Setembru

Xikwembu Nkulukumba a nyike Yesu ntamu wa ku helisa swikazratu hinkwaswu swa vhanu. Mahlolana lawa Yesu a ma yentxiki ma kombisa leswaku a ni ntamu wa ku helisa swikazratu leswi hine hi kalaka hi nga swi koti ku swi helisa. Hi xikombiso, a ni ntamu wa ku hi ntsrhunxa ka xidoho ni ka hinkwaswu leswi tisiwaka ha xone, swa ku fana ni mavabyi ni lifu. (Mat. 9:1-6; Rom. 5:12, 18, 19) Mahlolana lawa Yesu a ma yentxiki ma tiyisekisa leswaku a ni ntamu wa ku daha “mavabyi ya ku hambanahambana” ni ku tlhela a pfuxa lava fiki. (Mat. 4:23; Yoh. 11:43, 44) Nakone a ni ntamu wa ku lawula swidzedze leswikulu ni ku ntsrhunxa vhanu ka mademona. (Mar. 4:37-39; Luk. 8:2) Hi nyonxa ngopfu swinene hi ku tiva leswaku Yehovha a nyike n’wanake Yesu ntamu wa ku yentxa mintxhumu hinkwayu leyi!Hi nga dumba hi ku helela leswaku Mfumu wa Xikwembu Nkulukumba wu ta tisa matovoko manyingi lani misaveni. Mahlolana lawa Yesu a ma yentxiki loko a li lani misaveni ma kombisa leswi a taka swi yentxa swanga hosi ya Mfumu wa Xikwembu Nkulukumba, kambe hi ndlela leyikulu. Xihondzro Xa Ku Zrindzra 04/2023 p. 3 §§ 5-7

Loko u li ka bandla ledzri ku nga ni vazrezri vanyingi nakone u titwe u tlakule voko makhambi manyingi kambe mufambisi a nga ku nyiketi, swi nga yentxeka u nga ha djuli ku hlamula. Kambe u nga yimi ku dzringisa ku hlamula. Lulamisela tinhlamulo tinyingi ka xiyenge xin’wana ni xin’wana xa ntlhanganu. Loko va nga ku nyiketi akuva u hlamula na ka ha sungula xidondzro, u ta va ni mukhandlu wumbeni wa ku hlamula. Nkama lowu u lulamiselaka dondzro ya Xihondzro Xa Ku Zrindzra, yanakanya hi ndlela leyi yava dzrin’wana ni dzrin’wana dzri yelanaka ha yone ni nhlokomhaka. Hi ndlela leyo, u ta kota ku nyikela tinhlamulo letinene loko dondzro yi ya yi famba. Handle ka leswo, u nga lulamisela ha hombe akuva u hlamula ka mayava lawa ma khanelaka hi timhaka leti yentiki, leti hi ntolovelo ti kazrataka ku ti tlhamuxela. Ha yini? Hikusa swi nga yentxeka va li vatsrongo lava tlakuxaka voko ka mayava wolawu. Kambe swi li yini loko ntsrhaku ka mintlhanganu yinyingi va nga ku nyiki akuva u hlamula? Na mintlhanganu yi nga si sungula u nga ya bula ni mufambisi u va u mu byela yava ledzri a u navela ku hlamula ka dzrone. Xihondzro Xa Ku Zrindzra 04/2023 pp. 21-22 §§ 9-10

Yosefa a a nga hlweli ku yamukela minkongomiso, kutani leswo swi mu yentxe a va nuna lwenene. Swi ze swi ku kolomu ka makhambi mazrazru na a yamukela minkongomiso leyi pfaka ka Xikwembu Nkulukumba leyi fambisanaka ni ndangu wake. Ka makhambi lawa hinkwayu, a yi yamukele ha hombe minkongomiso, nambi loko leswo a swi patsra ku yentxa ku txintxa lokukulu. (Mat. 1:20; 2:13-15, 19-21) Hikuva a yingisete minkongomiso ya Xikwembu Nkulukumba, Yosefa a sizrelele Mariya, a mu seketela ni ku mu hlayisa. Handle ka ku ganaganeka, leswo swi yentxe leswaku a lizrandzru ni xihlonipho leswi Mariya a a li na swone ha Yosefa swi tama swi kula! Vavanuna, minkama hinkwayu mi nga yetisela xikombiso xa Yosefa hi ku djuletela minkongomiso leyi kumekaka a Bibeleni nkama lowu mi hlayisaka mindangu yenu. Nambiloko swi djula kuva u yentxa ku txintxa lokukulu, loko u landzra minsinya ya milawu ya Bibele, u kombisa leswaku wa mu zrandzra nsati waku nakone leswo swi ta tiyisa wukati byaku. Makwezru wa kukazri wa xisati wa le Vanuatu lweyi a nga ni ku tlula 20 wa malembe na a txhatile a li: “Loko nuna wanga a djula ni ku landzra minkongomiso ya Yehovha, ni ya ni mu hloniphaka ngopfu. Ni titwa na ni sizrelelekile nakone ni tlhela ni dumba swiboho leswi a swi tekaka.” Xihondzro Xa Ku Zrindzra 05/2023 p. 21 § 5

Vayuda lava a va tlhelela a Babilona a va ta ndzruluka ‘tiko dzra ku xwenga ku Yehovha’. (Deut. 7:6) Kambe swi le livaleni leswaku akuva va nyonxisa Yehovha a va fanela ku yentxa ku txintxa ka kukazri. Vanyingi va vayuda lava pswaleliwiki a Babilona, a va ni mayanakanyela ya ku fana ni Vababilona. Ntsrhaku ka kolomu ka 70 wa malembe na vayuda va ku sungula va tlhele a Israyele, Mufumi Neyemiya a hlundzruke ngopfu loko a tive leswaku vatsrongwana lava pswaliwiki a Israyele a va ngi ngi dondzrisiwa nambi lidzrimi dzra xiyuda. (Deut. 6:6, 7; Nehem. 13:23, 24) Xiyenge xa xikulu xa Zritu dzra Xikwembu Nkulukumba a xi tsraliwe hi Xiheberu. Kutani xana vana lava a va ta dondzrisa kuyini ku zrandzra ni ku gandzrela Yehovha leswi nambi lidzrimi ledzro va kalaka va nga dzri tivi? (Ezr. 10:3, 44) Swa twisiseka leswaku Vaisrayele lava a va ta fanela ku yentxa ku txintxa lokukulu a wuton’wini byavu, kambe a swi ta va nabyalela ku yentxa ku txintxa koloko loko a va li Israyele lani ha katsrongokatsrongo a wugandzreli bya ku xwenga a byi ya byi pfuxetiwa.—Nehem. 8:8, 9. Xihondzro Xa Ku Zrindzra 05/2023 p. 15 §§ 6-7

