Dezembru

Xana Yehovha a na wone ntamu wa ku pfuxa lava fiki? Ina a na wone! Phela yene i wa “Ntamu Hinkwawu”. (Mpful. 1:8) A ni ntamu wa ku helisa valala vake hinkwavu ku patsra ni lifu. (1 Kor. 15:26) Nakone hi ni xivangelo xin’wana xa ku kholwa leswaku Xikwembu Nkulukumba a ni ntamu wa ku pfuxa lava fiki, hikusa miyanakanyu yake yi hetisekile a yi na magamu. Akuva u swi twisisa, a vitana nyeleti yin’wana ni yin’wana hi vito. (Eza. 40:26) Handle ka leswo, a dzrimuka hinkwavu lava fiki. (Yb. 14:13; Luk. 20:38) Ka Yehovha swi nabyalile ku dzrimuka ntxhumu wun’wana ni wun’wana ka lava a taka va pfuxa, leswo swi patsra matsrhamela yavu, wumhunu byavu, leswi va samiki va swi hanya a wuton’wini ni wuswikoti byavu bya ku dzrimukela. Handle ka ku ganaganeka, hi nga kholwa ka xidumbiso xa Yehovha xa ku pfuxa lava fiki hikusa ha swi tiva leswaku a na kone ku navela ni ntamu wa ku swi hetisisa. Kambe hi ni xivangelo xin’wana xa ku kholwa ka ku pfuxiwa ka vafi, Yehovha a ke a swi yentxa leswo a nkameni lowu khalutiki. Nkameni lowu khalutiki a nyike Yesu kun᾿we ni malandzra man᾿wana, ntamu wa ku pfuxa malandzra yake lama fiki. Xihondzro Xa Ku Zrindzra 04/2023 pp. 9-10 §§ 7-9

Loko hi vulavula hi ndlela leyinene ni ya ku zrula, a vhanu va ta tama va djula ku yingiseta ni ku ya mahlweni ni bulu. Kambe lexi tiyiki hi leswaku, loko mhunu a djula ku hi holovisa kumbe ku vulavula ku biha hi leswi hi kholwaka ka swone a hi sindzriseki ku tama hi bula na yene kumbe ku mu hlamula. (Amapr. 26:4) Kambe ntalu wa vhanu a va tsrhamisisanga xileswo. Ku hlaya ntiyiso, vhanu vanyingi va ta hi yingiseta. Swi le livaleni leswaku ku va vhanu va ku zrula i ntxhumu wa lisima ngopfu. Khongota ka Yehovha u kombela ntamu lowu u wu vilelaka akuva u va lweyi a zruliki loko mhunu wa kukazri a vulavula ku biha hi leswi u swi kholwaka. Dzrimuka leswaku loko u hlamula hi ndlela ya ku zrula u ta yentxa leswaku mi nga holovisani. Nakone loko u hlamula hi ndlela ya ku zrula ni leyi kombisaka xitxhavu u nga pfuna van’wana akuva va yingiseta ni ku kombisa xitxhavu mayelanu na hine kun’we ni Bibele. “Minkama hinkwayu mi lulamela ku hlamula” mayelanu ni leswi mi swi kholwaka, “kambe swi yentxani hi moya wa ku zrula ni hi xitxhavu lexikulu.” (1 Pet. 3:15) Tiyimisele kuva minkama hinkwayu u va lwa zruliki ni ku kombisa leswaku u mhunu lweyi a tiyiki. Xihondzro Xa Ku Zrindzra 09/2023 p. 19 §§ 18-19

Vona mune wa tindlela leti ha tone hi nga kombisaka ku lehisa mbilu. Xa ku sungula mhunu lweyi a lehisaka mbilu loko va mu kwatisa a tama a zrula nakone a nga tidzrihiseli nambi loko swi nga mu fambeli ha hombe. (Eks. 34:6) Xa wubidzri, a mhunu lweyi a lehisaka mbilu awa swi kota ku yimela ntxhumu wa kukazri na a zrulile. A mhunu lweyi a lehisaka mbilu a dzringisa kuva a nga vindlavindleki kumbe ku hlundzruka loko ntxhumu wa kukazri lowu a wu yimeliki wu nga yentxeki. (Mat. 18:26, 27) Xa wuzrazru, mhunu lweyi a lehisaka mbilu a nga yentxi mintxhumu na a nga pimisanga. Kambe mhunu lweyi a lehisaka mbilu loko a ni ntxhumu wa lisima akuva a wu yentxa a nga wu yentxi hi magugu hi ku kahlulela ku heta, kambe a tinyika nkama wa ku yanakanyisisa hi ndlela leyi a taka yi yentxa ha yone kutani a tizrisa nkama lowu vilelekaka akuva a yentxa mintxhumu yi huma hi ndlela ya kone. Xa wumune, a mhunu lweyi a lehisaka mbilu a tikazratela ku lavisana ni swikazratu na a nga khalakhali. Yene a beka miyanakanyu yake ka mintxhumu leyinene leyi a nga na yone a wuton’wini nakone a ta yentxa leswi a nga swi kotaka akuva a tama a tizrela Yehovha hi ku nyonxa. (Kol. 1:11) Ka swiyimu leswi hinkwaswu vhanu va Yehovha va fanela ku lehisa mbilu. Xihondzro Xa Ku Zrindzra 08/2023 pp. 20-21 §§ 3-6

