Novhembru

Loko u ni vana, va pfuni kuva va lulamisela tinhlamulo leti fambisanaka ni ntanga yavu. Minkama yimbeni a mitlhanganwini ku ta dondzriwa hi swikazru leswi humelelaka mindangwini kumbe mhaka leyi fambisanaka ni mahanyela. Nambitanu, swi nga yentxeka ku va ni yava dzrin’we kumbe mabidzri lawa vanaku va nga hlamulaka ku wone. Handle ka leswo, pfuna n’wanaku a twisisa leswaku a hi minkama hinkwayu a taka tlakuxa voko a va a nyiketiwa. Hi ndlela leyo, loko ku nyiketiwa van’wana kuva va hlamula a matsrhan’wini yake a nge ti khunguvanyeka. (1 Tim. 6:18) Hinkwezru hi nga lulamisela tinhlamulo leti yakaka leti yisaka lidzrumu mahlweni ka Yehovha ni ku kutxa vamakwezru. (Amapr. 25:11) Minkama yin’wana hi nga nyikela tinhlamulo leti vulavulaka hi mfambu wezru, kambe hi fanela ku tivonela akuva hi nga vulavuli ngopfu ha hine. (Amapr. 27:2; 2 Kor. 10:18) A matsrhan’wini ya leswo tinhlamulo tezru ti fanela ku vulavula ngopfu ha Yehovha, Zritu dzrake ku’nwe ni vhanu vake.—Mpful. 4:11. Xihondzro Xa Ku Zrindzra 04/2023 pp. 24-25 §§ 17-18

A lizrandzru i dzra lisima ngopfu swinene akuva hi tama hi tsrhama na hi pfukile. (Mat. 22:37-39) Lizrandzru ledzri hi nga na dzrone ha Xikwembu Nkulukumba dzri hi pfuna ku tama hi tiyisela a ntizrweni wa ku zrezra nambiloko hi kumana ni swikazratu. (2 Tim. 1:7, 8) Hi tlhela hi kombisa leswaku ha va zrandzra vhanu van’wana lava hi kalaka hi nga li na vone a ku pfumeleni hikuva hi va zrezrela, nambiloko swi vilela kuva hi yentxa hi ku va fonela kumbe ku va tsralela mapapela. A hi heleliwi hi dumbo dzra leswaku siku dzrin’wana vhanu lava va nga ha txintxa va va va sungula ku yentxa leswinene. (Ezek. 18:27, 28) Ku zrandzra walikwezru swi patsra kuva hi zrandzra vamakwezru. Nakone hi nga yentxa leswo hi kuva hi “tiyisana [hi] tlhela hi yakana”. (1 Tes. 5:11) Ku fana ni masotxha lawa ma tizrisanaka loko ma li yimpini, na hine hi djula ku tiyisana ni van’wana. A hi djuli ku khunguvanyisa vamakwezru ha vomu kumbe ku tlhelisela wubihi hi wubihi. (1 Tes. 5:13, 15) Hi tlhela hi kombisa leswaku hi ni lizrandzru hi kuva hi hlonipha vamakwezru lava nga ni wutiyanguleli bya ku hlayisa bandla.—1 Tes. 5:12. Xihondzro Xa Ku Zrindzra 06/2023 p. 10 § 6; p. 11 §§ 10-11

Yin’we ya tindlela ta ku tiyisa lipfumelo dzrezru i ku yanakanyisisa hi xitizrulo. A xitizrulo hi xone xi hi tiyisekisaka leswaku Xikwembu Nkulukumba a ta hetisisa hinkwaswu leswi a swi dumbisiki. Ku yanakanyisisa hi leswaku ha yini Yehovha a hi nyike xitizrulo ni hinkwaswu leswi patsrekiki kuva a hi nyika xitizrulo, swi ta tiyisa lipfumelo dzrezru ka leswaku Xikwembu Nkulukumba a ta hetisisa swidumbiso swake hinkwaswu mayelanu ni wutomi lebyi nga helikiki a misaveni leyimpshwa. Ha yini hi nga hlayaka leswo? Akuva a hi nyika xitizrulo, Yehovha a zrumele n’wanake lweyi a zrandzrekaka akuva a ta pswaliwa lani misaveni swanga mhunu wa nyama lweyi a hetisekiki. Loko a li lani misaveni, Yesu a lavisane ni swiyimu swa ku kazrata a va a dlayiwa hi ndlela ya nsele. Nakunene Yehovha a hakele ku dula! Yehovha a a nge ti pfumela kuva n’wanake a xanisiwa ni ku tlhela a dlayiwa ntsena kuva hi hanya swa nkamanyana. (Yoh. 3:16; 1 Pet. 1:18, 19) Leswi a hakeliki ku dula, Yehovha a ta yentxa hinkwaswu akuva xidumbiso xa wutomi lebyi nga helikiki a misaveni leyimpshwa xi va xa ha kakunene. Xihondzro Xa Ku Zrindzra 04/2023 p. 27 §§ 8-9

Xana Yehovha a na kone ku navela ka ku pfuxa lava fiki? Handle ka ku ganaganeka a na kone. Akuva a tiyisekisa leswo, a yentxe leswaku vatsrali vanyingi va Bibele va vulavula hi dumbo ledzri dzra wumundzruku. (Eza 26:19; Mpful. 20:11-13) Nakone loko Yehovha a hamba xidumbiso xa kukazri awa xi hetisisa. (Yehoš. 23:14) Ku hlaya ntiyiso, Yehovha a wu yimelile nkama lowu a taka pfuxa lava fiki akuva va tlhela va hanya. Hi xikombiso, vona leswi Yobe a swi tsraliki. A a tiyiseka leswaku loko a fa, Yehovha a a ta mu xuva nakone a a ta navela ku tlhela a mu pfuxa kuva a tlhela a hanya. (Yb. 14:14, 15) Yehovha a ma xuva swinene hinkwawu malandzra yake lawa ma fiki. A nga wu voni nkama wa ku va pfuxa a va nyika lihanyu ledzrinene ni ku nyonxa. Kambe swi li yini hi vhanu vanyingi lava fiki na va nga kumanga mukhandlu wa ku dondzra ntiyiso mayelanu na Yehovha? Ni volavu Xikwembu Nkulukumba wezru wa lizrandzru a ta va pfuxa. (Mint. 24:15) Yehovha a djula ku va nyika mukhandlu wa ku va vanghanu vake ni ku va nyika mukhandlu wa ku hanya hi la ni ku nga helikiki kola misaveni.—Yoh. 3:16. Xihondzro Xa Ku Zrindzra 04/2023 p. 9 §§ 5-6

