Marsu

A misava leyimpshwa a yi si tlhasa. Kambe hi xikombiso, yanakanya hi leswi kutani swi nga kone swa ku fana ni tinyeleti, minsinya, swihazri ni vhanu. A nga kone lweyi a nga hlayaka leswaku mintxhumu leyo a hi ya xivizri, kambe ku ve ni nkama lowu a swi nga li kone. Swo va kone hi leswi Yehovha a swi vumbiki. (Gen. 1:1, 26, 27) Xikwembu Nkulukumba wezru a hi dumbise ku hi nyika misava leyimpshwa nakone a ta xi hetisisa xidumbiso lexo. Loko xidumbiso lexo xi hetiseka, vhanu va ta va ni wutomi lebyi hetisekiki hi lani ku nga helikiki. Hi nkama lowu Yehovha a wu bekiki misava leyimpshwa yi ta va ya xivizri ku fana ni mintxhumu leyin’wana leyi yi hi zrendzreliki. (Eza. 65:17; Mpful. 21:3, 4) Na ha ha yimela misava leyimpshwa, hi fanela ku yi londzrovota ha hombe mikhandlu leyi yi hi pfulekeliki akuva hi tiyisa lipfumelo dzrezru. Minkama hinkwayu kombisa ku tlangela xitizrulo. Yanakanyisisa hi ntamu wa Yehovha. Nakone minkama hinkwayu tsrhama na u khomekile hi mintizro ya moya, hi ndlela leyo, u ta va mun’we wa ‘lava yamukelaka leswi dumbisiwiki hi kola ka lipfumelo ni ku lehisa mbilu’.—Heb. 6:11, 12. Xihondzro Xa Ku Zrindzra 04/2023 p. 31 §§ 18-19

Yesu a lavisa tilweni kutani a khongota a makazri ka vhanu. Ka hinkwaswu leswi taka yentxeka a djula ku yisa lidzrumu hinkwadzru ka Yehovha. Kutani Yesu a huwelela hi zritu ledzrikulu a ku: “Lazaru, huma handle!” (Yoh. 11:43) Kutani Lazaru a huma sizreni! Yesu a yentxe ntxhumu lowu a swi tikomba na wu nge na ku koteka. Dzrungula ledzri dzri tiyisa lipfumelo dzrezru ka dumbu dzra ku pfuka ka vafi. Hi ndlela yini? Yanakanya hi xidumbiso lexi Yesu a xi yentxiki ka Marta: “Makwenu a ta pfuka.” (Yoh. 11:23) Ku fana ni Papayi wake, Yesu a na kone ku navela ni ntamu wa ku hetisisa xidumbiso lexi. Ku dzrila ka Yesu ku swi kombisa hi ku helela leswaku a swi navela hi mbilu hinkwayu ku helisa lifu ni ku xaniseka hinkwaku loku tisiwaka ha dzrone. Handle ka leswo, nkama lowu Lazaru a nga huma sizreni, Yesu a tiyisekise leswaku a na wone ntamu wa ku pfuxa lava fiki. Hi wugamu yanakanya hi leswi Yesu a swi dzrimuxiki Marta leswi tsrhahiwiki ka ndzrimana ya namunhla. Hine hi ni swivangelo swinyingi swa kuva hi kholwa ka xidumbiso xa Xikwembu Nkulukumba xa ku pfuxa lava fiki, ni leswaku xi ta hetiseka hakakunene. Xihondzro Xa Ku Zrindzra 04/2023 pp. 11-12 §§ 15-16

Minkama yin’wana swi nga ha djula hi txintxa swikhongoto swezru loko hi xiya ku zrandzra ka Yehovha ha hine. Hi fanela ku dzrimuka leswaku Yehovha a ta hetisisa nkongometo wake hi nkama lowu a wu bekisiki. Nkongometo wake wu patsra ku helisa mintxhumu hinkwayu leyi yi hi vangelaka ku hlupheka ya ku fana ni timhangu ta ntumbuluku, mavabyi ni lifu. Yehovha a ta hetisisa nkongometo wake hi ku tizrisa Mfumu wake. (Dan. 2:44; Mpful. 21:3, 4) Na siku ledzri dzri nga si tlhasa, Yehovha a ha pfumelela leswaku Sathana a tama a fuma misava. (Yoh. 12:31; Mpful. 12:9) Loko Yehovha a o lulamisa swikazratu leswi vhanu va kumanaka na swone a swi ta yentxa ingiki Sathana a fuma hi ndlela leyinene. Kutani leswo swi hlaya leswaku hi fanela ku lehisa mbilu ku tlhasela loko Yehovha a hetisisa swin’we swa swidumbiso swake. Kambe leswo a swi hlayi swone leswaku Yehovha a nga hi pfuni. Yehovha a ta hi pfuna. Xihondzro Xa Ku Zrindzra 05/2023 p. 8 § 4; pp. 9-10 §§ 7-8

Hi nga va pfuna hi ndlela yini van’wana akuva va susa londzrovoto ka xidzrimuxo? Xa ku sungula, hi zranga hi ku zramba vhanu. Handle ka ku zramba ntsena lava hi va kumaka a nsin’wini, hi nga hamba nxaxamelo wa mavito ya lava hi navelaka ku va zramba va ku fana ni maxaka, lava hi tizraka na vone, swidondzrikulozri ni van’wana. Nambiloko hi nge na swizrambu leswi dzringaniki hi xivizri, hi nga va zrumelela link hi ka matelefone. Hi ta hlamalisiwa hi nhlayu ya vhanu lava taka yamukela! (Ekles. 11:6) Dzrimuka leswaku lava hi va zrambaka va nga ha va ni swivutiso swa kukazri, ngopfungopfu loko va ngi ngi ya a ndlwini ya wugandzreli. Swi nga va swinene ku yanakanyisisa hi swivutiso leswi va nga ha swi yentxaka ni ku tilulamisela akuva hi va hlamula. Nambi tsrhaku ka loko va hlaleli xidzrimuxo, lava kombisiki ku nyonxela va nga ha va ni ku ganaganeka ka kukazri. Hi djula ku yentxa hinkwaswo leswi hi nga swi kotaka na xidzrimuxo xi nga si tlhasa, hi nkama wa xizrimuxo ni loko xi khalutile akuva hi pfuna “lava kombisiki leswaku va swi djula”, akuva va susa londzrovoto ka ntlhanganu lowu.—Mint. 13:48. Xihondzro Xa Ku Zrindzra 01/2024 p. 12 §§ 13, 15; p. 13 § 16