Xin’we xa swivangelo leswi hi yentxaka hi sizrelela mbilu yezru hi leswaku Yehovha i mukambeli wa timbilu. Leswo swi tlhamuxela leswaku ku hambana ni vhanu lava vo ngo kota ku vona leswi hi nga xiswone he handle, Yehovha a kota ku vona leswi hi nga xiswone he ndzreni. Loko hi tata mimpimiso yezru hi swilayu swa wutlhazri swa Yehovha, yene a ta hi zrandzra ni ku tlhela a hi nyika wutomi lebyi nga helikiki. (Yoh. 4:14) Hi ndlela leyo, a mahanyela ya ku biha ya misava leyi ni madzrimi ya Sathana a swi nge ti hi hona hikusa a hi nge ti swi nyika mbangu. (1 Yoh. 5:18, 19) Nkama lowu hi yaka hi tsrhindzrekela kusuhi na Yehovha, lizrandzru dzrezru ni ndlela leyi hi mu hloniphaka ha yone swi ta ya swi kula. Hi mu zrandzra ngopfu Papayi wezru Yehovha lakakuva hi nyenya ni ku doha. Marta, makwezru wa le Cróacia, lweyi a samiki a dzringeka ku tikhoma hi ndlela ya ku biha a tsrale leswi: “A swi ni nabyalelanga ku lwisana ni ku navela loku ka ku yentxa mintxhumu ya ku biha leswi a swi to ni nyonxisa swa nkamanyana. Kambe ku txhava Yehovha swi ni sizrelelile.” Kambe xana ku txhava Yehohva swi mu pfune hi ndlela yini makwezru Marta? Yene a li a a yanakanyisisa hi mabindzru lawa ntsrhaku a a ta ma kuma hi ku yentxa leswo. Na hine hi fanela ku yentxa leswi fanaka. Xihondzro Xa Ku Zrindzra 06/2023 pp. 20-21 §§ 3-4

Yesu a a swi tiva leswaku nkongometo wa Yehovha a ku li ku xwengisa vito dzrake, ni ku kombisa leswaku leswi hlayiwiki mayelanu na Yene a ku li madzrimi. Hi leswi mu yentxiki a dondzrisa valandzreli vake ku khongota hi ndlela leyi: “Papayi wezru lweyi a nga matilweni, a vito dzraku a dzri xwengisiwe.” (Mat. 6:9) Yesu a a swi twisisa leswaku mhaka leyi yi khumba swivumbiwa hinkwaswu. A ku na xivumbiwa xin’wana lexi tlhazrihiki a wuyakwini hinkwabyu, lexi yentxiki swa ku tlula leswi Yesu a swi yentxiki akuva a xwengisa vito dzra Yehovha. Kambe, loko Yesu a khomiwile, valala vake a va mu lumbete leswaku a yeyise vito dzra Yehovha. Handle ka ku ganaganeka, Yesu a a swi tiva leswaku ku tizrisa hi ndlela ya ku biha kumbe ku zruka vito dzra ku xwenga dzra Papayi wake, a ku li xidoho lexikulu lexi mhunu a nga xi yentxaka. Ku yavanyisiwa ni ku lumbetiwa hi xidoho lexi, swi mu vavise ngopfu swinene. Swi nga yentxeka na lexo xi ve xivangelo lexi mu yentxiki a titwa na a “kazratekile ngopfu swinene” loko a li kusuhi ni ku khomiwa.—Luk. 22:41-44. Xihondzro Xa Ku Zrindzra 02/2024 p. 11 § 11

Ka mpalisanu wezru wa wutomi hi fanela ku zrandzra Yehovha na Yesu ku tlula xizro xin’wana ni xin’wana xa ndangu. (Mat. 10:37) Kambe leswo a swi hlayi swone leswaku a hi fanelanga hi hetisisa wutiyanguleli byezru a ndangwini. Kambe a matsrhan’wini ya leswo, loko hi djula ku nyonxisa Yehovha na Yesu hi fanela ku hetisisa wutiyanguleli byezru a ndangwini. (1 Tim. 5:4, 8) Loko hi yentxa leswo, hi ta nyonxa ngopfu swinene. Yehovha awa swi tiva leswaku a ndangwini ku to va ni ku nyonxa ntsena loko nuna ni nsati va kombana xihlonipho, loko vapswali va zrandzra vanavu ni ku tlhela va va dondzrisa ni loko vana va yingiseta vapswali. (Efe. 5:33; 6:1, 4) Swi nge na mhaka leswaku u nuna, nsati kumbe n’wana, a xa lisima i ku tizrisa milawu ya wutlhazri leyi kumekaka a Bibeleni. U nga yentxi leswi u vonaka swi lulamile hi ku ya hi vonela dzraku kumbe hi ku ya hi leswi tolovelekiki lomu u tsrhamaka kone. Nakone u nga dzringisi ku yentxa leswi hlayiwaka hi lava va tihlayaka masungakati. Ma tizrisi ha hombe mabuku yezru lama seketeliwiki a Bibeleni. Wone ma ni swidzringanyeto swinyingi mayelanu ni ndlela leyi u nga yi tizrisaka ha yone minkongomiso ya Bibele. Xihondzro Xa Ku Zrindzra 08/2023 p. 28 §§ 6-7

Makwezru wa xisati a fanela ku va ni wuswikoti bya ku hamba mintizro leyi taka mu pfuna a wuton’wini. Yin’we ya mintizro leyo, a nga dondzrisiwa na a li ntsrongo yi nga mu pfuna wutomi byake hinkwabyu. Hi xikombiso, tiva ku dondzra ni ku tsrala ha hombe. Mimbangwini yin’wana vhanu va yanakanya leswaku a swi vileleki kuva vavasati va tiva ku dondzra ni ku tsrala, kambe lebyo i wuswikoti bya lisima ka mukriste mun’wana ni mun’wana. (1 Tim. 4:13) Xileswo, u nga pfumeleli ntxhumu xi ku sivela ku dondzra ni ku tsrala ha hombe. Ma ta va wani mabindzru ya leswo? Swi ta ku nabyalela ku kuma ntizro nakone u ta va mudondzri lwenene wa Bibele u tlhela u dondzrisa van’wana. Kambe xa lisima ka hinkwaswu, u ta kota ku dondzra ni ku yanakanyisisa hi leswi u swi dondzraka Bibeleni, nakone leswo swi ta ku pfuna ku va kusuhi na Yehovha.—1 Tim. 4:15. Xihondzro Xa Ku Zrindzra 12/2023 p. 20 §§ 10-11

