakanyisisa hi ntamu wa Yehovha. A ni ntamu wa ku hetisisa hinkwaswu leswi a swi dumbisiki. Hikusa yene i wa Ntamu Hinkwawu. (Yb. 42:2; Mar. 10:27; Efe. 3:20) A dumbise Abrahamu na Sara leswaku nambileswi a va duhalile a va ta va ni n’wana. (Gen. 17:15-17) A tlhele a dumbisa Abrahamu leswaku a tiko dzra Kanana a a ta dzri nyika lixaka dzrake. Xidumbiso lexo a xi tikomba ingiki a xi nga ti hetiseka hikusa Vaisrayele lava a va lumba lixaka dzra Abrahamu, va xanisiwe ku dzringana malembe manyingi na va li swikazrawa a tikweni dzra Egipta. Kambe swi yentxekile. A dumbise leswaku Mariya lweyi a a li n’hwanyana, a a ta pswala N’wana wa Xikwembu Nkulukumba, akuva a hetisisa xidumbiso lexi a xi yentxiki malembe ntsrhaku a xizrambeni xa Edeni! (Gen. 3:15) Loko hi yanakanyisisa hi ndlela leyi Yehovha a swi hetisisiki ha yone swidumbiso swake a nkameni lowu khalutiki, lipfumelo dzrezru dzra leswaku misava leyimpshwa yi ta tlhasa, dzri ya dzri tiya.—Yehoš. 23:14; Eza. 55:10, 11. Xihondzro Xa Ku Zrindzra 04/2023 p. 28 §§ 10-12

Yehovha a hlamule swikhongoto swa Davhida swa ku kombela ku huluxiwa. (1 Sam. 19:10, 18-20; 2 Sam. 5:17-25) Na hine hi nga va ni ku tiyiseka loku fanaka. (Amaps. 145:18) Swi nga yentxeka Yehovha a nga hlamuli swikhongoto swezru hi lani hine a hi swi yimeli ha kone. Pawulo a kombele Yehovha akuva a mu susa “mutwa a nyameni”. Swi ze swi ku makhambi mazrazru na Pawulo a khongota hi mhaka leyi. Xana Yehovha a swi hlamulile swikhongoto leswo? Ina. Kambe a nga swi hlamulanga hi ndlela leyi Pawulo a a yimela leswaku a ta swi hlamula ha yone. A matsrhan’wini ya ku va Yehovha a susa xikazratu xa Pawulo a mu nyike ntamu lowu a a wu vilela akuva a tama a mu tizrela hi ku dumbeka. (2 Kor. 12:7-10.) Minkama yin’wana, Yehovha a nga ha hlamula swikhongoto swezru hi ndlela leyi a hi nga yi yimelanga. Kambe hi nga tiyiseka leswaku Yehovha a swi tiva ha hombe leswi nga swinene kwezru. A nga tlhela a “yentxa swa ku tlula hinkwaswu leswi hi swi kombelaka kumbe ku swi yanakanya”. (Efe. 3:20) Xileswo, Yehovha a nga hlamula swikhongoto swezru hi nkama ni hi ndlela leyi a hi nga yi yanakanyi. Xihondzro Xa Ku Zrindzra 05/2023 pp. 8-9 §§ 4-6

Minkama yimbeni, hinkwezru hi fanela ku yanakanya hi dumbo dzra ku pfuka ka vafi. Ha yini? Hikusa a hi swi tivi leswaku he dzrini lani hi taka khomiwaka hi mavabyi lamakulu kumbe hi taka luzekeliwa hi mhunu lweyi hi mu zrandzraka. (Ekles. 9:11; Yak. 4:13, 14) Dumbo ledzri dzra ku pfuka ka vafi dzri nga hi nyika ntamu lowu hi wu vilelaka akuva hi lavisana ni swikazratu leswo. (1 Tes. 4:13) A Bibele dzri hi tiyisekisa leswaku Yehovha, Papayi wezru lwa nga matilweni, a hi tiva ku yampswa nakone a hi zrandzra ngopfu. (Luk. 12:7) Yehovha a hi tiva ku yampswa lakakuva a ta pfuxa mun’wana ni mun’wana na a ni wumhunu byake ni ku tlhelisela miyanakanyu yake ya khale. Nakone a hi zrandzra ngopfu lakakuva a hi nyika mukhandlu wa ku hanya hi la ku nga helikiki nambiloko swi sindzrisa kuva a yentxa hi ku hi pfuxa! Ha yini hi fanela ku kholwa ka xidumbiso xa ku pfuxiwa ka vafi? Hikusa ha tiyiseka leswaku Yehovha Lweyi a dumbisaka a na kone ku navela, ntamu ni wuswikoti bya ku swi hetisisa. Xihondzro Xa Ku Zrindzra 04/2023 pp. 8-9 §§ 2-4