U nga dzri tiyisisa kuyini dumbo dzraku? Loko a li leswaku dumbu dzraku i ku hanya hi la ku nga helikiki la misaveni, dondzra wundzrunguli bya le Bibeleni lebyi vulavulaka hi paradeyisi u va u yanakanyisisa ha byone. (Eza. 25:8; 32:16-18) Yanakanya hi ndlela leyi wutomi byi taka va ha yone a misaveni leyimpshwa u va u tivona hi mahlo ya miyanakanyu na u li kohala. Loko hi tinyika nkama wa ku yanakanyisisa hi ndlela leyi wutomi byi taka va ha yone a misaveni leyimpshwa, swikazratu swezru swi ta va ‘swa nkamanyana nakone swi ta vevuka’. (2 Kor. 4:17) A xidumbiso lexi Yehovha a hi nyikiki xone hi xone xi taka hi yentxa hi va ni ntamu. Yehovha a hi nyika hinkwaswu leswi hi swi vilelaka akuva hi kuma ntamu lowu pfaka kwake. Kutani, loko u djula mpfunu akuva u hetisisa xiyavelo xaku, u lwisana ni xikazratu kumbe u djula ku tsrhama na u nyonxile, pfula mbilu yaku ka Yehovha hi xikhongoto ni ku djuletela nkongomiso wake hi ku va u hamba dondzro ya ximhunu. Pfumela ku kutxiwa ni mpfunu wa vamakwezru. Tinyike nkama wa ku yanakanyisisa hi ndlela leyi wutomi byi taka va ha yona a nkameni lowu taka. Loko u yentxa leswo, hi la ni buku dzra Vakolosa 1:11 dzri hlayaka ha kone, ‘ntamu wake lowukulu wu ta ku tiyisa, ku yentxela leswaku u kota ku tiyisela hi ku helela ni ku lehisa mbilu na u nyonxile’. Xihondzro Xa Ku Zrindzra 10/2023 p. 17 §§ 19-20

Hi ni swivangelo swinyingi swa ku hi yentxa hi tlangela Yehovha ka swikhongoto swezru. Hi nga tlangela Yehovha hi hinkwaswu leswinene leswi hi nga na swone hikusa nyiko yin’wana ni yin’wana leyi hetisekiki hi pfa kwake. (Yak. 1:17) Hi xikombiso, hi nga mu tlangela hi kola ka mintxhumu hinkwayu ya ku xonga leyi a yi tumbuluxiki. Hi nga mu byela leswaku hi mu tlangela ngopfu hi kola ka wutomi, ndangu, vanghanu ni hi dumbo dzra ku xonga ledzri a hi nyikiki dzrone mayelanu ni wumundzruku. Nakone swi le livaleni leswaku hi djula ku tlangela Yehovha hi kola ka ndjombo ya ku hlawuleka leyi a hi nyikiki yone ya ku va vanghanu vake. Kumbexana swi nga ha djula hi tikazrata akuva hi yanakanyisisa hi swivangelo leswi hi nga na swone swa ku tlangela Yehovha. Hikusa vhanu vanyingi namunhla hi lava va nga khensiki, va heta nkama wunyingi na va tikazratela ku kuma leswi va swi djulaka a matsrhan’wini ya ku tlangela hi leswi va nga na swone. Loko hi kutxeteliwa hi mayanakanyela lawo, hi nga ha sungula kuva ka swikhongoto swezru ho tama ku kombela ntsem. Akuva leswo swi nga yentxeki hi fanela kuva minkama hinkwayu hi dzrimuka ku tlangela Yehovha hi hinkwaswu a hi yentxelaka swone.—Luk. 6:45. Xihondzro Xa Ku Zrindzra 05/2023 p. 4 §§ 8-9

Swanga Papayi wezru lweyi a nga ni lizrandzru, Yehovha a nga swi zrandzri ku hi vona na hi xaniseka. (Eza. 63:9) Nambitanu, Yehovha a nga siveli kuva mindzringo hinkwayu, leyi nga ha fanisiwaka ni milambu kumbe ndzrilo, yi nga hi humeleli. (Eza. 43:2) Kambe Yehovha a dumbisa leswaku a ta hi pfuna ku “khaluta ka mindzringo” yoleyo. Nakone a nge ti pfumelela leswaku mindzringo yoleyo yi hi sivela ku mu tizrela. Futsrhi Yehovha a tlhela a hi nyika moya wake wa ku xwenga akuva wu hi nyika ntamu wa ku tiyisela. (Luk. 11:13; Filp. 4:13) Xileswo, hi nga tiyiseka leswaku minkama hinkwayu hi ta va ni leswi hi swi vilelaka akuva hi tiyisela ni ku tama hi dumbeka kwake. Yehovha a yimela leswaku hi mu dumba. (Heb. 11:6) Minkama yin’wana swikazratu swezru swi nga ha tikomba swi li swikulu, kutani hi nga ha sungula ku ganaganeka leswaku Yehovha a ta hi pfuna kumbe im-him. Kambe Bibele dzri hi tiyisekisa leswaku hi ntamu wa Xikwembu Nkulukumba hi nga tlula nambi ‘pangu’ kumbe muru. (Amaps. 18:29) A matsrhan’wini ya kuva hi pfumelela ku ganaganeka koloko ku kula a mbilwini yezru, hi fanela ku khongota na hi ni ku dumba loku heleliki ka leswaku Yehovha a ta hi hlamula.—Yak. 1:6, 7. Xihondzro Xa Ku Zrindzra 11/2023 p. 22 §§ 8-9