A xa ku vavisa hi leswaku nambiloko u ni nsusumeto lowunene ni ku tiyimisela u nga ha txhuka u kumana ni swikazratu swa kukazri akuva u tlhaselela kungu dzraku. Hi xikombiso, ‘humelelo’ kumbe mintxumu leyi hi kalaka hi nga yi yimelanga yi nga ha tsrhika hi nge na nkama lowu hi wu vilelaka akuva hi tlhaselela kungu dzrezru. (Ekles. 9:11) Kumbe mhaka ya kukazri yi nga ha hi yentxa hi godola ni ku hela ntamu. (Amapr. 24:10) Nakone hi kola ka ku pfumala ku hetiseka, hi nga ha hetelela hi yentxe swihoxo leswi nga yentxaka swi hi kazrateka ku tlhaselela makungu yezru. (Rom. 7:23) Kumbe hi ku va ntsena hi titwa na hi kazralile. (Mat. 26:43) I yini swi nga hi pfunaka ku hlula swikazratu kumbe loko hi hele ntamu? Swikazratu a swi fanelanga swi ku yentxa u kodola ku tlhaselela kungu dzraku. A Bibele dzri swi beka a livaleni leswaku nambi loko hi kumana ni swikazratu swinyingi, hi nga swi kota ku ya mahlweni. Loko hi tama hi ya mahlweni nambiloko hi kumana ni swikazratu hi komba Yehovha leswaku hi djula ku mu nyonxisa nakone Yehovha a nyonxa ngopfu loko a hi vona na hi tikazratela ku tlhaselela kungu dzrezru! Xihondzro Xa Ku Zrindzra 05/2023 p. 30 §§ 14-15

Ku va phayona swi pfuna djaha ku hanyisana ha hombe ni vhanu lava nga ni wumhunu lebyi hambaniki ni ku tizrisa ha hombe mali leyi dzri yi kumaka. (Filp. 4:11-13) Ndlela leyinene ya ku sungula ntizro wa nkama hinkwawu i ku teka wuphayona bya ku pfunisa, leswo swi pfuna ku lulamela ku va maphayona ya nkama hinkwawu. Ntizro wa wuphayona wu nga tlhela wu ku pfulela mikhandlu yin’wana ya ku va ka ntizro wa ku hlawuleka nkama hinwawu, wa ku fana ni ku tizra ka ku yaka kumbe a Betele. Vakriste hinkwavu va xinuna a bandleni va fanela ku va ni kungu dzra ku faneleka ku tizra swanga vakulu va bandla. A Bibele dzri hlaya leswaku vavanuna hinkwavu lava tikazratelaka ku kuma wutiyanguleli lebyo va tikazratela “ntizro lowunene”. (1 Tim. 3:1) Ku sungula, makwezru wa xinuna a fanela ku faneleka ku va nandzra wa wutizreli. Malandzra ya wutizreli ma pfuna vakulu ku hlayisa vamakwezru a bandleni hi tindlela ta ku hambanahambana. Vakulu va bandla kun’we ni malandzra ya wutizreli i malandzra ya ku titsrongahata lawa ma tizrelaka vamakwezru nakone i vazrezri va nkhikhi. Xihondzro Xa Ku Zrindzra 12/2023 p. 28 §§ 14-16

Hosi Yosiya a sungule ku tsrhindzrekela ka Yehovha loko a ni 16 wa malembe. A djula ku dondzra leswi yengetelekiki ha Yehovha ni ku yentxa ku zrandzra kwake. Kambe, a hi minkama hinkwayu wutomi a byi mu nabyalela mumpswha lweyi, lweyi a li hosi. A nkameni luwani vhanu vanyingi a va gandzrela swikwembu swa madzrimi nakone swi djule kuva Yosiya a va ni xixixi akuva a kota ku yimelela wugandzreli bya ntiyiso. Nakunene a dzri yimelile! Phela nambi 20 wa malembe a nge nawu loko a sungula ku helisa wugandzreli bya madzrimi a tikweni. (2 Makr. 34:1, 2) Nambiloko wa ha li mumpswha u nga swi kota ku yetisela xikombiso xa Yosiya hi ku tama u dondzra leswi yengetelekiki ha Yehovha ni matsrhamela yake ya ku hlamalisa. Leswo hi swone swi taka ku yentxa u djula ku tinyiketela ka Yehovha. Kambe xana xiboho lexo xi ta byi khumba hi ndlela yini wutomi byaku? Makwezru wa kukazri lweyi a vitaniwaka Luke, lweyi a babatisiwiki na a ni 14 wa malembe, a hlaya leswi: “Ku sukela ka namunhla ku ya a mahlweni, ni ta teka ku tizrela Yehovha ku li ntxhumu wa ku sungula a wuton’wini byanga, nakone ni ta tikazratela ku nyonxisa mbilu yake.” (Mar. 12:30) Tiyiseka leswaku na wene u ta tovokisiwa loko u tiyimisela ku yentxa leswi fanaka! Xihondzro Xa Ku Zrindzra 09/2023 p. 11 §§ 12-13