A Bibele dzri vulavula hi 8 wa vhanu lava pfuxiwiki akuva va tlhela va hanya kola misaveni. Swi ngo yini u tinyika nkama wa ku kambela swiyentxakalu leswo? Loko u li kazri u yentxa leswo, tinyiki nkama wa ku dondzra xa kukazri ka dzrungula dzin’wana ni dzrin’wana. Yanakanya hi ndlela leyi ku pfuxiwa kun’wana ni kun’wana ku hi tiyisekisaka ha yone leswaku Xikwembu Nkulukumba a na kone ku navela ni ntamu wa ku pfuxa vazrandzriwa vezru lava fiki akuva va tlhela va hanya. Nakone tinyiki nkama wa ku yanakanyisisa hi ku pfuxiwa loku ku nga ka lisima ngopfu, ku nga ku pfuxiwa ka Yesu. Ku pfuxiwa loku ku voniwe hi vhanu vanyingi nakone ku tiyisa lipfumelo dzrezru. U nga txhuki u swi dzrivala leswo. (1 Kor. 15:3-6, 20-22) Hi mu tlangela ngopfu Yehovha hi kola ka xidumbiso xa ku pfuxa lava fiki! Hi nga tiyiseka leswaku a ta swi hetisisa hikusa Yehovha a ni ku navela ni ntamu wa ku yentxa leswo. Xileswo, hi fanela ku tiyimisela ku tiyisa lipfumelo dzrezru ka dumbo ledzri dzra ku hlamalisa. Loko hi yentxa leswo, hi ta ya hi tsrhindzrekela kusuhi na Yehovha Xikwembu Nkulukumba lweyi a dumbisaka mun’wana ni mun’wana wezru leswaku, ‘lweyi u mu zrandzraka a ta pfuka!’—Yoh. 11:23. Xihondzro Xa Ku Zrindzra 04/2023 p. 8 § 2; p. 12 § 17; p. 13 § 20

Ku titsrongahata ni ku dzringanisela swa fambelana. Hi kombisa leswaku ha tisrongahata hi ku va ni vonela ledzrinene ha hine ni leswaku a hi nge koti ku yentxa hinkwaswu. Hi kombisa ku titsrongahata loko hi ti kazratela ku kombisa tsrhamela ledzri dzra moya. (Filp. 2:3) Hakanyingi, ku dzringanisela ka fambisana ni ku titsrongahata. Gidiyoni a a li wanuna lweyi a a dzringanisela ni ku titsrongahata. Loko ntsrumi ya Yehovha yi byele Gidiyoni leswaku a a hlawuliwile akuva a tizrula Vaisrayele a mavokweni ya Vamidiyani, a hlamule hi ku titsrongahata a ku: ‘Mine ni lwentsrongo a ndlwini ya tatana.’ (Abaṭ. 6:15) A tivone na a nga faneleki ku yamukela ntizro lowu hikusa a a tivona na a nga li mhunu wa ku yampswa. Vakulu va tikazrata ngopfu akuva minkama hinkwayu va va lava dzringaniselaka ni ku titsrongahata. (Mint. 20:18, 19) A va tsrhameli ku vulavula hi mabindzru lawa va viki na wone hi kola ka wuswikoti lebyi va nga na byone kumbe ku tsrhamela ku vulavula hi leswi va samiki va swi yentxa. Nakone a va titwi na va nga pfuni ntxhumu hi kola ka swihoxo swavu ni ku kala ku hetiseka kwavu. Xihondzro Xa Ku Zrindzra 06/2023 p. 3 §§ 4-5

A ku pfotlotiwa ka nhloko ya Sathana, ku ta hetiseka a ku heleni ka 1.000 wa malembe ya ku fuma ka Kriste. (Mpful. 20:7-10) Na leswo swi nge si na yentxeka, a Bibele kutani a dzri profetile hi swiyentxakalo leswi. Xa ku sungula, a mimfumu yi ta huwelela leswaku “ku zrulile nakone ku sizrelelekile!” (1 Tes. 5:2, 3) Kutani, “na va nga swi yimelanga” a nhlomulu lowukulu wu ta sugula loko matiko ma helisa wukhongoti bya madzrimi. (Mpful. 17:16) Ntsrhaku ka leswo, Yesu a ta yavanyisa vhanu, a hambanisa tihamba ka timbuti. (Mat. 25:31-33, 46) Nambitanu, Sathana a nga ti kazrala. Hi kola ka mahlundzru yake, a ta yentxa ka leswaku matiko, lawa Bibele dzri ma vitanaka Gogue wa Magogue, ma hlasela vhanu va Xikwembu Nkulukumba. (Ezek. 38:2, 10, 11) Hi nkama wolowo, vatotiwa lava taka va va hali lani misaveni va ta tekiwa va ya matilweni va ya tipatsra na Yesu kun’we ni khandzra dzrake a matilweni akuva va ya lwa nyimpi ya Armagedoni, ku nga xiyenge xa wugamu xa nhlomulo lowukulu. (Mat. 24:31; Mpful. 16:14, 16) Ntsrhaku ka leswo, a Mfumo wa Kriste wa 1.000 wa malembe wu ta sungula ku fuma lani misaveni.—Mpful. 20:6. Xihondzro Xa Ku Zrindzra 10/2023 pp. 20-21 §§ 9-10

Namunhla malandzra manyingi ya Yehovha ma hanya mimbangwini leyi mintizro yezru yi tsimbisiwaka. Ku fana na Obadiya, vamakwezru lava va ya mahlweni va kombisa xitxhavu ka lava va nga ni wulawuli, kambe va nyika Yehovha leswi swi mu fanelaka ku nga wugandzreli bya ku hlawuleka! (Mat. 22:21) Va kombisa leswaku va txhava Xikwembu Nkulukumba hi ku yingiseta yene a matsrhan’wini ya vhanu. (Mint. 5:29) Va tama va zrezra ni ku hlalela mintlhanganu hi ndlela ya xihundla. (Mat. 10:16, 28) Handle ka leswo, va yentxa hinkwaswu akuva vamakwavu va kuma swakuda swa moya hi nkama lowu faneliki. Vona Xikombiso xa makwezru Henri. Yene a tsrhama Africa ka mbangu lowu ntizro wezru wu samiki wu tsimbisiwa ku dzringana nkama wa kukazri. Hi nkama wolowo, makwezru Henri a tinyikelile akuva a yavela vamakwezru a mabuku. A hlaya leswi: “Hi ntumbuluku ni ni wutoya. . . . Yehovha . . . a ni nyike xixixi lexi a xi vileleka.” Xana u nga swi kota ku va ni xixixi ku fana na Henri? Handle ka ku ganaganeka u nga swi kota, loko u txhava Yehovha hi ndlela leyi yi faneliki. Xihondzro Xa Ku Zrindzra 06/2023 p. 16 §§ 9, 11