Bibele dzri khanela hi lizrandzru dzra ntiyiso hi ndlela ya ku xonga swinene! Mazritu lawa ma tiyisekisa vatekani leswaku va nga va ni lizrandzru dzra ntiyiso. A lizrandzru dzra ntiyiso ni ledzri tsrhamaka hi lani ku nga helikiki dzra wanuna ni wansati dzri tiseketele ka ku tikazrata kwavu. Hi xikombiso, yanakanya hi xitiko. Xi nga tsrhama na xi tlhavikile hi lani ku nga helikiki kambe u fanela ku hlanganyetela tihunyi. Loko u nga tivoneli xi nga ha timeka. Hi lani ku fanaka, lizrandzru dzra nuna ni nsati dzri nga tama dzri tiya hi lani ku nga helikiki ntsena loko va dzri bekisa. Minkama yimbeni vatekani va nga ha vona ingiki lizrandzru dzravu dzra hola, ngopfungopfu loko va kumana ni swikazratu swa timali, swa lihanyu kumbe loko va wundla vana. Kutani akuva a ‘langavi dzra Yahi’ dzri tama dzri pfuzra, nuna ni nsati va fanela ku tama va tiyisa wuxaka byavu na Yehovha. Xihondzro Xa Ku Zrindzra 05/2023 pp. 20-21 §§ 1-3

Xana hi nga yentxa yini akuva hi va ni xixixi? Vapswali vezru va nga ha hi byela leswaku hi va ni xixixi kambe ledzri a hi tsrhamela dzra ku suka ka papayi dzri ya ka n’wana. Ku va ni xixixi swi fana ni ku dondzrela wuswikoti bya kukazri. Ndlela ya ku va ni wuswikoti bya kukazri i kuva hi lavisisa lweyi a nga na byone kutani hi mu yetisela. Hi ndlela leyi fanaka, akuva hi va ni xixixi hi fanela ku lavisisa lava nga ni tsrhamela ledzri hi tlhela hi va yetisela. Ku fana na Daniyele, swi djula hi dzri tiva ha hombe Zritu dzra Xikwembu Nkulukumba, hi va ni wuxaka bya le kusuhi na Yehovha hi tlhela hi vulavula na yene hi mu byela ta le mbilwini, nakone hi fanela ku dumba Yehovha hi va hi tiyiseka leswaku a ta hi seketela. Kutani loko lipfumelo dzrezru dzri dzringiwa hi ta kombisa xixixi. Lava nga ni xixixi va hloniphiwa hi van’wana. Xixixi lexi xi tlhela xi pfuna ku kokela vhanu va timbilu letinene ka Yehovha. Nakunene hi ni swivangelo leswi twalaka swa ku va ni xixixi. Xihondzro Xa Ku Zrindzra 08/2023 p. 2 § 2; p. 4 §§ 8-9

A zritu dzra Xigriki ledzri ndzruluteliwiki dzri va ku “kambela”, dzri tlhamuxela ku kambela mintxhumu ya nsimbi leyi yi nga ya lisima dzrikulu. Xileswo, hi fanela ku kambela mintxhumu leyi hi yi yingelaka kumbe ku yi dondzra akuva hi vona leswaku i ntiyiso kumbe im-him. Swi ta va swa lisima ngopfu ni kwezru namunhla swanga hi leswi hi yaka hi tsrhindzrekela kusuhi ni nhlomulu lowukulu. A matsrhan’wini ya ku kholwa hinkwaswu, hi fanela ku tizrisa wuswikoti byezru bya ku yanakanya akuva hi kota ku dzringanisa leswi hi swi dondzraka kumbe ku swi twa, ni leswi hlayiwaka hi Bibele kun’we ni nhlengeletanu ya Yehovha. Loko hi yentxa leswo a hi nge ti kanganyisiwa hi madzrungula ya madzrimi lawa ma pfaka ka mademona. (Amapr. 14:15; 1 Tim. 4:1) Ha swi tiva leswaku swanga ntlawa, a malandzra ya Xikwembu Nkulukumba ma ta huluka ka nhlomulo lowukulu. Kambe a hi swi tivi leswaku ku ta yentxeka yini hi mun’wana ni mun’wana wezru. (Yak. 4:14) Swi nge na mhaka leswaku a nhlomulo lowukulu wu ta sungula na ha ha hanya kumbe na hi file, loko hi tsrhama na hi dumbekile ka Yehovha a ta hi hakela hi wutomi lebyi nga helikiki. Xileswo, hi djula ku beka miyanakanyu yezru ka dumbo dzrezru dzra ku hlamalisa ni ku tsrhama na hi lulamele siku dzra Yehovha! Xihondzro Xa Ku Zrindzra 06/2023 p. 13 §§ 15-16

Hine a hi swi tivi leswaku wuprofeta byin’wana bya Bibele byi ta hetiseka hi ndlela yini. (Dan. 12:8, 9) Kambe akuva hi nga yi tivi ha hombe ndlela leyi wuprofeta byin’wana byi taka hetiseka ha yone, a swi hlayi swone leswaku a byi nge ti hetiseka. Ha tiyiseka leswaku Yehovha a ta hi pfuna kuva hi twisisa leswi hi swi vilelaka hi nkama lowu nga wone, hi lani a yentxiki ha kone a nkameni lowu khalutiki. A wuprofeta bya ku huweleliwa ka leswaku “ku zrulile nakone ku sizrelelekile” nakunene byi ta hetiseka. (1 Tes. 5:3) A mimfumu ya misava ya politika yi ta helisa wugandzreli bya madzrimi hi ku helela. (Mpful. 17:16, 17) Kutani va ta sungula ku hlasela vhanu va Xikwembu Nkulukumba. (Ezek. 38:18, 19) Swiyentxakalu leswi swi ta hi yisa hi ku helela ka yimpi ya wugamu ya Armagedoni. (Mpful. 16:14, 16) Hi nga tiyiseka leswaku hinkwaswu leswi, ku nge khale swi ta hetiseka. Na ha ha yimela leswaku hinkwaswu leswi swi yentxeka a hi yimeleni Papayi wezru wa le matilweni hi ku va hi dondzra ha hombe wuprofeta bya le Bibeleni ni ku va hi pfuna van’wana ku yentxa leswi fanaka. Xihondzro Xa Ku Zrindzra 08/2023 p. 13 §§ 19-20