Loko mupostola Pawulo a tsrale papela ledzri yaka ka Vatesalonika, bandla ledzriyani a dzri nge na lembe na dzri simekiwile. Swi nga yentxeka vavanuna lava hlawuliwiki a va nge na mfambu wukulu, nakone swi nga yentxeka va yentxe swihoxo swa kukazri, nambitanu a va fanela ku hloniphiwa. Nkama lowu hi yaka hi tsrhindzrekela ka nhlomulu lowukulu, hi fanela ku dumba vakulu va bandla ni ku tama hi landzra minkongomiso yavu. Swi nga ha yentxeka swi nga ti koteka kuva hi bulisana ni ntsindzra wa misava hinkwayu kumbe zrwavi, xileswo i swa lisima kuva na ka ha li swoswi hi dondzra ku zrandzra ni ku nhlonipha vakulu lava nga bandleni dzrezru. Swi nge na mhaka leswaku ku nga ha txhuka ku humelela yini, hi ta tama hi tsrhama na hi pfukile nakone hi nga tibeka tihlo ka ku kala ku hetiseka ka vamakwezru. Hi fanela ku beka miyanakanyu yezru ka leswaku Yehovha na Yesu va kazri va kongomisa vavanuna lavo va ku dumbeka. Swanga hi leswi a kapaseti a dzri sizrelela nhloko ya musotxha, a dumbo dzrezru dzra ku huluxiwa dzri sizrelela miyanakanyu yezru. Dzri hi pfuna ku twisisa leswaku hinkwaswu leswi misava yi nga naswone a swi pfuni ntxhumu. (Filp. 3:8) Dumbo dzrezru dzri hi pfuna ku tama hi va ni ku zrula ni ku tiyisela. Xihondzro Xa Ku Zrindzra 06/2023 pp. 11-12 §§ 11-12

Lava yingisetaka ‘wansati wa vuphukuphuku’ va fanela ku teka xiboho xa leswaku va ta xi yamukela a xizrambu xake kumbe im-him. Hi ni swivangelo leswi twalaka swa ku fambela kule ni ku tikhoma hi ndlela ya ku biha hi tlhelo dzra tinkuku. A ‘wansati wa vuphukuphuku’ a li: ‘A mati lama yiviwiki ma nandzriha.’ (Amapr. 9:17) I yini ‘mati lama yiviwiki’? A Bibele dzri fananisa timhaka ta ntinkuku ka wanuna ni wansati lava txhatiki ni mati ya ku titimeta. (Amapr. 5:15-18) Wanuna ni wansati lava txhatiki hi nawu va nga tikholisa hi timhaka ta tinkuku hi ndlela leyi yamukelekaka. Kambe swi hambane ngopfu swinene ni ‘mati lama yiviwiki’. Wone ma nga ha fanekisela timhaka ta tinkuku leti nga liki nawini kumbe leti yilisiwaka. Ku fana ni muyivi lweyi a zamaka ku yiva na a nga voniwi, vhanu lava tikhomkaka hi ndlela ya ku biha hi tlhelo dzra tinkuku va zama ku swi fihla akuva van’wana va nga swi tivi. Nakone loko vhanu lava va yanakanya leswaku a ku na mhunu lweyi a nga ta swi tiva, a ‘mati lama yiviwiki’ ma nga ha voneka na ma ya ma nandzrika. I xihoxo xikulu ku yanakanya hi ndlela leyo! Hikusa Yehovha a vona hinkwaswu. A ku na ntxhumu xa ku ‘nandzrika’ a mhakeni leyo. A matsrhan’wini ya leswo, u ta luza ku nyonxeliwa hi Yehovha ku nga txhumu wa ku vavisa ngopfu.—1 Kor. 6:9, 10. Xihondzro Xa Ku Zrindzra 06/2023 p. 22 §§ 7-9

Swi nga kuyini loko swikhongoto swaku swi nga ha sukeli mbilwini nakone u ya sin’wini akuva u hetisisa nawu? U nga pimisi leswaku awa he na moya wa ku xwenga wa Yehovha. Wene u mhunu wa ku kala ku hetiseka, minkama yin’wana u nga ha titwa hi ndlela leyo. Loko u titwa u nge he na nkhinkhi ya ku fana ni leyi a wu li na yone a ku sunguleni, yimanyana u yanakanyisisa hi xikombiso xa mupostola Pawulo. Nambileswi a a tikazratela ku yetisela Yesu, minkama yin’wana matitwela yake a ma pfa ma txintxatxintxa. Pawulo a a tiyimisele ku hetisisa ntizro wake swi nge na mhaka ni ndlela leyi a a titwa ha yone hi nkama wolowo. Hi ndlela leyi fanaka, u nga teki swiboho hi ku ya hi ndlela leyi u titwaka ha yone. Tiyimisele ku tama u yentxa leswi nga swinene swi nge na mhaka ni ndlela leyi u titwaka ha yone. Loko u tama u yentxa leswi nga swinene, matitwela yaku na wone ma nga txintxa ma va lamanene.—1 Kor. 9:16. Xihondzro Xa Ku Zrindzra 03/2024 pp. 11-12 §§ 12-13

Hi nga kombisa lizrandzru ka vamakwezru hi ku va yamukela ni ku tlhela hi hamba xinghanu na vone. (2 Kor. 6:11-13) Ntalu wezru hi le ka mabandla lawa ma vumbiwaka hi vamakwezru lava va kulisiwiki hi ndlela ya ku hambana ni yezru ni ku tlhela hi va ni wumhunu lebyi hambaniki. Hi nga tiyisa lizrandzru dzrezru hi kuva hi lavisisa matsrhamela lamanene lawa va nga na wone. Lizrandzru dzri ta hi pfuna ngopfu hi nkama wa nhlomulo lowukulu. Xana Yehovha a ta hi sizrelela hi ndlela yini loko nhlomulo lowukulu wu sungula? Vona leswi Yehovha a kongomisiki vhanu vake kuva va swi yentxa a nkameni lowu khalutiki loko va hlaseliwa hi Vababilona: ‘Famba, we tiko dzranga, u ya nhingena tindlwini taku, u pfala tinyangwa ntsrhaku kwaku, tumbela nkamanyana, a mahlundzru ma ko ma hela.’ (Eza. 26:20) Swi nga yentxeka nkongomiso lowu wu ta tizra ni kwezru hi nkama wa nhlomulo lowukulu. Xihondzro Xa Ku Zrindzra 07/2023 pp. 6-7 §§ 14-16