Kombela Yehovha akuva a ku pfuna ku hlula mindzringo. Leswi hi kalaka hi nga hetisekanga, minkama hinkwayu hi fanela ku tikazratela ku fambela kule ni mintxhumu leyi bihiki. Kambe Sathana a ta tama a yentxa hinkwaswu akuva a hi bindzrisela wutomi a mhakeni leyi. Ndlela yin’wana leyi a yi tizrisaka i ku hungata hi mintxhumu leyi bihiki. Ku hungata hi mintxhumu ya ku fana ni leyo swi nga ha txhimisa mimpimiso yezru kutani mimpimiso leyi kalaka yi nga basanga yi nga ha yi kokela ku yentxa xidoho lexikulu hi va hi nga ha nyonxeliwi ha Yehovha. (Mar. 7:21-23; Yak. 1:14, 15) Loko hi djula ku hlula ndzringo wa ku yentxa leswi bihiki hi fanela ku kombela mpfunu wa Yehovha. Ka xikhongoto xa hosi Yesu a ma patsrile mazritu lawo, a te: “U nga hi tsrhike hi nghena ndzringweni, kambe hi sizreleli ka lweyi wa ku biha.” (Mat. 6:13) Yehovha a swi djula ngopfu ku hi pfuna kambe hine hi fanela ku mu kombela kuva hi yentxa leswo. Nakone hi fanela ku hanya hi ku pfumelelana ni swikhongoto swezru. Xihondzro Xa Ku Zrindzra 05/2023 pp. 6-7 §§ 15-17

Loko nuna ni nsati va byi nyika lisima wuxaka byavu na Yehovha, va ta tizrisa swilayu swake kutani leswo swi ta va pfuna kuva va fambela kule kumbe ku langusana ni swikazratu leswi nga ha yentxaka leswaku lizrandzru dzravu dzri hola. Mhunu wa moya a yentxa hinkwaswu akuva a yetisela matsrhamela ya Yehovha ya ku fana ni wunene, ku lehisa mbilu ni ku dzrivalela. (Efe. 4:32–5:1) Loko vatekani va kombisana matsrhamela lawo, lizrandzru dzravu dzri ta ya dzri kula. Makwezru wa xisati lweyi a vitaniwaka Lena, lweyi a nga ni ku tlula 25 wa malembe na a txhatile a li: ‘Swa nabyala ku kombisa xitxhavu ni lizrandzru ka mhunu lweyi a nga ni wumoya.’ A hi voneni xikombiso lexi kumekaka a Bibeleni. Loko swi djule leswaku Yehovha a hlawula lava a va ta va vapswali va Mesiya lweyi a dumbisiwiki, a a ta hlawula mun’wana ni mun’wana wa lixaka dzra Davhida, kambe a hlawule Yosefa na Mariya. Ha yini? Hikusa ha vabidzri a va ni wuxaka lebyi tiyiki na Yehovha nakone Yehovha a a swi tiva leswaku minkama hinkwayu va ta mu beka mahlweni ka wukati byavu. Xihondzro Xa Ku Zrindzra 05/2023 p. 21 §§ 3-4

Nambileswi muzrangeli wezru Yesu a hetisekiki, lava a va hlawuliki akuva va zrangela vhanu vake lani misaveni a va hetisekanga. Xileswo, swa hi kazratela ku va yingiseta, ngopfungopfu loko va hi sindzrisa ku yentxa mintxumu leyi hi kalaka hi nga yi djuli. Khambi dzrin’wana Petro a swi mu nabyalelanga ku yingiseta. A ntsrumi yi mu byele leswaku a da swihazri leswi a swi nga basanga hi ku ya hi nawu wa Moxe. Swi ze swi ku makhambi mazrazru na Petro a yala ku yingiseta. (Mint. 10:9-16) Kambe, ha yini Petro a yentxe leswo? A nkongomiso lowo lowunpshwa a wu nga twisiseki kwake. Hi tlhelo dzrin’wana, mupostola Pawulo a yingisetile, nambiloko vakriste lava a va zrangela a Yerusalema va mu byele leswaku a teka mune wa vavanuna a famba na vone tempeleni akuva va ya tibasisa. Pawulo a a kombisa leswaku a hlonipha nawu. Nambi leswi Pawulo a a swi tiva leswaku a swi nga ha sindzrisi leswaku vakriste va landzrelela nawu wa Moxe, leswi a swi yentxiki a swi nga hoxekanga. Pawulo “a teke vavanuna lavo a ya tibasisa kun’we na vone hi ku landzra Nawu”. (Mint. 21:23, 24, 26) Kuva Pawulo a yingisetile swi yentxe leswaku ku va ni wumun’we a makazri ka vamakwavu.—Rom. 14:19, 21. Xihondzro Xa Ku Zrindzra 10/2023 p. 10 §§ 15-16

Swi nga yentxeka u yanakanya leswaku a ku txhava a hi tsrhamela dzra lisima ka vanghanu. Kambe lava va djulaka ku va vanghanu va Yehovha va fanela ku ‘mu txhava’. A swi na mhaka leswaku hi ni malembe mangani na hi tizrela Yehovha, hinkwezru hi fanela ku mu txhava hi ndlela leyi fanelekiki. Kambe swi tlhamuxela yini ku txhava Xikwembu Nkulukumba? Ku txhava Yehovha swi tlhamuxela ku mu txhava hi lani ku heleliki ni ku va hi nga yentxi ntxhumu lowu wu nga ha bekaka wuxaka byezru na yene a khombyeni. Hi xikombiso, Yesu a a ni muxaka lowu wa ku “txhava Xikwembu Nkulukumba”. (Heb. 5:7) Ku txhava loku Yesu a a li na kone hi Yehovha a a nga li ku txhava ka ku zruzrumela. (Eza. 11:2, 3) Ku hlaya ntiyiso Yesu a a mu zrandzra ngopfu Yehovha nakone a a djula ku mu yingiseta. (Yoh. 14:21, 31) Ku fana na Yesu hi mu hlonipha ngopfu Yehovha, hikusa ha swi tiva leswaku a ni lizrandzru, wutlhazri, wululami ni ntamu. Futsrhi ha swi tiva leswaku Yehovha awa hi zrandzra nakone hinkwaswu leswi hi nga swi yentxaka swi nga ha mu khunguvanyisa kumbe swi nyonxisa mbilu yake.—Amaps. 78:41; Amapr. 27:11. Xihondzro Xa Ku Zrindzra 06/2023 p. 14 §§ 1-2; p. 15 § 5