Loko Pawulo a khanela hi lipfumelo, dumbo ni lizrandzru a gamise hi ku hlaya leswaku “kambe lexikulu ngopfu ka leswizrazru i lizrandzru”. (1 Kor. 13:13) Kambe ha yini Pawulo a hlaye mazritu lawa? Hikusa a nkameni lowu taka swi nga ha ti vileleka kuva hi va ni lipfumelo ka swidumbiso swa Xikwembu Nkulukumba mayelanu ni misava leyimpshwa kumbe dumbo dzra leswaku swidumbiso swoleswo swi ta hetiseka, hikusa swi ta va na swi hetisekile. Kambe minkama hinkwayu swa ha ta tama swi vileleka kuva hi zrandzra Yehovha kun’we ni vhanu. Handle ka ku ganaganeka lizrandzru dzrezru dzri ta tama dzri kula hi lani ku nga helikiki. Na hine loko hi zrandzra van’wana hi kombisa leswaku hi vakriste va ntiyiso. Yesu a byele vapostola vake a ku: “Hinkwavu va ta swi tiva leswaku mi vadondzrisiwa vanga loko mi zrandzrana.” (Yoh. 13:35) Ku zrandzra van’wana swi hi pfuna ku va ni wumun’we. Pawulo a hlaye leswaku “a lizrandzru dzri yentxa leswaku vhanu hinkwavu va twanana hi ku helela”. (Kol. 3:14) Mupostola Yohane a tsralele vapfumelikulobye a ku: “Lweyi a zrandzraka Xikwembu Nkulukumba a fanela ku zrandzra ni makwavu.” (1 Yoh. 4:21) Loko hi kombisa lizrandzru ka van’wana hi va na hi kombisa leswaku ha mu zrandzra Xikwembu Nkulukumba. Xihondzro Xa Ku Zrindzra 11/2023 p. 8 §§ 1, 3

A Bibele dzri fananisa wutomi bya mukriste ni ku tsrutsruma. A switsrutsrumi leswi taka heta mpalisanu swi ta kuma wutomi lebyi nga helikiki. (2 Tim. 4:7, 8) Xileswo, hi fanela ku yentxa hinkwaswu leswi hi nga swi kotaka akuva hi tama hi tsrutsruma ngopfungopfu leswi hi nga kusuhi ni magamu. Mupostola Pawulo a hi byela leswi nga hi pfunaka akuva na hine hi swi kota. Pawulo a hi byela leswaku a hi “txukumeteni hinkwaswu leswi swi hi bindzraka . . . hi tsrutsrumeni hi ku tiyisela ka mpalisanu lowu hi nga ka wone”. Xana Pawulo a a djula ku hlaya leswaku mukriste a nga fanelanga a va ni ntsrhwalu wa kukazri? Im-him. A matsrhan’wini ya leswo, a hi byela leswaku hi fanela ku txukumeta ntxhumu wun’wana ni wun’wana lowu hi bindzraka na wu nga faneleki. Muxaka lowo wa ntsrhwalu wu nga ha hi heta ntamu wu tlhela wu hi kazralisa. Xileswo, loko ha ha djula ku tama hi tiyisela hi fanela ku kambisisa leswaku a hi na yone yin’we ya mintsrhwalu yoleyo hi va hi yi txukumeta hi ku kahlula. Kambe ku ni mintsrhwalu leyi hi fanelaka ku yi zrwala. Nakone hi fanela ku swi yentxa hikusa loko ho yentxa leswi hambaniki swi ta fana ni loko hi tsrhika ku tsrutsruma.—2 Tim. 2:5. Xihondzro Xa Ku Zrindzra 08/2023 p. 26 §§ 1-2

Ku va lava nabyaliki swi ta tlhela swi hi pfuna ku hlonipha mavonela ya van’wana. Hi xikombiso, vamakwezru van’wana va xisati va swi zrandzra ngopfu ku tipenda kambe van’wana a va swi zrandzri. Vamakwezru van’wana va swi zrandzra ku nwa hi mpimu kambe van’wana ni byitsrongo a va nwi nakone hinkwezru ha swi djula ku va ni lihanyu dzrinene kambe hi hlawula tindlela ta ku siyanasiyana akuva hi dzri bekisa. Loko hi yanakanya leswaku minkama hinkwayu hi yentxa leswi nga swone ni ku zama ku kutxa van’wana ku yentxa leswi hi swi yentxaka swi nga ha ndzruluka xikhunguvanyiso ka van’wana ni ku vanga ku yavana a bandleni. (1 Kor. 8:9; 10:23, 24) Hi xikombiso, a matsrhan’wini ya kuva Yehovha a hi byela leswaku hi fanela ku yambala mpahla ya matsrhamela muni, a hi nyika minsinya ya milawu akuva hi yi landzra. Hine hi fanela ku yambala hi ndlela leyi yisaka lidzrumu ka Xikwembu Nkulukumba, hi yanakanyela, hi dzringanisela ni “hi ku tikhoma”. (1 Tim. 2:9, 10) Hine a hi djuli ku kokela yingiso ka ndlela leyi hi yambalaka ha yone. A minsinya ya milawu ya Bibele yi nga tlhela yi pfuna vakulu kuva va nga beki swinawanawana mayelanu ni ndlela ya ku yambala ni ku tilungisa. Xihondzro Xa Ku Zrindzra 07/2023 pp. 23-24 §§ 13-14