Yosefa na Mariya a va tizra kun’we akuva va tiyisa wuxaka byavu na Yehovha. A va swi tiva leswaku i swa lisima ku tizrela Yehovha swanga ndangu. (Luk. 2:22-24; 4:16) Lexi i xikombiso lexinene ka vatekani namunhla. Loko u ni vana, ku fana na Yosefa na Mariya, swi nga ha yentxeka ku li xikazratu ku ya a mintlhanganwini kumbe ku tinyika nkama wa ku va ni wugandzreli bya ndangu. Nakone swi nga ha yentxeka swi mi kazratela ku tinyika nkama wa ku dondzra ni ku khongota xikan’we swanga vatekani. Kambe u nga dzrivali, nkama lowu mi yaka mi gandzrela Yehovha xikan’we, mi ya mi tsrhindzrekela kusuhi na yene ni ku tlhela mi tiyisa wukati byenu. Kutani, zrangisani mintizro ya moya a wuton’wini byenu. Loko u lavisana ni swikazratu a wukatini byaku, swi nga yentxeka mi nge na ntamu nambi wa ku hamba wugandzreli bya ndangu xikan’we. Ka swiyimu swa ku fana ni leswo, mi nga ha sungula hi timhaka leti nabyaliki kumbe ku hlawula mhaka leyi yi mi nyonxisaka. Ku yentxa leswo swi ta tiyisa lizrandzru dzrenu ni ku kulisa ku navela ka ku yentxa mintxhumu ya moya na mi li xikan’we. Xihondzro Xa Ku Zrindzra 05/2023 p. 22 §§ 7-8

Xana ku txhava loku Obadiya a li na kone ha Yehovha ku mu pfune hi ndlela yini? Ha swi tiva leswaku Obadiya a ve wanuna wa ku dumbeka. Hi leswo swi yentxiki kuva hosi yi mu beka leswaku a va muvoneleli wa yindlu ya wuhosi. (Dzringanisa Nehemiya 7:2.) Ku ve ku txhava koloko loku nyikiki Obadiya Xixixi. Nakone handle ka ku ganaganeka a a ta dzri vilela ngopfu tsrhamela ledzri. A hanye hi nkama lowu a ku fuma hosi Akabe lwe wa ku biha. (1 Tih. 16:30) Handle ka leswo, a nsati wa Akabe, Yezabele, a a li mugandzreli wa Bali. Yene a a mu nyenya ngopfu Yehovha, lakakuva a dzringise ku helisa wugandzreli bya ntiyiso hi ku helela ka tinxaka ta 10 ta Israyele. A patsre ni ku dlaya vaprofeta vanyingi va Yehovha. Loko Yezabele a sungule ku landzrelela vaprofeta va Xikwembu Nkulukumba akuva a va dlaya, Obadiya a fihle 100 wa vaprofeta va Yehovha hi ‘mintlawa ya 50 ni ku va phamela makati ni mati’. (1 Tih. 18:13, 14) Loko Yezabele a e swi gungula leswo, handle ka ku ganaganeka Obadiya inaka a dlayiwile. Swi nga yentxeka Obadiya a khomiwe hi ku txhava hikusa a a nga djuli ku fa. Kambe lizrandzru ledzri a a li na dzrone ha Yehovha kun’we ni malandzra yake a dzri li dzrikulu lakakuva a a tiyimisele nambi ku nyikela wutomi byake loko swi vileleka. Xihondzro Xa Ku Zrindzra 06/2023 p. 16 §§ 9-10

Yehovha a ha tama a kongomisa vhanu vake namunhla swanga hi lani a yentxiki ha kone nkameni lowu khalutiki. A yentxa leswo hi ku tizrisa Bibele ni N’wanake lweyi a nga nhloko ya bandla. Xana Xikwembu Nkulukumba a ha tama a tizrisa vhanu akuva va zrangela vhanu vake? Ina. Hi xikombiso, vona leswi yentxekiki ntsrhaku ka 1870. Charles Taze Russell kun’we ni vanghanu vake va twisise leswaku lembe dzra 1914 a ku ta va lembe dzra lisima ka Mfumu wa Xikwembu Nkulukumba. (Dan. 4:25, 26) Va tiseketele ka wuprofeta bya Bibele akuva va tlhasela wugamu lebyo. Xana Yehovha a a seketela wusentxhi lebyi va byi hambiki a Bibeleni? Nakunene a a va kongomisa. Leswi swi yentxekiki hi 1914, swi kombise leswaku a Mfumu wa Xikwembu Nkulukumba wu sungule ku fuma. Ku sungule hi yimpi ya ku sungula ya misava, ku landzrela mavabyi, ku tsrekatsreka ka misava ni ku pfumaleka ka swakuda. (Luk. 21:10, 11) Nakunene, Yehovha a a tizrisa vavanuna lavayani va ku dumbeka akuva va pfuna vhanu vake. Xihondzro Xa Ku Zrindzra 02/2024 p. 22 § 11