Loko hosi Uziya a ndzruluke wanuna wa ntamu a game a dzrivala hinkwaswu leswi Yehovha a mu yentxeliki swone. Hi dondzra yini? Minkama hinkwayu hi fanela ku dzrimuka leswaku a matovoko ni swiyavelo hinkwaswu leswi hi nga na swone swi pfa hi ka Yehovha. A matsrhan’wini ya ku tsrhamela ku tibyela hi leswi hi kotaka ku swi yentxa hi fanela ku yisa lidzrumu hinkwadzru ka Yehovha. (1 Kor. 4:7) Handle ka leswo, hi fanela ku titsrongohata ni ku pfumela leswaku a hi hetisekanga nakone hi vilela ku pfuniwa. Makwezru wa kukazri lweyi a nga ni kolomu ka 60 wa malembe a tsrale leswi: “Ni dondzri kuva ni nga khunguvanyeki kumbe ni hela ntamu loko van’wana va xiya swihoxo swanga. Minkama yin’wana ni hamba swihoxo swa ku kala swi nga twali nakone va ni laya hi kola ka swone. Nambitanu ni zama ku yampswisa ni va ni yentxela Yehovha hinkwaswu leswi ni nga swi kotaka.” Loko hi yingiseta Yehovha ni ku tama hi titsrongahata hi kuma ku nyonxa ka ntiyiso.—Amapr. 22:4. Xihondzro Xa Ku Zrindzra 09/2023 p. 10 §§ 10-11

Swi djule kuva vakriste va ku sungula va tiyisela. Va lavisane ni swikazratu leswi ntalu wa vhanu va le minkameni yavu a va lavisana na swone. Kambe swikazratu swavu a swi ya swi pfisa hi leswi a va li vakriste. Vanyingi a va landzreleliwa ku nge ntsena hi vazrangeli va wukhongoti bya Xiyuda ni vazrangeli va Varoma, kambe ni hi maxaka yavu. (Mat. 10:21) Minkama yin’wana a swi djula kuva va lwisana ni tidondzro ta madzrimi leti pfaka ka madukwa leti a ti ta yentxa leswaku bandla dzri yavana. (Mint. 20:29, 30) Nambitanu, vakriste lavayani va tame va tiyisela. (Mpful. 2:3) Ha yini? A va yanakanyisisa hi swikombiso swa vhanu lava swi kotiki ku tiyisela, lava ku khaneliwaka ha vone a Bibeleni va ku fana na Yobe. (Yak. 5:10, 11) A va khongota va kombela ntamu. (Mint. 4:29-31) Nakone a va beka miyanakanyu ka mabindzru lamanene lawa a va ma kuma hi ku tama va tiyisela.(Mint. 5:41) Na hine hi nga swi kota ku tiyisela loko hi dondzra ni ku yanakanyisisa hi swikombiso swa vhanu lava tiyiseliki lava hi dondzraka ha vone ka Zritu dzra Xikwembu Nkulukumba ni ka mabuku yezru. Xihondzro Xa Ku Zrindzra 07/2023 p. 3 §§ 5-6

Yehovha na Yesu a va nge txhuki va hi tsrhikile. Ntsraku ka loko mupostola Petro a yale Yesu a a fanela ku teka xiboho. Xana a a ta tsrhika ku va mulandzreli wa Kriste kumbe a a ta tama a tiyisela? Yesu a kombele Yehovha leswaku a pfuna Petro akuva lipfumelo dzrake dzri nga tsrani. Nakone Yesu a byele Petro hi xikhongoto lexi a xi yentxiki nakone a kombise leswaku a a mu dumba Petro ni leswaku a a ta swi kota ku tiyisa vamakwavu. (Luk. 22:31, 32) Swi nga yentxeka na mazritu lawa ma mu tiyise ngopfu Petro loko a ma dzrimuka. Hi ndlela leyi fanaka loko swi djula hi teka xiboho xa kukazri xa lisima a wuton’wini byezru, Yehovha a nga hi pfuna kuva hi dumbeka. (Efe. 4:8, 11) Leswi Yehovha a hlayisiki Petro kun’we ni vapostola van’wana hi tlhelo dzra nyama, na hine a ta hi hlayisa loko hi zrangisa Mfumu a wuton’wini byezru. Xihondzro Xa Ku Zrindzra 09/2023 pp. 24-25 §§ 14-15

Yehovha a swi nyika lisima hinkwaswu leswi hi swi yentxaka akuva hi kombisa wunene nambi ka swiyentxo leswitsrongo. A ku nyika lisima ku tikazrata hinkwaku hi ku yentxeka nakone a swi teka swanga xikweneti lexi a taka hi hakela. Kambe swi li yini loko a nkameni lowu khalutiki u same u tizra swanga nandzra wa wutizreli kumbe nkulu wa bandla? Yehovha awa wu dzrimuka ntizro hinkwawu u wu yentxiki ni lizrandzru ledzri a dzri ku susumetela ku yentxa leswo. (1 Kor. 15:58) Nakone awa dzri vona lizrandzru ledzri u yaka mahlweni u dzri kombisa. Yehovha a djula leswaku hinkwezru hi yengesela lizrandzru ledzri hi nga na dzrone ha yene ni van’wana. Hi nga tiyisa lizrandzru dzrezru ha Yehovha hi ku dondzra Zritu dzrake, hi yanakanyisisa ha dzrone ni ku khongota kwake nkama ni nkama. Hi nga kulisa lizrandzru dzrezru hi vamakwezru hi ku yentxa xa kukazri akuva hi va pfuna. Loko lizrandzru dzrezru dzri ya dzri kula, hi ya hi tsrhindzrekela kusuhi na Yehovha ni ndangu wezru wa moya. Nakone a wunghanu byezru na Yehovha kun’we ni vamakwezru byi ta va bya hi lani ku nga helikiki. Xihondzro Xa Ku Zrindzra 07/2023 p. 10 § 11; p. 11 § 13; p. 13 § 18

