‘A Ku Lwa Ku Le Ku Yehovha’

Hinkwaswu swi sungule a ku heleni ka lembe dzra 1990. A mfumu wa França a wu hakelise Betele dzra França mali leyi a yi nga li nawini ku nga minyikelo leyi a va yi yamukelile hi lembe dzra 1993 ni 1996. Hi dzringise ku lulamisa mhaka leyi hi ku pfuniwa hi matribunali ya França kambe a swi pfunanga ntxhumu. Leswi matribunali lawa ma kalaka ma nga yi khomanga ha hombe mhaka yezru, a mfumu wu hi tekele kolomu ka 4.5 milhões wa maewuro ka konta ya banku ya Betele. Lomu a hi dumbe kone ntsena a a li Tribunali Ledzrikulu dzra Europa. Kambe na hi nge si na yi kambisisa mhaka yezru, a Tribunali dzri hi kombele kuva hi tlhangana ni ntlawa wa vayavanyisi va mfumu kun’we ni muyimeli mun’we wa Tribunali. Nkongometo a a li ku vona leswaku hi nga twanana na hi nga si na teka mhaka hi yi yisa ka Tribunali Ledzrikulu.

A hi yimele kuva muyimeli wa Tribunali a hi kombela leswaku hi hakela mali yitsrongo ka mfumu wa França. Kambe a hi swi tiva leswaku nambi ku hakela ewuro dzrin’we a swi nga fambisani ni minsinya ya milawu ya Bibele. Vamakwezru a va nyikele swihanano leswo akuva va seketela mintizro ya nhlengeletanu, xileswo a mali leyo a yi nga li ya mfumu wa França. (Mat. 22:21) Nambitanu, akuva hi hetisisa swileleto swa Tribunali hi yile ka ntlhanganu lowo.

Hi tlhangane ka sala dzra ku xonga dzra Tribunali ledzro. A tlhanganu lowo wu sungule hi manyala. A muyimeli wa Tribunali dzra Europa loko a sungule ku khanela a hlaye leswaku Timboni ta Yehovha a ti fanela ku hakela tin’we ta tinemba ka mfumu wa França. Swe suketana swi hi byela ku va hi vutisa hi ku: “A u swi tiva leswaku a mfumu kutani wu hi tekele 4.5 milhões wa maewuro ka konta yezru ya banku?”

Loko muyimeli wa Tribunali a twe leswo swi mu khumbile. Kutani loko vayavanyisi va mfumu wa le França va pfumelile leswaku va yi tiva mhaka leyo, a vonela ledzri muyimeli wa Tribunali a a buya na a li na dzrone dzri txintxe hi ku helela. A muyimeli wa Tribunali a va kawukile a tlhela a tekela ku yimisa ntlhanganu hi nkama wolowo. Ni swi xiyile leswaku Yehovha a a txintxe hi ku helela xiyimu lexiyani hi ndlela leyi a hi nge ti txhuka hi yi yanakanya. Hi hume ka ntlhanganu luwani na hi nga tikoti hi ku nyonxa. Phela swi yentxe ingiki a ho lozra.

Hi 30 ka Junyu wa 2011, a Tribunali Ledzrikulu Dzra Europa Dzra Timfanelo Ta Vhanu dzri pfumelelane ka xiboho xin’we, xiboho lexi a xi hi pfuna. A xiboho lexi a xi hlaya leswaku a mali ya tinemba leyi a va hi tekelile a yi nga li nawini nakone swi sindzrise ku va mfumu wu hi tlhelisela mali leyo ni ku tlhela wu hakela ni majuru! A matin’wini ya França, xiboho lexo xa ha tama xi sizrelela a wugandzreli bya ku xwenga ku ta tlhasa ni namunhla. Xivutiso lexiyani xa xin’we xa ku a hi nga xi lulamiselanga hi masiku xi fane ni zribye ledzri kongomiki nhloko ya Goliyati, xivutiso lexo xi txintxe mhaka hinkwayu. Ha yini hi hlulile? Hikusa hi lani Davhida a byeliki Goliyati ha kone, ‘a ku lwa ku le ku Yehovha’.—1 Sam. 17:45-47.