Swanga vhanu va Yehovha, ha swi tiva leswaku awa hi zrandzra nakone a djula leswaku hi nyonxa. (Rom. 8:35-39) Nakone ha swi tiva leswaku ku tizrisa minsinya ya milawu ya Bibele swi pfuna hine. (Eza. 48:17, 18) Kambe hi fanela ku yangulisa kuyini loko ku humelela xikazratu lexi a hi nga xi yimelanga a wuton’wini byezru? Hi xikombiso, xizro xa kukazri a ndangwini xi nga ha hi khunguvanyisa, kumbe hi nga ha va ni mavabyi lamakulu lawa ma nga ha hi sivelaka ku yentxa leswi a hi swi navela a ntizrweni wa Yehovha. Hi nga ha kumana ni mhangu ya ntumbuluku kumbe ku xanisiwa hi kola ka leswi hi swi kholwaka. Loko hi kumana ni swiyimu swa ku fana ni leswo hi nga ha tivutisa leswi: ‘Ha yini ni humeleliwa hi leswi? Xana ni yentxe ntxhumu wa kukazri lowu hoxekiki? Xana leswo swi kombisa leswaku Yehovha a nga ha ni tovokisi?’ Swi nga yentxeka u ke u titwisa xileswi. Loko swi li hi ndlela leyo, u nga heli ntamu. Malandzra manyiki lama dumbekiki ya Yehovha ma ke ma titwa hi ndlela leyi fanaka.—Amaps. 22:1, 2; Heb. 1:2, 3. Xihondzro Xa Ku Zrindzra 04/2023 p. 14 §§ 1-2

Loko hi dzringeka ku yentxa leswi bihiki, hi ku kahlula hi tekela ku bakanya mayanakanyela ni swiyentxo leswi nga honaka wuxaka byezru na Xikwembu Nkulukumba. Yehovha a yimela leswaku hi va “lava yingisetaka hi timbilu [tezru] hinkwatu”. (Rom. 6:17) Minkongomiso ya Yehovha yi pfuna hine nakone a hi nge yi txintxi milawu yake. (Eza. 48:17, 18; 1 Kor. 6:9, 10) Sathana a tizrisa tihanyi ni ku hi yentxa hi pimisa hi ndlela leyi nga liki yone akuva a tsranisa ku tiyimisela kwezru. Nkongometo wake i ku hi “hahlulela” kumbe ku helisa wuxaka byezru na Yehovha. (1 Pet. 5:8) A vakriste va ku sungula va txhaviseliwile, va biwa ni ku tlhela va dlayiwa hi kola ka ku tiyimisela kwavu ka ku tama va yima na va tiyile. (Mint. 5:27, 28, 40; 7:54-60) Namunhla wa siku, Sathana a ha tama a tizrisa nkaneto. Leswo hi swi vona hikusa vamakwezru va khomiwa hi ndlela ya tihanyi hi mfumu wa Rússia ni matiko man’wana. A misaveni hinkwayu, a vakaneti va landzrelela vamakwezru hi tindlela ta ku siyanasiyana. Handle ka ku tizrisa mindzringo leyi kongomiki, Sathana a tlhela a tizrisa “mazrengu” akuva a hi hlasela.—Efe. 6:11. Xihondzro Xa Ku Zrindzra 07/2023 pp. 15-16 §§ 6-9

Loko u ya u dondzra Zritu dzra Xikwembu Nkulukumba, lizrandzru dzraku ha Yene dzri ta ya dzri kula. Nakone lizrandzru ledzro dzri ku kutxa ku hanya hi leswi u swi dondzra. U kota ku teka swiboho swa wutlhazri leswi seketeliwiki ka minsinya ya milawu ya Bibele, u yampswisa matsrhamela yaku ni mayanakanyela yaku hikusa u djula ku nyonxisa Xikwembu Nkulukumba. Nakone hi lani a n’wana a yetiselaka papayi wake wa lizrandzru ha kone, na wene u zama ku yetisela Papayi waku wa le tilweni. (Efe. 5:1, 2.) U nga ha tivutisa leswi: Xana lizrandzru ledzri ni nga na dzrone ha Yehovha swoswi dzri tiyile ku tlula ledzri a ni li na dzrone nkama lowu ni viki mukriste ha wone? Ku sukela loko ni babatisiwile, xana ni yanakanya ni ku yentxa hi ndela leyi Yehovha a yentxaka ha yone? Xana na kombisa lizrandzru ka vamakwezru a bandleni? Loko hi ndlela ya kukazri a “lizrandzru ledzri a wu li na dzrone a ku sunguleni” dzri holile, u nga godoli. Ku humelele ntxhumu lowu fanaka ka vakriste a dzanenei dzra ku sungula. Yesu a nga va helelanga mbilu nakone a nge ti ku helela mbilu na wene. (Mpful. 2:4, 7) Awa swi tiva leswaku u nga swi kota ku tlhela u hlanganyetela lizrandzru ledzri a u li na dzrone nkama lowu u sunguliki ku dondzra ntiyiso ha wone. Xihondzro Xa Ku Zrindzra 07/2023 p. 8 §§ 2-3