Loko Adamu na Evha va hlawule ku kala va nga mu yingiseti Yehovha, a swi tikomba ingiki Sathana a swi kotile ku sivela Yehovha ku hetisisa nkongometo wake, wa ku tata misava hi vhanu va ku hetiseka ni lava yingisetaka. Swi nga yentxeka Sathana a a pimisa leswaku Yehovha a nge ti swi kota ku hetisisa xidumbiso xake. Nakone swi nga yentxeka a pimise leswaku Yehovha a a ta helisa Adamu na Evha a va a vumba vatekani vambeni lava hetisekiki akuva a hetisisa nkongometo wake hi vhanu. Kambe loko Yehovha a e yentxa leswo, Sathana na a hlaye leswaku Yehovha i muhembi. Ha yini? Hikusa hi ku ya hi Genesis 1:28, Yehovha a a byele Adamu na Evha leswaku a vanavu a va ta pswalanana va tata misava. Swi nga yentxeka Sathana a pimise leswaku Yehovha a a ta pfumelela kuva Adamu na Evha va pswala vana, kambe vana volavo a va nge te gama va hetisekile. (Ekles. 7:20; Rom. 3:23) Handle ka ku ganaganeka, loko leswo a swe yentxeka Sathana a a ta va na a lumbete Yehovha leswaku a nga swi koti ku hetisisa swidumbiso swake. Hi mhaka muni? Hikusa ka xiyimu lexi, Xikwembu Nkulukumba a a tava a nga swi kotanga ku hetisisa nkongometo wake wa ku tata misava leyi nga Paradeyisi hi vhanu lava yingisetaka ni lava hetisekiki. Xihondzro Xa Ku Zrindzra 11/2023 p. 6 §§ 15-16

Yehovha a hi nyika minkongomiso leyi kongomiki ni leyi basiki hi ku tizrisa a Zritu dzrake ni nhlengeletanu yake. A ku na xivileleko xa ku yengesela swa kukazri ka minkongomiso leyi a hi nyikaka yone. (Amapr. 3:5-7) Hi ndlela leyo, a hi nge ti tlula mpimu wa leswi tsraliwiki a Bibeleni kumbe ku bekela vamakwezru swinawanawana ka mintxhumu leyi mun’wana ni mun’wana a fanelaka ku titekela xiboho. Sathana a tizrisa “wukanganyisi lebyi kalaka byi nga pfuni ntxhumu” ni “mintxhumu leyi nga yone ya ntshima ya misava;” akuva a tsravukanisa vhanu. (Kol. 2:8) A nkameni wa vapostola, leswo a swi patsra tidondzro ta filosofiya leti ti seketeliki ka mavonela ya vhanu, tidondzro ta Vayuda leti a ti nga seketeliwanga ka matsralwa ni ka tindondzro ta leswaku vakriste a va nga fanelanga ku yingiseta Nawu wa Moxe. Mavonela lawa a ma kanganyisa vhanu hikusa a ma tsravukanisa vhanu ni nhlovo ya wutlhazri bya ntiyiso, ku nga Yehovha. Namunhla, Sathana a tizrisa matelevhizawu ni maredi sosiyali akuva a hangalasa moya wa wupfukeli ni madzrungula ya madzrimi leswi swi hlohloteliwaka hi vazrangeli va politika. Xihondzro Xa Ku Zrindzra 07/2023 p. 16 §§ 11-12

I yini leswi sathana a a pimisa leswaku Yehovha a a ta swi yentxa? Yehovha a lulamise timhaka hi ndlela leyi hetisekiki akuva a hetisisa nkongometo wake. Yehovha a pfumelele kuva Adamu na Evha va va ni vana, hi ku yentxa leswo a swi kombisile leswaku a hi muhembi. A tlhele a hlaya leswaku a ku ta va ni “lixaka” ledzri a dzri ta huluxa vana lava yingisetaka va Adamu na Evha, akuva a tiyisekisa leswaku a nkongometo wake wu ta hetiseka. (Gen. 3:15; 22:18) Hi ndlela leyo, Yehovha a a nga te va muhembi lweyi a kalaka a nga swi koti ku hetisisa nkongometo wake. Lixaka ledzri Yehovha a dumbisiki leswaku a dzri tava kone a dzri ta nyikela wutomi bya dzrone akuva dzri huluxa vhanu hinkwavu. Sathana a a ngi ngi sama a pimisa hi leswo! Hi mhaka muni? Hikusa xitizrulo a xi kombisa lizrandzru ledzrikulu dzra Yehovha. (Mat. 20:28; Yoh. 3:16) Sathana a nga na dzrone tsrhamela ledzro dzra lizrandzru hikusa a ni makwanga. Kutani, i yini leswi nga ta humelela hi kola ka lulamiselo dzra xitizrulo? A ku heleni ka 1.000 wa malembe ya ku fuma ka Kriste, a lixaka ledzri yingisetaka ni ledzri hetisekiki dzra Adamu na Evha dzri ta tata misava leyi taka va Paradeyisi hi lani Yehovha a hlayiki ha kone. Xihondzro Xa Ku Zrindzra 11/2023 p. 6 § 17

