Otubru

Xana u vona leswaku minkama yin’wana swa ku kazratela ku yingiseta? A u wuswaku, hosi Davhida na yene a a titwa hi ndlela yoleyo, xileswo a khongote ka Xikwembu Nkulukumba a ku: ‘Ndzri seketele hi moya lowa nkhinkhi.’ (Amaps. 51:12) Davhida a a muzrandzra Yehovha. Nambitanu, minkama yin’wana a swi mu kazratela ku yingiseta. Ku yentxeka leswi fanaka ha hine. Ha yini? Xa ku sungula, hi leswaku a hi hetisekanga nakone hi pswaliwa na swi hi bindzrela ku yingiseta. Xa wubidzri, hi leswaku Sathana minkama hinkwayu a zama tindlela ta ku hi yentxa hi djikela Yehovha hi lani yene a yentxiki ha kone. (2 Kor. 11:3) Xa wuzrazru, hi hanya ka misava leyi taliki hi vhanu lava nga ni moya wa wudukwa, “moya lowu swoswi wu tizraka ka vana lava kalaka va nga yingiseti”. (Efe. 2:2) Kutani hi fanela ku tikazratela ku lwisana ni ku kala ku hetiseka hi tlhela hi lwisana na Sathana kun’we ni misava leyi, leyihi yentxaka hi nga yingiseti. Hi fanela ku tikazratela ku yingiseta Yehovha kun’we ni lava a va nyikiki wulawuli. Xihondzro Xa Ku Zrindzra 10/2023 p. 6 § 1

Hi nga dondzra yini ka hlolana ledzri Yesu a dzri yentxiki dzra ku ndzruluta mati ma va vhinyu? Hi dondzra tsrhamela dzra ku titsrongahata. Yesu a nga zanga a tibyela hi kola ka hlolana ledzri a dzri yentxiki. Ku hlaya ntiyiso, a ngi ngi sama a tibyela hi leswi a swi yentxiki. A matsrhan’wini ya leswo, minkama hinkwayu Yesu a a titsrongahata ni ku yisa lidzrumu ka Papayi wake. (Yoh. 5:19, 30; 8:28) Loko hi yetisela xikombiso xa Yesu nakone hi va ni mayanakanyela ya ku titsrongahata, hi ta twisisa leswaku a hi koti ku yentxa ntxhumu. Swi ta va swinene ku kala hi nga tikokeli matihlo, kambe hi yisa lidzrumu ka Xikwembu Nkulukumba wezru wa ku hlamalisa. (Yer. 9:23, 24) Phela swa mu fanela ku dzrumisiwa, hikusa a xi kone ni xin’we lexi hi nga xi yentxaka handle ka loko hi pfuniwa ha yene. (1 Kor. 1:26-31) Loko hi titsrongahata, a hi nge ti yimela ku kulungeliwa hi mintxhumu ya yinene leyi hi yi yentxelaka van’wana. Kwezru swi ta va swi yanelile ku tiva leswaku Yehovha a swi vonile leswi hi swi yentxiki nakone a swi nyika lisima. (Dzringanisa Matewu 6:2-4; Heb. 13:16) Handle ka ku ganaganeka, Yehovha a nyonxa ngopfu loko a hi vona hi yetisela xikombiso xa Yesu xa ku titsrongahata.—1 Pet. 5:6. Xihondzro Xa Ku Zrindzra 04/2023 p. 4 § 9; p. 5 §§ 11-12

Mupostola Pawulo a kutxe Vakriste ku zrangisa swivileleko swa vambeni mahlweni ka swavu. Xana hi nga xi tizrisa hi ndlela yini xidzringanyeto lexi loko mintlhanganu yi li kazri yi famba? I ku dzrimuka leswaku ku fana na hine, vambeni na vone va swi djula ku nyikela tinhlamulo. Xana loko u bula ni vanghanu vaku, ko va wene ntsena u vulavulaka kumbe u va nyika mukhandlu wa kuva na vone va vulavula? Nakunene wa va tsrhika va vulavula. Wa swi djula leswaku na vone va hlengela ka mabulu. Hi ndlela leyi fanaka hi djula leswaku vamakwezru va hlamula mintlhanganwini. Ku hlaya ntiyiso yin’we ya tindlela ta ku kutxa vamakwezru i ku va nyika mukhandlu wa kuva va khanela hi ta lipfumelo dzravu hi ku nyikela tinhlamulo. (1 Kor. 10:24) Nyikela tinhlamulo ta ku goma, kutani van’wana va ta va ni mukhandlu wa ku hlamula. Nambiloko u nyikela nhlamulo ya ku goma tikazrateli kuva u nga longoloxi tinhla hinkwatu hi nkama wun’we. Loko u hlamula yava hinkwadzru, swi ta yentxa leswaku van’wana va saleliwa hi swa switsrongo akuva va hlamula. Xihondzro Xa Ku Zrindzra 04/2023 pp. 22-23 §§ 11-13

Hi fanela ku dzrimuka leswaku a xa lisima ngopfu i ku pfuna van’wana ngopfungopfu hi ntizro wa ku zrezra. Loko hi le ku zrezreni hi fanela ku va lava nabyaliki hikusa hi kuma vhanu va mimbangu ya ku siyanasiyana nakone lava kholwaka ka mintxhumu leyi hambaniki. Mupostola Pawulo a a swi kota ku titwananisa ni swiyimu. Na hine hi nga dondzra swinyingi ka xikombiso xake. Yesu a yavele Pawulo kuva “mupostola lweyi a zrumeliwiki ka vamatiko”. (Rom. 11:13) Pawulo a zrezrele Vayuda ni Vagriki, vhanu lava a va dondzrekile ni lava a va nga dondzrekanga, tihosi ni wuhosi. Akuva a khumba timbilu ta vhanu hinkwavu, Pawulo a tiyentxe “mintxhumu hinkwayu ka vhanu va minxaka hinkwayu”. (1 Kor. 9:19-22) Pawulo a a ku tekela nhlokweni lomu vhanu a va pfa kone ni leswi a va swi kholwa, kutani a a titwananisa ni swiyimu swavu loko a va zrezrela. Na hine hi nga yampswisa ndlela leyi hi zrezraka ha yone hi ku swi tekela nhlokweni swiyimu swa vhanu lava hi va zrezrelaka hi tlhela hi titwananisa na swone. Xihondzro Xa Ku Zrindzra 07/2023 p. 23 §§ 11-12