Yehovha a hi komba ndlela leyi hi nga vaka ni wumundzruku lebyi nyonxisaka ha yone. Lava va pfumelaka xizrambu xa ‘wansati wa vuphukuphuku’ vo hanyela bya namunhla. A bindzru hi leswaku, a mahanyela lawo ma ta va yentxa va ya ku ‘yeteni ka Sheol’. (Amapr. 9:13, 17, 18) Kambe lava yamukelaka xizrambu xa wansati wa ku tlhazriha kumbe ‘vutlhazri’ bya ntiyiso, va kuma mabindzru ya ku nyonxisa! (Amapr. 9:1) Loko hi yentxa leswo, hi ta va na hi dondzra ku zrandzra leswi Yehovha a swi zrandzraka ni ku nyenya leswi a swi nyenyaka. (Amaps. 97:10) Nakone ha nyonxa hi ku zramba van’wana akuva na vone va dondzra hi ‘vutlhazri’ bya ntiyiso. Swo fana ni loko hi zrezra a mimbangwini leyi tlakukiki ya doropa hi ku: ‘Mani na mani lweyi a pfumalaka vutivi a a hambukele halenu!’ Nakone a mabindzru yezru ni ya lava va yamukelaka xizrambu i ya hi lani ku nga helikiki. Nakone ma hi pfuna ku ‘hanya hi lani ku nga helikiki’ na hi ‘famba a ndleleni ya ku yingelisisa’.—Amapr. 9:3, 4, 6. Xihondzro Xa Ku Zrindzra 06/2023 p. 24 §§ 17-18

Xana u titwisa kuyini loko mudondzrikuloni kumbe mutizrikuloni a ku hamba swivutiso mayelanu ni leswi hi swi kholwaka? Xana u khomiwa hi ku txhava? Ntalu wezru ha txhava. Kambe swivutiso swa ku fana ni leswo swi hi pfuna ku tiva leswi mhunu yelweyo a swi pimisaka swi tlhela swi hi nyika mukhandlu wa ku vulavula hi madzrungula lamanene. Kambe minkama yimbeni, vhanu va hi hamba swivutiso leswo akuva va hi holovisa. Leswo a swi hi hlamalisi. Vanyingi va yingela madzrimi mayelanu ni leswi hi swi kholwaka. (Mint. 28:22) Leswo a swi hi hlamalisi hikusa hi hanya a “masikwini ya wugamu” lani vhanu vanyingi va “kalaka va nga djuli ntwananu” nakone “va levaka”. (2 Tim. 3:1, 3) N’waninkama u nga ha tivutisa leswi: ‘Xana ni nga tama ni kombisa wunene hi ndlela yini loko mhunu a djula ku ni holovisa hi kola ka leswi ni swi kholwaka?’ Xana wa swi tiva leswi nga ku pfunaka? I ku va ni moya wa ku zrula. Mhunu lweyi a zruliki a nga na xikwatisana, a matsrhan’wini ya leswo awa swi kota ku tama a zrula nambiloko a pfukiwa kumbe loko a nga tiyiseki hi leswi a taka swi hlaya. Xihondzro Xa Ku Zrindzra 09/2023 p. 14 §§ 1-2

Minkama yin’wana nhlengeletanu yi hi nyika switsratsriyo leswi hi sizrelelaka. Hi xikombiso, hi biwa ndleve ka ku zrandzra mali ni ku yentxa mintxhumu leyi nga hi sivelaka ku yingiseta milawu ya Yehovha. (Eza. 48:17, 18; 1 Tim. 6:9, 10) Handle ka ku ganaganeka, Yehovha a ta tama a tizrisa vhanu va nyama akuva va nyikela minkongomiso ka nhlomulo lowukulu ni ka Mfumu wa 1.000 wa malembe. Xana hi ta tama hi landzra nkongomiso lowo? Swi ta hi nabyalela loko ku sukela swoswi hi landzra nkongomiso wa Yehovha. Xileswo, a hi tameni hi landzra minkongomiso ya Yehovha, ku patsra ni leyi a hi nyikaka hi ku tizrisa vavanuna lava hi zrangelaka. (Eza. 32:1, 2; Heb. 13:17) Nkama lowu hi yentxaka leswo, hi ta va ni swivangelo leswi twalaka swa ku dumba Mukongomisi wezru Yehovha, yene a hi yentxa hi fambela kule ni mintxhumu leyi nga ha honaka wuxaka byezru na yene a tlhela a hi kongomisa ka wutomi lebyi nga helikiki. Xihondzro Xa Ku Zrindzra 02/2024 p. 25 §§ 17-18

Mupostola Pawulo a nyonxe ngopfu hi ku tizrela Yehovha. Kambe a hi minkama hinkwayu a swi mu nabyalela. Pawulo a a fanela ku yendzra mimpfhuka ya ku leha, kambe a nkameni wake a swi nga nabyali ku yendzra hikusa minkama yin’wana a “ve tinghozini tinyingi ta milambu” ni “ta vayivi”. Nakone makhambi man’wana Pawulo a biwile. (2 Kor. 11:23-27) Hi tlhelo dzrin’wana, a hi minkama hinkwayu vamakwavu a va kombisa ku tlangela ku tikazrata kwavu akuva va va pfuna (2 Kor. 10:10; Filp. 4:15) I yini lexi pfuniki Pawulo ku tama a tizrela Yehovha? Pawulo a dondzre ngopfu hi wumhunhu bya Yehovha ka Matsralwa ni ka mfambu lowu a viki na yone a wuton’wini. Yene a a tiyiseka leswaku Yehovha Xikwembu Nkulukumba a a mu zrandzra. (Rom. 8:38, 39; Efe. 2:4, 5) Leswo swi mu yentxe a ya a mu zrandzra ngopfu Yehovha. Pawulo a kombise lizrandzru dzrake ha Yehovha hi ku “tizrela vaxwengi ni ku tama a va tizrela”.—Heb. 6:10. Xihondzro Xa Ku Zrindzra 07/2023 p. 9 §§ 5-6