Hine hi yingiseta nawu wa Yehovha mayelanu ni ndlela leyi ngati ni wutomi swi xwengiki ha yone. Ha yini? Hikusa a ngati i nyiko ya ku hlawuleka leyi pfaka ka Yehovha nakone yi yimela wutomi. (Lev. 17:14) Loko Yehovha a nyikele mpfumelelo wa leswaku vhanu va da nyama ya swihazri, a va nyike xileleto xa leswaku a va fanelanga va da ngati. (Gen. 9:4) A tlhele a phinda nawu lowu wa ku yilisa ku da ngati ka nawu wa Moxe lowu a wu nyikiki Vaisrayele. (Lev. 17:10) Nakone Yehovha a tlhele a kongomisa Huvo leyi zrangelaka ya le dzaneni dzra ku sungula akuva yi dondzrisa Vakriste leswaku va “tsrhika. . . ngati”. (Mint. 15:28, 29) Nakone hine hi wu yingiseta hi ku tiya a nawu lowu loko hi teka swiboho mayelanu ni madahela lawa hi taka ma yamukela. Hine tlhela hi landzra minsinya ya milawu leyi tlakukiki ya mahanyela leyi Yehovha a yi bekiki. Loko mupostola Pawulo a hi kutxa a hlaya leswi: “dlayani ku navela ka swizro swa mizri wenu” leswi tlhamuxelaka ku fambela kule ni hinkwaswu leswi nga swa ku biha. Hine a hi yentxi ntxhumu ni wun’we lowu nga hi yentxeka hi tikhoma hi ndlela ya ku biha hi tlhelo dzra tinkuku nambi ku lavisa mintxhumu leyi yelanaka ni leswo.—Kol. 3:5; Yb. 31:1. Xihondzro Xa Ku Zrindzra 07/2023 p. 15 §§ 5-6

Samisoni a a mu zrandzra ngopfu Delila lakakuva a nga swi kotanga ku xiya leswi a a djula ku mu yentxa swone. Delila a a tsrhamela ku sindzrisa Samisoni leswaku a mu byela xihundla xa ntamu wake. Hi wugamu Samisoni a mu dzrungulele hinkwaswu. Lexi vavisaka, hi leswaku Samisoni a tipete ka xiyimu lexi xa ku kazrata hi wuswake. Xihoxo xake xi yentxe leswaku ku dzringana nkama wa kukazri a heleliwa hi ntamu lowu a a li na wone ni ku tlhela a nga ha nyonxeliwi ha Yehovha. (Abaṭ. 16:16-20) Samisoni a hakele ku vava hikuva a dumbe Delila matsrhan’wini ya ku dumba Yehovha. Vafilista va khome Samisoni, va mu boxa matihlo va gama va ya mu pfalela a Gaza, va mu hamba xikazrawa xa ku sila tindzroho. Va tame va mu khomisa tingana hi ku mu teka va mu yisa ka nkhuvu lowu a va hambela xikwembu xavu Dagoni. Vafilista a va yanakanya leswaku xikwembu lexi hi xone xi va pfuniki ku hlula Samisoni, xileswo va mu humese a djele akuva a va ‘hlekisa’.—Abaṭ. 16:21-25. Xihondzro Xa Ku Zrindzra 09/2023 pp. 5-6 §§ 13-14

Swi nga yentxeka mudondzrikulozri kumbe mutizrikulozri a hi vutisa leswaku ha yini hi landzra minsinya ya milawu ya Bibele. Loko hi hlamula hi ta yentxa hinkwaswu hi nga swi kotaka akuva hi yimelela leswi hi swi kholwaka nakone hi nkama wun’we hi ta kombisa xihlonipho ka leswi van’wana va swi kholwaka. (1 Pet. 3:15) A matsrhan’wini ya ku teka xivutiso xa mhunu lweyo swanga ndlela ya ku ku hlasela, a swi ta va swinene ku vona xivutiso lexo swanga mukhandlu wa ku vona leswi mhunu lweyo a swi vonaka swi li swa lisima. A swi na mhaka leswaku i yini leswi susumeteliki mhunu lwiyani kuva a ku hamba xivutiso, minkama hinkwayu hi djula ku hlamula hi ndlela ya ku zrula ni leyinene. Nhlamulo yezru yi nga pfuna mhunu lweyo akuva a yanakanyisisa ha hombe hi mhaka leyi. Swi nga yentxeka mutizrikuloni a djula ku tiva leswaku ha yini u nga tlangeli malembe ya ku belekiwa. Yimanyana u tivutisa leswi: ‘Xana a nga va a tivutisa leswaku ha swi zrandzra kumbe im-him ku hungata? Hi nga mu kulungela mutizrikulozri hi kuva a kombisa ku zron’wekela van’wana ni ku txutxela wumun’we a ntizrweni. Hi ndlela leyo, hi ta pumba ku vilela ka mutizrikulozri nakone swi nga ha hi pfulela mukhandlu wa ku va ni mabulu lama nyonxisaka mayelanu ni leswi Bibele dzri swi hlayaka hi ku tlangela malembe ya ku belekiwa. Xihondzro Xa Ku Zrindzra 09/2023 p. 17 §§ 10-11

Hi ni tovoko dzra ku londzrovota nkama lowu wa ha saliki akuva hi zrezrela vhanu hinkwavu a misaveni. Mupostola Petro a hi kutxa kuva hi “yanakanyisisa hi siku dzra Yehovha”. (2 Pet. 3:11, 12) Hi nga swi yentxisa kuyini leswo? I swinene akuva hi tsrhamela ku yanakanyisisa hi matovoko lawa hi taka va na wone a misaveni leyimpshwa nakone loko hi swi kotisa hi nga yanakanyisisa hi matovoko lawo siku ni siku. Xana u ke u tiyanakanya na wu li ka mbangu wa ku xonga, wu tikholisa hi swakuda swa ku nandzriki na u li kazri u hoyozela maxaka yaku ni vanghanu lava taka pfuxiwa? Kumbe u tiyanakanya na u tlhamuxela ndlela leyi wuprofeta bya Bibele byi hetisekiki ha yone malembe manyingi ntsrhaku. Ku yanakanyisisa hi mintxhumu leyi swi ta ku pfuna ku tama u lavisela ni ku dumba leswaku wugamu byi le kusuhi. Ku wumundzruku byezru ni leswi hi “tiviki timhaka leti na ke he nkama” swi ta hi pfuna kuva hi nga “hambukisiwi” hi madzrimi ya misava. Xihondzro Xa Ku Zrindzra 09/2023 p. 27 §§ 5-6