Mupostola Petro a hambe swihoxo swihinyingi. Ku sungula, Petro a a tidumba nakone a a tibyela leswaku a dumbeke ngopfu ni leswaku a a ta tama a va na Yesu nambiloko vapostola van’wana va mu tsrhika. (Mar. 14:27-29) Petro a hluleke makhambi manyingi ku tama a zrindzra. (Mar. 14:32, 37-41) Ntsrhaku ka leswo, loko ku te xitsrhungu xi ta khoma Yesu, Petro a pandile a mu siya. (Mar. 14:50) Hi wugamu, Petro a yale Yesu makhambi mazrazru ni ku hlambanya leswaku a nga mu tivi. (Mar. 14:66-71) Xana Petro a titwise kuyini ntsrhaku ka loko a xiye swihoxo hinkwaswu leswi a swi yentxiki? A vaviseke ngopfu ni ku tlhela a dzrila hi xiviti. (Mar. 14:72) Yesu a nga mu holovelanga Petro, handle ka leswo, a mu tiyisile hi ku mu byela leswaku a a ta kuma wutiyanguleli lebyikulu. (Yoh. 21:15-17) Petro a a swi tiva leswaku a yentxe xihoxo lexikulu, kambe a tikazrate ngopfu kuva a tama a yentxa leswi nga swinene. Ha yini? Hikusa Petro a a swi tiva leswaku N’winyi wake, Yesu, a a nga mu helelanga mbilu. Hi dondzra yini? Yehovha a djula leswaku hi tiyiseka leswaku awa hi zrandzra ni ku hi dzrivalela.—Rom. 8:38, 39. Xihondzro Xa Ku Zrindzra 03/2024 pp. 18-19 §§ 13-15

Ku tikhoma hi ndlela ya ku biha hi tlhelo dzra tinkuku swi nga ku yentxa u va ni tingana, ku titwa na u nga pfuni ntxhumu, ku va ni tinyimba leti kalaka ti nga yimeliwanga ni ku hohlota mindangu. Nakunene, i wutlhazri ku fambela kule ni yindlu ya wansati lweyi wa ku mphunta. Handle ka ku fa hi tlhelo dzra moya, vhanu vanyingi lava tikhomaka hi ndlela ya ku biha hi tlhelo dzra tinkuku va kuma mavabyi van’wana va va va fa hi ka kunene. (Amapr. 7:23) Amaproverbia ndzrima 9 ndzrimana 18 loko yi gama yi li: ‘Lava a va zrambiki va le ku yeteni ka sheol.’ Loko xizrambu lexi xi li ni makhombo, ha yini vhanu vanyingi va xi yamukela? (Amapr. 9:13-18) Ntlhamu lowu tolovelekiki ngopfu namunhla i pornografiya. Van’wana va yanakanya leswaku a swi na khombo ku hlalela pornografiya. Kambe ku hlaya ntiyiso, a pornografiya dzri vanga swikazratu swinyingi, byi nga ha yentxa mhunu a nga tinyiki lisima ni kuva a nga va hloniphi van’wana nakone byi nga ha ndzruluka xihena lexi kazrataka ku xi tsrhika. Swifaniso leswi mhunu a swi hlaleliki ka ponografiya swi nga ha kazrata ku suka miyanakanywini. A ponografia a dzri dlayi ku navela ka ku yentxa leswa ku biha, a matsrhan’wini ya leswo dzro yentxa leswaku ku navela koloko ku tama ku kula. (Kol. 3:5; Yak. 1:14, 15) Hi mhaka leyo, vanyingi lava hlalelaka pornografiya va hetelela hi ku tikhoma hi ndlela ya ku biha. Xihondzro Xa Ku Zrindzra 06/2023 p. 23 §§ 10-11

Nambileswi matiko man’wana ma zamaka ku teka wumbangu bya mfumu wa Anglo-America ku nga mfumu, wa misava hinkwayu, kambe a ma nge ti swi kota. Ha yini? Hikusa a mfumu lowu wu to helisiwa hi Mfumu wa Xikwembu Nkulukumba, lowu yimeliwaka hi ‘zribye’ ledzri taka helisa minkondzro ya xifaniso lexi yimelaka mfumu wa misava hinkwawu wa Anglo-America. (Dan. 2:34, 35, 44, 45) Xana wa tiyiseka leswaku wuprofeta bya Daniyele mayelanu ni minkondzro ya nsimbi leyi patsrinyetiwiki ni vumba bya hetiseka? Loko u tiyiseka hi leswo, swi ta kutxetela ndlela leyi u hanyaka ha yone. A wu nge ti tsrhamela ku landzrelela mintxhumu ya nyama kumbe ku dzringisa ku va lweyi a ganyiki hikusa wa swi tiva leswaku ku nge khale misava leyi yi ta helisiwa. (Luk. 12:16-21; 1 Yoh. 2:15-17) Ku twisisa wuprofeta lebyi swi ta tlhela swi ku pfuna ku vona lisima dzra ntizro wa ku zrezra ni wa ku dondzrisa. (Mat. 6:33; 28:18-20) Ntsrhaku ka loko u dondzre wuprofeta lebyi, u nga ha tivutisa leswi: ‘Xana swiboho leswi ni swi tekaka a wuton’wini byanga, swi kombisa leswaku na tiyiseka leswaku ku nge khale Mfumu wa Xikwembu Nkulukumba wu ta helisa mimfumu hinkwayu ya vhanu?’ Xihondzro Xa Ku Zrindzra 08/2023 p. 11 §§ 13-14