Ku zrula a swi tlhamuxeli leswaku hi tsranile. Ku hlaya ntiyiso, tsrhamela ledzri i dzra vhanu lava tiyiki. Swi djula ku tikhoma akuva hi tama hi zrula nambiloko hi langusana ni xiyimu xa ku kazrata. Ku zrula ku hamba xiyenge xa “mihandzru ya moya”. (Gal. 5:22, 23) Zritu dzra Xigriki ledzri ndzruluteliwiki dzri va “ku zrula” a dzri tizrisiwa akuva ku khaneliwa hi makavhalu ya nhova ntsrhaku ka loko ma khomiwile. Swa koteka ku ma byisa na ma zrulile kambe ma ha tama ma va ni ntamu. Swi li yini ha hine? Hi nga swi kotisa kuyini ku va lava zruliki na hi nkama wun’we hi li lava tiyiki? A hi nge swi koti ku swi yentxa leswo hi wuswezru. Hi fanela ku khongota hi kombela moya wa Xikwembu Nkulukumba ni mpfunu akuva hi txutxela tsrhamela ledzro dzra lisima. Ku ni swikombiso swinyingi leswi swi swi bekaka livaleni leswaku swa koteka ku dondzra ku va lwa zruliki. Vamakwezru vanyingi va tame va zrula nambi loko va pfukiwa hi vhanu van’wana nakone va yentxe leswaku vhanu volavo va va ni vonela dzrinene ha vone.—2 Tim. 2:24, 25. Xihondzro Xa Ku Zrindzra 09/2023 p. 15 § 3

Dzrumisa Yehovha. Mupostola Yohane a ve ni xivono xa ku hlamalisa lani a voniki 24 wa vakulu a matilweni na va gandzrela Yehovha. Vone a va dzrumisa Xikwembu Nkulukumba hi ku hlaya leswaku swa mu fanela ku yamukela ‘ku phatima, ni xitxhavu, ni ntamu’. (Mpful. 4:10, 11) Tintsrumi ta ku dumbeka na tone ti ni swivangelo swinyingi swa ku dzrumisa ni ku txhava Yehovha. Tone ti xikan’we na Yehovha a matilweni nakone ti mu tiva ha hombe. Tintsrumi leti ti kota ku xiya matsrhamela ya Yehovha hi kola ka hinkwaswu leswi a swi yentxaka, xileswo ti susumeteleka ku mu dzrumisa. (Yb. 38:4-7) Na hine hi djula ku dzrumisa Yehovha ka swikhongoto swezru hi ku mu byela ndlela leyi hi mu hloniphaka ha yone. Nkama lowu u dondzraka Bibele dzringisa ku xiya matsrhamela ya Yehovha lawa ma ku nyonxisaka. (Yb. 37:23; Rom. 11:33) Ntsrhaku ka leswo, byela Yehovha leswaku ha yini ma ku nyonxisa matsrhamela lawo. Ndlela yin’wana ya ku dzrumisa Yehovha i ku mu tlangela hi hinkwaswu leswi a hi yentxelaka swone ni leswi a swi yentxelaka vamakwezru.—1 Sam. 2:1, 2. Xihondzro Xa Ku Zrindzra 05/2023 pp. 3-4 §§ 6-7

Hi 1919, Babilona Lwenkulu, kumbe wukhongoti bya madzrimi byi sungule kuva byi nge he na ntamu ka vhanu va Xikwembu Nkulukumba. Hi lembe ledzro, ku bekiwe “nandzra wa ku dumbeka ni ku tlhazriha” lweyi a kotiki ku pfuna vhanu akuva va famba ka ‘ndlela ya vuxwengi’. (Mat. 24:45-47; Eza. 35:8) Hi ku pfuniwa hi ntizro lowu wa ku lulamisela ‘ndlela ya vuxwengi’, lava hlawuliki ku famba hi ndlela leyi va kote ku yengesela wutivi byavu ha Yehovha kun’we ni nkongometo wake. (Amapr. 4:18) Va tlhele va yentxa ku txintxa akuva va hanya hi ku fambisana ni minsinya ya milawu ya Yehovha. Kambe Yehovha a nga sindzrisanga leswaku vhanu vake va txintxa swa kola ni kola. A matsrhan’wini ya leswo, a va pfune ku txintxa ha katsrongokatsrongo. A nkameni lowu taka swi ta nyonxisa ngopfu kuva hi kota ku nyonxisa Yehovha hi hinkwaswu hi swi yentxaka! A xitaratu xin’wana ni xin’wana xi djula ku hlayisiwa akuva xi tama xi va xinene. Ku sukela hi 1919, a ‘ndlela ya vuxwengi’ na yone yi kazri yi bekisiwa nakone leswo swi pfuna vanyingi akuva va huma ka Babilona lwenkulu. Xihondzro Xa Ku Zrindzra 05/2023 p. 17 § 15; p. 19 § 16

Huvo Leyi Zrangelaka yi patsreka hi ku kongoma ka ku wupfisa vapfunisi va swihubyana swa ku hambanahambana swa Huvo Leyi Zrangelaka. Vapfunisi lava va ni wutiyanguleli swoswi nakone va lulamele ku tama va tizra akuva va hlayisa tihamba ta Kriste. Loko mutotiwa wa wugamu a ta tekiwa a ya matilweni na nhlomulu lowukulu wu li kusuhi ni ku hela, malandzra ya Yehovha ma ta tama ma mu gandzrela hi ku dumbeka. A hi nge ti tsrhika ku gandzrela Yehovha hikusa hi ta va na hi zrangeliwa hi Yesu Kriste. I ntiyiso leswaku hi nkama wolowo hi ta va na hi hlaseliwa hi Goge wa Magoge, ku nga ntlhanganu wa matiko. (Ezek. 38:18-20) Kambe, nhlaselo wolowo wu nga ti tlhaveliwa hi dambu; nakone a wu nge ti swi kota ku sivela vhanu va Yehovha akuva va tama va mu gandzrela. Nakunene, ha tiyiseka leswaku Yehovha a ta hi huluxa! Mupostola Yohane ka xivoniso xake, a vone “xitsrhungu lexikulu” xa tihamba tin’wana ta Kriste. Yohane a byeliwe leswaku “xitsrhungu lexikulu” a ku li “lava va humaka a nhlomulweni lowukulu”. (Mpful. 7:9, 14) Handle ka ku ganaganeka, Yehovha a ta hi huluxa! Xihondzro Xa Ku Zrindzra 02/2024 pp. 5-6 §§ 13-14