Vampshwa vezru va tsrandzreliwe hi vana lava kalaka “va nga yingiseti vapswele.” (2 Tim. 3:1, 2) Ha yini vampshwa vanyingi va nga yingiseti? Vampshwa van’wana va yanakanya leswaku vapswele vavu va va kombela ku yentxa mintxhumu leyi vone va kalaka va nga yi yentxi. Van’we va yanakanya leswaku a misava yi ntxintxile nakone a vapswele vavu va khaluteliwe hi nkama. A swilayu swavu swa bindzra nakone a swa ha pfuni. Xana na wene u yanakanya hi ndlela leyi fanaka? Vanyingi va li swa kazrata ku landzra xilayu xa Yehovha lexi kumekaka ka tsralwa dzra namunhla. Xana i yini lexi nga ku pfunaka ku yentxa leswo? U nga dondzra ku va mhunu lwa yingisetaka hi ku yetisela xikombiso lexikulu ka hinkwaswu, ku nga xa Yesu. (1 Pet. 2:21-24) Yene a a hetisekile kambe a vapswele vake a va nga hetisekanga. Nambitanu, Yesu a a hlonipha vapswele vake nambiloko va pfa va yentxa swihoxo kumbe va nga mu twisisi.—Eks. 20:12. Xihondzro Xa Ku Zrindzra 10/2023 p. 7 §§ 4-5

Mupostola Pawulo a va tlhamuxele leswaku a magandzrelo lawa a Nawu a wu hlaya leswaku a va fanela ku ma nyikela a ma nga susi swidoho hi ku helela, xileswo Nawu wa khale wu ‘helisiwile’. Swoswi Pawulo a a dondzrisa ntiyiso lowo lowu yentiki. A va dzrimuxe leswaku “a dumbu dzra ku yampswa”, ledzri seketeliwiki ka xitizrulo xa Yesu, hi dzrone ledzri a dzri ta va pfuna a kuva va “tsrhindzrekela kusuhi na Xikwembu Nkulukumba”. (Heb. 7: 19) Pawulo a tlhamuxele Vakriste va Vaheberu leswaku a wugandzreli bya wukriste a byi tlakukile ku tlula wugandzreli lebyi a va li ka byone khale. Leswi a va swi yentxa akuva va gandzrela Yehovha hi kuya hi nawu wa Moxe a kova ntsena “ntsrhuti wa leswi swa ha taka, kambe a xisekelo xa kakunene xa mintxhumu leyi i Kriste”. (Kol. 2:17) A ntsrhuti wa ntxhumu wa kukazri wo kombisa ntsena leswi ntxhumu lowo wu tsrhamisiki xiswone kambe a hi wone hi ku kongoma. Hi lani ku fanaka, ndlela leyi Vayuda a va mu gandzrela ha yone Xikwembu Nkulukumba a kova ntsrhuti ntsena, hikusa kutani a va ta gandzrela Yehovha hi ndlela ya ku yampswa. Hi fanela ku twisisa hinkwaswu leswi Yehovha a swi yentxiki akuva hi kota ku dzrivaleliwa swidoho ni ku va swi koteka kuva hi mu gandzrela hi ndlela leyi a yi djulaka. Xihondzro Xa Ku Zrindzra 10/2023 p. 25 §§ 4-5

A buku dzra Daniyele ndzrima 11 dzri khanela hi tihosi tibidzri kumbe vapolitika lava lwelaka ku kuma wuhosi. Loko hi fananisa wuprofeta lebyi ni byin’wana bya Bibele hi kota ku gungula leswaku ‘a hosi ya n’walungu’ i Rússia ni vaseketeli vake nakone a ‘hosi ya nyingitimu’ i mfumu lowukulu wa misava hinkwayu wa Grã-Bretanha na Estados Unidos. Vhanu va Xikwembu Nkulukumba lava nga hansi ka mfumu wa ‘hosi ya n’walungu’ va kazri va hlaseliwa hi ku kongoma. Van’we va vamakwezru va xinuna ni va xisati va biwile va tlhela va pfaleliwa madjele hi kola ka lipfumelo dzravu. A matsrhan’wini ya ku va nhlaselo lowu wu tsranisa lipfumelo dzra vamakwezru, wo ya wu dzri tiyisa. Ha yini? Va swi tiva leswaku leswo swi hetisisa wuprofeta byinyingi lebyi nga ka buku dzra Daniyele. (Dan. 11:41) Ku tiva leswo swi tlhela swi tiyisa dumbo dzrezru nakone hi ya mahlweni hi dumbeka ka Yehovha. Xihondzro Xa Ku Zrindzra 08/2023 p. 11 §§ 15-16.

Leswi a hi zrandzraka, Yehovha a kahlula a twisisa matitwela yezru nakone a hlunyele ku hi sizrelela. Awa vaviseka loko a hi vona na hi kazratekile. Nakone hi nga tiyiseka leswaku awa hi hlamula loko hi khongota hi ku: ‘Ndzri bekisi swanga hi nxanga [nyingi] ya tihlo.’ (Amaps. 17:8) Tihlo i xizro lexi nga ni wunyenyeti swinene nakone xi nga xa lisima ka mizri wa mhunu. Kutani loko Yehovha a hi fanisa ni nyingi ya tihlo dzrake, swo fana ni loko a ku: ‘Lweyi a ku xanisaka, wene tiko dzranga, a xanisa ntxhumu lowu hlawulekiki kwanga.’ Yehovha a djula leswaku u tiyiseka leswaku awa ku zrandzra wene hi ku kongoma. Kambe yene awa swi tiva leswaku hi kola ka swikazratu leswi u nga na swone, u nga ha ganaganeka leswaku yene awa ku zrandzra. Kumbexana swoswi swi nga yentxeka u lavisana ni swiyimu leswi dzringaka ku kholwa kwaku ka leswaku Yehovha awa ku zrandzra. I yini lexi nga tiyisaka ku dumba kwaku? I ku dondzra ndlela leyi Yehovha a kombisaka ha yone lizrandzru ka Yesu, vatotiwa na hine hinkwezru. Xihondzro Xa Ku Zrindzra 01/2024 p. 27 §§ 6-7

Ezra a vone ndlela leyi Yehovha a va seketeliki ha yone vhanu vake hi nkama wa ndzringo. Ntsrhakunyana ka leswo, hi 484 N.N.Y., Ezra a a tsrhama a Babilona loko hosi Ahasuweru a humese Nawu wa leswaku Vayuda hinkwavu lava a va hanya hansi ka mfumu wa le Persiya va fanela ku helisiwa. (Est. 3:7, 13-15) A wutomi bya Ezra ni Vayuda kulobye a byi le khombyeni! Loko va yingele mhaka leyo, handle ka ku ganaganeka va titsrone swakuda va va va dzrila va khongota ka Yehovha va kombela mpfunu. (Est. 4:3) Yanakanya ndlela leyi Ezra a titwiki ha yone ntsrhaku ka loko a yingele leswaku lava a va kunguhata ku dlaya Vayuda hi vone va dlayiwiki! (Est. 9:1, 2) Leswi Ezra a kumaniki na swone swi nga ha yentxeka swi mu lulamisele mindzringo leyi a ya ha le ku teni swi tlhela swi tiyisa dumbu dzrake ka wuswikoti lebyi Yehovha a nga na byone bya ku sizrelela vhanu vake. Xihondzro Xa Ku Zrindzra 11/2023 p. 17 §§ 12-13