Tiviwa swanga mhunu lwa yanakanyelaka vambeni. Tivutise leswi: ‘Xana ni tiviwa ni li mhunu lweyi a yanakanyelaka ni ku pfumelela mintxhumu ya kukazri kumbe ni tiviwa ni li mhunu wa nkanu ni ku ti lebyisa? Xana ni sindzrisa kuva vhanu va yentxa mintxhumu hi ndlela leyi ni yi djulaka?’ Akuva hi kombisa leswaku hi yetisela Yehovha na Yesu swi ta ya hi leswaku hi vhanu lava yanakanyelaka ku ya tlhasela kwini. Loko swiyimu swezru swi txintxa, hi fanela kuva lava yanakanyelaka ni ku nabyala. A ku txintxa koloko ku nga ha hi buyisela swikazratu leswi a hi nga yimelanga ku kumana na swone. Hi xikombiso, na hi nga swi yimelanga hi nga ha va ni xikazratu lexikulu xa lihanyu kumbe xikazratu xa timali kumbe xa politika. Leswi nga ha yentxaka wutomi byezru byi ya byi bindzra. (Ekles. 9:11) Phela nambi ku txintxa ka xiyavelo xezru ku nga ha va xikazratu lexikulu. Swi nga koteka ku titwananisa ni swiyimu leswimpshwa. Hi leyi mune wa mintxhumu leyi nga hi pfunaka: 1) Pfumela ntiyiso wa mhaka, 2) lavisela wumundzruku, 3) beka miyanakanyu ka leswinene, ni 4) ku yentxa xa kukazri akuva u pfuna van’wana. Xihondzro Xa Ku Zrindzra 07/2023 pp. 21-22 §§ 7-8

Muprofeta Daniyele a ha li mumpshwa loko va mu tekile a Yerusalema akuva a ya va xikazrawa a Babilona. Phela a a li kule ni kaya kwake. Kambe nambi leswi Daniyele a a li kule ni kaya, masotxha ya Vababilona ma hlamalisiwe swinene. Va vone leswaku Daniyele ‘a a nga na vulema nakone a a ni liso la ku xonga’ ni leswaku a a buya hi ka ndangu lowu hloniphiwaka. (1 Sam. 16:7) Leswi yentxiki leswaku Vababilona va djula ku wupfisa Daniyele akuva a tizra a ndlwini ya hosi. (Dan. 1:3, 4, 6) Yehovha a a mu zrandzra Daniyelehi kola ka wumhunu lebyi Daniyele a a hlawule ku va na byone. Swi nga yentxeka Daniyele a a ni kolomo ka 20 wa malembe loko Yehovha a hlaye leswaku a a fana na Nowa na Yobe. Kutani Yehovha a a teka mumpshwa lweyi, Daniyele, swanga mhunu lweyi a lulamiki ngopfu ku fana na Nowa na Yobe lava mu tizreliki ku dzringana malembe manyingi. (Gen. 5:32; 6:9, 10; Yb. 42:16, 17; Ezek. 14:14) Daniyele a hanye malembe manyingi nakone na a nyonxile hi leswi a a tizrela Yehovha. Nakone nkama hinkwawu lowo Yehovha a a mu zrandzra.—Dan. 10:11, 19. Xihondzro Xa Ku Zrindzra 08/2023 p. 2 §§ 1-2

Loko u djula ku xava yindlu a u ta ya u ya vona matsrhamela ya yone ni swin’wana. Nakunene, a wu ta nyoxela ku tiva hinkwaswu mayelanu ni yindlu yoleyo na wu nge si na yi xava. Hi nga yentxa leswi fanaka loko hi li ku dondzreni ka Bibele. Loko u nga dzri dondzri ha hombe Bibele u to gamela ntsena ka “mitxhumu ya masungulo”. (Heb. 5:12) Swanga hi leswi a yindlu a wu ta zranga hi ku ya yi vona u yi tiva ha hombe na u nga si na yi xava, u fanela ku yentxa leswi fana loko u dondzra a Bibele akuva u dzri twisisa ha hombe. A ndlela leyinene ya ku dondzra Bibele i ku vona ndlela leyi ndzimana leyo yi yelanaka ha yone ni tin’wana. Ti kazrateli ku twisisa ku nga li mintxhumu leyi u kholwaka ka yone ntsena kambe ni leswaku ha yini u kholwa ka yone. Akuva hi dzri twisisa ha hombe Zritu dzra Xikwembu Nkulukumba, hi fanela ku dondzra mintiyiso leyi yi yentiki ya Bibele. Mupostola Pawulo a byeli vamakwavu leswaku va fanela ku dondzra Zritu dzra Xikwembu Nkulukumba ha hombe akuva va kota “ku twisisa hi ku helela ku yanama, ku leha, ku tlakuka, ni ku yenta ka ntiyiso’’. Hi ku yentxa leswo, a va ta kota ku “dzima mintsru ni ku tlhela va tiya” a lipfumelweni. (Efe. 3:14-19) Kutani, na hine hi fanela ku yentxa leswi fanaka. Xihondzro Xa Ku Zrindzra 10/2023 p. 18 §§ 1-3