Kambe hi nga yentxa yini akuva hi yamukela moya wa ku xwenga? Hi nga khongota hi kombela moya wa ku xwenga, hi dondzra Zritu dzra Xikwembu Nkulukumba ni ku tlhela hi hamba xiyenge xa nhlengeletanu yake. Ku yentxa leswo swi ta hi pfuna ku txutxela “mihandzru ya moya”. (Gal. 5:22, 23) Yehovha a nyikela moya wake lowa ku xwenga ntsena ka lava nga ni swiyentxo ni mimpimiso leyi basiki. Yene a nga ti za a hi nyike moya wake loko hi tsrhamela ku yanakanya kumbe ku yentxa mintxhumu leyi kalaka yi nga mu nyonxisi. (1 Tes. 4:7, 8) Akuva hi tama hi yamukela moya wa ku xwenga hi fanela ku landzra nawu lowu liki “mi nga dzreli wuprofeta”. (1 Tes. 5:20) A “wuprofeta” lebyi byi patsra dzrungula ledzri Xikwembu Nkulukumba a hi nyikiki hi ku tizrisa moya wake mayelanu ni siku dzra Yehovha kun’we ni masiku lawa ya wugamu. A hi ganaganeki leswaku a Armagedoni dzri ta tlhasa ku nge khale, a matsrhan’wini ya leswo hi yimele leswaku dzri tlhasa. Hi yentxa leswo hi ku tama hi va ni mahanyela lamanene ni ku tsrhama na hi khomekile hi ku “tinyiketela ka Xikwembu Nkulukumba”.—2 Pet. 3:11, 12. Xihondzro Xa Ku Zrindzra 06/2023 p. 12 §§ 13-14

I yini leswi mukriste a fanelaka ku swi yentxa loko ku txhuka ku humelela xifaniso xa pornografiya ka telefone kumbe ka komputadori dzrake? Hi fanela kuva hi ku kahlula hi yima ku swi lavisa ni ku tekela ku swi tima. Nakone swi ta hi nabyalela ku tima leswo loko hi dzrimuka leswaku a ntxhumu wa lisima a wuton’wini byezru i wuxaka byezru na Yehovha. Swi nga yentxeka swifaniso swin’wana swi nga voniwi na swi li pornografiya kambe swi ku susumetela ku yentxa timhaka ka tinkuku. Ha yini hi fanela ku fambela kule ni swifaniso swa muxaka lowo? Hikusa a hi djuli ntxhumu ni wun’we, nambi wo va wutsrongo, lowu u nga hi yentxaka hi yanakanya kumbe ku tikhoma hi ndlela ya ku biha. (Mat. 5:28, 29) Makwezru David, nkulu wa bandla wa le Tailândia a te: “Na yimanyana ni yanakanyisisa: ‘Nambi loko swifaniso leswi swi nga yelani ni pornografiya, xana Yehovha a ta nyonxa loko a ni vona na ni swi hlalela?’ Ku yanakanya hi ndlela leyi swi ni pfuna ku teka swiboho swa wutlhazri.” Ku txhava ku yentxa ntxhumu lowu nga khunguvanyisaka Yehovha swi ta hi pfuna ku teka swiboho leswinene. Ku txhava Yehovha i ‘masungulu’ ya ‘vutlhazri’. Xihondzro Xa Ku Zrindzra 06/2023 p. 23 §§ 12-13

A ‘tindlwini’ swi nga yentxeka ku hlayiwa mabandla yezru. Hi nkama wa nhlomulo lowukulu Yehovha a ta hi sizrelela loko hi tama hi va ni wumun’we ni vamakwezru. Xileswo hi fanela ku tikazrata akuva hi nga gameli ntsena ka ku va yamukela vamakwezru kambe hi tlhela hi va zrandzra. Hikusa swi nga yentxeka ku huluxiwa kwezru ku ta tiseketela hi ku yentxa leswo! ‘A siku dzra Yehovha ledzrikulu’ ku ta va nkama wa ku kazrata ka vhanu hinkwavu. (Tsef. 1:14, 15) Nakone ni vhanu va Yehovha na vone va ta xaniseka. Kambe loko hi tilulamisela na ke he swoswi hi ta swi kota ku zrula ni ku pfuna van’wana. Hi ta lavisana ni xikazratu xin’wana ni xin’wana lexi nga ha humelelaka hi ku tiyisela. Loko vamakwezru va xaniseka hi ta va komba ntwela wusiwana hi kuva hi va pfuna ni ku va nyika leswi va swi vilelaka. Hi ta tlhela hi kombisa lizrandzru ledzri hi nga na dzrone hi vamakwezru hi ku va kusuhi na vone. Yehovha a ta hi hakela hi wutomi lebyi nga helikiki ka misava leyi timhangu ta ntumbuluku ni swikazratu swi taka vaka swi khalutile.—Eza. 65:17. Xihondzro Xa Ku Zrindzra 07/2023 p. 7 §§ 16-17