Vhanu vanyingi va swi twisisia leswaku hi vilela a mimfumu ni leswaku yin’wana ya milawu leyi bekiwaka hi “wuhosi” ya pfuna. Kambe vhanu volava va van’we va tlhela va yala ku yingiseta milawu yoleyo loko va nga yi zrandzri kumbe va vona ingiki a yi twisiseki. A Bibele dzri hlaya leswaku mimfumu ya vhanu yi vanga ku xaniseka, yi kongomisiwa hi Sathana nakone ku nga li khale yi ta helisiwa. (Amaps. 110:5, 6; Ekles. 8:9; Luk. 4:5, 6) A Bibele dzri tlhela dzri ku: “Lweyi a yalaka ku yingiseta wuhosi a lwisana ni lulamiselo dzra Xikwembu Nkulukumba.” Swoswi Yehovha a ha pfumelela mimfumo leswaku yi tama yi va kone akuva mintxhumu yi famba ha hombe nakone a djula leswaku hine hi yi yingiseta. Xileswo, hi fanela ku “nyika hinkwavu leswi swi va fanelaka”, leswo swi patsra tinemba, xihlonipho, ni ku yingiseta. (Rom. 13:1-7) Minkama yin’wana hi nga ha vona ingiki milawu yin’wana a yi twali, kumbe yi hi bindzrela kuva hi yi yingiseta. Kambe hine hi yingiseta Yehovha nakone a hi byela leswaku hi fanela ku yingiseta wuhosi. Hi ngo kala hi nga byi yingiseti ntsena loko byi djula leswaku hi yentxa mintxhumu leyi lwisanaka ni minkongomiso ya Yehovha.—Mint. 5:29. Xihondzro Xa Ku Zrindzra 10/2023 p. 8 §§ 9-10

Nkama lowu Samisoni a pswaliwiki ha wone, a Vaisrayele a va hluphiwa ngopfu hi Vafilista. (Abaṭ. 13:1) Vafilista a va li vhanu va tihanyi ngopfu swinene xileswo Vaisrayele va hlupheke ngopfu a mavokweni yavu. Yehovha a hlawule Samisoni akuva a ‘huluxa Israyele a mavokweni ya Vafilista’. (Abaṭ. 13:5) Akuva Samisoni a kota ku hetisisa xiyavelo lexo, a swi ta djula kuva a dumba Yehovha. Khambi dzrin’wana, a ntlawa wa masotxha ya Vafilista wu ye a Lei, lomu kumbexana a ku kumeka Yuda, akuva wu ya khoma Samisoni. Ku yentxeke yini? A vavanuna va le Yuda va khomiwe hi ntxhavu, kutani va teke xiboho xa kuva va nyikela Samisoni ka valala. Va mu khome va mu tsrimba hi mapindzra mabindzri lamampshwa va mu nyikela ka Vafilista. (Abaṭ. 15:9-13) Kambe ‘a moya wa [Yehovha] wu mu tata hi ntamu’ kutani Samisoni a tsrema mapindzra. Hi lanu Samisoni a nga ‘vona lihlaya dzra mbogolo ledzri afaka dzri nga si na woma’, kutani a nalavuta voko a dzri teka, a va a dlaya 1000 wa Vafilista ha dzrone!—Abaṭ. 15:14-16. Xihondzro Xa Ku Zrindzra 09/2023 p. 2 §§ 3-4

Yehovha a hi byele switsrongo mayelanu ni “nkongometo wake lowu nga helikiki” lowu nga Bibeleni. Hi ndlela ya kukazri, Yehovha minkama hinkwayu awa swi kota ku yentxa leswi a swi djulaka hikusa ‘a yentxe mintxhumu hinkwayu a makungwini yakwe’. (Amapr. 16:4) Nakone hinkwaswu leswi a swi yentxaka swi tsrhama hi lani ku nga helikiki. Kambe he dzrini kungu dzra Yehovha nakone i yini leswi a swi yentxiki akuva kungu ledzro dzri hetiseka? Xikwembu Nkulukumba a byeli vatekani va ku sungula leswaku he wini nkongometo wake. Xikwembu Nkulukumba a te: ‘Belekanani n’wi yadzra, n’wi tata misava, n’wi mi hlula, . . . ni hinkwaswo leswi hanyaka leswi fambaka a misaveni.’ (Gen. 1:28) Leswi Adamu na Eva va kalaka va nga yingisetanga, vhanu hinkwavu a misaveni va ndzruluke vadohi, kambe leswo a swi txintxanga nkongometo wa Yehovha. Kambe e txintxa ntsena ndlela leyi nkongometo lowo a wu ta hetiseka ha yone. Hi ku kahlula, Yehovha a bekise Mfumu a matilweni lowu taka hetisisa nkongometo wake wa ku sungula mayelanu ni vhanu lani misaveni.—Mat. 25:34. Xihondzro Xa Ku Zrindzra 10/2023 p. 20 §§ 6-7

Yehovha a nga hi pfuna ku tiyisela. I ntiyiso leswaku a swi nabyali ku tiyisela, ngopfungopfu loko hi ni malembe na hi lwisana ni ku tsrana ka kukazri. Minkama yin’wana ku tsrana kwezru ku nga ha va swikazratu swikulu ku tlula leswi mupostola Petro a lavisaniki na swone, kambe Yehovha a nga hi nyika ntamu lowu hi wu vilelaka akuva hi nga kazrali. (Amaps. 94:18, 19) Hi xikombiso, vona mfambu wa makwezru lweyi khale na a nge si dondzra ntiyiso a a hanya wutomi bya wu gay. A txintxe hi ku helela wutomi byake nakone a sungule ku hanya hi ku pfumelelana ni leswi Bibele dzri swi dondzrisaka. Nambitanu, minkama yin’wana a fanela ku lwisana ni ku navela ka ku biha. Kambe i yini lexi mu pfunaka ku tama a tiyisela? Yene a li: “Yehovha awa ni tiyisa. Hi mpfunu wa moya lowu wa ku xwenga . . . ni dondzre leswaku swa koteka ku tama ni famba a ndleleni ya ntiyiso nakone nambi leswi ni lwisanaka ni ku kala ku hetiseka, Yehovha awa ni tizrisa nakone a tama a ni tiyisa.” Xihondzro Xa Ku Zrindzra 09/2023 p. 23 § 12