Bibele dzri ni swikombiso swa vhanu vanyingi lava lehisiki mbilu. Swi ngo yini ka dondzro yaku ya Bibele u hamba xiyimiso xa ku dondzra ha vone? Hi xikombiso, Davhida a a li mumpshwa loko a hlawuliwe swanga hosi ya Israyele nakone swi djule a yima malembe manyingi akuva a sungula ku fuma. Xikombiso, xin’wana i xa Simiyoni ni xa Ana. Vone a va gandzrela Yehovha hi ku dumbeka na va yimela ku ta ka Mesiya. (Luk. 2:25, 36-38) A nkama lowu u dondzraka wudzrunguli lebyo, kuma tinhlamulo ta swivutiso leswi: I yini swi mu pfuniki ku lehisa mbilu? Ha yini ku lehisa mbilu swi ve swinene kwake? U nga tlhela u dondzra ka lava kalaka va nga lehisanga mbilu. (1 Sam. 13:8-14) Loko u li ku kambisiseni ka swikombiso leswo, tivutisi: ‘Ha yini mhunu lweyi a nga lehisanga mbilu? He yini mintxhumu ya ku biha leyi humeleliki hi kola ka leswo?’ Xihondzro Xa Ku Zrindzra 08/2023 p. 25 § 15

Mupostola Petro a a dumbekile, a nga pfumelelanga ntxhumu xi mu tsrhikisa kuva mulandzreli wa Yesu. Hi xikombiso, khambi dzrin’wana Petro a kombise ku dumbeka loko Yesu a hlaye ntxhumu wa kukazri lowu vadondzrisiwa van’wana va kalaka va nga wu twisisanga ha hombe. (Yoh. 6:68) Nakone vanyingi lava a va landzrela Yesu va tsrhike ku mu landzrela nakone a va zanga va djule ntlhamuxelo wa mhaka yoleyo. Kambe Petro a nga yentxanga leswo, nakone a byele Yesu leswaku o va yene ntsena lweyi a nga ni “mazritu ya wutomi lebyi nga helikiki.” Yesu a a swi tiva leswaku Petro kun’we ni vapostola van’wana a va ta mu baleka. Nambitanu, Yesu a hlaye leswaku a a swi tiva leswaku Petro a a ta tama a dumbeka. (Luk. 22:31, 32) Yesu a a swi tiva leswaku “a mbilu ya swi djula, kambe a mizri a wu na ntamu”. (Mar. 14:38) Hi kola ka leswo, Yesu a nga mu tsrhikanga mupostola wake wa ku zrandzreka nambi ntsrhaku ka loko a yalile leswaku awa mu tiva. Swi tikomba na ntsrhaku ka loko Yesu a pfuxiwile a ta va a humeleli mahlweni ka Petro, na Petro a li wuswake. (Mar. 16:7; Luk. 24:34; 1 Kor. 15:5) Nakone swi nga yentxeka leswo swi mu tiyisile Petro, lweyi a a khunguvanyekile hi kola ka hinkwaswu leswi a a swi yentxile. Xihondzro Xa Ku Zrindzra 09/2023 p. 22 §§ 9-10

Xikwembu Nkulukumba a dzrivalela swidoho swa lava nga ni lipfumelo kwake. A va dzrivalela hi ku helela nakone a nga ha tlheli a swi dzrimuka swidoho swavu. (Amaps. 32:1, 2) Ku yene, a mhunu lweyo a lulamile nakone a nga na xihoxo hi kola ka lipfumelo dzrake. I ntiyiso leswaku Abrahamu, Davhida ni malandzra man’wana ya Yehovha ya ku dumbeka ma voniwe ma li lama lulamiki, nambitanu ma tame ma va lama kalaka ma nga hetisekanga ni ku va vadohi. Kambe hi kola ka lipfumelo ledzri a ma li na dzrone, Yehovha a ma vone swanga lama hetisekiki, ngopfungopfu loko ma pimanisiwa ni lava a va nga mu tizreli. (Efe. 2:12) Ka papela ledzri a dzri tsraleliki Varoma, mupostola Pawulo a tlhamuxele leswaku hi fanela ku va ni lipfumelo loko hi djula ku va vanghanu va Xikwembu Nkulukumba. Xileswo, ku fana na Abrahamu na Davhida, loko hi va ni lipfumelo ka Yehovha na hine hi nga va vanghanu vake. Xihondzro Xa Ku Zrindzra 12/2023 p. 3 §§ 6-7

Namunhla, Vakriste hinkwavu va ni tovoko dzra ku nyikela switlhavelo ka Yehovha hi ku tizrisa nkama wavu, ntamu wavu ni leswi va nga na swone akuva va seketela hinkwaswu leswi a Mfumu wa Xikwembu Nkulukumba wu nga le ku swi yentxeni. Hi kombisa leswaku hi dzri nyika lisima a tovoko ledzro loko hi gandzrela Yehovha hi hinkwaswu leswi hi nga na swone. Mupostola Pawulo a vulavule hi mintxhumu yinyingi leyi hine hi fanelaka ku yi yentxa akuva hi gandzrela Yehovha. (Heb. 10:22-25) Mintxhumu leyo yi patsra ku khongota ka Yehovha, ku zrezrela van’wana hi va byela hi ta dumbu dzrezru ni ku va kone mintlhanganwini akuva hi kutxana ni vamakwezru, “ngopfu ngopfu leswi siku dzra Yehovha dzri tsrhindzrekelaka”. Nakone ka buku dzra Mpfuletelo hi dondzra hi leswi a ntsrumi ya Yehovha yi swi hlayiki, yone yi te: “Gandzrelani Xikwembu Nkulukumba!” Yi phindhe mazrito lawa kabidzri ku kombisa leswaku i ya lisima ngopfu swinene! (Mpful. 19:10; 22:9) A hi swi djuli ku txhuka hi dzrivala leswi hi swi dondzriki mayelanu ni tempele ledzrikulu dzra moya, kun’we ni tovoko dzra ku hlawuleka ledzri hi nga na dzrone dzra ku gandzrela Xikwembu Nkulukumba. Xihondzro Xa Ku Zrindzra 10/2023 p. 29 §§ 17-18