Hakanyingi loko Bibele dzri vulavula hi vavanuna va le minkameni leyi khalutiki dzri hlaya leswaku i vavanuna va ntamu lava tiyiki. Kambe nambi lava a va tiyile a hi minkama hinkwayu a va titwisa xileswo. Hi xikombiso, minkama yimbeni hosi Davhida a a titwa na a tiyile ku fana ni nhava, kambe minkama yimbeni a a zruzrumela hi ku txhava. (Amaps. 30:7) Kasi Samisoni a a ni ntamu lowukulu hi kola ka moya wa kuxwenga wa Yehovha, kambe a a swi tiva leswaku handle ka mpfuno wolowo a ntamu wake ‘a wu ta mu sukela, a tsrana, a va swanga hi mhunu mun’wana’. (Abaṭ. 14:5, 6; 16:17) Vavanuna lava, a ve tiya ntsena hi leswi a va pfuniwa hi Yehovha. Muapostola Pawulo na yene a a swi tiva leswaku a vilela mpfunu wa Yehovha. (2 Kor. 12:9, 10) Yene a a lwisana ni xikazratu xa lihanyu. (Gal. 4:13, 14) Minkama yimbeni, a swi djula a tikazrata ngopfu akuva a yentxa leswi lulamiki. (Rom. 7:18, 19) Nakone minkama yin’wana, a a txhava leswi a swi ta mu humelela. (2 Kor. 1:8, 9) Nambitanu, loko Pawulo a titwa na a tsranile, hi lani a a titwa na a tiyile kone, hikusa Yehovha a a mu nyika ntamu lowu a a wu vilela akuva a lwisana ni swikazratu leswo. Xihondzro Xa Ku Zrindzra 10/2023 p. 12 §§ 1-2

Loko minkama yin’wana u titwa u nga pfuni ntxhumu, dzrimuka leswaku i Yehovha ha wuswake a nga ku kokela ntiyisweni. (Yoh. 6:44) Yehovha a vona leswi nga swinene ka mun’wana ni mun’wana wezru. A tiva timbilu tezru nakone a ndlela leyi a hi vonaka ha yone yi hambanile ni ndlela leyi hine hi tivonaka ha yone. (2 Makr. 6:30) Xileswo tiyiseka loko Yehovha a ku byela leswaku u mhunu lwe a navelekaka kwake. (1 Yoh. 3:19, 20) Na hi nga si dondzra ntiyiso swi nga yentxeka van’we kwezru hi yentxe mintxhumu leyi nga hi yentxaka hi titwa nandzru. (1 Pet. 4:3) Malandzra man’wana ya Yehovha lawa kutani ma mu tizrelaka ku dzringana nkama wa ku leha swi nga yentxeka na wone ma lwisana ni ku tsrana ka kukazri. Wene ke? Xana minkama yin’wana u titwa na Yehovha a nga ku dzrivalelanga? Ka xiyimu lexi i swinene ku dzrimuka leswaku man’we ka malandzra ya Yehovha ya le nkameni wa khale na wone ma lwisane ni matitwela lawo. Hi xikombiso, mupostola Pawulo loko a yanakanyisisa hi ku kala ku hetiseka kwake a a titwa na a nga pfuni ntxhumu. (Rom. 7:24) I ntiyiso leswaku Pawulo a tisolile ka swidoho swake a va a babatisiwa. Nambitanu a a tivona swanga “lwentsrongo ka vapostola” ni “mudohi lwenkulu”.—1 Kor. 15:9; 1 Tim. 1:15. Xihondzro Xa Ku Zrindzra 03/2024 p. 27 §§ 5-6

Swiboho swa ku biha swa hosi Yehowaxi, swi hi dondzrisa leswaku hi fanela ku hlawula vanghanu lava nga ta va ni nkutxetelo lowunene a wuton’wini byezru ku nga vanghanu lava zrandzraka Yehovha ni lava djulaka ku mu nyonxisa. Vanghanu vezru va nga va va tintanga ta ku siyanasiyana. Dzrimuka leswaku Yehowaxi a a li mutsrongo ka munghanu wake Yehoyada. Tivutise leswi mayelanu ni vanghanu vaku: ‘Xana va ni pfuna ku tiyisa lipfumelo dzranga ka Yehovha? Xana va ni pfuna ku hanya hi milawu ya Xikwembu Nkulukumba? Xana va khanela ha Yehovha ni mintiyiso ya Bibele? Xana va yi hlonipha minsinya ya milawu ya Xikwembu Nkulukumba? Xana va tsrhamela ku ni byela leswi taka ni nyonxisa kumbe va ni xixixi xa ku ni laya loko swi vileleka?’ (Amapr. 27:5, 6, 17) Ntiyiso wa mhaka hi leswaku, a wu va vileli vanghanu lava kalaka va nga mu nyonxisi Yehovha. Kambe loko u ni vanghanu lava zrandzraka Yehovha, womelela kwavu hikusa minkama hinkwayu va ta ku pfuna.—Amapr. 13:20. Xihondzro Xa Ku Zrindzra 09/2023 pp. 9-10 §§ 6-7

A Alfa i letra dzra ku sungula ka mabesedi ya Xigriki, a Omega i dzra wugamu. Loko a ku “Hi mine Alfa na Omega,” Yehovha a va na a kombisa leswaku loko a sungula ntxhumu wa kukazri, awa wu hetisisa nakone a yentxa leswaku wu koteka. Ntsrhaku ka loko Yehovha a vumbe Adamu na Evha, a hlaye leswi ku vone: ‘Belekanani n’wi yandzra, n’wi tata misava.’ (Gen. 1:28) Loko Yehovha a hlaye nkongometo wake a swi fana ni loko a te “Alfa.” A nkongometo wa Yehovha wu ta hetiseka loko lixaka dzra Adamu na Evha ledzri yingisetiki dzri tlhela dzri hetiseka dzri ndzruluta misava yi paradeyisi. Loko leswo swi yentxeka swi ta fana ni loko Yehovha a ku “Omega.” Ntsrhaku ka loko Yehovha a vumbe misava, matilo ni hinkwaswu leswi nga kone, a nyikele xitiyisekiso xa leswaku a kongometo wake hi vhanu wu ta hetiseka a ku heleni ka siku dzra wu 7.—Gen. 2:1-3. Xihondzro Xa Ku Zrindzra 11/2023 p. 5 §§ 13-14