Kambe ledzro a nga vanga khambi dzra ku sungula ledzri hi hluliki a matribunali. Ku ta tlhasa namunhla, nambileswi hi lavisanaka ni ku kanetiwa hi politika ni hi wukhongoti, a matribunali ya makulu ya 70 wa matiko ni matribunali ya ku hambanahambana ya le misaveni hinkwayu, kutani ma yime ni Timboni ta Yehovha ka timhaka leti dzringanaka 1.183 wa tone. Ku hlula loko ka wuyavanyisi ku hi sizrelela ka timfanelo ta ntshima. Hi xikombiso, ta ku fana ni ku gandzrela Yehovha na hi ntsrhunxekile, ku zrezra, ku va hi nga patsreki ka mintlhanganu ya politika ni ku yala ku nyikela kumbe ku txheliwa ngati.

Kambe swi yentxekise kuyini kuva ni va Europa, ni pfunisa ku bekisa timhaka ta wuyavanyisi nakasi a ni tizra a Ntsindzra Wa Misava Hinkwayu wa Timboni ta Yehovha a Estados Unidos?

VAPSWELE VANGA A VA WU ZRANDZRA NTIZRO WA WUZRUMIWA

Vapswele vanga, George na Lucille, va pase ka turma dzra wu 12 dzra xikole xa Giliyadi. Ni pswaliwe hi lembe dzra 1956 na vapswele vanga va tizrela a tikweni dzra Etiópia. Va ni txhule vito dzra ku Filipi na dzri sukela ka Filipi lwe wa muevhangeli wa lembe xidzana dzra ku sungula. (Mint. 21:8) Ka lembe ledzri landzreliki, a mfumu wu yilise ntizro wa Timboni ta Yehovha. Nambileswi a na ha li ntsrongo, ni dzrimuka loko ndangu wanga wu patsreka ka mintizro ya moya a xihundleni. Leswi a na ha li ntsrongwana, hinkwaswu leswi a swi yentxeka a swi ni nyonxisa! Lexi vavisaka, hi 1960 a wuhosi byi hi sindzrise ku huma tikweni.

Swanga ndangu, loko hi tlhase a Wichita, Kansas, a Estados Unidos, vapswele vanga va tame va ha wu zrandzra ntizro wa wuzrumiwa. Va ve ni vana vazrazru, mine, makwezru lwenkulu wa xisati Judy ni makwezru lwentsrongo wa xinuna Leslie. Hi wuzrazru byezru hi pswaliwe a Etiópia. Vapswele vezru a va hanya hi leswi a va swi dondzra nakone va hi dondzrise ku zrandzra Yehovha ni ku mu tizrela hi mbilu hinkwayu. Ni babatisiwe na ni ni 13 wa malembe. Loko ku khalute malembe mazrazru hi zruzrele lomu a ku ni xivileleko lexikulu, a Arequipa a Peru.

Hi 1974 loko ni ni 18 wa malembe, a Betele dzra Peru dzri ni nyike xiyavelo kun’we ni mune wa vamakwezru akuva hi tizra swanga maphayona ya ku hlawuleka. Hi ye zrezra a Cordilheira dos Andes ka nsimu leyi a ku nge si sama ku zrezreliwa ka yone. A xiyavelo lexi a hi nyikiwe xone a xi patsra ku ya zrezrela vhanu lava a va khanela lidzrimi dzra Xiquechuwa ni Xiaymara. A hi famba hi boti dzra motori ledzri hi ku dzri zrandzra hi dzri vitaniki leswaku i ngalawa, hikusa a dzri ni xivumbeko xa ku fana ni bokisi dzra dzrikulu. Na ha dzrimuka loko ni ve ni mabulu ya ku xonga lani a ni komba vhanu leswaku ku nga li khale Yehovha a ta helisa ku xaniseka, mavabyi ni lifu. (Mpful. 21:3, 4) Vhanu vanyingi ka mbangu lowo va ve Timboni ta Yehovha.