Hinkwezru hi djula ku ‘tama hi zrandzrana.’ Kambe, hi fanela ku dzrimuka leswi Yesu a swi hlayiki loko a ku “a lizrandzru dzra vhanu vanyingi dzri ta hola.” (Mat. 24:12) Kambe Yesu a a nga djuli ku hlaya swone leswaku ntalu wa vadondzrisiwa vake a va ta tsrhika ku kombisana lizrandzru. Kambe hi fanela ku tivonela leswaku ku kala lizrandzru ka misava leyi ku nga kutxeteli ndlela leyi hi hanyisanaka ha yone ni vamakwezru. Na ha ha ni leswo miyanakanywini, a hi voneni xivutiso xin’wana xa lisima: Hi nga swi vonisa kuyini leswaku a lizrandzru dzrezru hi vamakwezru dzri tiyile? Yin’we ya tindlela ta ku kambela leswaku hakunene a lizrandzru dzrezru hi vamakwezru dzri tiyile i ku yanakanyisisa hi ndlela leyi hi tikhomaka ha yone loko hi ni xikazratu xa kukazri ni makwezru. (2 Kor. 8:8) Leswo swi tikomba hi leswi Petro a swi hlayiki loko a ku: “Henhla ka hinkwaswu, zrandzrananani ngopfu swinene, hikusa a lizrandzru dzri funeketa swidoho swinyingi.” (1 Pet. 4:8) Leswi liki, a ku tsrana ni ku kala ku hetiseka ka vambeni ku nga ha dzringa ndlela leyi hi va zrandzraka ha yone vamakwezru. Xihondzro Xa Ku Zrindzra 11/2023 pp. 10-11 §§ 12-13

Hi ta va na hi nga kombisi leswaku ha wu landzra nawu wa Yesu loko hi kombisa lizrandzru ka ntlawa wa kukazri wa vamakwezru kambe ku va ni van’wana lava hi kalaka hi nga va kombisi lizrandzru. I ntiyiso leswaku hi nga ha zrandzra ngopfu vhanu va kukazri hi lani swi viki ha kone ka Yesu ni vapostola vake. (Yoh. 13:23; 20:2) Kambe mupostola Petro a hi dzrimuxa leswaku hi fanela ku tikazratela ku “zrandzra vamakwezru hinkwavu”. Hi va zrandzra swanga swizro swa ndangu. (1 Pet. 2:17) Petro a hi kutxa ku “zrandzranana ngopfu swinene na swi sukela mbilwini”. (1 Pet. 1:22) A mhakeni leyi, a ku ‘zrandzrananana ngopfu’ swi tlhamuxela ku zrandzra mhunu nambiloko swi kazrata ku kombisa lizrandzru ka mhunu lweyo. Hi xikombiso, a wu ta yentxa yini loko makwezru o ku khunguvanyisa? N’waninkama a ntxhumu wa ku sungula lowu nga hi telaka a miyanakanywini i ku tlhelisela wubihi hi wubihi, a matsrhan’wini ya ku kombisa lizrandzru. Kambe, Petro a dondzre ka Yesu kriste leswaku ku yangula hi ndlela leyo, leswi liki ku tlhelisela wubihi hi wubihi a swi mu nyonxisi Xikwembu Nkulukumba. (Yoh. 18:10, 11) Petro a tsrale leswi: “Mi nga tlheliseli wubihi hi wubihi kumbe xizruku hi xizruku. Ku hambana ni leswo, va yentxelani leswinene van’wana.” (1 Pet. 3:9) Loko u va zrandzra ngopfu vamakwezru u ta kombisa wunene ka hinkwavu ni ku tikazratela ku va twisisa. Xihondzro Xa Ku Zrindzra 09/2023 pp. 28-29 §§ 9-11

Swa hlamalisa ku vona ndlela leyi ntsrongwana a kulaka ha yone hi nkamanyana wutsrongo a va nkulu wa mhunu, nakone leswo swi yentxeka hi ku kahlula. Kambe, ku kula hi tlhelo dzra moya swi hambanile. (1 Kor. 13:11; Heb. 6:1) Ku va mhunu a va ni wuxaka lebyi tiyiki na Yehovha swi djula leswaku a tikazrata. Handle ka leswo, akuva a va ni matsrhamela lamanene, ku va ni wuswikoti bya ku yentxa xa kukazri ni ku tlhela a tilulamisela akuva a va ni wutiyanguleli a nkameni lowu taka, a vilela mpfunu wa moya wa ku xwenga. (Amapr. 1:5) Yehovha a vumbe wanuna ni wansati. (Gen. 1:27) I ntiyiso leswaku a vavanuna ni vavasati va ni xivumbeko lexi hambaniki, kambe va tlhela va hambana hi tindlela tin’wana. Hi xikombiso, Yehovha a vumbe vavanuna ni vavasati akuva va hetisisa wutiyanguleli bya kukazri, xileswo va vilela ku va ni matsrhamela ni wuswikoti bya kukazri akuva swi va pfuna ku hetisisa wutiyanguleli byavu.—Gen. 2:18. Xihondzro Xa Ku Zrindzra 12/2023 p. 18 §§ 1-2

Xana Yesu a a tlhela a djula leswaku van’wana va tizrisa vito dzra Papayi wake? Ina. Van’we ka vazrangeli va wukhongoti a va kholwa leswaku vito dzra Xikwembu Nkulukumba dzri xwenge ngopfu kuva mhunu a dzri tizrisa, kambe Yesu a nga pfumelelanga leswaku a swihena leswi kalaka swi nga seketeliwanga a matsralweni swi mu sivela ku dzrumisa vito dzra Papayi wake. Khambi dzrin’wana Yesu a dahe wanuna lweyi a a ni mademona lweyi a a tsrhama a mugangeni wa Vagerasi. Vhanu va txhave ngopfu swinene lakakuva va kombela leswaku Yesu a suka a mugangeni luwani. (Mar. 5:16, 17) Nambitasu,Yesu a a djula leswaku vhanu va muganga luwani va tiva vito dzra Xikwembu Nkulukumba. Kutani, Yesu a byele wanuna lweyi a mu dahiki leswaku a nga byeleteli vhanu leswi a swi yentxiki kambe a va byela leswi Yehovha a mu yentxeliki swone. (Mar. 5:19) Yesu a ha djula leswi fanaka ni namunhla, ku nga kuva hi tivisa vito dzra Papayi wake a misaveni hinkwayu! (Mat. 24:14; 28:19, 20) Loko hi hamba xiyenge xezru a mhakeni leyi, hi ta yentxa leswaku hosi yezru Yesu Kriste yi nyonxa ngopfu swinene. Xihondzro Xa Ku Zrindzra 02/2024 p. 10 § 10