Va na lwa dzringaniselaka nakone pfumela leswaku awa ha koti ku yentxa hinkwaswu hi lani a wu djula ha kone hi kola ka ntanga, lihanyu kumbe swiyimu swin’wana. Ku fana na Barzilayi, yala swiyavelo leswi u tivaka leswaku a u nge ti swi kota ku swi hetisisa. (2 Sam. 19:35, 36) Nakone ku fana na Moxe, kombela mpfunu nakone yavelana ni van’wana wutiyanguleli lebyi u nga na byone loko swi kotela. (Eks. 18:21, 22) Ku dzringanisela koloko, ku ta pfuna kuva u nga yimeli mintxhumu leyi nga ku yentxaka u kazrala. Nakone a hi fanelanga ku titwa nandzru hi kola ka swiboho leswi hoxekiki swa van’wana. Hine a hi na mfanelo ya ku tekela van’wana swiboho; nambi ku va sizrelela ka mintxhumu ya ku biha leyi nga ha humelelaka hi kola ka swiboho swavu. Hi xikombiso, swi nga yentxeka a n’wana a teka xiboho xa ku tsrhika ku tizrela Yehovha nakone vapswali va nga ha vaviseka ngopfu hi kola ka xiboho lexo. Kambe loko vapswali va tsrhamela ku titwa nandzru hi kola ka xiboho xa n’wananavu, leswo swi nga ha va ntsrhwalu lowukulu kwavu nakone ntsrhwalu lowu a hi wone lowu Yehovha a djula leswaku va wu zrwala. Xihondzro Xa Ku Zrindzra 08/2023 p. 29 §§ 11-12

Samisoni a a li mhunu wa ku kala ku hetiseka ku fana na hine. Xileswo, a teke swiboho swa kukazri leswi kalaka swi nga li swinene. Xin’we xa swone xi mu tisele swikazratu swinyingi. Ntsranku ka loko a tizre nkama wa kukazri swanga muyavanyise, ‘a zrandzre wansati wa kukazri lwe a yakiki a nkhisini wa Soreki, a vito dzrake afe Delila’. Na leswi swi nga si humelela, Samisoni a a zrandzrana ni wansati wa Mufilista. Hi Yehovha lweyi a mu kongomisiki ku yentxa leswo hikusa leswo a swi ta mu pfulela mukhandlu wa ku lwa ni Vafilista. Nakone ka khambi dzrin’wana, Samisoni a tsrhame a mutini wa wansati wa ngwavana, a doropeni dzra Vafilista a Gaza. A nkameni luwani, Yehovha a nyike Samisoni ntamu akuva a tlakula swipfalu swa doropa, hi ndlela leyo doropa a dzri nga ha sizrelelekanga. (Abaṭ. 14:1-4; 16:1-3) Kambe ka Delila a swi li hi ndlela leyi hambaniki. Swi tikomba na Delila a a li Muisrayele. Vafilista va hakele mali yinyingi ka Delila akuva a wonga Samisoni. Xihondzro Xa Ku Zrindzra 09/2023 p. 5 §§ 12-13

Wutlhazri byi nga hi pfuna ku va lava nabyaliki. Mhunu wa ku tlhazriya awa tikhoma loko a pfukiwa mayelanu ni leswi a swi kholwaka. Hakanyingi loko vhanu va hi hamba swivutiso, a va talisi ku hlaya leswaku ha yini va hamba swivutiso leswo. Xileswo, i swa lisima kuva na hi nge si hlamula hi dzrimuka leswaku a hi swi tivi leswi susumeteliki mhunu lweyo akuva a hamba xivutiso. (Amapr. 16:23) Vona ndlela leyi Gidiyoni a yanguliki ha yone loko vavanuna va Efrayimi va ye vulavula na yene na va hlundzrukile. A va djula ku tiva leswaku ha yini Gidiyoni a nga va vitananga loko a ya lwa ni valala vavu. Kambe i yini lexi va yentxiki va hlundzruka? Xana ku nga va ku ve ku tibyela? Swi nge na mhaka leswaku ku ve xini xivangelo, Gidiyoni a kombise wutlhazri. A zame ku twisisa leswaku ha yini vavanuna lavayani a va hlundzrukile nakone a va yangule hi ndlela ya ku zrula. Dzri ve dzrini bindzru? Bibele dzri li vavanuna lavayani ‘va tlhelise ku mu hlundzrukela kwavu’.—Abaṭ 8:1-3. Xihondzro Xa Ku Zrindzra 09/2023 p. 16 §§ 8-9

Yehovha na Yesu va ni wuxaka bya le kusuhi swinene ku tlula wuxaka lebyi nga kone makazri ka papayi ni n’wana. Handle ka ku ganaganeka swi mu vavise ngopfu swinene ku vona n’wanake na a hluphiwa, a yaliwa a tlhela a xaniseka. Vapswele va ku tiva ha hombe ku vavisa loku tisiwaka hi ku feliwa hi n’wana. Hi ni lipfumelo ledzri tiyiki ka ku pfuxiwa ka vafi. Nambitanu, loko mhunu a fa hi twa ku vavisa ngopfu a mbilwini. Leswo swi hi pfuna ku twisisa ndlela leyi Yehovha a titwiki ha yone loko a vona N’wanake lweyi a zrandzrekaka na a hlupheka a tlhela a fa hi lembe dzra 33 N.Y. (Mat. 3:17) Swi ngo yini ku sukela swoswi u sungula ku dondzra hi xitizrulo xa Yesu ka dondzro yaku ya ximhunu kumbe ka wugandzreli bya ndangu? Nakone hi siku dzra xidzrimuxo, u nga dzrivali ku hlalela Wugandzreli Bya Ni Mixo Bya Ku Hlawuleka. Loko hi tilulamisela ha hombe timbilu tezru akuva hi ya xidzrimuxweni, hi ta swi kota ku pfuna van’wana leswaku va londzrovota xiyentxakalo lexo.—Ezr. 7:10. Xihondzro Xa Ku Zrindzra 01/2024 p. 11 §§ 10-12