Mukriste mun’wana ni mun’wana a fanela ku teka xiboho mayelanu ni ndlela leyi a taka dzri hlayisa ha yone lihanyu dzrake. Loko mukriste a hlawula ndlela leyi a taka dahiwa ha yone milawu leyi a fanelaka ku yi landzra hi leyi yi vulavulaka hi ku fambela kule ni ngati ni wudemona ntsena. (Mint. 15:20; Gal. 5:19, 20) Handle ka milawu leyi, mukriste a ntsrhunxekile ku teka xiboho mayelanu ni wudahu lebyi a taka byi yamukela. Hi fanela ku hlonipha mfanelo leyi makwezru mun’wana ni mun’wana a nga na yone ya ku titekela xiboho mayelanu ni wudahu lebyi a taka byi yamukela swi nge na mhaka leswaku hi pfumelelana na swone kumbe im-him. Kutani hi fanela ku beka miyanakanywini mune wa tinhla leti landzrelaka: 1) O va ntsena Mfumu wa Xikwembu Nkulukumba lowu taka daha hi ku helela mavabyi hinkwawu. (Eza. 33:24) 2) Mukriste mun’wana ni mun’wana a fanela ku “tiyiseka hi leswi nga swinene kwake”. (Rom. 14:5) 3) U nga yavanyisi van’wana hi kola ka swiboho leswi va swi tekaka nakone u nga vi zribye dzra xikhunguvanyiso. (Rom. 14:13) 4) A vakriste va kombisa lizrandzru nakone va swi tiva leswaku a wumun’we bya bandla i bya lisima swinene ku tlula mavonela yavu.—Rom. 14:15, 19, 20. Xihondzro Xa Ku Zrindzra 07/2023 p. 24 § 15

Xana u byi nyika lisima wuxaka byaku na Yehovha? Handle ka ku ganaganeka ina! Ku sukela a minkameni ya khale, vhanu vanyingi va titwa ku fana na wene. (Amaps. 104:33, 34) Vanyingi va tikazrate ngopfu akuva va tizrela Yehovha. Hi leswo swi yentxiwiki hi Vanaziri vanyingi a Israyeleni wa khale va tinyiketela. A xiga lexi xi tlhamuxela Vaisrayele va ku hiseka lava tikazratiki akuva va tizrela Yehovha hi ndlela ya ku hlawuleka. A Nawu wa Moxe a wu pfumelela leswaku wanuna wa kukazri kumbe wansati wa kukazri a hamba xidumbiso xa ku hlawuleka ka Yehovha, a hlawula ku hanya swanga Munaziri ku dzringana nkama wa kukazri. (Atinhl. 6:1, 2) Xidumbixo lexo, a xi patsra kuva va yentxa mintxhumu ya kukazri leyi Vaisrayele van’wana a va nga fanelanga ku yi yentxa. Kutani ke, ha yini Muisrayele a a ta hlawula kuva Munaziri? A a ta va na a susumeteliwa hi lizrandzru ledzrikulu ledzri a nga na dzrone ha Yehovha ni hi leswi a tlangelaka matovoko yake.—Deut. 6:5; 16:17. Xihondzro Xa Ku Zrindzra 02/2024 p. 14 §§ 1-2

A Bibeleni, zritu dzra Xiheberu ledzri liki ku “dumbeka” kumbe “lizrandzru dzra ku dumbeka” dzri nyikela mongo wa leswaku dzra khomelela nakone makhambi manyingi dzri tlhamuxela lizrandzru ledzri Yehovha a nga na dzrone hi malandzra yake. A Zritu dzroledzri dzra dzrin’we dzri tlhela dzri tlhamuxela lizrandzru ledzri nga kone ka vhanu va Xikwembu Nkulukumba. (2 Sam. 9:6, 7) Lizrandzru dzrezru dzra ku dumbeka dzri nga ya dzri tiya hi ku famba ka nkama. Leswi hi leswi humeleliki Daniyele. Ku dumbeka loku Daniyele a a li na kone ka Yehovha ku dzringiwele wutomi byake hinkwabyu. Kambe yin’we ya mindzringo leyikulu yi humelele loko a ni 90 wa malembe. Tindzruna leti a ti tizrela hosi a ti nga mu zrandzri Daniyele nakone a ti nga mu txhavi Yehovha. Kutani va luke makungu akuva ku dlayiwa Daniyele. Va sindzrise hosi akuva yi sinara papela ledzri a dzri tsrimbisa kuva mhunu a khongota xikwembu xin’wana ni xin’wana kambe va khongota ntsena ka hosi. Lexi Daniyele a a fanela ku xi yentxa a ku li ku yima ku khongota ka Yehovha ku dzringana 30 wa masiku, hi ndlela leyo a a ta va na a kombisa leswaku awa dumbeka ka hosi. Kambe Daniyele a nga pfumelanga ku yentxa leswo.—Dan. 6:12-15, 20-22. Xihondzro Xa Ku Zrindzra 08/2023 p. 5 §§ 10-12

Yehovha a djula leswaku hi tama hi kombisa lizrandzru ka vamakwezru. Loko makwezru a txhuka a hi yentxela ntxhumu wa ku biha, hi nga tiyiseka leswaku a nga hi yentxeli ha vomu. Nakone a yentxa hinkwaswu leswi a nga swi kotaka akuva a yentxa mintxhumu hi ndlela ya Yehovha. (Amapr. 12:18) Yehovha awa ma zrandzra malandzra yake ya ku dumbeka nambileswi ma yentxaka swihoxo, a ha tama a va munghanu wezru nakone a nga beketeli xiviti. (Amaps. 103:9) Hi nyonxa ngopfu hi leswi Yehovha a hi dzrivalelaka, xileswo na hine hi fanela ku dzrivalela van’wana! (Efe. 4:32–5:1) Leswi hi hanyaka a masikwini ya wugamu, i swa lisima ngopfu ku va kusuhi ni vamakwezru. Swi nga yentxeka hi xanisiwa ngopfu kumbe hi pfaleliwa hi kola ka lipfumelo dzrezru. Loko leswo swi yentxeka hi ta wu vilela ngopfu mpfunu wa vamakwezru.—Amapr. 17:17. Xihondzro Xa Ku Zrindzra 03/2024 pp. 15-16 §§ 6-7