NI YAVELIWE KU YA TIZRA A NTSINDZRA WA MISAVA HINKWAYU

Loko makwezru Albert Schroeder lweyi a a li xizro xa Huvo Leyi Zrangelaka ya Timboni ta Yehovha a yendzrele tiko dzra Peru hi 1977, a ni kutxe ku tsrala petisawu ledzri fambisanaka ni ntizro wa Betele dzra ntsindzra wa misava hinkwayu. Ni yentxe swoleswo. Loko ku khalute nkamanyana, hi 17 ka Junyu wa 1977, ni sungule ku tizra a Betele dzra Brooklyn. Ni tizre ka Ndzrawulu Ya Wubasisi Ni Ya Ku Lulamisa Leswi Honekiki ku dzringana 4 wa malembe.

Hi Junyu wa 1978 ni tive Elizabeth Avallone ka kongresu internacional a Nova Orleans a Louisiana. A kulisiwe hi vapswele lava a va tizrela Yehovha hi mbilu hinkwayu ku fana ni vapswele vanga. Elizabeth kutani a a tizra swanga phayona dzra nkama hinkwawu ku dzringana mune wa malembe nakone a ku navela kwake a ku li ku tizrela Yehovha ka ntizro wa nkama hinkwawu wutomi byake hinkwabyu. Ku dzringana nkama lowu hinkwawu a hi bula akuva hi tivana ha hombe ku ya tlhasa lani hi wugamu hi zrandzraniki. Hi txhate hi 20 ka Otubru wa 1979 nakone hi sungule ku tizra a Betele na hi li vatekani.

Vamakwezru va bandla dzra ku sungula ledzri hi viki ka dzrone dzra Xipanyola a Brooklyn va hi yamukele hi timbilu tavu hinkwatu. Loko malembe ma ya ma famba, hi ye tizrela ka mabandla man’wana mazrazru, lani na kone va hi yamukeliki ha hombe, va hi komba lizrandzru ni ku hi seketela ka ntizro wezru wa Betele. Hi wu tlangela ngopfu mpfunu lowu vamakwezru lava va hi kombisiki wone ni ndlela leyi vanghanu kun’we ni maxaka va hi khomiki ha yone akuva hi hlayisa vapswele vezru lava a va kule hi ntanga.

NA NI PFUNISA KU LWELA TIMFANELO TA NHLENGELETANU

Na ni nga swi yimelanga, hi Janeru wa 1982 ni yaveliwe ku ya tizra a Betele ka Ndzrawulu Ya Ta Nawu. Loko ku khalute malembe mazrazru, vamakwezru va ni vutise leswaku ni nga swi kota ku yengesela tidondzro akuva ni va adivhogado. A nkama na ni dondzra, ni gungule leswaku a timfanelo ta nhlengeletanu leti a ti lweliwa a ti nga pfuni ntsena nhlengeletanu kambe a ti pfuna ni vhanu va Estados Unidos ku patsra ni matiko man’wana. A timfanelo leto ta lisima a ti dondzriwa ngopfu a univhersidadi.

Hi 1986 loko ni ni 30 wa malembe, ni yaveliwe ku va mulaviseli wa Ndzrawulu Ya Ta Nawu. Ledzro ku ve tovoko hikusa nambileswi a na ha li ntsrongo a ni swi vona leswaku vamakwezru a va ni dumba kambe na mine a ni titwa na ni ni wutiyanguleli lebyikulu, hikusa a ku nga li xiyavelo xa matlangwana nakone a ni nga si na dondzra swinyingi.