Yin’we ya tindlela ta ku va hi yamukela mpfunu wa Yehovha i kuva hi tsrhindzrekela kwake hi xikhongoto. Yehovha a ta hlamula swikhongoto swezru hi ku hi nyika “ntamu lowu tlulaka lowu tolovelekiki”. (2 Kor. 4:7) Hi nga tlhela hi yamukela mpfunu lowu hi wu vilelaka loko hi dondzra Bibele ni ku yanakanyisisa ha hombe hi leswi hi swi dondzriki. (Amaps. 86:11) A dzrungula dzra Yehovha ledzri nga Bibeleni “dzri ni ntamu”. (Heb. 4:12) Loko u khongota ka Yehovha ni ku dondzra Zritu dzrake, u ta kuma ntamu lowu u wu vilelaka akuva u tiyisela, u va ni ku nyonxa kumbe ku hetisisa xiyavelo lexi kazrataka. Vona ndlela leyi Yehovha a mu pfuniki ha yone Yonasi. Ntsrhaku ka loko a yamukele xiyavelo xa ku kazrata lexi pfaka ka Yehovha, Yonasi a zame ku tsrutsruma a ya kule. Hi kola ka leswo, kutsrongo a luzekeliwe hi wutomi byake ka xidzedze lexikulu nakone a tlhele a beka wutomi bya vambeni a nghozini. Ntsrhaku ka loko vatluti va mu txukumetele matini a ye mintiwa hi hlampfi a tsrhama khuzrini dzra yone ku nga mbangu lowu a a ngi ngi sama a wu yanakanya leswaku a nga va ka wone. I yini leswi Yonasi a swi yentxiki akuva a kuma ntamu ka mbangu luwani na a li wuswake? I xikhongoto.—Yon. 2:1, 2, 7. Xihondzro Xa Ku Zrindzra 10/2023 p. 13 §§ 4-6

I ntiyiso leswaku mapapela lawo Petro a a ma tsralela vakriste lava va hanyiki nkameni wake, kambe Yehovha a pfumelele leswaku mapapela wolawo ma hamba xiyenge xa Bibele. Xileswo, na hine hi nga dondzra swinyingi ka mapapela lawo. (Rom. 15:4) Hi hanya ni vhanu lava va kalaka va nga kholwi ka wuprofeta bya Bibele. Van’wana va hi poyila hi leswi hi nga ni malembe na hi vulavula hi ku helisiwa ka misava leyi. Van’wana va hi kaneta va hlaya leswaku a wugamu byi nge ti za byi tlhasile. (2 Pet. 3:3, 4) Ku yingela mazritu ya ku fana ni lawa, ku nga ha va ka va vhizinyu, mutizrikulozri, mudondzrikulozri kumbe xaka swi nga ha tsranisa lipfumelo dzrezru. Petro a tlhamuxela leswi nga hi pfunaka. Ka van’wana swi nga ha tikomba ingiki Yehovha awa hlwela ku helisa mintxhumu ya ku biha ka misava leyi, kambe mazritu lama kumekaka ka buku dzra Petro ma hi pfuna kuva hi va ni langutelo ledzrinene. Ma hi dzrimuxa leswaku ndlela leyi Yehovha a wu vonaka ha yone nkama yi hambanile ni ndlela leyi vhanu va wu vonaka ha yone. (2 Pet. 3:8, 9) Ka Yehovha a 1.000 wa malembe ma fana ni siku dzrin’we. Yehovha a lehisa mbilu nakone a nga djuli leswaku ku helisiwa ni mun’we. Kambe loko nkama lowu a wu bekiki wu ta tlhasa, Yehovha a ta helisa wubihi hinkwabyu. Xihondzro Xa Ku Zrindzra 09/2023 pp. 26-27 §§ 2-5

Ha yini mupostola Pawulo a tsralele vakriste va Vaheberu lava a va tsrhama Yudeya? Swi nga yentxeka ku ve hi kola ka swivangelo swibidzri. Xa ku sungula, akuva a va tiyisa. Wunyingi byavu a va kulisiwe ka wukhongoti bya Xiyuda nakone lava a va li vazrangeli va wukhongoti a va va poyila hi leswi va ndzrulukiki vakriste. Handle ka leswo, a va nge na tempele akuva va mu gandzrela kone Yehovha. A va nge na mbangu wa ku gandzrela kone nakone a va nge na muprista akuva a hisela Yehovha magandzrelo. Swi nga yentxeka leswo swi yentxe leswaku Vakriste lavu va hela ntamu swi va swiholisa lipfumelo dzravu. (Heb. 3:12, 14) Nakone swi nga yentxeka van’we vavu va navele nambi ku tlhelela ka wukhongoti bya Xiyuda. Xivangelo xa wubidzri hi leswaku Pawulo a a djula ku tiyisa vakriste va Vaheberu akuva va zama ku twisisa mintiyiso lemimpshwa ni lemiyentiki, kumbe “swakuda leswi tiyiki” leswi nga zritwini dzra Xikwembu Nkulukumba. (Heb. 5:11-14) Swi tikomba na van’we ka Vakriste va Vayuda a va ha khomelela ka Nawu wa Moxe. Xihondzro Xa Ku Zrindzra 10/2023 pp. 24-25 §§ 3-4