Mupostola Pawulo a a vulavula ngopfu hi ku “yentxa leswi nawu” wu hlayaka swone, Nawu wa Moxe lowu nyikeliwiki a nhaveni ya Sinayi. (Rom. 3:21, 28) A masikwini ya Pawulo, swi tikomba na van’we ka vakriste va Vayuda a va kholwa leswaku a va ha fanela ku landzrelela Nawu wa Moxe. Xileswo, Pawulo a tizrise xikombiso xa Abrahamu, akuva tlhamuxela leswaku a swi sindzrisi kuva mhunu a landzrelela Nawu wa Moxe akuva a nyonxisa Yehovha. Kambe swo djula lipfumelo ntsena. Swi nyonxisa ngopfu ku tiva leswo hikusa swi hi dondzrisa leswaku loko hi li ni lipfumelo ka Xikwembu Nkulukumba na Kriste, hi nga yamukeleka kwake. Hi tlhelo dzrin’wana “a mintizro” leyi Yakobe a vulavulaka ha yone ka ndzrima 2 a hi yin’we ni ku “yentxa mintizro ya nawu” leyi Pawulo a khanelaka ha yone. Yakobe a a vulavula hi swiyentxo kumbe mintizro leyi vakriste a va fanela ku yi yentxa siku dzrin’wana ni dzrin’wana. (Yak. 2:24) Mintizro leyo hi yone a yi kombisa leswaku mukriste a ni lipfumelo dzra hakakunene ka Xikwembu Nkulukumba kumbe im-him. Xihondzro Xa Ku Zrindzra 12/2023 p. 3 § 8; pp. 4-5 §§ 10-11

Vamakwezru va xisati lava djulaka ku nghenela wukati, va fanela ku hlawula ha hombe lweyi va taka txhata na yene. Dzrimuka leswaku, swi ta djula ku va u yingiseta ni ku landzra swiboho swa mhunu lweyi u taka mu hlawula ku txhata na yene. (Rom. 7:2; Efe. 5:33) Kutani, tivutise leswi: ‘Xana i mukriste lweyi a wupfiki? A zrangisa mintxhumu ya moya a wuton’wini byake? Xana a teka swiboho swa wutlhazri? A wa swi pfumela swihoxo swake? A wa va hlonipha vavasati? Xana a ta swi kota ku ni hlayisa hi tlhelo dzra moya, dzra nyama ni hi matitwela? Kambe, loko u djula ku kuma wanuna lwenene na wene u fanela ku tilulamisela kuva wansati lwenene. Bibele dzri hlaya leswaku wansati lwenene i ‘mupfuni’ lwa fanelekaka wa nuna wake. (Gen. 2:18) Nakone leswi a zrandzraka Yehovha, a yentxa hinkwaswu leswi a nga swi kotaka akuva a nga ntxhimisi vito dzra nuna wake. (Amapr. 31:11, 12; 1 Tim. 3:11) U nga tilulamisela akuva u va nsati lwenene hi ku tiyisa lizrandzru dzraku ha Yehovha ni hi ku pfuna vambeni, a ndangwini kumbe a bandleni. Xihondzro Xa Ku Zrindzra 12/2023 pp. 22-23 §§ 18-19

Yehovha a hi nyika wutlhazri. Yehovha a hi dumbisa ku hi nyika wutlhazri akuva hi teka swiboho leswinene nakone hi byi vilela ngopfu wutlhazri byake loko hi djula ku teka swiboho swa lisima a wuton’wini byezru, hi xikombiso, loko hi djula ku teka xiboho xa leswaku hi ta txhata kumbe im-him. Yehovha a hi nyika ntamu wa ku tiyisela. Hi lani a yentxiki ha kone ka mupostola Pawulo, Yehovha a ta hi nyika ntamu lowu hi wu vilelaka akuva hi tiyisela swikazratu leswi hi kumanaka na swone. (Filp. 4:13.) A tizrisa ndangu wezru wa moya akuva a hi pfuna. Ka wusiku dzra wugamu na a nge si nyikela hi wutomi byake, Yesu a khongote hi ku hiseka. Yesu a a nga djuli leswaku vhanu va pimisa leswaku a txhimise vito dzra Papayi wake. Xileswo, a kombele Yehovha akuva a nga pfumeleli leswaku leswo swi yentxeka. Kambe a matsrhan’wini ya kuva Yehovha a yentxa leswi Yesu a swi kombeliki, a zrumele ntsrumi akuva yi mu tiyisa. (Luk. 22:42, 43) Na hine, Yehovha a nga hi pfuna hi ku yentxa leswaku makwezru wa kukazri a hi fonela kumbe a hi pfuxela akuva a hi tiyisa. Nakunene hinkwezru hi nga djuletela mikhandlu akuva hi hlaya ‘zritu ledzrinene’ kumbe ku yentxa ntxhumu lowu taka kutxa vamakwezru.—Amapr. 12:25. Xihondzro Xa Ku Zrindzra 05/2023 pp. 10-11 §§ 9-11