Swi nyonxisa ngopfu ku hamba xiyenge xa nhlengeletanu ya Yehovha ka masiku lawa ya wugamu lama kazrataka. Xiyimu xa misava leyi xi ya xi bindzra, kambe Yehovha a hi nyike vamakwezru kuva va hi pfuna. (Amaps. 133:1) A tlhela a hi nyika ndangu lowu sizrelelekiki ni lowu tiyiki. (Efe. 5:33–6:1) Nakone a hi nyika wutlhazri lebyi hi byi vilelaka akuva hi lwisana ni ku hlatiyela nakone hi va lava nyonxiki. Hi fanela ku tikazrata ngopfu akuva hi tizrela Yehovha hi ku dumbeka. Ha yini? Hikusa hi nga ha khunguvanyeka hi leswi van’wana va swi hlayaka kumbe ku swi yentxa. Nakone swi nga hi kazratela ku lwisana ni ku kala ku hetiseka kwezru, ngopfungopfu loko u tsrhamela ku yentxa xihoxo xolexi xa xin’we. Hi fanelaka ku tiyisela nkama lowu hi tizrelaka Yehovha 1) loko vamakwezru va hi khunguvanyisa, 2) loko hi hela ntamu hi kola ka leswi nkatezru a yentxiki xihoxo ni 3) loko hi hela ntamu hi kola ka swihoxo swezru. Xihondzro Xa Ku Zrindzra 03/2024 p. 14 §§ 1-2

Minkama yin’wana u ta twa mimfambu ya vamakwezru lava tikazrateliki ku yentxa leswi yengeletekiki a ntizrweni wa Yehovha. Swi nga yentxeka va ya ka Xikole xa Vazrezri va Mfumu kumbe va zruzrele lomu ku nga ni xivileleko lexikulu. Loko swiyimu swaku swi ku pfumelela, lawa i makungu lamanene ya ku u nga va na wone. Minkama hinkwayu hi tikazratela ku yentxa leswi yengetelekiki a ntizrweni wa Yehovha. (Mint. 16:9) Loko u nga swi koti ku yentxa leswo hi kola ka xivangelo xa kukazri, u nga tivone u nge na lisima. Xa lisima ka mukriste i kuva a tama a tiyisela. (Mat. 10:22) U nga dzrivale leswaku Yehovha a swi teka swi li swa lisima hinkwaswu leswi u kotaka ku swi yentxa hi ku ya hi wuswikoti byaku ni swiyimu swaku. Hi leswo swi taka ku pfuna akuva u tama u landzrela Yesu ntsrhaku ka babatiso.—Amaps. 26:1. Xihondzro Xa Ku Zrindzra 03/2024 p. 10 § 11

Yehovha a dumbisa leswaku loko hi tisola a ta hi dzrivalela. (Amaps. 86:5) Xileswo loko kutani hi tisolile ka swidoho leswi hi swi yentxiki, hi nga tiyiseka leswaku Yehovha a hlaya ntiyiso nakone a hi dzrivalelile. Dzrimuka leswaku Yehovha a nga hi bindzriseli nakone awa yanakanyelana. A nga hi sindzrisi ku yentxa swa ku tlula leswi hi nga swi kotaka, a nyika lisima ntizro wun’wana ni wun’wana lowu hi wu yentxaka ntsena loko hi tikazrata. Nakone u nga yanakanyisisa hi swikombiso swa le Bibeleni swa vhanu lava tizreliki Yehovha hi timbilu tavu hinkwatu. Yanakanya hi mupostola Pawulo. A tizre yi nga txhayi ku dzringana malembe manyingi, a yendzre mpfhuka wa ku leha swinene nakone a pfunisile a ku simekiweni ka mabandla. Kambe loko xiyimu xake xi txintxile a nga ha swikoti ku zrezra ku fana ni khale, a nga va leswaku Yehovha a a nga ha swi nyiki lisima leswi a nga swi yentxa? Im-him. Pawulo a tame a yentxa leswi a nga swi kota nakone Yehovha a mu tovokisile. (Mint. 28:30, 31) Hi ndlela leyi fanaka, leswi hi mu yentxelaka swone Yehovha swi nga ha txintxa hi ku famba ka nkama. Kambe lexi xi nga xa lisima i nsusumeto lowu hi yentxaka hi mu tizrela. Xihondzro Xa Ku Zrindzra 03/2024 p. 27 §§ 7, 9

Ndlela leyi Yesu a a swi hamba ha yone swikhongoto ka Yehovha i xikombiso lexinene lexi a hi siyeliki xa ku xi yetisela. Ka wutizreli byake hinkwabyu, Yesu a a khongota nkama ni nkama. Nambileswi a a tsrhama na a khomekile kun’we ni ku tsrandzreliwa hi xitsrhungu a a fanela ku tinyika nkama wa ku khongota. (Mar. 6:31, 45, 46) A a pfuka ni mpundzru swinene akuva a ya khongota na a li wuswake. Khambi dzrin’wana na a li kusuhi ni ku teka xiboho xa lisima swinene a khongote ku dzringana wusiku hinkwabyu. (Luk. 6:12, 13) Ka wusiku lebyi a a ta fa ha byone, a khongote hi ku phindhaphindha hi ku tiva xiyimu xa ku kazrata lexi a a ta langutana na xone. (Mat. 26:39, 42, 44) Xikombiso xa Yesu, xi hi dondzrisa leswaku nambi loko hi tsrhama hi khomekile hi fanela ku tinyika nkama wa ku khongota. Ku fana na Yesu, hi fanela ku tihambela xiyimiso xa ku khongota. Ku nga ha va nkama lowu hi pfukaka ha wone kumbe loko hi ya ku yetleleni. Loko hi yentxa leswo, hi komba Yehovha leswaku hi xi nyika lisima xihiwa xa ku khongota. Xihondzro Xa Ku Zrindzra 05/2023 p. 3 §§ 4-5