Bibele dzri vulavula hi vampshwa lava a va li ni wuxaka na Yehovha, lava va tovokisiwiki ni ku tlhela va va ni ku nyonxa. Mun’we wavu i Davhida. Loko Davhida a ha li mumpshwa, a hlawule kuva ni wuxaka na Yehovha nakone hi ku famba ka nkama a ve hosi ya ku dumbeka. (1 Tih. 3:6; 9:4, 5; 14:8) Swi ngo yini u ya u dondzra leswi yengetelekiki ha Davhida? U nga ha tlhela u dondzra hi xikombiso xa Marka na Timotewu. Vone va sungule ku tizrela Yehovha na va ha li vampshwa nakone va tame va dumbeka wutomi byavu hinkwabyu, va kume ku yamukeliwa ha Yehovha. Leswaku wutomi byaku byi tava hi ndlela yini a nkameni lowu taka swi ta ya hi ndlela leyi u byi tizrisaka ha yone swoswi. Loko minkama hinkwayu u tikazratela kuva u nga tidumbi kambe u dumba Yehovha a ta ku pfuna akuva minkama hinkwayu u teka swiboho swa wutlhazri. Ina, u nga va ni wutomi bya ku nyonxisa lebyi taliki hi mintxhumu leminene. Kambe dzrimuka leswaku Yehovha a swi nyika lisima hinkwaswu leswi u mu yentxelaka swone. Ku tizrisa wutomi byaku akuva u tizrela Papayi wezru Yehovha hi wone ntxhumu wa lisima lowu u nga wu yentxeka. Xihondzro Xa Ku Zrindzra 09/2023 p. 13 §§ 18-19

Mupostola Pawulo a a swi tiva leswaku vamakwavu i vhanu va ku kala ku hetiseka. Hi xikombiso, van’we ka vamakwezru va bandla dzra le Yerusalema a va nga kholwi leswaku yene i mudondzrisiwa. (Mint. 9:26) Ntsrhakunyana ka leswo, van’we va vulavule ku biha hi Pawulo akuva vamakwezru van’wana va nga ha mu dumbi. (2 Kor. 10:10) Pawulo a vone nkulu wa kukazri na a teka xiboho lexi nga liki xinene, lexi a xi ta khumba van’wana. (Gal. 2:11, 12) Nakone Marka munghanu lwenkulu wa Pawulo a mu khunguvanyisile. (Mint. 15:37, 38) Pawulo a a ta va a pfumelele swiyimu leswi swa vamakwezru swi mu khunguvanyisa, kambe a nga swi yentxanga leswo, yene a tame a vona leswinene ka vamakwezru ni ku tama a tizrela Yehovha hi ku dumbeka. Xana i yini lexi pfuniki Pawulo kuva a tiyisela ka xiyimu lexi? Pawulo a a zrandzra vamakwavu. Lizrandzru ledzri Pawu a a li na dzrone hi vamakwavu dzri mu pfune kuva a nga lavisisi swihoxo kambe a lavisisa matsrhamela lamanene. A lizrandzru dzri tlhele dzri pfuna Pawulo kuva a yentxa leswi a swi tsraliki ka tsralwa dzra namunhla. Xihondzro Xa Ku Zrindzra 03/2024 p. 15 §§ 4-5

A Bibeleni ku ni swikombiso swinyingi leswi swi bekaka a livaleni leswaku ku zrula i tsrhamela dzra lisima. Vona xikombiso xa Izaki. Loko a ye tsrhama Gerari va vhizinyu vake, ku nga Vafilista, va mu tsrhohokile nakone va pfale swihlovo leswi malandzra ya papayi wake a ma swi kelile. Kambe a matsrhan’wini ya ku lwa akuva a kuma swihlovo leswo, Izaki kun’we ni ndangu wake va zruzrile va ya kule swinene va va va ya kela swihlovo swimbeni. (Gen. 26:12-18) Kambe Vafilista va hlaye leswaku swihlovo leswo leswimpshwa na swone a swi li swavu. Kambe a matsrhan’wini ya leswo Izaki a tame a zrula. (Gen. 26:19-25) Kambe xana Izaki a swi kotise kuyini ku tama a zrula nambi loko vhanu vambeni va mu pfuka? Handle ka ku ganaganeka a lavisise ha hombe xikombiso xa vapswele vake. Hi xikombiso, papayi wake Abrahamu a a li mhunu lweyi a zruliki, nakone mamana wake Sara, a a li mhunu wa “ku zrula ni ku nabyala”.—1 Pet. 3:4-6; Gen. 21:22-34. Xihondzro Xa Ku Zrindzra 09/2023 p. 15 § 4

Yehovha a zrumele N’wanake wa mativula a ta la misaveni hi nkama lowu a wu bekisiki, akuva a ta dondzrisa vhanu mayelanu ni Mfumu wa Xikwembu Nkulukumba ni ku nyikela wutomi byake akuva a hi tizrula ka xidoho ni lifu. Kutani Yehovha a pfuxe Yesu akuva a tlhelela matilweni a ta va hosi ya Mfumu wa Xikwembu Nkulukumba. Nhlokomhaka nkulu ya Bibele i ku va ku xwengisiwa vito dzra Xikwembu Nkulukumba. Leswo swi ta yentxeka nkama lowu a hetisisaka nkongometo wake hi Misava hi ku tizrisa Mfumu wake, lowu ku taka fuma Kriste. Nkongometo wa Yehovha a wu nge txintxiwi. Yehovha a dumbisa leswaku hinkwaswu swi ta yentxeka hi lani a dumbisiki ha kone. (Eza. 46:10; Heb. 6:17, 18) Hi ku famba ka nkama, a misava yi tava paradeyisi nakone vana lava hetisekiki ni lava lulamiki va Adamu na Evha va ta ‘hanya hila ku nga helikiki’. (Amaps. 22:26) Kambe Yehovha a ha ni swinyingi miyanakanywini leswi a swi kunguhataka mayelanu na hine. Nkongometo wake lowukulu i kuva malandzra yake hinkwawu, ya le mtilweni ni ya la misaveni, ma mu gandzrela hi wumun’we. Xileswo, hinkwavu va ta dumbeka ni ku yingiseta Yehovha lweyi a tlakukiki a wuyakwini hinkwabyu. (Efe. 1:8-11) Xana a swi ku hlamalisi ku vona ndlela leyi Yehovha a hetisisaka nkongometo wake ha yone? Xihondzro Xa Ku Zrindzra 10/2023 p. 20 §§ 7-8