Madjaha, swi djula ku tikazrata akuva mi va vakriste lava wupfiki. U fanela ku yetisela swikombiso leswinene, ku txutxela wuswikoti bya ku tlhavukanya, ku dumbeka, ku dondzrela ntizro lowu taka ku pfuna wuton’wini ni ku tilulamisela ku kuma wutiyanguleli a nkameni lowu taka. Swi nga yentxeka u vilela, ntsena hi ku yanakanya wutiyanguleli lebyi u taka va na byone a nkameni lowu taka. Kambe u ta swi kota. Dzrimuka leswaku Yehovha a swi djula ngopfu ku ku pfuna. (Eza. 41:10, 13) I ntiyiso leswaku, vamakwezru a bandleni na vone va ta ku pfuna. Loko u va wanuna lweyi Yehovha a djulaka leswaku u va yene, wutomi byaku byi ta nyonxisa swinene. N’wine madjaha, hi mi zrandzra ngopfu swinene! Nakone mi nga tiyiseka leswaku Yehovha a ta mi tovokisa loko mi tikazratela ku va vakriste lava wupfiki. Xihondzro Xa Ku Zrindzra 12/2023 p. 29 §§ 19-20

Pimisa hi loko u le ka xinkhubyana ni ntlawa wa kukazri wa vamakwezru na mi tikholisa, mi gama mi susa mifoto hi ntlawa. Swi nga ha yentxeka mi susa mifoto yizrazru ku yentxela leswaku loko dzrin’we dzri nga mi nyonxisanga mi ta sala ni leyimbeni. Kutani swoswi u ni mifoto yizrazru kambe ka dzrin’we dzra wone u xiye leswaku a wuso bya makwezru wa kukazri a byi humanga ha hombe. Nakunene u nga dzri tima mufoto wolowo hikusa wa ha ni yibidzri nakone ka mifoto yoleyo wene ku patsra ni makwezru lweyo, mi le ku hlekeni nakone mi hume ha hombe. Handle ka ku ganaganeka, a ve minkama ya ku nyonxisa leyi u viki na yone ni vamakwezru, kambe swi nga yentxeka ka swiyimu swoleswo ku veni makwezru wa kukazri lweyi a hlayiki ntxhumu wa kukazri lowu kalaka wu nga ku nyonxisanga. A wu ta yentxa yini ntsrhaku ka ku dzrimuka leswo? Ha yini u nga swi tsrhiki swi khaluta hi lani u timiki hakone mufoto lowu kalaka wu nga humanga ha hombe? (Efe. 4:32) Yanakanyisisa hi minkama ya ku nyonxisa leyi u viki na yone ni mhunu lweyo. A minkama leyo ya ku nyonxisa, hi yone hi djulaka ku yi bekisa. Xihondzro Xa Ku Zrindzra 11/2023 pp. 12-13 §§ 16-17

Mazritu ya xigriki lama tizrisiwiki lani ma kombisa leswaku wansati a fanela ku yambala hi ndlela leyinene ni ku kombisa leswaku a yanakanyela matitwela ni mapimisela ya vhanu vambeni. Ha tikhuza hi vamakwezru va xisati lava yingisetaka xitsratsriyo lexi nakone va yambalaka hi ndlela leyinene! Wuswikoti bya ku yanakanya i tsrhamela dzrin’wana ledzi vakriste va xisati lava wupfiki va fanelaka ku va na dzrone. Kambe, i yini wuswikoti bya ku yanakanya? I wuswikoti bya ku hambanisa leswinene ka leswi bihiki, u va u hlawula ku yentxa leswinene. Vona xikombiso xa Abigayeli. Nuna wake a teke xiboho xa ku biha lexi a xi ta peta ndangu wake hinkwawu a nghozini kun’we ni hinkwavu lava a va mu tizrela. Kambe leswi Abigayeli a a ni wuswikoti bya ku yanakanya, hi ku kahlula a teke xiboho lexi huluxiki wutomi bya vhanu vanyingi. (1 Sam. 25:14-23, 32-35) Wuswikoti bya ku yanakanya byi nga tlhela byi hi pfuna ku tiva nkama wa ku vulavula ni nkama wa ku miyela. Nakone byi nga hi pfuna kuva hi zron’weka hi vhanu van’wana, kambe na hi nga ti peti ka timhaka tavu.—1 Tes. 4:11. Xihondzro Xa Ku Zrindzra 12/2023 p. 20 §§ 8-9

Mupostola Pawulo a tsralele bandla dzra le Roma mazritu lawo. Vamakwezru va bandla ledzro a va dondzre ntiyiso mayelanu na Yehovha na Yesu, va kombise lipfumelo nakone va ve vakriste. Xileswo, Xikwembu Nkulukumba a va vone na va “li lava lulamiki hi kola ka lipfumelo [dzravu]” nakone a va tote hi moya wa ku xwenga. (Rom. 5:1) A va ta yimela ku yamukela hakelo dzra ku nyonxisa nakone a va tiyiseka leswaku nakunene swi ta yentxeka. Pawulo a game a tsralela vakriste lava totiwiki va le Efesa mayelanu ni dumbo ledzri a va dzri yamukelile. A dumbo ledzro a dzri patsra ku yamukela mintxhumu ‘leyi dumbisiwiki vaxwengi’. (Efe. 1:18) Nakone loko a tsralela va le Kolosa, Pawulo a kombise lomu vakriste lava totiwiki a va ta yamukela hakelo dzravu kone. A hlaye leswaku a ku li “dumbo ledzri [va] bekiseliwiki dzrone a tilweni”. (Kol. 1:4, 5) Kutani a dumbo dzra lava totiwiki i dzra leswaku va kuma wutomi lebyi nga helikiki a tilweni lani va taka fuma na Kriste.—1 Tes. 4:13-17; Mpful. 20:6. Xihondzro Xa Ku Zrindzra 12/2023 p. 9 §§ 4-5