A liyendzro dzra ku suka a Babilona u ya a Israyele a dzri nga nabyali. A dzri ta teka kolomu ka 4 wa tihweti. Kambe Yehovha a dumbise ku helisa swikazratu swin’wana ni swin’wana leswi a swi ta sivela vhanu akuva va tlhelela a tikweni dzravu. Ka Vayuda va ku dumbeka, matovoko ya ku tlhela a Israyele a ma li ya lisima ku tlula ku tikazrata kun’wana ni kun’wana loku a va ta ku yentxa. Tovoko ledzrikulu a dzri yelana ni ndlela leyi a va ta mu gandzrela ha yone Yehovha. Kambe Vaisrayele a va nga na tempele ni dzrin’we ledzri a va ta gandzrela Yehovha ku dzrone a Babilona. Nambi alitari akuva va kota ku nyikela timhamba hi la ni Moxe a a yentxa ha kone. Nakone a va nga na lulamiselo dzra vaprista lava a va ta nyikela magandzrelo. Nakone vhanu va Yehovha a va tsrandzreliwi hi nhlayu yikulu ya vhanu lava kalaka va nga na mhaka ni milawu ya Yehovha. Xileswo, Vayuda vanyingi va ku dumbeka a va nga wu voni nkama wa ku tlhelela a tikweni dzravu akuva va ya pfuxeta wugandzreli bya ku xwenga. Xihondzro Xa Ku Zrindzra 05/2023 pp. 14-15 §§ 3-4

Swi vilela moya wa ku xwenga akuva hi tama hi va “vana va livaningu”. Ha yini? Hikusa swa kazrata ku tikhoma hi ndlela leyi basiki ka misava leyi hi hanyaka ka yone. (1 Tes. 4:3-5, 7, 8) A moya wa ku xwenga wu ta hi pfuna ku lwisana ni mayanakanyela ya misava, ku patsra ni tidondzro ta filozofiya ni mavonela ya misava leyi lwisanaka ni ku zrandzra ka Yehovha. A moya wa ku xwenga wu ta tlhela wu hi pfuna ku yentxa “mintxhumu hinkwayu leyinene, ya ku lulama”. (Efe. 5:9) Ndlela yin’wana leyi nga hi pfunaka ku kuma moya wa ku xwenga i xikhongoto. Yesu a hlaye leswaku Yehovha a ta “nyika moya wa ku xwenga lava va mu kombelaka”. (Luk. 11:13) Handle ka leswo, loko hi dzrumisa Yehovha a mintlhanganwini hi kuma moya wa ku xwenga. (Efe. 5:19, 20) Nkutxetelo lowunene lowu moya wa ku xwenga wu nga na wone wu hi pfuna ku hanya hi ndlela leyi nyonxisaka Xikwembu Nkulukumba. Xihondzro Xa Ku Zrindzra 03/2024 pp. 23-24 §§ 13-15

Xana u djula ku lehisa mbilu hi la ni ku yengetelekiki? Loko swi li hi ndlela leyo, khongota ha swone. Ku lehisa mbilu swi hamba xiyenge xa mhandzru wa moya. (Gal. 5:22, 23) Xileswo hi fanela ku khongota ka Yehovha hi kombela moya wa ku xwenga ni ku va a hi pfuna ku va ni matsrhamela ya mhandzru wa moya. Loko hi kumana ni swiyimu leswi dzringaka ku lehisa mbilu kwezru hi fanela ku ya ‘mahlweni hi kombela’ moya wa ku xwenga akuva wu hi pfuna ku kombisa tsrhamela ledzro. (Luk. 11: 13) Handle ka leswo, hi nga mu kombela akuva a hi pfuna ku vona mintxhumu hi ndlela leyi a yi vonaka ha yone. Handle ka ku khongota, hi fanela ku yentxa leswi hi nga swi kotaka akuva hi lehisa mbilu siku dzrin’wana ni dzrin’wana. Loko hi ya hi khongota hi kombela ku lehisa mbilu nakone hi tikazratela ku yentxa leswi, a tsrhamela ledzri dzri ta ya dzri byala timitsru a mbilwini nakone dzri ta hamba xiyenge xa wumhunu byezru. Xin’wana xi nga ku pfunaka i ku yanakanyisisa hi swikombiso swa le Bibeleni. A Bibele dzri khanela hi vhanu vanyingi lava lehisiki mbilu. Loko hi yanakanyisisa hi swikombiso leswi, hi dondzra tindlela ta kuva hi lehisa mbilu. Xihondzro Xa Ku Zrindzra 08/2023 p. 22 §§ 10-11

Yesu a tiyisekise mupostola Petro leswaku Yehovha a a ta mu pfuna. Ntsrhaku ka loko a pfuxiwile, Yesu a tlhele a yentxa leswaku Petro kun’we ni vapostola van’wana va phasa tihlampfi tinyingi hi ndlela ya hlolana. (Yoh. 21:4-6) Handle ka ku ganaganeka, a hlolana ledzri dzri yentxe leswaku Petro a swi twisisa leswaku nakunene Yehovha a a ta mu nyika hinkwaswu leswi a a ta swi vilela hi tlhelo dzra nyama. Swi nga yentxeka Petro a dzrimuke mazritu ya Yesu loko a hlaye leswaku Yehovha a ta bekisa hinkwavu lava va ‘zrangisaka mfumu’. (Mat. 6:33) Hinkwaswu leswo swi pfune Petro akuva a teka ntizro wa ku zrezra wu li wa ku sungula a wuton’wini byake ku tlula ntizro wa ku phasa tihlampfi. Hi siku dzra Pentekosta hi lembe dzra 33 N.Y., Petro a zrezre hi nkhinkhi akuva a pfuna vhanu vanyingi leswaku va yamukela madzrungula lamanene. (Mint. 2:14, 37-41) Nakone hi ku famba ka nkama a pfune Vasamariya ni vamatiko akuva va va valandzreli va Kriste. (Mint. 8:14-17; 10:44-48) Handle ka ku ganaganeka, Yehovha a tizrise Petro hi ndlela ya ku hlamalisa akuva a kokela vhanu va tinxaka ta ku siyanasiyana ka bandla dzra wukriste. Xihondzro Xa Ku Zrindzra 09/2023 p. 20 § 1; p. 23 § 11