Swi nga yentxeka lava holiki lava viki kone ka xidzrimuxo va khomiwe hi ku txhava. Swi nga yentxeka va txhave kuva va nga yamukeliwi hi ndlela leyinene. U nga txhuki u hlaya leswi taka va kwatisa ni ku va khomisa tingana. Vamakwezru lava va mu zrandzra Yehovha ku fana na hine. Swa hi nyonxisa ngopfu ku tlhela hi gandzrela Yehovha kun’we na vone! (Amaps. 119:176; Mint. 20:35) Nakunene swa twala ku va Yesu a hi lelete ku dzrimuka lifu dzrake lembe dzrin’wana ni dzrin’wana, swanga hi leswi hinkwezru hi buyeliwaka hi ku yentxa leswo. (Eza. 48:17, 18) Hi xikombiso, lizrandzru dzrezru ha Yehovha na Yesu dzri ya dzri tiya, hi va ni mukhandlu wa ku tlangela hi leswi va hi yentxeliki swone, nakone hi ya hi va kusuhi ni vamakwezru. Handle ka leswo, hi ni mukhandlu wa ku pfuna van’wana akuva na vone va dondzra mayelanu ni xitizrulo va tlhela va va ni mukhandlu wa ku yamukela matovoko lawa Yehovha a hi nyikaka wone. Xileswo, a hi yentxeni hinkwaswu akuva hi lulamela siku ledzri dzra lisima ka lembe ku nga xidzrimuxo xa lifu dzra Kriste! Xihondzro Xa Ku Zrindzra 01/2024 p. 14 §§ 18-19

Xana Yehovha a hi kongomisa hi ndlela yini? Xa ku sungula, a hi kongomisa hi ku tizrisa Zritu dzrake ku nga Bibele nakone a tlhela a tizrisa vhanu akuva va hi kongomisa. Hi xikombiso, a tizrisa a “nandzra wa ku dumbeka ni ku tlhazriha” akuva a hi nyika swakuda swa moya akuva hi kota ku teka swiboho swa wutlhazri. (Mat. 24:45) Yehovha a tlhela a tizrisa vavanuna lava nga ni wuswikoti akuva va hi kongomisa. Hi xikombiso, valaviseli va miganga ni vakulu va hi tiyisa va tlhela va hi nyika tidondzro leti hi pfunaka ku lwisana ni swikazratu. Hi wu tlangela ngopfu swinene nkongomiso lowu wa ku dumbeka ka masiku lawa ya wugamu! Leswo swi hi pfuna ku tama hi va vaghanu va Yehovha leswi hi yentxaka hi tikholisa hi wutomi swoswi ni le nkameni lowu taka. Nambitasu, minkama yin’wana swi nga hi kazratela ku landzra minkongomiso ya Yehovha ngopfungopfu loko yi nyikeliwa hi vavanuna lava kalaka va nga hetisekanga. Ka swiyimu leswo, hi fanela ku dumba ka leswaku Yehovha hi yene a kongomisaka vhanu vake ni leswaku ku yingiseta minkongomiso yake swi ni matovoko. Xihondzro Xa Ku Zrindzra 02/2024 p. 20 §§ 2-3

Hi nga yengesela ndlela leyi hi mu zrandzraka ha yone Xikwembu Nkulukumba hi kuva hi dzri dondzra ha hombe Zritu dzrake. Loko u dondzra Bibele zama ku twisisa leswi wudzrunguli lebyo byi ku dondzrisaka swone ha Yehovha. Tivutisi: ‘Xana wudzrunguli lebyi byi swi kombisa hi ndlela yini leswaku Yehovha awa ni zrandzra? Xana wudzrunguli lebyi byi ni yentxa ni kulisa lizrandzru dzranga ha Yehovha hi ndlela yini? Ndlela yin’wana ya ku kulisa lizrandzru dzrezru ha Yehovha i kuva hi mu byela ta le mbilwini hi ku tizrisa xikhongoto. (Amaps. 25:4, 5) Yehovha awa swi hlamula swikhongoto swezru. (1 Yoh. 3:21, 22) Hi fanela ku yengesela lizrandzru ledzri hi nga na dzrone hi vambeni. Malembenyana ntsraku ka leswo, mupostola Pawulo a tive mumpshwa wa kukazri lweyi a vitaniwaka Timotewu. Timotewu a a mu zrandzra ngopfu Yehovha ni vhanu van’wana. Pawulo a hlaye leswi ka Vafilipiya: “Hikusa a ni na mun’wana lweyi a nga ni ku tiyimisela loku fanaka ni kwake [Timotewu], lweyi a taka mi hlayisa hi mbilu hinkwayu.” (Filp. 2:20) Pawulo a a hlamalisiwa ngopfu hi lizrandzru ledzri Timotewu a a li na dzrone hi vamakwavu. Handle ka ku ganaganeka, a mabandla lawa a ma yendzreliwa ha Timotewu a ma tsrhama na ma hlunyela ku mu yamukela—1 Kor. 4:17. Xihondzro Xa Ku Zrindzra 07/2023 p. 9 §§ 7-10

Moxe a fe na Vaisrayele va nga si nghena tikweni dzra xidumbiso. Leswi Moxe a a nga ha li kone, vhanu va Xikwembu Nkulukumba xana va sale na va nga swi tivi swa ku swi yentxa? Im-him. Yehovha a tame a va bekisa loko va tama va dumbeka kwake. Na Moxe a nga si na fa, Yehovha a mu byele leswaku a hlawula Yoxuwa akuva a zrangela vhanu vake. Moxe a wupfise Yoxuwa ku dzringana malembe manyingi. (Eks. 33:11; Deut. 34:9) Handle ka leswo, a ku ni vavanuna vanyingi lava na vone a va tiyimiselile ku zrangela vhanu va Yehovha, vazrangeli va 1000, va 100, va 50 ku ya tlhasa ni ka vazrangeli va 10. (Deut. 1:15) Vhanu va Xikwembu Nkulukumba a va hlayisekile. Xikombiso xin’wana lexinene hi nga na xone i xa Eliya. Ku dzringana malembe manyingi, Eliya a pfune Vaisrayele akuva va tama va va ka wugandzreli bya ku xwenga. Kambe, ku ve ni nkama lowu Yehovha a nyikiki xiyavelo leximpshwa Eliya, a nyingitimu wa Yuda. (2 Tih. 2:1; 2 Makr. 21:12) Xana ku nga va leswaku Vaisrayele va ku dumbeka, lava a va li mfun’wini wa tinxaka ta 10 va tsrhikiwile? Im-him. Hi malembe manyingi Eliya a wupfise Elixa. Yehovha a tame a hetisisa nkongometo wake nakone a ma hlayise ha hombe malandzra yake. Xihondzro Xa Ku Zrindzra 02/2024 p. 5 § 12