Hi lembe dzra 1988 ni ve adivhogado. Kambe a ni nga yi xiyi ndlela leyi tidondzro leto a ti ni khumba ha yone ku patsra ni wuxaka byanga na Yehovha. A univhersidadi dzri nga yentxa mhunu a tikulisa, a djula ku va ni ndhuma ni ku yentxa mhunu a tivona leswaku i wa lisima ku tlula van’wana ntsena hi leswi a nga ni wutivi. Elizabeth hi yene a ni huluxiki a mhakeni leyi. Hi yene a ni pfuniki ku tlhela ni yentxa leswi a ni swi yentxa na ni nga si na ya a univhersidadi akuva ni kota ku tiyisa wuxaka byanga na Yehovha. Swi teke nkama, kambe hakutsrongokutsrongo ni swi kotile ku pfuxeta wumoya byanga. Ni nga hlaya hi ku kongoma leswaku ku va ni wutivi ngopfu a hi swone swi nga swa lisima a wuton’wini. Leswi yentxaka leswaku a wutomi byi va bya lisima hakakunene i ku va ni wuxaka lebyi tiyiki na Yehovha, u mu zrandzra ni ku zrandzra vamakwezru.

KU LWELA KU SIMEKA MADZRUNGULA LAMANENE HI KU YA HI NAWU

Loko ni hete ku dondzra a univhersidadi, ni beke miyanakanyu yanga a ku seketeleni ka Ndzrawulu Ya Ta Nawu a Betele ni ku lwela swivileleko swa Mfumu wa Xikwembu Nkulukumba a matribunali. A ntizro wanga a wu nyonxisa, kambe hi nkama wu li wun’we a wu li xikazratu hikusa a mintxhumu a yi txintxa hi ku kahlula a nhlengeletanwini. Hi xikombiso, a khale a hi ni xihena xa ku kombela minyikelo ka mabuku yezru. Kambe hi 1990, vamakwezru va kombele nkongomiso ka Ndzrawulu Ya Ta Nawu akuva yi tlhamuxela ha hombe xivangelo xa kuva ku nga ha kombeliwi minyikelo. Hi ku famba ka nkama a Timboni ta Yehovha ti sungule ku nyikela mabuku hi mahala. Leswo swi yampswise ntizro a ndzreni ni le handle ka Betele nakone ku ta tlhasa namunhla leswo swi sizrelela ntizro wezru ka timhaka leti yelanaka ni tinemba. Van’wana a va yanakanya leswaku ku txintxa loko a ku ta yentxa leswaku hi nga ha vi na mali ni ku tlhela swi khumba ntizro wezru wa ku zrezra. Kambe a swi vanga hi ndlela leyo. Ku sukela hi 1990 a nhlayu ya lava tizrelaka Yehovha i yinyingi ngopfu swinene. Nakone namunhla vhanu va nga kuma mabuku na va nga hakelanga ntxhumu. Ni dondzre leswaku a ku txintxa a ndzreni ka nhlengeletanu ya Yehovha ko koteka ntsena hi kola ka mpfunu wake ni hi kola ka nkongomiso lowu hi wu kumaka ka nandzra wa ku dumbeka ni ku tlhazriha.—Eks. 15:2; Mat. 24:45.

A hi hlulanga ku lwela timfanelo ta nhlengeletanu hi leswi hi nga ni vaadivhogado lavanene. Makhambi manyingi, leswi yentxaka leswaku a wuhosi byi hi pfuna swi pfela ka ndlela leyi vhanu va Yehovha va yangulaka ha yone. Ni vone xikombiso xa leswo hi 1998 loko vamakwezru vazrazru va Huvo Leyi Zrangelaka ni vasati vavu va hlalele kongresu dzra ku hlawuleka a Cuba. Va kombise hinkwavu wunene ni ku va hlonipha. A xikombiso xavu xi ve xa lisima ngopfu swinene ku tlula ntlhanganu wun’wana ni wun’wana lowu hi wu yentxiki ni wuhosi akuva hi kombisa leswaku a hi hambi xiyenge ka politika.