Malembe mabidzri ntsrhaku ka loko Vababilona va hohlote Yerusalema. Hosi Nebukadnetsari wa le Babilona a lozre xifaniso lexi a xi lehe kuya henhla ni lexi txhavisaka. A hlaye leswaku a a ta dlaya tintlhazri hinkwatu, ku patsra na Daniyele, loko ti nga mu byele lozro ni ntlhamuxelo wa wone. (Dan. 2:3-5) Swi djule leswaku Daniyele a yentxa swa kukazri hi ku kahlula akuva vhanu va nga fi. Yene “a ya ka hosi a tlhasa a yi byela a ku: ‘Hosi, na ku kombela, ni nyiki nkama akuva ni ta kota ku ku tlhamuxela leswi u swi lozriki’”. (Dan. 2:16) Leswo swi djule lipfumelo ni xixixi. A Bibele a dzri hlayi leswaku Daniyele a a same a tlhamuxela milozro. A kombele leswaku vanghanu vake “va khongota akuva Xikwembu Nkulukumba wa le tilweni a va komba timpswalu mayelanu ni xihundla lexi”. (Dan. 2:18) Yehovha a swi hlamulile swikhongoto leswo. Hi mpfunu wa Xikwembu Nkulukumba, Daniyele a swi kotile ku tlhamuxela lozro wa Nebukadnetsari. Hi kola ka leswo, Daniyele, vanghanu vake kun’we ni tintlhazri tin’wana a va dlayiwanga. Xihondzro Xa Ku Zrindzra 08/2023 p. 3 § 4

Yanakanya hi mabindzru ya ku lehisa mbilu. Lweyi a lehisaka mbilu awa nyonxa nakone a kombisa ku zrula. A ku lehisa mbilu ku nga yentxa leswaku hi va ni lihanyu ledzrinene a miyanakanywini ni le nyameni. Loko hi lehisa mbilu, hi va ni wunghanu lebyinene nakone hi hanyisana hi ku zrula ni van’wana. Handle ka leswo, a bandla dzrezru dzri ni wumun’we. Loko mhunu a hi hlundzrukisa, hi tingawula leswaku xiyimu lexo xi ndzruluka timholova letikulu. (Amaps. 37:8; Amapr. 14:29) Xa lisima ngopfu hi va na hi yetisela Papayi wezru wa le matilweni nakone wunghanu byezru na yene byi ya byi tiya. Handle ka ku ganaganeka, a ku lehisa mbilu i tsrhamela dzra lisima ledzri pfunaka hinkwezru. Ku hlaya ntiyiso, a hi minkama hinkwayu swi nabyalaka ku lehisa mbilu, kambe hi ku pfuniwa hi Yehovha hi nga swi kota ku tama hi txutxela tsrhamela ledzri. Nkama lowu hi lehisaka mbilu na hi yimela siku dzra Yehovha hi nga tiyiseka leswaku ‘a mahlo ya Yehovha ma le henhla ka lava mu txhavaka, a henhla ka lava laviselaka lizrezre lakwe’. (Amaps. 33:18) Xileswo ku tlula hinkwaswu, hi fanela ku tama hi tiyimisela ku lehisa mbilu. Xihondzro Xa Ku Zrindzra 08/2023 p. 22 § 7; p. 25 §§ 16-17

Yakobe a kombise leswaku wanuna lweyo a hlaye leswaku a ni lipfumelo, kambe leswi a swi yentxiki a swi nga kombisi leswaku hakunene a a ni lipfumelo. (Yak. 2:1-5, 9) Ka xikombiso xa wubidzri, Yakobe a vulavule hi xifaniso xa mhunu lweyi a voniki makwavu ‘wa xinuna kumbe wa xisati a pfumala mpahla ni swakuda’ kambe a nga yentxi ntxhumu akuva a mu pfuna. Nambiloko a hlaya leswaku a ni lipfumelo a swiyentxo swake a swikombisi leswaku a nadzrone limpfumelo. (Yak. 2:14-17) Yakobe a khanele hi Rahabe swanga xikombiso lexinene xa mhunu lweyi a a ni lipfumelo ledzri a dzri kombisiki hi mintizro. (Yak. 2:25, 26) Rahabe a same a twa na ku khaneliwa hi Yehovha nakone a a swi tiva leswaku yene a a seketela Vaisrayele. (Yehoš. 2:9-11) Xileswo, a kombise lipfumelo dzrake hi mintizro hi ku sizrelela tinhloli tibidzri ta Vaisrayele leti a ti li nghozini. Hi kola ka leswo, wansati lweyi, lweyi a a nga hetisekanga nakone a a nga li Muisrayele a hlayiwe lweyi a lulamiki, hi lani swi viki ha kone ka Abrahamu. A xikombiso xa Rahabi xi hi dondzrisa leswaku lipfumelo dzri fanela ku va ledzri kombisiwaka hi mintizro. Xihondzro Xa Ku Zrindzra 12/2023 pp. 5-6 §§ 12-13

Swanga vakriste, a hi djuli ku twisisa mintiyiso ya masungulo ya Bibele ntsena. Hi ku pfuniwa hi moya wa ku xwenga wa Yehovha, hi lulamele nambi ku li “mintxhumu leyi yentiki ya Xikwembu Nkulukumba”. (1 Kor. 2:9, 10) Swi ngo yini loko wo sungula ku tihambela dondzro yaku ya ximhunu akuva u ya u tsrhindzrekela kusuhi na Yehovha? Hi xikombiso, u nga hamba wusetxhi mayelanu ni ndlela leyi Yehovha a kombisiki lizrandzru dzrake ka malandzra yake ya le nkameni lowu khalutiki ni ndlela leyi leswo swi kombisaka ha yone leswaku awa ku zrandzra. U nga tlhela u hamba wusetxhi mayelanu ni ndlela leyi Yehovha a a djula leswaku Vaisraele va mu gandzrela ha yone ni ndlela leyi a djulaka leswaku hi mu gandzrela ha yone namuntlha. Kumbe u nga tlhela u dondzra wutsrhokotsrhoko mayelanu ni wuprofeta lebyi Yesu a byi hetisisiki nkama lowu a a li lani Misaveni. U nga tlhela u tizrisa Nkongomiso Wa Ku Hamba Wusetxhi Wa Timboni Ta Yehovha, ka xidondzro xaku xa ximhunu. U ta gungula leswaku xitizru lexi xi ta yentxa xidondzro xaku xi nyoxisa. Ku hamba xidondzro lexi yentiki xa Bibele swi ta ku pfuna ku tiyisa lipfumelo dzraku ni ku ‘kuma ku tiva Xikwembu Nkulukumba’.—Amapr. 2:4, 5. Xihondzro Xa Ku Zrindzra 10/2023 pp. 18-19 §§ 3-5