Vavasati van’wana va hlawula ku kala va nga txhati. (Mat. 19:10-12) Kambe, u nga tiyiseka leswaku Yahovha na Yesu va va nyika lisima dzrikulu lava kalaka va nga txhatanga. A misaveni hinkwayu, i tovoko a mabandleni ku va ni vamakwezru va xisati lava kalaka va nga txhatanga. Hi kuva va kombisa lizrandzru ni ku zron’weka hi vambeni, vamakwezru lava va va swanga vamakwavu ni vamamana va moya ka vanyingi a bandleni. (Mar. 10:29, 30) Van’wana va nghenela ntizro wa nkama hinkwawu. A misaveni hinkwayu vamakwezru va xisati hi vone va tizraka ngopfu a ntizrweni wa ku zrezra. (Amaps. 68:11) Xana u nga kunguhata ku nghenela ntizro wa nkama hinkwawu? U nga hlawula ku va phayona, ku pfunisa ka ntizro wa ku yaka kumbe u tizra Betele. Khongota mayelanu ni kungu dzraku. Bula ni lava va nga ka ntizro lowu, nakone vona leswi u nga swi yentxaka akuva na wene u wu nghenela. Ntsrhaku ka leswo, tikazratele ku tlhasela kungu ledzro. Nakone u nga tiyiseka leswaku ku nghenela ntizro wa nkama hinkwawu swi ta ku pfulela mikhandlu ya ku hlamalisa ya ku yentxa leswi yengetelekiki a ntizweni wa Yehovha. Xihondzro Xa Ku Zrindzra 12/2023 p. 22 §§ 16-17

Leswi nhlomulo lowukulu wu yaka wu tsrhindzrekela, i swa lisima swinene ku yingelisisa swileleto swa ku zrezra madzrungula lamanene. Kambe, swi nga hi kazratela ku wu hetisisa ntizro lowu loko hi ni swikazratu swa timali kumbe hi kanetiwa a ntirweni wa ku zrezra. I yini lexi nga hi pfunaka kuva hi zrangisa Mfumu? Hi fanela ku tiyiseka leswaku “Yehovha wa makhandzra a na hine”. A ta hi seketela loko hi zrangisa Mfumu a mahlweni ka swivileleko swezru, xileswo a hi na xivamgelo xa ku txhava. (Hag. 2:4) Yehovha a djula leswaku hi hisekela ntizro wa ku huluxa vhanu ni ku tama hi yentxa vadondzrisiwa. Hagayi a tsratsriye vhanu va Yehovha akuva va tlhela va sungulisa ku pfuxeta Tempele. Yehovha a dumbise leswaku a a ta va tovokisa loko va yentxa leswo. (Hag. 2:18, 19) Na hine hi nga tiyiseka leswaku Yehovha a ta tovokisa minzamu yezru loko hi zrangisa ntizro lowu a hi nyikiki wone. Xihondzro Xa Ku Zrindzra 11/2023 p. 16 § 8; p. 17 § 11

Ka papela ledzri a dzri tsraleliki Varoma, mupostola Pawulo a tlhamuxele leswaku vhanu hinkwavu i vadohi. Kutani ke, swi kotekisa kuyini akuva Xikwembu Nkulukumba a vona vhanu swanga lava lulamiki kumbe lava kalaka va nge na xihoxo? Akuva a pfuna vakriste ku twisisa yinhla leyi, Pawulo a nyikele ntlhamuxelo mayelanu na Abrahamu. A nkama lowu Yehovha a nga hlaya leswaku Abrahamu i wanuna wa ku lulama, Abrahamu, a a tsrhama Kanana. Ha yini Yehovha a hlaye leswo? Ku nga va hi mhaka ya leswi Abrahamu a a landzra hi ku helela Nawu wa Moxe? Im-him. (Rom. 4:13) Vaisrayele va nyikiwe Nawu lowu ntsrhaku ka 400 wa malelmbe na Xikwembu Nkulukumba a hlaye leswaku Abrahamu a lulamile. Kutani ke, ha yini Yehovha a hlaye leswaku Abrahama a a li wanuna wa ku lulama? Yehovha hi timpswalu, a hlaye leswaku Abrahama a lulamile hi kola ka lipfumelo dzrake.—Rom. 4:2-4. Xihondzro Xa Ku Zrindzra 12/2023 p. 3 §§ 4-5