Loko Vayuda lava humiki Babilona va tlhase a Yerusalema, a swi tekanga nkama wa ku leha, ku sungule mpfilumpfilu ya politika, ku pfumaleka ka swakuda, ni ku kanetiwa. Kasi van’wana swi va kazratelile kuva va tinyiketela a ku pfuxeteni ka tempele dzra Yehovha. Kambe, Yehovha a beke vaprofeta vabidzri, ku nga Hagayi na Zakariya, akuva va pfuna vhanu ku hisekela wugandzreli bya Yehovha, leswi viki swa lisima swinene. (Hag. 1:1; Zek. 1:1) Ntsrhaku ka kolomu ka 50 wa malembe, Vayuda va vilela mpfunu. Ezra, lweyi a a ni wuswikoti ka ku kopiyara Nawu, a suke a Babilona akuva a ya kutxa vhanu va Xikwembu Nkulukumba leswaku va zrangisa wugandzreli byake. (Ezr. 7:1, 6) Swanga hi leswi wuprofeta bya Hagayi na Zakariya byi pfuniki vhanu va Xikwembu Nkulukumba kuva va tama va dumba Yehovha loko va kumana ni nkaneto, na hine hi nga tiyiseka leswaku Yehovha a ta tama a hi pfuna swi nge na mhaka leswaku hi kumana ni swikazratu swa muxaka muni a wuton’wini.—Amapr. 22:19. Xihondzro Xa Ku Zrindzra 11/2023 pp. 14-15 §§ 2-3

Hi nga kombisa lizrandzru dzredzru hi vamakwezru hi ndlela yini? Yin’we ya tindlela ta ku yentxa leswo i ku va txhavelela. Nakone a ntwela wusiwana wu ta hi pfuna ku “tama hi txhavelelana”. (1 Tes. 4:18) Hi nga yentxa yini akuva hi tiyisa a lizrandzru dzrezru hi van’wana? Hi ku dzrivalela vamakwezru hi lani hi nga kotaka ha kone nambiloko ku yentxa leswo swi kazrata. Ha yini namunhla swi li swa lisima ngopfu ku kombisa lizrandzru hi van’wana? Petro a hlaye xivangelo xa kone loko a ku: “Kambe a wugamu bya mintxhumu hinkwayu byi le kusuhi. Xileswo, . . . zrandzrananani ngopfu swinene.” (1 Pet. 4:7, 8) A ku hela ka misava leyi ya ku biha ku le kusuhi. Na hi ni leswo miyanakanywini, i yini leswi hi fanelaka ku swi yimela? Yesu a basopise vadondzrisiwa vake a ku: “Mi ta nyenyiwa hi matiko hinkwawu hi mhaka ya vito dzranga.” (Mat. 24:9) Akuva hi kota ku tiyisela swi djula hi va ni wumun’we. Hi ku yentxa leswo, Sathana a nge te swi kota ku hi tsravukanisa hikusa hi ta va na hi tlhanganisiwe hi lizrandzru.—Filp. 2:1, 2. Xihondzro Xa Ku Zrindzra 11/2023 p. 13 §§ 18-19

Mintiyiso ya Zritu dzra Xikwembu Nkulukumba yi ni ntamu swinene. Loko hi dondzrisa vhanu mayelanu ni ndlela leyi Yehovha a nga xiswone hakunene, hi ta vona ntxhumu wa ku hlamalisa. Ntuzru wa madzrimi lowu Sathana a wu tsrimbiki a matihlweni ya vhanu wa suka hi kutsrongokutsrongo, kutani va sungula ku vona matsrhamela ya ku xonga ya Papayi wezru, Yehovha. Va hlamalisiwa hi ku vona ntamu lowu nga helikiki wa Yehovha. (Eza. 40:26) Va dondzra ku mu dumba hi kola ka wululami byake lebyi hetisekiki. (Deut. 32:4) Va dondzra swinyingi ka wutlhazri byake lebyikulu. (Eza. 55:9; Rom. 11:33) Nakone va txhaveleleka loko va dondzra leswaku Yehovha i lizrandzru. (1 Yoh. 4:8) Loko va ya va tsrhindzrekela ka Yehovha, a dumbu dzravu dzra ku hanya hi lani ku nga helikiki dzri ya dzri tiya. Hi ni tovoko dzrikulu dzra ku pfuna vhanu kuva va tsrhindzrekela ka Papayi wavu, Yehovha! Loko hi yentxa leswo Yehovha a hi vona swanga “vatizrikulobye”.—1 Kor. 3:5. Xihondzro Xa Ku Zrindzra 02/2024 p. 12 § 15

Loko u li xidondzri xa Bibele kumbe u kulisiwa hi vapswali lava nga Timboni ta Yehovha, xana wa yanakanya hi ku babatisiwa? I swa lisima leswo! Na u nga si na babatisiwa, swi djula u tinyiketela ka Yehovha. Xana u tinyiketela ka Yehovha hi ndlela yini? U hamba xikhongoto, ka xikhongoto lexo u dumbisa Yehovha leswaku u ta mu hanyela wutomi byaku hinkwabyu ni ku mu dumbisa leswaku u ta zrangisa ku zrandzra kwake a wuton’wini byaku. Ku hlaya ntiyiso, u dumbisa Yehovha leswaku u ta tama u mu zrandzra “hi mbilu yaku hinkwayu, hi wutomi byaku hinkwabyu, hi miyanakanyu yaku hinkwayu ni hi ntamu waku hinkwawu”. (Mar. 12:30) Ku tinyiketela loko ku yentxiwa a xihundleni, wene na Yehovha. Hi tlhelo dzrin’wana a babatiso dzri yentxiwa mahlweni ka vhanu vanyingi; dzri komba van’wana leswaku u tinyiketelile ka Yehovha. Ku tinyiketela kwaku i xidumbiso xa lisima swinene, xileswo u ta yentxa hinkwaswu leswi u nga swi kotaka akuva u xi hetisisa xidumbiso lexi, nakunene hi leswi Yehovha a swi yimeliki kwaku.—Ekles. 5:4. Xihondzro Xa Ku Zrindzra 03/2024 p. 2 § 2; p. 3 § 5