A zritu ledzri mupostola Petro a dzri tizrisiki dzra ku “ngopfu” hi ku kongoma dzri tlhamuxela ku “ndlandlamuxa”. A xiyenge xa wubidzri xa ndzrimana xi khanela hi leswi hi taka swi yentxa loko hi va zrandzra ngopfu van’wana, hi ta funeketa kumbe ku swi tsrhika swi khaluta swihoxo swa vamakwezru. Hi nga fananisa lizrandzru ni panu ledzri nwevukaka, ledzri hi nga dzri gwimbaka ku ko dzri tlhasela lani dzri funeketaka “swidoho swinyingi” ku nga li xin’we kumbe swibidzri. Hi ndlela leyo, a ku funeketa a swi ta fana ni ku “dzrivalela”, swanga hi leswi panu dzri nga ha tlhotaka mabatibati a menzeni, a lizrandzru dzrezru na dzrone dzri funeketa ku tsrana ni ku kala ku hetiseka ka vamakwezru. A lizrandzru dzrezru dzri fanela ku va ledzrikulu lakakuva hi kota ku dzrivalela swihoxo swa vamakwezru nambiloko minkama yin’wana swi djula hi tikazrata ngopfu. (Kol. 3:13) Loko hi kota ku dzrivalela van’wana hi ta kombisa leswaku a lizrandzru dzrezru dzri tiyile nakone hi ta nyonxisa Yehovha. Xihondzro Xa Ku Zrindzra 11/2023 pp. 11-12 §§ 13-15

Loko a li ni 26 wa malembe Yosiya a sungule ku pfuxeta tempele. Kuve hi nkama wolowo va kumiki ‘a buku dzra nawu wa Yehovha lowu nyikiwiki ha Moxe’. Loko hosi yi twe leswi a buku a dzri swi hlaya, hi ku kahlula yi hamba ku txintxa loku a ku vileleka hi ku fambisana ni leswi tsraliwiki. (2 Makr. 34:14, 19-21) Xana wa zama ku dondzra bibele siku ni siku? Loko u swi yentxa swi fambisa kuyini? Xana u ni xihena xaku bekisa tindzrimana leti nga ha txhukaka ti ku pfuna? Loko Yosiya a ni 39 wa malembe a teki xiboho xa ku biha lexi mu yisiki ku feni. A djule ku tidumba a matsrhan’wini ya ku djuletela nkongomiso wa Yehovha. (2 Makr. 35:20-25) I dondzro ya lisima kwezru. A swi na mhaka swaku hi va ntanga muni, kumbe hi ni malembe mangani na hi tizrela Yehovha, hinkwezru hi fanela ku tama hi tsrhindzrekela kusuhi na Yehovha. Akuva leswo swi koteka hi fanela ku khongota nkama ni nkama hi kombela minkongomiso ya Yehovha, hi dondzra Bibele ni ku landzra swilayu swa vakriste lava wupfiki. Hi ku yentxa leswo a hi nga ti tsrhamela ku yentxa swihoxo nakone hi ta tsrhama na hi nyonxile.—Yak. 1:25. Xihondzro Xa Ku Zrindzra 09/2023 p. 12 §§ 15-16

A Bibele dzri vulavula hi vavasati vanyingi va ku hlamalisa lava zrandzriki Yehovha va tlhela va mu tizrela. Vone a va “dzringanisela ka mintxhumu hinkwayu” va tlhela va “dumbeka ka mintxhumu hinkwayu”. (1 Tim. 3:11) Ntlhantakubidzri, a mabandleni ku ni swikombiso swinyingi swa vamakwezru va xisati lava wupfiki, lava vampshwa va nga va yetiselaka. Van’hwanyana, swi ngo yini mi djuletela vamakwezru va kukazri va xisati lava wupfiki, mi zama ku yetisela xikombiso xavu? Lavisa leswaku he wani matsrhamela lawa va nga na wone nakone yanakanya hi ndlela leyi u nga ma yetiselaka ha yone. Ku titsrongahata i tsrhamela dzra lisima akuva mhunu a va mukriste lwa wupfuki. Loko wansati a titsrongahata, a ta va ni wuxaka lebyi tiyiki na Yehovha nakone a ta hanyisana ha hombe ni vhanu van’wana. Hi xikombiso, wansati lweyi a zrandzraka Yehovha awa titsrongahata nakone awa wu hlonipha nawu wa wunhloko lowu bekiwiki ha Yehovha. (1 Kor. 11:3) Nawu lowo wu tizra a bandleni ni le ndangwini. Xihondzro Xa Ku Zrindzra 12/2023 pp. 18-19 §§ 3-5

Yehovha a djula leswaku nuna a zrandzra nsati wake a tlhela a mu hlayisa hi tlhelo dzra nyama, dzra matitwela ni hi tlhelo dzra moya. Ku tlhavukanya, ku hlonipha vamakwezru va xisati ni ku dumbeka swi ta ku pfuna kuva u va nuna lwenene. Ntsrhaku ka ku txhata u nga ha va papayi. Xana u nga dondzra yini ka Yehovha mayelanu ni ku va papayi lwenene? (Efe. 6:4) Yehovha a a nga dani ku byela n’wanake, Yesu, leswaku awa mu zrandzra nakone awa mu yamukela. (Mat. 3:17) Xileswo, loko u va papayi, u nga dzrivali ku va minkama hinkwayu u byela vanaku leswaku wa va zrandzra. Loko vanaku va yentxa mintxhumu leyi nga yinene minkama hinkwayu va kulungeli. Vapapayi lava yetiselaka xikombiso xa Yehovha, va pfuna vanavu ku va vakriste lava wupfiki. U nga tilulamisela ku sukela swoswi akuva u va papayi lwenene hi ku va u hlayisa ndangu waku hi lizrandzru ni vamakwezru a bandleni nakone u va byela leswaku wa va zrandzra.—Yoh. 15:9. Xihondzro Xa Ku Zrindzra 12/2023 pp. 28-29 §§ 17-18