Kambe loko a timhaka ta nawu ti nga lulamisiswi hi ndlela ya xinghanu, lanu ke swi djula ku va hi “lwela ni ku simeka madzrungula lamanene hi ku ya hi nawu” a matribunali. (Filp. 1:7) Hi xikombiso, ku dzringana malembe manyingi a wuhosi bya Europa ni bya Coreia do Sul a byi nga pfumeli kuva hi yentxa mintizro yimbeni leyi a yi ta pfaleta kuva hi nga yi a wusotxhweni. Hi kola ka leswo, kolomu ka 18.000 wa vamakwezru a Europa ni ku tlula 19.000 wa vamakwezru va Coreia do Sul va pfaleliwe djele hi kola ka leswi va yaliki ku ya a wusotxhweni hi ku hlonipha lipfalu dzravu ledzri dondzrisiwiki.

Hi wugamu hi 7 ka Julhu wa 2011, a Tribunali Ledzrikulu Dzra Europa a matin’wini hinkwawu dzri teke xiboho a mhakeni ya Bayatyan ni Armênia ku nga xiboho xa leswaku a Europa hinkwaku ku va ni ntizro lowu taka pfaleta ntizro wa ku ya a wusotxhweni. Tribunali dzra le Coreia Ledzri Lwelaka Timhaka ta Tiko dzri teke xiboho lexi fanaka hi 28 ka Junyu wa 2018. Loko van’we ka vampshwa vezru a vo kala va nga tiyiselanga a mhakeni ya ku patsreka ka politika, a swiboho leswi swa lisima inaka swi nga tekiwanga.

A Tindzrawulo Ta Nawu ni Ntsindzra Wa Misava Hinkwayu ku patsra ni Mabetele ya misava hinkwayu swi tizra wusiku ni nhlikanhi akuva swi lwela mfanelo yezru ya ku gandzrela Yehovha ni ku zrezra madzrungula lamanene ya Mfumu. I tovoko dzrikulu akuva hi kota ku yimela vamakwezru lava lwisanaka ni ku kanetiwa hi wuhosi. Nambiloko hi nga yi hluli mhaka ya kukazri, hi nyikela wumboni ka vagovhernadori, ka vafumi ni matiko. (Mat. 10:18) A vayavanyisi, vayimeli va wuhosi, vajornalixta ni vhanu hinkwavu va ti vona tindzrimana leti hi ti tsralaka ka mapapela yezru va tlhela va twa ni leti hi yentxaka hi ku ti hlaya loko va hi thethisa. Vhanu vanyingi lava nga ni timbilu letinene va dondzra leswaku Timboni ta Yehovha i vamani ni leswaku leswi hi swi dondzraka swi sukela kwini. Van’we vavu va ndzruluke va va vamakwezru.

KHANIMAMBU YEHOVHA!

Ka 40 wa malembe lama khalutiki ni ve ni tovoko dzra ku tizrisana ni Mabetele ya misava hinkwayu mayelanu ni timhaka ta nawu ni tlhela ni ya ka matribunali lamakulu ni va ni yima mahlweni ka vhanu va xiyimu xa le henhla. Na va zrandzra vamakwezru ni tlhela ni nyonxa hi vamakwezru lava tizraka na mine ka Ndzrawulu Ya Ta Nawu Ya Ntsindzra Wa Misava Hinkwayu. Ni titwa na ni yanelisekile a wuton’wini byanga nakone ni kume matovoko manyingi.

Ku khaluta 45 wa malembe na hi li xikan’we ni nkatanga Elizabeth lweyi a dumbekaka a tlhela a zrandzreka. Minkama hinkwayu ya ku nyonxisa ni ya ku kazrata ni mu hlamala ngopfu ni tlhela ni mu khensa hikusa a yentxe hinkwaswu leswi na a ni mavabyi lawa ma mu hetaka ntamu.

A wuton’wini byezru hi dondzre leswaku akuva hi humelela a swi le ntan’wini wezru, hi lani Davhida a hlayiki ha kone a ku: ‘Yehovha i ntamu wa tiko dzrakwe.’ (Amaps. 28:8) Nakunene, ‘a ku lwa ku le ku Yehovha’.