A zritu ledzri liki “ku bekisa” dzri tizrisiwe loko ku khaneliwa hi masotxha lawa a ma bekisa doropa ni ku dzri sizrelela ka minhlaselo. Lava a va tsrhama ka doropa dzroledzro a va yetlela hi ku zrula hikusa a va sizrelelekile hi ku tiva leswaku a masotxha a ma yime swipfalwini ma zrindzra. Hi ndlela leyi fanaka, ku zrula ka Xikwembu Nkulukumba ku bekisa mbilu yezru ni miyanakanyu yezru, leswo swi hi yentxa hi va ni ku zrula hikusa ha swi tiva leswaku hi sizrelelekile. (Amaps. 4:8) Ku fana na Ana, nambiloko swiyimu swezru swi nga txintxi hi nkama wolowo, hi nga va ni ku zrula ka kukazri. (1 Sam. 1:16-18) Nakone minkama yinyingi, loko hi titwa hi zrulile, hi xiya leswaku swa nabyala ku yanakanya hi ndlela leyinene ni ku teka swiboho. Hi nga yentxa? Loko u kazratekile, vitana ‘mubekisi’. Hi ndlela yini? Khongota swi phela lakakuva u kuma ku zrula ka Xikwembu Nkulukumba. (Luk. 11:9; 1 Tes. 5:17) Loko u lavisana ni swikazratu, phikelela a ku khongoteni, xileswo u ta kuma ku zrula ka Yehovha nkama lowu ku bekisaka mbilu ni miyanakanyu yaku.—Rom. 12:12. Xihondzro Xa Ku Zrindzra 01/2024 p. 21 §§ 5-6

Akuva Yesu a xwengisa vito dzra Papayi wake, swi djule kuva a tiyiselela ku biwa, ku zrukiwa ni ku lumbetiwa. A a swi tiva leswaku a mu yingisetile Papayi wake ka hinwaswu; a ku nge na lexi a xi ta mu khomisa tingana. (Heb. 12:2) Nakone a a swi tiva leswaku Sathana a o mu hlasela hi ku kongoma ka swiyimo leswiyani swa ku kazrata. (Luk. 22:2-4; 23:33, 34) Sathana a a djula ku yentxa hinkwaswu leswi a a ta swi kota akuva Yesu a nga dumbeki, kambe a nga swi kotanga. Yesu a kombise leswaku Sathana i muhembi lweyi a nga ni tihanyi, ni leswaku Yehovha a ni malandzra ya ku dumbeka lama tamaka ma mu tizrela hi ku dumbeka nambiloko ma kumana ni swiyimo swa ku kazrata! Xana u djula ku nyonxisa hosi yaku Yesu? Kutani, yana mahlweni u dzrumisa vito dzra Yehovha hi ku pfuna van’wana kuva va dondzra hi matsrhamela ya ku xonga ya Xikwembu Nkulukumba wezru. Loko u yentxa leswo u va na u landzrelisisa ha hombe minkondzro ya Yesu. (1 Pet. 2:21) Ku fana na Yesu, u ta nyonxisa Yehovha ni ku kombisa leswaku nala wake, Sathana, i muhembi lwenkulu! Xihondzro Xa Ku Zrindzra 02/2024 pp. 11-12 §§ 11-13

Ka ntlhanu wa malembe lama khalutiki, ku tlula 1.000.000 wa vhanu va babatisiwile swanga Timboni ta Yehovha. Loko mhunu a tinyiketela ka Yehovha, a hlawula ku va mudondzrisiwa wa Yesu Kriste nakone a zrangisa ku zrandzra ka Xikwembu Nkulukumba a wuton’wini byake. Xana swi patsra yini ku tinyiketela ka wukriste? Yesu a te: “Loko mhunu a djula ku ni landzrela, a a tiyale.” (Mat. 16:24) Swanga nandzra lweyi a tinyiketeliki ka Yehovha, u fanela ku yala ntxhumu wun’wana ni wun’wana lowu nga ha honaka wuxaka byaku na yene. (2 Kor. 5:14, 15) Leswo swi patsra ku yala ku yentxa “mintizro ya nyama” ya ku fana ni ku tikhoma hi ndlela ya ku biha hi tlhelo dzra tinkuku. (Gal. 5:19-21; 1 Kor. 6:18) Xana ku yingiseta Yehovha swi bindzrisa wutomi byaku? Loko u mu zrandzra Yehovha nakone u tiyiseka leswaku milawu yake ya ku pfuna a swi nge ti ku kazratela.—Amaps. 119:97; Eza. 48:17, 18. Xihondzro Xa Ku Zrindzra 03/2024 p. 2 § 1; p. 3 § 4

Yehovha a nyika moya wake wa ku xwenga lava a va yamukelaka. (Mat. 12:18) Hi nga ha tivutisa: ‘Xana ku ni mhandzru wa moya lowu ni swi kotaka ku wu kombisa a wuton’wini byanga?’ Xana u swi xiyile leswaku swoswi wa swi kota ku lehisa mbilu ku tlula nkama lowu u nga dondzra ntiyiso ha wone? Nkama lowu u yaka mahlweni u kombisa matsrhamela ya moya wa Xikwembu Nkulukumba, u ta ya u tiyiseka leswaku Yehovha awa ku yamukela! Yehovha a hambe lulamiselo dzra xitizrulo akuva a pfuna lava a va yamukelaka. (1 Tim. 2:5, 6) Kambe loko u nga tiyiseki ke, leswaku Yehovha awa ku yamukela nambiloko u ni lipfumelo ka xitizrulo nakone u babatisiwile? Dzrimuka leswaku a hi minkama hinkwayu hi fanelaka ku tiseketela ka matitwela yezru, kambe hi nga dumba Yehovha. Kwake, lweyi a nga ni lipfumelo ka xitizrulo a mu vona na a li lweyi a lulamiki nakone a dumbisa leswaku a ta mu tovokisa.—Amaps. 5:12; Rom. 3:26. Xihondzro Xa Ku Zrindzra 03/2024 p. 30 § 15; p. 31 § 17