Nambileswi hi nga malandzra ya ku dumbeka ya Yehovha, hi kumana ni swikazratu ni mavabyi ku fana ni vhanu hinkwavu. Handle ka leswo, swi nga ha sindzrisa kuva hi tiyiselela ku kanetiwa kumbe tinxanisa ta lava nyenyaka vhanu va Xikwembu Nkulukumba. Nambileswi Yehovha a kalaka a nga siveli kuva hi humeleliwa hi swikazratu, yene a dumbisa ku hi pfuna. (Eza. 41:10) Hi mpfunu wake, hi nga swi kota ku tama hi va lava nyonxiki, hi teka swiboho leswinene ni ku tama hi dumbeka kwake nambiloko hi kumana ni swikazratu. Yehovha a dumbisa ku hi nyika leswi Bibele dzri swi vitanaka “ku zrula ka Xikwembu Nkulukumba”. (Filp. 4:6, 7) Ku zrula loku, ku hlayiwa ku zrula ka miyanakanyu ni ka le mbilwini loku tisiwaka hi ku va ni wuxaka bya le kusuhi na Yehovha. Ku zrula loku ku “tlula ku twisisa hinkwaku”. Matitwela lawa ya ku zrula ma tlula mayanakanyela yezru. Hi xikombiso, xana u sama u khongota hi ku hiseka ka Yehovha, ntsrhaku ka leswo u hlamala hi ku zrula loku u viki na kone? Matitwela lawa i “ku zrula ka Xikwembu Nkulukumba”. Xihondzro Xa Ku Zrindzra 01/2024 p. 20 § 2; p. 21 § 4

Lizrandzru ledzri vhanu va ku dumbeka va nga na dzrone hi Xikwembu Nkulukumba, dzri va susumetela ku dzrumisa vito dzrake hi mbilu hinkwayu. Hosi Davhida a a swi tiva leswaku ku twalisa vito dzra Yehovha swi fana ni ku twalisa Yehovha hi ntshima. Vito dzra Yehovha dzri patsra ndhuma yake, leswo swi hi dzrimuxa matsrhamela yake hinkwawu ya ku xonga ni mintxhumu hinkwayu ya ku xonga leyi a yi yentxiki. Davhida a a djula ku dzrumisa vito dzra Papayi wake hikusa dzri xwengile. A a djula ku yentxa leswo hi ‘hinkwaswu leswi nga ndzreni kwake’ leswi liki hi mbilu yake hinkwayu. Hi lani ku fanaka, Valevhi a va zrangela ka ku dzrumisa Yehovha. Nakone hi ku titsrongahata, a va vona na mazritu yavu ma nga yaneli ku kombisa leswaku va gandzrela vito dzra Yehovha hi ndlela leyi swi mu fanelaka ha yone. (Nehem. 9:5) Handle ka ku ganaganeka, ku titsrongohata loko ku yentxe Yehovha a nyonxa swinene. Xihondzro Xa Ku Zrindzra 02/2024 p. 9 § 6

Loko u nga swi koti ku tlhasela kungu ledzri nga handle ka wuswikoti byaku u nga yanakanyi leswaku Yehovha a ta ku vona u nga pfuni ntxhumu. (2 Kor. 8:12) Vona ku hluleka kwaku swanga ndlela ya ku dondzra swa ku kazri. Yanakanya hi makungu lawa kutani u kotiki kuma tlhasela. Bibele dzri li ‘Xikwembu Nkulukumba a nga kali ku lulama lakakuva a nga dzrivala mintizro yenu.’ (Heb. 6:10) Kutani yentxa leswi fanaka, u nga dzrivali leswi u kotiki ku swi tlhasela. Hi xikombiso, ku va ni wuxaka na Yehovha, ku bulela van’wana ha yene, kumbe ku babatisiwa. Swanga hi leswi u swi kotiki ku tlhasela makungu yaku ya moya a nkameni lowu khalutiki, ni swoswi u nga swi kota ku ma tlhasela. Hi ku pfuniwa ha Yehovha, u nga swi kota ku tlhasela makungu yaku, nkama lowu u lwelaka ku tlhasela makungu yaku, nyonxa hi ku vona Yehovha a ku pfuna ni ku tovokisa ku tikazrata kwaku. (2 Kor. 4:7) Loko u nga tlheleli ntsrhaku u ta yamukela matovoko lamakulu ngopfu.—Gal. 6:9. Xihondzro Xa Ku Zrindzra 05/2023 p. 31 §§ 16-18

Yehovha minkama hinkwayu a djuletela tindlela ta ku kombisa malandzra yake leswaku awa ma zrandzra nakone awa nyonxa hi leswi ma swi yentxaka. A Bibele dzri khanela hi swiyentxakalu swibidzri lani Yehovha a byeliki Yesu leswaku i n’wanake lweyi a zrandzrekaka nakone a mu yamukelaka. (Mat. 3:17; 17:5) Xana a u swi nyonxeli ku twa Yehovha na a hlaya ntxhumu lowu fanaka ha wene? Namunhla Yehovha a nga khaneli na hine hi ku kongoma, kambe a khanela na hine hi ku tizrisa Bibele. Hi nga yingela zritu dzra Yehovha loko a hi byela leswaku awa hi yamukela nkama lowu hi dondzraka mazritu ya Yesu ka Tievhangeli. Yesu a yetisele Papayi wake hi ku helela, xileswo loko hi twa mazritu ya lizrandzru lawa Yesu a ma byeliki vhanu va ku kala ku hetiseka, hi nga kota ku yanakanya leswaku hi Yehovha hi ku kongoma a hi byelaka mazritu lawo. (Yoh. 15:9, 15) Loko hi kumana ni mindzringo a swi hlayi swone leswaku Yehovha a nga ha hi yamukeli. Ku hambana ni leswo, lowo i mukhandlu wa ku kombisa lizrandzru ledzri hi nga na dzrone ha Yehovha ni ndlela leyi hi mu dumbaka ha yone.—Yak. 1:12. Xihondzro Xa Ku Zrindzra 03/2024 p. 28 §§ 10-11