Hi wusiku lebyi Nathani a khaneliki mazritu lama nga ka tsralwa dzra namunhlana ka hosi Davhida ha dzrone, Yehovha a byele Natani leswaku a hi Davhida lweyi a a ta yaka tempele. (1 Makr. 17:3, 4, 11, 12) Xana Davhida a yangulise kuyini loko a yamukele ndzrava leyo? Davhida a sungule ku hlengeletela mali ni switizro leswi Solomoni a a ta swi vilela akuva a yaka tempele. (1 Makr. 29:1-5) Ntsrhaku ka loko Davhida a tive leswaku a hi yene lweyi a a ta yaka tempele, Yehovha a hambe ntwananu na yene. A dumbise leswaku mun’we ka lixaka dzra Davhida a a ta fuma hi lani ku nga helikiki. (2 Sam. 7:16) A misaveni leyimpshwa, ka Mfumu wa Yesu wa 1000 wa malembe, Davhida a ta nyonxa ngopfu hi ku tiva leswaku Hosi Yesu Kriste a huma ka lixaka dzrake! Dzrungula ledzri dzri hi pfuna ku vona leswaku nambiloko hi nga koti ku yentxa hinkwaswu leswi a hi navela ku swi yentxela Yehovha, Xikwembu Nkulukumba a nga hi tovokisa hi tindlela tin’wana leti a hi nga ti yimelanga. Xihondzro Xa Ku Zrindzra 04/2023 p. 16 §§ 8-10

Ku dondzra mabuku ya kukazri ya Bibele swi nga ku pfuna hi ku kongoma loko u titwa na u txhava. Hi xikombiso, u nga kuma ntxhavelelo ka buku dzra Yobe, Amapsalma, Amaproverbia ni ka mazritu ya Yesu lama kumekaka ka buku dzra Matewu ndzima 6. Nakunene, loko u khongota ka Yehovha u tlhela u dondzra Zritu dzrake swi nga ku yentxa u titwa na u txhavelelekile. Hi nga tiyiseka leswaku Yehovha a lulamele ku hi pfuna ka swiyimu swa ku kazrata leswi hi nga ha lavisaka na swone a wuton’wini byezru. A hi nge te txhuka hi va wuswezru. (Amaps. 23:4) Yehovha a dumbisa ku hi bekisa, ku hi tiyisa, ku hi seketela ni ku hi txhavelela. Ezaya 26:3 yi hi tiyisekisa leswi mayelanu na Yehovha: ‘Ku lwe wa mbilu ya ku tiya, ku mu bekisa a ku zruleni, ni ku zruleni, hikuva a tidumbele wene.’ Xileswo, Dumba Yehovha nakone londzrovota hinkwaswu leswi a swi yentxaka akuva a ku pfuna, loko u yentxa leswo u ta swi kota ku tama u tiya nambiloko u kumana ni swiyimu swa ku kazrata. Xihondzro Xa Ku Zrindzra 01/2024 p. 25 §§ 16-17

Mazritu lama nga la henhla lama huhuteliwiki ma hetiseka namunhla. Mazritu lama landzrelaka lama kutxanaka ma tizra ni kwezru namunhla, wone ma li: ‘A vana vaku hinkwavu va ta va vadondzrisiwa va Yehovha; a ku zrula ka vana vaku ku ta va lokukulu ngopfu. U ta tiyisiwa vululameni: . . . u nga ka u nga txhavi ntxhumu; u ta va kule ni ntxhavu, hikuva wu ngaka wu nga ti kusuhi na wene’. (Eza. 54:13, 14) Nambi Sathana, “xikwembu xa misava leyi” a nga swi koti ku helisa ntizro lowu yentxiwaka wa ku dondzrisa vhanu mayelanu na Yehovha. (2 Kor. 4:4) Wugandzreli lebyi xwengiki byi pfuxetiwile nakone byi nge he txhuki byi ntxhimisiwa hi wukhongoti bya madzrimi. Byi ta va kone hi la ku nga helikiki. A ku na tlhazri ni dzrin’we ledzri taka kota ku helisa vhanu va Yehovha! Xihondzro Xa Ku Zrindzra 02/2024 p. 4 § 10

Swanga vakriste, hi nyinka lisima xidumbiso lexi hi xi yentxeliki Yehovha nkama hi nga tinyiketela. Leswo swi khumba swiboho swezru ni leswi hi swi yentxaka ka timhaka leti khumbaka maxaka yezru. Hi tizra hi nkhinkhi akuva hi kota ku yanelisa swivileleko swa ndangu wezru, kambe a hi nge txhuki hi zrangisa ku navela ka maxaka yezru a mahlweni ka leswi Yehovha a swi djulaka kwezru. (Mat. 10:35-36; 1 Tim. 5:8) Minkama yin’wana, swi ta djula hi teka swiboho leswi taka kala swi nga ma nyonxisi maxaka yezru kambe swi taka nyonxisa Yehovha. Yehovha hi yene muvumbi wa mindangu nakone a djula leswaku hi va ni ndangu lowu nyonxiki. (Efe. 3:14, 15) Loko hi djula ku va ni ku nyonxa ka ntiyiso, hi fanela ku yentxa leswi Yehovha a djulaka leswaku hi swi yentxa. Tiyiseka leswaku Yehovha a ku nyika lisima ku tikazrata loku u ku yentxaka akuva u mu tizrela nkama lowu u hlayisaka ndangu waku ni ku wu kombisa lizrandzru ni xihloniphu.—Rom. 12:10. Xihondzro Xa Ku Zrindzra 02/2024 p. 18 §§ 11, 13