Vakriste va le Efesa va hlawule ku hanya hi Zritu dzra Xikwembu Nkulukumba ledzri a dzri fana ni livaningu, ledzri a dzri va kongomisa. (Amaps. 119:105) Vaefesa lava va tsrhike hinkwaswu leswi a swi fambisana ni wukhongoti bya madzrimi ni ku tikhoma hi ndlela ya ku biha. Vone va ve ‘vayetiseli va Xikwembu Nkulukumba.’ Nakone va yentxe hinkwaswu akuva va tizrela Yehovha hi mbilu hinkwayu ni ku mu nyonxisa. (Efe. 5:1) Swa fana ni ka hine, ndlela leyi a hi tikhoma ha yone ni ka wukhongoti lebyi a hi li ka byone na hi nga si dondzra Bibele, a yi kombisa leswaku hi le munyameni. Van’wana vezru a hi patseka ka ku tlangela maferiyadu ya wukhongoti bya madzrimi, nakone van’wana vezru a va tikhoma hi ndlela ya ku biha. Kambe ntsrhaku ka loko hi dondzre hi milawu ya Yehovha mayelanu ni swa swinene ni swa ku biha hi txintxile. Hi sungule ku hanya hi ndlela leyi Yehovha a yi djulaka, kutani leswo swi hi tisele mihandzru leyinene. (Eza. 48:17) Swoswi, hi fanela ku lwisana ni swikazratu swa kukazri. Hi fanela ku yentxa hinkwaswu akuva hi fambela kule ni munyama lowu hi wu tsrhikiki, hi tama hi “hanya ku fana ni vhanu lava nga livaningwini. Xihondzro Xa Ku Zrindzra 03/2024 p. 21 §§ 6-7

Swi nga yentxeka u titwa u nga lulamelanga ku tinyiketela ni ku babatisiwa. Swi nga yentxeka swi vilela kuva u yentxa ku txintxa ka kukazri a wuton’wini byaku akuva u fambisana ni minsinya ya milawu ya Yehovha, kumbe u vilela nkama lowu yengetelekiki akuva u tiyisa lipfumelo dzraku ka Yehovha. (Kol. 2:6, 7) Xidondzro xin’wana ni xin’wana xi hluvuka hi ndlela leyi hambaniki, nakone a hi vampshwa hinkwavu va babatisiwaka ka ntanga leyi fanaka. I swa lisima ku tiva lani u fanelaka ku txintxa kone, ntsrhaku ka leswo yentxa hinkwaswu leswi u nga swi kotaka na u nga tifananisi ni vambeni. (Gal. 6:4, 5) Nambiloko u nga si lulamela ku tinyiketela ka Yehovha, u nga dzri tsrhiki kungu ledzro. Kombela Yehovha leswaku a ku pfuna ku txintxa leswi vilelekaka a wuton’wini byaku. (Filp. 2:13) U nga tiyiseka leswaku Yehovha a ta yingela xikhongoto xaku nakone a ta ku pfuna.—1 Yoh. 5:14. Xihondzro Xa Ku Zrindzra 03/2024 p. 5 §§ 9-10

Siku dzrin’wana Sara a a khunguvanyekile kutani a byele Abrahamu ndlela leyi a a titwa ha yone. A tlhele a nyika Abrahamu nandzru hi leswi a swi humelelile. Abrahamu a a swi tiva leswaku Sara i wansati lweyi a a titsrongahata ni ku tlhela a mu seketela. Abrahamu a yingisete Sara nakone a zame ku lulamisa mhaka leyo. (Gen. 16:5, 6) Hi nga dondzra yini? Vanuna, i ntiyiso leswaku mi ni wutiyanguleli bya ku teka swiboho a ndangwini. (1 Kor. 11:3) Nambitanu, mi nga kombisa lizrandzru hi ku yingela mavonela ya vasati venu nkama lowu mi tekaka swiboho ngopfungopfu swiboho leswi taka va khumba. (1 Kor. 13:4, 5) Khambi dzrimbeni va yamukele vayeni swa xitxhuketa kutani Abrahamu a va zrambele swakuda. Kutani a kombele Sara kuva a tsrhika leswi a a swi yentxa a ya lulamisela nhlayu yikulu ya mapawu. (Gen. 18:6) Sara a seketele xiboho xa Abrahamu kutani hi nkama wolowo a ya yentxa leswi a mu kombeliki swone. Vasati, mi nga yetisela xikombiso xa Sara hi ku seketela swiboho swa vanuna venu. Hi ku yentxa leswo, mi ta va na mi tiyisa wukati byenu.—1 Pet. 3:5, 6. Xihondzro Xa Ku Zrindzra 05/2023 pp. 24-25 §§ 16-17

Ntsrhaku ka loko Gidiyoni a ve muyavanyisi wa tiko dzra Israyele, swi djule kuva a yingiseta ni ku va ni xixixi. Kambe leswo a swi nga nabyali. A yamukele xiyavelo lexi nga ni khombo, xa ku mbundzrumuxa Alitari ledzri a dzri tizriseliwa wugandzreli bya Bali hi papayi wake. (Abaṭ 6:25, 26) Hi ku famba ka nkama swi ze swi ku makhambi mabidzri na Yehovha a byela Gidiyoni ku pumba nhlayu ya masotxha lawa a a li na wone. (Abaṭ. 7:2-7) Nakone a tlhele a yamukela xiyavelo xa ku hlasela minxaxa ya valala a xikazri ka wusiku. (Abaṭ. 7:9-11) Minkama hinkwayu vakulu va fanela ku “lulamela ku yingiseta”. Nkulu lweyi a yingisetaka a nga hlweli ku landzra leswi Bibele kun’we ni nhlengeletanu ya Yehovha va swi hlayaka. Hi ku yentxa leswo, a va na a bekela van’wana xikombiso lexinene. Kambe ka swiyimu swin’wana a swi nabyali ku yingiseta. Hi xikombiso, vakulu swi nga ha vakazretela ku yingiseta ni ku landzra minkongomiso yinyingi leyi va yi yamukelaka. Minkama yin’wana va nga ha va ni ku ganaganeka ka leswaku minkongomiso yoleyo yi ta famba ha hombe kumbe im-him. Kumbe va nga ha kombeliwa ku hetisisa kumbe ku yamukela xiyavelo xa kukazri lexi va nga ha kumanaka ni khombo dzra ku pfaleliwa. Xana vakulu va nga xi yetisela hi ndlela yini xikombiso xa Gidiyoni xa ku yingiseta ka swiyimu swa ku fana ni leswo? Yingiseta ha hombe a minkongomiso u va u yi landzra. Xihondzro Xa Ku Zrindzra 06/2023 pp. 4-5 §§ 9-11