Mitxhatu hinkwayu yi ni swikazratu. A Bibele dzri swi beka livaleni leswaku lava txhatiki “va ta va ni swikazratu wuton’wini”. (1 Kor. 7:28) Ha yini? Hikusa mutxhatu wu vumbiwa hi vhanu vabidzri lava kalaka va nga hetisekanga, va ni matsrhamela lama hambaniki, a va zrandzri mintxhumu leyi fanaka nakone va ni mavonela lama hambaniki. Swi nga yentxeka va kulele ka mimbangu leyi hambaniki ni hi ndlela leyi hambaniki, xileswo nuna kumbe nsati a ta gungula ntxhumu ka nkatake lowu a a nga wu tivi nkama na va nga si txhata. Ntxhumu ha wun’we wu nga ha vanga xikazratu. A vatekani van’wana a matsrhan’wini ya kuva va lulamisa timhaka ha wubidzri byavu, va lwela ku tiva lweyi a nga ni xihoxo kumbe nandzru nambileswi ha vabidzri va nga ni nandzru hi ndlela ya kukazri. Van’wana va vona swi yampswa ku teka xiboho xa ku hambana kumbe ku dlaya wukati. Kambe, xana lexo i xiboho lexinene? Im-him. Yehovha a kongomisa vhanu lava txhatiki akuva va hlonipha lulamiselo dzra mutxhatu nambiloko swi kazrata ku hanyisana na yene. Xihondzro Xa Ku Zrindzra 03/2024 p. 16 § 8; p. 17 § 11

Ntsrhaku ka loko u tinyiketelile ni ku babatisiwa, a dumbo dzraku dzra ku hanya hi lani ku nga helikiki a paradeyiseni kola misaveni dzri tama dzri kula loko u dondzra ha yene u va u wupfa hi tlhelo dzra moya. (Heb. 5:13–6:1) U ta pfumelelana ni leswi hlayiwaka ka Varoma 5:2-4. Handle ka ku ganaganeka u kumane ni swikazratu swinyingi, kambe u tame u tiyisela nakone u titwe na u yamukeleka ka Yehovha. Leswi u swi tivaka leswaku Yehovha awa ku zrandzra u ni swivangelo swinyingi swa ku yimela leswi Yehovha a swi dumbisiki. Nakone, a dumbo dzraku dzri ye dzri tiya ku tlula nkama lowu u tiviki ntiyiso ha wone. Xileswo, a dumbo ledzri i dzra hi kakunene nakone dzri ni ntlhamuxelo wa lisima kwaku. Dzri ku pfuna ka swiyimu hinkwaswu a wuton’wini byaku, dzri ntxintxa ndlela leyi u hanyisanaka ni vandangu waku ha yone, swiboho leswi u swi tekaka ni ndlela leyi u wu tizrisaka ha yone nkama. Mupostola Pawulo a tlhela a vulavula hi ntxhumu wa lisima mayelanu ni dumbo ledzri u vaka na dzrone ntsrhaku ka loko u yamukeliwile ha Yehovha. A ku tiyisekisa leswaku a dumbo ledzri u nga na dzrone, handle ka ku ganaganeka dzri ta hetiseka.—Rom. 15:13. Xihondzro Xa Ku Zrindzra 12/2023 pp. 12-13 §§ 16-19

Loko hi lavisana ni swiyimu swa ku kazrata, swi nga hi kazratela ku va ni matitwela, mayanakanyela ni mayangulela lawa hi ma toloveliki. Ku fana ni boti ledzri yingayingisiwaka hi mavimbi ya lwandle, na hine matitwela yezru ma nga ha txintxatxintxa. Xana Yehovha a hi pfunisa kuyini loko hi sungula ku va ni matitwela lawa? Yene a dumbisa leswaku a ta hi tiyisa. Loko ku sungula xidzedze na boti dzri li lwandle, dzri nga ha sungula ku yingayinga dzri ya hala ni hala hi ndlela ya ku txhavisa. Akuva boti dzri tiya, ku tizrisiwa swihupa leswi bekiwaka ka matlhelo hinkwawu ya boti. Swihupa leswo swi nga yentxa leswaku a boti dzri nga yingayingi, hi ndlela leyo lava nga ka boti va nga titwa na va sizrelelekile va tlhela va titwa ha hombe ka liyendzro dzravu. Kutani, switizro swinyingi leswi tizriseliwaka ku tiyisa boti swi tizra ha hombe loko boti dzri li ku fambeni. Hi ndlela leyi fanaka, Yehovha awa hi tiyisa loko hi tama hi dumbeka ka swiyimu swa ku kazrata. Xihondzro Xa Ku Zrindzra 01/2024 p. 22 §§ 7-8

Loko u titwa na u txhava, tivutise leswi: ‘I yini leswi Yehovha a swi yentxiki?’ Tinyike nkama wa ku yanakanyisisa hi ntumbuluku. Hi xikombiso, loko hi ‘lavisisa ha hombe’ ndlela leyi Yehovha a hlayisaka ha yone tinyanyana ni mafilori, nambileswi a kalaka a nga swi hambanga hi xifaniso xake nakone swi nga kotekiki leswaku swi mu gandzrela, loko hi yanakanyisa hi leswi hi nga tiyiseka leswaku na hine Yehovha a ta hi hlayisa. (Mat. 6:25-32) Tlhela u yanakanya hi leswi Yehovha a swi yentxeliki malandzra yake. U nga dondzra hi xikombiso xa mhunu wa kukazri wa le Bibeleni lweyi a kombisiki lipfumelo ledzri tiyiki kumbe u nga ha dondzra hi mimfambu ya vhanu va Yehovha va le masikwini yezru. Handle ka leswo, tlhela u yanakanya hi ndlela leyi Yehovha a ku hlayisaka ha yone. I yini leswi a swi yentxiki akuva u tiva ntiyiso? (Yoh. 6:44) Xana a swi hlamulisi kuyini swikhongoto swaku? (1 Yoh. 5:14) He yini mintxhumu ya yinene leyi yentxekaka a wuton’wini byaku leyi kombisaka leswaku wa buyeliwa hi kola ka xitizrulo xa N’wanake lweyi a zrandzrekaka?—Efe. 1:7; Heb. 4:14-16. Xihondzro Xa Ku Zrindzra 01/2024 p. 4 § 6; p. 7 § 17