Xiyisisa xiga lexi liki: ‘A hi hananaka wone’ ka ndzrimana leyi nga henhla. Xitlhamuxela mazritu xin’wana, loko xi tlhamuxela xiga lexi xi li: ‘A wu te ku hine swanga hi nfula.’ Xikombiso lexi, xi dzri beka livaleni lizrandzru ledzrikulu ledzri Yehovha a nga na dzrone hi vatotiwa. A vatotiwa va swi tiva leswaku vone hi “lava zrandzriwaka hi Xikwembu Nkulukumba”. (Yud. 1) Mupostola Yohane a kombise matitwela yake loko a tsrala leswi: “Vonani ku kula ka lizrandzru ledzri Papayi a hi kombiki dzrone, lakakuva hi vitaniwa vana va Xikwembu Nkulukumba!” (1 Yoh. 3:1) Xana Yehovha o kombisa lizrandzru dzrake ka vatotiwa ntsena? Im-him, Yehovha a kombise lizrandzru dzrake ku hine hinkwezru. He xini xikombiso lexikulu xa lizrandzru dzra Yehovha? I xitizrulo, ku nga xiyentxo xa lizrandzru ledzrikulu ngopfu a wuyakwini hinkwabyu!—Yoh. 3:16; Rom. 5:8. Xihondzro Xa Ku Zrindzra 01/2024 p. 28 §§ 9-10

A ndzrimana leyi nga henhla yi kombisa ntxhumu lowu pfuniki Davhida loko a txhava. Nambiloko a li nghozini a a yanakanyisisa hi leswi Yehovha a a ta mu yentxela swone. Davhida a a swi tiva leswaku Yehovha a a ta mu huluxa hi nkama lowu faneliki. Phela, Yehovha a a hlaye leswaku Davhida a a ta va hosi leyi a yi ta landzrela a Israyele. (1 Sam. 16:1, 13) Davhida a a tiyiseka leswaku hinkwaswu leswi Yehovha a swi dumbisiki swi ta hetiseka. Xana Yehovha a dumbisa ku ku yentxela yini? A hi yimelanga leswaku a hi sizrelela ka swikazratu hinkwaswu. Nambitasu hi nga tiyiseka leswaku swikazratu hinkwaswu leswi hi lavisanaka na swone ka misava leyi, Yehovha a ta swi helisa a misaveni leyimpshwa. (Eza. 25:7-9) Handle ka ku ganaganeka, ha tiyiseka leswaku muvumbi wezru a na wone ntamu wa ku pfuxa lava fiki, ku helisa mavabyi ni valala vezru.—1 Yoh. 4:4. Xihondzro Xa Ku Zrindzra 01/2024 p. 6 §§ 12-13

Pimisa hi lexi ku yentxiki u tinyiketela ni ku babatisiwa. U teke magwansu lawo hikusa a wu djula ku yima na Yehovha. Dzrimuka lexi ku yentxiki u tiyiseka leswaku u kume ntiyiso. U tive leswaku i mani Yehovha u va u sungula ku mu zrandzra ni ku mu hlonipha swanga Papayi waku wa le tilweni. U kulise lipfumelo dzraku nakone u susumeteleke ku tisola. Lizrandzru dzraku ha Yehovha dzri ku susumetele ku tsrhika mintxhumu ya ku biha u va u sungula ku yentxa leswi nyonxisaka Xikwembu Nkulukumba. Loko u twisisa leswaku Xikwembu Nkulukumba a ku dzrivalelile, u titwe na u zrulile. (Amaps. 32:2) U sungule ku ya mintlhanganwini nakone u sungule ku yavelana ni van’wana mintxhumu ya ku hlamalisa leyi a wu yi dondzra. Swanga Mukriste lweyi a tinyiketeliki ni ku babatisiwa, swoswi u famba ka ndlela ya wutomi nakone u tiyimisele ku yentxa hinkwaswu akuva u tama u famba ku yone. (Mat. 7:13, 14) Tama u yima na u tiyile u nga tsrekatsreki, u zrandzra Yehovha ni ku yingiseta minkongomiso yake. Xihondzro Xa Ku Zrindzra 07/2023 p. 17 § 14; p. 19 § 19

Loko u yanakanyisisa hi xikhongoto lexi u xi yentxiki loko u tinyiketela ka Yehovha swi ta ku pfuna kuva u tiyiselela mindzringo. Hi xikombiso, xana u ta navela ku gangisana ni mhunu lweyi a txhatiki? Im-him! U dumbise Yehovha leswaku u nge txhuki u swi yentxile leswo. Loko u nga pfumeleli matitwela ya ku biha ma dzima timitsru a mbilwini yaku, a swi nga ti vilela kuva u lwisana ni matitwela lawo a nkameni lowu taka. A wu nge ti famba a ‘mintileni ya lava ku biha’. (Amapr. 4:14, 15) Ku yanakanyisisa hi ku tiyimisela loku Yesu a a li na kone ka ku djula ku nyonxisa Papayi wake, swi ta hi pfuna akuva na hine hi nga pfumeleli ntxhumu wu hi sivela ku nyonxisa Xikwembu Nkulukumba lweyi hi tinyiketeliki kwake. (Mat. 4:10; Yoh. 8:29) A ntiyiso hi leswaku swikazratu ni mindzringo swi ku nyika mukhandlu wa ku kombisa leswaku u tiyimisele ku tama u landzra Yesu. Loko u yentxa leswo, u nga tiyiseka leswaku Yehovha a ta ku pfuna. Xihondzro Xa Ku Zrindzra 03/2024 pp. 9-10 §§ 8-10